Sumarúthlutun orlofshúsa 2026 er lokið þar sem 127 vikum var úthlutað til jafnmargra félagsmanna.

Þær vikur sem eftir standa er nú lausar til leigu og gildir nú "fyrstur kemur - fyrstur fær".

Bókanir fara fram á Mínar síður félagsins og gengið er frá greiðslu við bókun.

Verkalýðsfélag Akraness hélt fræðsludag fyrir trúnaðarmenn félagsins í gær og var mætingin mjög góð. Trúnaðarmenn frá öllum helstu vinnustöðum á félagssvæðinu mættu til leiks, sem undirstrikar sterka stöðu félagsins og mikilvægi þess að viðhalda góðu samstarfi við lykilfólk á vinnumarkaði.

Á fræðsludeginum fóru formaður félagsins og Elín Reynisdóttir, starfsmaður félagsins, ítarlega yfir helstu atriði sem snerta störf trúnaðarmanna. Þar var meðal annars fjallað um réttindi og skyldur á íslenskum vinnumarkaði, kjarasamninga félagsins, hin ýmsu lög er varða launafólk og þau réttindi sem félagsmenn njóta í gegnum aðild að félaginu.

Einnig var lögð sérstök áhersla á innleiðingu nýs félagakerfis sem mun bæta þjónustu og samskipti við félagsmenn á næstu misserum. Umræður voru líflegar og þátttakendur sýndu mikinn áhuga á efninu.

Dagurinn þótti í alla staði vel heppnaður og staðfestir mikilvægi þess að stéttarfélög séu í nánu og virku sambandi við sína trúnaðarmenn. Slík samvinna er lykilatriði í því að tryggja öfluga hagsmunagæslu fyrir félagsmenn og efla starfsemi félagsins til framtíðar.