Eins og fram kemur í fjárlagafrumvarpinu er ekki gert ráð fyrir því að persónuafsláttur hækki á næsta ári eins og yfirlýsing ríkisstjórnarinnar frá 17. febrúar 2008 segir til um. Persónuafslátturinn er í dag 42.250 krónur, en ef staðið yrði við það loforð sem verkalýðshreyfingin fékk við gerð síðasta samnings þá ætti persónuafslátturinn að fara í rétt rúmar 49.000 krónur sem er hækkun upp á rétt tæpar 7000 krónur á mánuði.  Hægt að lesa yfirlýsingu ríkissjórnar frá 17. febrúar 2008 hér

Formaður félagsins gerði alvarlegar athugasemdir við það á ársfundi Alþýðusambands Íslands að ekki skuli hafa verið gengið frá því í stöðugleikasáttmálanum margumtalaða að hækkun persónuafsláttar kæmi til framkvæmda. Það liggur fyrir að hækkun persónuafsláttar nýtist þeim tekjulægstu hvað best. Við erum eins og áður hefur komið fram að tala um 7000 króna hækkun sem er örlítið meira heldur en launataxtar eiga að hækka um 1. nóvember samkvæmt kjarasamningi frá 17. febrúar 2008.

Það er með ólíkindum að það skuli vera ríkisstjórn sem kennir sig við félagshyggju-, jafnaðar- og velferðarstjórn sem ætli ekki að standa við það samkomulag sem gengið var frá í febrúar 2008 sem var grunnurinn að því að gengið var frá hófstilltum kjarasamningum á sínum tíma.

Það er mat Verkalýðsfélags Akraness að það sé ekki hægt undir nokkrum kringumstæðum að sætta sig við það að persónuafslátturinn komi ekki til framkvæmda um næstu áramót eins og um hefur verið samið enda er verðtrygging persónuafsláttar eitt af aðalbaráttumálum verkalýðshreyfingarinnar og við slíkt er ekki hægt að una.

Formaður félagsins var í Kastljósi í gærkveldi þar sem málefni verkalýðshreyfingarinnar voru til umfjöllunar.  Horfa hér. 

Guðmundur Gunnarsson formaður RSÍ skrifar inná blogg sitt á eyjan.is í dag um aðdraganda að Kastljósþætti sem formanni Verkalýðsfélags Akraness var boðið í gær til að ræða hin ýmsu málefni verkalýðshreyfingarinnar.  Guðmundur gagnrýnir þáttastjórnandann Helga Seljan harkalega í umræddu bloggi.

Það kom einnig fram í skrifum formanns RSÍ að hann hafi ekki minnstu hugmynd hvaða tillögur formaður Verkalýðsfélags Akraness hefur sett fram um  lífeyrissjóðina, Guðmundur segir orðrétt ,"hef aldrei heyrt þær og færi vart að mæta í viðtal um það, enda ekki mitt að dæma þær tillögur". 

Þessi skrif formanns RSÍ eru stórfurðuleg og er þar vægt að orði kveðið, var hann ekki á ársfundinum þar sem tillaga VLFA um lífeyrissjóðina var til umfjöllunar?  Jú, formaður RSÍ var á ársfundi ASÍ og tók meira segja til máls um tillöguna og því til viðbótar hefur formaður RSÍ skrifað grein um tillögu VLFA á heimsíðu RSÍ sjá hér.  Þessi skrif formanns RSÍ eru því með öllu óskiljanleg.

Hann gagnrýndi Helga Seljan umsjónarmann Kastljós harðlega í umræddu bloggi.  Helgi Seljan svarði Guðmundi Gunnarssyni í dag á Pressunni sjá HÉR .

 Svar Helga Seljan umsjónarmanns Kastljós er hér að neðan í heild sinni

"Ég finn mig knúinn til að svara og í leiðinni leiðrétta stóryrtar stílæfingar Guðmundar Gunnarssonar, formanns Rafiðnaðarsambands Íslands, á vefsvæði Guðmundar á Eyjunni, sem seinna birtust á Kaffistofu Pressunar:

Nú hefur komið í ljós að launafólk mun fá launahækkun 1. nóvember nk. þannig að launatjón launþega vegna afsals og frestunar á launahækkunum verður ekki meira en orðið er.

Það hefur áður komið fram hér á heimasíðunni að verkafólk sem starfar á berstrípuðum lágmarkstöxtum hefur verið þvingað til að afsala sér launahækkunum sem nema allt að 100.000 kr. á umræddu tímabili.

Stjórn Verkalýðsfélags Akraness veltir því fyrir sér á hvaða forsendum atvinnurekendur sjá sér fært núna að standa við þær launahækkanir sem áttu að taka gildi 1. mars sl. Sérstaklega í ljósi þess að fátt virðist hafa orðið að veruleika í margumtöluðum stöðugleikasáttmála og VLFA veltir því líka fyrir sér hvort ekki sé öruggt að gengið hafi verið frá því við ríkisstjórn Íslands að persónuafsláttur hækki í samræmi við það sem yfirlýsing ríkisstjórnarinnar frá 17. febrúar 2008 segir til um.

Það væri með ólíkindum ef stjórn sem gefur sig út fyrir að vera félagshyggju- jafnaðar og velferðarstjórn ætli sér ekki að standa við hækkun persónuafsláttar eins og um var samið. Á þeirri forsendu þurfa aðilar vinnumarkaðarins að upplýsa almenning um hvort búið sé að ganga frá því hvort persónuafsláttur komi til framkvæmda um áramótin eða ekki.

Formaður félagsins er þeirrar skoðunar að afsal og frestun kjarasamninga hafi verið stórkostleg mistök í ljósi þess að verkafólk var þvingað til að afsala sér þessum hækkunum og það hjá fyrirtækjum sem klárlega hafa fulla burði til að standa við gerða samninga. Nægir að nefna í því samhengi öll fyrirtæki sem starfa í útflutningi.

Samkvæmt Hagstofu Íslands eru rúmlega 1.600 fyrirtæki sem hafa á síðustu 12 mánuðum starfað í útflutningi. Þetta er ekki nákvæm tala, en þetta er nálgun eins og Hagstofan tjáði formanni Verkalýðsfélags Akraness. Það væri því fróðlegt að vita hversu margir einstaklingar starfa hjá þessum fyrirtækjum, en ljóst er að um tugi þúsunda einstaklinga er að ræða. Fyrirtæki sem notið hafa góðs af þeirri gengislækkun sem orðið hefur á undanförnum misserum.

Þann 1. nóvember nk. munu kauptaxtar verkafólks almennt hækka um 6.750 kr. og taxtar iðnaðarmanna um 8.750 kr. Þá er einnig gert ráð fyrir grunnhækkun launa um 3,5% en frá henni dragast launahækkanir frá og með 1. janúar 2009 til og með 1. nóvember, þ.m.t. vegna hækkunar kauptaxta. Hinn 1. júní 2010 skulu laun hækka um 2,5% en hækki laun meira vegna sérstakrar hækkunar kauptaxta, gildir sú hækkun.

Kjarasamningur starfsmanna Norðuráls rennur út um áramótin og var fyrsti formlegi samningafundurinn haldinn í morgun í húsakynnum ríkissáttasemjara.

Á þessum fyrsta fundi var afgreidd viðræðuáætlun og kemur meðal annars fram í þessari áætlun að samningsaðilar hafi það markmið að búið verði að ganga frá nýjum kjarasamningi fyrir 15. desember næstkomandi. Nú verður tíminn einn að leiða það í ljós hvort að sú áætlun muni takast eður ei.

Ekki er ólíklegt að lögð verði mikil áhersla á launaliðinn í komandi viðræðum og mun Verkalýðsfélag Akraness leggja ofuráherslu á að launakjör Norðuráls verði með sambærilegum hætti og annarra fyrirtækja í samskonar iðnaði. Við annað er alls ekki hægt að una. 

Fram hefur komið í máli forsvarsmanna Norðuráls að erfitt verði að fara í launalið samningsins á meðan óvissa ríkir varðandi nýjan Orku-, auðlinda- og umhverfisskatt. Verkalýðsfélag Akraness getur ekki tekið þátt í því að þessi óvissa varðandi nýjan orkuskatt hafi áhrif á komandi kjaraviðræður, enda er ekki hægt að sætta sig við að aðgerðir Ríkisstjórnar Íslands í skattamálum hafi áhrif á kjarasamningsviðræður.

Rekstrarskilyrði álfyrirtækja hafa skánað töluvert á liðnum mánuðum og nægir að nefna í því samhengi að í febrúar 2009 var álverð pr. tonn 1260 dollarar en í dag er álverðið komið upp í 1900 dollara og hefur hækkað um rúm 50% á áðurnefndu tímabili. Það er alveg ljóst að jákvæð þróun á álverði að undanförnu mun gefa stéttarfélögunum byr undir báða vængi með að ná ásættanlegum kjarasamningi fyrir starfsmenn Norðuráls.

Næsti fundur er fyrirhugaður á næsta föstudag hjá ríkissáttasemjara.

Í kvöld mun stjórn Verkalýðsfélags Akraness koma saman til fundar og eitt af málefnum fundarins er sú staðreynd að N1 var að skila 500 milljónum í hagnað á fyrstu 6 mánuðum ársins. Fyrir fundinn verður lögð áskorun til stjórnar N1 þar sem þess verður farið á leit við fyrirtækið að það greiði sínum starfsmönnum þær launahækkanir sem um var samið 17. febrúar 2008.

Eins og fram hefur komið á heimasíðunni þá var verkafólk þvingað til að afsala sér áður umsömdum launahækkunum. Nemur tap almenns verkamanns sem starfar eftir lágmarkstaxta upp undir 100.000 kr. vegna þess samkomulags sem ASÍ og SA gerðu á sínum tíma.

Verkalýðsfélag Akraness hefur ætíð verið á móti áður nefndu samkomulagi með þeim rökum að til væru fyrirtæki sem klárlega hefðu fjárhagslega burði til að standa við þann hófstillta kjarasamning sem gerður var þann 17. febrúar 2008. Nægir að nefna fyrirtæki sem starfa í útflutningi og fyrirtæki sem hafa möguleika á að varpa sínum vanda beint út í verðlagið.

Ef stjórn félagsins samþykkir þá áskorun sem fyrir hana verður lögð á fundinum í kvöld þá verður áskorunin send til stjórnar N1 á morgun.

Félagið hefur áður sent út áskorun til fyrirtækja þar sem þau fyrirtæki sem hafa fjárhagslega burði til eru hvött til að standa við gerða samninga.

Í gær var rætt var við formann félagsins í Reykjavík síðdegis. Hægt er að hlusta hér.

Ráðherrar í heimsókn í verksmiðjunni fyrir fáeinum dögum síðanEins og fram hefur komið hér á heimasíðunni þá hafa starfsmenn Sementsverksmiðjunnar samþykkt að fallast á tillögur framkvæmdastjóra verksmiðjunnar um að minnka starfshlutfall tímabundið niður í 50%. Þetta gera starfsmenn vegna þeirra erfiðleika sem fyrirtækið á nú við að etja sökum mikils samdráttar á byggingarmarkaði og ekki síður vegna þeirra grunsemda um að Aalborg Portland hafi hér á landi stundað undirboð á sementsmarkaðnum.

Það er staðreynd studd gögnum að danska fyrirtækið hefur selt sement undir markaðsvirði þegar það var að koma undir sig fótunum hér á landi. Rétt er að rifja upp viðtal í Nordjyllands Stiftstidende við forstjóra Aalborg Portland í Danmörku, Sören Vinter, í september 2002 kom fram sú gífurlega áhersla sem fyrirtækið legði á íslenska markaðinn enda hefði það náð 25 prósenta hlutdeild á aðeins tveimur árum. Í viðtalinu segir forstjórinn að hann líti á Ísland sem heimamarkað Aalborg Portland. Hann gekk svo langt að segja að til langs tíma litið yrði ekki pláss fyrir bæði Aalborg Portland og Sementsverksmiðjuna á íslenska markaðnum og Aalborg Portland sæi ákveðin tækifæri í yfirtöku á rekstri Sementsverksmiðjunnar á Akranesi.

Það er margt sem bendir til þess að það hafi verið tilgangur Aalborg Portland að koma Sementsverksmiðjunni út af markaðnum ef mark er takandi á viðtalinu hér að ofan.

Að sjálfsögðu eigum við Íslendingar að styða íslenska framleiðslu, verja íslensk störf og tryggja það að erlendir aðilar komi ekki hér inn á íslenskan markað og drepi niður íslenska framleiðslu með undirboðum sem einungis yrðu tímabundin.

Hægt er að lesa bréf framkvæmdastjóra Sementsverksmiðjunnar til viðskiptaráðs með því að smella hér.

Næstkomandi fimmtudag munu um 100 félagsmenn Verkalýðsfélags Akraness 70 ára og eldri halda í dagsferð sem félagið býður árlega upp á.  Lagt verður af stað kl. 9:00 frá Íþróttamiðstöðinni að Jaðarsbökkum.

Þetta árið verður farið um Snæfellsnes og Dali. Áætluð heimkoma er um kl. 18:30.

Áð verður á nokkrum stöðum í ferðinni og m.a. boðið uppá léttan hádegisverð á Hótel Stykkishólmi. Boðið verður upp á aðrar veitingar um kaffileytið. Leiðsögumaður í ferðinni verður Björn Finsen.

Boðsbréf hefur verið sent til félagsmanna og fer skráning fram á skrifstofu félagsins að Sunnubraut 13 eða í síma 430-9900 og stendur hún til kl. 12:00 á hádegi miðvikudaginn 9. september n.k.

Myndir og fréttir úr ferðinni verða settar inn hér á heimasíðunni við fyrsta tækifæri.

Eins og fram hefur komið hér á heimasíðu félagsins sendi stjórn Verkalýðsfélags Akraness stjórn N1 áskorun um að fyrirtækið greiddi starfsmönnum sínum þær áður umsömdu launahækkanir sem hefðu átt að taka gildi 1. mars ef ekki hefði komið til samkomulags um frestun á milli samninganefndar Alþýðusambands Íslands og Samtaka atvinnulífsins. Áskorunin var send út sökum þess að N1 skilaði tæpum 500 milljónum í hagnað eftir skatta á fyrstu 6 mánuðum ársins. 

Það er skoðun stjórnar Verkalýðsfélags Akraness að þau fyrirtæki sem hafi fjárhagslega burði til að standa við þann hóflega gerða kjarasamning frá 17. febrúar 2008 eigi að standa við hann.

Einnig kom einnig fram hér á heimasíðunni að fjárhaglegt tjón almenns verkamanns vegna þessarar frestunar og linkindar í forystu ASÍ mun nema um eitt hundrað þúsund krónum og munar um minna fyrir verkafólk sem starfar á berstrípuðum lágmarkstöxtum. 

Stjórn Verkalýðsfélags Akraness væntir þess að fá skriflegt svar frá stjórn N1 um þá áskorun sem félagið sendi frá sér, um leið og stjórn N1 hefur fjallað um erindi Verkalýðsfélags Akraness.

Hægt er að lesa áskorun stjórnar VLFA til stjórnar N1 með því að smella hér.