Verkalýðsfélagi Akraness barst rétt í þessu bréf frá Hermanni Guðmundssyni, forstjóra N1, þar sem áskorun félagsins um að fyrirtækið standi við áður umsamdar launahækkanir vegna góðrar afkomu er svarað.

Í svarbréfi til félagsins segir m.a. þetta: "Það er rétt sem fram kemur í áskorunarbréfinu að afkoma N1 á fyrri hluta ársins var viðunandi. Það er hins vegar mikil óvissa um framhaldið. Á síðasta starfsári N1 varð tap af rekstrinum uppá 1.200 milljónir króna."

Einnig segir: "Skuldir fyrirtækisins hafa hækkað mikið á s.l. einu og hálfu ári eins og hjá öllum fyrirtækjum og heimilum landsins. Fyrirsjáanlegt er að á næstunni verður það hörð barátta að greiða þær niður þannig að þær komist aftur í fyrra horf."

Að endingu kemur fram í svarbréfinu: "Við munum bæta við laun okkar starfsfólks í samræmi við samkomulag sem gert var þ. 25. júní sl. á milli ASÍ og SA."

Formaður félagsins harmar þessa afstöðu forsvarsmanna N1, sérstaklega í ljósi þess að afkoma fyrirtækisins var eins og áður hefur komið fram góð á fyrstu 6 mánuðum þessa árs. Vissulega er það eflaust rétt hjá forstjóra fyrirtækisins að skuldastaða fyrirtækisins hefur hækkað mikið undanfarið. Rétt er að minna forstjóra N1 á að greiðslubyrði almenns verkafólks hefur stórhækkað á undanförnum misserum og á þeirri forsendu hefði verið mjög mikilvægt að verkafólk sem starfar á berstrípuðum lágmarkstöxtum hefðu fengið sínar hóflegu launahækkanir sem áttu að taka gildi 1. mars sl.

Hins vegar kemur það formanni Verkalýðsfélags Akraness ekki á óvart að fyrirtæki nýti sér þann afslátt sem Samtök atvinnulífsins og Alþýðusambands Íslands gengu frá og gerir það að verkum að almennt verkafólk hefur orðið af allt að 100.000 kr. launahækkun.

Það hefur komið fram hér á heimasíðunni að VLFA er alfarið tilbúið að aðstoða fyrirtæki sem klárlega eiga í vandræðum vegna þess ástands sem nú ríkir, en það er engin ástæða til að gefa fyrirtækjum sem skila hundruðum milljóna í hagnað tækifæri til að komast hjá því að standa við gerða samninga.

Það er því miður grátlegt fyrir almennt verkafólk að verða af upp undir 100.000 kr. vegna linkindar samninganefndar ASÍ við endurskoðun kjarasamninga að undanförnu. Það átti klárlega að tryggja að vel stæð fyrirtæki myndu standa við gerða samninga, fyrirtæki sem starfa í útflutningi og fyrirtæki sem hafa möglunarlaust varpað sínum vanda beint út í verðlagið eins og til að mynda olíufélögin.

Hægt er að lesa bréf N1 sem Verkalýðsfélagi Akraness barst í dag með því að smella hér.

Í gær bauð Verkalýðsfélag Akraness eldri félagsmönnum sínum ásamt mökum í dagsferð undir dyggri leiðsögn Björns Finsen. Þessi ferð er árlegur viðburður í starfsemi félagsins og var að þessu sinni farið á Snæfellsnesið. 

Það voru 100 félagsmenn sem ásamt þremur fulltrúum félagsins og leiðsögumanni lögðu af stað í tveimur rútum frá Akranesi í ágætis veðri. Ekið var sem leið lá til Borgarness en fyrsti viðkomustaður var kirkjan á Borg á Mýrum.

Þaðan var ekið til Stykkishólms og byrjað á því að skoða kirkjuna undir leiðsögn kirkjuvarðar en kirkjan er afar björt og falleg.

Næsti viðkomustaður var Hótel Stykkishólmur þar sem snæddur var hádegisverður. Boðið var upp á súpu og steiktan fisk og ríkti mikil ánægja með það sem á boðstólum var.

Frá Stykkishólmi var ekið um Skógarströnd sem leið lá til Eiríksstaða í Haukadal.  Þar var skoðað víkingasafnið að Eiríksstöðum í Haukadal sem var afar fróðlegt og gaman.

Umsjónarmaður staðarins segir fyrrverandi íbúa Eiríksstaða hafa verið einn af örfáum góðum útrásarvíkingum landsins.

Eiríksstaði byggði Eiríkur rauði og Þjóðhildur kona hans en á meðal sona þeirra var landkönnuðurinn Leifur heppni.

Eiríksstaðir voru vígðir árið 2000 í tilefni af því að þá voru þúsund ár liðin frá landafundum þeirra feðga. Af sama tilefni var þar opnað lifandi víkingasafn í svokölluðum Eiríksskála, sem byggður er að fyrirmynd fornra skálarústa á staðnum.

Að lokinni skoðun á víkingasafninu var ekið sem leið lá á Hótel Hamar þar sem boðið var upp á kaffi og meðlæti áður en haldið var heim á leið.

Þessi ferð þykir hafa heppnast ákaflega vel og kann félagið öllum þeim sem að ferðinni komu hinar bestu þakkir fyrir.

Vegna aukinna verkefna óskar Verkalýðsfélag Akraness eftir öflugum starfskrafti í 50% starf á skrifstofu félagsins. Vinnutími er frá kl. 12 til 16.

Í starfinu felst þjónusta við félagsmenn, símsvörun, iðgjaldaskráning og tilfallandi verkefni.

Leitað er að einstaklingi sem er jákvæður, lipur í mannlegum samskiptum, tekur frumkvæði og getur unnið sjálfstætt. Góð tölvu- og enskukunnátta er nauðsynleg. Viðkomandi þarf að geta hafið störf strax.

Um framtíðarstarf er að ræða á lifandi vinnustað.

Nánari upplýsingar veitir Vilhjálmur í símum 8651294 og 4309900.

Umsóknarfrestur er til kl. 16:00 fimmtudaginn 17. september. Umsóknum skal skilað á skrifstofu félagsins, Sunnubraut 13, 300 Akranes eða á netfangið This email address is being protected from spambots. You need JavaScript enabled to view it..

Enn eru miklar hækkanir á matvörum í verslunum, að því er fram kemur í nýrri mælingu verðlagseftirlits á vörukörfu ASÍ sem gerð var um sl. mánaðarmót. Við samanburð á mælingu verðlagseftirlitsins frá því í maí, hækkar vörukarfan um 2-5% hjá öllum verslunarkeðjum nema Nóatúni, þar sem karfan lækkar um 1%.

Hægt er að skoða niðurstöður í heild sinni með því að smella hér.

Það er sorglegt fyrir verkafólk sem og aðra launþega að horfa upp á verslunareigendur, ríki, sveitarfélög, tryggingafélög og olíufélög varpa sínum vanda viðstöðulaust út í verðlagið á sama tíma og launþegar horfa fram á gríðarlegt tekjutap, stóraukna greiðslubyrði og skattahækkanir samhliða skerðingu á opinberri þjónustu.

Ekki er hægt að komast hjá því að minnast á það að almennir launþegar voru þvingaðir til að fresta sínum áður umsömdu launahækkunum. Svo tala menn um stöðugleikasáttmála, sáttmála sem einungis hefur byggst á því að launafólk hefur orðið af sínum áður umsömdu launahækkunum.

Stjórn og trúnaðarráð Verkalýðsfélags Akraness samþykkti á fundi sínum rétt í þessu tillögu sem lögð verður fyrir ársfund Alþýðusambands Íslands sem haldinn verður dagana 22. og 23. október nk.  Tillagan hefur nú þegar verið send forseta ASÍ en samkvæmt 24. grein laga ASÍ er kveðið á um að mál þau og tillögur sem einstök aðildarsamtök óska að tekin verði fyrir á fundinum, skuli send miðstjórn einum mánuði fyrir ársfund. Skal miðstjórn leggja mál þau og tillögur fyrir fundinn, ásamt umsögn sinni.

Tillaga Verkalýðsfélags Akraness gengur út á það að miðstjórn Alþýðusambands Íslands verði falið að vinna að því að atvinnurekendur hverfi úr stjórnum lífeyrissjóða og að unnið verði að breytingum á reglugerðum sjóðanna með þeim hætti að sjóðsfélagar kjósi sér stjórnarmenn með beinni kosningu. Hægt að lesa tillöguna með því smella hér.

Það er mjög mikilvægt að í þessari tillögu er verið að stórauka lýðræðið þannig að allir sjóðsfélagar, bæði greiðendur og lífeyrisþegar, hafi möguleika á því að bjóða sig fram til stjórnarsetu í lífeyrissjóðum innan ASÍ.

Það eru komin 40 ár frá því að Alþýðusamband Íslands gerði fyrst samning sem kveður á um að atvinnurekendur skuli eiga helming stjórnarmanna á móti stéttarfélögunum. Fyrsti samningurinn var gerður 1969, sá samningur var síðar endurnýjaður 12. desember 1995 og í honum er einnig kveðið á um jafna skiptingu stjórnarmanna.

Í greinargerð með tillögu stjórnar og trúnaðarráðs VLFA segir m.a.:

Það er öllum ljóst að traust og trúverðugleiki lífeyrissjóðanna hefur beðið gríðarlega hnekki á undanförnum misserum. Þetta traust verður verkalýðshreyfingin að byggja upp aftur og einn liður í því að byggja upp traustið og trúverðugleikann á ný er að atvinnurekendur víki úr stjórnum lífeyrissjóðanna,

Það eru engin haldbær rök fyrir því að atvinnurekendur skuli sitja í stjórnum lífeyrissjóðanna. Það er t.a.m. afar óeðlilegt að atvinnurekendur séu að taka ákvörðun um fjárfestingarleiðir þegar liggur fyrir að krosseignatengsl og hagsmunaárekstrar fulltrúa atvinnurekenda í sjóðunum geta klárlega skarast á við hagsmuni sjóðsfélaga.

Það þarf einnig að stórauka lýðræði innan lífeyrissjóðanna, það þarf að tryggja að hinn almenni sjóðsfélagi hafi tækifæri til að bjóða sig fram til stjórnarsetu að uppfylltum hæfniskröfum skv. 31. grein laga um skyldutryggingu lífeyrisréttinda og starfsemi lífeyrissjóða frá árinu 1997.

Það þarf að tryggja að stjórnarmenn verði kosnir beinni kosningu af sjóðsfélögum. Stóraukið lýðræði sjóðsfélaga er gríðarlega mikilvægur þáttur í að byggja upp traust og trúverðugleika lífeyrissjóðanna að nýju.

Það þarf ekkert að fara í grafgötur með það að atvinnurekendur hafa klárlega reynt að nýta sér lífeyrissjóðina í gegnum árin og nægir að nefna tilraun Baugs og FL Group til að stofna sér lífeyrissjóð fyrir sína starfsmenn vegna þess að þeir voru óánægðir með fjárfestingarstefnu Lífeyrissjóðs verslunarmanna. Í frétt á ruv.is frá árinu 2006 segir m.a. um það mál: “Þá ríkir mikil óánægja meðal stjórnenda Baugs og FL Group með fjárfestingastefnu Lífeyrissjóðs verslunarmanna, sem þeir telja beitt gegn sér og sínum félögum.” Sjá fréttina í heild sinni hér:

Í frétt á mbl.is um það mál frá árinu 2004 er haft eftir Jóni Ásgeiri Jóhannessyni, forstjóra Baugs að hann telji “nauðsynlegt að ferskir vindar blási reglulega í stjórnum slíkra sjóða og þannig verði komið í veg fyrir að einstakir stjórnarmenn líti á sjóði sem þeirra eigin”.

Sjá þá frétt í heild sinni hér:

Á þessum fréttum sést að til eru atvinnurekendur sem klárlega gera allt til þess að verja sína hagsmuni með öllum tiltækum ráðum og er gríðarleg hætta á því að hagsmunir eigenda lífeyrissjóðanna, sem eru sjóðsfélagarnir, geti skaðast sökum þess. Það verður fróðlegt að sjá hvort þessi tillaga stjórnar og trúnaðarráðs Verkalýðsfélags Akraness fái ekki örugglega fullan stuðning á ársfundi Alþýðusambands Íslands. 

Þessi tillaga stjórnar og trúnaðarráðs Verkalýðsfélags Akraness hefur fengið gríðarlega umfjöllun enda er hér um afar viðkvæmt mál að ræða bæði fyrir atvinnurekendur og þá sem farið hafa með völdin í lífeyrissjóðum landsmanna til þessa.

Fjallað var um tillöguna á mbl.is sjá hér.  Einnig var fjallað tillöguna á ruv.is hlusta hér og einnig viðtal við formann félagsins í Reykjavík síðdegis hlusta hér.

Að lokum var rætt við fulltrúa frá Samtökum atvinnulífsins um tillöguna á ruv í dag. Hlusta hér.

Það var afar athyglisverð frétt sem birtist á Stöð 2 og Vísi.is nú um helgina og varðaði lán bankanna til eignarhaldsfélaga. Hægt er að lesa fréttina hér.. Í fréttinni kom fram að bankarnir hafa lánað eignarhaldsfélögum 1.703 milljarða króna og þar kom einnig fram að allt sé á huldu hvað varðar veð og tryggingar á þessum lánum.

Til að almenningur átti sig á því um hverslags gríðarlegar upphæðir eru hér að ræða þá er hrein eign lífeyrissjóðanna í dag í kringum 1.762 milljarðar. Það lýsir því hvers lags firring hefur átt sér stað í útlánastarfsemi bankanna til eignarhaldsfélaganna þegar lánveitingar séu orðnar jafnháar og eignir lífeyrissjóðanna, en eignir lífeyrissjóðanna hafa verið byggðar upp af öllu launafólki á síðustu 40 árum.

Hvernig má slík skuldsetning hafa átt sér stað? Hvaða útlánareglum fóru bankanir eiginlega eftir?

Það kom einnig fram í fréttinni að búið er að afskrifa um 85 milljarða og eru eftirtaldir aðilar nefndir í því samhengi:

• Eignarhaldsfélagið Milestone 
• Eignarhaldsfélag í eigu Bjarna Ármannssonar
• Eignarhaldsfélagið Langflug sem Finnur Ingólfsson fyrrverandi ráðherra Framsóknarflokksins átti meirihluta í
• Eignarhaldsfélagið Fons

Þessir 85 milljarðar sem þegar hafa verið afskrifaðir myndu duga til að greiða atvinnuleysisbætur í þrjú ár en áætlað er að greiddar verði út atvinnuleysisbætur fyrir 29 milljarða á næsta ári.

Það ætlar allt um koll að keyra hjá hinum ýmsu aðilum í þjóðfélaginu þegar hugmyndir um almennar leiðréttingar á skuldum heimilanna eru ræddar.  Nei, almennar leiðréttingar á skuldum heimilanna eru alls ekki framkvæmanlegar að mati ráðamanna þjóðarinnar og fleiri áhrifamanna í íslensku þjóðfélagi.

Öðru máli virðist gegna um afskriftir hjá eignarhaldsfélögum til að mynda félögum tengdum Bjarna Ármannssyni upp á 800 milljónir og skuldir hjá eignarhaldsfélaginu Langflugi sem Finnur Ingólfsson fyrrverandi ráðherra Framsóknarflokksins átti meirihluta í upp á 14 milljarða.  Ætlar einhver að halda því fram að Bjarni Ármannssson hafi ekki fjárhagslega burði til að standa skil á þessari skuld.  Nei, hann ætlar ásamt fleirum sér líkum að skýla sér á bakvið eignarhaldsfélögin sín og segir að það væri óábyrg meðferð fjármuna að greiða skuldina.  Ef hins vegar almennt launafólk stendur ekki við sínar skuldbindingar þá er það hundelt og getur sér hvergi um frjálst höfuð strokið í áraraðir.

Hvernig má það eiga sér stað að bankarnir hafi lánað 1.703 milljarða til eignarhaldsfélaga? Hvaða lánareglur giltu hjá bönkunum? Hvar voru eftirlitsaðilar, t.a.m. fjármálaeftirlitið? Getur verið að farið hafi verið eftir öllum lánareglum sem í gildi voru hjá bönkunum?

Það er eins og áður hefur komið fram með hreinustu ólíkindum að lánveiting til eignarhaldsfélaga hafi verið orðin jafnmikil og hrein eign lífeyrissjóðanna. Það er mat formanns Verkalýðsfélags Akraness að þetta mál verði að rannsaka og fá botn í.

Eins og fram hefur komið hér á heimasíðunni þá var auglýst eftir nýjum starfskrafti í 50% starf vegna aukinna verkefna og það er skemmst frá því að segja að hvorki fleiri né færri en 25 umsóknir bárust. Það var gríðarlega erfitt að velja úr þeim góða hópi sem sótti um, en niðurstaða stjórnar félagsins var að ráða Dagbjörtu Guðmundsdóttur í starfið. Stjórn félagsins vill þakka öllum umsækjendum fyrir þann áhuga sem þeir sýndu starfinu með umsókn sinni.

Sl. mánudag hóf Dagbjört störf á skrifstofu Verkalýðsfélags Akraness og vill stjórn félagsins bjóða Dagbjörtu hjartanlega velkomna til starfa hjá félaginu og hlakkar til ánægjulegs samstarfs með henni í framtíðinni.

Rætt var við formann félagsins í fréttum Stöðvar 2 í gær vegna þeirrar firringar sem hefur átt sér stað í útlánum bankanna til eignarhaldsfélaga, en bankarnir hafa lánað eignarhaldsfélögum 1.703 milljarða, sem er litlu minna en hrein eign lífeyrissjóðanna í landinu, sem er 1.762 milljarðar.

Verkalýðsfélag Akraness krefst þess að fá upplýsingar um hvaða veð og tryggingar liggi að baki þessum útlánum, einfaldlega á þeirri forsendu að töluverðar líkur eru á því að þetta muni allt lenda á almenningi. Það liggur fyrir að þegar almennt launafólk getur ekki staðið við sínar skuldbindingar, þá er húsnæði þeirra gert upptækt og það er hundelt í áraraðir ef ekki áratugi. En snillingarnir sem standa á bak við eignarhaldsfélögin þeir virðast geta gengið hnarreistir frá sínum skuldum.

Í fréttum DV.is í dag kemur fram að fjármálaeftirlitið hefur nú til rannsóknar mál þar sem talið er að kerfisbundið hafi verið reynt að halda verði hlutabréfa uppi fyrir bankahrunið með því að senda röng og misvísandi skilaboð til markaðarins. Í fréttinni segir m.a.:

"Dæmi er um lánveitingar hjá Kaupþingi til eignarhaldsfélaga þar sem lánið var nýtt til að kaupa hlutabréf í Kaupþingi og einu veðin voru bréfin sjálf. Dæmi um það eru kaup Holt Investments Ltd. eignarhaldsfélags Skúla Þorvaldssonar þar sem eini tilgangurinn hafi verið hlutabréfakaup í Kaupþingi. DV.is greindi frá því þann fyrsta ágúst síðastliðinn að Skúli hafi verið stærsti lántakandi Kaupþings í Lúxemborg en samkvæmt gögnum sem lekið var á vefsíðuna Wikileaks í sumar námu heildarlán til félaga hans um 750 milljónum evra, eða rúmlega 220 milljörðum króna."

Það er mjög mikilvægt að það verði upplýst hversu góð og haldbær veð og tryggingar liggi að baki þessum 1.703 milljörðum, sérstaklega þegar liggur fyrir að dæmi séu um að eignarhaldsfélögum hafi verið lánaðir tugir ef ekki hundraðir milljarðar til hlutabréfakaupa, með einungis veði í bréfunum sjálfum.

Það er sorglegt fyrir almennt launafólk að hlusta nú á ráðamenn þjóðarinnar halda því fram að ekki sé svigrúm til almennra leiðréttinga á skuldum heimilanna, í ljósi þess gríðarlega forsendubrests sem orðið hefur. Það virðist ætíð vera þannig að grálúsugur almúginn þarf að standa skil á sínu, en hvítflibbarnir virðast geta gengið frá sínum skuldum og skýlt sér á bak við handónýt lög um eignarhaldsfélög. Það er algerlega ljóst að þessu þarf að breyta og það tafarlaust.

Hægt er að lesa fréttina á DV.is í heild sinni hér.

Hvalveiðbátarnir tveir sem veitt hafa langreyðar frá því í júní komu í gær með síðustu dýrin að landi í hvalstöðinni í Hvalfirði. Alls veiddust 125 langreyðar af 150 dýra kvóta sem Hvalur hf. fékk úthlutað í ár. Færast því 25 dýr yfir á næsta veiðisumar en heimilt er að færa allt að 20% á milli ára líkt og í kvótasettum fiski. Kristján Loftsson forstjóri Hvals segir í samtali við Skessuhorn að veiðarnar og vinnslan hafi gengið vel í sumar. “Við fórum aðeins seinna í gang en við ætluðum í vor en ljúkum þessu núna þar sem miðað við veðurspá megi búast við brælu. Það verður að hafa sæmilegt veður við þessar veiðar og gott skyggni. Reyndar er þetta mjög svipaður tími sem við hættum og var hér áður fyrr áður en hvalveiðistoppið tók gildi,” segir Kristján.

Kristján segir að nú taki við þrif og frágangur í hvalstöðinni. Þá verði vinnuflokkur ásamt iðnaðarmönnum að störfum fram undir áramót við að lagfæra og endurnýja það sem þarf í stöðinni. Aðspurður segir hann að um 160 hafi unnið við veiðarnar og vinnsluna í sumar. Þar af voru um 30 á bátunum tveimur, upp undir hundrað í hvalstöðinni, um 30 í vinnslunni á Akranesi og um tugur í Hafnarfirði. Þannig má segja að mikið hafi munað um að hafa hvalvinnsluna í sumar þegar atvinnuleysi var meira en um áraraðir.

150 milljón munnar

Aðspurður um horfur á sölu kjötsins segir Kristján þær vera góðar. “Við erum að fara yfir sölumálin, skoða efnagreiningar á kjötinu og erum að skoða með frystiskip til að flytja það til Japan. Megnið af þessu kjöti fer í útflutning en hluti þess er seldur hér heima. Japanir hafa sýnt þessu kjöti mikinn áhuga og hafa vinnslu- og söluaðilar þaðan komið í sumar til að kynna sér aðstæður.” Kristján segir að í Japan sé kjötið ýmist sneitt niður til sölu í verslunum eða selt í áframvinnslu, svo sem niðursuðu. “Við höfum engar áhyggjur af að kjötið seljist ekki. Þarna eru 150 milljónir munnar að metta. Japönum líkar vel við hvalkjötið og líta á það sem úrvalsvöru enda um hreint og ómengað sjávarfang að ræða, án lyfja eða hormóna,” sagði Kristján Loftsson.

Það er alveg ljóst að þessar hvalveiðar hafa haft gríðarlega jákvæð áhrif á atvinnulífið hér á Akranesi, enda liggur fyrir að útsvarstekjur Akraneskaupstaðar verða umtalsverðar vegna þessara veiða.  Stjórn Verkalýðsfélags Akraness fagnar því innilega að veiðar á hval hafi verið heimilaðar að nýju, enda er það skýlaus réttur okkar að nýta þær auðlindir sem við búum yfir bæði til sjávar og sveita.  Það er einnig ljóst að þessar veiðar skipta þjóðarbúið miklu máli í ljósi þess að veiðarnar skapa þjóðinni töluverðar gjaldeyristekjur og veitir ekki af um þessar mundir.

Þann 14. október nk. verða liðin 85 ár frá því að Verkalýðsfélag Akraness var stofnað á framhaldsaðalfundi í Báruhúsinu á Akranesi. Þá skráðu 108 félagsmenn sig í félagið. Í dag eru félagsmennirnir tæplega 3.000 og hafa þeir aldrei verið fleiri.

Stjórn Verkalýðsfélags Akraness telur það skyldu sína að varðveita þá miklu sögu sem félagið geymir og hefur því ákveðið að minnast þessara tímamóta með útgáfu afmælisblaðs. Ritstjóri blaðsins er Haraldur Bjarnason og hefur hann að undanförnu verið önnum kafinn við að safna efni, viðtölum og myndum í blaðið sem dreift verður í hús á afmælisdaginn.