Formaður Verkalýðsfélags Akraness og Aðalsteinn Baldursson, formaður Framsýnar stéttarfélags á Húsavík voru í útvarpsviðtali í Íslandi í bítið í morgun þar sem skýrsla Rannsóknarnefndar Alþingis var til umfjöllunar.

Fram kom í máli formanns félagsins að honum væri það minnistætt þegar verið var að ganga frá kjarasamningi á hinum almenna vinnumarkaði árið 2008, þá heyrðust varnaðarorð frá greiningardeildum bankanna. Byggðust þau varnaðarorð á því að launafólk þyrfti að semja með hófstilltum hætti til að ná tökum á verðbólgunni og stuðla að stöðugleika til lengri tíma litið.

Þetta sögðu snillingarnir sem voru í greiningardeildum bankanna í byrjun árs 2008, með öðrum orðum var aðalmálið hjá þeim að vara verkalýðshreyfinguna við að fara fram á miklar launabætur til handa sínu fólki. Á sama tíma var verið að ræna bankana innan frá en aðaláhyggjur greiningadeildanna voru launahækkanir verkafólks.

Græðgin var allsráðandi í bankakerfinu og nægir að nefna eins og fram kemur í rannsóknarskýrslunni að ráðningarsamningur Lárusar Welding var metinn á 5,1 milljarð króna. Ekki má gleyma launakjörum Bjarna Ármannssonar en á árinu 2004 var hann með 9 milljónir á mánuði en einungis þremur árum seinna voru launin orðin 50 milljónir á mánuði. Þetta kallar maður alvöru starfsaldurshækkun.

Krafan er skýr frá íslensku verkafólki: að þeir aðilar sem bera ábyrgð á þessum hlutum verði látnir sæta þeirri ábyrgð og það eins fljótt og kostur er. Grundvallaratriðið er að eigur þessara manna sem bera ábyrgð á þessu verði frystar hið snarasta á meðan á rannsókninni stendur. Það er óþolandi að verða vitni að því eins og fram kemur í rannsóknarskýrslunni að Lárus Welding tæmdi bankareikning sinn, 318 milljónir, á sama tíma og hann sagði við alþjóð að allt væri í stakasta lagi í bankanum. Þetta gerðu Elín Sigfúsdóttir og Sigurjón Þ. Árnason, bankastjórar hjá Landsbankanum einnig en þau komu greiðslum í séreignalífeyrissjóðum sínum í skjól. Fram kemur einnig í rannsóknarskýrslunni að margir af æðstu stjórnendum bankanna hafi verið að setja eigur sínar yfir á maka sína, augljóslega til að reyna að skjóta einhverju undan.

Í dag er síðasti skiladagur umsókna um orlofshús Verkalýðsfélags Akraness sumarið 2010. Hægt er að skila á opnunartíma skrifstofu til kl. 16:00. Einnig verður hægt að skila á félagavefnum til miðnættis í kvöld.

Starfsfólk skrifstofu mun í fyrramálið hefjast handa við frágang úthlutunar. Allar umsóknir verða skráðar inn í orlofshúsakerfi félagsins sem raðar þeim upp í röð eftir punktastöðu félagsmanns og úthlutar eftir því. Ef vel gengur verður þessari vinnu lokið á miðvikudag og þá verður öllum umsækjendum sent bréf, hvort sem þeir fá úthlutað eður ei.

Fái félagsmaður úthlutað skal hann ganga frá greiðslu eigi síðar en 23. apríl. Hægt er að greiða á skrifstofu félagsins, með millifærslu í banka, eða greiða með korti á félagavefnum.

Forsvarsmenn Norðuráls hafa óskað eftir því að samningafundinum sem ríkissáttasemjari var búinn að boða til nk. mánudag verði frestað fram til miðvikudags.

Ástæðan er sú að þeir segjast þurfa meiri tíma til að svara efnislega þeim kröfum sem stéttarfélögin hafa sett fram.  Það er ríkissáttasemjari einn sem getur heimilað slíka frestun þar sem hann sem stjórnar alfarið viðræðum og fundartímum. Sáttasemjari hefur samþykkt að fresta fundi fram á miðvikudag.

Það er því ljóst að algjör úrslitastund mun renna upp í þessum kjaraviðræðum á miðvikudaginn kemur og vonandi fara forsvarsmenn Norðuráls að sýna meiri samningsvilja en þeir hafa gert hingað til.

Eins og fram hefur komið hér á síðunni var samningafundur í húsakynnum ríkissáttasemjara vegna kjaradeilunnar við Norðurál haldinn í dag. Á fundi, sem haldinn var sl. miðvikudag, lagði samninganefnd stéttarfélaganna fram nýtt tilboð sem forsvarsmenn Norðuráls hafa haft til skoðunar síðan þá. Á fundinum í dag kom svar við tilboði stéttarfélaganna frá forsvarsmönnum Norðuráls. 

Því miður þá ber enn töluvert mikið á milli í launaliðnum á því tilboði sem forsvarsmenn Norðuráls lögðu fram í dag og er morgunljóst að þar er ekki um að ræða jöfnun launakjara við Alcan og Elkem. 

Það eru mikil vonbrigði að forsvarsmenn Norðuráls skuli ekki hafa sýnt meiri samningsvilja á þessum fundi en raunin varð.  Ríkissáttasemjari ákvað að boða til næsta fundar á mánudaginn kemur.

Það er hvellskýrt af hálfu formanns Verkalýðsfélags Akraness að um úrslitatilraun verður að ræða á mánudaginn kemur, hvort deiluaðilar muni ná saman eða ekki. Það kom einnig fram hjá formanni félagsins á fundinum í dag að ekki verður kvikað frá þeirri sanngjörnu kröfu að starfsmenn Norðuráls njóti sambærilegra kjara og starfsbræður þeirra í Alcan og Elkem.  Það er einlæg von formanns félagsins að forsvarsmenn Norðuráls fari að átta sig á því að það eru engar forsendur fyrir því að starfsmenn þeirra njóti ekki sömu kjara og starfsbræður þeirra í Alcan í Straumsvík.

Verkalýðsfélag Akraness mun alls ekki sætta sig við það ef stefna Norðuráls verður sú að gera störf í stóriðjum að láglaunastörfum.  Launakostnaður í Norðuráli var einungis 7% af heildarveltu á árinu 2008 og ljóst að mörg fyrirtæki myndu vilja sjá slíkar tölur í sínum efnahagsreikningum.