Í kvöldfréttum Stöðvar 2 í gær var viðtal við Marinó G. Njálsson hjá Hagsmunasamtökum heimilanna en í viðtalinu sakar hann Steingrím J Sigfússon um afar villandi og hreinan skáldskap í málflutningi sínum varðandi gengistryggðu lánin.  Marinó vitnaði í gögn frá Seðlabankanum sem sýndu að lánasöfn gömlu bankanna voru færð niður um rúm 50% yfir í nýju bankana t.d. voru yfirdráttar lán færð niður um 40% verðtryggð lán um 51% og gengistryggð lán um 58% 

Svo talar fjármálaráðherra um að bankarnir muni vart þola þessa niðurfærslu sem dómur Hæstaréttar kveður á um.

Það hefur verið nöturlegt  að fylgjast með störfum fjármálaráðherra í hinum ýmsu málum að undanförnu og nægir að nefna t.d. ummæli hans í Ísland í bítið í gær en hann segir að með dómnum hafi ákveðinni réttaróvissu verið eytt þó að enn standi eftir réttaróvissa um það hvernig fara eigi með lánin, hvaða vextir eigi að gilda.  Hvaða réttaróvissu er Steingrímur eiginlega að tala um?   Í samningalögum er kveðið á um í 36. grein laganna eftirfarandi:

„Skriflegur samningur, sem atvinnurekandi gefur neytanda kost á, skal vera á skýru og skiljanlegu máli. Komi upp vafi um merkingu samnings sem nefndur er í 1. mgr. 36. gr. a skal túlka samninginn neytandanum í hag".  Samkvæmt þessum lögum á óvissan að falla neytendum í hag.

Hvað sagði ekki Steingrímur J. Sigfússon í fréttum fyrir 19 mánuðum síðan, eða 23. október 2008? Hann sagði að það verði gerð uppreisn hér á landi verði gengið að kröfum Breta og Hollendinga um greiðslu á 600 milljarða króna skuldbindingu vegna Icesave-reikninganna. Hann sagði einnig að Íslendingar hafi uppfyllt allar lagalegar skyldur og tilskipanir Evrópusambandsins um innlánstryggingakerfið og Íslendingum bæri ekki að láta undan kröfum Alþjóðagjaldeyrissjóðsins því okkur beri ekki skylda til að greiða tapið á Icesave-reikningunum.  Þetta sagði Steingrímur J. Sigfússon fyrir rétt rúmum 19 mánuðum síðan. En nú kveður við nýjan tón hjá Steingrími þar sem hann og hans ríkisstjórn hefur haldið uppi skefjalausum hræðsluáróðri um að allt sé hér á leið til fjandans verði ekki gengið frá Icesave-samningunum og að vextir Seðlabankans fái að gildi fyrir gengistryggðu lánin.

Hvað hefur eiginlega gerst hjá Steingrími eftir að hann varð fjármálaráðherra maður sem var froðufellandi í ræðustól Alþingis í hvert sinn sem honum fannst hallað á hagsmuni alþýðu þessa lands.  Í dag getur hann ekki einu sinni staðið með almenningi sem fer fram á að dómur Hæstaréttar fái að standa og óvissan sem fjármálaráðherra er afar tíðrætt um falla neytendum þessa lands í hag eins og lög kveða á um.  Það væri fróðlegt að sjá viðbrögð Steingríms J Sigfússonar ef hann væri í stjórnarandstöðu og önnur ríkisstjórn en hans myndi standa að því að hafa dóm Hæstaréttar að vettugi eins og hans ríkisstjórn stendur nú að og það ríkisstjórn sem kennir sig við norræna verðferð.

Því segir formaður Verkalýðsfélags Akraness: Ragnar Reykás er grátbroslegur í samanburði við þann viðsnúning sem nú hefur orðið hjá Steingrími J Sigfússyni eftir að hann varð fjármálaráðherra.

Mótmæli voru við Seðlabankann í dagYfir 400 manns mættu við Seðlabanka Íslands til að mótmæla þeim tilmælum sem Seðlabankinn og Fjármálaeftirlitið hafa beint til fjármálafyrirtækja. Þar segir að þau skuli miða við lægstu vexti SÍ við endurútreikning lána í íslenskum krónum sem voru gengistryggð. Formaður Verkalýðsfélags Akraness styður þessi mótmæli heilshugar en því miður sá hann sér ekki fært að mæta vegna anna en mun klárlega mæta verði framhald á mótmælum vegna þess ofbeldis sem íslensk stjórnvöld hafa sýnt skuldsettum heimilum að undanförnu.

Eins og áður hefur komið fram hér á heimasíðunni þá er það mat formanns að eðlilegra og réttara hefði verið að dómur hæstaréttar hefði staðið og fjármögnunarfyrirtækin hefðu sótt fyrir dómi önnur vaxtakjör heldur en getið er um í samningunum ef þau telja að brotið hafi verið á þeim. Það er nöturlegt að verða vitni að því hvernig íslensk stjórnvöld taka upp hanskann fyrir fjármögnunarfyrirtæki sem hafa mörg hver hagað sér með dólgslegum hætti gagnvart sínum viðskiptavinum og nú þegar dómur féll sem var hagstæður íslenskum heimilum þá virðist vera að ríkisstjórn Íslands hafi í reykfylltum bakherbergjum unnið að því að fá Seðlabankann og Fjármálaeftirlitið til að senda út áðurnefnd tilmæli. 

Nú tala menn um að þessi dómur sé ekki sanngjarn fyrir fjármögnunarfyrirtækin og á þeirri forsendu hafi þurft að grípa til þessara ráðstafana. Hvað með sanngirnina þegar afskrifaðar voru skuldir til dæmis hjá Ólafi Ólafssyni í Samskip upp á 88 milljarða en eins og einnig hefur komið fram hér á heimasíðunni þá sagði Gylfi Magnússon, efnahags- og viðskiptaráðherra að kostnaður við dóm hæstaréttar væri í kringum 100 milljarðar. Bara þessi eini einstaklingur, Ólafur Ólafsson, hefur fengið afskriftir upp á tæpa 100 milljarða. Að ríkisstjórn sem kennir sig við félagshyggju, velferð, jöfnuð og síðast en ekki síst réttlæti, skuli standa á bakvið þessa herferð gegn íslenskum heimilum er ótrúlegt og í raun og veru lyginni líkast.

Það er gríðarlega mikilvægt að almenningur í þessu landi berjist með kjafti og klóm fyrir því að réttlætið í þessu máli nái fram að ganga og geri þá skýlausu kröfu á íslensk stjórnvöld að þessi tilmæli Seðlabankans og Fjármálaeftirlitsins verði tafarlaust dregin til baka. Við annað verður ekki unað.

Í gær hófust svokallaðir Írskir dagar hér á Akranesi en þeir munu standa yfir alla helgina og verður boðið upp á glæsilega dagskrá eins og undanfarin ár. Það er afar ánægjulegt að fólk hafi nú möguleika á því að skemmta sér á þessum viðburði og gleyma þeim áhyggjum sem mörg heimili glíma nú við sökum þess efnahagsástands sem nú ríkir. Og það er einnig ánægjulegt að fólk geti gleymt þeirri gríðarlegu reiði sem kraumar í æði mörgum sökum þess ofbeldis sem Seðlabankinn, Fjármálaeftirlitið og íslenska ríkisstjórnin hafa sýnt almenningi í kjölfar dóms hæstaréttar vegna gengistryggða lána. Nú er ekkert annað fyrir fólk en að skemmta sér vel um helgina og taka síðan slaginn af fullum þunga við íslensk stjórnvöld vegna áðurnefnds ofbeldis á íslenskum almenningi.

Formaður félagsins hvetur alla til að koma og taka þátt í þeirri dagskrá sem hér er í boði og til að mynda verður hið margrómaða götugrill út um allan bæ í kvöld og á laugardagskvöldið verður stærsta ball sem haldið er á Íslandi ár hvert, svokallað Lopapeysuball, en undanfarin ár hafa fleiri þúsund manns komið á þann viðburð.  

Hægt er að sjá þessa glæsilegu dagskrá sem boðið verður upp á hér.

Framkvæmdastjóri Samtaka atvinnulífsins gerir ekki athugasemdir við ákvörðun Seðlabankastjóra og FjármálaeftirlitsinsSá ótrúlegi atburður er að gerast hér á landi að Seðlabankinn og Fjármálaeftirlitið hafa sent fjármálafyrirtækjum þau tilmæli að þeim beri að endurreikna þau lán sem innihalda gengistryggingarákvæði sem eru óskuldbindandi samanber dóma hæstaréttar. Ekki verði miðað við upphaflega vexti lánanna sem í mörgum tilvikum voru í kringum þrjú prósent, heldur vexti sem Seðlabankinn ákveður með hliðsjón af lægstu vöxtum sem nú gilda á lánamarkaði. Með þessum tilmælum eru þau að hafa dóm hæstaréttar að engu.

Aðilar Seðlabankans og Fjármálaeftirlitsins og einnig einstaka ráðherrar hafa talað um að það þurfi að eyða óvissu varðandi vaxtakjör í þessum lánasamningum. Rétt er að geta þess að á borgarafundi í Iðnó kom það skýrt fram hjá Ragnari Baldurssyni lögmanni sem rak annað dómsmálið fyrir hæstarétti að dómur hæstaréttar væri hvellskýr og menn væru að búa til óvissu. Hann sagði að þeir vextir sem væru tilgreindir í lánasamningunum ættu skýlaust að standa óhaggaðir enda væri dómurinn afar afdráttarlaus.

Það er nöturlegt að verða vitni að því hvernig á að halda áfram að níðast á skuldsettum heimilum þessa lands og ekki undir nokkrum kringumstæðum getur alþýða þessa lands látið þetta átölulaust. Það var viðtal við Vilhjálm Egilsson framkvæmdastjóra Samtaka atvinnulífsins þar sem hann talar með sama hætti og fulltrúar Seðlabankans, fjármálaráðuneytisins og viðskiptaráðherra um að það þurfi að eyða óvissu um gengistryggðu lánin, einfaldlega vegna þess að þau eru hagstæð almenningi þessa lands. Það á að láta neytendur njóta vafans og það eru fjármálastofnanirnar sem eiga að sækja sinn rétt fyrir dómstólum ef þeir telja að vaxtakjörin sem tilgreind eru í samningunum sem eru flestir í kringum 3%, eigi ekki að standa. En í þessum tilmælum sem gefin voru út í morgun er verið að tala um að vextirnir verði 8,25% sem er umtalsvert hærra heldur en getið er um í þeim lánasamningum sem um ræðir.

Verkalýðshreyfingar um víða veröld myndu klárlega grípa til allsherjar aðgerða eins og til dæmis allsherjarverkfalla ef þau yrðu vitni að öðru eins óréttlæti eins og almenningur í þessu landi er að upplifa. Á þeirri forsendu er full ástæða fyrir Alþýðusamband Íslands að beina þeim tilmælum til aðildarfélaga sinna að grípa til róttækra aðgerða vegna þessarar ákvörðunar Seðlabanka Íslands og Fjármálaeftirlitsins þar sem þau skilaboð eru send út að dómar hæstaréttar gildi ekki fyrir fjármálakerfið heldur einungis fyrir sauðsvartan almúgan.

Formaður Verkalýðsfélags Akraness hvetur alþýðu þessa lands til að standa saman og sýna íslenskum stjórnvöldum fulla hörku og það verði ekki liðið að dómar hæstaréttar gildi ekki fyrir alla í þessu landi. Oft hefur verið þörf fyrir samstöðu en nú er nauðsyn.