Strax eftir helgi verður gengið frá fyrstu úthlutun umsókna um dvöl í orlofshúsum félagsins í sumar. Þeir sem ekki hafa þegar skilað inn umsókn geta gert það um helgina, annað hvort á Félagavefnum eða skilað umsókninni í bréfalúguna á Sunnubraut 13.  

Starfsfólk skrifstofu VLFA mun hefjast handa við úthlutun strax á mánudagsmorgun og verður úthlutun lokið fljótlega eftir hádegi. Nánari reglur um úthlutun er að finna hér. Allir umsækjendur fá sent bréf þar sem fram kemur hvort einhver vika hafi fallið í þeirra skaut eður ei, en notendur Félagavefs geta séð bókun á vefnum sínum eftir hádegi á mánudag, hafi þeir hlotið orlofshús í sumar.

Á kaffistofu Verkalýðsfélags Akraness skapast oft fjörugar umræður og þar eru allir velkomnir sem vilja. Á þessum árstíma, þegar frambjóðendur ríða um héruð og heimsækja fyrirtæki til að kynna sig og sín málefni vill umræðan á kaffistofunni óneitanlega snúast um kosningarnar sem framundan eru. Ekki er verra þegar frambjóðendur líta við í kaffi og taka þátt í umræðunni eins og þeir gera gjarnan.

Í dag komu í heimsókn á skrifstofu félagsins frambjóðendur Regnbogans, en það er nýtt framboð sem býður fram á landsvísu. Það voru þau Jón Bjarnason, alþingismaður og fyrrv. sjávarútvegs- og landbúnaðarráðherra, og Arnþrúður Heimisdóttir, tamningakona og kennari frá Langhúsum Fljótum sem litu við fyrr í dag og áttu gott spjall á kaffistofunni. Formaður félagsins notaði tækifærið og kom á framfæri við frambjóðendur að brýnasta hagsmunamál íslenskra heimila væri afnám verðtryggingar og leiðrétting þess forsendubrests sem hrunið olli. Um þetta hefur stjórn og trúnaðarráð Verkalýðsfélags Akraness ítrekað ályktað og hefur lagt fram slíkar ályktanir á öllum þingum og hvar sem því hefur verið við komið síðan árið 2008.

Formaður félagsins hefur verið að fara víða og halda erindi er lúta að afnámi verðtryggingar og skuldavanda íslenskra heimila. Hefur hann meðal annars haldið erindi fyrir Framsóknarflokkinn og Sjálfstæðisflokk og framundan eru fundir hjá Dögun og Flokki heimilanna.

Eins og fram hefur komið hér á heimasíðunni eru ályktanir stjórnar- og trúnaðarráðs Verkalýðsfélags AKraness afdráttarlausar hvað þessi málefni varðar. Frá árinu 2009 hefur VLFA lagt fram fjölmargar tillögur og ályktanir um afnám verðtryggingar og leiðréttingu á þeim skelfilega forsendurbresti sem heimilin urðu fyrir. Í þessum ályktunum hefur einnig verið kveðið skýrt á um að setja verði vaxtaþak á húsnæðislán til heimilanna.

Í gær var haldinn gríðarlega fjölmennur fundur hjá framsóknarmönnum í Garðabæ og hélt formaður VLFA erindi þar. Á meðal ræðumanna voru auk formanns Ólafur Arnarson ritstjóri Tímaríms, Eygló Harðardóttir oddviti í Kraganum og formaður Framsóknarflokksins Sigmundur Davíð Gunnlaugsson.

Formaður VLFA fór víða yfir í erindi sínu og kom meðal annars fram að brýnasta hagsmunamál íslenskra heimila og alþýðu þessa lands væri að afnema verðtryggingu á neytendalánum, leiðrétta forsendubrest heimilanna og að þak verði sett á húsnæðislán. Það kom einnig fram í máli formanns að það þarf að taka af fullum þunga og hörku á erlendu vogunar- og hrægammasjóðunum og nota það svigrúm sem þar er til staðar til að leiðrétta þann miskunnarlausa forsendubrest sem heimilin hafa orðið fyrir. Það virðist ekki lengur vera ágreiningur á meðal manna um að þetta svigrúm verði til staðar heldur virðist ágreiningurinn núna lúta að því í hvað á að nota þetta svigrúm sem næst í samningum við hrægammasjóðina. Formaður sagði að í sínum huga væri það engin spurning að heimilin ættu að vera í algjörum forgangi hvað það svigrúm varðar og nota á það til að leiðrétta forsendubrestinn. Íslensk heimili og alþýða þessa lands hafa þurft að bera afleiðingar hrunsins þar sem ríki, sveitarfélög, tryggingafélög, verslunareigendur, orkufyrirtæki og aðrir þjónustuaðilar hafa varpað sínum vanda miskunnarlaust yfir á íslensk heimili.

Það kom einnig fram í máli formanns að heimilin eru tannhjól samfélagsins og því er gríðarlega mikilvægt að forsendurbresturinn verði leiðréttur þannig að heimilin fái súrefni á nýjan leik sem mun svo klárlega skila sér í aukinni verslun og þjónustu um leið og skuldafarganinu verður létt af heimilunum.

Það þarf ekki að velkjast í vafa um það að þetta er brýnasta hagsmunamál íslenskrar alþýðu og krafa kjósenda er skýr. Afnemið verðtryggingu og leiðréttið forsendubrest heimilanna. Annað verður ekki við unað.

Fjölmargir fundarmenn óskuðu eftir að formaður myndi setja þær glærur sem hann var með á fundinum hér inn á heimasíðuna. Í ljósi þess að hann á eftir að halda nokkur erindi á fleiri fundum verður beðið með það þar til þeim er lokið af kurteisi við þá sem eiga eftir að hlýða á erindið. Þegar fundunum er lokið sem formaður hefur gefið loforð fyrir að tala á munu þessar glærur verða settar inn á heimasíðuna þar sem þær verða aðgengilegar öllum.

Verksmiðja Elkem Ísland á GrundartangaEins og fram hefur komið hér á heimasíðunni ákvað Verkalýðsfélag Akraness að stefna Elkem Ísland í ljósi þeirrar staðreyndar að þar er að störfum verktaki í daglegum störfum inni á athafnasvæði verksmiðjunnar og njóta starfsmenn umrædds verktaka ekki þeirra kjara sem um er getið í kjarasamningi Elkem Ísland. Á grundvelli þessa átti formaður VLFA fund með lögmanni félagsins þar sem hafinn var undirbúningur að því að stefna Elkem Ísland fyrir félagsdóm þar sem að Elkem hefur neitað félaginu um að ganga frá samkomulagi þar sem skýrt verði kveðið á um að verktökum sem starfi inni á svæðinu allt árið um kring séu tryggð þau kjör sem kveðið er á um í kjarasamningi Elkem Ísland.

Þessu hafnaði Elkem Ísland eins og áður sagði og vísaði þess í stað á kjarasamning á hinum almenna vinnumarkaði en í þeim samningi eru kjör langtum lakari heldur en gengur og gerist í stóriðjusamningunum almennt. Nægir til dæmis að nefna að dagvinnutími í stóriðjunum er 156 stundir en 173 stundir á hinum almenna vinnumarkaði. Þessu til viðbótar njóta starfsmenn stóriðja desember- og orlofsuppbóta sem eru mun hærri en á hinum almenna vinnumarkaði svo ekki sé talað um veikinda- og slysarétt.

Á þessari forsendu sér félagið sig knúið til þess að tryggja það að verktakar sem starfa inni á athafnasvæðum stóriðjanna allt árið um kring alla daga ársins komi ekki inn á svæðið og gjaldfelli áðurnefnd kjör. Þetta eru grafalvarleg tíðindi fyrir þá starfsmenn sem starfa í stóriðjunum því ef þetta er túlkun forsvarsmanna Elkem Íslands, að hægt sé að fá verktaka til að vinna dagleg störf og láta kjarasamninga á hinum almenna vinnumarkaði gilda, þá er verið að ógna atvinnu og kjörum þeirra sem starfa í þessum stóriðjum gífurlega. Um leið er einnig verið að gjaldfella þá kjarabaráttu sem unnin hefur verið á liðnum árum og áratugum og þeim umtalsverða árangri sem náðst hefur varðandi bætt kjör í stóriðjunum.

Því er engin undankomuleið fyrir VLFA að mæta þessu af fullri hörku og verður það í fyrsta gang gert fyrir félagsdómi. Ef svo óheppilega vildi til að málið myndi tapast fyrir félagsdómi þá er morgunljóst að kjör starfsmanna í stóriðjunum verður að tryggja með afgerandi hætti í komandi kjarasamningum. Það er einnig ljóst að félagið mun aldrei skrifa undir kjarasamning þar sem opið verður fyrir að hægt sé að láta utanaðkomandi verktaka ganga í dagleg störf starfsmanna í stóriðjum á allt öðrum kjörum en um hefur verið samið í þessum fyrirtækjum.

Í ljósi þess að nú eru einungis 24 dagar í Alþingiskosningarnar eru frambjóðendur stjórnmálaflokkanna farnir að láta vel heyra í sér og eins og undanfarin ár þá koma þingmenn og frambjóðendur oft í heimsókn á skrifstofu Verkalýðsfélags Akraness. Að sjálfsögðu taka starfsmenn VLFA ávallt vel á móti öllum frambjóðendum sem óska eftir því að koma í heimsókn á skrifstofuna og var engin undantekning á því þegar frambjóðendur Framsóknarflokksins, þau Ásmundur Daði Einarsson og Elsa Lára Arnardóttir, litu við í kaffispjall fyrr í dag.

Það er alltaf gaman þegar frambjóðendur sjá sér fært að koma í heimsókn og eðli málsins samkvæmt voru komandi kosningar mikið til umræðu og m.a. kosningaloforð framsóknarmanna um að afnema verðtrygginguna og leiðrétta þann skelfilega forsendubrest sem heimilin urðu fyrir. Enda er það mat formanns og ályktun stjórnar og trúnaðarráðs félagsins, að áðurnefnd mál séu eitt brýnasta hagsmunamál sem íslensk alþýða stendur nú frammi fyrir.

Formaður á von á því að fleiri frambjóðendur muni koma í heimsókn á næstu dögum, enda er alltaf gaman að taka þátt í umræðu er lýtur að hagsmunum íslensks launafólks og íslenskrar alþýðu, enda reynir félagið að leggja sig í líma við að tryggja hagsmuni íslensks launafólks eins vel og kostur er og er óhrætt við að koma þeim skilaboðum á framfæri við verðandi þingmenn þessarar þjóðar.

Aðalfundur Verkalýðsfélags Akraness verður haldinn í kvöld á Gamla Kaupfélaginu kl. 18. Það er afar ánægjulegt að segja frá því að rekstur félagsins á liðnu ári gekk frábærlega og var rekstrarafgangur af heildarsamstæðu félagsins rétt tæpar 90 milljónir króna. Það skýrist að hluta til af fjölgun félagsmanna en á milli ára fjölgaði þeim um tæplega 300 manns. Iðgjöldin jukust samhliða því um tæpar 22 milljónir á milli ára.

Eins og áður sagði var rekstrarafgangur af öllum sjóðum félagsins en það er stefna stjórnar VLFA að láta félagsmenn ætíð njóta ávöxtunar af góðri afkomu félagsins. Sem dæmi þá hækkaði stjórn félagsins fæðingarstyrkinn í fyrra um 100% og í ár ætlar stjórnin að taka upp styrk vegna tannlækninga frá og með 1. maí næstkomandi.  Sá styrkur fellur undir styrk vegna heilsufarðsskoðunar, nemur 50% af reikningi og er að hámarki 20.000 kr.

Stjórnin hvetur félagsmenn til að mæta á aðalfundinn því það skiptir máli að félagsmenn láti sig starf félagsins varða. Að afloknum venjubundnum aðalfundarstörfum mun félagið bjóða upp á lambalæri að hætti Gamla Kaupfélagsins með öllu tilheyrandi.  

Verksmiðja Elkem Ísland á GrundartangaEins og fram hefur komið hér á heimasíðunni hefur Verkalýðsfélag Akraness í hyggju að stefna Elkem Ísland vegna þess að verktaki sem er að vinna inni á athafnasvæði Elkem á Grundartanga hefur ekki getað sýnt fram á að starfsmenn hans séu að starfa eftir þeim kjarasamningum sem á svæðinu gilda. Verkalýðsfélag Akraness sendi forsvarsmönnum Elkem Ísland erindi þar sem þess var krafist að fyrirtækið upplýsti eftir hvaða kjarasamningi umræddur verktaki væri að vinna enda er himinn og haf á milli þeirra kjara sem kveðið er á um í kjarasamningnum á hinum almenna vinnumarkaði og kjara stóriðjusamninganna.

Félaginu barst svar frá forsvarsmönnum Elkem þar sem fram kom að umræddir starfsmenn verktakafyrirtækisins væru að taka laun eftir kjarasamningi á hinum almenna vinnumarkaði. Sá samningur er eins og áður sagði langtum lakari heldur en kjarasamningur Elkem Ísland við Verkalýðsfélag Akraness. Á þessari forsendu bauð Verkalýðsfélag Akraness Elkem Ísland að leysa málið með því að gengið yrði frá samkomulagi þar sem skýrt yrði kveðið á um að umræddir verktakar sem ynnu inni á athafnasvæði Elkem Ísland allt árið um kring myndu taka laun samkvæmt kjarasamningi Elkem Ísland. Félagið getur aldrei sætt sig við að verið sé að ógna starfskjörum starfsmanna Elkem með þeim hætti að hægt sé að taka inn verktaka á svæðið í dagleg störf sem kveða á um langtum lægri kjör og réttindi heldur en kveðið er á um í stóriðjusamningunum. Það tók forsvarsmenn Elkem viku að svara erindi félagsins og var því algjörlega hafnað. Þetta er grafalvarlegt mál vegna þess að ef fyrirtæki telur að hægt sé að fá verktaka inn á svæðið sem er að starfa allt árið um kring á miklu lakari kjörum heldur en kveðið er á um í stóriðjusamningunum þá er verið að stefna atvinnuöryggi og atvinnukjörum starfsmanna í stóriðjum í stórhættu.

Þessu verður mætt af fullri hörku og meðal annars liggur fyrir að þetta mál mun fara fyrir félagsdóm. Það liggur einnig fyrir að Verkalýðsfélag Akraness mun ekki undir neinum kringumstæðum skrifa undir samning í komandi kjarasamningum þar sem ekki verður tryggt að þau kjör sem um hefur verið samið inni á athafnasvæði Elkem Ísland gildi fyrir alla sem þar starfa. Það er rétt að geta þess að VLFA er ekki að tala um eða krefjast þess að launakjör Elkem Ísland gildi fyrir verktaka sem koma tímabundið inn á svæðið í mjög skamman tíma heldur einungis verktaka sem eru að starfa allt árið inni á athafnasvæði fyrirtækisins og ganga í dagleg störf starfsmanna Elkem Ísland.

Hér er áratugalöng kjarabarátta í húfi því ef þetta verður látið átölulaust þá er verið að stefna atvinnuöryggi og kjörum þeirra sem starfa í stóriðjunum í stórhættu eins og áður sagði. Það er einnig mikilvægt fyrir forsvarsmenn Elkem Ísland að átta sig á því að það hefur verið gagnkvæmur skilningur á því að í stóriðjunum gilda betri kjör, bæði vegna þess að um mjög krefjandi störf getur verið að ræða sem og vegna þeirra ívilnana sem fyrirtækin hafa fengið i gegnum áratugina, meðal annars í formi jákvæðs raforkuverðs. Ef menn ætla að rjúfa þetta samkomulag þá getur það aldrei kallað á annað heldur en grjótharða afstöðu stéttarfélagana sem eiga aðild að þessum samningum. Eitt er víst, að VLFA er klárt í þann slag.  

Formaður VLFA hélt erindi hjá Kiwanis á Akranesi í gærÍ gær hélt formaður félagsins erindi fyrir Kiwanis félaga á Akranesi en þeir höfðu óskað eftir því að hann myndi halda erindi varðandi verðtrygginguna, skuldavanda heimilanna og lífeyrissjóðina. Það er óhætt að segja að erilsamt hafi verið hjá formanni varðandi það að flytja erindi á fundum sem þessum enda hefur hann meðal annars haldið fjölmörg slík erindi hjá stjórnmálaflokkum sem og hinum ýmsu félagasamtökum.

Sem dæmi hefur hann haldið fyrirlestur hjá Lions félögum í Hafnarfirði, hjá Rotary og Lionsmönnum á Akranesi og á fimmtudaginn í síðustu viku var hann á fjölmennum fundi í Reykjanesbæ þar sem fjallað var um þá stöðu sem þar er eins og greint hefur verið frá hér á heimasíðu félagsins. Það er óhætt að segja að dagskrá formanns hvað þetta varðar sé nokkuð þéttskipuð en fyrir liggur að hann mun halda tvö erindi fyrir Framsóknarflokkinn og einnig fyrir Dögun í aprílmánuði.

Fundurinn í gær var mjög góður og fjölmargar áhugaverðar og gagnlegar spurningar voru lagðar fyrir formanninn. Ekki var annað að heyra á fundarmönnum en að þeir væru sammála um að taka þyrfti á vanda verðtryggingarinnar og þeim skuldavanda sem heimilin standa frammi fyrir. Einnig bar lífeyrissjóðina töluvert á góma á þessum fundi enda þónokkuð margir fundarmenn sem eru byrjaðir að taka út lífeyri og voru ekki á eitt sáttir með hvernig það hefur verið að virka til þessa.  

Formanni VLFA var boðið að flytja erindi á opnum fundi í Reykjanesbæ sem Hagsmunasamtök heimilanna héldu í gær. Á þessum fundi voru auk formanns frambjóðendur allra flokka ásamt bæjarstjóra Reykjanesbæjar og sýslumannsins þar. Umræðuefnið á fundinum var verðtryggingin, skuldavandi heimilanna og síðast en ekki síst það skelfingarástand sem ríkir í atvinnumálum á Reykjanesi.

Það var afar athyglisvert að hlusta á ræðu bæjarstjórans þar sem fram kom í máli hans að í raun og veru væri atvinnuleysi á Suðurnesjum allt að 20% þó skráð atvinnuleysi væri 9,5% því gríðarlegur fjöldi hefur lokið bótarétti sínum og flutt úr landi. Það kom fram í máli hans að félagsaðstoð á vegum bæjarins hafi aukist gríðarlega.

Formaður sagði í erindi sínu að Suðurnesjamenn ættu samúð hans alla yfir því skelfingarástandi sem ríkti á þessu svæði. Tók hann sem dæmi að skráð atvinnuleysi á Suðurnesjum væri 9,5% en á Vesturlandi væri það 3,3% og það þætti mönnum samt sem áður of hátt. Hvergi annarsstaðar er meira atvinnuleysi eða fleiri nauðungarsölur á fasteignum en á Suðurnesjum. Formaður talaði hátt og skýrt um mikilvægi þess að afnema verðtryggingarvítisvélina sem er að ganga frá íslenskum heimilum dauðum enda væri verðtryggingin búin að fara eins og skýstrókur um íslensk heimili og soga allan eignarhluta frá heimilunum og færa hann yfir til fjármálafyrirtækja og erlendra vogunarsjóða. Formaður sagði að leiðrétting á skuldavanda heimilanna, afnám verðtryggingar og það að koma tannhjólum atvinnulífsins af stað á nýjan leik væru brýnustu hagsmunamál íslenskrar alþýðu og um þessi mál yrði svo sannarlega kosið í komandi kosningum.

Formaður var ekki að skafa af því þegar kom að því að ræða það skefjalausa dekur sem hefur viðgengist gagnvart fjármálakerfinu og nefndi sem dæmi að búið væri að setja fram 427 milljarða til bjargar fjármálakerfinu og því væri dapurlegt að heyra stjórnmálamenn og sérhagsmunagæslumenn öskra lýðskrum og spyrja hver eigi að borga þegar talað væri um að leiðrétta forsendubrest íslenskra heimila. Formaður sagði að ekki hafi heyrst hósti eða stuna frá þessum aðilum þegar 427 milljarðar voru lagðir á herðar alþýðunnar og einnig nefndi formaðurinn að þessir sömu aðilar víluðu það ekki fyrir sér að tala um að leggja jafnvel hundruði milljarða á íslenska skattgreiðendur vegna Icesave samninganna á sínum tíma.

Formaður kom einnig inn á hversu gríðarlega mikilvægt það væri fyrir Suðurnesjamenn að koma starfseminni í Helguvík á fulla ferð. Formaður fór yfir þau launakjör sem eru við lýði í stóriðjum hér á landi og tók skýrt fram að þau launakjör væru umtalsvert betri en gengur og gerist á hinum almenna vinnumarkaði. Hann sagði einnig að það væri óskiljanlegt að menn væru ekki búnir að leggja allan sinn kraft og þunga í að koma þessari framkvæmd á laggirnar enda er Helguvík líflína Suðurnesjamanna. Nefndi hann sem dæmi að ef stóriðjunnar á Grundartanga nyti ekki við þá væri hann sannfærður um að það væri nánast hægt að slökkva ljósin á Akranesi, pakka saman og flytja eitthvert annað. Svo mikið vægi hefur stóriðjan á Grundartanga fyrir lífsafkomu Akurnesinga og þeirra sem búa í nærsveitum þar.

Þetta var hörkugóður fundur, mörg góð erindi, flottar spurningar og í mörgum tilfellum flottir frambjóðendur. En það sem vakti mesta athygli hjá formanni félagsins var af hverju honum var boðið að sitja þennan fund og flytja erindi í ljósi þess að þetta er ekki félagssvæði formanns VLFA og rétt er að geta þess að hart var lagt að honum að mæta á þennan fund. Það vakti líka athygli hans að hann sá ekki formenn annarra stéttarfélaga á þessum fundi þó svo að fjölmargir Suðurnesjamenn væru á fundinum og umræðuefnið væri afar brýnt fyrir hagsmuni launafólks og skuldsettra heimila.  

Það er svosem ekki orðin nein nýlunda að umræðan um stóriðjurnar hér á landi eigi undir högg að sækja hvað almenningsálitið varðar. Það skal algjörlega viðurkennast að formanni VLFA finnst þessi umræða oft á tíðum vera afar óvægin gagnvart þessum mikilvægu störfum sem unnin eru í stóriðjunni. En nú er Norðurál á Grundartanga sakað um það að reyna að koma sér hjá því að greiða skatta hér á landi með einhverjum bellibrögðum eins og fram kom í Kastljósi í gær.

Það er best að byrja á því að rifja upp starfsemi Norðuráls hér á landi. Norðurál hóf starfsemi hér árið 1998 og var framleiðslugeta fyrirtækisins 60 þúsund tonn og um 160 manns störfuðu hjá fyrirtækinu á upphafsárinu. Frá þeim tíma hefur verið botnlaus uppbygging hjá fyrirtækinu sem hefur gert það að verkum að fyrirtækið framleiðir nú um 290 þúsund tonn af áli og hjá fyrirtækinu starfa um 600 manns auk 1000 afleiddra starfa.

Rétt er að geta þess að þessa dagana eru gríðarlegar framkvæmdir hjá Norðuráli á Grundartanga sem munu standa í ein þrjú ár og eru þessar framkvæmdir einar af fáum á landinu sem nú eru í gangi. En þessar fjárfestingarframkvæmdir hjá Norðuráli á Grundartanga nema um 4 milljörðum króna bara á þessu ári en áætlað er að heildarkostnaðurinn við þær næstu 3 árin verði um 11 milljarðar króna. Á þessu sést hversu gríðarlega atvinnuskapandi þetta fyrirtæki er fyrir okkur Akurnesinga og þjóðarbúið í heild sinni nýtur góðs af.

Það er ýjað að því að Norðurál sé ekki að greiða neinn tekjuskatt hér á landi en það liggur fyrir að frá árinu 2009 hefur Norðurál greitt 3,4 milljarða í tekjuskatt og bara á síðasta ári greiddi fyrirtækið 1,6 milljarð í tekjuskatt. Auk þess hefur fyrirtækið greitt 1,2 milljarð í fyrirframgreiddan tekjuskatt en það var gert samkomulag við stjórnvöld um þennan fyrirframgreidda skatt vegna bágrar stöðu þjóðarbúsins. Þessu til viðbótar er fyrirtækið að greiða 300 milljónir í fasteigna- og hafnargjöld á hverju einasta ári svo ekki sé talað um skatttekjur sem ríki og sveitarfélög fá vegna þeirra starfsmanna sem starfa hjá fyrirtækinu en sá skattur er um 1 milljarður króna á ári.

Það er þyngra en tárum taki að lesa ummæli eftir Björn Val Gíslason, formann fjárlaganefndar, þar sem hann segir að það sé ekki rétt að Norðurál meðal annars hafi greitt tekjuskatt hér á landi. Eins og áður sagði þá greiddi Norðurál bara á síðasta ári 1,6 milljarð auk 400 milljóna í fyrirframgreiddan skatt og því er það með ólíkindum að heyra formann fjárlaganefndar saka Norðurál um að greiða ekki tekjuskatt hér á landi. Fáfræði formanns fjárlaganefndar ríður ekki við einteyming.

Það er óhætt að segja að Verkalýðsfélag Akraness hafi tekið margar syrpurnar við forsvarsmenn Norðuráls þegar kemur að því að semja um kaup og kjör. Það þekkja þeir sem hafa tekið þátt í þeim kjarasamningsviðræðum með formanni félagsins enda hefur mikið gengið á við kjarasamningsgerðina, jafnvel hurðum skellt og hart tekist á. En alltaf hefur verið komist að niðurstöðu þar sem undirritaðir hafa verið kjarasamningar. Í því samhengi er rétt að geta þess að laun og önnur kjaraatriði  í stóriðjunum eru umtalsvert betri en gengur og gerist á hinum almenna vinnumarkaði. Ástæðan fyrir því er sú að afkoma þessara fyrirtækja hefur verið mjög góð og þetta eru krefjandi störf sem unnin eru í stóriðjunum. Verkafólk sem hefur starfað hjá Norðuráli í 3 ár er með í heildarlaun með öllu í vaktavinnu fyrir 184 klukkustundir 505 þúsund krónur. Iðnaðarmenn á vöktum eru með 650 þúsund krónur í laun. Formaður félagsins fullyrðir að þeirri baráttu við að bæta kjör þessa fólks enn frekar sé hvergi nærri hætt því alltaf má gera betur. En formaður fullyrðir að þessi starfskjör bjóðast ekki á hinum almenna vinnumarkaði. Einnig er rétt að geta þess að í síðustu samningum var samið um svokallaðan stóriðjuskóla sem mun geta gefið starfsmönnum að loknu námi allt að 9% viðbótar launahækkun.

Það er orðið dapurlegt fyrir starfsmenn sem vinna í þessum stóriðjum að þurfa að lesa og hlusta stanslaust á neikvæða umræðu í garð þessara fyrirtækja. Á þeirri forsendu sá formaður sig knúinn til að skrifa þennan pistil, starfsmönnunum til varnar. Það er mikilvægt fyrir okkur Íslendinga að átta okkur á því að við byggjum okkar velferðarsamfélag upp á því að skapa hér gjaldeyristekjur. Það eru þrjár atvinnugreinar sem skapa um 90% þessara gjaldeyristekna, það er að segja sjávarútvegur, ferðaþjónusta og síðast en ekki síst stóriðjufyrirtækin. Þessum fyrirtækjum þarf að skapa þannig rekstrarskilyrði að þau geti vaxið og dafnað sem leiðir svo af sér hærri laun þeirra starfsmanna sem starfa hjá þeim og fjölgun starfa en ekki fækkun.

Við Akurnesingar gerum okkur algjörlega grein fyrir mikilvægi stóriðjunnar hér á Akranesi enda er nánast morgunljóst að ef að stóriðjunnar nyti ekki við þá væri hægt að slökkva ljósin hér á Akranesi og pakka saman. Svo mikilvæg er þessi starfsemi fyrir samfélagið á Akranesi og það þekkja allir þeir sem búa þar og í nærsveitum. Því biður formaður þá aðila sem tala niður þessa starfsemi að tala af ögn meiri virðingu fyrir þeim störfum sem þetta ágæta fólk sinnir dags daglega til að skapa hér gjaldeyristekjur fyrir íslenskt samfélag.  Gjaldeyristekjur sem hjálpa til við að halda úti löggæslu, mennta- og heilbrigðiskerfi hér á landi.