Ágúst Hafberg, framkvæmdastjóri viðskiptaþróunar og samskipta hjá Norðuráli, fer mikinn á vefmiðli Víkurfrétta í dag. Þar segir Ágúst m.a. ummæli formanns VLFA og framsetning launasamanburðar vera mjög villandi. Einnig segir Ágúst: "Varðandi grunnlaunin verður að hafa í huga að vaktakerfi fyrirtækjanna eru gjörólík og samsetning launa ólík. Miðað við síðustu áramót eru byrjunarlaun starfsmanns hjá Norðuráli um 364.000 krónur sem er hærra en í öðrum álverum og stóriðjufyrirtækjum á Íslandi".

Það er rétt hjá Ágústi að byrjunarlaun vaktavinnumanns hjá Norðuráli með öllu eru 364.000 krónur. Hins vegar segir hann ekki frá því hversu margar vinnustundir liggja að baki þessari tölu, en þær eru 182 á mánuði. Hjá Alcan eru heildarlaun byrjanda með öllu, skv. samanburði sem Norðurál hefur sjálft gert, 350.000 krónur. En þar á bak við liggja 145,6 tímar. Þetta er mismunur upp á 36,4 tíma á mánuði og starfsmenn Norðuráls eru því með 14.000 krónum hærri laun fyrir þessar 36 klukkustundir á mánuði.

Þegar launasamanburður vaktavinnufólksins er settur niður á einingar, það er að segja sama vinnustundafjölda, þá liggur fyrir að munurinn á milli Alcan og Norðuráls er bilinu 40 til 50 þúsund krónur á mánuði, Alcan í vil.

Rétt er að minna á að fovarsmenn Norðuráls hafa sjálfir gert launasamanburð  þar sem kemur fram að launamunurinn sé umstalsverður  á milli áðurnefndra verksmiðja starfsmönnum Norðuráls í óhag.

Þegar fyrirtækið sakar nú formann Verkalýðsfélags Akranes fyrir villandi launasamanburð, þá er ekki annað hægt en að vísa því aftur til föðuhúsanna.

Ágúst gagnrýnir formann Verkalýðsfélags Akraness líka fyrir hafa "ítrekað komið með yfirlýsingar um rekstur Norðuráls sem sýna að hann hefur enga þekkingu á rekstri eða rekstrarumhverfi fyrirtækisins". Formaður Verkalýðsfélags Akraness skoðaði rekstur fyrirtækisins allt aftur til ársins 1998 og studdist þar við samantekt Frjálsrar Verslunar á 300 stærstu fyrirtækjunum á Íslandi. Þar fram kemur að Norðurál hafi skilað hagnaði árin frá 1998 til 2008 upp á samtals 36 milljarða króna og að fyrirtækið hafi skilað 16 milljörðum í hagnað árið 2008? Er þetta rangt? Þetta eru rök sem formaður hefur haldið á lofti.

Hvað sagði ekki Ágúst Hafberg sjálfur í Skessuhorni í fyrra þegar fyrirtækið skilaði 16 milljörðum í hagnað? Hann sagði að rekstur Norðuráls á Grundartanga væri á heimsmælikvarða. Núna segja forsvarsmenn Norðuráls að það hafi verið tap á síðasta ári. Formaður ætlar ekki að þræta fyrir það að svo hafi verið en finnst það reyndar skjóta skökku við ekki hafi dugað að reka verksmiðjuna með hagnaði á 1700 dollurum tonnið, sérstaklega í ljósi þess að fjármálastjóri móðurfélagsins Century sagði í nóvember á síðasta ári að mögulegt hafi verið að reka álverið á Grundartanga á sléttu á 1275 dollurum.

Að lokum vill formaður sýna með afgerandi hætti hver hinn raunverulegi launamunur er og þar af leiðandi hversu mikið laun starfsmanna Norðuráls þurfa að hækka til að jöfnun launa hafi átt sér stað á við hinar verksmiðjurnar. Þetta er hinn raunverulegi launamunur sem samninganefnd stéttarfélaganna hefur unnið í samráði við hagfræðing Alþýðusambands Íslands og þar kemur nákvæmlega fram hvað laun starfsmanna Norðuráls þurfa að hækka um til að jafna laun á við hinar verksmiðjurnar hjá Elkem og Alcan..

Formaður spyr sjálfan sig, hví í ósköpunum eiga starfsmenn Norðuráls að vera á lakari kjörum sem nemur tugum þúsunda króna á við mánaðarlaun starfsbræðra þeirra í öðrum sambærilegum verksmiðjum? Það er morgunljóst að við það mun Verkalýðsfélag Akraness alls ekki una.

Eins og lög félagsins gera ráð fyrir verða aðalfundir allra deilda Verkalýðsfélags Akraness haldnir næstu daga. Nú í kvöld munu félagsmenn Almennrar deildar funda. Félagsmenn Iðnsveinadeildar munu funda annað kvöld og á miðvikudagskvöld 3. febrúar er aðalfundur Matvæladeildar. Stóriðjudeildin mun funda mánudaginn 8. febrúar og Opinbera deildin fundar síðust þann 9. febrúar. Allir fundirnir verða haldnir í fundarsal félagsins að Sunnubraut 13 og hefjast kl. 18:00.

Dagskrá fundanna:

1. Venjuleg aðalfundarstörf
2. Kynning á stöðu kjaramála
3. Önnur mál

Félagsmenn eru eindregið hvattir til að mæta á fund sinnar deildar og taka þannig þátt í mótun starfsemi félagsins. Kaffiveitingar verða í boði.

Í þessari viku hafa þegar verið haldnir tveir af aðalfundum deildanna, á mánudaginn var aðalfundur almennrar deildar og í gær var iðnsveinadeildin. Í kvöld mun Matvæladeildin halda sinn aðalfund.

Auk venjubundinna aðalfundarstarfa hafa á fundunum spunnist heilmiklar umræður um atvinnuástandið og aðgerðir ríkisstjórnarinnar þar að lútandi. Ber öllum fundarmönnum saman um að atvinnuástandið sé mjög alvarlegt, enda eru yfir 300 manns á Akranesi án atvinnu. Á landinu öllu eru yfir 17.000 manns atvinnulausir.

Einnig eru fundarmenn sammála um að aðgerðir ríkisstjórnarinnar til að sporna við vanda skuldsettra heimila séu alls ekki nægilegar, enda virðast flestar aðgerðir ríkisstjórnarinnar miðast að því að heimilin greiði sínar stökkbreyttu skuldir upp í rjáfur á sama tíma og slegin hefur verið skjaldborg utan um fjármagnseigendur.

Í gær var haldinn í húsakynnum ríkissáttasemjara samningafundur um nýjan kjarasamning fyrir starfsmenn Norðuráls. Þetta var áttundi fundurinn sem haldinn hefur verið í þessari samningalotu. En eins og áður hefur komið fram þá hefur vinna við samningagerðina hingað til lotið að textabreytingu í kjarasamningi og er lítið byrjað að ræða það sem skiptir starfsmenn hvað mestu máli, það er launaliðina.

Formaður Verkalýðsfélags Akraness kynnti fyrir samninganefnd Norðuráls, þ.e. stéttarfélögunum og trúnaðarmönnum, launasamanburð sem hann hefur gert og lýtur að samanburði á launum Norðuráls, Elkem Ísland og Alcan.

Á grundvelli þessa launasamanburðar mun Verkalýðsfélag Akraness berjast af alefli fyrir því að sá launamunur sem birtist í þessum samanburði verði leiðréttur að fullu við undirskrift nýs samnings. Formaður hefur tjáð forsvarsmönnum Norðuráls að Verkalýðsfélag Akraness mun ekki skrifa undir nýjan kjarasamning fyrr en leiðrétting hefur farið fram á launakjörum starfsmanna Norðuráls til samræmis við launakjör áðurnefndra verksmiðja. Frá þessari kröfu mun félagið ekki hvika.

Næsti fundur hefur verið boðaður hjá ríkissáttasemjara á föstudaginn næstkomandi.

Klukkan 9 í fyrramálið mun hefjast fundur í húsakynnum ríkissáttasemjara vegna nýs kjarasamnings fyrir starfsmenn Norðuráls, en þetta mun verða áttundi fundurinn. Eins og áður hefur komið fram hér á síðunni þá hefur vinnan hingað til aðallega falið í sér lagfæringar á texta í kjarasamningnum og er sú vinna nú langt komin.

Hugsanlega getur textavinnan klárast á morgun eða á næsta fundi og þá verður hægt að fara af fullum krafti í það sem skiptir starfsmenn langmestu máli en það eru launaliðirnir sjálfir. Formanni leiðist ekki að ítreka það að í þessum viðræðum mun Verkalýðsfélag Akraness sýna fulla hörku við að knýja fram sömu kjör og gilda í öðrum verksmiðjum.  

Að gefnu tilefni vill formaður Verkalýðsfélags Akraness taka það skýrt fram að hann er ekki á leið í framboð vegna komandi sveitarstjórnakosninga, en vill samt sem áður þakka þeim fjölmörgu sem hafa að undanförnu skorað á hann m.a. á Facebook og víðar fyrir það traust.

Formaður vill upplýsa að hann tilheyrir ekki neinum stjórnmálaflokki, enda er það hans skoðun að forystumenn í verkalýðshreyfingunni eigi ekki undir nokkrum kringumstæðum að vera eyrnamerktir einhverjum einum ákveðnum stjórnmálaflokki. Enda eru forystumenn í verkalýðshreyfingunni að vinna fyrir félagsmenn sem tilheyra öllum stjórnmálaflokkum.

Það er einnig gríðarlega mikilvægt að verkalýðshreyfingin sé hafin yfir allan vafa hvað varðar traust og trúverðugleika. En það gerir hún alls ekki með því að forystumenn í verkalýðshreyfingunni séu yfirlýstir stuðningsmenn einhverra ákveðinna stjórnmálaafla og noti verkalýðshreyfinguna til að koma sínum flokkspólítísku málum á framfæri. Þetta hefur því miður verið allt of algengt.

Með öðrum orðum, verkalýðshreyfingin á að vinna að málefnum er lúta að hagsmunum launafólks algerlega óháð því frá hvaða stjórnmálaöflum slík málefni koma.

Formaður vill líka upplýsa um það að það eru ærin verkefni framundan hjá Verkalýðsfélagi Akraness við að bæta kjör félagsmanna Verkalýðsfélags Akraness, t.a.m. stendur nú yfir samningagerð við forsvarsmenn Norðuráls og að auki eru allir aðrir kjarasamningar lausir á árinu. Mun formaður ekki hvika frá þeirri baráttu sem framundan er, en vill ítreka þakklæti til þeirra sem hafa verið að skora á hann að undanförnu.

Í gær var haldinn níundi samningafundur vegna kjarasamnings Norðuráls í húsakynnum ríkissáttasemjara. Meginefni fundarins í gær var að fara yfir þau ágreiningsefni er lúta að texta í nýjum kjarasamningi og er sú vinna langt komin þó vissulega séu nokkur atriði sem verulegur ágreiningur er um.

Formaður Verklýðsfélags Akraness kynnti á þarsíðasta fundi fyrir samninganefnd stéttafélaganna launasamanburð sem hann hafði gert á eftirtöldum verksmiðjum: Norðuráli, Elkem Ísland og Alcan í Straumsvík. Nú hefur hagfræðingur ASÍ einnig gert sambærilegan launasamanburð og er skemmst frá því að segja að samanburðinum ber algjörlega saman. Það er ljóst að það er mikil vinna framundan við að jafna launakjör þessara verksmiðja en eins og fram hefur komið hér á heimasíðunni mun Verkalýðsfélag Akraness ekki kvika frá þeirri kröfu að þessum launamuni verði endanlega eytt.

Það hefur einnig komið fram hér á heimasíðunni að rekstur stóriðjanna almennt hefur verið mjög góður á undanförnum árum og ef skoðaðar eru hagnaðartölur áðurnefndra fyrirtækja 12 ár aftur í tímann þá kemur í ljós að Alcan hefur skilað 41 milljarði í hagnað, Norðurál rúmum 36 milljörðum og Elkem Ísland 2,6 milljörðum. Sem dæmi til viðbótar þá skilaði Norðurál 16 milljörðum í hagnað árið 2008. Á þessu sést að þessi útflutningsfyrirtæki hafa fulla burði til að koma vel til móts við það góða starfsfólk sem hjá stóiðjunni starfar og greiða góð laun.

Næsti fundur verður á föstudaginn kemur og eins og áður hefur komið fram þá eru margar hraðahindranir sem samninganefnd stéttafélaganna þarf að fara yfir áður en gengið verður frá nýjum samningi. En til að ítreka það enn og aftur þá eru engar forsendur fyrir því að gefinn verði afsláttur á launakjörum starfsmanna Norðuráls sökum þess góða reksturs sem fyrirtækið hefur skilað á liðnum árum. Og þessu til viðbótar er rétt að minna á að fyrirtækið selur sínar afurðir í dollurum og hefur dollarinn frá árinu 2008 hækkað um 108%. Á sama tíma eru laun greidd í íslenskum krónum.

Formaður félagsins átti fund með starfsmannastjóra Elkem Ísland á þriðjudaginn var. Fundarefnið var það að verktakar hafa að undanförnu verið að störfum inni á svæðinu við svokallaða kjarnastarfsemi fyrirtækisins, en samkvæmt bókun sem fylgir kjarasamningi starfsmanna er kveðið á um eftirfarandi:

"Ein verðmætasta auðlind fyrirtækisins er sérþekking starfsmanna á framleiðsluþáttum og búnaði. Það er grundvallaratriði að slík þekking á kjarnastarfsemi fyrirtækisins haldist innan þess. Í því ljósi verður ekki um úthýsingu á kjarnastarfsemi fyrirtækisins að ræða."

Starfsmannastjóri Elkem var sammála formanni að þau verkefni sem hér væri um að ræða væru hluti af kjarnastarfseminni og hefðu einungis verið hugsuð í mjög skamman tíma. Var samþykkt að fyrirtækið myndi kippa þessu í liðinn innan skamms aðlögunartíma sem fyrirtækið óskaði eftir. Formaður er ánægður með þessa lausn málsins enda var fundurinn mjög góður og ánægjulegt hver viðbrögð fyrirtækisins voru við þessari athugasemd félagsins.

Tíundi samningafundur við forsvarsmenn Norðuráls var haldinn í dag í húsakynnum ríkissáttasemjara. Eins og áður hefur komið hér fram er verið að leggja lokahönd á textabreytingar í kjarasamningnum og einnig var rætt um launasamanburð á milli verksmiðja.

Það er alveg ljóst eftir þennan dag að það er gríðarleg vinna framundan við að ganga frá nýjum kjarasamningi fyrir starfsmenn Norðuráls. Eins og formaður Verkalýðsfélags Akraness hefur sagt hér á heimasíðu félagsins sem og á samningafundum þá mun hann ekki undirrita kjarasamning ef launakjör starfsmanna Norðuráls verða ekki jöfnuð við aðrar sambærilegar stóriðjur. Það er algjörlega morgunljóst að undirritun formanns mun ekki eiga sér stað ef jöfnun mun ekki verða að veruleika. Þessum skilaboðum hefur formaðurinn komið með afgerandi hætti á framfæri við forsvarsmenn fyrirtækisins.

Það er einnig mat formanns að það muni geta tekið þónokkurn tíma að leysa þann ágreining sem uppi er en leggur formaður mikla áherslu á að reynt verði til þrautar á næstu samningafundum að ná saman með nýjan kjarasamning.

Á ársfundi ASÍ í október sl. lagði stjórn og trúnaðarráð Verkalýðsfélags Akraness fram tillögu um breytingu á fyrirkomulagi við stjórnarval í lífeyrissjóðum. Tillagan gekk út á að stórauka lýðræðið við stjórnarval þar sem allir stjórnarmenn yrðu kosnir beinni kosningu af sjóðsfélögum. Núverandi fyrirkomulag er með þeim hætti að atvinnurekendur skipa helming stjórnarmanna og verkalýðshreyfingin kýs hinn helminginn.

Það er skemmst frá því að segja að tillaga Verkalýðsfélags Akraness á ársfundi ASÍ í október var kolfelld með atkvæðum 79,3% fundargesta. Hins vegar var samþykkt að efna til stefnumótunarfundar ASÍ um lífeyrismál þar sem stefna ASÍ yrði yfirfarin og endurskoðuð og skilgreind hver skuli vera samningsmarkmið ASÍ við Sa um lífeyrismál. Nú hefur verið ákveðið að þessi fundur verði haldinn 18. og 19. febrúar nk. á Hótel Selfossi.

Af því tilefni ákvað Verkalýðsfélag Akraness að láta Capacent Gallup gera könnun á því hvort vilji væri til að breyta fyrirkomulagi við stjórnarval í lífeyrissjóðunum. Þessi könnun var framkvæmd dagana 3. til 10. febrúar og var úrtakið 1175 manns. Spurt var: “Ert þú hlynnt(ur) því eða andvíg(ur) að tekið verði upp nýtt fyrirkomulag við val á stjórnarmönnum í lífeyrissjóðum þannig að stjórnarmenn verði að vera sjóðsfélagar og sjóðsfélagar sjálfir kjósi alla stjórnarmenn beinni kosningu?”

Fjöldi svarenda var 836 sem er svarhlutfall upp á 71,1%. Það er skemmst frá því að segja að yfirgnæfandi meirihluti er hlynntur því að tekið verði upp nýtt fyrirkomulagi við stjórnarval í lífeyrissjóðum eða sem nemur 71,5% en einungis 7,8% voru því andvígir. 20,6% sögðust hvorki vera hlynntir né andvígir.

Það er augljóst að afgreiðsla ársfundar Alþýðusambands Íslands á tillögu Verkalýðsfélags Akraness er í algjörri andstöðu við niðurstöðu könnunar Capacent Gallup.  79% ársfundarmanna voru andvígir tillögunni sem Verkalýðsfélag Akraness lagði fram á ársfundinum. 71,5% svarenda könnunar Capacent Gallup eru fylgjandi breytingum á stjórnarvali í lífeyrissjóðum.

Það hlýtur því að vera augljóst að þessi niðurstaða mun vekja forystu Alþýðusambands Íslands til umhugsunar um að vilji hins almenns sjóðsfélaga er að stóraukið verði lýðræði við stjórnarval í lífeyrissjóðum og hætt verði með svokölluð helmingaskipti sæta í stjórnum lífeyrissjóða á milli launaþega og atvinnurekenda.

Hægt er að lesa könnunina í heild sinni með því að smella hér.