Ríkisstjórn Íslands verður að standa vörð um SementsverksmiðjunnaUmfjöllun Verkalýðsfélags Akraness um rekstrarerfiðleika Sementverksmiðjunnar sökum samdráttar á byggingarmarkaði og að ríkið og opinberir aðilar eru að nota innflutt danskt sement á sama tíma og verksmiðjan berst fyrir lífi sínu hefur vakið gríðarleg viðbrögð. 

Jón Bjarnason, sjávarútvegs- og landbúnaðarráðherra, tók málefni Sementsverksmiðjunnar á Akranesi til umfjöllunar á ríkisstjórnarfundi í morgun. Hann segir alvörumál verði Íslendingar háðir innflutningi á sementi. Mjög mikilvægt sé að grípa til aðgerða til að tryggja framtíð íslenskrar sementsframleiðslu.  Formaður Verkalýðsfélags Akraness fagnar innilega þessum jákvæðu viðbrögðum ráðherrans.

Rétt er að geta þess enn og aftur að Sementsverksmiðjan á Akranesi hefur frá upphafi skilað þjóðinni miklum arði. Hún hefur framleitt rúmlega 5,5 milljónir tonna af sementi úr innlendu hráefni og sparað þjóðinni þann gjaldeyri sem annars hefði verið varið til innflutnings á sementi. Verði stoðunum kippt undan starfsemi verksmiðjunnar mun það hafa alvarlegar afleiðingar.  Um 50 manns og um 90 afleidd störf glatast, tækniþekking sem byggð hefur verið upp á síðustu áratugum verður að engu og sement sem er aðlagað að þörfum íslensks markaðar, víkur fyrir innfluttu sementi.  Rétt er að geta þess að íslenska sementið er um 95% íslenskt hráefni.

Það verður að standa vörð um þá framleiðslu og störf sem unnin er í Sementverksmiðjunni hér á Akranesi með öllum tiltækum ráðum enda hefur hún skilað íslensku samfélagi miklum arði og sparað gríðarlegan gjaldeyrir fyrir þjóðarbúið.  Íslenskt atvinnulíf má alls ekki við því að tapa fleiri störfum en orðið er og því verðum við að styðja íslenska framleiðslu.

Núverandi stjórnvöld hafa margítrekað bæði fyrir og eftir kosningar að slegin verði skjaldborg um fyrirtæki og heimili þessa lands og einnig að byggð verði svokölluð velferðarbrú.  Því miður stefnir allt í að VELFERÐARBRÚIN verði byggð úr dönsku sementi ef ríkið heldur áfram að stuðla að innflutningi á dönsku sementi.

Fjallað hefur verið um málið á vef rúv skoða hér.  Einnig var fjallað um málið í Fréttablaðinu í dag og á eyjunni.is skoða hér

Tveir ráðherrar ríkisstjórnar Íslands munu koma í heimsókn í Sementsverksmiðjuna hér á Akranesi í kl. 13:00 í dag.   Þeir ráðherrar sem um ræðir eru þær Svandís Svavarsdóttir umhverfisráðherra og Katrín Júlíusdóttir iðnaðarráðherra.

Heimsóknin byrjar á því að fundað verður með starfsmönnum og forsvarsmönnum verksmiðjunnar og að því loknu verður ráðherrunum sýnd verksmiðjan og þá starfsemi sem þar fer fram.

Væntanlega mun verða rætt á fundinum um samdráttinn í sementssölu og ósk forsvarsmanna Sementsverksmiðjunnar um að starfshlutfall starfsmanna verði lækkað tímabundið niður í 50% og að framleiðsla verði stöðvuð um nokkurra mánaða skeið. 

Einnig verður væntanlega rætt um þá gagnrýni Verkalýðsfélags Akraness að íslenska ríkið skuli stuðla að innflutningi á sementi á sama tíma og íslensk sementsframleiðsla á verulega undir högg að sækja. 

Það er Aalborg Portland Helguvík sem er íslenskt fyrirtæki í eigu Dana sem flytur inn sement frá Danmörku og hafa verið flutt inn rúm 20 þús tonn á þessu ári að verðmæti ca 240 milljóna í gjaldeyri.  Í fyrra var flutt inn um 111 þúsund tonn af dönsku sementi. Helsti kúnni Aalborg sem flytur inn danska sementið er Steypustöðin h.f sem er í eigu Íslandsbanka og eins og flestir vita er Íslandsbanki í eigu ríkisins.

Jón Bjarnason, sjávarútvegs- og landbúnaðarráðherra, tók málefni Sementsverksmiðjunnar á Akranesi til umfjöllunar á ríkisstjórnarfundi í fyrradag. Hann segir alvörumál verði Íslendingar háðir innflutningi á sementi. Mjög mikilvægt sé að grípa til aðgerða til að tryggja framtíð íslenskrar sementsframleiðslu.  Ráðherrann hefur leggið undir ámælum fyrir þessa afstöðu sína frá Samtökum verslunar og þjónustu sem er að mati formanns Verkalýðsfélags Akraness óskiljanlegt.

Eitt af hlutverkum stéttarfélaga er að verja störf sinna félagsmanna og á þeirri forsendu fagnar Verkalýðsfélag Akraness stuðningi Jóns Bjarnasonar, sjávarútvegs- og landbúnaðarráðherra í þessu máli.  Er hægt að gagnrýna ráðherrann fyrir að vilja standa vörð um íslenska framleiðslu sem hefur skilað íslensku þjóðarbúi gríðarlegum arði í gegnum árin og sparað íslensku þjóðinni umtalsverðan gjaldeyrir. 

Að sjálfsögðu eigum við Íslendingar að styðja íslenska framleiðslu og velja Íslenskt og verja íslensk störf.  Gunnar Hermann Sigurðsson, framkvæmdastjóri Sementsverksmiðjunnar sendi frá sér fréttatilkynningu í gær og sagði Gunnar meðal annars þetta:

Aalborg Portland í Danmörku hefur hins vegar frá upphafi lagt töluvert á sig til að bregða fæti fyrir rekstur Sementsverksmiðjunnar. Í þessu samhengi er vert að rifja upp þá staðreynd að danska fyrirtækið seldi sement undir markaðsvirði þegar það var að koma undir sig fótunum hér á landi. Í viðtali Nordjyllands Stiftstidende við forstjóra Aalborg Portland í Danmörku, Sören Vinter, í september 2002 kom fram sú gífurlega áhersla sem fyrirtækið legði á íslenska markaðinn enda hefði það náð 25 prósenta hlutdeild á aðeins tveimur árum. Í viðtalinu segir forstjórinn að hann líti á Ísland sem heimamarkað Aalborg Portland. Hann gekk svo langt að segja að til langs tíma litið yrði ekki pláss fyrir bæði Aalborg Portland og Sementsverksmiðjuna á íslenska markaðnum og Aalborg Portland sæi ákveðin tækifæri í yfirtöku á rekstri Sementsverksmiðjunnar á Akranesi

Gunnar sagði einnig í sinni fréttatilkynningu að á krepputímum eins og þeim sem íslenska þjóðin er að ganga í gegnum er nauðsynlegt að verja störf eins og kostur er og hamla gegn stöðnun í samfélaginu. Það verður best gert með því að halda áfram opinberum framkvæmdum eða auka þær ef kostur er, eins og stjórn og starfsmenn Sementsverksmiðjunnar hafa bent á. Einnig er mikilvægt að hið opinbera stuðli að uppbyggingu nýrra stórverkefna á sviði atvinnulífsins víða um land. Á þann hátt skapast fjöldi nýrra atvinnutækifæra sem styður við þá starfsemi sem fyrir er í landinu.

Framleiðsla Sementsverksmiðjunnar er fyllilega samkeppnisfær við sement Aalborg Portland, bæði hvað varðar verð og gæði. Það hlýtur því að teljast eðlilegt að Sementsverksmiðjan hafi sömu möguleika og Aalborg Portland á því að selja steypustöð í eigu ríkisins sement. Stjórnendur og starfsmenn Sementsverksmiðjunnar eru að biðja um jafnan rétt en ekki fyrirgreiðslu frá hinu opinbera.

Sementsverksmiðjan á Akranesi hefur frá upphafi skilað þjóðinni miklum arði. Hún hefur framleitt rúmlega 5,5 milljónir tonna af sementi úr innlendu hráefni og sparaði þjóðinni þann gjaldeyri sem annars hefði verið varið til innflutnings á sementi. Ljóst er að Sementsverksmiðjan mun ekki, frekar en mörg önnur íslensk fyrirtæki í byggingariðnaði, lifa af viðvarandi frostavetur á framkvæmdasviðinu. Núverandi staða mun  á endanum kippa stoðunum undan starfsemi hennar með alvarlegum afleiðingum. Vel á annað hundrað störf glatast, tækniþekking sem byggð hefur verið upp á síðustu áratugum verður að engu og sement, aðlagað að þörfum íslenska markaðarins víkur fyrir innfluttu sementi,"  segir í yfirlýsingu frá Gunnari Sigurðssyni framkvæmdastjóra Sementsverksmiðjunnar

Í gær sendi N1 frá sér afkomutilkynningu fyrir fyrstu 6 mánuði ársins. Þar kemur fram að hagnaður af rekstri N1 var 474 milljónir króna á áðurnefndu tímabili en á sama tímabili á síðasta ári var 98 milljóna króna hagnaður af rekstrinum.  Einnig segir í tilkynningunni að kjarnastarfsemi félagsins hafi gengið vel á árinu og reiknað sé með að afkoma ársins verði betri en árið 2008.  Þetta verða að teljast mjög jákvæð tíðindi.

Hins vegar er rétt að rifja það upp að samninganefnd Alþýðusambands Íslands gekk í tvígang frá frestun við Samtök atvinnulífsins á þeim umsömdu launahækkunum sem kveðið var á um í kjarasamningi sem gerður var 17. febrúar 2008.   En í þeim kjarasamningum var kveðið á um að laun þeirra sem störfuðu eftir launatöxtum ættu að hækka um 13.500 kr. 1. mars sl. og þeir sem störfuðu eftir taxtakerfi áttu að hækka um 3,5%.

Eins og flestir muna þá gekk fyrri frestun út á það að launþegar fengu enga hækkun 1. mars sl. eins kjarasamningurinn kvað á um en til stóð að hún kæmi öll til framkvæmda 1. júlí.  Það var ekki heldur staðið við það samkomulag og gengu ASÍ og SA frá öðru samkomulagi í júní þar sem kveðið var á um 6.750 kr hækkun til þeirra sem störfuðu á berstrípuðum launatöxtum og hinn helmingurinn af 13.500 kr. á að koma 1. nóvember nk.

Ástæðan sem gefin var fyrir því að fresta áður umsömdum launahækkunum til verkafólks var bág staða fyrirtækja í kjölfar bankahrunsins og fyrirtæki hefðu ekki bolmagn til að standa við þær launahækkanir sem um hafði verið samið.

Eins og flestir muna þá voru sex landsbyggðafélög á móti því að fresta umsömdum launahækkunum og var Verkalýðsfélag Akraness eitt þeirra.  Formaður félagsins benti m.a. á að það væru klárlega til fyrirtæki sem hefðu fjárhagslega burði til að standa við gerða samninga og nefndi hann t.d. fyrirtæki sem starfa í útflutningi og einnig Olíufélögin sem hafa varpað sínum vanda beint útí verðlagið.  Því miður var samninganefnd Alþýðusambands Íslands ekki sammála Verkalýðsfélagi Akraness í þessu máli.

Rétt er að rifja einnig upp baráttu Verkalýðsfélags Akraness vegna arðgreiðslna HB Granda en þar gagnrýndi Verkalýðsfélag Akraness harðlega að fyrirtækið væri að greiða út arð á sama tíma og fiskvinnslu- og verkafólk var þvingað til að fresta sínum umsömdu launahækkunum.  Eins og flestir muna ákvað HB Grandi að standa að fullu við þær launahækkanir sem áttu að taka gildi 1. mars sl. og það gerðu einnig fjölmörg önnur fiskvinnslufyrirtæki.  Barátta Verkalýðsfélags Akraness skilaði 13.500 kr. hækkun á mánuði til hundruða fólks sem starfar í fiskvinnslu.

Nú kemur í ljós að N1 er að skila um 500 milljónum í hagnað á fyrstu 6 mánuðum þessa árs og reikna forsvarsmenn N1 með að afkoman verði betri á þessu ári hjá fyrirtækinu en á árinu 2008. Til hvers á fyrirtæki sem er að skila slíkum hagnaði að fá afslátt á hóflega gerðum kjarasamningi frá 17. febrúar 2008? Það er engin ástæða til slíks.

Á þeirri forsendu skorar Verkalýðsfélag Akraness á stjórnendur og eigendur N1 að endurgreiða því góða starfsfólki sem hjá því starfar þær hækkanir sem ella hefðu komið til ef ASÍ og SA hefðu ekki gengið frá frestun á áður umsömdum launahækkunum.

Fjárhaglegt tjón bensínafgreiðslumanns vegna þessarar frestunar og linkindar í forystu ASÍ mun nema um eitt hundrað þúsund krónum og munar um minna fyrir verkafólk sem starfar á berstrípuðum lágmarkstöxtum. Stjórn Verkalýðsfélag Akraness hefur lýst því yfir að félagið er tilbúið til að sýna fyrirtækjum sem eru í fjárhagslegum vandræðum skilning og umburðalyndi og þá sérstaklega fyrirtækjum í byggingariðnaði og honum tengdum.

En það er hins vegar alls engin ástæða til að fresta áður umsömdum launahækkunum hjá fyrirtækjum sem selja sínar afurðir erlendis og njóta góðs af þeim gengisbreytingum sem orðið hafa. Einnig olíufyrirtækjunum sem varpa öllum sínum vanda beint útí verðlagið sem síðan hefur áhrif á verðtryggðu lánin okkar. 

Stjórn Verkalýðsfélags Akraness mun senda stjórn N1 áskorun eftir helgi þar sem þess verður farið á leit við fyrirtækið að það standi í einu og öllu við þann kjarasamning sem gerður var 17. febrúar 2008 í ljósi þess að afkoma fyrirtækisins er góð og stefnir í að verða betri á þessu ári en í fyrra.  Ef fyrirtækið verður við þessari áskorun félagsins þá munu starfsmenn í 100% starfi geta átt von á endurgreiðslu allt að 100.000 kr. og munar um minna fyrir lágtekjufólk sem hefur þurft að horfa uppá stóraukna greiðslubyrði.   

Ríflega þriðjungur eða 35% þeirra sem eru í launaðri vinnu hafa lent í því að laun eða starfshlutfall hefur verið skert frá hruni bankanna í október.  Þetta kemur fram í skoðanakönnun sem Capacent Gallup gerði fyrir ASÍ í júní.

Flestir eða rúmlega 18% hafa lent í launalækkun, hjá 9% hefur vinnutími verið styttur og 8% hafa orðið fyrir annarskonar skerðingu.  Þetta er mikil aukning frá því í desember 2008 þegar 21% launafólks hafði orðið fyrir í slíkri skerðingu.

Mun fleiri karlar en konur hafa lent í skerðingu launa og/eða starfshlutfalls og þá vekur athygli að 40% iðnaðarmanna hafa orðið fyrir því að laun hafa verið lækkuð eða vinnutími styttur.  Þá hafa þeir sem eru með laun yfir 550 þúsund á mánuði frekar lent í launalækkun en þeir sem hafa lægri laun.  Nákvæmt niðurbrot svara við spurningu um skerðingu launa og starfshlutfalls má sjá hér.

Í gær var haldinn stjórnarfundur þar sem hin ýmsu mál voru til umfjöllunar. Aðalmálið var nýgerður stöðugleikasáttmáli og afstaða félagsins til samkomulags samninganefndar ASÍ og Samtaka atvinnulífsins frá 25. júní sl.

Afstaða félagsins hefur ætíð verið hvellskýr hvað varðar afslátt og frestun á kjarasamningi sem gerður var 17. febrúar 2008. Hún er sú sama og þegar umsömdum launahækkunum sem taka áttu gildi 1. mars sl. var frestað, það er að Samtök atvinnulífsins standi í einu og öllu við hóflega gerðan kjarasamning sem undirritaður var þann 17. febrúar 2008.

Verkafólk sem vinnur eftir launatöxtum hefur nú þegar orðið af 54.000 kr. því ef staðið hefði verið við kjarasamninginn frá 2008 þá hefði launataxtar hækkað um 13.500 kr. þann 1. mars sl. Verkafólk hefur því miður enga burði til að gefa af sínum launum í ljósi þess að ríki, sveitarfélög, verslunareigendur, olíufélög, tryggingafélög og aðrir þjónustuaðilar varpa sínum vanda beint út í verðlagið. Greiðslubyrði verkafólks hefur aukist gríðarlega á undanförnum mánuðum og misserum.

Ef það verður hins vegar vilji meirihluta verkalýðshreyfingarinnar að taka áðurnefndu samkomulagi við SA þá er það skýlaus krafa Verkalýðsfélags Akraness að slíkt verði lagt í allsherjaratkvæðagreiðslu á meðal þeirra félagsmanna sem vinna eftir áðurnefndum kjarasamningum.

Því miður er margt sem bendir til þess að samninganefnd ASÍ hræðist að fara með samkomulagið frá 25. júní í allsherjaratkvæðagreiðslu. Formaður Verkalýðsfélags Akraness trúir því ekki fyrr en hann tekur á því að samkomulagið frá 25. júní verðir ekki lagt fyrir þá félagsmenn sem starfa eftir þeim samningum sem gerðir voru 17. febrúar 2008. Því miður óttast formaður að nú þegar sé búið að ákveða að fara ekki með samkomulagið í allsherjaratkvæðagreiðslu.

Verkalýðsfélag Akraness hefur einnig gert athugasemdir við að samninganefnd ASÍ hafi ekki heimild til að afgreiða endurskoðunarákvæði kjarasamninganna með þeim hætti sem hún hefur gert, þ.e.a.s. að fresta umsömdum launahækkunum sem áttu að taka gildi 1. mars sl. og síðan aftur 25. júní en í því samkomulagi er gert ráð fyrir að helmingur af 13.500 kr. komi til framkvæmda 1. júlí.

Þessa afstöðu byggir Verkalýðsfélag Akraness á lögfræðilegu áliti sem félagið lét gera. Lögfræðiálitið er hægt að lesa í heild sinni með því að smella hér. 

Rætt var við formann Verkalýðsfélags Akraness í Reykjavík síðdegis í gær um hin ýmsu atriði tengd réttindum launafólks. Hægt er að hlusta með því að smella hér.

Írskir dagar hófust formlega í morgun þegar tæplega 200 börn frá leikskólum bæjarins komu saman í miðbænum, sungu og skemmtu sér. Hver leikskóli var klæddur í litum írska fánans og saman mynduðu börnin fánann á miðju Merkurtúninu. Þaðan var haldið í skrúðgöngu á Akratorg þar sem börnin tóku lagið með Gísla S. Einarssyni, bæjarstjóra og öðrum gestum sem fjölmenntu á torgið.

Mikið er um að vera í bænum núna um helgina, götugrill, kvöldvaka, tívolí, sandkastalakeppni, Akraneshlaupið og fjölskyldudagskrá í Skógræktinni er aðeins brot af því sem boðið verður upp á, lifandi tónlist verður út um allan bæ að ógleymdri Lopapeysunni víðfrægu. Dagskrána í heild sinni má finna hér.

Bæjarhátíðir sem þessi hafa fest sig í sessi víða um land og af samtölum við Skagamenn að dæma þá hafa þeir margir myndað sterkar taugar til þessarar skemmtilegu helgar og hefur hennar greinilega verið beðið með miklum spenningi á mörgum heimilum hér í bæ. 

Það er ekki síst á erfiðum tímum sem þessum sem nauðsynlegt er að lyfta sér upp öðru hverju, gleyma amstri hversdagsins og njóta þess að vera til.

Stjórn og starfsfólk Verkalýðsfélags Akraness vill því hvetja félagsmenn sína til njóta komandi daga með jákvæðu viðhorfi, skemmta sér og sínum og lifa lífinu af hjartans lyst.

Samkvæmt 29. gr. laga Verkalýðsfélags Akraness ber að viðhafa allsherjaratkvæðagreiðslu um kjör stjórnar.

Framboðslistum til stjórnarkjörs í Verkalýðsfélagi Akraness árið 2017, ásamt meðmælendum skv. reglugerð ASÍ um allsherjaratkvæðagreiðslur, ber að merkja kjörstjórn og skila á skrifstofu félagsins, Sunnubraut 13 fyrir kl. 12:00 þann 5. október nk. Hvert það framboð er gilt sem fram kemur innan þess tíma og hefur skriflegt samþykki þeirra sem framboðslistann skipa.

Stjórn og trúnaðarráð Verkalýðsfélags Akraness hefur lagt fram framboðslista til stjórnar. Listann er hægt að skoða með því að smella hér.

Berist kjörstjórn ekki aðrir listar telst framboðslisti stjórnar og trúnaðarráðs sjálfkjörinn til næstu tveggja ára.

Formaður var í viðtali í þættinum Ísland í bítið í gær en til umræðu var fjárlagafrumvarpið og hvaða áhrif það hefur á þá sem höllustum fæti standa í íslensku samfélagi.  Fram kom í máli formanns að það sé með öllu ólíðandi sú aukna skattbyrði sem fólk sem tekur laun eftir lágmarkslaunum hefur þurft að þola á undanförnum árum og áratugum.

Fram kom í máli formanns að skoða verði gaumgæfilega þann möguleika að taka upp þrepaskiptan persónuafslátt þannig að ráðstöfunartekjur þeirra tekjulægstu og millitekjufólks aukist.  Allavega er full ástæða til að skoða hvort eðlilegt sé að einstaklingar með lægstu og millitekjur séu með sama persónuafslátt og hátekjufólk.

Það er mat formanns Verkalýðsfélags Akraness að gera verði breytingar á skattkerfinu með það að markmiði að auka ráðstöfunartekjur milli- og lágtekjufólks. Þrepaskiptur persónuafsláttur getur svo sannarlega verið góð leið til þess enda má alveg láta persónuafsláttinn fjara út þegar launafólk hefur náð t.d. 2 milljóna króna launum á mánuði. Þann ávinning og sparnað má síðan nota til að hækka persónuafslátt hjá milli-og lágtekjufólki. Það er ólíðandi að launafólki sem er t.d. á lágmarkslaunum upp á 280.000 á mánuði sé gert að greiða yfir 46 þúsund á mánuði í skatt og það verður að vera forgangsverkefni hjá verkalýðshreyfingunni að berjast fyrir því að lágmarkslaun verði skattlaus.

Einnig nefndi formaður í þessu tiltekna viðtali að mikilvægt væri að breyta skattkerfinu þannig að ofurbónusar og kaupaukar verði skattlagðir með sérstökum hátekjuskatti.

Það er mat formanns að einn liður í komandi kjaraviðræðum á næsta ári sé að lagfæra persónuafsláttinn hjá milli-og lágtekjufólki enda morgunljóst að hækkun persónuafsláttar t.d. með því að taka upp þrepaskiptan persónuafslátt myndi klárlega liðka vel fyrir því að hægt væri að ná sátt á íslenskum vinnumarkaði hvað þessa hópa varðar.

Það verður fróðlegt að sjá og heyra hvort forsætisráðherra og fjármálaráðherra verði tilbúnir til að skoða t.d. þessar leiðir til að auka ráðstöfunartekjur milli-og lágtekjufólks á kostnað hátekjufólks, en eins og áður sagði getur þrepaskiptur persónuafsláttur verið einn liður í að koma á sátt á vinnumarkaði en fleira þarf klárlega að koma til af hálfu stjórnvalda eins og veruleg lækkun á húsnæðisvöxtum til almennings. 

Stjórn og trúnaðarráð Verkalýðsfélag Akraness mun fara yfir þessar hugmyndir um að gerð verði krafa um að taka upp þrepaskiptan persónuafslátt á næsta fundi sínum.

Nú stendur yfir mesta samdráttarskeið í íslensku efnahagslífi á síðari tímum. Framundan eru tvö erfið ár þar sem landsframleiðsla dregst mikið saman og lífskjör rýrna.

Þetta er meðal þess sem fram kemur í nýrri spá Hagdeildar ASÍ um horfur í efnahagsmálum til ársins 2012. Hagdeildin spáir ríflega 10% samdrætti í landsframleiðslu í ár og áframhaldandi samdrætti á fyrri hluta næsta árs, en að botninum verði náð á öðrum ársfjórðungi það ár og efnahagslífið byrji að rétta úr kútnum í framhaldinu.

Staða heimilanna er þröng, ráðstöfunartekjur lækka og atvinnuástand er afar slæmt. Útlit er fyrir að atvinnuleysi verði 9-10% næstu misserin þótt heldur dragi úr þegar líða tekur á spátímabilið. Háir vextir, veik króna, takmarkað aðgengi að lánsfé og minnkandi eftirspurn gerir rekstrarskilyrði fyrirtækja erfið. Þungar vaxtagreiðslur, vaxandi útgjöld vegna atvinnuleysis og samdráttur í tekjum valda verulegum hallarekstri hjá hinu opinbera á næstu árum.

Til þess að ná sem fyrst jöfnuði á ný í rekstri ríkis og sveitarfélaga er óumflýjanlegt að auka skatttekjur og draga umtalsvert úr útgjöldum hins opinbera. Verðbólga hjaðnar og verður komin í 4% í árslok og gengi krónunnar verður stöðugra en helst áfram hátt. Í spánni er gert ráð fyrir að Seðlabankinn haldi áfram að lækka stýrivexti þegar skýr merki sjást um að tekist hafi að endurvekja traust á íslenskt efnahagslíf og þá mun hann jafnframt létta á gjaldeyrishöftum í áföngum.

Það eru ekki til neinar töfralausnir á þeim vanda sem þjóðin stendur frammi fyrir en það skiptir miklu máli að takast strax á við erfiðleikana og vinna sig út úr þeim með markvissum hætti til þess að grafa ekki undan velferðarkerfinu og rýra lífskjör til framtíðar. Við megum ekki gleyma því að þótt á móti blási um stund, þá búum við yfir miklum mannauði og auðlindum sem standa óhögguð. Við eigum fiskinn í sjónum, orkuna í fallvötnunum og jarðvarmann og síðast en ekki síst vel menntaða, unga þjóð. Við höfum því alla burði til að vinna okkur út úr vandanum á skömmum tíma.

Takist okkur að auka trúverðugleika hagkerfisins eins og að er stefnt í nýgerðum stöðugleikasáttmála stjórnvald og aðila vinnumarkaðarins mun endurreisnin ganga hraðar en spáin gerir ráð fyrir. Áhrifin munu þá birtast í jákvæðari horfum á síðari hluta spátímans.

Hagspána má sjá í heild sinni hér.

Heimild ASÍ