Á fundum allra stjórna Verkalýðsfélags Akraness í gærkvöldi kynntu endurskoðendur félagsins ársreikninga 2009. Það verður að segjast alveg eins og er að afkoma félagsins var afar góð á síðasta ári þrátt fyrir þær hremmingar sem gengið hafa yfir atvinnu- og efnahagslíf þjóðarinnar.

Sem dæmi þá lækka iðgjaldatekjur ekki á milli ára, þrátt fyrir mikinn samdrátt á vinnumarkaðnum heilt yfir og sýnir það þann styrk sem félagið býr yfir og nokkuð stabílt atvinnuástand. Það er alveg ljóst að veiðar á hval höfðu töluverð áhrif, enda höfðu upp undir 100 manns atvinnu af hvalnum og voru meðaltekjur þeirra sem þar störfuðu yfir 500.000 krónur á mánuði.

Rekstrarafgangur var af öllum sjóðum félagsins, en heildarrekstrarafgangur samstæðunnar nam rúmum 95 milljónum króna. Það er gríðarlegur styrkur í því fyrir Verkalýðsfélag Akraness að afkoman skuli vera jafn góð og raun ber vitni enda hefur stjórn félagsins undanfarin ár aukið við hina ýmsu þjónustu til handa félagsmönnum í ljósi góðrar afkomu. Á það jafnt við um sjúkrasjóð félagsins sem og hina ýmsu möguleika í orlofsmálum, nægir þar að nefna Veiðikort, Útilegukort og gistingu á Edduhótelum. Þetta er ekki hægt að gera nema þegar rekstur félagsins er jafn góður og raun ber vitni um.

Það er allt í lagi að rifja það upp að þegar núverandi stjórn tók við í lok árs 2003, þá var félagið rekið á yfirdrætti. Á þessum rúmum 6 árum hefur núverandi stjórn tekist að snúa rekstri félagsins algerlega við, bæði félagslega og fjárhagslega. Á þessum tíma hefur félagsmönnum líka fjölgað umtalsvert eða um 87%. Þetta sýnir að fólk telur hag sínum vel borgið í sterku og öflugu stéttarfélagi.

Aðalfundur félagsins verður haldinn miðvikudaginn 21. apríl kl. 18:00  í Gamla kaupfélaginu, Kirkjubraut 11, Akranesi. Skorar stjórn félagsins á félagsmenn að mæta, en boðið verður upp á kvöldverð að loknum fundi.

Rétt í þessu var að ljúka samningafundi vegna kjarasamnings Norðuráls og var fundurinn undir handleiðslu ríkissáttasemjara. Samninganefnd stéttarfélaganna lagði fram nýtt tilboð til handa forsvarsmönnum Norðuráls og byggist það tilboð algjörlega á þeim launasamanburði sem samninganefndin hefur unnið að að undanförnu. Í þeim samanburði kemur fram að launamunurinn getur numið nokkrum tugum þúsunda á mánuði í sumum tilfellum.

Forsvarsmenn Norðuráls tóku við tilboðinu og hafa það nú til skoðunar og lagði ríkissáttasemjari fram tillögu um að fresta fundi þar til á föstudaginn en þá munu forsvarsmenn Norðuráls svara tilboði stéttarfélaganna efnislega. Það er gríðarlega mikilvægt að mati formanns Verkalýðsfélags Akraness að samningsaðilar fari að komast að niðurstöðu, einfaldlega vegna þeirrar óþreyju sem eðlilega er farið að gæta meðal starfsmanna fyrirtækisins. Það er einnig mat hans að deiluaðilar þurfi að komast samkomulagi eigi síðar en í byrjun næstu viku en eins og margoft hefur komið fram hér á heimasíðunni þá eru nokkur atriði sem samninganefndin mun ekki hvika frá og eitt þeirra er jöfnun launa við sambærilegar verksmiðjur.

Formaður félagsins ætlar að leyfa sér að vera hóflega bjartsýnn á að lausn á þessari erfiðu deilu finnist í næstu viku, alla vega er það von hans að svo verði.

Á morgun verður samningafundur hjá ríkissáttasemjara vegna kjarasamnings Norðuráls en hálfur mánuður er nú liðinn frá því að fundað var síðast. Það er ljóst að það er farið að gæta verulegrara órþeyju hjá starfsmönnum þannig að það mæðir mikið á samninganefndum deiluaðila að vinna af fullum krafti að lausn þessarar deilu. l

Krafa samningarnefndar stéttarfélaganna er hvellskýr það er að laun verði jöfnuð á við Elkem og Alcan í Straumsvík.  Frá þeirri sanngjörnu kröfu mun formaður Verkalýðsfélags Akraness alls ekki víkja.

Það er óhætt að segja að þeir félagar Eiður Ólafsson og Kristófer Jónsson á Ísak Ak 67 séu að gera ágætis hluti þessa dagana, en þeir komu í land í gær með 26 tunnur af grásleppuhrognum sem gera yfir þrjú tonn af hrognum.

Þeir félagar eru búnir að fá uppundir 12 tonn af hrognum síðan þeir byrjuðu á grásleppuvertíðinni þann 10. mars sl.  Þessi veiði hingað til verður að teljast mjög góð og ekki spillir fyrir að verðið á grásleppuhrognum er í sögulegu hámarki um þessar munir eða um 1000 kr. fyrir kílóið.

Þeir félagar á Ísak Ak kalla ekki allt ömmu sína enda þekktir fyrir harða sjósókn og að vera harðduglegir. Það er alveg morgunljóst að íslenskir sjómenn eru þeir aðilar sem munu hjálpa okkur Íslendingum hvað mest að vinna okkur úr þessum efnahagshremmingum sem nú steðjar að þjóðinni. Það eru jú þeir sem skapa hvað mestar gjaldeyristekjur fyrir þessa þjóð.

Þeir félagar á Ísak Ak tilheyra sjómannadeild Verkalýðsfélags Akraness og er félagið stolt af því að hafa slíka jaxla í félaginu.