Desemberuppbót - færð þú það sem þér ber?  Verkalýðsfélag Akraness hvetur sína félagsmenn til að fylgjast vel með hvort desemberuppbót sé rétt greidd.  Endilega að hafa samband við skrifstofu félagsins og fáið upplýsingar séu þið ekki viss hver réttur ykkar er.  Hægt að skoða nánar með því að smella á meira.

Samningafundur var í dag um nýjan kjarasamning Íslenska járnblendifélagsins.  Til umræðu voru sérmál ofngæslumanna og dagmanna.  Krafa stéttarfélaganna og trúnaðarmanna er að það aukna álag sem stafar útaf  fækkun starfsmanna á liðnum árum verði bætt starfsmönnum upp, með einum eða öðrum hætti.  Sérkröfur eru samtals í 8 liðum hjá ofngæslumönnum en 4 hjá dagmönnum.  Eru þær nú til skoðunar hjá forsvarsmönnum ÍJ.  Næsti fundur er á morgun kl. 09.00 og er fundurinn haldinn hjá ríkissáttasemjara. 

Kynningarfundur um stóriðjuskóla Ísals var haldinn í kvöld. Til að kynna hvernig skólinn virkar hjá Ísal, voru fengnir Kolbeinn Gunnarsson formaður Vlf. Hlífar í Hafnarfirði og Gylfi Ingvarsson aðaltrúnaðarmaður Ísals.  Fóru þeir félagar yfir hvernig skólinn varð til og eins hvað hann er að gefa starfsmönnum í launahækkun að loknu námi.  Þegar starfsmaður hefur lokið námi fær hann 10.5% launahækkun.  Ennfremur upplýstu þeir félagar að stjórnendur Ísals hefðu ákveðið að bjóða uppá framhaldsnám í stóriðjuskólanum sem mun gefa þeim sem ljúka framhaldsnáminu 4% launahækkun. 

Starfsmat vegna starfsmanna sem vinna hjá sveitarfélögunum, er lokið og verður að segjast alveg eins og er að félagsmenn Verkalýðsfélags Akraness komu frábærlega út í starfsmatinu.  Til að nefna nokkur dæmi þá eru verkamenn í sorphirðu að hækka sem nemur 6 launaflokkum eða um 7%.

Starfsmenn í heimilisþjónustu eru að hækka um 8 launaflokka eða um 7%.  Eins komu matráðar mjög vel útúr starfsmatinu.  Vill Verkalýðsfélag Akraness benda sínum félagsmönnum á að eftir nýja launakerfinu verður greitt nú um mánaðarmótin.  Síðan eiga starfsmenn að fá leiðréttinu greidda aftur í tímann eða frá 2002, þannig að félagsmenn VLFA munu einhverjir fá ágætan jólaglaðning, því samkvæmt upplýsingum frá bæjarskrifstofunni þá á að greiða leiðréttinguna út fyrir jól.

Fundað var um nýjan kjarasamning við Íslenska járnblendifélagið í dag.  Fundurinn var haldinn í húsakynnum ríkissáttasemjara.  Var sáttasemjara gerð grein fyrir þeirri vinnu sem samningsaðilar hafa verið að vinna að, milli þeirra funda sem eru haldnir hjá sáttasemjara.  Samningsaðilar hafa rætt lítillega um stóriðjuskólann, bónusmálin, sérmál ofngæslumanna og dagmanna.  Ljóst er að nokkuð ber á milli deiluaðila. 

Ákveðið var að stefna að því að ljúka við gerð nýs kjarasamnings fyrir áramót.  Verður farið á fulla ferð í þessari og næstu viku að ræða saman.  Til stendur að næsti fundur verði á föstudaginn og verði haldið áfram þar sem frá var horfið í bónusmálum.  Það liggur orðið fyrir hvernig menn vilja sjá fyrir sér hvaða atriði verði notuð til vigtunar í bónusnum. 

Nú hafa trúnaðarmenn Íslenska járnblendifélagsins og formaður Verkalýðsfélags Akraness lokið við að funda með öllum verkamönnum sem vinna á vöktum sem og verkamönnum í dagvinnu.  Alls voru haldnir fimm fundir, þar sem farið var yfir hvaða kröfur starfsmenn vilja leggja mesta áherslu á. 

Trúnaðarmenn og formaður VLFA hafa tekið við um 40 kröfum sem starfsmenn ÍJ vilja reyna að ná fram í komandi   kjarasamningum. Samningurinn rennur út 30. nóvember.  Starfsmenn ÍJ hafa skrifað undir áskorun til þeirra félaga sem eiga aðild að kjarasamningi við ÍJ, um að félögin tryggi að kjarasamningur Íslenska járnblendifélagsins verði lágmarkssamningur á starfssvæði ÍJ við Grundartanga. Munu stéttarfélögin svo sannarlega taka þessari áskorun, og reyna að varðveita þau réttindi sem starfsmenn ÍJ bæði núverandi og fyrrverandi (GT Tækni, Fang og Klafi) hafa áunnið sér  á liðnum áratugum.  Sú barátta verður ekki átakalaus, en með samstöðu allra starfsmanna eru meiri líkur á að það takist.  Formaður VLFA lagði til að þegar samningaviðræður væru komnar á fullt skrið, þá verði haldnir fundir með starfsmönnum ÍJ eins oft og þurfa þykir og þeim gerð grein fyrir stöðu mála, með því verða starfsmenn vel upplýstir um gang viðræðnanna. Starfsmönnum ÍJ leist mjög vel á þessa tillögu formanns VLFA.

Hafinn er undirbúningur að halda fiskvinnslunámskeið um miðjan nóvember.  Verkalýðsfélag Akraness mun auglýsa þetta námskeið vel, því það er til töluverðs að vinna, því að afloknu námskeiði hækkar starfsmaðurinn um tvo launaflokka.  Námskeiðið verður unnið í fullri samvinnu við atvinnurekendur.

Stjórn Verkalýðsfélag Akraness lýsir yfir fullum stuðningi við forystumenn sjómannasamtakanna í þeim aðgerðum sem nú standa yfir gegn forsvarsmönnum Brims.

Jafnframt hvetur stjórn Verkalýðsfélags Akraness verkalýðshreyfinguna í heild sinni til lýsa yfir stuðningi við aðgerðir forystumanna sjómannasamtakanna í málefnum Brims.

Stjórn Verkalýðsfélags Akraness telur að það þurfi að svara þessari árás forsvarsmanna Brims á skipulagða verkalýðshreyfingu af  fullri hörku.

Haldinn var fundur í dag með forsvarsmönnum Norðuráls, fundinn sátu allir formenn þeirra félaga sem eiga aðild að samningnum, ásamt aðaltrúnaðarmanni Norðuráls.  Á fundinum voru lögð fram drög að viðræðuáætlun.  Þá var tekin ákvörðun um  að hefja samningaviðræður vegna nýs kjarasamnings mánudaginn 18. október kl. 10:00.  Aðilar voru sammála um að byrja að ræða gildisvið samningsins og einnig vaktafyrirkomulag. 

Halldór Björnsson formaður Starfsgreinasambands Íslands og Skúli Thoroddsen framkvæmdastjóri SGS komu í heimsókn í dag á skrifstofu félagsins.  Tilefni heimsóknarinnar var að heyra í stjórn félagsins og fara yfir komandi ársfund Starfsgreinasambandsins sem verður haldinn  14. og 15. október n.k.  Menn fóru yfir þá alvarlegu atburði sem hafa verið að gerast í málefnum Brims og hvernig best væri að bregðast við. 

Formaður félagsins fór yfir hvað hefur verið að gerast og hvað hefur áunnist í starfsemi félagsins frá því ný stjórn tók við 19. nóvember 2003.  Sagði formaður VLFA að miðað við þær hremmingar sem félagið hefur gengið í gegnum á liðnum árum hafi stjórn félagsins tekist að færa margt til betri vegar og starfsemi félagsins hefur tekið algjörum stakkaskiptum á þessu tæpa ári frá því ný stjórn tók við.  Stjórn félagsins bauð þeim félögum Halldóri og Skúla upp á súpu og nautapottrétt sem menn voru afar ánægðir með.  Halldór Björnsson mun láta af formennsku í Starfsgreinasambandinu á ársfundinum 14. október, af því tilefni gaf Verkalýðsfélag Akraness Halldóri bókina um sögu Akraness í þakklætisskyni fyrir það góða samstarf sem hann hefur átt við Verkalýðsfélag Akraness á liðnum árum, og óskaði formaður félagsins Halldóri alls hins besta á komandi árum.