Haldið verður upp á 80 ára afmæli félagsins á morgun í sal Fjölbrautaskóla Vesturlands.  Dagskrá afmælisins er m.a. á þá leið að Grétar Þorsteinsson forseti ASÍ og Kristján Gunnarsson, formaður SGS munu flytja ávörp, KK mun taka nokkur lög, sýndar verða myndir úr félagsstarfinu bæði gamlar og nýjar.  Kaffiveitingar. 

Félagar og aðrir velunnarar eru hvattir til að mæta og fagna 80 ára afmæli félagsins.

Vel á annað hundrað manns mættu til að fagna 80 ára afmæli félagsins sem haldið var í sal Fjölbrautarskóla Vesturlands í gær.  Forseti ASÍ og formaður SGS fluttu ræðu og eins flutti forseti bæjarstjórnar örlítið ávarp.  Afmælið tókst í alla staði afar vel og fékk félagið veglegar gjafir frá hinum ýmsu fyrirtækum og stéttarfélögum.  Verkalýðsfélag Akraness vill þakka kærlega fyrir þessar veglegu gjafir.  Eins vill stjórn félagsins þakka þeim fjölmörgu, sem sáu sér fært að mæta og fagna þessum merka áfanga.  Afmælisræðu formanns Verkalýðsfélags Akraness er hægt að lesa með því að smella á meira.

Forseti ASÍ, formaður SGS, bæjarstjóri Akraness, góðir félagsmenn, og aðrir hátíðargestir.

Ég býð ykkur öll hjartanlega velkomin í 80 ára afmæli Verkalýðsfélags Akraness.

Við erum samankomin hér í dag til að fagna og halda upp á 80 ára afmæli Verkalýðsfélags Akraness. Það er ekki úr vegi að líta til baka og minnast frumkvöðlanna sem komu saman í svokölluðu Báruhúsi hér á Akranesi þann 14. október árið 1924 og stofnuðu félagið.  Markmið og tilgangur með stofnun þess var að ákveða vinnutíma og kaupgjald og efla og bæta hag alþýðunnar. Það markmið er enn óbreytt. Það hefur sannast þau 80 ár sem liðin eru frá stofnun félagsins að Verkalýðsfélög um allt land hafa skilað miklu og góðu starfi í þágu verkafólks -  en alltaf má gera betur.

 Krafturinn og dugnaðurinn sem frumkvöðlarnir bjuggu yfir er sá kraftur sem núverandi stjórn vill hafa að markmiði. Maður fylltist eldmóði og aðdáun við að lesa viðtöl við heiðursfélaga Verkalýðsfélags Akraness sem birtust í afmælisblaði félagsins. Sú barátta sem háð var hér á árum áður var mun miskunnarlausari og langtum erfiðari heldur en það sem við þekkjum í dag. Heiðursfélögum Verkalýðsfélags Akraness verður seint þakkað þau fórnfúsu störf sem þau unnu fyrir félagið á liðnum áratugum. 

Markmið okkar sem nú stjórnum félaginu er skýrt. Markmiðið er að vera það félag á Íslandi sem mest og best þjónar sínum félagsmönnum. Vissulega eru þetta háleit markmið en að mínu mati verður að setja markið hátt. Við hljótum að vilja aðeins það besta til handa félagsmönnum okkar.

Mig langar að rifja upp atburð úr sögu félagsins sem átti sér stað árið 1929 þegar félagið var einungis fimm ára gamalt. Það ár brugðust útgerðarmenn ókvæða við aðgerðum verkalýðsfélagsins til að bæta kjör félagsmanna sinna. Þeir gerðu það að skilyrði að Verkalýðsfélag Akraness segði sig úr Alþýðusambandi Íslands - ella yrði ekki samið um kaup og kjör. Einnig neituðu þeir að semja við félagið og vildu frekar semja beint við hvern félagsmann fyrir sig. Þetta átti sér stað árið 1929 og það er ótrúlegt til þess að hugsa að nú - 75 árum síðar - eru nánast sömu hlutirnir að endurtaka sig. Útgerðamaður Sólbaks EA setur það sem skilyrði að skipverjar standi utan stéttarfélags - ef þeir ekki hlýði því þá verði þeir að finna sér annan starfsvettvang. Þetta kallar útgerðamaður Sólbaks félagafrelsi. Þessa aðför, sem nú er gerð að íslenskri verkalýðshreyfingu, verður að stöðva með öllum tiltækum ráðum.

Á þessu tæpa ári sem núverandi stjórn Verkalýðsfélags Akraness hefur starfað höfum við lent Í erfiðum málum gagnvart atvinnurekendum. Í þessum málum vorum við sannfærð um að verið væri að brjóta á réttindum félagsmanna. Tekist var hraustlega á og að lokum náðist samkomulag í öllum þessum málum. Þessi réttindabarátta hefur skilað rúmum 12 milljónum króna í vasa félagsmanna okkar. Meginverkefni stéttarfélaga er að standa vörð um áunnin réttindi félagsmanna og bæta þau eins og kostur er. Það er og verður stefna stjórnar Verkalýðsfélags Akraness að standa einarðlega vörð um öll áunnin réttindi félagsmanna og verður hvergi hvikað í þeirri baráttu.

Það er mjög mikilvægt að Verkalýðsfélag Akraness sem og önnur stéttarfélög eigi gott samstarf við atvinnurekendur og þannig viljum við hafa það. Þegar ágreiningur verður á milli stéttarfélagsins og atvinnurekenda þá verða menn að reyna að leysa málin í sátt. En höfum það hugfast að rétt skal vera rétt – sama hvoru megin sú niðurstaða liggur.

Sem formaður félagsins hef ég farið og heimsótt flest þau fyrirtæki sem félagsmenn okkar starfa hjá – ekki öll - en flest. Markmið okkar með þessum vinnustaðaheimsóknum er að auka bein tengsl milli stéttafélagsins og félagsmanna og upplýsa þá  um réttindi þeirra og skyldur. Það er lykilatriði fyrir forustumenn í stéttafélögum að vera í góðu sambandi við félagsmenn. Ég hef fengið prýðisgóðar viðtökur í þessum vinnustaðaheimsóknum og eru félagsmönnum færðar þakkir fyrir. Við í stjórn félagsins viljum vera í nánu og góðu sambandi við félaga okkar. 

Atvinnumöguleikar á svæði félagsins eru býsna góðir um þessar mundir.  Með stækkun Norðuráls mun félagsmönnum fjölga töluvert og heimildir herma að forsvarsmenn Norðuráls hafi áhuga á að stækka verksmiðjuna enn frekar en talað hefur verið um hingað til. Í undirbúningi er bygging rafskautaverksmiðju, og verði hún að veruleika má búast við að störfum á okkar félagssvæði muni fjölga um allt að þrjú hundruð. Við höfum því ekki ástæðu til annars en að vera bjartsýn á framtíðina ef þessi áform ganga öll eftir.

Kæru félagsmenn og aðrir gestir. Ég lýt svo á að þegar núverandi stjórn tók við í Verkalýðsfélagi Akraness þann 19. nóvember 2003  hafi hafist nýr kafli í sögu félagsins. Félagið hafði fram til þeirrar stundar þurft að ganga í gegnum einstaklega erfitt tímabil eins og fólki er í fersku minni. Þeir tímar eru að baki og ekkert meira um það að segja.

Ég vil á þessari stundu nota tækifærið og þakka þá gríðarlegu hjálp sem ákveðin stéttarfélög og einstaklingar veittu formanni og nýkjörinni stjórn á fyrstu dögum og mánuðum á starfstíma hennar. Að taka við félaginu við þessar erfiðu aðstæður var mjög krefjandi og því fylgir mikil ábyrgð að vera forystumaður í einu af stærri stéttarfélögum innan Starfsgreinasambands Íslands.  Viljum við í stjórn félagsins þakka öllum þeim fjölmörgu sem aðstoðuðu okkur.  Sérstaklega viljum við þakka Aðalsteini Baldurssyni og Ágústi Óskarssyni frá Verkalýðsfélagi Húsavíkur kærlega fyrir þá ómetalegu hjálp sem þeir veittu okkur. Eins viljum við þakka Hermanni Guðmundssyni, fyrrverandi formanni Sveinafélags málmiðnaðarmanna fyrir hans aðstoð.

Stjórn félagsins er afar ánægð með útkomuna á afmælisblaði félagsins það er mat okkar að virkilega hafi tekist vel til.  Vill stjórn félagsins þakka Kristjáni Kristjánssyni rithöfundi og eiganda Uppheima ehf. og hans fólki kærlega fyrir vel heppnað blað og gott samstarf.

Kæru hátíðargestir! Það er afar ánægjulegt að þið skulið fagna þessum merka áfanga með okkur sem 80 ára afmæli félagsins er.  Sérstaklega vil ég þakka heiðursfélögum Verkalýðsfélags Akraness, þeim Herdísi Ólafsdóttur, Bjarnfríði Leósdóttur, Skúla Þórðarsyni, Garðari Halldórssyni, og Sigrúnu Clausen fyrir að vera hér með okkur í dag. Ef þessa fólks hefði ekki notið við hér á árum áður þá væri Verkalýðsfélag Akraness ekki það sterka afl sem það er í dag.

Ágætu gestir. Verkalýðsfélag Akraness mun nú sem endranær bera hag félagsmanna fyrir brjósti, líkt og frumkvöðlarnir sem börðust af elju og atorkusemi fyrir bættum kjörum. Verkalýðsfélögin eru og munu áfram vera mikilvægasta aflið á leið okkar til bættra kjara.

Ég þakka áheyrnina.

Verkalýðsfélag Akraness er í góðu sambandi við þingmenn kjördæmisins.  Í gær komu þingmenn Frjálslynda flokksins þeir Guðjón Arnar Kristjánsson og Sigurjón Þórðarson í heimsókn á skrifstofu félagsins.  Menn ræddu um atvinnuhorfur og margt fleira.  Fyrir tveimur mánuðum kom Jóhann Ársælsson frá Samfylkingunni í heimsókn þar sem hann var að kynna sér starfsemi félagsins.  Það er afar ánægjulegt hve mikinn áhuga þingmenn sýna félaginu og því starfi sem við erum að vinna.

Formaður félagsins hélt vinnustaðafundi með tveimur vöktum C og D uppí Norðuráli í gærkveldi.  Tilgangur með þessum fundum var að heyra hljóðið í okkar félagsmönnum og kynna fyrir þeim gang viðræðna við forsvarsmenn Norðuráls.  Það eru miklar væntingar sem starfsmenn Norðuráls gera til nýs kjarasamnings, á því er enginn vafi.  Það var afar gagnlegt að heyra í starfsmönnunum og fá upplýsingar um hvað starfsmenn vilja leggja mestu áherslu á í komandi samningum.  Það er vilji formanns félagsins að vera í eins nánu sambandi við félagsmenn sína á meðan á samningagerð stendur eins og kostur er.  Næsti fundur við forsvarsmenn Norðuráls er á morgun kl 8:30

Þriðji samningafundurinn með forsvarsmönnum Norðuráls var haldinn í morgun.  Til umræðu voru aðallega tvö mál þ.e. gildissviðið og vaktirnar.  Ákveðið hefur verið að funda aftur á miðvikudaginn kl. 13.00.

Samninganefnd Sjómannasambands Íslands hefur verið  boðuð til áríðandi fundar hjá ríkissáttasemjara á morgun kl. 14.00, þar sem kjaramál verða til umræðu.

Samninganefnd Sjómannasambands Íslands kom saman til áríðandi fundar í gær.  Tilefni fundarins var að formaður SSÍ Sævar Gunnarsson og Hólmgeir Jónsson einnig frá SSÍ, vildu kynna fyrir samninganefndinni drög að nýjum kjarasamningi  milli sjómanna og útvegsmanna.  Þeir félagar kynntu fyrir

samninganefndinni  hvað fælist í samningnum og voru samninganefndarmenn afar ánægðir með að loksins  hafi tekist að semja við útvegsmenn.  Sjómenn í Verkalýðsfélagi Akraness geta komið á skrifstofu félagsins og fengið eintak af samningnum.

Samninganefndin var einróma í því að láta félagsmenn kjósa um samninginn.  Samninganefndin taldi að margt væri gott í samningum en annað orkaði tvímælis.  Heilt yfir var samninganefndin ánægð með nýjan samning, og þökkuðu menn þeim Sævari Gunnarsyni og Hólmgeiri Jónssyni fyrir þá miklu vinnu sem þeir hafa lagt á sig í þessari kjarasamningsgerð.

Kom skýrt fram hjá Sævari Gunnarsyni að ekki yrði lengra komist án átaka.  Kjarasamningurinn verður að sjálfsögðu kynntur mjög vel á næstu dögum og vikum, en til stendur að búið verði að kjósa eigi síðar en 15. desember 2004. 

Ríkissáttasemjari hefur boðað til fundar mánudaginn 1. nóvember kl. 14.00, vegna kjaradeilu stéttarfélaganna við Íslenska járnblendifélagið.  Trúnaðarmenn og formenn þeirra félaga sem eiga aðild að kjarasamningum við Íj ætla að funda kl. 13.00 í húsakynnum Ríkissáttasemjara, til að meta stöðu mála.

Starfsmenn Klafa og Fangs eru  sárir, reiðir og undrandi yfir því að ekki hafi komið arðgreiðsla til þeirra eins og kom til starfsmanna Íslenska járnblendifélagsins 15. ágúst s.l.  Verkalýðsfélag Akraness hefur vísað þessu máli til lögmanns félagsins sem hefur sent forsvarsmönnum þessara tveggja  fyrirtækja bréf,  þar sem þess er krafist að starfsmenn Klafa og Fangs  fái sömu arðgreiðslu og starfsmenn ÍJ fengu 15. ágúst s.l. 

Í bréfi lögmanns félagsins sem hann sendi um miðjan ágúst til Klafa og Fangs, bendir hann á  ráðningasamninga starfsmanna, því í þeim er vísað beint í kjarasamning Íslenska járnblendifélagsins hvað varðar öll kjaraatriði.  Því er það mat starfsmanna þessara fyrirtækja  og Verkalýðsfélags Akraness  að starfsmenn þessara fyrirtækja eigi rétt á þessum arðgreiðslum, þetta eru flest allir fyrrverandi starfsmenn ÍJ og fengu starfsmennirnir þau skilaboð þegar þessi dótturfyrirtæki voru stofnuð og þeim boðin vinna hjá þessum fyrirtækjum, að þeir skyldu halda öllum þeim launakjörum sem þeir hafi haft hjá ÍJ.  Formaður félagsins hefur verið í góðu sambandi við framkvæmdastjóra þessara tveggja  fyrirtækja en þeir hafa lítið getað tjáð sig um þessi mál, og segja báðir að stjórnir fyrirtækjanna muni  taka ákvörðun í málum þessum.  Það er einlæg von stjórnar Verkalýðsfélags Akraness að stjórnir Klafa og Fangs afgreiði mál þetta farsællega svo ekki þurfi að koma til frekari aðgerða af hálfu félagsins.  Ennfremur telur Verkalýðsfélag Akraness það væri gott og reyndar nauðsynlegt að forsvarsmenn stéttarfélaganna og forsvarsmenn Klafa, Fangs og Íslenska járnblendifélagsins funduðu saman og færu yfir málin í heild sinni. 

Það styttist í að sjómenn missi þolinmæðina að sögn Sævars Gunnarssonar, formanns Sjómannasambands Íslands. Sjómenn áttu fund með útvegsmönnum hjá ríkissáttasemjara í gær og stóð fundurinn í þrjár klukkustundir. 

Sævar sagði eftir fundinn að ekkert hafi gengið á fundinum í dag og að núna þegar sjómenn væru búnir að vera samningslausir í átta mánuði styttist í að þeir misstu þolinmæðina. Næsti fundur í deilunni verður haldinn á þriðjudag.