Í dag komu starfsmenn og trúnaðarmenn stéttarfélagsins Drífanda, Vestmannaeyjum í heimsókn á skrifstofu Verkalýðsfélags Akraness. Fengu gestirnir kynningu á starfsemi félagsins og snæddu saman hádegisverð. Að því loknu skoðaði hópurinn Safnasvæðið á Akranesi.

Samskipti milli þessara stéttarfélaga hafa ætíð verið góð og uppbyggileg enda hafa félögin sameiginlegra hagsmuna að gæta og hafa staðið saman í baráttunni fyrir bættum hag launafólks. Bæði félögin hafa innan sinna raða félagsmenn úr ýmsum atvinnugreinum og má þar nefna sjávarútveginn sérstaklega, en stór hópur beggja félaga hefur atvinnu af sjósókn og fiskvinnslu og skipta málefni þessa hóps því bæði félögin gríðarmiklu máli.

Það er alltaf gagnlegt að funda með fulltrúum annarra félaga, ræða málefni sem helst brenna á fólki hverju sinni og treysta böndin enn frekar, og eru fulltrúum Drífanda færðar bestu þakkir fyrir góða og gagnlega heimsókn.

Það er óhætt að segja að það gangi mikið á á íslenskum vinnumarkaði um þessar mundir en svokallaður SALEK hópur undirritaði í gær nýtt samkomulag undir yfirskriftinni "betri vinnubrögð, betri árangur." Þetta samkomulag var síðan til umfjöllunar á formannafundi Alþýðusambands Íslands í dag. Það er skemmst frá því að segja að formaður Verkalýðsfélags Akraness ber verulegan kvíðboga fyrir þeirri hugmyndafræði sem liggur á bakvið þetta nýja vinnumarkaðslíkan. Vinnumarkaðslíkan sem byggist á því sem gerist á hinum Norðurlöndunum en talað er um að sett verði á laggirnar svokallað þjóðhagsráð aðila vinnumarkaðarins sem muni hafa það hlutverk að meta í hvert sinn sem kjarasamningar eru lausir hvert svigrúm til launahækkana sé.

Það er vonlaust að ætla sér að taka einn þátt út úr norræna vinnumarkaðslíkaninu og heimfæra það yfir á íslenskt fyrirkomulag eins og þann þátt er lýtur að þjóðhagsráðinu. Ef að menn ætla að hverfa til norræna módelsins þá verður að taka alla þá þætti sem eru inni í því módeli og nægir að nefna í því samhengi að launamunur á milli Norðurlandanna og Íslands er í kringum 30-60%. Það er ekkert verið að tala um í þessu nýja vinnumarkaðslíkani að jafna þennan mun, það er verið að tala um að semja um afar hóflegar launahækkanir í anda þess svigrúms sem þjóðhagsráð mun komast að en það svigrúm verður mjög líklega í anda þess sem Seðlabankinn, Samtök atvinnulífsins og fjármálaráðuneytið hafa ætíð komist að þegar samningar eru lausir. Nánast undantekningalaust hafa þeir talað um að svigrúmið sé 3-3,5%. Formaður óttast það að ef þetta vinnumarkaðslíkan verður að veruleika þá sé búið að hlekkja íslenskt launafólk við samræmda láglaunastefnu og ekki verði heimilt að taka tillit til sterkrar stöðu einstaka atvinnugreina og fyrirtækja þegar kemur að mótun kröfugerðar. Semsagt, ekki megi sækja aukna hlutdeild til fyrirtækja sem skila milljörðum eða jafnvel tugum milljarða í hagnað því allir eigi að hlíta því sem þjóðhagsráð ákveður á hverjum tíma fyrir sig.

Það kom fram á formannafundi ASÍ áðan að það er ljóst að samningsréttur stéttarfélaganna verður skertur ef þetta nýja vinnumarkaðslíkan verður að veruleika. Eins og áður sagði þá er ekki nóg að taka einn þátt upp sem tengist norræna módelinu, það þarf að horfa til margra þátta, ekki bara þess mikla launamunar sem er á milli Norðurlandanna og Íslands hvað laun varðar heldur einnig þátta eins og þeirra sem tengjast vöxtum, verðtryggingu og öðru er viðkemur húsnæðismálum neytenda. Svo ekki sé talað um kostnaðarhlutdeild í heilbrigðisþjónustunni.

Já, það er ekki gott að taka einungis þann þátt út þar sem íslensku launafólki verða skammtaðar launahækkanir af hópi aðila sem sitja í svokölluðu þjóðhagsráði á sama tíma og laun margra launamanna duga vart fyrir framfærsluviðmiðum sem hið opinbera hefur gefið út. Formaður biður allt launafólk að fylgjast vel með umræðunni og reyna að tryggja með afgerandi hætti að hér sé ekki verið að skerða samningsrétt stéttarfélaganna, samningsrétt sem gerir meðal annars mögulegt að sækja á atvinnugreinar sem hafa skilað góðri afkomu og eru vel aflögufærar til að bæta kjör sinna starfsmanna. Það liggur fyrir að ef Verkalýðsfélag Akraness hefði fylgt eftir samræmdu launastefnunni sem var fyrst mótuð 2011 þá væru laun starfsmanna í stóriðjunum á Grundartanga 1 milljón króna lakari á ársgrundvelli en þau eru í dag. Og það er þetta sem Verkalýðsfélag Akraness hræðist innilega enda byggist hræðslan á því að verða hlekkjuð við samræmda láglaunastefnu næstu áratugina. Formaður er svosem ekki hissa þó fulltrúar Samtaka atvinnulífsins, stjórnvalda, sveitarfélaga og annarra hagsmunaaðila atvinnulífsins skuli fagna þessu samkomulagi enda er það og verður að mati formanns á kostnað íslensks launafólks.

Í gær bauð Verkalýðsfélag Akraness félagsmönnum sínum 70 ára og eldri ásamt mökum í dagsferð um Reykjanes. Slíkar dagsferðir eru farnar árlega og eru ómissandi þáttur í starfsemi félagsins. Yfir 100 manns skráðu sig í ferðina í ár og eins og oft áður var leiðsögumaður í ferðinni Björn Ingi Finsen.

Ferðin var vel heppnuð í alla staði og verður ferðasagan sögð hér á heimasíðunni um leið og ritun hennar lýkur. Myndir úr ferðinni eru hins vegar komnar á sinn stað hér á heimasíðunni og er hægt að skoða þær með því að smella hér.

Til leigu eru tvær íbúðir VLFA í Furulundi á Akureyri, fullbúnar húsgögnum og borðbúnaði. Leigutímabil er frá september 2015 til maí 2016 og henta þær því vel skólafólki eða öðrum sem þurfa tímabundið húsnæði á Akureyri. Tvö svefnherbergi, þvottavél á baði. Upplýsingar í síma 4309900 eða This email address is being protected from spambots. You need JavaScript enabled to view it..

Í dag mun formaður félagsins kynna fyrir nemendum við Fjölbrautaskóla Vesturlands hin ýmsu atriði er lúta að réttindum og skyldum á hinum íslenska vinnumarkaði. Einnig mun formaðurinn fara yfir alla þá margvíslegu þjónustu sem félagið veitir félagsmönnum sínum en gríðarlega mikilvægt er að unga fólkið sé vel upplýst um réttindi sín og fyrir hvað stéttarfélögin standa.

Það liggur fyrir að leikurinn á milli launamannsins og vinnuveitandans getur oft á tíðum verið afar ójafn þegar kemur að hinum margvíslegu kjarasamningsbrotum og því getur það skipt sköpum fyrir launafólk að vera aðili að öflugu stéttarfélagi. Sem dæmi þá hefur Verkalýðsfélag Akraness  innheimt fyrir félagsmenn sína yfir 300 milljónir vegna hinna ýmsu kjarasamningsbrota á 15 árum. En á þessum tölum sést hversu gríðarlega mikilvægt það er að vera aðili að góðu og sterku stéttarfélagi.

Þessi kynning fyrir nemendur er einn liður í því að fræða og upplýsa þá um réttindi þeirra og þá þjónustu sem félagið veitir félagsmönnum sínum.  Síðar í þessari viku verður formaður síðan með kynningu vegna fiskvinnslunámskeiðs þar sem farið er mjög ítarlega yfir öll réttindi og skyldur á íslenskum vinnumarkaði.

Það er óhætt að segja að bjart sé yfir atvinnulífi hér á Akranesi og í Hvalfjarðasveit eftir að  Terry Jester, forstjóri og stjórnarformaður Silicor, greindi frá því á hátíðarfundi á Hótel Glym í Hvalfjarðarsveit rétt í þessu að fjármögnun og samningagerð vegna fyrri hluta byggingar umhverfisvænnar sólarkísilverksmiðju Silicor á Grundartanga væri lokið og áætlað væri að fjármögnun seinni hluta yrði lokið um mitt ár 2016.

Þetta eru gríðarlega jákvæðar fréttir fyrir okkur Akurnesinga og Hvalfjarðarsveit og reyndar samfélagið allt því okkur vantar gjaldeyrisskapandi störf, meðal annars til að geta rekið okkar grunnstoðir eins og heilbrigðis- og menntakerfið.

Það er afar ánægjulegt að vita til þess að Silicor materials á Grundartanga verður samkvæmt óháðum aðila umhverfisvænasta stóriðja á Íslandi, enda hefur hún það markmið að framleiða sólarkísil sem meðal annars er notaður í sólarrafhlöður, sem síðan eru notaðar í framleiðslu á endurnýjanlegum orkugjafa. Það mun þurfa um 600 til 700 manns til starfa við uppbyggingu á verksmiðjunni en þegar verksmiðjan verður komin í fulla framleiðslu þá munu varanleg vel launuð og gjaldeyrisskapandi störf verða um 450 talsins. Ekki má gleyma margfeldiáhrifunum af þessari vistvænu verksmiðju í formi afleiddra starfa sem jafnvel geta skipt hundruðum.

Væntanlega munu Faxaflóahafnir hefja vegaframkvæmdir að athafnasvæðinu á næstu vikum og um áramótin mun jarðvegsvinna hefjast af fullum krafti sem og uppbyggingin en áætlað er að framleiðslan verði komin á fullt skrið árið 2018.

Til að átta sig á hversu jákvæð áhrif þetta hefur á þjóðarbúið í heild sinni þá er áætlað að Silicor materials muni skila íslensku þjóðarbúi útflutningstekjum sem nema um 50 milljörðum ár hvert sem jafnast á við tvær makrílvertíðir.

Það er gríðarlega mikilvægt að við Akurnesingar verðum tilbúnir til að mæta þeirri miklu uppbyggingu sem verður í okkar samfélagi strax í upphafi. Því skiptir miklu máli að bæjaryfirvöld búi sig vel undir þá miklu fjölgun sem getur orðið hér á Akranesi og í nágrenninu. Formaður veit að Ólafur Adolfsson, forseti bæjarstjórnar, bæjarstjórinn og bæjarstjórnin í heild sinni hefur unnið gríðarlega vel í þessu máli og ætla að láta innviði bæjarfélagsins vera í stakk búna til að taka við þessari jákvæðu fjölgun og uppbyggingu sem verður í kjölfarið á þessari vistvænu stóriðju.

Í morgun lauk formaður við sinn hluta í kennslu á fiskvinnslunámskeiði en þar fór hann yfir réttindi og skyldur á íslenskum vinnumarkaði ásamt því að upplýsa um alla þá starfsemi sem tengist stéttarfélögunum. Þetta fiskvinnslunámskeið var haldið fyrir starfsmenn Vignis G. Jónssonar og starfsmenn frystihússins HB Granda en samtals voru yfir 70 manns á námskeiðinu.

Fjölmargar spurningar vöknuðu hjá þeim sem sátu námskeiðið en formaður fór ítarlega yfir hversu mikilvægt það er fyrir launafólk að vera vel meðvitað um öll sín réttindi, ekki eingöngu þau sem tengjast kjarasamningum heldur einnig allt sem stéttarfélögin bjóða sínum félagsmönnum. Nú hafa þeir einstaklingar sem lokið hafa þessu námskeiði áunnið sér tveggja flokka launahækkun og eru flestir sem sátu þetta námskeið komnir í 9. launaflokk. Þeir sem hafa starfað í 7 ár eða lengur hjá sama fyrirtæki eru komnir í launaflokk 11 þannig að hér getur verið um töluverðan ávinning að ræða fyrir starfsfólkið.  

Formaður félagsins hélt erindi fyrir nemendur Gylfa Dalmanns í Háskóla Íslands í gær en þeir eru í meistaranámi í vinnumarkaðsfræði. Þetta er í fjórða sinn sem formaður heldur erindi fyrir nemendur Gylfa en erindið fjallaði um íslenska verkalýðshreyfingu og málefni henni tengd.

Í gær fór formaður um víðan völl í máli sínu og ræddi meðal annars fréttir sem berast þessa dagana af Selek hópnum en þær fréttir eru reyndar afar óljósar enda liggur fyrir að fulltrúar ASÍ í þessum hópi eru umboðslausir til að ganga frá einhverjum samningum fyrir hönd stéttarfélaganna. Formaður fór yfir að hann hræðist þær umræður um að breyta eigi hér vinnumarkaðslíkaninu í þá átt að það verði fámennur hópur sem taki ákvörðun um hvernig launabreytingar verða og tók hann fram að hann myndi aldrei samþykkja breytingar á vinnulöggjöf sem væru fólgnar í að umboð væri tekið af stéttarfélögum við kjarasamningsgerð.

Einnig fór hann yfir samræmdu launastefnuna sem var við lýði 2011 og 2013 og hvaða afleiðingar hún hefði haft fyrir félagsmenn VLFA ef félagið hefði fylgt henni eftir. Sagði hann meðal annars frá því að laun í stóriðjunum á Grundartangasvæðinu væru uppundir einni milljón króna lakari en þau eru í dag ef samræmdu launastefnunni hefði verið fylgt eftir. Hann fór einnig yfir að það væri hans mat að prósentuhækkanir í kjarasamningum væru aflgjafi misskiptingar og óréttlætis enda virka prósentuhækkanir með þeim hætti að þeir tekjuhæstu fá ætíð hæstu krónutöluna í sitt umslag. Hann nefndi þá staðreynd að íslenskt verkafólk getur ekki farið í verslanir og verslað með prósentum, það eru krónur sem eðli málsins samkvæmt gilda allstaðar!

Margt bendir til þess að hugsanlega sé kjarasamningur að verða til á milli Starfsgreinasambands Íslands og ríkisins og eru umtalsverðar líkur á að skrifað verði undir nýjan kjarasamning í næstu viku. Drög að þessum samningi eru í anda þess sem samið var um við Samtök atvinnulífsins í kjarasamningnum á hinum almenna vinnumarkaði. Í þeim samningi var samið um sérstaka hækkun til þeirra sem voru að vinna á lægstu töxtunum og drögin við ríkið taka að sjálfsögðu mið af því.

Þeir sem vinna eftir kjarasamningum við ríkið og tilheyra Verkalýðsfélagi Akraness eru að stærstum hluta starfsmenn á Heilbrigðisstofnun Vesturlands eða með öðrum orðum á Sjúkrahúsi Akraness.

Hinsvegar er ekki sömu sögu að segja gagnvart sveitarfélögunum, þar hefur lítið sem ekkert þokast og er farið að gæta verulegrar óþreyju hjá stéttarfélögunum í garð sveitarfélaganna. Ef ekki fer að sjást til lands í þeim samningum er allt eins líklegt að deilunni verði áður en langt um líður vísað til ríkissáttasemjara.

Samkvæmt 29. gr.laga Verkalýðsfélags Akraness ber að viðhafa allsherjaratkvæðagreiðslu um kjör stjórnar.

Framboðslistum til stjórnarkjörs í Verkalýðsfélagi Akraness árið 2015, ásamt meðmælendum skv. reglugerð ASÍ um allsherjaratkvæðagreiðslur, ber að merkja kjörstjórn og skila á skrifstofu félagsins, Sunnubraut 13 fyrir kl. 12:00 þann 15. október nk. Hvert það framboð er gilt sem fram kemur innan þess tíma og hefur skriflegt samþykki þeirra sem framboðslistann skipa.

Stjórn og trúnaðarráð Verkalýðsfélags Akraness hefur lagt fram framboðslista til stjórnar. Listann er hægt að skoða með því að smella hér.

Berist kjörstjórn ekki aðrir listar telst framboðslisti stjórnar og trúnaðarráðs sjálfkjörinn til næstu tveggja ára.