Þessa dagana standa yfir kynningar á nýgerðum kjarasamningi verkafólks á hinum almenna vinnumarkaði. Á mánudaginn var almennur opinn kynningarfundur á Gamla Kaupfélaginu þar sem farið var mjög ítarlega yfir innihald samningsins. Fjölmargar spurningar voru bornar upp á fundinum en heilt yfir voru fundarmenn nokkuð ásáttir.

Í morgun fengu starfsmenn HB Granda á Akranesi kynningu á samningnum og kom fram á þeim fundi að fólk var nokkuð sátt með innihald samningsins, enda er allt eins líklegt að engin fiskvinnsla á Íslandi sé að fá jafn mikla launahækkun og starfsmenn HB Granda, þar sem Verkalýðsfélag Akraness gekk frá mjög innihaldsríkum bónussamningi sem tók gildi 1. apríl og er eðli málsins samkvæmt hluti af þeirri kjarabaráttu sem átt hefur sér stað að undanförnu. En starfsmenn HB Granda eru að hækka frá kr. 60.000 upp í allt að 88.000 krónur á mánuði frá 1. maí 2015.

Á morgun verður samningurinn kynntur fyrir starfsmönnum Akraborgar, sem er lifrarbræðslufyrirtæki þar sem starfa um 50 manns. Þeir félagsmenn sem óska eftir því að fá kynningu inn á vinnustaði eru hvattir til að hafa samband við skrifstofu félagsins.

Kosning um samninginn er rafræn og eru kjörgögn að berast til félagsmanna þessa dagana, en kosningin hefst á morgun 12. júní. Félagsmenn eru eindregið hvattir til að nýta atkvæðarétt sinn og kjósa um kjarasamninginn. 

Þeir sem eiga eftir að kynna sér innihald samningsins geta haft samband við skrifstofu félagsins. Einnig er vakin athygli á mjög góðum kynningarvef sem SGS hefur látið setja saman um innihald samningsins, þar sem eru upplýsingar á íslensku, ensku og pólsku.

Kynningarvefur SGS um nýja kjarasamninginn (ÍSLENSKA, ENGLISH, POLSKI)

Kynning VLFA fyrir starfsfólk HB Granda

Kynning VLFA fyrir starfsfólk Akraborgar

Kjör fiskvinnslufólks lagast umtalsvert!Nú hefur formaður félagsins lokið við að kynna nýgerðan kjarasamning á hinum almenna vinnumarkaði fyrir þeim félagsmönnum sem óskuðu eftir slíkri kynningu. Langstærstur hluti hópsins sem tekur laun eftir kjarasamningi á almennum vinnumarkaði er fiskvinnslufólk, eða uppundir 50%. Það hefur áður komið fram að Verkalýðsfélag Akraness náði sem betur fer að lagfæra kjör þeirra sem starfa í fiskvinnslu umtalsvert í þessum samningi sem og í sér bónussamningi við HB Granda. Þetta þýðir að laun starfsmanna HB Granda hækka frá 1. maí frá 60 þúsundum á mánuði uppí allt að 88 þúsund og þessar hækkanir gera það að verkum að fiskvinnslufólk er nokkuð sátt við þennan samning, þótt alltaf megi gera betur í að lagfæra kjör félagsmanna.

Rafræn atkvæðagreiðsla um nýjan kjarasamning við Samtök atvinnulífins hófst 12. júní og mun henni ljúka kl. 12:00 þann 22. júní nk. Allir kosningabærir félagsmenn fá kynningarbækling sendan í pósti og ætti hann að berast félagsmönnum á næstu dögum. Í bæklingnum má m.a. finna lykilorð sem þarf að nota þegar greitt er atkvæði. Verkalýðsfélag Akraness hvetur alla félagsmenn sem taka laun eftir kjarasamningum á hinum almenna vinnumarkaði til að nýta kosningarétt sinn og greiða atkvæði um samninginn.

Í tilefni aldarafmælis kosningarréttar kvenna mun Verkalýðsfélag Akraness gefa öllu starfsfólki sínu frí eftir hádegi þann 19. júní og verður skrifstofa félagsins því lokuð frá kl. 12:00 þann dag. Þannig er starfsfólki félagsins gert kleift að sækja hátíðahöld í tilefni dagsins og heiðra minningu þeirra sem börðust fyrir þessum réttindum sem teljast sjálfsögð í dag.

Vegna brýnna erinda verður hægt að ná í formann félagsins í síma 8651294.

Nú eru síðustu forvöð fyrir félagsmenn sem starfa eftir kjarasamningi á almennum vinnumarkaði að kjósa um nýja samninginn sem undirritaður var þann 29. maí síðastliðinn.

Kosningu lýkur á hádegi og eru þeir félagsmenn sem fengu lykilorð sent heim í pósti hvattir til að nýta atkvæðarétt sinn og kjósa. Niðurstaða kosningar verður kynnt síðar í dag.

Smelltu hér til að kjósa.

Í gærkvöldi undirritaði Samiðn fyrir hönd aðildarfélaga sinna nýjan kjarasamning við Samtök atvinnulífsins sem gildir til loka árs 2018, en Verkalýðsfélag Akraness er eitt af aðildarfélögum Samiðnar.

Almennar launahækkanir eru í takt við samninga sem undirritaðir voru 29. maí sl. og voru samþykktir í gær. Almennar launahækkanir eru metnar á um 16% en þær eru breytilegar vegna launaþróunartryggingar. Gerðar eru breytingar á kauptaxtakerfinu. Byrjunartaxti var færður upp í eins árs taxta, öðrum töxtum hliðrað upp en sjö ára taxti fellur út. Þannig hækka byrjunarlaun um rúm 15% strax, en um 30% á samningstímanum. Með breytingum á kauptaxtakerfinu er verið að færa taxtakerfið nær markaðslaunum en það er gert meðal annars til að draga úr félagslegum undirboðum. Auk þessa voru gerðar ýmsar lagfæringar á gildandi kjarasamningi.

Samningurinn verður kynntur félagsmönnum á næstu dögum. Atkvæðagreiðsla hefst í byrjun næstu viku og lýkur kl. 12:00 miðvikudaginn 15. júlí.

Samninginn má lesa með því að smella hér.

Talningu atkvæða í kosningu um kjarasamning við Samtök atvinnulífsins vegna starfa á almennum vinnumarkaði sem undirritaður var þann 29. maí síðastliðinn er nú lokið.

Á kjörskrá voru 659. Atkvæði greiddu 161, eða 24,43%.

Já sögðu 133, eða 82,61%

Nei sögðu 26, eða 16,15%

Auðir og ógildir voru 2, eða 1,24%

Samningurinn skoðast því samþykktur og má lesa hann í heild sinni með því að smella hér, en helstu atriði samningsins eru þessi:

• Gildistími samnings er frá 1. maí 2015 til 31. desember 2018
• Taxtar hækka 1. maí 2015 um kr. 25.000
• Taxtar hækka 1. maí 2016 um kr. 15.000
• Taxtar hækka 1. maí 2017 um 4,5%
• Taxtar hækka 1. maí 2015 um 3%
• Byrjunarlaunaflokkar færðir upp í eins árs þrep og neðstu launaflokkar óvirkjaðir, svo launafólk getur auk áðurgreindra hækkana færst til í taxtakerfinu og hækkað í launum vegna þess, umfram það sem hækkanir taxta segja til um.
• Almennar launahækkanir 1. maí 2015 verða 3,2-7,2%, en prósentuhækkunin fer lækkandi eftir hærri tekjuþrepum.
• Almennar launahækkanir 1. maí 2016 5,5%
• Almennar launahækkanir 1. maí 2017 3%
• Almennar launahækkanir 1. maí 2018 2%
• Lágmarkstekjutrygging hækkar í fjórum þrepum, við undirritun samnings kr. 245.000. Árið 2016 kr. 260.000. Árið 2017 kr. 285.000. Árið 2018 verður hún komin upp í kr. 300.000.
• Orlofs- og desemberuppbætur fara stighækkandi næstu 3 árin.
• Sérstök hækkun fiskvinnslufólks, meðal annars tveggja launaflokka hækkun þeirra sem eru með 7 ára starfsaldur.

Í gær var fundur með samráðsnefnd Akraneskaupstaðar og Verkalýðsfélags Akraness vegna kjarasamnings þessara aðila, en þessi samráðsnefnd hefur það verkefni að koma saman til að taka á þeim ágreiningsefnum sem koma upp milli samningsaðila og leysa úr þeim ef kostur er.

Þrjú mál voru tekin fyrir á þessum fundi, tvö þeirra eru til frekari skoðunar og vonast formaður til þess að þau fái farsæla niðurstöðu. Annað þeirra lýtur að innröðun starfsmanns í launatöflu samkvæmt starfsmati, en það er mat félagsins að viðkomandi starfsmaður sé kolrangt metinn inn miðað við ábyrgð og umfang þess starfs sem viðkomandi aðili innir af hendi. Hitt málið sem enn er ólokið varðar jöfnun réttinda á milli kjarasamninga Starfsmannafélags Reykjavíkur og Verkalýðsfélags Akraness og var sameininlegur skilningur fulltrúa Akraneskaupstaðar að fundin verði farsæl lausn á því máli.

Málið sem var afgreitt í gær laut að framkvæmd kjarasamninga varðandi fatnað starfsmanna, en umtalsverð óánægja hefur verið hjá starfsmönnum með þá framkvæmd sem hefur verið á þessum þætti og þá fjárhæð sem greidd er vegna fatakaupa. Starfsmenn hafa einungis verið að fá kr. 12.000 á ári til fatakaupa, sem dugar á engan hátt að mati starfsmanna. Samþykkt var að hækka þessa upphæð upp í kr. 16.500 á þessu ári og 20.000 á árinu 2016, til að koma örlítið til móts við starfsmenn. Formaður lagði áherslu á að til viðmiðunar verði hafður raunkostnaður við úthlutun fatnaðar samkvæmt ákvæðum kjarasamnings, og taldi formaður félagsins að núverandi fjárhæð endurspegli ekki þann raunkostnað.

Þetta var svo sem ágætis fundur, en mikilvægt er að tekið sé á þeim ágreiningsefnum sem upp koma af einurð og festu og þau séu afgreidd á skömmum tíma, því það er óþolandi og ólíðandi að uppi sé ágreinigur í málum um langa hríð og ekki sé leitast við að finna lausn á þeim. Því ber að fagna því að brugðist var skjótt við þessum atriðum og vonast formaður eftir því að búið verði að afgreiða öll þessi mál í byrjun ágúst.

Starfsgreinasambandið hefur gengið frá nýjum kjarasamningi við Bændasamtök Íslands vegna starfsfólks í landbúnaði. Samningurinn tekur sömu hækkunum og samið var um í almennum kjarasamningi við Samtök atvinnulífsins auk þess sem farið var yfir gildissvið samningsins og er nú talað um að hann taki til starfsfólks í landbúnaði en ekki einungis á lögbýlum. Þá voru upphæðir sem draga má frá launum vegna fæðis og húsnæðis hækkaðar lítillega. Samningurinn gildir frá 1. maí 2015 og út árið 2018 eins og aðrir samningar á almennum vinnumarkaði. 

Nýja kjarasamninginn má lesa með því að smella hér.

Nýja kauptaxta vegna starfa í landbúnaði má skoða með því að smella hér.

Félagsmenn Verkalýðsfélags Akraness eru duglegir að sækja um styrki sem þeir eiga rétt á, til dæmis vegna náms. Því er vakin athygli á því að nú hafa þrír sjóðir sem Verkalýðsfélag Akraness á aðild að: Landsmennt, Sveitamennt og Ríkismennt, ákveðið að hækka hámark styrkja sinna en hámarkið hefur verið kr. 60.000 á ári síðustu ár.

Landsmennt

Stjórn Landsmenntar hefur samþykkt að hækka hámarksupphæð einstaklingsstyrkja í 70.000 kr. f.o.m. 1. júlí nk. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 70.000 kr eða mest 75% kostnaðar. 

Hækkun á geymdum rétti (uppsafnaður réttur) er eftirfarandi:

• 2015 verður hægt að taka út kr. 190.000.- fyrir eitt samfellt nám/námskeið. Ferðakostnaður vegna náms getur að hámarki orðið kr. 70.000.- (nær til náms sem hefst e.1.júlí 2015)
• 2016 verður hægt að taka út kr. 200.000.- og 2017 verði upphæðin orðin 210.000.-

Ekki hefur verið gerð breyting á styrkjum til meiraprófs eða til tómstundanámskeiða. Hækkunin nær til þess náms sem hefst eftir 1. júlí 2015.

Sveitamennt

Stjórn Sveitamenntar hefur samþykkt að hækka hámarksupphæð einstaklingsstyrkja í 75.000 kr. f.o.m. 1. júní 2015. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 75.000 kr eða mest 75% kostnaðar. Hækkun á geymdum rétti (3ja ára) verður til samræmis við þessa hækkun kr. 225.000.-.

Hækkunin nær til náms/námskeiða sem hefjast eftir 1. júní 2015. Engin breyting er á styrkjum til meiraprófs eða styrkum til tómstundanámskeiða.

Ríkismennt

Stjórn Ríkismenntar hefur samþykkt að hækka hámarksupphæð einstaklingsstyrkja í 75.000 kr. f.o.m. 1. júní 2015. Upphæð styrkja er miðuð við greidd iðgjöld síðustu 12 mánaða en hægt er að fá styrk (þá lægri) eftir 6 mánaða aðild. Styrkur getur þó aldrei orðið hærri en 75.000 kr eða mest 75% kostnaðar. Hækkun á geymdum rétti (3ja ára) verður til samræmis við þessa hækkun kr. 225.000.-

Hækkunin nær til náms/námskeiða sem hefjast eftir 1. júní 2015. Engin breyting er á styrkjum til meiraprófs eða styrkum til tómstundanámskeiða.

Eins og fram hefur komið hér á heimasíðu félagsins þá stefndi Verkalýðsfélag Akraness Norðuráli vegna ágreinings í tveimur málum vegna túlkunar á greinum í kjarasamningi félagsins við Norðurál. Fyrra málið laut að túlkun á réttindaávinnslu starfsmanna til greiðslu orlofs- og desemberuppbóta og seinna málið laut að túlkun á ávinnslu á starfsaldurhækkunum. 

Það er skemmst frá því að segja að Félagsdómur féllst á allar dómskröfur Verkalýðsfélags Akraness í báðum málunum. Norðuráli var gert að greiða Verkalýðsfélagi Akraness 500.000 kr. í málskostnað fyrir hvort málið fyrir sig og var Norðuráli því gert að greiða VLFA samtals 1.000.000 kr. í málskostnað. 

Það er ljóst að umtalsverðir hagsmunir voru í húfi í þessum málum og þá sér í lagi hvað varðar túlkun á réttindaávinnslu starfsmanna til greiðslu á orlofs- og desemberuppbótum. Enda liggur fyrir að um háar upphæðir er að ræða enda eru orlofs- og desemberuppbætur samtals fyrir fullt starf hjá Norðuráli í dag 370.916 kr. eða 185.458 kr. hvor um sig.

Verkalýðsfélag Akraness valdi mál eins starfsmanns til að fara með sem prófmál fyrir félagsdóm til að fá úr því skorið hvort hann ætti rétt á hlutfalli af orlofs- og desemberuppbótum fyrir árin 2014 og 2015 og eins og áður sagði féllst félagsdómur á allar kröfur félagins og mun Norðurál þurfa að greiða umræddum starfsmanni um 200.000 krónur og að sjálfsögðu mun félagið fara fram á að dráttavextir verði greiddir af þeirri upphæð.

Það er morgunljóst að þessi dómur um réttindaávinnslu á orlofs- og desemberuppbótum hefur fordæmisgildi og ljóst að mun fleiri starfsmenn munu eiga rétt til greiðslu á orlofs- og desemberuppbótum en fyrirtækið hefur talið hingað til. Það liggur fyrir að VLFA mun gera kröfu á að allir starfsmenn sem samkvæmt dómnum eiga rétt á orlofs- og desemberuppbótum muni fá þær leiðréttar 4 ár aftur í tímann og er því ljóst er að um umtalsverðar upphæðir getur verið að ræða sem mun klárlega skipta þá starfsmenn sem þar heyra undir töluverðu máli.

Verkalýðsfélag Akraness var búið að reyna ítrekað að leysa þetta mál í sátt og samlyndi við forsvarsmenn fyrirtækisins en þeir töldu að þeim bæri ekki að greiða þetta og því fór Verkalýðsfélag Akraness með málið fyrir dómstóla sem hafa nú kveðið upp sinn endanlega útskurð. Það liggur fyrir að Verkalýðsfélag Akraness mun aldrei sætta sig við að brotið sé á réttindum okkar félagsmanna og ef félagið telur að brot hafi verið framin þá reynir félagið að sjálfsögðu að finna lausn á því. Ef það ekki tekst þá fer félagið með slík mál fyrir dómstóla. 

Í gegnum árin hefur félagið stefnt þó nokkrum fyrirtækjum vegna ágreinings um túlkun kjarasamninga og vangoldinna launa og núna er félagið t.d. með eitt mál fyrir Héraðsdómi Vesturlands og tvö önnur á leið þangað. Það mikilvægt að atvinnurekendur átti sig á því vel og rækilega að VLFA hefur ekki og mun ekki sætta sig við að brotið sé á réttindum sinna félagsmanna.  

Hægt er lesa dómana í heild sinni með því að smella hér.