Eins og áður hefur komið fram hér á heimasíðunni þá hafa kjaraviðræður stéttarfélaganna við forsvarsmenn Norðuráls frá því um miðjan desember vegna stefnu VM á hendur Norðuráli.

Málið var tekið fyrir í félagsdómi sl. þriðjudag og er dóms að vænta þá og þegar. Þar sem þetta mál hefur tafið kjaraviðræðurnar í rúman mánuð hefur Verkalýðsfélag Akraness farið þess á leit við forsvarsmenn Norðuráls að viðræður hefjist að nýju á föstudaginn kemur.

Formaður á von á því að boðað verði til fundar í þessari viku, því það er alveg ljóst að framundan eru ærin verkefni við nýjan kjarasamning fyrir starfsmenn Norðuráls. 

Á síðasta ársfundi Alþýðusambands Íslands var lögð fram tillaga frá Verkalýðsfélagi Akraness um stóraukið lýðræði við stjórnarval í lífeyrissjóðum en eins og fram hefur komið hér á síðunni var sú tillaga kolfelld. Hins vegar var á fundinum samþykkt ályktun um heildarendurskoðun á stefnu ASÍ í málefnum lífeyrissjóða.

Nú hefur verið boðað til fundar 18. og 19. febrúar næstkomandi á Hótel Selfossi þar sem stefnumótun í lífeyrismálum Alþýðusambands Íslands verður til umfjöllunar. Það eru 85 fulltrúar frá verkalýðshreyfingunni sem munu eiga seturétt á þessum fundi og mun Verkalýðsfélag Akraness eiga einn fulltrúa á fundinum.

Að sjálfsögðu mun Verkalýðsfélag Akraness halda áfram baráttu sinni fyrir því að auka lýðræðið við stjórnarval í sjóðunum. Krafa félagsins verður sú sama, það er að hætt verði með helmingaskipti atvinnurekenda og verkalýðshreyfingarinnar við skipan í stjórnir lífeyrissjóðanna og nýtt fyrirkomulag tekið upp þar sem allir sjóðsfélagar eigi rétt á að bjóða sig fram til stjórnarsetu. Þessari skoðun mun Verkalýðsfélag Akraness halda á lofti á þessum fundi.

Því miður var tillaga Verkalýðsfélags Akraness á ársfundinum um aukið lýðræði kolfelld eins og áður sagði en 80% ársfundarfulltrúa greiddu atkvæði gegn tillögunni. Það er skoðun formanns að þarna hafi sérhagsmunir forystumanna verkalýðshreyfingarinnar náð fram að ganga en af 24 miðstjórnarmönnum innan ASÍ eru 13 sem sitja í stjórnum lífeyrissjóða, annað hvort sem varamenn eða aðalmenn. Setu í stjórnum lífeyrissjóðanna fylgja umtalsverð völd og einnig getur verið um töluverðan fjárhagslegan ávinning að ræða. Á þeirri forsendu er eins og áður hefur komið fram skoðun formanns að hér hafi verið um sérhagsmunagæslu forystu verkalýðshreyfingarinnar að ræða þegar tillagan fékk ekki brautargengi.  

Það er skýlaus krafa almennings í þessu landi að tekin verði upp ný gildi, gildi er lúta að réttlæti, jöfnuði og virðingu og að gömlu gildin verði látin víkja, gildi sem lúta til dæmis að sérhagsmunagæslu og það er kjörið tækifæri fyrir verkalýðshreyfinguna að sýna það í verki með því að taka upp stóraukið lýðræði við stjórnarval í lífeyrissjóðunum.

Eins og fram hefur komið hér á heimasíðunni munu samningsaðilar að nýjum kjarasamningi Norðuráls hittast á morgun og leggja grunninn að áframhaldandi vinnu við gerð nýs kjarasamnings.

Formaður félagsins hefur verið að skoða afkomu stóriðjufyrirtækja allt aftur til ársins 1998 og það er skemmst frá því að segja að afkoma álfyrirtækjanna síðustu 10 ár er mjög góð. Varðandi járnblendiverksmiðjuna Elkem Ísland þá er afkoma hennar á síðustu 10 árum því miður ekki eins glæisleg og hjá álfyrirtækjunum. Frá árinu 1999 hefur Norðurál skilað samtals rúmum 35 milljörðum í hagnað, Alcan í Straumsvík hefur skilað 41 milljarði á sama tímabili en Elkem Ísland rúmum 2,5 milljörðum. Formaður hefur einnig verið að bera saman launakjör í þessum verksmiðjum og því miður hafa starfsmenn Norðuráls ekki notið jafn góðra kjara og starfsmenn Elkem og Alcan. En það er morgunljóst að í komandi viðræðum mun sá launamunur sem þar ríkir á milli verða leiðréttur að fullu, við annað mun Verkalýðsfélag Akraness ekki una.

Það á að vera skýlaus krafa okkar Íslendinga gagnvart stóriðjufyrirtækjunum að þeim góða ávinningi sem þessi fyrirtæki eru að skila verði skilað með einum eða öðrum hætti til starfsmanna. Þessi fyrirtæki eru að fá hjá okkur ódýrari raforku heldur en gengur og gerist, eru að fá afnot af landinu okkar og síðast en ekki síst fá þeir afskaplega góða starfsmenn til að skila þessum góða árangri sem áður hefur verið nefndur.

Formaður hefur reyndar velt einu fyrir sér, af hverju við Íslendingar reisum ekki okkar eigið álver því það er engin ástæða til þess að láta þann mikla hagnað sem álfyrirtækin eru að skila renna til erlendra eignaraðila. Þetta er möguleiki sem við Íslendingar eigum svo sannarlega að skoða með opnum hug.

Eins og fram kom hér á heimasíðunni í gær þá var fundur vegna nýs kjarasamnings Norðuráls haldinn í húsakynnum ríkissáttasemjara í dag og var þetta fyrsti fundurinn frá því að viðræðum var frestað um miðjan desember á síðasta ári.

Það er afar ánægjulegt að viðræðurnar séu nú farnar af stað aftur og nú mun það liggja fyrir að lagður verður kraftur í þessar viðræður og boðað hefur verið til næsta fundar á þriðjudaginn næstkomandi.

Formaður talaði tæpitungulaust á þessum fundi og kom fram í máli hans að Verkalýðsfélag Akraness muni klárlega standa fast á þeirri kröfu að launakjör starfsmanna Norðuráls verði jöfnuð að fullu við stóriðjur í sambærilegum iðnaði og verður hvergi hvikað í þeim efnum.

Eins og fram hefur komið hér á heimasíðunni er kjarasamningur starfsmanna Norðuráls laus nú um áramótin og hefur samninganefnd trúnaðarmanna og stéttarfélaganna átt nokkra fundi með forsvarsmönnum Norðuráls. Eins og einnig hefur komið fram á síðunni hefur sú vinna aðallega snúist um breytingar á textavinnu í kjarasamningnum.

Næsti fundur verður á morgun í húsakynnum ríkissáttasemjara og verður haldið áfram að vinna í textavinnunni en henni miðar sæmilega áfram þó svo að nokkur ágreiningsatriði séu að tefja fyrir. Samkvæmt viðræðuáætlun á milli samningsaðila var stefnt að því að kjarasamningsgerðinni yrði lokið 15. desember en eins og staðan er í dag verður að teljast afar ólíklegt að búið verði að undirbúa nýjan kjarasamning fyrir þann tíma.

Reyndar telur formaður félagsins að framundan séu nokkuð erfiðar viðræður en ber þá von í brjósti sér að samningsaðilar nái saman fyrir áramót þótt eins og áður hefur komið fram séu ekki miklar líkur á því eins og staðan er í dag. Markmið Verkalýðsfélags Akraness í þessum viðræðum er alveg hvellskýrt, það er að kjör starfsmanna Norðuráls verði með sambærilegum hætti og gerist í öðrum sambærilegum iðnfyrirtækjum.

Samninganefndir stéttarfélaganna áttu í morgun fund með forsvarsmönnum Norðuráls í húsakynnum ríkissáttasemjara. Fundurinn stóð stutt yfir þar sem samningsaðilar voru sammála um að lausn þyrfti að finnast á ágreiningi sem uppi er í einu máli og var því fundi frestað fram á miðvikudag í næstu viku.

Það er ljóst eins og staðan er í dag að ekki eru miklar líkur á að náist að vinna eftir þeirri viðræðuáætlun sem gerð var en í henni var kveðið á um að aðilar stefndu að því að nýr samningur yrði klár til undirritunar 15. desember. Formaður félagsins er því miður svartsýnn á að komin verði nýr samningur fyrir áramót en að sjálfsögðu munu samningsaðilar leita allra leiða til að svo geti orðið.  

Í lok árs 2005 gerði stjórn Verkalýðsfélags Akraness mjög góðan samning við Landsbankann á Akranesi um öll bankaviðskipti félagsins. Í einu ákvæði samningsins er kveðið á um að Landsbankinn greiði í sérstakan styrktarsjóð Verkalýðsfélags Akraness sem nota á til að styrkja góðgerðarmál á félagssvæði VLFA.

Á grundvelli þessa samnings við Landsbankann ákvað stjórn félagsins á fundi að styrkja Mæðrastyrksnefnd Akraness um 150.000 kr.  Einnig ákvað stjórn félagsins að styrkja styrktarsjóð Akraneskirkju um 150.000 kr. og mun séra Eðvarð Ingólfsson sóknarprestur okkar skagamanna sjá um að útdeila þeim fjármunum til fjölskyldna sem eiga í fjárhagsvandræðum

Stjórn félagsins er afar ánægð með að geta komið þessum góðgerðarsamtökum til hjálpar með þessu framlagi. 

Það er alveg ljóst að gríðarlegur fjöldi fólks eiga um sárt að binda fjárhagslega um þessar  mundir sökum þess ástands sem nú ríkir í íslensku efnahagslífi.  Á þeirri forsendu er jákvætt að geta aðstoðað einhverja sem eiga í tímabundnum erfiðleikum fjárhagslega við að halda gleðilega jólahátíð.

Á morgun verður haldinn sjöundi fundur vegna endurnýjunar kjarasamnings starfsmanna Norðuráls og verður fundurinn haldinn eins og áður í húsakynnum ríkissáttasemjara.

Eins og áður hefur komið fram hér á heimasíðunni gerir viðræðuáætlun samningsaðila ráð fyrir því að búið verði að ganga frá nýjum kjarasamningi 15. desember og er morgunljóst að það mun ekki takast. Formaður ber verulegan kvíðboga fyrir því að þessar viðræður geti dregist framyfir áramót en ef að það gerist þarf að sjálfsögðu að tryggja það að þær launahækkanir sem taka eiga gildi 1. mars gildi frá þeim tíma þó svo að samningurinn dragist eitthvað framyfir áramót.

Verkalýðsfélag Akraness vill undirstrika enn og aftur hvert markmið félagsins er í þessum viðræðum en það er að jafna launakjörin við stóriðjur í sambærilegum iðnaði.

Í gær var formaður félagsins í viðtali í þættinum Reykjavík síðdegis þar sem fjallað var um hversu langan tíma það getur tekið að afgreiða umsóknir þeirra sem atvinnulausir eru orðnir. Þess eru dæmi að það geti tekið allt að 4-6 vikur fyrir einstaklinga sem misst hafa atvinnu að fá greiðslu úr atvinnuleysistryggingasjóði.

Það er með öllu óásættanlegt að þetta skuli taka svona langan tíma en ástæðan fyrir þessu er fyrst og fremst vegna undirmönnunar hjá Vinnumálastofnun vítt og breitt um landið. Sem dæmi eru í dag á Vinnumálastofnun hér á Akranesi starfandi jafnmargir starfsmenn og fyrir 3 árum síðan þegar það voru rúmlega 80 manns á atvinnuleysisskrá en í dag eru tæplega 600 manns skráðir atvinnulausir. Á þessu sést að álagið sem er á starfsfólki Vinnumálastofnunnar er gríðarlegt og það er skylda ríkisstjórnar Íslands að skapa Vinnumálastofnun það rekstrarumhverfi sem til þarf.

Það er einnig óþolandi og ólíðandi að fólk sem að missir atvinnu sína skuli þurfa að bíða jafnlengi eftir sínum rétti hjá atvinnuleysistryggingasjóði eins og raun ber vitni. Því er krafan sú að starfsfólki Vinnumálastofnunnar verði fjölgað án tafar þannig að atvinnuleitendur þurfi ekki að lenda í því að bíða eftir sínum greiðslum lengur en þörf er á.

Formanni er fullkunnugt um að starfsfólkið hér á Vinnumálastofnun á Akranesi er að sinna sínu starfi af eins mikilli kostgæfni og mögulegt er en sökum undirmönnunar komast þau ekki yfir þau verkefni sem fyrir þeim liggja sökum mikils álags.