Eins og fram hefur komið í fréttum ríkir nú umtalsverð óvissa varðandi atvinnuöryggi sjómanna, fiskvinnslufólks og annarra sem starfa í sjávarútvegi. Ástæðan er einföld, hið nýja auðlindagjald ríkisstjórnarinnar hefur stefnt atvinnuöryggi þessa fólks í verulega hættu. Í fréttum í gær kom fram að 62 starfsmönnum hefur nú verið sagt upp hjá þremur útgerðarfyrirtækjum og er ekki ólíklegt að mun fleiri uppsagnir séu nú í burðarliðnum.

Þetta nýja auðlindagjald virðist í fljótu bragði vera algjörlega vanhugsað enda er verið að leggja umtalsverðar byrðar á útgerðina. Formaður Verkalýðsfélags Akraness hefur verið í sambandi við tvo útgerðarmenn sem eru í smábátaútgerð hér á Akranesi og í máli þeirra kom fram að það sé algjörlega búið að rústa þessari grein og þeir hafi ekki nokkurn áhuga á að starfa áfram við þessar aðstæður. Annar þeirra sagðist hafa greitt rétt rúmar 600 þúsund krónur í auðlindagjald fyrir ári síðan en nú væri hann hins vegar kominn með reikning í hendurnar sem kveður á um 2,7 milljónir í auðlindagjald og hann áætlar að af þessum litla kvóta sem hann er með fari aflaverðmæti 20-30 tonna í það eitt að standa undir kostnaði vegna hins nýja auðlindagjalds. Sömu sögu er að segja af hinum útgerðarmanninum, hann greiddi 800 þúsund krónur í auðlindagjald á síðasta ári en hefur nú fengið reikning upp á 4 milljónir króna. Báðir sögðu þeir að þeir hefðu í hyggju að hætta þessari starfsemi vegna skattastefnu stjórnvalda, enda er þeim ekki lengur gert kleift að starfa í þessari grein. Það kom einnig fram í fréttum í dag að fjölmargar smærri útgerðir séu nú að íhuga að selja sínar útgerðir og hætta starfsemi.

Formaður félagsins óttast að atvinnuöryggi hundruð ef ekki þúsunda sjómanna sé stefnt í voða vegna þessa auðlindagjalds. Rétt væri að sjávarútvegurinn myndi greiða eðlilegt og sanngjarnt auðlindagjald en það auðlindagjald má ekki vera með þeim hætti að atvinnuöryggi áðurnefndra aðila sé stefnt í tvísýnu eins og nú er gert. Formaður VLFA vill sjá útgerðina geta vaxið og dafnað þannig að hún geti hækkað laun þeirra sem starfa í greininni sem klárlega myndi skila sér í auknum tekjum fyrir ríkissjóð sem og sveitarfélög og einnig að útgerðinni séu gerð þannig rekstrarskilyrði af hálfu stjórnvalda að það leiði til fjölgunar starfa í greininni en ekki fækkunar eins og nú er að eiga sér stað enda er það til hagsbóta fyrir allt samfélagið.

Það er þyngra en tárum taki að núverandi stjórnvöld virðast eiga í heilögu stríði við þrjár mikilvægustu atvinnugreinar þessa lands, það er að segja útgerðina, stóriðjuna og nú síðast ferðaþjónustuna. Það var t.d. gengið frá samkomulagi við stóriðjurnar um fyrirframgreiddan skatt árið 2010 sem átti að renna út á þessu ári en nú hafa stjórnvöld tilkynnt eins og svo oft áður að þau ætli að svíkja það samkomulag og hafa framlengt skattheimtuna. Hvernig eiga erlendir fjárfestar að hafa nokkurn áhuga á að fjárfesta hér á landi þegar ekki er hægt að treysta undirrituðum samkomulögum þar að lútandi. Ekki þar fyrir utan að verkalýðshreyfingin þekkir það mætavel að ekki er hægt að treysta núverandi stjórnvöldum þó undirritað samkomulag hafi verið gert og nægir að nefna í því samhengi öll þau samkomulög sem gerð hafa verið samhliða kjarasamningum sem nú hafa verið svikin að stórum hluta.

Það er hins vegar alveg ljóst að ríkissjóður þarf að auka skatttekjur sínar en það má ekki vera með þeim hætti að það hafi þveröfug áhrif og leiði frekar til tekjurýrnunar ríkissjóðs heldur en aukningar. Sem dæmi þá hafa skattahækkanir ríkisstjórnarinnar frá því hún tók við hækkað verðtryggðar skuldir heimilanna um vel á þriðja tug milljarða vegna áhrifa hækkana á neysluvísitölunni.

Samtök atvinnulífsins hafa bent á að skattahækkanir ríkisstjórnarinnar frá því hún tók við hafi leitt til þess að skattbyrði hverrar fjögurra manna fjölskyldu hafi aukist um 1 milljón króna á hverju ári. Verkalýðsfélag Akraness skorar á stjórnvöld að endurskoða þessa skattastefnu sína því það gengur ekki upp að verið sé að ganga af heimilunum dauðum sem og að fyrirtækjum og atvinnuöryggi heillar atvinnugreinar sé stefnt í voða eins og nú er að gerast. Hér er um dauðans alvöru að ræða og Verkalýðsfélagi Akraness ber skylda til þess að verja störf sinna félagsmanna með kjafti og klóm. Hér fara hagsmunir atvinnulífsins og stéttarfélagsins svo sannarlega saman enda er hér um lífsafkomu félagsmanna í húfi. VLFA skorar einnig á stjórnvöld og útgerðarmenn að setjast niður og reyna að finna lausn á þessari deilu þar sem það má ekki undir nokkrum kringumstæðum gerast að störfum innan sjávarútvegsins sé stefnt í hættu á þennan hátt.

Barátta Verkalýðsfélags Akraness gegn verðtryggingunni hefur víða fengið hljómgrunn. Nú hefur hljómsveitin Grasasnar frá Borgarbyggð og sönghópurinn Stúkurnar frá Akranesi gefið út nýtt jólalag: (við viljum ekki hafa) Verðtryggð jól.

Í fréttatilkynningu vegna útgáfu lagsins segir: "Allir aðstendur lagsins og myndbandsins eru frá Vesturlandi og vilja með þessu verki sínu lýsa yfir samstöðu með Verkalýðsfélagi Akraness svo og Hagsmunasamtökum heimilanna  sem tekið hafa forystu og stefnt stjórnvöldum á grundvelli þess að lög um verðtryggingu séu ólögleg.  Flytjendur líta svo á verðtygging sé mannréttindabrot sem skapi óbærilega stöðu fyrir fjölskyldufólk og heimili í landinu. Með framlagi sínu vilja þeir leggja sitt litla lóð á vogarskálarnar í  von um að vekja fólk til umhugsunar og aðgerða gegn þessu séríslenska óréttlæti."

Verkalýðsfélag Akraness þakkar innilega fyrir þennan hljómfagra stuðning enda munar um hvert einasta lóð sem lagt er á vogarskálarnar gegn verðtryggingunni. Stuðningur sem þessi er algerlega ómetanlegur. Það er gaman að geta þess að ein úr sönghópnum Stúkurnar er starfsmaður á skrifstofu VLFA. Rétt í þessu var að berast myndband sem Friðþjófur Helgason hefur gert við lagið og er hægt að sjá það með því að smella hér.

Textinn með laginu er svohljóðandi:

Syngjum saman lítið lag um jólin,

saman skulum finna okkur skjól.

Syngjum hátt og snjallt, svo það heyrist út um allt.

Við viljum ekki hafa verðtryggð jól.

Þingmenn svíkja sannfæringu sína,

fjármagnsfurstar spinna flækjustig.

Leiðast hönd í hönd með belti og axlabönd

á meðan sigla heimili í slig.

Öfugsnúið réttlæti hér ríkir,

gjafirnar fá glæframenn og fól.

Fjölskyldanna lán, skuldaklafi og smán

Aftengjum vitlaus vísitölu tól.

Kominn tími til að opna  augun

blekkingarnar blasa öllum við.

Forsendan er falin og afleiðingin galin,

Koma svo, þetta þolir ekki bið. 

Fréttabréf Verkalýðsfélags Akraness er komið út og verður lokið við að dreifa því til allra heimila og fyrirtækja á Akranesi og nágrenni í dag. Þeir félagsmenn sem búa í öðrum póstnúmerum fá blaðið sent heim til sín. Hægt er að lesa fréttabréfið hér.

Það er óhætt að segja að starfsmenn Samherja geti glaðst um þessar mundir í ljósi þess að fyrirtækið hefur nú tilkynnt starfsmönnum að það ætli enn eitt árið að greiða þeim jólaumbun sem nemur tæpum 400.000 krónum. Samherji hefur verið iðinn við að láta starfsmenn sína njóta góðrar afkomu fyrirtækisins á liðnum árum og hefur fyrirtækið nú greitt hverjum starfsmanni 810.000 krónur umfram þá kjarasamninga sem undirritaðir voru í maí í fyrra. Á síðustu 4 árum hefur fyrirtækið greitt hverjum starfsmanni upp undir 1,5 milljón umfram gildandi kjarasamninga.

Samherji er ekki eina fyrirtækið sem hefur látið starfsmenn sína njóta góðrar afkomu í sjávarútvegi, en fyrirtæki eins og Eskja, Vinnslustöðin, Brim og fleiri hafa gert slíkt hið sama. En því miður hefur eitt stærsta sjávarútvegsfyrirtækið hér á landi, HB Grandi sem er m.a. með starfsstöð hér á Akranesi, ekki séð sér fært að greiða starfsmönnum sínum slíkar greiðslar þrátt fyrir afar góða afkomu undanfarin ár vegna hagstæðs gengis útflutningsfyrirtækja. Fyrirtækið hefur skilað milljörðum í hagnað og greitt hundruði milljóna í arðgreiðslur til eigenda. Á þeirri forsendu er það þyngra en tárum taki að fyrirtækið hafi hingað til ekki verið tilbúið til að umbuna sínum starfsmönnum líkt og Samherji hefur gert ár eftir ár.

Hins vegar er sorglegt til þess að vita að þegar kjarasamningar voru lausir í fyrra þá barðist Verkalýðsfélag Akraness hart fyrir því að laun fiskvinnslufólks yrðu lagfærð og leiðrétt í ljósi þeirrar bláköldu staðreyndar að staða sjávarútvegsfyrirtækja er gríðarlega sterk um þessar mundir sökum hagstæðra ytri skilyrða, en  Alþýðusamband Íslands og Samtök atvinnulífsins komu í veg fyrir að þessi leiðrétting á launum fiskvinnslufólks yrði að veruleika. Enda gengu þeir frá kjarasamningum sem kváðu á um samræmda launastefnu þar sem ekki mátti taka tillit til sterkrar stöðu útflutningsfyrirtækja, þ.e.a.s. sjávarútvegsfyrirtækja. Rök Verkalýðsfélags Akranses voru ætíð þau að staða þessara fyrirtækja væri sterk og láta ætti fiskvinnslufólk njóta góðs af þessari sterku stöðu. Enda hefur það nú verið staðfest svo ekki verður um villst þegar horft er á þessar glæsilegu umframgreiðslur Samherja og annarra sterkra sjávarútvegsfyrirtækja. Þess vegna er það ömurlegt til þess að vita að svona sterk fyriræki eins og HB Grandi skuli skýla sér á bak við þennan kjarasamning sem gerður var í maí 2011 og láta ekki sína starfsmenn njóta góðs af góðri afkomu.

Verkalýðsfélag Akraness eygir þá von að forsvarsmenn og eigendur HB Granda fylgi nú þessu frábæra fordæmi Samherjamanna og greiði sínum starfsmönnum álíka upphæð. Formaður félagsins skrifaði í dag bréf til yfirstjórnar HB Granda og fór þess á leit við fyrirtækið að það myndi fylgja áðurnefndu fordæmi Samherjamanna og umbuna sínu góða starfsfólki fyrir góð störf í gegnum árin með álíka eingreiðslu og Samherjamenn hafa greitt sínu starfsfólki. Vonandi munu forsvarsmenn HB Granda taka jákvætt í þetta erindi, en þegar þessi orð eru skrifuð hefur ekkert svar borist við þessari beiðni.

Skrifstofa VLFA vill hvetja félagsmenn til að fylgjast vel með því að desemberuppbót skili sér rétt. Desemberuppbót skal greiða ekki síðar en 15. desember ár hvert, miðað við starfshlutfall og starfstíma, öllum starfsmönnum sem verið hafa samfellt í starfi hjá atvinnurekanda í 12 vikur á síðustu 12 mánuðum eða eru í starfi fyrstu viku í desember.

Upphæð desemberuppbótar er mismunandi eftir kjarasamningum. Helstu upphæðir eru:

- Almennur vinnumarkaður, Samiðn og Ríkið kr. 50.500,-

- Sveitarfélög kr. 78.200

- Elkem og Klafi kr. 141.971

- Norðurál kr. 146.522

Á síðasta föstudag skilaði hagsmunagæsla félagsins tæpum þremur milljónum til tveggja starfsmanna en þeim hafði verið sagt upp störfum og áttu ekki að fá greiddan umsaminn uppsagnarfrest. Eftir nokkura vikna baráttu tókst félaginu að fá fyrirtækið til að hverfa frá því að greiða þeim ekki áðurnefndan uppsagnarfrest enda voru hér umtalsverðir hagsmunir í húfi fyrir umrædda starfsmenn.

Ný stjórn tók við Verkalýðsfélagi Akraness þann 19. nóvember 2003 og er óhætt að segja að hagsmunagæsla og það að verja kjör félagsmanna VLFA hafi gengið frábærlega á þessum tíma en félagið hefur náð að verja réttindi þar sem kjarasamningsbrot fyrirtækja hafa átt sér stað um sem nemur rúmum 200 milljónum á áðurnefndu tímabili. Það er stefna stjórnar félagsins að hvika hvergi frá þegar réttinda- og hagsmunagæsla er í húfi og horfir félagið ekki í krónur og aura í þeirri baráttu. Það skiptir gríðarlega miklu máli fyrir hina almennu félagsmenn að vera með öflug stéttarfélög á bakvið sig sem eru tilbúin til þess að berjast af alefli gegn hinum ýmsu kjarasamningsbrotum sem félagsmenn verða því miður alltof oft fyrir af hálfu sinna atvinnurekenda. Það er því miður bláköld staðreynd að leikurinn á milli launþegans og atvinnurekandans er afar ójafn þegar kemur að hinum ýmsu málum er lúta að réttindum launþegans.

Verkalýðsfélag Akraness er stolt af þessum árangri enda er hér ekki um neinar smáupphæðir að ræða og stærsta einstaka málið sem félagið hefur innheimt fyrir félagsmenn nemur á þriðja tug milljóna króna.

Um þessar mundir er Fréttabréf Verkalýðsfélags Akraness í vinnslu á skrifstofu félagsins. Félagið gefur fréttabréfið út tvisvar á ári í þeim til gangi að kynna starfsemi og þjónustu félagsins og segja fréttir af þeim málum sem stjórn og starfsmenn félagsins eru að vinna að hverju sinni.

Efni blaðsins er fjölbreytt og verður því dreift til allra heimila og fyrirtækja á Akranesi og nágrenni í fyrstu viku desember, auk þess sem félagsmenn búsettir annars staðar fá blaðið heimsent í pósti.

Áður útgefin fréttabréf eru aðgengileg hér á heimasíðunni.

Nú hafa fimm stéttarfélög tilkynnt um þá ákvörðun að styrkja Verkalýðsfélag Akraness í málarekstrinum vegna hugsanlegs ólögmætis verðtryggingarinnar, en núna rétt fyrir helgi bættust Verkalýðsfélag Snæfellinga og Sjómannafélag Íslands í hóp þeirra sem munu að leggja málinu lið fjárhagslega. Sjómannafélag Íslands styrkti málið um 300.000 kr. Það er ekki bara að stéttarfélög hafi styrkt málið heldur hafa einstaklingar einnig lagt fé til málarekstursins en samtals hefur félagið fengið í styrki vegna málsins rétt rúma eina milljón króna og kann stjórn VLFA öllum þessum aðilum bestu þakkir fyrir. Þetta mun auðvelda félaginu mikið að fara í þennan málarekstur því það er alveg ljóst að umtalsverður kostnaður er við mál af þessu tagi.

Málið er nú í fullri vinnslu og er reiknað með að það verði þingfest fyrir jól, en það er hæstaréttarlögmaðurinn Björn Þorri Viktorsson sem rekur málið fyrir hönd félagsins.

Í gær kom stjórn Verkalýðsfélags Akraness saman til fundar en þetta var hundraðasti stjórnarfundur núverandi stjórnar en hún tók við þann 19. nóvember 2003. Þetta eru vissulega merkileg tímamót í ljósi alls þess sem gekk á áður en stjórnin tók við en eins og félagsmenn muna voru átökin mikil í Verkalýðsfélagi Akraness á árunum 2000 til 2003 og endaði með því að Alþýðusamband Íslands yfirtók félagið og skipaði því starfsstjórn. Síðan var ákveðið að efna til allsherjar atkvæðagreiðslu um nýja stjórn í félaginu seint á árinu 2003 og tóku tæplega 90% félagsmanna þátt í kosningunum. Niðurstaðan var skýr og ný stjórn undir forystu núverandi formanns náði kjöri og tók hún eins og áður sagði við 19. nóvember 2003.

Formanni félagsins er það mjög minnisstætt þegar fyrrverandi forseti Alþýðusambands Íslands, Grétar Þorsteinsson, kom á aðalfund félagsins eftir að ný stjórn hafði tekið við í árslok 2003 og sagði að það væri mikið verk framundan hjá nýrri stjórn að vinna upp traust félagsmanna og byggja félagið upp fjárhagslega sem félagslega. Það er skemmst frá því að segja að frá þessum tíma þá hefur félagsmönnum fjölgað um tæplega 100% en félagsmenn eru í dag um 3.000 talsins. Og það er ekki bara að núverandi stjórn hafi tekist að fjölga þetta gríðarlega í félaginu heldur var félagið algjörlega fjárvana og félagssjóður þess var rekinn á 2,5 milljóna króna yfirdrætti þegar ný stjórn tók við. Nýrri stjórn hefur tekist að byggja félagið upp jafnt félagslega sem fjárhagslega á þessum árum og stendur félagið nú traustum fótum fjárhagslega, hefur byggt upp alla sína sjóði ásamt því að auka réttindi til handa félagsmönnum, meðal annars úr sjúkrasjóði félagsins en ný stjórn hefur tekið upp 9 nýja styrki. Félagið hefur keypt tvö orlofshús frá því ný stjórn tók við enda var ljóst að með þetta mikilli fjölgun í félaginu varð að auka við orlofsmöguleika félagsmanna. Núverandi stjórn er stolt yfir þeim glæsilega árangri sem hún hefur náð frá því hún tók við en það er morgunljóst að stjórnin er hvergi nærri hætt við að vinna að því að bæta réttindi og kjör sinna félagsmanna enda er af nægu að taka í þeim efnum.

Á fundinum í gær ákvað stjórn félagsins að styrkja Ingu Elínu Cryer, afrekssundkonu um 100.000 kr., en Inga Elín var kjörin íþróttamaður Akraness í fyrra og hefur náð glæsilegum árangri í sinni íþrótt. Hún er að fara á Evrópumót í sundi í næstu viku og hafði óskað eftir því í fjölmiðlum að fá fjárhagsstuðning sökum þess að kostnaður hennar hefði orðið um 300 þúsund krónur ef hún hefði þurft að standa ein straum af honum. Það er hlutverk okkar að styrkja og styðja okkar afreksfólk því það er ekkert sjálfgefið fyrir sveitarfélög að eiga slíka einstaklinga sem skara fram úr í sinni íþrótt. Báðir foreldrar Ingu Elínar eru félagsmenn í Verkalýðsfélagi Akraness og er stjórninni heiður af því að hafa náð að létta undir þannig að hún kæmist á Evrópumótið í sundi.  

Fundargestir klöppuðu málflutningi formanns VLFA lof í lófa (mynd: Egill Helgason)Formaður Verkalýðsfélags Akraness sat í gær hörkufund sem Hagsmunasamtök heimilanna héldu um verðtrygginguna og var fundurinn haldinn í Háskólabíói. Salurinn var yfirfullur en um eða yfir eitt þúsund manns mættu á fundinn og var gríðarlega góð stemmning í salnum.

Þeir sem sátu fundinn voru meðal annars Steingrímur J. Sigfússon, atvinnu- og nýsköpunarráðherra, þingmennirnir Pétur H. Blöndal, Helgi Hjörvar, Margrét Tryggvadóttir, Guðmundur Steingrímsson og Eygló Harðardóttir og einnig var Gísli Tryggvason talsmaður neytenda.

Formaður félagsins gerði grein fyrir dómsmáli sem VLFA er nú að vinna að er lýtur að ólögmæti verðtryggingarinnar en félagið hefur falið Birni Þorra Viktorssyni að sjá um málareksturinn. Málareksturinn er ekki með sama hætti og Hagsmunasamtökin eru að fara af stað með heldur lýtur málsókn VLFA að því hvort lög um verðbréfaviðskipti nr. 108/2007 og tilskipun Evrópuréttar standist lög hér á landi en hér er um að ræða svokallaðar MiFid reglur sem fjalla um það hvort heimilt sé að lána flókna fjármálagjörninga, svokallaðar afleiður, til einstaklinga.

Formaður tók nokkrum sinnum til máls á fundinum og fór yfir það grímulausa óréttlæti sem íslensk heimili hafa mátt þola vegna verðtryggingarinnar á síðustu árum og áratugum en verðtryggingin hefur farið eins og skýstrókur um íslensk heimili, sogað allan eignarhluta í burtu og fært hann yfir til fjármálakerfisins. Formaður fór einnig yfir þau gríðarlegu mistök sem voru gerð í kjölfar hrunsins þegar skipuð var nefnd undir forystu forseta Alþýðusambands Íslands sem hafði það hlutverk að kanna og meta hvort hægt væri að taka neysluvísitöluna tímabundð úr sambandi vegna þeirrar óðaverðbólgu sem var að bresta á í kjölfar hrunsins. Formaður fór yfir að þarna hefði verið kjörið tækifæri til að deila byrðum hrunsins jafnt á milli fjármálakerfisins, fjármagnseigenda og skuldsettra heimila með því að taka neysluvísitöluna úr sambandi. En þessi áðurnefnda nefnd var fljót að komast að niðurstöðu þar sem lagt var til að það mætti alls ekki taka neysluvísitöluna úr sambandi vegna þess að það myndi kosta fjármálakerfið um 200 milljarða króna og formaður sagði að þessi nefnd hefði þar með um leið sagt skítt með skuldsett heimili, þeim má fórna á altari verðtryggingarinnar.

Formaður fór einnig yfir þá grafalvarlegu stöðu sem lífeyrissjóðirnir eru í og gerði hann það vegna ummæla Péturs H. Blöndal um það hversu mikilvægt væri fyrir almenning að hafa verðtryggingu til að verja lífeyrissjóðina. Formaður upplýsti Pétur um að lífeyrissjóðirnir á hinum almenna vinnumarkaði séu búnir að skerða réttindi sinna sjóðsfélaga um 130 milljarða króna frá hruni sem er 14 milljörðum meira en allur heildarniðurskurður íslenska ríkisins. Því sé það grátbroslegt þegar að menn tali um að lífeyrir launafólks sé verðtryggður í ljósi þess að lífeyrissjóðirnir skerða réttindin miskunnarlaust á aðalfundum sjóðanna ef tryggingafræðileg staða sjóðanna er neikvæð. Formaður upplýsti Pétur einnig um að lífeyrissjóðir innan ASÍ væru með neikvæða tryggingafræðilega stöðu upp á 100 milljarða króna og eru allar þessar tölur byggðar á gögnum frá Fjármálaeftirlitinu sem birtust í júlí á þessu ári. Í þessum sömu gögnum kemur fram að lífeyrissjóðskerfið í heild sinni vanti um 700 milljarða króna til að geta staðið við sínar skuldbindingar gagnvart sínum sjóðsfélögum. Svo tala menn um að þetta sé besta kerfi í heimi.

Formaður var djúpt snortinn yfir þeim móttökum sem hann fékk við sínum málflutningi og sérstaklega þegar upp undir 1000 manns risu úr sætum og klöppuðu fyrir málflutningnum. Þessi stuðningur er ómetanlegur og gerir ekkert annað en að efla félagið enn frekar í hagsmunabaráttu fyrir skuldsett heimili og fyrir bættum hag alþýðu þessa lands.

Eftirfarandi ályktun var lögð fram á fundinum og var hún samþykkt með nánast öllum greiddum atkvæðum á fundinum með örfáum undantekningum en ályktunin hljóðar með eftirfarandi hætti:

"Almennur fundur í Háskólabíói 13. nóvember 2012 krefst þess að Alþingi tryggi tafarlaust afnám verðtryggingar á lánsfé og að gildandi lög um neytendavernd séu virt."

Já, á þessum fundi var hún samþykkt nánast með öllum greiddum atkvæðum en á ársþingi Alþýðusambands Íslands lagði VLFA fram ályktun sem laut að nánast nákvæmlega sama hlutnum en ASÍ elítan sá hins vegar til þess að sú tillaga fengi ekki brautargengi sem er óskiljanlegt í ljósi þess að bæði þessi fundur, þing Neytendasamtakanna og allar kannanir sem hafa verið gerðar sýna eindreginn vilja í þá átt að verðtryggingin á neytendalánum til almennings verði afnumin án tafar. En snillingarnir í Alþýðusambandi Íslands, þeir eru svo sannarlega ekki á sama máli.