Ársfundur Starfsgreinasambands Íslands mun hefjast á morgun á Hótel Selfossi. Það er alveg ljóst að fjölmörg mál verða til umræðu á ársfundinum en að sjálfsögðu munu mál er lúta að stöðu kjaramála, skuldsetningu heimilanna og aukinni skattbyrði á almenning verða til umræðu á þinginu.

Það er alveg ljóst að almennt verkafólk sem gekk frá hófstilltum kjarasamningi þann 17. febrúar 2008 getur ekki tekið á sig meiri byrðar en orðið er. Nú þegar hefur almennt verkafólk verið þvingað til að fresta og afsala sér þeim hófstilltu launahækkunum sem áttu að taka gildi 1. mars sl. Það er alveg klárt að þessi mál munu verða til umræðu á þinginu en afstaða Verkalýðsfélags Akraness til frestunarinnar á sínum tíma var skýr, að þeir atvinnurekendur sem hefðu til þess fjárhagslega burði ættu að standa við gerða samninga, en félagið var að sjálfsögðu tilbúið að sína þeim fyrirtækjum sem áttu í rekstrarerfiðleikum svigrúm til að vinna úr sínum málum.

Það verður væntanlega líka til umræðu sú ákvörðun að ekki skyldi hafa verið farið með það samkomulag sem gert var um frestun áður umsaminna launahækkana í allsherjaratkvæðagreiðslu á meðal þeirra félagsmanna sem unnu eftir viðkomandi kjarasamningi. En það var mat félagsins á sínum tíma að slíkt stæðist enga skoðun.

Staðan er einfaldlega þannig í dag að almennum launþegum er vítt og breitt að blæða út sökum þess ástands sem nú ríkir í íslensku efnahags- og atvinnulífi og nú stendur til að skattpína almenna launþega um 63 milljarða á næsta ári ef marka má fyrirliggjanda fjárlagafrumvarp fyrir árið 2010.

Fulltrúar Verkalýðsfélags Akraness á ársfund SGS eru eftirfarandi:

Vilhjálmur Birgisson

Skúlína Guðmundsdóttir

Guðrún Linda Helgadóttir

Tómas Rúnar Andrésson

Jón Jónsson

Jóna Adolfsdóttir

Eins og fram hefur komið hér á heimasíðu félagsins þá verður fundur um nýjan skatt sem til stendur að leggja á stóriðjufyrirtækin hér á landi sem heitir Orku- umhverfis- og auðlindaskattur. Þessi skattur á að skila ríkissjóði samkvæmt nýju fjárlagafrumvarpi um 16 milljarða króna. Það hefur einnig komið fram hér á síðunni að slík skattlagning myndi þýða 6 milljarðar fyrir Norðurál, 2 milljarðar fyrir Elkem Ísland og yfir 200 milljónir fyrir Sementsverksmiðjuna.

Með þessum skatti væri verið að leggja rekstrargrundvöll þessara fyrirtækja í umtalsverða hættu, en ekki síður er verið að stefna atvinnuöryggi þúsunda starfsmanna í stóriðjum á okkar svæði í stórhættu ef þessi skattur verður að veruleika. Á þeirri forsendu hefur Verkalýðsfélag Akraness í samráði við bæjaryfirvöld á Akranesi ákveðið að boða alla þingmenn Norðvestur-kjördæmisins ásamt iðnaðarráðherra og forstjórum áðurnefndra stóriðjufyrirtækja á fund sem haldinn verður í Tónbergi, föstudaginn 9. október kl. 16:00.

Hér er einfaldlega um grafalvarlegt mál að ræða, því það er alveg ljóst að sú farsæla uppbygging sem orðið hefur á Grundartanga á undanförnum árum og áratugum hefði ekki orðið ef skattheimta sem nú er fyrirhuguð hefði orðið að veruleika hér á árum áður.

Elkem Ísland hefur t.a.m. aldrei nokkurn tímann skilað 2 milljörðum í hagnað frá því þeir hófu starfsemi, en þetta frumvarp gerir hins vegar ráð fyrir því að þeir greiði 2 milljarða í aukaskatt á næsta ári. Hins vegar hefur fyrirtækið ráðist í framkvæmdir fyrir 8 milljarða á síðustu misserum, en fyrirtækið hefur nýverið hafið framleiðslu á nýrri afurð sem nefnist FSM og þessa dagana er verið að ráðast í gríðarlegar endurbætur á ofni 3 sem kostar fyrirtækið um 800 milljónir.

Það er ljóst að ef þessi fyrirhugaði skattur hefði legið fyrir þegar Elkem lokaði verksmiðju sinni í Noregi og færði starfsemina hingað til lands, þá hefði uppbygging og stækkun Elkem á Grundartanga aldrei orðið að veruleika.

Er þetta sú atvinnumálastefna sem núverandi ríkisstjórn ætlar að standa fyrir? Að drepa niður traustustu fyrirtæki okkar svæðis með stóraukinni skattheimtu sem ekkert fyrirtæki getur staðið undir.

Krafan er skýr, burtu með þennan skatt. Það er hægt að ná auknum tekjum til ríkisins með því að hækka laun starfsmanna og það mun verða hlutverk Verkalýðsfélags Akraness. Hærri laun skila ríki og sveitarfélögum yfir 37% í formi skattgreiðslna starfsmanna.

Rætt var við formann félagsins í Ísland í bítið í gærmorgun, meðal annars um þetta mál. Hægt er að hlusta á viðtalið hér.

Samkvæmt 29. gr. laga Verkalýðsfélags Akraness ber að viðhafa allsherjaratkvæðagreiðslu um kjör stjórnar.

Framboðslistum til stjórnarkjörs í Verkalýðsfélagi Akraness árið 2009, ásamt meðmælendum skv. reglugerð ASÍ um allsherjaratkvæðagreiðslur, ber að merkja kjörstjórn og skila á skrifstofu félagsins, Sunnubraut 13 fyrir kl. 12:00 þann 23. október nk.

Hvert það framboð er gilt sem fram kemur innan þess tíma og hefur skriflegt samþykki þeirra sem framboðslistann skipa.

Stjórn og trúnaðarráð Verkalýðsfélags Akraness hefur lagt fram framboðslista til stjórnar. Berist kjörstjórn ekki aðrir listar telst framboðslisti stjórnar og trúnaðarráðs sjálfkjörinn til næstu tveggja ára.

Framboðslisti stjórnar og trúnaðarráðs er nú til kynningar hér á heimasíðu félagsins, hægt er að skoða listann með því að smella á meira.

Framboðslisti stjórnar og trúnaðarráðs

Aðalstjórn    

Formenn deilda

Varaformenn deilda

Hitafundur á Akranesi um Orku-, umhverfis- og auðlindaskatt.Verkalýðsfélag Akraness og bæjaryfirvöld stóðu fyrir fundi á föstudaginn var þar sem fjallað var um fyrirhugaðan nýjan skatt sem nefnist Orku-, umhverfis- og auðlindaskattur. Í fjárlagafrumvarpinu er gert ráð fyrir að þessi nýi skattur eigi að geta skilað ríkissjóði 16 milljörðum króna.

Til fundarins voru boðaðir allir þingmenn Norðvesturkjördæmis ásamt iðnaðarráðherra, einnig var forstjórum stóriðjufyrirtækjanna Norðuráls, Elkem Ísland og Sementsverksmiðjunnar boðið á fundinn. Því miður sáu einungis þrír þingmenn sér fært að mæta en það voru þeir Guðbjartur Hannesson, formaður fjárlaganefndar, Einar Kr. Guðfinnsson og Ásbjörn Óttarsson.

Fram kom í máli Ragnars Guðmundssonar, forstjóra Norðuráls, að honum fyndist óskiljanlegt að mæting þingmanna væri ekki betri í ljósi þess alvarleika sem þetta mál væri. Það kom einnig fram í máli hans að verið væri að stefna rekstraröryggi verksmiðjunnar í hættu ef þessi áform yrðu að veruleika. Einar Þorsteinsson, forstjóri Elkem Íslands, sagði að sú mikla uppbygging sem verið hefur hjá fyrirtækinu á undanförnum misserum hefði ekki orðið að veruleika ef tillögur sem nú er getið um í fjárlagafrumvarpinu hefðu verið fram komnar þegar ákvörðun var tekin um stækkun verksmiðjunnar.

Formaður Verkalýðsfélags Akraness tók til máls á fundinum og bað stjórnvöld vinsamlegast um að endurskoða þennan nýja skatt sem á að setja á stóriðjufyrirtækin einfaldlega í ljósi þess að verið er að setja störf starfsmanna í stóriðjum í umtalsverða hættu með slíkri skattlagningu. Formaðurinn sagði einnig að hægt væri að ná meira út úr stóriðjunum til ríkisins með því að hækka laun starfsmanna en slíkt skilar sér að sjálfsögðu í auknum skatttekjum til ríkis og sveitarfélaga.

Það kom einnig fram á fundinum að áform stjórnvalda eru fordæmalaus í sögu landsins og ganga auk þess þvert á gerða alþjóðasamninga. Fyrirtækin eru með langtíma orkusamninga og Norðurál er til að mynda nýbúið að undirrita fjárfestingarsamning sem fyrirtækin vinna sínar áætlanir útfrá. Með þessum hugmyndum er verið að skapa stórhættu með að nokkur erlendur fjárfestingaraðili hafi áhuga á að fjárfesta hér á landi.

Í dag eru liðin 85 ár frá stofnun Verkalýðsfélags Akraness. Í tilefni afmælisins hefur veglegu afmælisblaði verið dreift í öll hús á Akranesi. Stjórn og starfsmenn óska félagsmönnum öllum innilega til hamingju með daginn.

Hér á eftir fer frásögn af stofnun félagsins:

Það var fimmtudaginn 9. okt. 1924, að allmargir sjómenn og verkamenn og ein kona, komu saman til fundar í Báruhúsinu á Akranesi, í þeim tilgangi að vinna að undirbúningi að stofnun verkalýðsfélags á Akranesi.

 Það fólk sem hér var samankomið, var hert í miskunnarlausri baráttu fyrir lífshagsmunum sínum og heimila sinna.  Þetta voru menn, sem sóttu sjóinn á litlum vélbátum og sumir á opnum árabátum, af miklu kappi, - verkamenn sem báru daginn út og daginn inn, og kona sú, sem getið er í fundargerðinni, vann við fiskþvott, en slíkt starf var að mestu unnið í óupphituðu húsnæði, og stundum undir beru lofti, og kom fyrir að brjóta þurfti ís af þvottakörunum áður en fiskþvottur gæti hafist.

 Fundarstjóri á þessum fundi var kjörinn Sveinbjörn Oddsson, og fundarritari Sæmundur Friðriksson.  Frummælandi á þessum undirbúningsfundi var Oddur Sveinsson á Akri.        

 Hann flutti snjallt erindi um alþýðuhreyfinguna í Evrópu, og lýsti starfi hennar og stefnu, og hversu miklu hún gæti komið til leiðar með starfsemi sinni.  Hvatti Oddur eindregið til stofnunar verkalýðsfélags hér á Akranesi. 

 Þá ræddi Sæmundur Friðriksson, um stofnun verkalýðsfélags, og lýsti því hversu mikla þýðingu slíkur félagsskapur gæti haft fyrir verkalýðinn á sjó og landi, bæði í kaupgjalds- og atvinnumálum.    

 Sveinbjörn Oddsson kvað ekki hægt á einu kvöldi, að sýna fram á hvernig best væri ráðin bót á öllu því sem umbóta þurfti með, og lýsti á hvern hátt hann hyggði, að verkalýðsfélag gæti náð árangri ef stofnað yrði.  

 Auk þess töluðu þeir Þorsteinn Benediktsson og Sigurður Jörundsson, og mæltu þeir báðir með stofnun verkalýðsfélags.  Þess ber að geta, að bræðurnir frá Teig, Ásgrímur, Sigurjón og Stefán, stuðluðu mjög að stofnun félagsins.      

 Á fundi þessum var kosin 5 manna nefnd, til þess að vinna að frekari undirbúningi.  Kosningu hlutu eftirtaldir menn:  Sveinbjörn Oddsson, Sæmundur Friðriksson, Jörgen Hansson, Indriði Jónsson og Oddur Sveinsson.      

 Þá var kosin 9 manna nefnd til þess að gera tillögur um stjórn fyrir væntanlegt félag og hlutu kosningu eftirtaldir:  Indriði Jónsson, Sigurjón Sigurðsson, Sigurður Björnsson, Eiríkur Guðmundsson, Jónas Guðmundsson, Ólafur Kristjánsson, Gísli Einarsson, Halldór Sigurðsson og frú Sveinsína Sveinsdóttir.  Síðan var fundi frestað og framhaldsfundur boðaður hinn 14. okt. 1924.      

Framhaldsfundur var haldinn boðaðan fundardag, og þá lagt fram frumvarp að lögum fyrir félagið og það samþykkt samhljóða á fundinum.  Stofndagur Verkalýðsfélags Akraness er því 14. október 1924.  Stofnendur munu hafa verið alls 108 að tölu.

1. grein laganna hljóðaði svo:

Félagið heitir:  Verkalýðsfélag Akraness. Starfssvið: Ytri Akraneshreppur.

2. grein:

Tilgangur félagsins er að efla og styðja hag og menningu alþýðunnar á því svæði, sem félagið nær yfir, með því að vinna að sjálfsbjargarviðleitni almennings, ákveða vinnutíma og kaupgjald, og með sjálfstæðri þátttöku alþýðunnar í stjórnmálum lands og sveitarfélags, allt í samræmi við önnur verkalýðsfélög og Alþýðusambandið. 

 Fyrsta stjórn félagsins var skipuð eftirtöldum mönnum:  Formaður:  Sæmundur Friðriksson; ritari:  Oddur Sveinsson og féhirðir Eiríkur Guðmundsson, Tungu.  Meðstjórnendur:  Jörgen Hansson og Ágúst Ásbjörnsson; varaformaður:  Sveinbjörn Oddsson; vararitari:  Gísli Gíslason og varaféhirðir:  Jónas Guðmundsson.

Formenn Verkalýðsfélags Akraness frá stofnun þess á árinu 1924.

1924-1925         Sæmundur Friðriksson

1925-1937         Sveinbjörn Oddsson

1937-1961         Hálfdán Sveinsson

1961-1966         Guðmundur Kristinn Ólafsson

1966-1981         Skúli Þórðarson

1981-1986         Agnar Jónsson

1986-1989         Guðmundur M. Jónsson

1989-2003         Hervar Gunnarsson

2003-                Vilhjálmur Elías Birgisson

Baráttan um að fá nýja sólarkísilflöguverksmiðju á Grundartanga sem Elkem Ísland er að berjast fyrir mun tapast endanlega ef nýr Orku-, umhverfis- og auðlindaskattur verður að veruleika. Þetta kom meðal annars fram í máli forstjóra Elkem Íslands, Einars Þorsteinssonar, á fundi með þingmönnum Norðvestur kjördæmis á föstudaginn var.

Elkem Ísland er í baráttu um að fá þessa verksmiðju hingað til lands við Kanada og eitt Asíuríki. Þessi nýja verksmiðja myndi skila 350 nýjum störfum, þar á meðal yrði töluvert af hátæknistörfum verksmiðjunni tengdri. Það kom einnig fram í máli Einars að ef þessi skattur verður að veruleika er verið að setja núverandi störf starfsmanna Elkem Ísland í umtalsverða hættu. Þessi nýi skattur mun þýða um tveggja milljarða aukaskatt á fyrirtækið en eins og fram hefur komið á heimasíðunni hefur fyrirtækið aldrei skilað slíkum hagnaði frá stofnun þess.

Það kom að lokum fram í máli Einars að fyrirtækið hefur fjárfest hér á landi á undanförnum misserum fyrir um 8 milljarða króna og nýverið var tekin ákvörðun um að ráðast í gagngerar endurbætur á ofni 3 sem er stærsti ofninn. Hann tjáði einnig á fundinum að ef þessi fyrirhugaði skattur hefði verið til staðar þegar ákvörðun um viðhald á ofni 3 var tekin hefðu eigendur fyrirtækisins að öllum líkindum tekið ákvörðun um að slökkva á ofninum sem hefði þýtt að rúmlega 30 manns hefðu hugsanlega misst atvinnu sína.

Þessi vanhugsaði skattur er formanni Verkalýðsfélags Akraness óskiljanlegur í ljósi þess að verið er að setja rekstrargrundvöll stóriðjufyrirtækja í stórhættu og þar af leiðandi störf starfsmannanna líka. Það er mat formanns að hér sé Ríkisstjórn Íslands að kasta meiri hagsmunum fyrir minni.

Formaður félagsins var gestur í þættinum Hrafnaþingi á sjónvarpsstöðinni Inn hjá Ingva Hrafni Jónssyni í gær.

Formaðurinn kom víða við í viðtalinu m.a endurskoðun kjarasamninga frá því vor, fyrirhugaðan Orku- umhverfs og auðlindaskatt sem mun stofna störfum í stóriðju í hættu ef af honum verður.  Einnig kom formaðurinn inn á lífeyrissjóðina og hugmyndina að stórauknu lýðræði við stjórnarval sjóðanna.  Hægt að sjá þáttinn því að smella hér.

Skrifstofu Verkalýðsfélags Akraness barst rétt í þessu stuðningsyfirlýsing vegna tillögu VLFA um stóraukið lýðræði við val á stjórnarmönnum lífeyrissjóðanna. Yfirlýsingin er frá hluta af stjórnarmönnum VR, sem er eitt stærsta félagið innan Alþýðusambands Íslands.

Það er afar ánægjulegt að fá þessa stuðningsyfirlýsingu nú þegar einungis þrír dagar eru þar til ársfundur Alþýðusambands Íslands hefst. Þar mun tillaga VLFA einmitt verða tekin til umfjöllunar og afgreiðslu.

Miðstjórn Alþýðusambands Íslands hefur tekið tillögu VLFA til umsagnar og samþykkir því miður einungis fyrri hluta tillögunnar og leggur til að staðið verði fyrir almennri umræðu aðildarfélaga ASÍ með það að markmiði að leggja drög að endurskoðaðri stefnu ASÍ í lífeyrismálum.

Seinni hluta tillögu VLFA, sem skiptir hvað mestu máli og lýtur að breytingu á reglugerðum sjóðanna þannig að sjóðsfélagar kjósi stjórnarmenn beinni kosningu, er miðstjórn ASÍ ekki tilbúin til að samþykkja. Þessi afstaða miðstjórnar er stjórn VLFA óskiljanleg. Í umsögn miðstjórnar ASÍ er lagt til að seinni hluti tillögu VLFA verði ekki tekinn fyrir sérstaklega á ársfundinum en tillagan verði hins vegar til umfjöllunar í almennri umræðu meðal aðildarfélaga ASÍ um lífeyrismál. Miðstjórn telur hins vegar ekki ástæðu til að gefa sér fyrirfram neina niðurstöðu í þeirri vinnu er lýtur að breytingum á stjórnarskipun lífeyrissjóðanna.

Hægt er að lesa tillögu stjórnar og trúnaðarráðs VLFA hér.

Hægt er að lesa umsögn ASÍ hér.

Hægt er að lesa stuðningsyfirlýsingu fulltrúa VR hér.

Ársfundur Alþýðusambands Íslands hefst í dag. Fulltrúar Verkalýðsfélags Akraness á ársfundinn eru Þórarinn Helgason, Jóna Adolfsdóttir, Sigurður Guðjónsson, Bryndís Guðjónsdóttir, Jón Jónsson og Vilhjálmur Birgisson.

Yfirskrift fundarins er: byggjum réttlátt þjóðfélag þar sem áherslan verður á hag heimilanna, efnahags- og kjaramál og atvinnumál og samfélagslega ábyrgð. Auk þess er viðbúið að til umræðu á ársfundinum verði stöðugleikasáttmálinn, endurskoðun kjarasamninga og tillaga stjórnar og trúnaðarráðs Verkalýðsfélags Akraness um breytingar á samningi um lífeyrismál.

Tillaga Verkalýðsfélags Akraness gengur út á það að miðstjórn Alþýðusambands Íslands verði falið að vinna að því að atvinnurekendur hverfi úr stjórnum lífeyrissjóða og að unnið verði að breytingum á reglugerðum sjóðanna með þeim hætti að sjóðsfélagar kjósi sér stjórnarmenn með beinni kosningu. 

Hægt að lesa tillöguna með því smella hér.

Nánari upplýsingar um ársfundinn má finna hér.

Ársfundi Alþýðusambands Íslands lauk á föstudaginn og það er alveg óhætt að segja að hart hafi verið tekist á um hin ýmsu mál á fundinum. Formaður félagsins hélt ræðu á fimmtudeginum þar sem hann gagnrýndi forystu ASÍ harðlega. Byggðist sú gagnrýni fyrst og fremst á endurskoðun kjarasamninga, stöðugleikasáttmálanum og þeirri skoðun formannsins að verkalýðshreyfingin hafi fjarlægst grasrótina ískyggilega á undanförnum misserum.

Formaður gagnrýndi það í sinni ræðu að verið væri að gefa fyrirtækjum sem hefðu fjárhagslega burði til að standa við gerða samninga afslátt á þeim launahækkunum sem áttu að taka gildi 1. mars sl. Nefndi hann í sinni ræðu sérstaklega útflutningsfyrirtækin, en það liggur fyrir að fyrirtæki í útflutningi hafa aldrei haft jafngóð rekstrarskilyrði og nú. Hann nefndi líka þá staðreynd að olíufyrirtækið N1 hafi skilað hálfum milljarði í hagnað en fyrirtækið hafi skýlt sér á bak við þá staðreynd að ASÍ væri búið að ganga frá samkomulagið við Samtök atvinnulífsins um frestun launahækkana.

Formaður sagði einnig að það eina sem væri búið að rætast hvað varðaði stöðugleikasáttmálann væri sú blákalda staðreynd að launafólk hafi verið þvingað til að afsala sér og fresta sínum launahækkunum. Annað hafi ekki orðið að veruleika í þessum sáttmála sem öllu átti að redda fyrir launþega þessa lands.

Hægt er að lesa ræðu formanns Verkalýðsfélags Akraness hér.