Eins og fram kom hér á heimasíðunni fyrir helgi átti Verkalýðsfélag Akraness von á því að Starfsgreinasambandið myndi undirrita kjarasamning með fulltrúum ríkisins á næstu dögum. Góður gangur hefur verið í viðræðunum við ríkið enda var það reiðubúið til að mæta flestum þeim kröfum sem stéttarfélög innan SGS höfðu lagt fram til þessa. Hinsvegar ákvað samninganefnd ríkisins að óska eftir því að fresta fundi fram á næsta mánudag, 5. október. Ástæða þeirrar beiðni er sú að svokallaður SALEK hópur sem virðist vera að vinna að því að búa til nýtt vinnumarkaðslíkan hér mun funda á næsta mánudag.

Formaður Verkalýðsfélags Akraness hefur ekki farið í grafgötur með það að honum hugnast ekki sú hugmyndafræði sem liggur að baki þessum SALEK hópi enda óttast hann að áhrif stéttarfélaganna við gerð kjarasamninga muni verða skert verulega ef hugmyndir hópsins verða að veruleika. Hinsvegar er mjög erfitt að segja til um hvað þessi hópur er í raun og veru að ræða en það er ljóst að eins og staðan er núna er hann nánast umboðslaus. Allavega eru yfirgnæfandi líkur á að gengið verði frá undirritun kjarasamnings við ríkið á næsta mánudag enda á þessi SALEK hópur ekki að hafa nein áhrif þar á enda mikilvægt að launafólk starfandi hjá ríkinu fái sínar kjarabætur eins fljótt og verða má.  

Verkalýðsfélag Akraness hefur vísað deilu félagsins við Samband íslenskra sveitarfélaga til ríkissáttasemjara. Sá samningur sem um ræðir er samningur sem starfsmenn Akraneskaupstaðar sem tilheyra Verkalýðsfélagi Akraness vinna eftir. Umræddur kjarasamningur rann út 1. maí síðastliðinn en Verkalýðsfélag Akraness lagði fram ítarlega kröfugerð á fundi þann 10. ágúst síðastliðinn. Niðurstaðan af þeim fundi var að fulltrúar Sambands íslenskra sveitarfélaga ætluðu að heyra í "stóru félögunum" fyrst og ræða síðan við VLFA. Núna einum og hálfum mánuði síðar hefur félagið engin viðbrögð fengið við kröfugerðinni né fengið neinar upplýsingar um hvort kjarasamningur sé í burðarliðnum við önnur stéttarfélög. Því er félaginu nauðugur einn kostur að vísa deilunni til ríkissáttasemjara.

Það liggur algjörlega fyrir að kjör ófaglærðra starfsmanna hjá sveitarfélögunum eru hvað lökust á íslenskum vinnumarkaði um þessar stundir og því gríðarlega mikilvægt að kjör þeirra verði lagfærð umtalsvert í komandi kjarasamningum. Í bréfi til ríkissáttasemjara kemur fram að það gildi ekki sömu lögmál fyrir ófaglært starfsfólk sveitarfélaganna eins og tíðkast vítt og breitt um landið í ráðhúsum þar sem starfsfólk þar semur um allskyns aukagreiðslur eins og til dæmis fasta yfirvinnu, ferðapeninga og önnur hlunnindi. Slíku er alls ekki til að dreifa hvað ófaglært fólk varðar og því afar mikilvægt að launataxtar ófaglærðs fólks hjá sveitarfélögunum verði lagfærðir umtalsvert í komandi kjarasamningum.  

Síðastliðinn föstudag gekk formaður félagsins, ásamt aðaltrúnaðarmanni Elkem Ísland frá launahækkun sem gildir fyrir starfsmenn Elkem fyrir árin 2015 og 2016. Forsaga málsins er sú að þann 21. mars 2014 gekk Verkalýðsfélag Akraness frá kjarasamningi við Elkem Ísland og gilti hann frá 1. janúar 2014 til 31. janúar 2017, eða í rétt rúm 3 ár. Í samningnum fólst meðal annars að laun skyldu hækka um rúm 9% á fyrsta ári, en launahækkanir fyrir 2015 og 2016 skyldu taka hlutfallslega mið af launahækkunum sem um semdist á hinum almenna vinnumarkaði.

Á fundi samningsaðila á föstudaginn var tekist á um hver sú hækkun ætti að vera, en vildu fulltrúar SA og forsvarsmenn Elkem meina að hún ætti að vera mun lægri en niðurstaðan náðist um. En samstaða náðist að lokum um niðurstöðuna milli samningsaðila og nú liggur það semsagt fyrir að laun starfsmanna Elkem ísland munu hækka um 6,5% afturvirkt frá 1. janúar síðastliðnum. Rétt er að geta þess að starfsmenn voru búnir að fá 2% sem komu til framkvæmda 1. janúar síðastliðinn þannig að laun starfsmanna munu hækka afturvirkt um 4,5%. Þetta þýðir að starfsmenn munu fá greiðslu vegna afturvirkni sem nemur 150-200 þúsund krónum. Orlofs- og desemberuppbætur munu hækka samtals um kr. 20.856 og munu hvor um sig nema kr. 170.864, eða samtals kr. 341.728.

Síðan mun önnur hækkun koma til framkvæmda 1. janúar 2016 upp á 5,5%. Þessar hækkanir gera það að verkum að kjarasamningur Elkem ísland sem undirritaður var 21. mars 2014 er að gefa yfir 22% í heildina, eða sem nemur að meðaltali 7,6% á ári. Þegar kjarasamningurinn var kynntur fyrir starfsmönnum árið 2014 reiknaði formaður með því að launahækkanir vegna áranna 2015 og 2016 yrðu á bilinu 3,5-4%, en nú hefur komið í ljós að sú hækkun varð töluvert meiri, eða eins og áður sagði 6,5% og 5,5%.

Byrjandataxti verður 242.775 og starfsmaður sem hefur starfað í 10 ár hjá Elkem verður með grunnlaun upp á 285.884. Heildarlaun starfsmanns í efsta þrepi eru komin upp í tæp 500.000 á mánuði, en rétt er að geta þess að á bak við þessi laun er vinnutími upp á 145,6 tíma á mánuði, en ekki 173,33 eins og er á hinum almenna vinnumarkaði.

Vegna forfalla er ein íbúð á Akureyri laus næstu viku, frá 14. til 21. ágúst. Hægt er að bóka á skrifstofu félagsins í síma 4309900 eða með því að senda póst á This email address is being protected from spambots. You need JavaScript enabled to view it. 

*Uppfært 12. ágúst 2015 - búið er að bóka þessa viku

Kjör ófaglærðra til skammar hjá sveitafélögunumÁ mánudaginn var átti Verkalýðsfélag Akraness sinn fyrsta samningafund með launanefnd sveitarfélaga vegna félagsmanna sinna sem starfa hjá Akraneskaupstað en kjarasamningurinn við Akraneskaupstað rann út 1. maí síðastliðinn.  Á fundinum sem haldinn var í húskynnum ríkissáttasemjara lagði formaður fram kröfugerð félagsins sem byggist á því að dagvinnulaun starfsmanna sveitafélaga verði lagfærð svo um munar í komandi kjarasamningum.

Það er morgunljóst að dagvinnulaun hjá sveitarfélögunum eru alltof lág og léleg og það er langt í frá að þau nái þeim framfærsluviðmiðum sem hið opinbera hefur gefið út.  Það er líka rétt að geta þess að jafnan hafa starfsmenn sveitarfélaga einungis dagvinnulaunin, því auka álagsgreiðslur eins bónusar og aðrar aukagreiðslur þekkjast nánast ekki hjá ófaglærðu starfsfólki sveitarfélaganna.

Öðru máli gegnir hins vegar með stjórnendur, forstöðumenn og aðra sem starfa í ráðhúsum sveitafélaganna, enda er það alþekkt að starfsmenn í efri lögum sveitarfélaganna fá jafnan greidda fasta óunna yfirvinnu, bifreiðastyrki og aðrar slíka aukagreiðslur.

Eins og áður sagði eru laun starfsmanna sveitarfélaga sorglega léleg og sem dæmi þá eru starfsmenn sem hefja störf á leikskóla með laun fyrir fullan mánuð kr. 242.057 og eftir 15 ára starf eru þessi laun komin uppí heilar 261.422 krónur.  Það sér hvert mannsbarn að á slíkum launum er alls ekki hægt að framfleyta sér og sínum.  Starfsmenn á leikskóla eru ekki þeir einu sem starfa á þessum sultarlaunum því sambærileg laun gilda einnig fyrir skólaliða og starfsmenn sundlauga. 

Öll vitum við að gríðarleg ábyrgð fylgir því að sinna og hafa eftirlit með börnunum okkar og ábyrgðin sem hvílir til að mynda á herðum sundlaugavarða er gríðarleg eins og fjölmörg dæmi sína þar sem snarræði sundlaugavarða hefur bjargað mannslífum.  Það er alveg ljóst að þessi ábyrgð og eftirlitsskylda endurspeglast alls ekki í launakjörum þessa fólks. En eins og áður sagði þá eru ekki neinar bónusgreiðslur eða aðrar aukagreiðslur til staðar hjá sveitarfélögunum eins og t.d. hjá fiskvinnslufólki HB Granda sem getur fengið auk sinna grunnlauna bónus allt að 112.664 á mánuði.

Formaður gagnrýndi á þessum samningafundi harðlega starfsmatið sem sveitarfélögin vinna eftir og í kröfugerðinni vill Verkalýðsfélag Akraness að umræða fari fram um starfsmatið, tilgang þess og markmið og hvort það sé að skila árangri.

Eins og áður sagði þá verður að lagfæra kjör starfsmanna sveitarfélaganna umtalsvert í komandi kjarasamningum og taka verður tillit til þess að engar aukagreiðslur eru til staðar hjá sveitarfélögunum eins og þekkjast á hinum almenna vinnumarkaði.  Alla vega gengur það ekki upp að einungis efri lögin hjá sveitarfélögunum fái hinar og þessar aukagreiðslur á meðan engar slíkar greiðslur eru til staðar hjá ófaglærðu starfsfólki sveitarfélaganna.

Vegna forfalla er orlofshús félagsins í Kjós laust vikuna 21.-28. ágúst 2015. Hægt er að bóka á skrifstofu félagsins í síma 4309900 eða með því að senda póst á This email address is being protected from spambots. You need JavaScript enabled to view it. 

GrundartangasvæðiðEins og fram hefur komið í fréttum hafa stéttarfélögin sem eiga aðild að kjarasamningi Alcan í Straumsvík átt í harðvítugri kjaradeilu við eigendur fyrirtækisins en ein af kröfum eigenda fyrirtækisins er að fá að stórauka verktakavæðingu inni á svæðinu sem nemur allt að 100 störfum. Rétt er að geta þess að VLFA á ekki aðild að þessum kjarasamningi en fá stéttarfélög á Íslandi hafa fleiri félagsmenn sem starfa í stóriðjum heldur en Verkalýðsfélag Akraness. Á þeirri forsendu fylgist félagið grannt með því sem gerist í Straumsvík en það liggur fyrir að forsvarsmenn Alcan vilja auka verktöku inni á svæðinu með það að markmiði að ná niður rekstrarkostnaði með því að láta verktakana taka laun eftir kjarasamningum á hinum almenna vinnumarkaði. Eins og allir vita þá eru kjör og réttindi í stóriðjum umtalsvert betri en gengur og gerist á hinum almenna vinnumarkaði.

Sem betur fer hefur Verkalýðsfélag Akraness ekki þurft að hafa áhyggjur af þessu því í fyrsta lagi er ekki mikið um að verktakar sinni daglegum störfum í stóriðjunum á Grundartanga og í öðru lagi að í þeim tilfellum sem verktakar sinna daglegum störfum þá hefur VLFA gengið frá því að laun og réttindi séu þau sömu og kveðið er á um í stóriðjusamningunum. Nægir að nefna í þessu samhengi að VLFA gerði fyrir nokkrum mánuðum síðan kjarasamning við verktakafyrirtækið Snók þar sem öll laun og kjör kjarasamnings Elkem gilda fyrir starfsmenn Snóks. Þetta gerir það að verkum að VLFA gerir engar athugasemdir þegar Snókur sækir um verkefni inni á Grundartangasvæðinu vegna þeirrar staðreyndar að starfsmenn njóta sömu kjara og gilda inni á stóriðjusvæðinu.

Þetta er grundvallaratriðið þegar talað er um að auka verktakavæðingu. Það er að starfsmenn verktakafyrirtækisins njóti þeirra kjara og réttinda sem gilda í stóriðjunum en ekki kjara sem gilda á hinum almenna vinnumarkaði því í sumum tilfellum eru himinn og haf á milli launa og annarra réttinda. Félagið hefur átt í góðu samstarfi við verktakafyrirtækið Snók og sem dæmi þá eru grunnlaun þeirra sem hafa starfað hvað lengst hjá fyrirtækinu komin yfir 300.000 kr. á mánuði sem eru nákvæmlega sömu grunnlaun og hjá framleiðslumönnum Elkem Ísland.

Á þeirri forsendu þurfa stéttarfélögin að standa fast í lappirnar og tryggja að eigendum Alcan takist ekki að mylja undan þeim ávinningi sem náðst hefur í gerð stóriðjusamninga með því að verktakavæða fjölda starfa og krefjast þess að kjör á hinum almenna vinnumarkaði gildi þar. Það er allavega hægt að láta aukningu á verktakavæðingu átölulausa ef tryggt er að öll réttindi sem gilda í kjarasamningum stóriðjufyrirtækja haldi sér. Um það snýst þessi hagsmunabarátta og því verður að tryggja með öllum tiltækum ráðum að kjör í stóriðjum verði ekki skert.

Vegna forfalla er orlofshús félagsins í Kjós laust vikuna 28. ágúst til 4. september. Hægt er að bóka á skrifstofu félagsins, með tölvupósti á netfangið This email address is being protected from spambots. You need JavaScript enabled to view it. eða í síma 4309900.

Orlofshús félagsins í Hraunborgum er laust dagana 5. til 10 júlí. Áhugasamir geta bókað tímabilið á skrifstofu félagsins í síma 4309900 eða á netfangið This email address is being protected from spambots. You need JavaScript enabled to view it. 

Kosning er nú hafin um kjarasamning Samiðnar við Samtök atvinnulífsins sem skrifað var undir 22. júní, en eftir þeim samningi starfa félagsmenn í Iðnsveinadeild Verkalýðsfélags Akraness.

Kosningin er rafræn og voru kjörgögn póstlögð til félagsmanna á kjörskrá fyrr í vikunni og eru því að berast þeim þessa dagana. Til að kjósa skal smella á hnappinn "Rafræn kosning" hér neðarlega til hægri á síðunni og fylgja leiðbeiningum sem fylgja kjörgögnum. Kosning stendur yfir til kl. 12:00 á hádegi 15. júlí.

Verði samningurinn felldur og samningar takast ekki mun koma til verkfalla 6. september. Verði samningarnir hins vegar samþykktir gilda þeir til loka árs 2018. Mikilvægt er að góð þátttaka verði í kosningunni þannig að vilji félagsmanna sé skýr, ekki síst ef niðurstaðan verður sú að félagsmenn telji að sækja eigi meira en kjarasamningarnir gera ráð fyrir. Félagsmenn eru því hvattir til að nýta atkvæðarétt sinn og láta afstöðu sína í ljós.

Hægt er að skoða kjarasamninginn hér.