Á fundi bæjarráðs sem haldinn var fimmtudaginn 2. júlí 2009 voru samþykktar alls kyns sparnaðarleiðir fyrir bæjarsjóð. Það sem vakti sérstaka athygli formanns Verkalýðsfélags Akraness voru verulegar breytingar á vinnutilhögun starfsmanna íþróttamannvirkja og skólaliða sem mun klárlega hafa umtalsverð áhrif á launakjör þessara hópa.

Í fundargerð bæjarráðs kemur m.a. fram að frá 1. október nk. verði breyting á opnunartíma íþróttamiðstöðvarinnar á Jaðarsbökkum, íþróttahússins við Vesturgötu og Bjarnalaugar. Opnunartími verði styttur um eina klukkustund virka daga og tvær klukkustundir laugardaga og sunnudaga. Lokað verði alla stórhátíðardaga og sérstaka frídaga.

Þessi ákvörðun þýðir það að starfsmenn íþróttamannvirkja Akraneskaupstaðar eru að lækka frá rúmum 10% upp í rétt tæp 15%. Formaður hefur dæmi um einstaka starfsmenn sem eru við þetta að lækka um 365.000 til 800.000 krónur á ársgrundvelli.

Það er algjörlega óviðunandi að starfsmaður sem er með 3.379.000 krónur í árslaun, eða 281.000 á mánuði skuli lækka í launum niður í 3.011.000 krónur á ársgrundvelli eða sem nemur 31.000 krónum á mánuði. Hér er um að ræða skerðingu á launum sem ekki ná 300.000 krónum á mánuði. Það er ljóst að skólaliðar grunnskólanna munu einnig verða fyrir umtalsverðri skerðingu.

Rétt er að geta þess að grunnlaun starfsmanns íþróttamannvirkja sem er 25 ára eru í dag 171.000 krónur.

Formaður átti í dag samtal við Gísla S. Einarsson bæjarstjóra Akraneskaupstaðar þar sem formaður gerði alvarlegar athugasemdir við fyrirhugaða breytingu á vinnutilhögun skólaliða og starfsmanna íþróttamannvirkja og taldi formaður að það væri yfirlýst stefna íslenskra stjórnvalda og sveitastjórna að slá skjaldborg um þá starfsmenn sem ekki ná launum sem nema 300.000 krónum á mánuði.

Fram kom í máli bæjarstjóra að það væri hans persónulega mat að ekki ætti að hrófla við launum einstaklinga sem væru með undir 300.000 krónum á mánuði og tók hann undir með formanni að æskilegt hefði verið að launanefnd sveitarfélaga hefði mótað einhverja heildstæða stefnu fyrir öll sveitarfélög í landinu sem varðar niðurskurð á launakjörum starfsmanna.

Formaður tjáði bæjarstjóra að það væri grundvallaratriði að skipa vinnuhóp með þeim stéttarfélögum sem eiga aðild að kjarasamningum við Akraneskaupstað auk trúnaðarmanna, þar sem farið yrði yfir þessi mál. Því það er grundvallaratriði að víðtæk sátt náist á meðal starfsmanna Akraneskaupstaðar um þær sparnaðarleiðir sem fyrirhugaðar eru. Það er algjörlega ólíðandi að starfsfólk sem nær ekki 300.000 krónum í mánaðarlaun verði fyrir jafn mikilli skerðingu og raun ber vitni.

Formaður vill fá að sjá hvaða breytingum aðrir starfsmenn Akraneskaupstaðar taka á sínum launakjörum, t.d. forstöðumenn, starfsmenn í stjórnunarstöðum, kennarar og æðstu stjórnendur bæjarins.

Verkalýðsfélag Akraness hefur fullan skilning á því að sveitarfélög vítt og breitt þurfa að leita allra leiða til að vinna sig út úr því skelfingarástandi sem nú ríkir í íslensku efnahagslífi. Hins vegar gerir Verkalýðsfélag Akraness þá kröfu að slegin verði skjaldborg um þá starfsmenn sem eru undir 300.000 kr. í mánaðarlaun. Það er einfaldlega lítið sem ekkert hægt að taka af slíkum launum, þau rétt duga til lágmarksframfærslu miðað við þá gengdarlausu hækkun sem orðið hefur á greiðslubyrði fólks.

Því mun Verkalýðsfélag Akraness íhuga það sterklega að skrifa ekki undir kjarasamning sem nú liggur nánast klár fyrir við launanefnd sveitarfélaganna fyrr en þessi mál verða komin á hreint. Það hlýtur að vera skilningur á meðal allra að starfsmenn sem ná ekki 300.000 í mánaðarlaun geta á engan hátt tekið á sig skerðingu á sínum launum.

Það er óhætt að segja að nóg hafi verið að gera við að verja réttindi félagsmanna þessari viku en í heildina hefur þessi réttindavarsla skilað sjö félagsmönnum sem um ræðir yfir einni milljón króna.

Málin eru margvísleg en eitt málið laut að því að félagsmanni var ekki greiddur uppsagnafrestur eins og kjarasamningar kveða á um. Annað málið laut að því að leiðrétta þurfti laun vegna vinnu í matartímum og einnig var þar leiðrétting vegna aksturs í þágu vinnuveitenda. Þriðja málið laut að leiðréttingu á greiðslu fyrir aðalhreingerningar og fjórða málið laut að því að það vantaði yfirvinnutíma hjá þremur starfsmönnum fimm mánuði aftur í tímann.

Það liggur fyrir að ef minnsti vafi er á að fyrirtæki séu ekki að uppfylla ákvæði kjarasamninga gagnvart félagsmönnum þá fer félagið af fullri einurð í slík mál. En jákvæð niðurstaða fékkst í öll þessi mál eftir að félagið hafði farið yfir þau með þeim aðilum sem þau tengdust og kom því ekki til kasta þess að vísa þessum málum til lögmanns félagsins.

Rétt er að geta þess að frá nóvember 2003 hefur Verkalýðsfélag Akranes náð að verja réttindi sinna félagsmanna um sem nemur um 540 milljónum og takið eftir, yfir hálfan milljarð króna. En þetta eru allt mál þar sem félagið hefur þurft að hafa aðkomu, bæði með aðstoð lögmanna félagsins sem og mál sem unnist hafa fyrir dómstólum.

Það er mat formanns að það skiptir gríðarlegu máli fyrir félagsmenn að hafa öflug stéttarfélög til að verja sín réttindi ef þeir telja að verið sé að brjóta á þeim enda er leikurinn á milli launamannsins og atvinnurekandans afar ójafn og því gott að geta leitað til síns stéttarfélags.

Verkalýðsfélag Akraness sendi í dag bæjarráði og bæjarstjórn Akraness bréf þar sem óskað er eftir því að skipaður verði vinnuhópur vegna þeirra sparnaðaraðgerða sem bæjarráð samþykkti á fundi sínum þann 2. júlí sl. Í þessum vinnuhópi auk bæjaryfirvalda yrðu fulltrúar þeirra stéttarfélaga sem eiga aðild að kjarasamningum við Akraneskaupstað auk trúnaðarmanna.

Samkvæmt þeim tillögum sem nú liggja fyrir þá blasir við gríðarleg skerðing hjá starfsmönnum íþróttamannvirkja og skólaliðum og ljóst að það ríkir töluverð gremja á meðal starfsmanna, en starfsmenn munu lækka samkvæmt þessum tillögum frá rúmum 10% upp í tæp 15%. Sem dæmi þá er einstaklingur sem er með 280.000 í mánaðarlaun skertur um rúmar 30.000 kr. á mánuði.

Það er mat Verkalýðsfélags Akraness að skerðing á launum starfsmanna sem ekki ná 300.000 kr. sé algjörlega ólíðandi og óviðunandi.

Verkalýðsfélag Akraness kallar eftir upplýsingum um hvað aðrir hópar innan bæjarins þurfa að leggja af mörkum í þeim sparnaðaraðgerðum sem nú liggja fyrir og nægir að nefna þar forstöðumenn, kennara, starfsmenn í stjórnunarstöðum og æðstu stjórnendur bæjarins.

Það er von Verkalýðsfélags Akraness að bæjaryfirvöld muni verða við þessari beiðni félagsins um að skipa vinnuhóp því það er grundvallaratriði að víðtæk sátt ríki um þær sparnaðaraðgerðir sem framundan eru og mjög mikilvægt að slegin verði skjaldborg um þá starfsmenn Akraneskaupstaðar sem hafa hvað lægstar tekjurnar.

Dagana 21. til 22. september verður haldið námskeið fyrir trúnaðarmenn félagsins. Um er að ræða Trúnaðarmannanámskeið I, 2. þrep, en efni námskeiðsins er: lestur launaseðla, kynning á kjarasamningum, sjóðum og starfsemi félagsins svo og fræðsla um einelti á vinnustað. Skráning stendur yfir og enn eru laus pláss. Það er Félagsmálaskóli Alþýðu sem sér um skipulagningu og kennslu á námskeiðinu.

Samkvæmt kjarasamningum er trúnaðarmönnum heimilt að sækja námskeið í eina viku á ári án skerðingar á launum. Markmið slíkra námskeiða er að styrkja og efla trúnaðarmenn í sínum störfum.

Trúnaðarmenn eru hvattir til að skrá sig sem fyrst. Vanti trúnaðarmann á vinnustaðinn þinn og viljir þú koma á kosningu veitir starfsfólk skrifstofu VLFA fúslega aðstoð við framkvæmdina. Athygli er vakin á því að eftir kosningu trúnaðarmanns þarf að tilkynna um kjörið til félagsins þar sem félagið þarf að tilnefna nýjan trúnaðarmann formlega.

Rétt í þessu skrifaði Verkalýðsfélag Akraness undir samning um framlengingu og breytingar á kjarasamningi félagsins við Launanefnd sveitarfélaga.

Eins og fram kom hér á heimasíðunni þá velti formaður félagsins því alvarlega fyrir sér hvort hann ætti yfir höfuð að skrifa undir þennan kjarasamning vegna þeirrar ákvörðunar bæjarráðs Akraneskaupstaðar að breyta vinnutilhögun skólaliða og starfsmanna íþróttamannvirkja. Þessar breytingar hafa þau áhrif að launakjör áðurnefndra aðila eru að lækka frá 10% upp í tæp 15%.

Verkalýðsfélag Akraness tók þá ákvörðun að skrifa undir þennan samning á þeirri forsendu að allflest stéttarfélög hafa þegar gengið frá framlengingu á kjarasamningi. Mun Verkalýðsfélag Akraness hins vegar reyna eftir fremsta megni að fá þeim niðurskurði sem boðaður hefur verið á launakjörum starfsmanna Akraneskaupstaðar sem tilheyra VLFA breytt með einum eða öðrum hætti.

Sem dæmi þá hefur Verkalýðsfélag Akraness skrifað bæjarráði og bæjarstjórn bréf þar sem óskað er eftir því að skipaður verði vinnuhópur sem muni fara yfir þær sparnaðaraðgerðir sem boðaðar hafa verið. Þegar þetta er skrifað hefur ekkert svar borist frá bæjaryfirvöldum. Hægt er að lesa bréfið hér.

Það er í raun og veru grátbroslegt að ganga frá kjarasamningi sem kveður á um hækkun á lægstu töxtum upp á 6.750 kr. á sama tíma og kynntar eru breytingar á vinnutilhögun sömu aðila sem hafa í för með sér skerðingu á mánaðarlaunum frá rúmum 30.000 kr. upp í tæplega 60.000 kr á mánuði.

Það er skýlaus krafa Verkalýðsfélags Akraness að bæjaryfirvöld á Akranesi hverfi frá fyrirhuguðum breytingum á vinnutíma skólaliða og starfsmanna íþróttamannvirkja, sem leiða af sér jafnmikla tekjuskerðingu og raun ber vitni. Það er forkastanlegt að skerða laun sem ekki ná 300.000 kr. eins og áðurnefndar tillögur munu gera. Hér á heimasíðunni hefur birst dæmi um starfsmann sem er með 281.000 kr. í mánaðarlaun sem lækkar um rúmar 30.000 kr. á mánuði miðað við fyrirhugaða breytingu á vinnutilhögun. Þetta er ólíðandi og óviðunandi með öllu.

Aðalatriði samningsins má sjá með því að smella á meira.

Samningurinn mun birtast í heild sinni hér á heimasíðunni á morgun.

Aðalatriði samningsins:

• Gildistími samnings er 1. júlí 2009 – 30. nóvember 2010.
• Ný launatafla tekur gildi frá 1. júlí 2009.
• Launataxtar. Mánaðarlaun fyrir dagvinnu allt að kr. 180.000 hækka 1. júlí 2009 og 1. nóvember 2009 um kr. 6.750.-  en hækka minna frá 180.000 kr. að 210.000. Laun umfram 210.000 kr í júlí og 220.000 kr. í nóvember 2009 taka ekki hækkunum.  Mánaðarlaun fyrir dagvinnu allt að kr. 180.000.-  hækka 1. júní 2010 um kr. 6.500.- en hækka minna að kr. 225.000. Mánaðarlaun fyrir dagvinnu umfram kr. 225.000.- eru óbreytt.
• Starfsmenn í tímamældri ákvæðisvinnu og ræstingu samkvæmt fermetragjaldi hækka, sjá nánar meðfylgjandi skjal.
• Lágmarkslaun fyrir fullt starf skulu vera kr. 157.000.- frá 1. júlí 2009, kr. 165.000.- frá 1. nóvember 2010 og kr. 170.000.-  frá 1. júní 2010, fyrir starfsmenn 18 ára og eldri sem starfað hafa fjóra mánuði samfellt hjá sömu stofnun.
• Orlofsuppbót árið 2010 verður kr. 25.800.- 

Miðvikudaginn 30. ágúst síðastliðinn var komið að hinni árlegu ferð eldri félagsmanna Verkalýðsfélags Akraness. Þessar ferðir eru ómissandi þáttur í starfi félagsins og margir bíða þeirra með eftirvæntingu. Björn Ingi Finsen sem hefur tekið að sér fararstjórn mörg undanfarin ár ákvað að stíga til hliðar og í hans stað kom Guðmundur Kristjánsson og sagði frá hinu og þessu sem fyrir augu bar í ferðinni.

Að þessu sinni lá leiðin vestur í Dali, til Hólmavíkur og farið var suðurstrandirnar heim á leið. Lagt var af stað stundvíslega kl. 8:30 og var veðrið með besta móti. Farið var í tveimur rútum og sáu bílstjórarnir Atli og Sigurbaldur um aksturinn eins og oft áður í þessum ferðum og stóðu sig með prýði. Fyrst lá leiðin að Erpsstöðum til hjónanna Þorgríms og Helgu þar sem hópurinn skoðaði svæðið og gæddi sér á ís beint frá býli. Í fjósinu var meðal annars nýfæddur kálfur og inni í versluninni var hægt að kaupa ýmsar mjólkurvörur sem framleiddar eru á Erpsstöðum. Eftir hálftíma stopp á Erpsstöðum var kominn tími til að halda áfram og næst var áð hjá minnismerki við Staðarhólskirkju í Saurbæ. Minnismerkið er reist til minningar um þrjú skáld, þá Stein Steinarr, Stefán frá Hvítadal og Sturlu Þórðarson. Margir gengu einnig upp að kirkjunni og um kirkjugarðinn en á meðan hópurinn stoppaði þarna sveif örn tignarlega yfir svæðinu og vakti mikla athygli.

Nú var farið að líða að hádegi og þá átti hópurinn pantaðan mat í Bjarkalundi í Reykhólasveit. Þangað var mætt á slaginu 12 og beið þar dýrindis lambalæri með meðlæti. Mörgum þótti gaman að koma í Bjarkalund og rifja upp góðar minningar, meðal annars af böllum sem haldin voru þar. Boðið var upp á kaffisopa eftir matinn og eftir að flestir höfðu notið þess að ganga um staðinn í rólegheitum var aftur haldið af stað. Farið var yfir Þröskulda og ýmsir voru að fara þá leið í fyrsta sinn og þótti mikil breyting. Komið var til Hólmavíkur kl. 14 og haldið beint í Hólmavíkurkirkju. Þar tók á móti hópnum sr. Sigríður Óladóttir sem er sóknarprestur þar en hún er einmitt frá Akranesi og þekkti marga í hópnum. Í anddyri kirkjunnar sátu tveir harmonikkuleikarar og tóku á móti hópnum með því að spila „Kátir voru karlar“ öllum til mikillar ánægju. Sigríður sagði hópnum svo frá starfi sínu, kirkjunni og bæjarfélaginu. Eftir þessa heimsókn var haldið af stað í átt að Sauðfjársetrinu að Sævangi þar sem hópsins beið kaffihlaðborð. Boðið var upp á ýmsar kræsingar og naut fólk þess að sitja og spjalla saman á meðan veitingunum voru gerð skil. Fyrir utan mátti svo bæði finna heimalninga og hænur sem margir spjölluðu aðeins við.

Nú var komið að síðasta hluta ferðarinnar þar sem ekið var um suðurstrandirnar. Skyggnið var mjög gott og sást til allra átta. Enn eru kaflar á þessari leið þar sem er malarvegur en þeim hefur þó farið fækkandi. Rétt fyrir kl. 18 var komið að Staðarskála þar sem gert var stutt stopp til að rétta úr sér. Aftur var haldið af stað og hringnum var formlega lokað þegar ekið var framhjá afleggjaranum að Bröttubrekku. Áfram hélt hópurinn heim á leið og komið var að Jaðarsbökkum rétt rúmlega 19:30. Ánægðir en þreyttir ferðalangar héldu þá heim á leið eftir góðan dag. Myndir úr ferðinni má sjá hér.

Starfsmenn sveitarfélaga sem eru félagsmenn í Verkalýðsfélagi Akraness eru boðaðir á kynningarfund vegna samnings um framlengingu og breytingar á kjarasamningi Verkalýðsfélags Akraness við Launanefnd sveitarfélaga.

Fundurinn verður haldinn mánudaginn 20. júlí kl. 18:00 í Skrúðgarðinum, Akranesi.

Hægt verður að kjósa um samninginn að aflokinni kynningu. Einnig verður hægt að kjósa þriðjudaginn 21. júlí og miðvikudaginn 22. júlí á skrifstofu félagsins.

Þeir félagar sem starfa eftir samningnum eru eindregið hvattir til að mæta.

Samninginn í heild sinni er hægt að lesa með því að smella hér..

Helstu atriði samningsins má lesa með því að smella á meira.

Aðalatriði samningsins:

• Gildistími samnings er 1. júlí 2009 – 30. nóvember 2010.
• Ný launatafla tekur gildi frá 1. júlí 2009.
• Launataxtar. Mánaðarlaun fyrir dagvinnu allt að kr. 180.000 hækka 1. júlí 2009 og 1. nóvember 2009 um kr. 6.750.-  en hækka minna frá 180.000 kr. að 210.000. Laun umfram 210.000 kr í júlí og 220.000 kr. í nóvember 2009 taka ekki hækkunum.  Mánaðarlaun fyrir dagvinnu allt að kr. 180.000.-  hækka 1. júní 2010 um kr. 6.500.- en hækka minna að kr. 225.000. Mánaðarlaun fyrir dagvinnu umfram kr. 225.000.- eru óbreytt.
• Starfsmenn í tímamældri ákvæðisvinnu og ræstingu samkvæmt fermetragjaldi hækka, sjá nánar meðfylgjandi skjal.
• Lágmarkslaun fyrir fullt starf skulu vera kr. 157.000.- frá 1. júlí 2009, kr. 165.000.- frá 1. nóvember 2010 og kr. 170.000.-  frá 1. júní 2010, fyrir starfsmenn 18 ára og eldri sem starfað hafa fjóra mánuði samfellt hjá sömu stofnun.
• Orlofsuppbót árið 2010 verður kr. 25.800.- 

Nú liggur fyrir að samninganefnd Alþýðusambands Íslands hefur samþykkt samkomulag sem gert var við SA um breytingar á kjarasamningum sem undirritaðir voru þann 17. febrúar 2008.

Verkalýðsfélag Akraness skilaði Starfsgreinasambandi Íslands afstöðu sinni, en afstaða VLFA var ætíð skýr. Hún gekk út á það að atvinnurekendur stæðu í hvívetna við þann samning sem undirritaður var þann 17. febrúar 2008. Einungis tvö félög innan SGS vildu hafna því samkomulagi sem undirritað var 25. júní sl. við Samtök atvinnulífsins, það voru Verkalýðsfélag Akraness og Framsýn á Húsavík.

Verkalýðsfélag Akraness telur reyndar að fengnu lögfræðilegu áliti að samninganefnd ASÍ hafi ekki haft heimild til að fresta áður umsömdum launahækkunum eins og raunin varð. Það er alveg ljóst að félagið mun íhuga það sterklega þegar samningar eru lausir hvort félagið muni yfir höfuð veita SGS umboð til samningsgerðar aftur.

Vegna samkomulags um breytingar á kjarasamningum milli aðildarfélaga ASÍ og Samtaka atvinnulífsins er rétt að minna félagsmenn á að kauptaxtar hækkuðu um kr. 6.750 frá 1. júlí sl.

Búið er að uppfæra kauptaxta hér á heimasíðunni í samræmi við þetta.

Uppfærðir kauptaxtar Samiðnar við SA eru væntanlegir, en  taxtahækkun í þeim samningi er kr. 8.750.

Starfsmenn Norðuráls vænta góðs samningsNú eru allflestir kjarasamningar Verkalýðsfélags Akraness frágengnir, þ.e.a.s. framlenging á kjarasamningum við Samtök atvinnulífsins, Launanefnd sveitarfélaga og við Ríkið. Nú er einungis einn kjarasamningur eftir á þessu ári en það er kjarasamningur Norðuráls, en sá samningur rennur út í lok þessa árs.

Undirbúningur vegna kjarasamnings starfsmanna Norðuráls mun hefjast að loknum sumarleyfum, en það er ljóst að starfsmenn hafa eðlilega væntingar til töluverðra hækkana á sínum samningi.

Það er ljóst að þróun á heimsmarkaðsverði á áli mun hafa töluverð áhrif á það hvort góður næst eða ekki. Þegar gengið var frá samkomulagi við forsvarsmenn Norðuráls í febrúar sl. þá var álverð í sögulegu lágmarki þegar fengust undir 1300 dollarar fyrir tonnið.

Staðan í dag er mun betri en í febrúar og 17. júlí var álverðið t.a.m. komið upp í 1635 dollara fyrir tonnið sem er hækkun upp á 26% frá því í febrúar. Vissulega eru blikur á lofti varðandi álverð til lengri tíma, sérstaklega vegna birgðasöfnunar á heimsvísu, en Norðurál stendur vel að vígi hvað varðar sölu á áli því þeir hafa tryggt sölu á öllum sínum afurðum í það minnsta til ársins 2016.

Það skiptir gríðarlega miklu máli að álverð haldi áfram að hækka, enda mun það gefa Verkalýðsfélagi Akraness byr undir báða vængi þegar að kemur að kjarasamningagerð fyrir starfsmenn Norðuráls.

Það er skylda þeirra fyrirtækja sem eru hér á álmarkaðnum að greiða sínum starfsmönnum góð laun enda er hér um að ræða fyrirtæki sem eru að selja sínar afurðir í erlendri mynt og því til viðbótar hafa þessi fyrirtæki aðgengi að hagstæðum orkusamningum og síðast en ekki síst kost á afar hæfu og tryggu starfsfólki.