Formaður Verkalýðsfélags Akraness hafði samband við forstjórann Gylfa Jónasson sem stýrir Festa lífeyrissjóði sem Verkalýðsfélag Akraness er aðili að. Formaðurinn tjáði honum með afgerandi hætti að ef lífeyrissjóðurinn Festa muni taka þátt í kaupréttarútboði á fyrirtækinu Eimskip þá mun félagið grípa til róttækra aðgerða sem gætu verið fólgnar í því að félagsmenn Verkalýðsfélags Akraness sem eru aðilar að Festu lífeyrissjóði gangi í annan lífeyrissjóð.

Forstjórinn tjáði formanni að hann hefði sent skilaboð út til stjórnarmanna sjóðsins í gær varðandi þetta útboð og mun niðurstaða liggja fyrir klukkan 14 í dag um hvað sjóðurinn muni gera varðandi þetta útboð. Það er alveg morgunljóst að Verkalýðsfélag Akraness mun og ætlar sér ekki að sætta sig við að verið sé að fjárfesta í fyrirtæki sem ætlar að rétta lykilstjórnendum Eimskips kaupréttarsamninga á silfurfati á sama tíma og sjóðurinn hefur tapað 500 milljónum króna vegna gjaldþrots Eimskips á sínum tíma. En lífeyrissjóðirnir töpuðu á gjaldþroti Eimskips hátt í 15 milljörðum króna samtals og á þeirri forsendu meðal annars er það skylda lífeyrissjóðskerfisins að senda skýr skilaboð út til fyrirtækja um að sjóðsfélagar í lífeyrissjóðum muni ekki sætta sig við að græðgisvæðingin skjóti aftur rótum inni í þessum fyrirtækjum.

Ef það verður niðurstaðan eins og áður sagði að Festa lílfeyrissjóður muni fjárfesta í þessu fyrirtæki þá mun Verkalýðsfélag Akraness boða til áríðandi fundar með sínum sjóðsfélögum þar sem því verður beint til félagsmanna að greiða inn í annan lífeyrissjóð. Hins vegar er tilfinning formanns sú að stjórn Festu muni verða við þessari beiðni VLFA og taka ekki þátt í þessu útboði en rétt er að minna á að formaður gerði þessa kröfu á sjóðinn í júlí síðastliðnum þegar það lá fyrir að þessir kaupréttarsamningar yrðu að veruleika. En eins og áður sagði þá mun formaður fá svar klukkan 14 í dag um hvort Festa lífeyrissjóður muni taka þátt í þessu útboði eður ei.

Þingi Alþýðusambands Íslands lauk á föstudaginn en það hafði staðið yfir frá miðvikudegi. Það er skemmst frá því að segja að þetta var átakaþing enda lagði Verkalýðsfélag Akraness fram þrjár tillögur og ályktanir fyrir þingið og það er einnig skemmst frá því að segja að engin þeirra hlaut brautargengi. Fyrsta tillagan laut að lagabreytingum ASÍ sem var fólgin í því að forseti sambandsins yrði kjörinn í allsherjar atkvæðagreiðslu á meðal allra félagsmanna ASÍ en ekki inni á þingum sambandsins eins og nú væri. Formaður VLFA gerði grein fyrir þessari tillögu og benti meðal annars á þá miklu lýðræðisvakningu sem væri að eiga sér stað í íslensku samfélagi þar sem krafan væri skýr um að auka beint lýðræði á öllum sviðum. En því miður þá voru þónokkrir forystumenn innan Alþýðusambandsins sem töluðu þessa tillögu niður sem varð þess valdandi að hún fékk ekki hljómgrunn eins og áður hefur komið fram. Það er með ólíkindum að þessi tillaga hafi verið felld í ljósi þeirrar staðreyndar að Capacent Gallup gerði könnun fyrir VLFA fyrir rúmri viku síðan þar sem vilji fólks var afgerandi en 88% þeirra sem tóku afstöðu til spurningarinnar vildu að forseti sambandsins yrði kjörinn í allsherjar atkvæðagreiðslu. Enn og aftur sést með afgerandi hætti sú djúpa gjá sem er á milli hins almenna félagsmanns innan ASÍ og forystu sambandsins.

Stjórn og trúnaðarráð Verkalýðsfélags Akraness lagði einnig fram tillögu er laut að lífeyrismálum og gekk sú tillaga út á það að fyrirhuguð hækkun á iðgjöldum í lífeyrissjóð úr 12 í 15,5% renni frekar í séreign starfsmanna heldur en í samtrygginguna en formaður færði gríðarlega sterk rök fyrir því að slíkt væri heppilegra fyrir hinn almenna launamann. Formaður rakti þá grafalvarlegu stöðu sem er í lífeyrissjóðskerfinu og einnig sýndi hann fram á það með afgerandi hætti að það loforð sem forysta ASÍ hefur haldið á lofti um að verið sé að jafna réttiindi við opinbera starfsmenn með því að hækka iðgjaldið um 3,5% standist ekki eina einustu skoðun og sé algjör blekkingarleikur gagnvart íslensku launafólki. Enda gekk formaður hart að forseta Alþýðusambandsins hvað þetta varðar og kom í ljós í nefndarstarfinu að forsetinn viðurkenndi að með því að hækka framlagið upp í 15,5% væri ekki verið að jafna lífeyrisréttindi. Formaður fór yfir það með þingfulltrúum að samkvæmt skýrslu fjármálaeftirlitsins væri búið að skerða réttindi sjóðsfélaga innan ASÍ um 130 milljarða frá hruni sem er 14 milljörðum meira heldur en heildar niðurskurður íslenska ríkisins frá sama tímabili. Já takið eftir, íslenska ríkið er búið að skera niður í heilbrigðiskerfinu, menntakerfinu, löggæslunni og víðar um 116 milljarða en réttindi sjóðsfélaga innan ASÍ eru búin að skerðast um 130 milljarða. Formaður benti líka á það að tryggingafræðileg staða lífeyrissjóða innan ASÍ væri neikvæð um 119 milljarða og á þeirri forsendu væri það lágmark að stjórnendur sjóðanna sýndu fram á sjálfbærni kerfisins áður en þeir færu að krefjast þess að launafólk setti meira inn í þessa hít. Því miður fékk þessi tillaga ekki heldur brautargengi enda lögðust áhrifamenn innan verkalýðshreyfingarinnar hart gegn henni.

Þriðja tillagan sem stjórn og trúnaðarráð VLFA lagði fram var um afnám verðtryggingarinnar en eins og fram hefur komið í fjölmiðlum þá sýna allar skoðanakannanir að almenningur hér á landi vill að verðtryggingin verði afnumin í eitt skipti fyrir öll og hafa þær skoðanakannanir sýnt allt að 80% séu því fylgjandi. Formaður rakti hvernig verðtryggingin hefur leikið skuldsett heimili en frá 1. janúar 2008 hafa verðtryggðar skuldir heimilanna hækkað um 400 milljarða bara vegna verðtryggingarinnar þar sem hún hefur farið eins og skýstrókur um íslensk heimili, sogað allan eignarhlut í burtu og fært hann yfir til bankanna, erlendra vogunarsjóða og þeirra sem eiga fjármagnið í þessu landi. En varðmenn verðtryggingarinar, forseti Alþýðusambands Íslands og hans helstu bandamenn leggjast alfarið gegn því að verðtryggingin verði afnumin og tekin verði staða með almenningi og á þeirri forsendu var þessi tillaga felld, reyndar naumlega, sem er miður.

Þetta þing sýnir svo ekki verður um villst það sem fram kom í rannsóknarskýrslu Alþingis að eitt af aðalvandamálum íslensks samfélags væri hjarðhegðun og foringjaræði enda er það óskiljanlegt að afgreiðslur inni á þessu þingi séu ekki í neinu samræmi við það sem er að gerast á meðal hins almenna félagsmanns innan ASÍ, svokallaðrar grasrótar. Það er mat formanns að hafi gjáin á milli hins almenna félagsmanns innan ASÍ og forystunnar verið djúp fyrir þetta þing þá er hún orðin að hyldýpi eftir þingið.  

Á morgun hefst þing Alþýðusambands Íslands og mun standa yfir í þrjá daga, en Verkalýðsfélag Akraness á 6 fulltrúa á þessu þingi. Stjórn og trúnaðarráð Verkalýðsfélags Akraness mun leggja fram þrjár tillögur á þessu þingi, tvær ályktanir og eina lagabreytingu. 

Tillagan að lagabreytingu er fólgin í því að lögum ASÍ verði breytt þannig að forseti ASÍ verði kjörinn í allsherjaratkvæðagreiðslu á meðal allra félagsmanna ASÍ en ekki aðeins á meðal fulltrúa á þingi sambandsins eins og nú er. Ástæða þessarar tillögu VLFA er einfaldlega sú að mjög mikilvægt er að forseti ASÍ á hverjum tíma fyrir sig sé kjörinn á meðal allra félagsmanna ASÍ, enda þarf forsetinn að hafa gríðarlega sterkt félagslegt umboð á bak við sig. Með allsherjarkosningu er óhætt að segja að forsetinn myndi njóta slíks umboðs. Það var hins vegar dapurlegt að miðstjórn Alþýðusambands Íslands hafnar þessari tillögu um aukið lýðræði við kjör á forseta ASÍ og kemur það formanni verulega á óvart að miðstjórn ASÍ skuli ekki vera tilbúin að taka þátt í lýðræðisvakningu almennings í þessu landi.

Einnig leggur félagið fram ályktun um afnám verðtryggingar, en allar skoðanakannanir hafa sýnt að yfirgnæfandi meirihluti vill að þetta óréttlæti í neytendalánum til einstaklinga verði afnumið, enda hefur verðtryggingin leikið skuldsett heimili skelfilega á undanförnum árum og áratugum og farið eins og skýstrókur um íslensk heimili, sogað allan eignarhluta frá heimilunum og fært hann til fjármálafyrirtækja, erlendra vogunarsjóða og þeirra sem eiga fjármagnið hér á landi.

Þriðja tillagan sem félagið leggur fram lýtur að lífeyrismálum, en það er mat stjórnar og trúnaðarráðs VLFA að lífeyriskerfið þurfi að skoða í heild sinni, enda er kerfið ekki sjálfbært eins og það er í dag en lífeyrissjóðskerfið vantar um 700 milljarða til að geta staðið við sínar skuldbindingar og þar af vantar lífeyrissjóði innan ASÍ 119 milljarða. Frá hruni hafa lífeyrissjóðir innan ASÍ skert réttindi sinna félagsmanna um 130 milljarða króna vegna þess gríðarlegs taps sem varð á eignarsafni sjóðanna á hrunárunum og er þessi niðurskurður gerður til að laga tryggingafræðilegan halla sjóðanna. Eins og áður sagði þá vantar 119 milljarða til viðbótar til að kerfið standi undir sér. Á þeirri forsendu þarf svo sannarlega að endurskoða þetta kerfi algjörlega frá grunni. Bara til að fólk átti sig á þeirri gríðarlegu skerðingu sem orðið hefur á lífeyrisréttindum félagsmanna innan ASÍ frá hruni þá nemur þessi skerðing 14 milljörðum meira en allur niðurskurður íslenska ríkisins frá hruni, en sá niðurskurður nemur 116 milljörðum. En hér er verið að tala um niðurskurð í heilbrigðiskerfinu, menntakerfinu, löggæslunni o.s.frv. Á þessu sést að sjálfbærni lífeyrissjóðakerfisins er ekki til staðar eins og það er í dag enda vantar eins og áður hefur komið fram 700 milljarða til að kerfið geti staðið við skuldbindingar sínar gagnvart sjóðsfélögum.

Það vekur hins vegar umtalsverða furðu hjá formanni félagsins að af 50 aðildarfélögum ASÍ virðist einungis eitt stéttarfélag hafa skilað tillögum að lagabreytingum og ályktunum inn á þetta þing, en það er Verkalýðsfélag Akraness sem það gerði og á allar þrjár tillögurnar sem verða til umfjöllunar á þessu þingi. Formaður spyr sig, hví koma engar tillögur og ályktanir frá öðrum félögum ASÍ, er það einfaldlega vegna þess að reynslan sýnir að ef tillögurnar þóknast ekki forystu ASÍ, þá fá þær ekkert brautargengi? Alla vega er það mjög undarlegt að aðildarfélögin skuli ekki sjá sig knúin til að leggja fram ályktanir á þriggja daga þingi ASÍ eins og t.d. um skuldavanda heimilanna, lágmarkslaun, þær skefjalausu verðhækkanir sem almenningur hefur mátt þola o.s.frv.

Forsvarsmann Hagsmunasamtaka Heimilanna óskuðu eftir því að funda með formanni félagsins og að sjálfsögðu varð formaðurinn við þeirri beiðni og fór fundurinn fram í morgun. Það er óhætt að segja að þetta hafi verið afar ánægjulegur og gagnlegur fundur, en umræðuefnið á fundinum var að Verkalýðsfélag Akraness og Hagsmunasamtök Heimilanna samræmi krafta sína í þeim dómsmálum sem HH og VLFA eru nú að fara að höfða vegna hugsanlegs ólögmætis verðtryggingarinnar.

Hagsmunasamtök heimilanna hafa nú þegar stefnt Íbúðalánasjóði og verður það mál þingfest 18. október nk., en stefnan þeirra byggist á því hvort verðtrygging á Íslandi standist lög um um neytendalán nr. 121/1994 eður ei. Sú málsókn sem Verkalýðsfélag Akraness undirbýr mun snúa m.a. að því hvort verðtrygging á Íslandi standist lög um verðbréfaviðskipti nr. 108/2007 og tilskipun Evrópuréttar. En í þessum lögum eru svokölluð MiFID tilskipun, þar sem talað er um að ekki sé heimilt að lána flókna fjármálagerninga, svokallaðar afleiður, til einstaklinga.

Því ber að fagna innilega að Hagsmunasamtökin og VLFA ætli að láta að reyna á lögmæti verðtryggingar á mismunandi forsendum, enda gríðarlega mikilvægt að látið verði reyna öll hugsanlega lögbrot er lúta að verðtryggingunni, enda eru forsvarsmenn Hagsmunasamtaka Heimilanna og formaður VLFA algerlega sammála því að hér sé um að ræða eitt brýnasta hagsmunamál íslenskra heimila. Enda hefur verðtryggingin farið eins og skýstókur um íslensk heimili og sogað allan eignarhluta í burtu frá heimilunum og fært hann yfir til fjármálafyrirtækja, erlendra vogunarsjóða og þeirra sem eiga fjármagnið í þessu landi.

Það var samróma álit fundarmanna að Hagsmunasamtök heimilanna og Verkalýðsfélag Akraness ætla að vinna náið saman í þessum dómsmálum og nýta og miðla upplýsingum til hvors annars, enda er það sameiginlegt hagsmunamál beggja aðila að farsæl lausn fáist í þetta brýna hagsmunamál heimilanna.

Frá hruni hefur orðið umtalsverð lýðræðisvakning á meðal almennings hér á landi og hefur ákall frá þjóðinni hvað aukið lýðræði varðar verið mjög áberandi á liðnum árum. Það hefur verið ákall á meðal hins almenna félagsmanns innan ASÍ að lýðræði í verkalýðshreyfingunni verði aukið og m.a. er lýtur að kjöri forseta Alþýðusambands Íslands, en í dag er kosningafyrirkomulag skv. lögum ASÍ með þeim hætti að hann er kosinn inni á þingum sambandsins á tveggja ára fresti.

Á þessari forsendu ákvað stjórn og trúnaðarráð Verkalýðsfélags Akraness að leggja fram tillögu um lagabreytingu er lýtur að kjöri forseta ASÍ. Lagabreytingin lýtur að því að forseti ASÍ verði kjörinn í allsherjaratkvæðagreiðslu á meðal allra félagsmanna Alþýðusambands Íslands en ekki á lokuðu þingi sambandsins eins og nú er. Í ljósi þessara háværu radda m.a. frá félagsmönnum VLFA um breytingu á kosninu forseta ASÍ ákvað Verkalýðsfélag Akraness að láta Capacent Gallup gera könnun á því hvort vilji væri á meðal almennings til að kjöri forsetans yrði breytt með þeim hætti að hann verði kosinn í allsherjaratkvæðagreiðslu.

Spurningin sem lögð var fyrir í þessari skoðanakönnun hljóðaði með eftirfarandi hætti: Vilt þú að lögum ASÍ verði breytt þannig að kosið verði um forseta ASÍ í allsherjarkosningu á meðal félagsmanna ASÍ, eða lög ASÍ verði óbreytt þannig að forseti ASÍ verði kosinn á þingi ASÍ? Niðurstaðan var afgerandi, en 87,6% af þeim sem tóku afstöðu vilja að forsetinn verði kosinn í allsherjarkosningu og að lögunum verði breytt. Einungis 12,4% vilja óbreytt fyrirkomulag. Skýrara getur þetta vart orðið, viljinn um lýðræðisaukningu innan ASÍ kom skýrt fram í þessari skoðanakönnun.

Það voru mikil vonbrigði með umsögn miðstjórnar Alþýðusambands Íslands varðandi þessa tillögu, en miðstjórn Alþýðusambandsins hafnar þessari tillögu að lagabreytingu um að forsetinn verði kosinn í allsherjaratkvæðagreiðslu, en fram kemur í umsögn miðstjórnar að það fyrirkomulag að forseti sambandsins verði kjörinn í leynilegri atkvæðagreiðslu allra þingfulltrúa á þingum ASÍ samræmist best hlutverki hans innan skipulags ASÍ. Það er formanni VLFA hulin ráðgáta hví miðstjórn leggst gegn þessari tillögu í ljósi þeirrar bláköldu staðreyndar að það er gríðarlega mikilvægt fyrir forseta ASÍ á hverjum tíma fyrir sig að hafa sterkt félagslegt umboð sinna félagsmanna á bak við sig og slíkt gerist svo sannarlega með breytingu á lögum um að forsetinn verði kjörinn í allsherjarkosningu á meðal allra félagsmanna ASÍ. Í dag eru um 100.000 innan ASÍ, en það kosningafyrirkomulag sem nú er við lýði gerir það að verkum að einungis 0,30% félagsmanna ASÍ kjósa sér sinn forseta. Slíkt er ólíðandi að mati stjórnar og trúnaðarráðs VLFA.

Hins vegar trúir formaður VLFA ekki öðru en að þingfulltrúar Alþýðusambandsins muni leggja þessari lagabreytingu lið, í ljósi áðurnefndrar skoðanakönnunar og þeirri lýðræðisvakningu sem er í íslensku samfélagi um þessar mundir.

Í morgun komu í heimsókn á skrifstofu félagsins tveir nýráðnir starfsmenn Starfsgreinasambands Íslands, þau Drífa Snædal framkvæmdastjóri og Árni Steinar Stefánsson sérfræðingur. Þetta var afar ánægjuleg heimsókn, enda stóð hún yfir í um tvo tíma. Rætt var um hin ýmsu mál er lúta að hagsmunum íslensks launafólks sem og mikilvægi verkalýðshreyfingarinnar og síðast en ekki síst starfsemi Starfsgreinasambands Íslands.

Starfsfólk skrifstofu Verkalýðsfélags Akraness þakkar þeim Drífu og Árna kærlega fyrir ánægjulega heimsókn og vonar að samskiptin við þau verði jafn ánægjuleg í náinni framtíð og þessi heimsókn, en það er ljóst að vel fór á með starfsfólki VLFA og starfsmönnum SGS í þessari heimsókn.

Kjarasamningur Sjómannasambands Íslands við Landssamband smábátaeigenda um kaup og kjör smábátasjómanna var samþykktur með 64,3% atkvæða en 35,7% greiddu atkvæði gegn samningnum. Verkalýðsfélag Akraness er aðili að Sjómannasambandinu og vel á fjórða tug smábátasjómanna sem eru í VLFA munu taka laun eftir þessum samningi.

Þetta er mikill áfangasigur því smábátasjómenn eru nánast eina stéttin á Íslandi sem ekki hefur notið þeirra mannréttinda að hafa í gildi kjarasamning sem tryggir þeim lágmarksréttindi við sín störf. Á þeirri forsendu fagnar VLFA þessum samningi innilega því nú er komin samningur sem tryggir þessi lágmarkskjör og í komandi kjarasamningum verður eðli málsins samkvæmt hægt að byggja enn frekar ofan á þennan samning með hagsmuni smábátasjómanna að leiðarljósi.  

 Kosningu er nú lokið um kjarasamning Sjómannasambands Íslands annars vegar og Landssambands smábátaeigenda hins vegar en samningurinn var undirritaður þann 29. ágúst sl. Hægt er að skoða samninginn hér.

Þeir smábátasjómenn sem tilheyra Verkalýðsfélagi Akraness kusu um samninginn með póstatkvæðagreiðslu og var kosningaþátttakan 67%.

Ekki er ennþá ljóst hvernig atkvæði féllu, því atkvæði frá landinu öllu verða talin saman í húsakynnum Ríkissáttasemjara á morgun. Fréttir af niðurstöðu kosningarinnar verða birtar hér á heimasíðunni um leið og talningu er lokið.

Formaður hélt í morgun fyrirlestur í Háskóla Íslands fyrir nemendur Gylfa Dalmanns Aðalsteinssonar, en fyrirlesturinn laut að verkalýðshreyfingunni og verkefnum henni tengdri. Formaður fór víða yfir í fyrirlestri sínum, fjallaði m.a. um verkalýuðshreyfinguna, lífeyrissjóðina og stöðu og framtíð verkalýðshreyfingarinnar í heild sinni.

Þetta er í þriðja sinn sem formaður félagsins heldur slíkan fyrirlestur um starfsemi verkalýðshreyfingarinnar og það er óhætt að segja að á þessum fyrirlestrum fái formaður fjölda spurninga er lúta að starfsemi stéttarfélaganna og tilgangi þeirra. Það er mikill heiður fyrir Verkalýðsfélag Akraness að háskólasamfélagið skuli leita til félagsins um að halda slíka fyrirlestra og kann félagið þakkir fyrir að fá tækifæri til að koma sjónarmiðum sínum á framfæri við þá sem eru í námi tengdu vinnumarkaðsfræðum í Háskóla Íslands.

Stjórn og trúnaðarráð Verkalýðsfélags Akraness samþykkti í kvöld að láta á það reyna fyrir dómstólum hvort að verðtrygging hér á landi standist lög. Eins og öllum er kunnugt lét VLFA gera lögfræðilegt álit á því hvort verðtrygging hér á landi stæðist íslensk lög og var niðurstaða þess álits sú að verulegur vafi léki á slíku.

Félagið mun kosta þennan málarekstur og eru nú þegar hafnar viðræður við lögfræðistofu um að reka þetta mál fyrir dómstólum. Það liggur nú þegar fyrir að óskað verður eftir flýtimeðferð hjá dómstólum vegna þessa máls enda eru miklir almannahagsmunir í húfi hvað þetta varðar. Einnig er mjög mikilvægt að dómstólar skeri fljótt og vel úr um það hvort að verðtryggingin standist lög eður ei í ljósi þeirra staðreynda að margir aðilar sem hafa tjáð sig opinberlega draga það verulega í efa að verðtrygging á neytendalánum standist lög.

Það er engum vafa undirorpið að verðtryggingin hefur leikið íslensk heimili skelfilega á liðnum árum og sem dæmi þá hafa verðtryggðar skuldir heimilanna hækkað um uppundir 400 milljarða frá 1. janúar 2008 til dagsins í dag. Og bara í dag var tilkynnt að neysluvísitalan hefði hækkað um 0,76% á milli mánaða sem þýðir að verðtryggðar húsnæðisskuldir landsmanna hækkuðu í síðasta mánuði um 11 milljarða króna. Það er sama upphæð og er áætlað að framkvæmdirnar við Vaðlaheiðagöng  kosti. Það er einnig rétt að upplýsa að meðalverðtryggð skuld íslenskra heimila í dag er í kringum 22 milljónir króna, sem þýðir að slík lán hafi hækkað um 167 þúsund krónur á milli mánaða. Það sér hvert einasta mannsbarn hverslags miskunnarlaust óréttlæti það er að varpa allri ábyrgð verðtryggingarinnar á skuldsett heimili á meðan lánveitendur eru tryggðir í bak og fyrir.

Ástæðan fyrir því að Verkalýðsfélags Akraness ætlar að fara í þennan málarekstur er einnig að nú er orðið deginum ljósara að íslensk stjórnvöld ætla sér ekki að leiðrétta þá stökkbreyttu hækkun sem orðið hefur á verðtryggðum húsnæðislánum frá hruni heldur hafa stjórnvöld tekið ákvörðun um að slá skjaldborg um fjármálastofnanir, erlenda vogunarsjóði og aðra aðila sem fjármagnið eiga í þessu landi.

Það er heldur ekki hægt að horfa upp á það að verðtryggingin fari eins og skýstrókur um íslensk heimili og sogi allan eignarhluta í burtu og færi hann yfir til fjármálastofnana og erlendra vogunarsjóða og á sama tíma sé íslenskum heimilum fórnað á altari verðtryggingarinnar. Það er hins vegar sorglegt til þess að vita að verðtryggingin skuli vera varin meðal annars af stjórnvöldum svo ekki sé nú talað um forystu Alþýðusambands Íslands í þessum efnum. Það á að vera hlutverk ASÍ að gæta hagsmuna sinna félagsmanna og VLFA telur að hvergi séu eins miklir hagsmunir fyrir alþýðu þessa lands eins og að tekið verði á verðtryggingu á neytendalánum.

Stjórn og trúnaðarráð Verkalýðsfélags Akraness er afar stolt af því að ætla sér að keyra þetta brýna hagsmunamál fyrir alþýðu þessa lands í gegnum dómstóla og mun félagið fylgja þessu máli eftir af fullum þunga og vonandi kemst niðurstaða í það hvort verðtryggingin sé lögleg eða ekki eins fljótt og mögulegt er.