Stjórn Verkalýðsfélag Akraness og starfsmenn félagsins  senda félagsmönnum sínum og landsmönnum öllum bestu jólakveðjur með óskum um farsæld og frið á jólum, um áramót og á komandi ári. 

ið minnum á aðalfund sjómannadeildar Verkalýðsfélags Akraness sem verður í dag og hefst klukkan 14. Fundurinn verður haldinn í fundarsal félagsins að Sunnubraut 13.

Auk venjubundinnar aðalfundardagskrár munu áform ríkisstjórnarinnar um afnám sjómannaafsláttarins klárlega verða til umræðu enda er hér verið að höggva í starfskjör sjómanna sem hafa verið við lýði í hartnær 40 ár. Það er mat félagsins að það sé ekki hægt að láta þessi áform yfir sjómenn ganga átölulaust.

Rétt í þessu var að ljúka aðalfundi sjómannadeildar Verkalýðsfélags Akraness. Auk venjubundinna aðalfundarstarfa var samþykkt ályktun vegna áforma ríkisstjórnar Íslands um að afnema sjómannaafsláttinn. Í ályktuninni segir meðal annars:

Aðalfundur sjómannadeildar hvetur alla sjómenn til að standa þétt saman í því að koma í veg fyrir þessi áform og mun sjómannadeild Verklýðsfélags Akraness ekki skjóta sér undan þeirri ábyrgð ef samstaða næst um aðgerðir til varnar sjómannaafslættinum.

Formaður félagsins fór yfir hin ýmsu mál er lúta að sjómannadeildinni og upplýsti fundarmenn um mikilvægi þess að kynna sér það sem félagið býður upp á, bæði er lýtur að sjúkrasjóði sem og greiðslum úr starfsmenntunarsjóði Sjómenntar og einnig aðra þjónustu sem félagið býður upp á. Farið var vítt og breitt um réttindamál sjómanna og voru fundarmenn sammála um mikilvægi þess að vanda vel til kjarasamningsgerðar en kjarasamningur sjómanna er laus eftir rétt rúmt ár.

Það þarf að fara alveg aftur til ársins 1995 til að finna álíka mikið atvinnuleysi hér á Akranesi eins og staðan er í dag. Nú eru 356 Akurnesingar án atvinnu og er skipting á milli kynja nokkuð jöfn. Þessu til viðbótar eru 26 einstaklingar án atvinnu í svæðisnúmeri 301 sem eru nærsveitirnar hér í kringum Akranes.

Á Vesturlandi öllu eru 617 án atvinnu og er það gríðarleg fjölgun ef litið er til síðustu þriggja ára og álag á starfsmenn Vinnumálastofnunnar er mjög mikið en starfsmannafjöldi er jafnmikill nú og var fyrir þremur árum síðan þegar atvinnuleysið á Vesturlandi öllu var innan við 100 manns. Það er skýlaus krafa Verkalýðsfélags Akraness að starfsmönnum Vinnumálastofnunnar verði sköffuð þau starfsskilyrði svo viðunandi sé, bæði fyrir starfsmenn og síðast en ekki síst fyrir atvinnuleitendur.

Á þessu sést að staðan er nokkuð alvarleg þó svo að á okkar atvinnusvæði sé ástandið mun betra en á höfuðborgarsvæðinu og á Suðurnesjum. Það fjölgaði til dæmis um 15 manns í fiskvinnslu HB Granda eins og fram kom hér á heimasíðunni í gær og einnig hefur stóriðjan á Grundartanga haldið lífæð atvinnulífsins gangandi.

Hinn árlegi jólatrúnaðarráðsfundur Verkalýðsfélags Akraness var haldinn í gær. Meginefni fundarins var að formaður gerði grein fyrir því ári sem nú er senn á enda og einnig hafði stjórn félagsins ákveðið að heiðra gamlan baráttumann félagsins, Ásmund Una Guðmundsson, en hann hefur verið viðriðinn stjórn félagsins með einum eða öðrum hætti frá árinu 1965.

Fram kom í máli formanns að árið í ár væri búið að vera afar viðburðaríkt í ljósi þess ástands sem nú ríkir í íslensku efnahags- og atvinnulífi. Fór formaður yfir frestun á þeim launahækkunum sem áttu að taka gildi á síðasta ári samkvæmt kjarasamningi frá 17. febrúar 2008 en eins og allir vita hefur Verkalýðsfélag Akraness mótmælt harðlega því samkomulagi sem samninganefnd ASÍ og Samtök atvinnulífsins gengu frá bæði í febrúar og í júní. Það kom fram í máli formanns að það sé með ólíkindum að samninganefnd ASÍ skuli hafa gefið vel stæðum útflutningsfyrirtækjum tækifæri til að koma sér hjá þeim kjarasamningi sem um var samið á árinu 2008. Það kom einni fram í máli formanns að verkafólk sem ekki fékk sínar launahækkanir samkvæmt samningnum hafi orðið af fjárhæð sem nemur á annað hundrað þúsund króna vegna þessarar linkindar samninganefndar ASÍ.

Í lok september lauk hvalvertíðinni og eins og fram hefur komið í fréttum veiddust 125 langreyðar af 150 hvala kvóta sem Hvalur hf fékk úthlutað.

Það er óhætt að segja það að veiðar á stórhveli hafi haft gríðarlega jákvæð áhrif fyrir samfélagið hér á Akranesi og í nærsveitum enda voru upp undir 150 manns sem fengu störf veiðunum tengdum og voru upp undir 80 manns héðan frá Akranesi sem unnu á vertíðinni.

Meðallaun þeirra sem tilheyra Verkalýðsfélagi Akraness og störfuðu hjá Hval hf voru 561 þúsund krónur á mánuði, að teknu tilliti til þeirra þriggja mánaða sem hávertíðin stóð yfir. Á þessu sést að tekjumöguleikar starfsmanna voru nokkuð góðir sérstaklega í því árferði sem nú ríkir á íslenskum vinnumarkaði. Það ber hins vegar að geta þess að mikið vinnuframlag liggur að baki þessum tekjum starfsmanna Hvals.

Það má alveg halda því fram að veiðar og vinnsla á hval hafi verið hálfgerð stóriðja, enda skilaði starfsemin umtalsverðum útsvarstekjum fyrir Akraneskaupstað og einnig fyrir sveitafélögin hér í kring. 

Þetta sýnir hversu gríðarlega mikilvægt er að við nýtum okkar sjávarauðlindir að fengnu áliti Hafrannsóknarstofnunar og við eigum ekki undir nokkrum kringumstæðum að láta fámenna öfgahópa úti í heimi kúga okkur til þess að afsala okkur nýtingu á okkar auðlindum.

Nú hefur komið í ljós að ferðamannastraumur til landsins hefur aldrei verið jafn blómlegur og í ár og nægir að nefna í því samhengi að aldrei hafa fleiri farið í hvalaskoðunarferðir frá Húsavík eins og í ár. Þetta sýnir einnig svo ekki verður um villst að veiðar á hvölum og hvalaskoðun geta klárlega farið saman án þess að skaða hvort annað.

Það ber að þakka Kristjáni Loftsyni forstjóra Hvals hf og öllu hans frábæra starfsfólki fyrir þeirra framlag til að skapa hér atvinnu og auka gjaldeyristekjur þjóðarinnar því það er þannig sem við vinnum okkur út úr þeim efnahagshremmingum sem við Íslendingar erum nú í. 

Nú er bara að vona að veiðar og vinnsla á hval hefjist fyrr á næsta ári og skili okkur Íslendingum jafn miklum ávinningi og vertíðin gerði sem nú er nýlokið.

Bæjaryfirvöld sína starfsmönnum íþróttamannvirkja fantaskapEins og fram kom hér á heimasíðunni í sumar tilkynntu bæjaryfirvöld Akranesskaupstaðar sparnaðarleiðir sem lutu að styttingu á vinnutíma starfsmanna íþróttamannvirkja. Þessi stytting varð þess valdandi að laun þessara starfsmanna skertust um frá 30 þúsund krónum upp í tæpar 70 þúsund krónur á mánuði. Þessu mótmælti Verkalýðsfélag Akraness fyrir hönd sinna félagsmanna harðlega enda var verið að ráðast illilega á þá sem eru með hvað lægstu tekjurnar hjá Akraneskaupstað.

Nú hafa bæjaryfirvöld tilkynnt að þau hyggist ætla að leyfa starfsemi í íþróttahúsi bæjarins að Vesturgötu í tvær klukkustundir á viku og einnig í Bjarnalaug án þess að starfsmenn bæjarins séu til staðar. Þeir ætla sér með öðrum orðum að láta þjálfara viðkomandi íþróttahópa sem stunda æfingar á þessum tímum ganga í störf starfsmanna íþróttamannvirkja sem þeir hafa sinnt undanfarin ár og áratugi.  Þessu mótmælti Verkalýðsfélag Akraness harðlega í bréfi til bæjaryfirvalda sjá hér.

Þegar skerðingin á vinnutíma starfsmanna íþróttamannvirkja var tilkynnt í sumar var það eitthvað sem starfsmenn voru nauðbeygðir til að sætta sig við. Það að bæjaryfirvöld skuli voga sér að ætla að láta sjálfboðaliða ganga í störf starfsmanna sem eru með kjarasamningsbundin réttindi um þau störf sem um ræðir er með öllu ólíðandi og verður ekki látið átölulaust.

Það er líka ámælisvert, og er það vægt til orða tekið, að ætla sér að heimila íþróttaiðkun án þess að starfsmaður sé til staðar, öryggisins vegna. Enda liggur fyrir viðbragðsáætlun sem starfsmenn hafa undirgengist og er hluti af þeirra starfi. Því er alveg óhætt að velta því fyrir sér hver ber ábyrgð á því ef eitthvert alvarlegt óhapp verður ef ekki er starfsmaður til staðar.

Starfsmenn íþróttamannvirkja Akranesskaupstaðar hafa falið Verkalýðsfélagi Akraness að gæta hagsmuna sinna í þessu máli. Það mun félagið svo sannarlega gera og hefur nú þegar hafið undirbúning að því að fara með málið fyrir dómstóla, enda getur það ekki staðist neina skoðun að gengið sé á rétt starfsmanna íþróttamannvirkja með jafn skelfilegum hætti og hér er að gerast. Ef þetta verður látið átölulaust er allt eins víst að þetta sé fyrsta skrefið í því að láta sjálfboðaliða ganga í störf starfsmanna og á þeirri forsendu verður þetta mál varið af fullri hörku enda getur málið verið fordæmisgefandi.

Sú lítilsvirðing sem starfsmönnum íþróttamannvirkja er sýnd með þessari ákvörðun bæjaryfirvalda er með hreinustu ólíkindum og er gríðarleg reiði á meðal starfsmanna og sem dæmi hvað það varðar var haldinn fundur um þetta mál í síðustu viku sem endaði með því að stór hluti fundarmanna gekk út.

Nú hefur ríkisstjórn Íslands tilkynnt nýjar leiðir til lausnar greiðsluvanda heimilanna. Leiðir sem nefnast greiðslujöfnun, þak á lengingu lána, greiðsluaðlögun og sértæk skuldaaðlögun.

Hagsmunasamtök heimilanna héldu fund í Iðnó sl. mánudagskvöld. Þar kynnti félagsmálaráðherra, Árni Páll Árnason, þessi nýju úrræði og það kom svo sem ekki á óvart að fundargestir létu óánægju sína berlega í ljós yfir þessum úrræðum sem félagsmálaráðherra kynnti.

Þegar þessi úrræði eru skoðuð þá liggur fyrir að ekki er verið að leiðrétta þann forsendubrest sem skuldarar hafa orðið fyrir vegna bankahrunsins heldur eru íslensk stjórnvöld einungis að tryggja að lánastofnanir fái örugglega allt sitt. Það á með öðrum orðum að tryggja það að alþýða landsins greiði allar sínar skuldir með góðu eða illu.

Ef við skoðum úrræðin fyrir bílalánin þá liggur fyrir að færa á gengisvísitöluna til 1. maí 2008, sem jú vissulega léttir á greiðslubyrði fólksins en lækkar ekki höfuðstól skuldarinnar vegna þess forsendubrests sem orðið hefur. Hægt er að lengja í láninu um 3 ár sem tryggir það að lánveitandinn fær örugglega allt sitt og ef svo ólíklega vill til að eitthvað stendur út af þá hefur lántakinn úrræði til að fá restina niðurfellda með því að skila lyklunum að bifreiðinni.

Ætla íslensk stjórnvöld að halda því að fram að það sé verið að hjálpa skuldsettum heimilum með þessum hætti? Ekkert er gert til að lagfæra þá gríðarlegu hækkun sem orðið hefur á skuldum heimilanna vegna bankahrunsins

Það gilda ekki sömu lögmál um fjármagnseigendur, þeir hafa verið tryggðir í bak og fyrir. Neyðarlögin tryggðu allar innistæður á bankabókum að fullu. Og rétt er að minna á að búið er að setja hundruð milljarða inn í peningamarkaðssjóðina og afskrifað tugi milljarða hjá eignarhaldsfélögum og nægir að nefna í því samhengi 800 milljónir hjá Bjarna Ármannssyni, 14 milljarða hjá Finni Ingólfssyni, 30 milljarða hjá Pálma Haraldssyni, 11 milljarða hjá Sigurði Bollasyni og áfram mætti lengi telja.

Svo halda menn því fram að það sé ekkert hægt að gera fyrir skuldsett heimili. Það er mat formanns Verkalýðsfélags Akraness að á engan hátt sé að sætta sig við þetta lengur og full ástæða fyrir skuldsett heimili að láta heyra í sér með kröftugum hætti.

Það ber að þakka Hagsmunasamtökum heimilanna fyrir sína ötulu baráttu í þessum málum og ljóst að það er full ástæða fyrir verkalýðshreyfinguna að fara að taka á þessum málum af fullum þunga.

Annar samningafundurinn vegna kjarasamnings Norðuráls var haldinn í húsakynnum ríkissáttasemjara í morgun og var aðallega verið að vinna í lagfæringum á hinum ýmsu orðalagsbreytingum í kjarasamningnum. Ekkert er farið að ræða um launaliðinn og verður það ekki gert fyrr en vinnunni í kringum orðalagsbreytingar í kjarasamningnum hefur verið lokið.

Formaður mun í næstu viku fara og hitta allar vaktirnar í Norðuráli til að kalla eftir hvað starfsmenn vilja leggja hvað mesta áherslu á í þeim viðræðum sem nú eru hafnar enda skiptir það gríðarlega miklu máli að starfsmenn allir hafi tækifæri til að koma með tillögur í þeirri vinnu sem nú er framundan við kjarasamning Norðuráls. Einnig skorar formaður á félagsmenn Verkalýðsfélag Akraness sem starfa hjá Norðuráli að vera óhræddir við að hafa samband við hann og koma með tillögur og hugmyndir vegna nýs kjarasamnings.

Eins og fram hefur komið hér á heimasíðunni þá telur formaður félagsins grundvallaratriði að jafna kjör starfsmanna Norðuráls við verksmiðjur í sambærilegum iðnaði í þessum samningum.