• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

27
 Sep

Störfum í fiskvinnslu að blæða út

Ógæfan dynur nú yfir fiskvinnslufólk vítt og breitt um landið en þegar þetta er ritað er búið að segja upp hátt í 100 manns sem starfa í fiskvinnslu í Þorlákshöfn og á Eskifirði.  Friðrik Arngrímsson framkvæmdastjóri LÍÚ segir þessar uppsagnir ekki koma sér á óvart og telur hann að fleiri uppsagnir fylgi í kjölfarið.

Þegar mótvægisaðgerðir ríkisstjórnarinnar voru kynntar nýverið  kom fram hjá ríkisstjórninni að ólíklegt væri að til fjöldaatvinnuleysis kæmi neins staðar á næstu mánuðum, hvorki hjá sjómönnum né landverkafólki.  Uppsagnirnar í dag sýna svo ekki verður um villst að ríkisstjórn Íslands skjátlaðist allverulega í þeim efnum.

Formaður Verkalýðsfélags Akraness spyr, ætlar ríkisstjórn Íslands ekkert að koma þessu fólki til hjálpar? Það er a.m.k. ekki að sjá á þeim mótvægisaðgerðum sem kynntar hafa verið og á það bæði við um fiskvinnslufólk og sjómenn.  Niðurskurður á aflaheimildum í þorski bitnar einmitt hvað harðast á fiskvinnslufólki og sjómönnum eins og dæmin eru svo sannarlega farin að sýna.

Það liggur orðið fyrir að störfum í fiskvinnslu er að blæða út en þessum störfum hefur fækkað gríðarlega á undanförnum árum og sem dæmi þá fækkaði störfum í fiskvinnslu um 500 á milli árana 2005 og 2006 samkvæmt gögnum frá Starfsgreinasambandi Íslands. 

Formaður VLFA krefst þess að ríkisstjórn Íslands opni augun fyrir þeirri skelfilegu stöðu sem komin er upp hjá sjómönnum og fiskvinnslufólki í kjölfar niðurskurðar á aflaheimildum í þorski.

Það er mat formanns félagsins að það fiskveiðistjórnunarkerfi og framsalskerfi sem hér hefur verið við lýði síðastliðin 23 ár sé meginorsök þeirra vandræða sem fiskvinnslufólk og sjómenn standa frammi fyrir í dag.

27
 Sep

Viðhorfskönnun vegna komandi kjarasamninga

Starfsmenn Verkalýðsfélags Akraness hafa sent út til um 500 félagsmanna viðhorfskönnun vegna komandi kjarasamninga undir fyrirsögninni Blásið til sóknar!

Eins og flestir vita þá renna kjarasamningar á hinum almenna vinnumarkaði út nú um áramótin og er undirbúningur fyrir kröfugerðina að hefjast að fullu.  Þessi viðhorfskönnun er einn liður í því að kanna hvaða atriði félagsmenn vilja leggja mesta áherslu á í komandi samningum.

Í þessari viðhorfskönnun eru nefnd 16 atriði og eiga félagsmenn að merkja við þau frá 1 og uppí 16 eftir mikilvægi þeirra atriða sem félagsmaður vill leggja áherslu á.

Eins og fjallað hefur verið um hér á heimasíðu félagsins þá er tími verkfólks kominn er lýtur að alvöru kauphækkun. Formaður hefur ritað um að hækka verði lágmarkslaun um allt að 40% í komandi kjarasamningum og er ánægjulegt að sjá að víðtæk sátt virðist vera að nást innan Starfsgreinasambands Íslands um að veruleg hækkun lágmarkslauna verði höfuðkrafan í komandi kjarasamningum. Með samstöðu alls verkafólks er æði margt að gera.

Það er mjög mikilvægt að félagsmenn svari könnunni til að hægt sé að sjá hvað félagsmenn vilja leggja mesta áherslu á í komandi kjarasamningum og einnig að sýna samstöðu í verki.

Skoða má könnunina með því að smella hér. 

26
 Sep

Nýr upplýsingabæklingur fyrir erlenda starfsmenn kominn út

Formaður félagsins var í viðtali á Bylgjunni í fyrradag þar sem réttindi erlendra starfsmanna á íslenskum vinnumarkaði voru til umræðu.

Í viðtalinu var m.a. rætt um könnun sem gerð var nýlega þar sem fram kom að 50% af erlendu verkafólki sem hér starfar talar hvorki íslensku né ensku.

Fram kom hjá formanni að stéttarfélögin eru að standa sig nokkuð vel í því að koma á íslenskunámskeiðum fyrir erlenda starfsmenn og á Vesturlandi voru t.a.m. haldin níu íslenskunámskeið í fyrra á vegum Símenntunarmiðstöðvar Vesturlands og á annað hundrað erlendir verkamenn sóttu þau námskeið.  Einnig eru stéttarfélögin að styrkja þessi námskeið í gegnum starfsmenntasjóði stéttarfélaganna að verulegu leyti.  Visslega má alltaf gera betur í því að kenna erlendum starfsmönnum íslensku.  Hins vegar þurfa atvinnurekendur að gefa erlendum starfsmönnum tækifæri til að sækja íslenskunámskeið í vinnutíma því eftir 10 til 12 tíma vinnudag eru erlendu starfmennirnir einfaldlega úrvinda af þreytu og treysta sér jafnvel ekki til að sækja þau námskeið sem í boði eru.

Nú hefur Verkalýðshreyfingin í samvinnu við Samtök atvinnulífsins gefið út bækling á pólsku og ensku sem inniheldur útdrátt úr kjarasamningum þar sem fjallað er um helstu atriði samningsins, m.a. ráðningarsamninga, vekindarétt, orlof, launaseðla, dagvinnulaun og uppsagnafrest.  Þessi bæklingur mun klárlega hjálpa erlendu verkafólki að vera mun meðvitaðra um sín réttindi.  Hægt er að fá eintak af bæklingnum á skrifstofu félagsins.

Þann 3. október nk. mun Vinnumálastofnun hefja átak þar sem farið verður til þeirra fyrirtækja sem eru með erlenda starfsmenn í sinni þjónustu og kannað hvort skráningar erlendra starfsmanna þeirra séu í samræmi við lög og reglur hér á landi.  Þetta átak á einnig að beinast að þeim félagslegu undirboðum sem því miður eru alltof algeng um þessar mundir á íslenskum vinnumarkaði.

24
 Sep

Fundur um átak gegn brotastarfsemi fyrirtækja og félaglegum undirboðum á íslenskum vinnumarkaði

Félagsmálaráðherra hefur ákveðið í ljósi þeirra atvika sem upp hafa komið á íslenskum vinnumarkaði er lúta að félagslegum undirboðum að Vinnumálastofnun standi fyrir sérstöku átaki í þeim efnum.

Því hefur Alþýðusamband Íslands boðað til kynningarfundar með fulltrúum allra aðildarfélaga ASÍ og landssambanda á morgun á Nordica-hóteli.

Fundurinn á morgun verður kynning á því hvernig staðið skuli að allsherjarátaki sem hafi að markmiði að fyrirtæki sem hafa útlendinga í starfi uppfylli lögbundna upplýsingaskyldu sína og að útlendingar sem starfa á íslenskum vinnumarkaði njóti þeirra kjara og réttinda sem þeim ber.

Verkalýðsfélag Akraness hefur margsinnis bent á það hversu mikilvægt það er að gerð verði allsherjarúttekt á fyrirtækjum sem eru með erlenda starfsmenn í sinni þjónustu með það að markmiði að koma í veg fyrir félagsleg undirboð. Á þeirri forsendu fagnar VLFA þessu framtaki félagsmálaráðherra innilega og vonast til að það muni skila tilætluðum árangri.

21
 Sep

Námskeiðið "Aftur í nám"

Í október hefst námskeið ætlað einstaklingum sem glíma við lestrar- eða skriftarörðugleika og eru á vinnumarkaði, en hyggjast fara í nám eða aftur í nám.  Námskeiðið er 95 kennslustundir og munu nemendur fara í sjálfsstyrkingu, íslensku, tölvu- og upplýsingatækni og í svokallaða Davis leiðréttingu.  Davis leiðrétting er aðferð sem kennd er við Ron Davis sem sjálfur var lesblindur en tókst að þróa aðferðir til að hjálpa sér og öðrum í námi og daglegu lífi.

Markmiðið er að auka hæfni til náms og stuðla að jákvæðu viðhorfi til áframhaldandi náms. Tilgangur þess er að styrkja sjálfstraust námsmanna, þjálfa þá í lestri og skrift með aðferðum Ron Davis og búa þá undir frekari þjálfun eftir að námskeiðinu lýkur.

Engar kröfur eru gerðar til lágmarks skólagöngu áður en nám hefst og námsmenn gangast ekki undir formleg próf. Kennt er 2x í viku, á þriðjudögum og fimmtudögum frá kl. 17:00 – 20:00.  Námskeiðinu lýkur með útskrift í lok nóvember.

Hægt er að skrá sig á heimasíðu Símenntunarmiðstöðvarinnar hér eða í síma 437-2390.  Einnig veitir Erla Olgeirsdóttir verkefnisstjóri allar nánari upplýsingar í síma 694-3339.

Námskeiðið kostar kr. 51.000 en fullgildir félagsmenn Verkalýðsfélags Akraness fá 75% kostnaðar endurgreiddan að námi loknu.

Hægt er að skoða námskrá námskeiðisins á pdf-formi með því að smella hér.

Hægt er að skoða stundarskrá námskeiðisins með því að smella hér.

Kynningarfundur um réttindi og skyldur starfsmanna Íslenska járnblendifélagsins
21
 Sep

Kynningarfundur um réttindi og skyldur starfsmanna Íslenska járnblendifélagsins

Í gær hélt formaður félagsins kynningu fyrir ofnmenn á E vakt Íslenska járnblendifélagsins um réttindi og skyldur starfsmanna Íj og stóð kynningin í um tvo tíma.

Formaður fór yfir hin ýmsu mál er varða réttindi og skyldur starfsmanna og fjallaði t.d. um atriði eins og uppsagnarfrest, veikindarétt, flýtt starfslok, öryggismál, bónusmál ásamt fjölda annarra réttinda og skyldna er snúa að starfsmönnum Íslenska járnblendifélagsins. Einnig fór formaður yfir það hvernig launataxtar hafa þróast frá því gengið var frá kjarasamningum síðast árið 2005.

Þetta var önnur kynningin sem formaður heldur með starfsmönnum Íslenska járnblendifélagsins, í síðustu viku var það B vaktin sem fékk kynningu en í gær var það E vaktin eins og áður hefur komið fram.

Kynningin heppnaðist mjög vel í alla staði og vöknuðu fjölmargar spurningar hjá starfsmönnum sem formaður reyndi að svara eftir bestu getu.  

20
 Sep

Vinnustaðafundur í HB-Granda Akranesi

Formaður félagsins fór í vinnustaðaheimsókn til HB-Granda í gær. Átti hann þar samtal við nokkra starfsmenn og fór ekki á milli mála að þeir voru afar svekktir yfir að ekki skyldi hafa orðið af áformum fyrirtækisins um flutning allrar landvinnslu upp á Akranes.

Starfsmenn voru nokkuð uggandi um sinn hag í ljósi þeirra staðreynda að aflaheimildir í þorski hafa verið skertar um 30%. Á undanförnum tveimur árum hefur meginuppstaða hráefnis í frystihúsinu á Akranesi verið þorskur. Að undanförnu hefur verið skortur á hráefni en skv. upplýsingum sem formaður hefur fengið þá er meginástæðan fyrir því aflabrestur í ufsa.

Varðandi mótvægisaðgerðir ríkisstjórnarinnar þá er klárt mál að þær ná ekki til þess fiskvinnslufólks hér á Akranesi sem að öllum líkindum mun verða fyrir tekjutapi sökum þeirrar skerðingar sem tilkynntar hafa verið á þorski. Einnig er ekki að sjá að mætt verði þeirri skerðingu sem sjómenn verða fyrir og nægir að nefna í því samhengi að skipverjarnir á Sturlaugi H. Böðvarssyni hafa á síðastliðnum tveimur árum sótt nær eingöngu í þorsk. Þannig er að allt útlit er á því að tekjur þeirra muni verða mun minni en síðastliðin tvö ár.

Samband sveitarfélaga á Vesturlandi reiknaði út þau áhrif sem aflasamdráttur í þorski upp á 30% hefði á byggðir á Vesturlandi og kom fram að þessi samdráttur mun kosta Akranes um 1,5 milljarð króna.

Formaður kallar eftir því við ríkisstjórn Íslands að þær mótvægisaðgerðir sem kynntar hafa verið muni að einhverju leyti beinast til sjómanna og fiskvinnslufólks hér á Akranesi.

19
 Sep

Formaður fundaði með bæjarráði í gær

Eins og fram kom hér á heimasíðunni í gær þá átti formaður félagsins fund með bæjarráði síðdegis í gærdag. Tilefni fundarins var m.a. sá launamunur sem ríkt hefur á milli leiðbeinenda á leikskólum bæjarins eftir félagsaðild. Bæjarráð samþykkti erindi Verkalýðsfélags Akraness og mun 4% álag sem þeir félagsmenn STAK sem störfuðu sem leiðbeinendur höfðu einnig gilda fyrir félagsmenn VLFA í sömu störfum.

Formaður félagsins fagnar þessari ákvörðun bæjarráðs og telur hann bæjarráð hafa sýnt það í verki oftar en einu sinni að þeim er umhugað um þá starfsmenn bæjarins sem eru með hvað lægstu tekjurnar og sýnir þessi samþykkt það einnig.  Vissulega má alltaf gera betur þegar kemur að kjörum þeirrra sem lægstu hafa launin.

Formaður ræddi einnig við bæjarráð um þá alvarlegu stöðu sem upp er komin er lýtur að málefnum HB-Granda á Akranesi eftir að fyrirtækið ákvað að hætta við að flytja alla sína landsvinnslu upp á Akranes eins og þeir höfðu áður tilkynnt. Formaður óskaði eftir því við bæjarráð að Akraneskaupstaður fundaði með forsvarsmönnum HB-Granda, Faxaflóahafna og Reykjavíkurborgar þar sem reynt yrði að finna farsæla lausn á þessu máli, einfaldlega vegna þess að hér er um gríðarlega hagsmuni að ræða fyrir samfélagið hér á Akranesi.

18
 Sep

Fundur með bæjarráði Akraness

Formaður félagsins mun eiga fund með bæjarráði Akranesskaupstaðar í dag. Tilefni fundarins eru kjör leiðbeinenda á leikskólum bæjarins. Einnig ætlar formaður að ræða við bæjarráð vegna þeirrar alvarlegu stöðu sem upp er komin vegna þeirrar ákvörðunar stjórnar HB-Granda að hætta við að flytja alla landvinnslu sína upp á Akranes.

Hér er um gríðarlega mikið hagsmunamál Akurnesinga að ræða og mun formaður óska eftir því að bæjaryfirvöld beiti sér af fullum þunga fyrir því að fundað verði með forsvarsmönnum HB-Granda, Reykjavíkurborgar og stjórnendum Faxaflóahafna vegna þessa máls. Mjög mikilvægt er að farsæl niðurstaða náist í þessu máli sem allir aðilar geta verið ásáttir með. 

Félagsleg undirboð á íslenskum vinnumarkaði samfélagslegt mein
16
 Sep

Félagsleg undirboð á íslenskum vinnumarkaði samfélagslegt mein

Norðurál hefur rift samningi við pólska verktakafyrirtækið Dabster eftir að Verkalýðsfélag Akraness og Félag-iðn og tæknigreina bentu forsvarsmönnum Norðuráls á að starfsmennn Dabster væru ekki með tilskilin leyfi til að starfa hér á landi eins og lög kveða skýrt á um. 

Ragnar Guðmundsson forstjóri Norðuráls sagði í viðtali við RUV í gærkveldi að um klárt lögbrot hafi verið að ræða. Mennirnir höfðu hvorki kennitölur, dvalarleyfi né önnur tilskilin leyfi til að starfa hér á landi.

Í september á síðasta ári gerði Norðurál samning við pólska verktakafyrirtækið Dabster. Alls var um fimm stöðugildi að ræða. Stöðurnar urðu þó tólf þegar mest var. Pólsku verkamennirnir sem komu hingað til lands til að manna þessar stöður störfuðu hér ólöglega í þrjá mánuði í senn, fóru þá úr landi og komu aftur til baka eða aðrir menn voru sendir í þeirra stað. Samningur Norðuráls við Dabster hefur gilt í ár. Því má gera ráð fyrir að um tuttugu til þrjátíu ólöglegir starfsmenn hafi komið til landsins og starfað á vegum Dabster fyrir Norðurál.

Það er ljóst að opinber gjöld vegna starfsmannanna ekki hafa verið greidd hér á landi. Slíkt skekkir alla samkeppnisstöðu gagnvart heiðarlegum fyrirtækjum og gjaldfellir kjör íslenskra launþega. Sterkar grunsemdir eru um að skort hafi á launagreiðslur til pólsku starfsmannanna.  Formanni félagsins er kunnugt um að Félag-iðn og tæknigreina er að kalla eftir gögnum til að ganga úr skuggum hvort brotið hafi verið á réttindum pólsku starfsmannana.  Einnig eru grunsemdir um að pólsku starfsmenirnir hafi ekki haft réttindi til að starfa hér á landi sem rafsuðumenn.

Það liggur fyrir að stéttafélögin sem eiga aðild að kjarasamningunum á Grundartangasvæðinu líða ekki lögbrot og félagsleg undirboð eins og í þessu tilviki.

Formaður félagsins fagnar þeirri ábyrgð sem Norðurál sýndi með því að rifta samningnum við Dabster. Félagsleg undirboð á íslenskum vinnumarkaði er samfélagslegt mein sem allir verði að taka höndum saman um að útrýma og lætur Verkalýðsfélag Akraness ekki sitt eftir liggja í þeim efnum. 

Hægt er að horfa á frétt um málið á RÚV með því að smella á Debster.

Page 152 of 212

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image