Samningafundur verður á morgun vegna  kjarasamnings Sementsverksmiðjunnar.  Einn samningafundur hefur verið haldinn þar sem samningsaðilar lögðu fram kröfur sínar og verða þær til umræðu á fundinum á morgun.

Samningsaðilar hittust í dag vegna kjarasamnings Sementsverksmiðjunnar.  Farið var yfir kröfurnar sem lagðar voru fram á síðasta samningafundi.    Eru trúnaðarmenn að fara yfir það sem fram kom á fundinum til að geta metið hver næstu skref verða í samningsgerðinni.    Ekki var tekin ákvörðun á þessum fundi hvenær næsti fundur skyldi haldinn.

Samningafundur vegna kjarasamnings Norðuráls verður haldinn á þriðjudaginn kl. 10.00.  Það sem væntanlega verður til umræðu á þessum fundi er gildissvið samningsins, eins verður rætt um breytingu  á vaktafyrirkomulagi.

Á þriðjudag, miðvikudag og fimmtudag verða haldnir kynningafundir fyrir starfsmenn Íslenska járnblendifélagsins vegna bónusmála starfsmanna.  Ágreiningur hefur verið um það hvort starfsmenn eigi inni auka bónus vegna ofns 3 sem tekinn var í notkun árið 1999.  Starfsmenn telja að svo sé.  Formaður félagsins og aðaltrúnaðarmaður ÍJ funduðu með forsvarsmönnum Íj og fóru yfir þessi mál og sitt sýndist hverjum í þeim efnum. Forsvarsmenn Íj segja að gert hafi verið samkomulag um bónusmál starfsmanna árið 1999 og miðað við það samkomulag eiga starfsmenn ekki inneign vegna fyrri ára. Verkalýðsfélag Akraness er sammála forsvarsmönnum ÍJ hvað það varðar.  Málið er að starfsmenn og trúnaðarmenn ÍJ höfðu tækifæri bæði árið 2000 og aftur 2001 að gera aukna kröfu um bónus vegna ofns 3 en gerðu það ekki því miður.  Formaður VLFA telur að hefðu menn borið gæfu til að fara framá aukinn bónus vegna ofns 3 þegar það var hægt þá hefðu starfsmenn átt rétt á auknum bónus.   Stéttarfélögin, trúnaðarmenn og starfsmenn verða að gæta mun betur að hag sínum í náinni framtíð.  Óskaði formaður Verkalýðsfélags Akraness að forsvarsmenn Íj kynntu fyrir starfsmönnum sínum, hvers vegna þeir telja að starfsmenn eigi ekki rétt á auknum bónus vegna fyrri ára.  Fyrstu fundirnir verða á morgun, fyrri kl. 14.00 og síðari kl. 16.00.

Samningafundur var haldinn  í dag vegna kjarasamnings Norðuráls.  Til umræðu á þessum fundi voru tvö mál þ.e gildissviðið, eins fóru menn lítillega yfir breytingu á vaktarfyrirkomulagi starfsmanna.  Í lok fundarins lögðu stéttarfélögin og trúnaðarmenn NA fram kröfur sínar og gerðu forsvarsmönnum Norðuráls grein fyrir þeim. 

Næsti fundur verður fimmtudaginn 25. nóvember, á þeim fundi munu forsvarsmenn Norðuráls leggja fram sínar kröfur.

Fyrstu tveir kynningafundir með starfsmönnum voru haldnir í dag það voru A og B vaktirnar sem fundað var með í dag.  Markmið fundanna var að fara yfir bónusmál starfsmanna vegna fyrri ára.  Í byrjun fundanna fór  forstjóri Ij yfir  framtíðarmarkmið fyrirtækisins.  Næst verður fundað með dagmönnum og C vaktinni, er sá fundur á morgun kl. 14.00.

Fundað verður hjá ríkissáttasemjara á morgun og hefst fundurinn kl. 08.30.  Stéttarfélögin munu leggja fram sameiginlegar  kröfur sínar, en félögin voru búin að leggja fram sérkröfur sínar á síðasta fundi.  Væntanlega verður farið yfir eitthvað af þessum kröfum, einnig verður rætt um gildissvið kjarasamningsins.

Stjórnar og trúnaðarráðsfundur var haldinn í kvöld.  Formaður félagsins fór yfir stöðu félagsins og kynnti einnig  fyrir trúnaðarráði stöðuna  í þeim kjaraviðræðum sem félagið stendur í þessa daga. 

Kynningarfundur um kjarasamning sjómanna var haldinn um borð í Helgu Maríu í kvöld, hófst fundurinn kl. 22.00.  Til fundarins mættu Sævar Gunnarsson frá Sjómannasambandi Íslands, Árni frá Fiski-og farmannasambandi Íslands og formaður Verkalýðsfélags Akraness.  Sævar fór yfir samninginn og svaraði þeim spurningum sem fyrir hann voru lagðar.  Formaður VLFA kynnti fyrir skipverjum hvernig fyrirkomulag kosninganna muni verða.

Hægt verður að kjósa á skrifstofu félagsins frá 1. desember til 31. desember.  Formaður minnti skipverja á að annar kynningafundur verður haldinn 27. desember þar sem Hólmgeir Jónsson frá SSÍ mun fara ítarlega yfir samninginn og svara fyrirspurnum fundarmanna.  Hvatti formaður VLFA alla áhafnarmeðlimi sem atkvæðisrétt hafa til að nýta kosningarétt sinn.

Stjórn Verkalýðsfélags Akraness er eins árs í dag 19. nóvember. Það verður að segjast alveg eins og er að félagið hefur tekið algjörum stakaskiptum á þessu eina ári.  Stjórn félagsins hefur staðið í ströngu á þessu eina ári. 

Á þessu tæpa ári sem núverandi stjórn Verkalýðsfélags Akraness hefur starfað höfum við lent í erfiðum málum gagnvart atvinnurekendum. Í þessum málum vorum við sannfærð um að verið væri að brjóta á réttindum félagsmanna. Tekist var hraustlega á og að lokum náðist samkomulag í öllum þessum málum. Þessi réttindabarátta hefur skilað rúmum 13 milljónum króna í vasa félagsmanna okkar. Meginverkefni stéttarfélaga er að standa vörð um áunnin réttindi félagsmanna og bæta þau eins og kostur er. Það er og verður stefna stjórnar Verkalýðsfélags Akraness að standa einarðlega vörð um öll áunnin réttindi félagsmanna og verður hvergi hvikað í þeirri baráttu.

Þegar stjórn félagsins tók við Verkalýðsfélagi Akranes átti félagið útistandandi skuldir hjá atvinnurekendum vegna ógreiddra iðgjalda rúmar 21 milljón króna, hefur stjórn félagsins tekist að innheimta 13 milljónir af þessum ógreiddum iðgjöldum.  Voru innheimtumál og iðgjaldaskráning í verulegum ólestri, þeim hlutum hefur verið kippt í lag. 

Hvað varðar almenna þjónustu við hin almenna félagsmann þá hefur hún stóraukist. Markmið okkar sem nú stjórnum félaginu er skýrt. Markmiðið er að vera það félag á Íslandi sem mest og best þjónar sínum félagsmönnum. Vissulega eru þetta háleit markmið en að mínu mati verður að setja markið hátt. Við hljótum að vilja aðeins það besta til handa félagsmönnum okkar.

Heimsíða félagsins er komin í fulla notkun og hefur fjöldi innlita á síðuna stóraukist en daglega eru um 100 innlit inná síðuna.  Ekki er hægt annað en að minnast á að nánast allir kjarasamningar félagsins voru og eru lausir á árinu og hefur verið gríðarlegt álag vegna þess. 

Formaður félagsins hefur farið og heimsótt flest þau fyrirtæki sem félagsmenn okkar starfa hjá – ekki öll - en flest. Markmið okkar með þessum vinnustaðaheimsóknum er að auka bein tengsl milli stéttarfélagsins og félagsmanna og upplýsa þá  um réttindi þeirra og skyldur. Það er lykilatriði fyrir forustumenn í stéttarfélögum að vera í góðu sambandi við félagsmenn.