Nú hefur önnur lota verkfalls staðið yfir í 16 tíma og er áhrifa farið að gæta víða um félagssvæði Verkalýðsfélags Akraness. Að sjálfsögðu bitnar þetta harkalega á ákveðnum atvinnugreinum, en vel á þriðja hundrað manns sem starfa hjá fiskvinnslufyrirtækjum vítt og breitt um bæinn hafa lagt niður störf. Sorphirðumenn hafa einnig lagt niður störf, svo og starfsmenn í mötuneyti Elkem Ísland á Grundartanga. Lokað er í öllum sjoppum og bensínafgreiðslustöðvum þar sem starfa félagsmenn VLFA. 

Ræstingar á leikskólum, bókasafni og fleiri stofnunum Akraneskaupstaðar liggja niðri vegna verkfallsins, sem gerir það að verkum að leikskólarnir verða lokaðir á föstudaginn þar sem ekki hefur verið ræst þar í tvo sólarhringa. Eðli málsins samkvæmt mun það hafa í för með sér erfiðleika fyrir foreldra að ekki verði hægt að koma börnunum fyrir á leikskólum. Innanbæjarstrætó gengur hvorki í dag né á morgun og heimaþjónusta Akraneskaupstaðar er skert. Ekki má gleyma verkfalli starfsmanna Spalar í gjaldskýli Hvalfjarðarganga. Það jákvæða í því er þó að vegfarendur fá frítt í göngin á meðan á verkfalli stendur.

Heilt yfir hafa atvinnurekendur virt verkfallið og sárafáar tilkynningar borist um verkfallsbrot, en félagið hvetur almenning til að hafa samband við skrifstofu félagsins ef það telur að verið sé að brjóta á lögvörðum rétti verkafólks í þessu verkfalli með því að láta það vinna eða ef verið er að ganga í störf verkafólks.

Skipulag aðgerða framundan er með þessum hætti:

6. maí 2015 - Allsherjar vinnustöðvun frá miðnætti til miðnættis (allur 6. maí) 

7. maí 2015 - Allsherjar vinnustöðvun frá miðnætti til miðnættis (allur 7. maí) 

19. maí 2015 - Allsherjar vinnustöðvun frá miðnætti til miðnættis (allur 19. maí) 

20. maí 2015 - Allsherjar vinnustöðvun frá miðnætti til miðnættis (allur 20. maí) 

26. maí 2015 - Ótímabundin vinnustöðvun hefst á miðnætti aðfaranótt 26. maí 2015

Í gærkveldi var undirritaður nýr kjarasamningur milli Samtaka fyrirtækja í sjávarútvegi og Sjómannasambands Íslands en Sjómannasambandið hefur farið með samningsumboðið fyrir hönd Verkalýðsfélags Akraness í þessum kjaraviðræðum.

Kjarasamninginn má finna hér.

Kynningu á nýjum kjarasamningi má finna hér.

Eins og fram hefur komið hér á heimasíðunni þá hófst verkfall hjá sjómönnum fimmtudaginn 10. nóvember en sjómenn hafa verið samningslausir frá 1. janúar 2011 og því var eðlilega farið að gæta verulegrar óþreyju hjá sjómönnum um að ná fram sanngjörnum kjarasamningi.

Helstu baráttumál sjómanna í þessum samningaviðræðum voru m.a. þessi:

- Verðlagsmálin
- Nýsmíðaálagið
- Hækkun á fatapeningum
- Mönnunarmál á uppsjávarskipum og ísfisktogurum

Það þarf ekkert að fara í grafgötur með það að þessar kjaraviðræður voru gríðarlega erfiðar enda bar mikið á milli oft á tíðum.

Helstu atriði sem náðust í þessum samningi voru þau að kauptrygging hækkar um rétt rúm 23% og verður kauptrygging háseta frá 1. nóvember 2016 kr. 288.168 og hjá matsveini, neta- og bátsmanni kr. 360.210.

Eins flestir sjómenn vita þá hefur kauptryggingin frekar lítið að segja enda kemur sjaldan til þess að greiða þurfi einungis kauptryggingu. Hins vegar er rétt að geta þess að því miður hafa sumar útgerðir reynt að koma sér hjá því að greiða kauptryggingu þegar það á við, eins og þegar skip þurfa að fara í viðhald og slipptöku. En slík framkoma útgerðamanna er óþolandi með öllu enda ber útgerðum að greiða kauptryggingu ef skip stoppa vegna t.d. slipptöku. Það er rétt að árétta að gefnu tilefni að útgerðarmönnum ber skylda til að bjóða skipverjum vinnu um þegar skip fer í slipp og ef skipverjar afþakka vinnu á meðan eiga þeir ekki rétt á kauptryggingu. Að öðrum kosti ber útgerðamönnum að greiða kauptryggingu vegna slipptöku.

Verðalagsmálin voru eitt af stóru málunum í þessum kjaraviðræðum og vildu sjómenn að fiskverð á botnfiski yrði fært nær markaðsverði. En í þessum samningi var samið um það markmið að fiskverð miðist að jafnaði við 80% af vegnu meðalverði á grundvelli magns síðastliðinna þriggja mánaða á innlendum fiskmarkaði. En með þessu ákvæði telja menn að verið sé að færa fiskverð mun nær markaðsverði á fiskmörkuðum heldur en áður var.

Einnig er tekið á verðlagningu á uppsjávarskipum en þar hefur að mati sjómanna verið mikil brotlöm á undanförnum árum enda hafa útgerðamenn oft á tíðum ákveðið einhliða hvert fiskverð á uppsjávarafurðum eigi að vera og ekki uppfyllt framkvæmd kjarasamninga með því að viðhafa leynilega kosningu um fiskverð eins og kveðið er á um í kjarasamningi. En slíkt framferði þeirra útgerða sem slíkt gera er ólíðandi og verður alls ekki liðið framvegis.

Það á að stórauka samræmda upplýsingagjöf um afurðaverð á uppsjávarafurðum til að hægt sé að ákvarða rétt verð á uppsjávarafla til áhafnar.  Við upphaf vertíðar í loðnu, kolmunna, makríl og síld, skulu fulltrúar útgerða halda fund með fulltrúum sjómanna sem eru í úrskurðarnefnd sjómanna og útvegsmanna og starfsmönnum Verðlagsstofu skiptaverðs þar sem fulltrúum sjómanna verða veittar upplýsingar um það afurðaverð sem útgerð mun fá á erlendum mörkuðum fyrir sínar afurðir.  Þetta á að gefa fulltrúum sjómanna betri sýn á það hvað sé rétt fiskverð til sjómanna.

Skýrt er kveðið á í samningum að útgerðarmaður og áhöfn skulu gera sín í milli samning um fiskverð, þegar útgerð selur afla til eigin vinnslu, þ.e.a.s. í viðskiptum milli skyldra aðila. Til að slíkur samningur öðlist gildi, skal hann staðfestur í leynilegri atkvæðagreiðslu áhafnar og að því loknu undirritaður af fulltrúum áhafnar og útgerðar. Bara þannig að það sé á hreinu þá mun Sjómannasambandið alls ekki undir nokkrum kringumstæðum líða það að útgerðamenn uppfylli ekki þetta ákvæði kjarasamningsins.

Eitt mál sem brann mikið á sjómönnum var svokallað nýsmíðaálag sem sett var á fyrir 14 árum en með nýsmíðaálaginu geta sjómenn þurft að greiða allt að 10% í 7 ár. Samið var um að nýsmíðaálagið myndi fara út á jafn löngum tíma og það hefur verið í gildi, eða á 14 árum. Hins vegar er rétt að geta þess að í sumum tilfellum uppfylla útgerðir ekki ákvæðið til að mega nota nýsmíðaálagið enda þarf skip að auka aflaverðmætið sitt töluvert til að nýsmíðaálagið taki gildi. En vissulega er þetta nýsmíðaálag að bitna á sumum sjómönnum í dag.

Fatagreiðslur til sjómanna  voru líka deiluefni enda umtalsverður kostnaður sem sjómenn þurfa að reiða fram vegna hlífðarfatakaupa. En í þessum samningi hækka fatapeningar um 130% og verða hjá undirmönnum 11.400 á mánuði. Hjá dekkmönnum á frystitogurum verða fatapeningar 14.900 og hækka líka um 130%.

Í þessum viðræðum voru mönnunarmál á uppsjávarskipum og ísfisktogurum mikið deilumál, en sjómenn telja að sú fækkun sem átt hefur sér stað t.d. á uppsjávarskipunum sé farin að ógna öryggi sjómanna við sín störf m.a. vegna brota á hvíldartíma. Því var samið um það að framkvæma athugun á mönnun og hvíldartíma í íslenska fiskiskipaflotanum. Lögð skal áhersla á að setja athugun á uppsjávarskipum í forgang og kynna samningsaðilum niðurstöðu þeirrar könnunar. Skipaður verður starfshópur til að gera þessa könnun og verður hann skipaður þremur fulltrúum tilnefndum af Samtökum fyrirtækja í sjávarútvegi og þremur fulltrúum tilnefndum sameiginlega af Sjómannasambandi Íslands. Starfshópurinn skal hefja störf við undirritun kjarasamningsins og miða við að hafa lokið störfum sínum fyrir lok árs 2017.             Ef það verður niðurstaða starfshópsins að fækkun sjómanna hafi leitt til þess að öryggi þeirra sé ógnað eins og sjómenn telja, þá mun það eðlilega leiða til þess að útgerðin verður að bregðast við því með einum eða öðrum hætti t.d. með því að fjölga á skipunum. Á meðan þessi starfshópur er að störfum verður skiptaprósentan hækkuð þar sem 8 eru í áhöfn um 0,55%.

Það er morgunljóst að þetta hafa verið gríðarlega erfiðar kjaraviðræður enda hefur ríkt mikil gremja á meðal sjómanna yfir því að hafa verið samningslausir frá 1. janúar 2011 og því til viðbótar hafa kjör sjómanna lækkað mikið á liðnum misserum vegna lækkunar á afurðaverði og styrkingu á íslensku krónunni.

Hins vegar gildir það í þessum kjarasamningum sem og í öðrum að það eru sjómennirnir sem hafa síðasta orðið enda þarf að kjósa um þennan samning og ef sjómenn eru sáttir segja þeir já en ef menn eru ósáttir þá segja þeir nei. Þannig virkar íslenskur vinnumarkaður að launafólk á blessunarlega alltaf síðasta orðið!      

Endurúthlutun er nú lokið, og er nú hægt að bóka sér viku af þeim sem eftir eru, annað hvort á Félagavefnum eða á skrifstofu félagsins. Lausar vikur eru flestar í byrjun júní og í lok ágúst, ekkert er laust í júlí. Fyrstur kemur fyrstur fær.

Í endurúthlutuninni í morgun urðu til 40 nýjar bókanir á félagsmenn sem ekki fengu úthlutað í fyrri úthlutun. Þeir sjá núna bókun inni á Félagavefnum (undir Orlofshús og Bókunarsaga) og geta greitt bókunina þar eða á skrifstofu félagsins. Eindagi er 13. maí.

Þann 14. maí verða ógreiddar bókanir felldar niður og geta þá aðrir félagsmenn bókað þær sýnist þeim svo.

Formaður félagsins, sem jafnframt situr í aðalsamningaráði Starfsgreinasambands Íslands, sat í morgun fund með Samtökum atvinnulífsins hjá Ríkissáttasemjara vegna kjarasamnings SGS við SA. Það er skemmst frá því að segja að þessi fundur var algjörlega árangurslaus og næsti fundur hefur verið boðaður á föstudag. Því er ljóst að verkfall mun skella á á miðnætti og standa yfir næstu tvo sólarhringa.

Ljóst er að mikið ber á milli deiluaðila, en það sem hleypti illu blóði í okkur hjá SGS var bréf sem Samtök atvinnulífsins sendu til aðildarfyrirtækja sinna þar sem því var haldið fram að tilboð SA hljóðaði upp á 20% launahækkun og slíkri hækkun hefði verið hafnað af okkar hálfu. Þessu var að sjálfsögðu mótmælt harðlega vegna þess að í fyrirliggjandi tilboði SA liggur fyrir að í þriggja ára samningi er íslensku verkafólki boðin 28.000 króna hækkun og því til viðbótar var því boðið að breyta yfirvinnuálagi og lengja dagvinnutímabil. En eins og uppsetningin á tilboðinu var, þá liggur fyrir að verkafólk átti sjálft að greiða hlut af sinni launahækkun. Á þeirri forsendu var því komið rækilega á framfæri við forsvarsmenn SA að slíku væri algerlega hafnað.

Á fundinum í dag sagði formaður VLFA Þorsteini Víglundssyni, forstjóra Samtaka atvinnulífsins, að það væri dapurlegt að bjóða íslensku verkafólki 28.000 króna launahækkun á þremur árum, í ljósi þeirrar bláköldu staðreyndar að Samtök atvinnulífsins hafi þann 9. desember síðastliðinn samið við flugstjóra um launahækkanir sem námu hvorki meira né minna en 310.000 krónur sem verður komin að fullu innan tveggja ára. Að hugsa sér að barátta verkalýðshreyfingarinnar fyrir því að lágmarkslaun verði 300.000 innan þriggja ára nemi lægri upphæð en flugstjórar fengu í launahækkun nánast á einu bretti.

Hvurslags hræsni er það að öskra hátt og skýrt á íslenskt verkafólk, að það þurfi að sýna ábyrgð og gæta hófsemi, á sama tíma og formaður Samtaka atvinnulífsins, sem jafnframt er forstjóri Icelandair Group, semur við hluta af sínu starfsfólki upp á 310.000 kr. launahækkun á mánuði? Reyndar hefur hann blessaður þrætt fyrir þetta eins og sönnum sprúttsala sæmir, en nú hefur formaður VLFA samninginn og launatöflur undir höndum sem sýna þessa hækkun svo ekki verður um villst. Fulltrúa SA reyndu ekki að þræta fyrir þennan samning á fundinum í dag, enda er slíkt ekki hægt þar sem sönnunin er nú komin upp á yfirborðið. Þessi samningur flugstjóra gefur 23,6%, og má lesa hann með því að smella hér.

Þetta gerir ekkert annað en að hleypa illu blóði í okkar fólk, því að misréttið og misskiptingin í íslensku samfélagi ríður ekki við einteyming. Þetta dæmi sýnir reyndar líka hvernig prósenturnar sem leggjast ofan á mjög há laun, eins og í þessu tilfelli flugstjóra, gefa gríðarlega háa krónutölu, svo háa að hún er hærri en krafa SGS um að dagvinnulaun verði orðin 300.000 innan þriggja ára.

Það er morgunljóst að deilan er í gríðarlegum hnút og það er ábyrgðarhlutur hjá Samtökum atvinnulífsins að fara að reyna að átta sig á þessari stöðu, að við verðum að lagfæra kjör þeirra sem höllustum fæti standa í þessu samfélagi þannig að lágmarkslaun dugi fyrir þeim framfærsluviðmiðum sem hið opinbera hefur gefið út. En slíku er ekki til að dreifa í dag. 

Þeir sem fengu úthlutað orlofshúsi í fyrri úthlutun eru hvattir til að ganga frá greiðslu leigu sem fyrst, en eindagi er í dag.

Á morgun, þriðjudaginn 5. maí, verða ógreiddar bókanir losaðar og allt gert klárt fyrir endurúthlutun sem fer fram miðvikudaginn 6. maí. Á hádegi þann dag verður hægt að bóka þær vikur sem eftir eru, og gildir þá reglan fyrstur kemur - fyrstur fær.

Í dag er baráttudagur verkalýðsins haldinn hátíðlegur um allt land og þar er Akranes engin undantekning.

Dagskráin hefst núna kl. 14 þegar safnast verður saman við Kirkjubraut 40 og genginn hringur um neðri-Skaga við undirleik Skólahljómsveitar Akraness. Að kröfugöngu lokinni tekur við hátíðardagskrá í salnum á þriðju hæð að Kirkjubraut 40. Fundarstjóri er Björg Bjarnadóttir og ræðumaður er Vilhjálmur Birgisson. Karlakórinn Svanir mun syngja nokkur lög og boðið verður upp á kaffiveitingar að dagskrá lokinni. Kl. 15 í dag verður börnum boðið frítt í bíó í Bíóhöllinni á Akranesi.

Það er mikilvægt nú sem aldrei fyrr að verkafólk standi saman í baráttunni, taki þátt í þessum degi og sýni með því samstöðu. Í ræðu sem formaður félagsins flytur í dag segir meðal annars:

„Það er lýðheilsumál að lagfæra kjör verkafólks og þeirra sem höllustum fæti standa í íslensku samfélagi.  Við getum ekki verið með launakjör á íslenskum vinnumarkaði sem ekki duga fyrir þeim framfærsluviðmiðum sem hið opinbera hefur gefið út, í slíku er fólginn alger ómöguleiki...Það segir sig sjálft að þegar lágtekjufólk nær ekki endum saman til að brauðfæða sig og sína þá getur það haft skelfilegar afleiðingar á heilsu fólks. Lágtekjufólk sogast jafnvel inn í myrkur ótta og vonleysis sem getur leitt af sér hina ýmsu heilsufarskvilla jafnt líkamlega sem andlega.“ 

Aðalfundur Verkalýðsfélags Akraness var haldinn á Gamla kaupfélaginu í gærkvöldi. Mæting var góð og gekk fundurinn vel fyrir sig. Rekstur félagsins gengur vel en heildar hagnaður allra sjóða var samtals tæpar 78 milljónir og starfsemi félagsins er í miklum blóma. 

Formaður fór yfir liðið starfsár en mikið hefur verið að gera í kjarasamningsgerð. Má þar nefna samninginn sem gerður var við Norðurál en hann var tímamótasamningur þar sem launahækkanir voru tengdar við launavísitölu. Félagsmenn eru duglegir að nýta sér það sem félagið býður upp á hvort sem um er að ræða styrki úr sjúkrasjóði, afnot af orlofshúsum eða þá niðurgreiðslu sem félagið býður upp á af til dæmis útilegu- og veiðikortinu, hótelmiðum og ferðum í Herjólf. 

Ómar Davíðsson, endurskoðandi félagsins, fór yfir ársreikninginn og útskýrði helstu tölur fyrir fundargestum en eins og áður sagði var afkoman mjög góð. 

Framundan eru ekki síður annasamir tímar þar sem verkfallsaðgerðir verkafólks hefjast af fullum þunga á hádegi í dag. Verkfallssjóðurinn stendur vel og gríðarlega góð samstaða ríkir meðal félagsmanna. Á fundinum var samþykkt tillaga að breytingu á reglugerð vinnudeilusjóðs. Breytingin felur fyrst og fremst í sér að stjórn Verkalýðsfélags Akraness ákveður í hverju tilfelli fyrir sig hvenær skuli hefja úthlutun úr sjóðnum og hversu háar greiðslur skuli vera. Stjórnin hyggst setja þær úthlutunarreglur að greiðslur úr verkfallssjóði hefjist á öðrum degi verkfalls en í mörgum félögum hefjast greiðslur ekki fyrr en eftir 5 eða 7 daga svo dæmi sé tekið. 

Að loknum venjubundnum aðalfundarstörfum og kosningu bauð félagið fundargestum upp á lambasteik með öllu tilheyrandi. Hér má sjá fleiri myndir frá fundinum.

Útlit er fyrir að forsvarsmenn Spalar ætli sér að gerast verkfallsbrjótar á fyrsta degi verkfalls, en samkvæmt mati yfirlögfræðings Alþýðusambands Íslands þá liggur fyrir að það er brot á lögum um stéttarfélög og vinnudeilur ef öryggisstjóri gengur í störf starfsmanna í gjaldskýlinu við Hvalfjarðargöng.

Þetta mál er með svo miklum ólíkindum, að það nær engu tali. Forsvarsmönnum Spalar hefur verið gert það ljóst að Verkalýðsfélag Akraness er svo sannarlega tilbúið að skoða það með opnum hug að veita fyrirtækinu undanþágu til að uppfylla viðbragðs- og neyðaráætlun í Hvalfjarðargöngum. En í þeirri neyðaráætlun, sem Spölur er aðili að og er unnin í gegnum Almannavarnir Ríkisins, gegna starfsmenn í gjaldskýli veigamiklu öryggishlutverki. Þar kemur meðal annars fram að það er ófrávíkjanleg krafa að gjaldskýlið sé aldrei skilið eftir mannlaust. Það liggur fyrir að fyrstu boð um slys eða óhöpp berast strax til gjaldskýlisins og þar skiptir gríðarlegu máli að gripið sé fumlaust inn í atburðarrásina til að forða frekari hættu, t.d. með lokun gangnanna.

Því miður virðist hroki stjórnenda Spalar ekki ríða við einteyming, því þeir geta ekki einu sinni brotið odd af oflæti sínu og óskað áðurnefndrar undanþágu til að uppfyllla þessar neyðaráætlanir, heldur er margt sem bendir til þess að þeir vilji frekar takmarka öryggi sinna viðskiptavina með fjareftirliti, auk þess sem fyrir liggur eins og áður sagði að öryggisstjóra er óheimilt að ganga í störf starfsmanna Spalar.

Verkalýðsfélag Akraness mun íhuga næstu skref, en það hvarflar ekki að félaginu að fara í slag við Spöl og loka göngunum með átökum, enda bitnar slíkt á öðrum en Speli. Félagið hins vegar harmar það að forsvarsmenn fyrirtækisins ætli að gefa afslátt af öryggi vegfarenda sem eiga viðskipti við Spöl. En gangi öryggisstjóri í störf starfsmanna, eins og útlit er fyrir að hann muni gera, þá verður það eðli málsins kært sem brot á lögum um stéttarfélög og vinnudeilur. Hins vegar telur félagið að Spölur þurfi að svara þeirri spurningu á opinberum vettvangi hvers vegna þeir ætli ekki að uppfylla öryggis- og viðbragðsáætlun sem gefin hefur verið út fyrir göngin, með því að hafa gjaldskýlið alltaf mannað eins og kveðið er á um, en þeir hafa svarað því að þeir telji sig vera að gera það með því að láta öryggisstjóra ganga í störf starfsmanna. Því þarf líka að spyrja þessa ágætu menn að því hvort þeir ætli að brjóta lög um stéttarfélög og vinnudeilur og traðka þannig á þeim grundvallarmannréttindum sem fólgin eru í verkfallsréttinum.

Félagsmenn vítt og breitt eru hvattir til að hafa samband við skrifstofu félagsins verði þeir vitni að verkfallsbrotum í dag. Einnig er hægt að ná í formann félagsins í síma 8651294.

 Félagsmenn, munið eftir aðalfundi félagsins sem haldinn verður á Gamla Kaupfélaginu í kvöld kl. 18:00. Á dagskrá eru hefðbundin aðalfundarstörf og að þeim loknum verður fundargestum boðið upp á kvöldverð. 

Á aðalfund eru velkomnir allir félagsmenn, úr öllum deildum félagsins og er mæting á aðalfund gott tækifæri til að fá innsýn í starfsemi félagsins á liðnu starfsári. Aðalfundur er æðsta vald félagsins og eru ýmis mál á dagskrá fundarins, meðal annars breyting á reglugerð vinnudeilusjóðs en allt stefnir í að vegna boðaðra verkfalla þurfi að úthluta úr honum til félagsmanna sem leggja niður störf í verkfalli.

Félagsmenn eru hvattir til að fjölmenna og taka þannig virkan þátt í starfi félagsins.

Nú eru verkfallsátökin byrjuð að harðna en fyrsta verkfall skellur á á hádegi næsta fimmtudag. Forsvarsmenn Spalar hafa tekið þá ákvörðun að hafa gjaldskýlið mannlaust og gefa frítt í göngin sem er að mínu mati grafalvarlegt. 

Þessu skal fyrst svara með því að í neyðar- og viðbragðsáætlun sem gildir fyrir Spöl í Hvalfjarðargöngum kemur skýrt fram að það sé ófrávíkjanleg krafa að starfsmenn Spalar hafi tetra talstöð og að gjaldskýlið sé aldrei skilið eftir mannlaust. Maður hlýtur að spyrja sig hvað Vegagerðin og ríkislögreglustjóri segi við því ef að Spölur ætlar ekki að uppfylla þá neyðaráætlun sem gildir fyrir Hvalfjarðargöng. Það hlýtur að kalla á skjót viðbrögð af hálfu Vegagerðarinnar því ef ekki er hægt að uppfylla viðbragðsáætlunina er ekkert annað að gera en að loka göngunum á meðan á verkfalli stendur.

Það er alveg ljóst að þessi aðgerð forsvarsmanna Spalar er á gráu svæði hvað varðar lög um stéttarfélög og vinnudeilur og því til viðbótar er það grafalvarlegt mál að skilja gjaldskýlið eftir mannlaust enda hefur sagan sýnt að það getur skipt sköpum að starfsmenn grípi til skjótra viðbragða þegar óhöpp eiga sér stað í göngunum. Hver mínúta getur skipt máli hvað það varðar. Nánast í hverri einustu viku þurfa starfsmenn Spalar að aðstoða vegfarendur vegna óhappa sem verða í göngunum, meðal annars að draga bilaðar bifreiðar upp og annað slíkt. 

Það kemur líka fyrir að starfsmenn Spalar þurfi að bregðast hratt við fyrir sjúkraflutningabíla í neyðarakstri og er þá göngunum lokað til að sjúkrabifreiðar hafi greiðan aðgang í gegn en það er ljóst að þegar enginn verður í gjaldskýlinu verður slíkri þjónustu ekki til að dreifa. 

Formaður félagsins talar af reynslu fyrir mikilvægi þess að öryggismál séu í lagi í göngunum enda vann hann hjá Speli í 6 ár áður en hann tók við formennsku í Verkalýðsfélagi Akraness. Það er morgunljóst að það er mikið öryggisatriði að starfsmenn séu til staðar til að bregðast við hinum ýmsu óhöppum sem upp kunna að koma í göngunum. Hér er til dæmis ein gömul frétt þar sem kviknaði í bíl við göngin og formaður tók þátt í að slökkva þann eld á sínum tíma. Það er eins gott að svona atvik komi ekki upp í ljósi þess að forsvarsmenn Spalar ætla að afgreiða verkfallið með áðurnefndum hætti. 

Það er í raun og veru grátlegt til þess að vita að starfsmenn hafi verið tilbúnir til að ganga frá samningi við Spöl til að forða fyrirtækinu frá verkfallsaðgerðum en nú liggur fyrir að Spölur bregst við með þeim hætti að gefa frítt í göngin. Að mati formanns er þetta á gráu svæði hvað varðar lög um stéttarfélög og vinnudeildur eins og áður hefur komið fram. En allavega er mikilvægt að vegfarendur átti sig á því að öryggisþáttur ganganna verður ekki svipur hjá sjón á meðan á verkfalli stendur.  

Verkalýðsfélag Akraness hefur sett sig í samband við Magnús Norðdahl, yfirlögfræðing ASÍ, til að kanna lögmæti þessarar aðgerðar Spalarmanna að gefa frítt í göngin og hafa þau opin. Einnig er félagið að kanna hjá Vegagerðinni hvort þetta standist öryggissjónarmið og á grundvelli þeirra niðurstaðna verður tekin ákvörðun um hvernig brugðist verður við.