Fyrri úthlutun orlofshúsa sumarið 2015 er nú lokið og verða svarbréf til allra umsækjenda, hvort sem þeir fengu úthlutað eða ekki, póstlögð í fyrramálið. Þeir sem fengu úthlutað geta nú þegar séð bókun sína á Félagavefnum (undir Orlofshús og Bókunarsaga) og geta á sama stað greitt með greiðslukorti vilji þeir nýta vikuna, eða fellt bókunina niður henti hún ekki. Einnig er hægt að ganga frá greiðslu með millifærslu í heimabanka eða á skrifstofu félagsins. Ganga verður frá greiðslu fyrir eindaga sem er 4. maí. 

Eftir eindaga verða allar ógreiddar bókanir felldar niður og teknar til endurúthlutunar. Allir þeir sem ekki fengu úthlutað í fyrri úthlutun eru sjálfkrafa með í endurúthlutun og einnig geta þeir sem voru seinir fyrir skilað inn umsókn. Þeim sem eiga inni umsókn í endurúthlutun er bent á að hægt er að breyta umsókninni fyrir endurúthlutunina til að auka möguleika á að fá úthlutað þá. Nú þegar er hægt að sjá á Félagavefnum (undir Orlofshúsog Laus orlofshús) hvaða vikur gengu ekki út í fyrri úthlutun. Eftir eindaga mun þessum lausu vikum fjölga umtalsvert þegar búið er að fella niður ógreiddar bókanir.

Frestur til að skila nýjum eða breyttum umsóknum í endurúthlutun er til miðnættis 5. maí. Endilega hafið samband við skrifstofu ef aðstoðar er þörf við umsóknarferlið eða ef spurningar vakna.

Þau stórkostlegu tíðindi gerðust á aðalfundi HB Granda að stjórnarlaun voru hækkuð um 33,3%. Þessu fagnar Verkalýðsfélag Akraness innilega, einfaldlega vegna þess að þetta hlýtur að gilda líka fyrir allt fiskvinnslufólk sem starfar hjá fyrirtækinu, annað væri með hreinustu ólíkindum. 

Þetta er dálítið kaldhæðnislegt að horfa upp á hækkun stjórnarlauna upp á 33,3% á sama tíma og landverkafólk HB Granda á Akranesi er að kjósa um verkfall vegna þess að því stendur einungis til boða launahækkun í kringum 3,3% sem myndi gefa um 6.000-7.000 kr. hækkun á mánuði. Það merkilega í þessu er að einn stjórnarmaðurinn í HB Granda er aðalmaður í stjórn Samtaka atvinnulífsins en hún heitir Rannveig Rist. Eins og allir vita þá mótar aðalstjórn SA kjarastefnu Samtaka atvinnulífsins þannig að Rannveig tók þátt í því að semja kjarastefnu þar sem almennu launafólki er boðið fyrir hönd SA upp á 3,3% en þiggur síðan sjálf hækkun á stjórnarlaunum upp á 33%. Semsagt, komman er tekin í burtu, þristinum ýtt nær öðrum þristi og út koma 33%. 

Það er alveg morgunljóst að starfsmenn HB Granda eru æfir af reiði. Á sama tíma og það stefnir í ein hörðustu verkfallsátök á íslenskum vinnumarkaði hjá verkafólki þá dúndrar stjórn HB Granda blautri tusku framan í starfsmenn með 33% launahækkun til handa stjórnarmönnum og þetta er að gerast þegar fiskvinnslufólkinu er einungis boðið að fá 3,3% í launahækkun.

Samtök atvinnulífsins hafa sagt að þau séu ekki hrifin af krónutöluhækkunum, þau vilji prósentuhækkanir. Gott og vel, ef að fiskvinnslufólki í HB Granda stendur til boða 33% launahækkun við undirskrift, þá er Verkalýðsfélag Akraness til í það, bara koma með samningsdrögin og það verður skrifað undir einn, tveir og þrír. Enda myndi slík prósentuhækkun skila fiskvinnslufólki HB Granda um 80.000 kr. launahækkun á mánuði. Ef að þetta er nálgun sem Samtök atvinnulífsins vilja klára samningana á, ekki krónutöluhækkun heldur sama prósentuhækkun og stjórnarmenn HB Granda fengu síðastliðinn föstudaginn, þá ítrekar VLFA að það yrði samþykkt. 

Það er alveg hvellskýrt og meira að segja morgunljóst að félagsmenn Verkalýðsfélags Akraness munu ekki undir nokkrum kringumstæðum láta svona miskunnarlaust óréttlæti yfir sig ganga. Formaður spyr hluthafa í HB Granda, er ekkert siðferði, er engin réttlætiskennd? Samþykktu menn möglunarlaust 33% launahækkun til handa stjórnarmönnum á sama tíma og fiskvinnslufólk lepur dauðann úr skel? Hví í ósköpunum steig enginn fram á hluthafafundinum íslensku fiskvinnslufólki til varnar? HB Grandi er glæsilegt fyrirtæki sem við Akurnesingar erum stoltir af, hefur vaxið og dafnað og gert frábæra hluti, skilar meðal annars methagnaði ár eftir ár, rúmum 5 milljörðum. Arðgreiðslur upp á 2,7 milljarða. En þegar kemur að fólkinu sem skapar arðinn, þá stendur lítið eftir annað en einn lítill pinnaís. 

Það er full ástæða til að Samtök atvinnulífsins svari því núna: Ógnar 33% launahækkun stjórnarmanna HB Granda ekki stöðugleikanum? Gildir það bara ef íslenskt lágtekjufólk fer fram á leiðréttingu á sínum launum? Samtök atvinnulífsins segja ætíð að það sé ekki hægt að hækka lægstu launin sérstaklega þar sem það hríslist upp allan stigann. Gott og vel, því nú er komið að því að ofurlaun íslenskra forstjóra og stjórnarmanna hríslist niður stigann þannig að þau lendi í vasa íslensks lágtekjufólks. 

Skýr skilaboð til Samtaka atvinnulífsins: Íslenskt verkafólk er tilbúið að fylgja eftir réttlætinu af fullum þunga og mun berjast fyrir því með kjafti og klóm að lágmarkslaun á Íslandi verði 300.000 kr. innan þriggja ára. Þetta ofbeldi sem íslenskt lágtekjufólk hefur þurft að þola í gegnum tíðina, því skal linna í eitt skipti fyrir öll því fyrirtæki sem greiða arðgreiðslur upp á 2,7 milljarða og hækka stjórnarlaun um 33% en dissa sitt eigið fólk með þessum hætti á ekki skilið annað en hörð átök. Átök sem munu að lokum leiða  til þess að íslenskt verkafólk geti haldið mannlegri reisn.    

Sjómannadeild Verkalýðsfélags Akraness boðar sjómenn til fundar í dag klukkan 14:00 á Gamla kaupfélaginu. 

Fundarefnið er nýgerður kjarasamningur Sjómannasambands Íslands við Samtök fyrirtækja í sjávarútvegi.

Það hefur ekki farið framhjá mörgum að umtalsverðar gremju gætir á meðal sjómanna með nýgerðan kjarasamning. Það er mikilvægt að sjómenn mæti á fundinn þar sem farið verður yfir samninginn og þá gremju sem ríkir hjá sjómönnum.

Í gær hélt formaður Verkalýðsfélags Akraness fund með sjómönnum sem tilheyra sjómannadeild Verkalýðsfélags Akraness. Á fundinum var farið yfir nýgerðan kjarasamning Sjómannasambands Íslands við Samtök fyrirtækja í sjávarútvegi.

Það er óhætt að segja að veruleg gremja ríki hjá sjómönnum með nýgerðan kjarasamning og var að heyra á mönnum að þeim fyndist vanta umtalsvert í samninginn. Það fer einnig ekkert á milli mála að það hefur myndast gríðarleg gjá á milli sjómanna og útgerðarmanna hvað varðar traust, en sjómenn treysta því ekki að þau atriði sem um var samið verði framkvæmd eins og samningur kveður á um. Kom skýrt fram hjá sjómönnum að þar tala þeir af reynslu.

Sjómönnum var t.d. tíðrætt um að þeir treysta því ekki að sú úttekt sem samið var um og lýtur t.d. að mönnunarmálum á uppsjávarskipum og ísfisktogurum verði hafin yfir alla vafa. Menn treysta ekki heldur útgerðarmönnum hvað varðar samræmda upplýsingagjöf á uppsjávarafurðum sem nota á til grundvallar á verðmyndun á uppsjávarafla. Það er svo sannarlega umhugsunarefni fyrir útgerðarmenn hvernig þeir virðast hafa glatað öllu trausti sjómanna.

Það verður að viðurkennast að margir sjómenn virðast upplifa hroka, yfirgang og virðingarleysi í sinn garð af hálfu sumra útgerðarmanna sem klárlega hefur gert

það að verkum að það ríkir því miður algert vantraust á milli sjómanna og útgerðarmanna. Það er ljóst að útgerðarmenn verða að  líta í eigin rann og spyrja sig af hverju þetta mikla vantraust ríki og hvað þeir geti gert til að bæta samskipti sín við sjómenn.

Það er algerlega morgunljóst að nýgerður kjarasamningur verður að vera innihaldsríkari, með öðrum orðum það þarf að koma meira inn í samninginn til að sjómenn verði á eitt sáttir. Útgerðarmenn verða líka að ávinna sér traust sjómanna og sýna þeim virðingu fyrir þau mikilvægu störf sem þeir inna af hendi fyrir útgerðarmenn og þjóðarbúið allt. Ugglaust vilja útgerðarmenn ekkert kannast við að þeir sýni sjómönnum hroka, vanvirðingu og skilningsleysi en það er hins

vegar staðreynd að fjölmargir sjómenn upplifa slíkt.

Hvernig ráðningarsamband er það á milli útgerðar og sjómanna þegar gríðarlegur fjöldi sjómanna þorir ekki undir nokkrum kringumstæðum að tjá sig um þau atriði sem þeir eru á eitt ósáttir við af ótta

við að verða látnir taka pokann sinn og missa þannig sitt lífsviðurværi. Að sjálfsögðu á allt launafólk að geta komið óánægju vegna sinna hagsmunamála á framfæri við sinn vinnuveitanda án þess að eiga von á því að vera refsað illilega fyrir þau sjálfsögðu mannréttindi að mega koma sínum skoðunum á framfæri.

Þegar atvinnurekendur haga sér með þessum hætti þá er ekki hægt annað en að kalla slíkt ráðningarsamband ofbeldissamband og er það þeim til skammar.

Eftir fundinn í gær þá myndi formaður telja yfirgnæfandi líkur á að þessi kjarasamningur verði felldur en það kemur í ljós 14. desember þegar kosningu lýkur. Það mikilvægt fyrir alla útgerðarmenn að líta í eigin rann og segja við verðum að ávinna traust sjómanna og við verðum að sýna okkar sjómönnum þá lágmarksvirðingu sem þeir eiga skilið fyrir sín störf.  Þetta eru menn sem vinna oft á tíðum við mjög erfiðar aðstæður fjarri sinni fjölskyldu svo dögum og vikum skiptir.

Það er mat formanns Verkalýðsfélags Akraness að útgerðarmenn eigi að nýta tíman vel til 14. desember og ræða hvernig þeir geti áunnið sér traust hjá sjómönnum og lagfært kjarasamninginn þannig á sjómenn séu á eitt sáttir.  Ef það gerist ekki þá telur formaður nokkuð ljóst að það sama muni gerast og gerist í flestum ofbeldissamböndum, að annar aðilinn lætur sig eðlilega hverfa og í þessu tilfelli verða það sjómenn sem munu láta sig hverfa ef kjarasamningurinn verður ekki lagfærður og þessari vanvirðingu sem þeir upplifa ljúki ekki í eitt skipti fyrir öll.

Klukkan 8 í morgun hófst kosningin um verkfall verkafólks á hinum almenna vinnumarkaði. Formaður ítrekar mikilvægi þess að félagsmenn taki þátt í kosningunni og segi já við verkfalli til að knýja fram þá sanngjörnu kröfu um að lágmarkslaun á Íslandi verði orðin 300.000 kr. eigi síðar en innan 3 ára. 

Kjörgögnin munu berast til félagsmanna í dag og á morgun og nú verða félagsmenn að standa saman allir sem einn því með samstöðu mun okkur takast að ná fram þeirri kröfu að dagvinnulaun verkafólks dugi fyrir lágmarksframfærslu sem hið opinbera hefur gefið út.  

Verkfallið mun hafa mjög víðtæk áhrif hér á Akranesi enda mun það ná til 116 fyrirtækja. Fjölmennustu hóparnir eru eðli málsins samkvæmt tengdir sjávarútvegsfyrirtækjum eins og HB Granda en því til viðbótar mun þetta hafa víðtæk áhrif á starfsemi GMR á Grundartanga, á flutningafyrirtæki, rútufyrirtæki, verktakafyrirtæki, lifrarbræðsluna, hrognavinnslu, ræstingar, bensínstöðvarnar og meira að segja mun þetta verkfall ná til starfsmanna Spalar sem vinna í gjaldskýlinu í Hvalfjarðargöngum. Með öðrum orðum, verkfallið mun hafa mjög víðtæk áhrif jafnt á sjávarútvegsfyrirtæki og ferðaþjónustu sem og önnur fyrirtæki.

Þessa dagana stendur yfir viðhorfskönnun meðal starfsmanna Norðuráls þar sem leitast er eftir því að kanna hvort vilji sé hjá starfsmönnum að fara úr 12 tíma vaktakerfi yfir í 8 tíma vaktakerfi eins og tíðkast hjá Elkem Ísland á Grundartanga og reyndar öllum þeim stóriðjum sem eru starfræktar hér á landi.

Í dag er vaktavinnufólk í ker- og steypuskála Norðuráls að vinna 182 tíma á mánuði sem þýðir að starfsmenn skila 26 föstum yfirvinnutímum á mánuði, en dagvinnuskylda í stóriðjum er 156 dagvinnustundir en ekki 173,33 eins og gerist á hinum almenna vinnumarkaði.

Hjá Elkem Ísland er eins og áður sagði 8 tíma vaktakerfi þar sem starfsmenn standa 6 vaktir á 5 dögum og eiga 5 daga í frí. Það þýðir að á meðaltali eru þar 18,2 vaktir á mánuði sem gera 145,6 tíma á mánuði og til að fylla uppí 156 dagvinnustundaskylduna þurfa menn að taka 1 skilavakt í mánuði.

Það liggur fyrir að þetta 8 tíma vaktakerfi sem er við lýði hjá Alcan í Straumsvík, Fjarðaráli og Elkem Ísland er mjög gott vaktakerfi sem allir starfsmenn láta vel af. Hins vegar hefur verið töluverð ónægja á meðal sumra starfsmanna hjá Norðuráli með þetta 12 tíma vaktakerfi enda liggur fyrir að það getur tekið mjög á starfsmenn að vinna svo langar vaktir. Hins vegar er þetta 12 tíma vaktakerfi þannig uppbyggt að starfsmenn hafa 26 fasta yfirvinnutíma og við það að fara í 8 tíma vaktakerfi falla þessir 26 yfirvinnutímar út.

Það er hins vegar mjög mikilvægt að allar upplýsingar séu yfir allan vafa hafnar þegar kemur að því að upplýsa starfsmenn um kosti og galla þess að hverfa frá 12 tíma vaktakerfi yfir í 8 tíma kerfi.

Miðað við þau gögn sem formaður VLFA hefur farið yfir er ljóst að upplýsingagjöfin um kosti og galla þessara tveggja vaktakerfa er ekki hlutlaus, enda liggur fyrir að forsvarsmenn Norðuráls virðast frekar vilja halda í 12 tíma vaktakerfið enda mun 8 tíma kerfið kalla á aukakostnað fyrirtækisins. Formaður VLFA hefur enga hagsmuni af því að breytt verði um vaktakerfi í Norðuráli aðra en velferð starfsmanna og er formaður ekki í neinum vafa um að hagsmunum og velferð starfsmanna er betur borgið í 8 tíma vaktakerfi enda er gríðarlega erfitt að standa í 12 tíma nánast samfleytt í miklum hita og við krefjandi aðstæður.

Eins og áður sagði þá finnst formanni upplýsingarnar ekki vera hlutlausar af hálfu fyrirtækisins og sem dæmi þá er talað um að frí vaktavinnumanna Norðuráls sé á milli vaktatarna 5 dagar, 4 dagar og 5 dagar.  Þetta er bara alls ekki rétt því starfsmenn eru búnir að skila 8 tímum í vinnu á öllum þessum frídögum og því er hið rétta að starfsmenn eiga 4 daga, 3, daga og 4 daga frí.  Hvernig geta forsvarsmenn Norðuráls talið það frídag þegar starfsmenn hafa skilað 8 tímum í vinnu? Í 8 tíma vaktakerfinu vinna menn 6 vaktir á 5 dögum og eiga 5 daga í frí.

Það líka mikilvægt að starfsmenn átti sig á því að þeir munu vinna sem nemur 1,7 mánuði minna á ári en þeir gera á 12 tíma vöktum eða sem nemur tæpum 2 mánuðum.

Í kynningu um launabreytingar á 12 og 8 tíma vaktakerfi kemur fram að byrjandi í Norðuráli sé með 496 þúsund á mánuði en með því að taka 26 yfirvinnutíma út og fara á 8 tíma vaktakerfi þá eru launin 425 þúsund á mánuði eða sem nemur lækkun um 71 þúsund krónum. Hjá starfsmanni sem er með 10 ára starfsaldur eru launin miðað við 12 tíma vaktakerfi 603 þúsund á mánuði en á 8 tíma vaktakerfi verða launin 516 þúsund eða sem nemur lækkun um 86 þúsund. Mikilvægt er að átta sig á því að með 8 tíma vaktakerfinu eru starfsmenn að vinna 156 tíma á mánuði en ekki 182 tíma sem eru 26 færri tímar á mánuði eða samtals 312 tímar á ári. Með öðrum orðum þá vinna starfsmenn sem nemur tæpum 2 mánuðum minna á ári. Það líka mikilvægt að hafa í huga að þótt starfsmenn séu að lækka í heildarlaunum frá 71 þúsundum uppí 86 þúsund krónur á mánuði þá lækka útborguð laun mun minna og sem dæmi þá lækka útborguð laun byrjanda um 41 þúsund og starfsmanns með 10 ára starfsaldur um 50 þúsund á mánuði en starfsmenn eru líka að vinna 26 tímum minna á mánuði og einnig eru þetta 8 tíma vaktir en ekki 12 tíma.  Það líka mikilvægt að starfsmenn átti sig á því að þetta vaktakerfi gefur þeim sem það vilja möguleika á að taka aukavaktir ef starfsmenn þurfa að auka tekjur sínar.

Það er alls engin tilviljun að allar stóriðjur fyrir utan Norðurál eru með 8 tíma vaktakerfi enda liggur fyrir að það kerfi er mun fjölskylduvænna, vinnutíminn mun styttri og því hafa starfsmenn meiri frítíma með sinni fjölskyldu.

Eins og áður hefur komið fram þá hefur formaður félagsins enga hagsmuni af því að horfið verði frá 12 tíma vaktakerfi yfir í 8 tíma kerfi aðra en þá er lýtur að velferð starfsmanna enda telur formaður að langur vinnudagur í miklum hita og álagi sé lýðheilsumál og er hann ekki í nokkrum vafa um að 8 tíma vaktakerfi sé betra hvað velferð og heilsu starfsmanna áhrærir.

Formaður skorar á starfsmenn að skoða þessi mál vel og rækilega og því er mjög mikilvægt að allar upplýsingar sem starfsmenn fá séu hafnar yfir allan vafa en það liggur fyrir að fyrirtækið er hlynnt því að halda óbreyttu vaktakerfi og því verða starfsmenn að taka allri upplýsingagjöf frá fyrirtækinu með það í huga. Verkalýðsfélag Akraness skorar á vaktavinnufólk í Norðuráli að hafa samband ef það óskar eftir frekari upplýsingum er lýtur að kostum og göllum þess að vera á 12 eða 8 tíma vaktakerfi.

Það er mat formanns að ef tekið verður upp 8 tíma vaktakerfi eins og í hinum sóriðjunum þá verður Norðurál mjög eftirsóknarverður vinnustaður.

Nú hafa starfsmenn Verkalýðsfélags Akraness lokið við að senda út kjörgögn vegna komandi kosningar um verkfall. Ættu kjörgögnin að vera búin að berast félagsmönnum strax eftir helgi en opnað verður fyrir kosninguna 13. apríl. Eins og áður hefur komið fram er íslenskt verkafólk á hinum almenna vinnumarkaði nú nauðbeygt til að beita verkfallsvopninu í fyrsta sinn í áratugi. 

Ástæðan er einföld, Samtök atvinnulífsins bjóða íslensku verkafólki launahækkun sem nemur 3 - 3,5% sem myndi þýða í kringum 7.000-8.000 kr. launahækkun á mánuði sem er algjörlega fjarri því að duga til að lagfæra kjör verkafólks með þeim hætti að þau dugi fyrir lágmarksframfærslu. Þetta tilboð er svo sorglegt, sérstaklega í ljósi þess að fjölmargar atvinnugreinar sem félagsmenn Verkalýðsfélags Akraness starfa hjá græða og skila hagnaði eins og enginn sé morgundagurinn. Í dag er til að mynda HB Grandi með aðalfund þar sem á að leggja til að greidd verði arðgreiðsla til eigenda sem nemur 2,7 milljörðum en fyrirtækið skilaði sem betur fer glæsilegri afkomu á síðasta ári sem nam 5,7 milljörðum í hagnað. 

Maður hefði haldið að í ljósi svona góðrar afkomu þá væri til dæmis HB Grandi tilbúinn til að skila góðri afkomu til landverkafólksins með afgerandi hætti en slíku er alls ekki til að dreifa. Þeir eru innan Samtaka atvinnulífsins og bjóða 7.000 - 8.000 kr. hækkun á mánuði. Og hvað myndi það þýða til dæmis fyrir fyrirtæki eins og HB Granda í kostnað? Jú, þetta tilboð sem fiskvinnslufólki í HB Granda og öðrum stendur til boða myndi kosta fyrirtækið í kringum 3,7 milljónir á mánuði en um 500 landverkamenn vinna hjá HB Granda. Já, hugsið ykkur, tilboðið sem SA leggur fram fyrir hönd HB Granda myndi vera með kostnaðarauka upp á 3,7 milljónir handa 500 manns sem er eilítið meira heldur en heildarlaun forstjórans á mánuði. 

Er það boðlegt að fyrirtæki sem er að greiða sér arðgreiðslur upp á 2,7 milljarða skuli leggja til að launakostnaður fiskvinnslufólksins hækki einungis um 3,7 milljónir á mánuði? Hvernig hafa eigendur slíks fyrirtækis samvisku til að taka þátt í slíkri smámunasemi og hví í ósköpunum eru fyrirtæki sem eru að skila svona ofurafkomu ekki tilbúin til að deila ávinningnum með þeim sem skapa hagnaðinn sem er jú starfsfólkið. Það er morgunljóst að það verður hvergi gefið eftir í þessari kjarabaráttu en ef til dæmis HB Grandi myndi ganga að kröfum VLFA að fullu þá myndi það kosta fyrirtækið 400 milljónir. Það eru smáaurar miðað við afkomutölur fyrirtækisins og eigendum fyrirtækisins ber siðferðisleg skylda til að skila góðri afkomu með betri og afgerandi hætti til starfsmanna heldur en hingað til hefur verið gert. 

Formaður skorar á félagsmenn sem munu fá kjörgögn eftir helgi að kjósa og segja JÁ við verkfalli. Félagið á góðan verkfallssjóð og munu starfsmenn fá 10.000 krónur fyrir hvern dag í verkfallsstyrk sem verkfallið stendur yfir. Félagið mun geta haldið sínum félagsmönnum í verkfalli í rúman mánuð miðað við þann sjóð sem félagið á og það mun félagið gera ef þurfa þykir. Félagsmenn munu öðlast rétt úr verkfallssjóði strax eftir fyrsta verkfallsdag, verkfallssjóðir eru til þess að styðja við félagsmenn í verkfallsátökum og því engin ástæða til að láta einhvern tíma líða þar til starfsmenn byrja að öðlast rétt úr verkfallssjóðnum. Formaður ítrekar enn og aftur: Kjósum, sýnum samstöðu, því oft er þörf en nú er nauðsyn. Skiptum þjóðarkökunni með sanngjörnum hætti! 

Núna er Verkalýðsfélag Akraness ásamt öðrum aðildarfélögum innan Starfsgreinasambands Íslands að undirbúa nýja kosningu til verkfalls. Kjörgögn verða send út fyrir helgi og ættu að vera búin að berast félagsmönnum í byrjun næstu viku en kosningin mun standa yfir frá 13. apríl til 20. apríl. 

Það er gríðarlega mikilvægt að þeir sem hafa kosningarétt, sem er verkafólk á hinum almenna vinnumarkaði, nýti sér kosningaréttinn og segi já við verkfalli því afstaða Samtaka atvinnulífsins til sanngjarnrar og réttlátrar kröfu verkafólks hefur verið algjört tómlæti og því ekkert annað í stöðunni en að mæta atvinnurekendum af fullri hörku með hörðum verkfallsaðgerðum. Krafa upp á 300.000 kr. lágmarkslaun innan þriggja ára er ekki bara réttlát, hún er sanngjörn og bráðnauðsynleg enda liggur það fyrir að þau kjör sem eru í boði núna fyrir verkafólk duga ekki fyrir lágmarksframfærslu sem hið opinbera hefur gefið út. Því er verkafólk eins og áður sagði nauðbeygt til að beita verkfallsvopninu í fyrsta sinn í langan tíma. 

Það skiptir máli að það verði góð þátttaka í kosningunni með afgerandi niðurstöðu því með samstöðunni verður íslensku verkafólki allir vegir færir enda hefur verkafólk þjóðina með sér í heild sinni. Almenningi í þessu landi ofbýður þau launakjör sem íslensku verkafólki er boðið upp á, sérstaklega í ljósi þess að fjöldi atvinnugreina græðir eins og enginn sé morgundagurinn án þess að vera tilbúnar til þess að rétta launafólki svo mikið sem lítinn hlut af þeim mikla hagnaði sem fyrirtækin eru að skila þessa dagana. Nægir að nefna þar sjávarútveginn fremstan í flokki, grein sem skilar 40-60 milljörðum ár hvert og arðgreiðslur flæða til eigenda upp á 6-12 milljarða, en að hækka laun fiskvinnslufólks um nokkra tugi þúsunda á ári kemur ekki til greina hjá þessum aðilum. 

Ferðaþjónustan er eins og hún er, þar eru kjarasamningsbrot og svört atvinnustarfsemi allsráðandi og það þrátt fyrir að í greininni ríki gullgrafaraævintýri um þessar mundir. Kjörin í þeirri grein eru hvað lökust á íslenskum vinnumarkaði í dag en þar er klárlega nægt svigrúm til að gera betur, vilji er allt sem þarf hvað það varðar.

Verkalýðsfélag Akraness býr sig undir grjóthart verkfall en sem betur fer stendur félagið gríðarlega vel fjárhagslega og er með góðan verkfallssjóð og það liggur fyrir að félagið mun geta haldið sínum félagsmönnum í verkfalli í rúman mánuð án þess að sjóðurinn myndi tæmast. Það er morgunljóst að félagið mun nýta verkfallssjóðinn í þessum átökum enda er sjóðurinn til þess og það mun hjálpa félagsmönnum að fara í þessi hörðu átök sem framundan eru.

Verkalýðsfélag Akraness vill minna félagsmenn sína að þeir eiga rétt á desemberuppbót samkvæmt starfshlutfalli og starftíma og eiga öll fyrirtæki að vera búin að greiða desemberuppbæturnar út í síðasta lagi 15 desember næstkomandi. 

Desemberuppbætur eru misháar eftir fyrirtækjum og kjarasamningum en þær eru eftirfarandi:

°              Starfsmenn Norðuráls:                185.688 krónur.

°              Starfsmenn Elkem og Klafa:       181.458 krónur.

°              Starfsmenn sveitafélaga:            106.250 krónur.

°              Almenni markaðurinn:                 82.000 krónur.

°              Starfsmenn Ríkis:                        82.000 krónur.

Nánari upplýsingar um rétt til desemberuppbóta er hægt að fá á skrifstofu félagsins í síma 430-9900

Í gær hófst 30. þing Sjómannasambands Íslands og verður því fram haldið í dag, en Verkalýðsfélag Akraness á þrjá fulltrúa á þinginu. Að þessu sinni er þingið haldið í skugga sýnilegrar óánægju sjómanna með nýgerðan kjarasamning og munu kjaramál því væntanlega vera mikið til umræðu á þinginu. Það er að heyra á sjómönnum almennt að talsverðar líkur séu á því að samningurinn verði felldur í yfirstandandi atkvæðagreiðslu og því er mikilvægt að farið verði yfir þá stöðu sem getur komið upp ef það verður niðurstaðan þegar atkvæði verða talin þann 14. desember nk.

Þau atriði í nýgerðum kjarasamningi sem sjómenn hafa helst verið óhressir með eru til að mynda nýsmíðaálagið og verðlagsmálin, auk þess sem tortryggni ríkir varðandi ákvæði um mönnunarmálin. Eins og fram hefur komið hjá formanni VLFA ríkir gríðarlegt vantraust á milli útgerðarmanna og sjómanna því menn hafa ekki trú á því að þau atriði sem um hefur verið samið komi til framkvæmda. Það er því afar nauðsynlegt að tryggja á einhvern hátt framkvæmd þeirra atriða sem um hefur verið samið milil aðila.