Það er óhætt að segja að það ríki algjört neyðarástand hjá íslenskum heimilum um þessar mundir. Nú liggja fyrir nýjar tölur um að fjármálastofnanir þessa lands hafi leyst til sín 4.290 íbúðir frá 1. janúar 2009 sem gerir 86 íbúðir á mánuði eða sem nemur rétt tæpum fjórum íbúðum hvern virkan dag á þessu tímabili. Já takið eftir, tæpar 4 íbúðir leysa fjármálastofnanir hér á landi til sín hvern einasta virka vinnudag ársins. Ugglaust fá fjölskyldur í einhverjum tilfellum að vera áfram í íbúðunum sem leigjendur til að þær lendi ekki beint á götunni en þetta eru skelfilegar tölur og sýnir í hvers lags gríðarlegri neyð íslensk heimili eru um þessar mundir vegna hrunsins.

Skiptingin á milli þeirra fjármálastofnana sem um ræðir og hafa leyst til sín skuldsett húsnæði landsmanna er eftirfarandi:

Samtals eru þetta eins og áður sagði 4.290 íbúðir sem fjármálastofnanir þessa lands hafa leyst til sín frá 1. janúar 2009. Á þessum tölum sést það skelfingarástand sem hér ríkir hjá íslenskum heimilum. Ég spyr mig hvað það kosti fjármálakerfið að leysa þessar íbúðir til sín og hvað það muni kosta að halda áfram að gera ekki neitt fyrir íslensk heimili. Þetta sýnir líka svo ekki verður um villst að allt tal um að gera ekki neitt fyrir skuldsett heimili er algjörlega ábyrgðarlaust enda ljóst að kostnaðurinn við að gera ekki neitt getur orðið mun meiri heldur en að grípa til róttækra aðgerða til bjargar íslenskum heimilum.

Formaður spyr sig hvernig geta stjórnmálamenn leyft sér að eyða tíma sínum í umræður á Alþingi um mál sem eru ekki nærri því eins mikilvæg og sú blákalda staðreynd að íslenskum heimilum er að blæða út eins og þessar tölur sýna svo ekki verður um villst.

Rétt er að geta þess að íslensk heimili bera ekki nokkra ábyrgð á þessu hruni og því er það þyngra en tárum taki að horfa upp á þær afleiðingar sem heimilin þurfa að sitja uppi með vegna afleiðinga hrunsins sem stjórnmálamenn og fjárglæframenn bera fyrst og fremst ábyrgð á.

Formaður vill segja við stjórnmálamenn: Vaknið! Þið getið ekki látið það átölulaust að verið sé að bera fjórar fjölskyldur út á hverjum einasta virka degi án þess að lyfta svo mikið sem litla fingri þessu fólki til bjargar. Þetta er brýnasta hagsmunamál íslensks samfélags í dag og það á að setja öll önnur mál á ís á meðan leyst er úr þessum vanda.

Það er nefnilega hægt að rifja það upp fyrir stjórnmálamenn sem koma nú og segja að það sé lýðskrum að ætla að koma íslenskum heimilum til hjálpar að það er búið að leggja á herðar íslenskra skattgreiðenda 427 milljarða til bjargar fjármálakerfinu vegna hrunsins. Sem dæmi þurftu íslenskir skattgreiðendur að greiða 16 milljarða bara í vaxtagjöld vegna endurreisnar fjármálakerfisins á síðasta ári. Og ugglaust er sú tala enn hærri á þessu ári. Því er það nöturlegt og dapurlegt að vita til þess að stjórnmálamenn skuli tala um lýðskrum þegar talað er um að koma íslenskum heimilum til hjálpar í ljósi áðurnefndra staðreynda.  

Eins og fram hefur komið í fréttum er Verkalýðsfélag Akraness ásamt öðrum aðildarfélögum innan ASÍ í átaki gegn verðhækkunum og var almenningur hvattur til að vera á varðbergi undir kjörorðinu Vertu á verði. Þessari áskorun tók maður að nafni Reynir Ásgeirsson í Kópavogi svo sannarlega enda hefur hann gert ítarlega verðkönnun og kannað verð á rúmlega 170 vöruflokkum í 7 verslunum. Verkalýðsfélag Akraness vill taka það fram að þessi könnun er alfarið á ábyrgð þess sem hana framkvæmdi en er frábært innlegg í þá baráttu að benda almenningi á hvar hagkvæmast er að framkvæma sín matarinnkaup. Hægt er að skoða þessa viðamiklu verðkönnun hér.

Hægt er að hafa samband við Reyni Ásgeirsson sem framkvæmdi þessa viðamiklu könnun í síma 8638826 eða á netfanginu This email address is being protected from spambots. You need JavaScript enabled to view it. ef að menn vilja koma með ábendingar til hans. En Verkalýðsfélag Akraness þakkar Reyni kærlega fyrir þetta þarfa framtak sem klárlega getur nýst neytendum mjög vel.  

Nú er framtalsaðstoð í fullum gangi á skrifstofu Verkalýðsfélags Akraness og er hún vel nýtt eins og undanfarin ár, en þessi þjónusta hefur verið í boði fyrir félagsmenn án endurgjalds síðan árið 2004. Það er Björg Bjarnadóttir sem sér um þessa þjónustu.

Framtalsaðstoðin verður í boði eins lengi og þörf er á, en síðasti dagur til að skila framtali er 21. mars. Þeir sem þurfa frest geta sótt um hann á www.skattur.is og getur hann lengstur orðið til 3. apríl. Hægt er að bóka tíma í framtalsaðstoð í síma 4309900.

Það er óhætt að segja umtalsverð reiði ríki á meðal starfsmanna Klafa, en það fyrirtæki sér um allar upp- og útskipanir fyrir Norðuráli og Elkem Ísland á Grundartangasvæðinu. Þann 1. mars síðastliðinn var starfsmönnum Klafa tilkynnt að Elkem Ísland hafi sagt upp þjónustusamningi við Klafa, en talað er um að þessi verkþáttur verði boðinn út í lokuðu útboði. Starfsmönnum var jafnframt tilkynnt um að til einhverra uppsagna myndi koma vegna þessa, en rétt er að geta þess að Klafi er í 50% eigu Elkem Ísland og 50% í eigu Norðuráls.

Það er þyngra en tárum taki að Elkem Ísland hefur í síauknum mæli boðið út hina ýmsu þætti í starfseminni sem unnir eru dags daglega á svæðinu, en það er m.a. að mati félagsins algerlega óheimilt. Það er grafalvarlegt mál þegar  launakjör sem ríkja á stóriðjusvæðinu eru gjaldfelld með þessari verktakavæðingu, en í stóriðjunum hafa í gegnum tíðina boðist umtalsvert betri laun en gengur og gerist á hinum almenna vinnumarkaði. Það er alveg ljóst að í kjarasamningum, bæði Klafa og Elkem Ísland, er skýrt kveðið á um að samningurinn taki til framleiðslu, viðhalds, skrifstofu og annarra þjónustustarfa í verksmiðju félagsins á Grundartanga, eða starfa sem eru keypt frá utanaðkomandi verktökum enda hafi þeir kaup og kjarasamning við verkalýðsfélögin. Verkalýðsfélag Akraness hefur sterkan grun um að núna sé verktakafyrirtæki að vinna dags daglega inni á svæðinu sem hafi ekki í gildi samning um kaup og kjör, eins og kveðið er á um að til þurfi þegar unnið er inni á athafnasvæði Elkem Ísland. Á þessari forsendu mun félagið stefna Elkem Ísland fyrir brot á kjarasamningi, fyrir að ráða verktaka sem ekki hefur í gildi kjarasamning vegna þeirra starfa sem umræddur verktaki sinnir á svæðinu dags daglega.

Það er sorglegt til þess að vita að margt bendir til þess að verktakar séu að reyna að gjaldfella þau kjör sem gilda á svæðinu, til að ná verkefnum yfir til sín og að sjálfsögðu verður því mætt af fullri hörku. Enda hafa stéttarfélögin þurft að hafa mikið fyrir því að ná þessum kjörum sem eru umtalsvert betri en gengur og gerist á hinum almenna vinnumarkaði og undirboð verktaka í þau störf verða ekki liðin, svo mikið er víst.

Nægir að nefna í þessu samhengi að starfsmenn sem vinna við ræstingar, þvottahús og í mötuneyti hjá Elkem Ísland á Grundartanga og tilheyrðu fyrirtækinu hér á árum áður, og fengu áður launahækkanir til samræmis við aðra starfsmenn Elkem Ísland, hafa núna eftir að fyrirtækið bauð þennan verkþátt út þurft að sæta því að tapa tugum þúsunda á mánuði. Skýringin felst í því að þessir starfsmenn hafa einungis fengið þær launahækkanir sem um hefur verið samið á almennum vinnumarkaði en ekki þær hækkanir sem um hefur verið samið fyrir starfsmenn stóriðja, en þær hækkanir eru langtum meiri en um hefur verið samið á almennum vinnumarkaði og munar eins og áður sagði tugum þúsunda á mánuði. Það er nöturlegt til þess að vita að forsvarsmenn Elkem Ísland hafi boðið út áðurnefnda verkþætti með þessum kjaraskerðingum sem umræddir starfsmenn hafa orðið fyrir, enda er það ætíð þannig að það er ráðist á þá sem síst skyldi þegar kemur að því að leita hagræðingar í rekstri.

Það er gríðarlega mikilvægt fyrir alla sem starfa hjá Elkem Ísland að átta sig á því að þetta er ekki einkamál starfsmanna Klafa eða þeirra sem starfa í mötuneyti fyrirtækisins að fyrirtækið sé nú að verktakavæða hin ýmsu störf. Þetta getur leitt til gjaldfellingar þeirrar áralöngu baráttu um hin ýmsu kjör sem á svæðinu gilda. Á þessari forsendu verða allir sem einn að setja hælana niður og koma í veg fyrir þessi áform, því formaður spyr sig: hvað ætla forsvarsmenn fyrirtækisins að verktakavæða næst? Ofnana? Starfsemina í filter? Eða eitthvað annað? Félagið mun mæta þessu af fullri festu og mun stefna Elkem Ísland fyrir félagsdóm vegna brota á kjarasamningi eins og áður hefur verið getið, enda mun félagið hvergi hvika frá því að verja réttindi starfsmanna sem vinna á svæðinu og verður öllum aðferðum beitt til þess.

Nú stendur yfir hátindur loðnuvertíðar en í gær byrjaði hrognataka og unnið er á vöktum allan sólarhringinn. Einnig er búin að vera veruleg törn hjá síldarbræðslufólkinu undanfarna daga en nú er verið að landa úr Faxa RE. Um leið og löndun úr honum verður lokið mun taka við löndun úr aflaskipinu Víkingi AK100 en hann liggur nú við höfn gjörsamlega smekkfullur og bíður löndunar.

Á yfirstandandi vertíð verða veidd um eða yfir 500 þúsund tonn og má áætla að aflaverðmæti þessarar vertíðar verði á bilinu 25-30 milljarðar króna en það eru svona verðmæti sem skila íslensku þjóðarbúi gjaldeyristekjum, gjaldeyristekjum sem gera það að verkum að við getum haldið uppi velferðarsamfélagi. Á þeirri forsendu er nöturlegt til þess að vita að verðtryggðar skuldir heimilanna skuli hafa hækkað um jafnmikið og þessi vertíð mun skila íslensku þjóðarbúi í gjaldeyristekjur. Það hlýtur hver og einn einasti Íslendingur að sjá að það er galið þegar verðtryggðar skuldir heimilanna hækka um 23 milljarða á einum mánuði og enginn virðisauki eða verðmætasköpun liggur að baki slíkri skuldaaukningu.

Eins og undanfarin ár býður Verkalýðsfélag Akraness upp á aðstoð við gerð einfaldra skattframtala og eru félagsmenn nú þegar byrjaðir að skrá sig. Aðstoðin hefst mánudaginn 11. mars og stendur til föstudagsins 22. mars. Á þeirri forsendu er gríðarlega mikilvægt að félagsmenn panti sér tíma sem fyrst en á undanförnum árum hafa á annað hundrað manns nýtt sér þessa aðstoð félagsins á hverju ári. Hægt er að panta tíma með því að hringja á skrifstofu félagsins í síma 4309900 eða koma við þar.  

Afstaða stjórnar og trúnaðarráðs Verkalýðsfélags Akraness hvað varðar verðtrygginguna og kröfu um leiðréttingu á skuldavanda íslenskra heimila er hvellskýr. Á síðasta þingi ASÍ í október lagði stjórn og trúnaðarráð félagsins til dæmis fram ályktun um afnám verðtryggingar á neytendalánum til einstaklinga og að þak yrði sett á húsnæðisvexti til íslenskra heimila. Einnig var kveðið á um í þessari ályktun að stjórnvöld beittu sér fyrir því að leiðrétta þann skelfilega forsendubrest sem íslensk heimili urðu fyrir í kjölfar hrunsins vegna verðtryggingarinnar. Á þessu sést hver stefna Verkalýðsfélags Akraness er í þessum málum og þessu til viðbótar er félagið nú að láta reyna á lögmæti verðtryggingar fyrir Héraðsdómi Reykjavíkur.

Það er engum blöðum um það að fletta að verðtryggingin hér á landi er að ganga af íslenskum heimilum dauðum en nú í febrúarmánuði liggur fyrir að neysluvísitalan er að hækka um 1,64% sem þýðir að verðtryggðar skuldir íslenskra heimila munu hækka um allt að 23 milljarða og það einungis á 28 dögum. Þetta er álíka há upphæð og loðnuvertíðin sem stendur nú sem hæst mun skila íslenska þjóðarbúinu. Formaður VLFA hefur verið að kalla eftir því hjá stjórnmálamönnum í hverju þessi verðmætasköpun upp á 23 milljarða hækkun á verðtryggðar skuldir heimilanna er fólgin. Öll sjáum við raunverulega verðmætasköpun í kjölfar loðnuvertíðarinnar en það mun skila okkur gjaldeyristekjum inn í okkar samfélag. En það er formanni hulin ráðgáta í hverju þessi verðmætasköpun upp á 23 milljarða er fólgin. Það er líka rétt að benda á að meðalverðtryggðar húsnæðisskuldir í dag hjá heimilunum nema um 22 milljónum sem þýðir að höfuðstóll slíkra lána er að hækka um, takið eftir, 360 þúsund krónur og það einungis á þessum 28 dögum.

Já formaður félagsins talar algjörlega í anda samþykktar félagsins hvað varðar afnám verðtryggingar og skuldavanda heimilanna enda er það skoðun félagsins eins og áður sagði að verðtryggingarvítisvélin sé að ganga frá íslenskum heimilum dauðum. Það verður að afnema verðtrygginguna en samhliða því verður að setja vaxtaþak á húsnæðislán og einnig finna leið til að leiðrétta títtnefndan forsendubrest sem heimilin urðu fyrir. Það er mat formanns að öll orðræða stjórnmálaflokka um að draga úr vægi verðtryggingar sé til þess fallin að slá ryki í augu almennings með það að markmiði að viðhalda hér verðtryggingu um ókomin ár. Þess vegna ítrekar Verkalýðsfélag Akraness afstöðu sína um að afnema verður verðtryggingu á neytendalánum til heimila án tafar.   

Vertu á verði!  – stöndum saman og rjúfum vítahring verðbólgunnar

Verkalýðsfélag Akraness og önnur stéttarfélög innan ASÍ hefja í dag átak gegn verðhækkunum undir yfirskriftinni – Vertu á verði. Almenningur og atvinnulífið eru hvött til að taka höndum saman og rjúfa vítahring verðbólgunnar. Átakinu er ætlað að veita fyrirtækjum og stofnunum aðhald í verðlagsmálum og vekja neytendur til aukinnar vitundar.

Á heimasíðu átaksins www.vertuaverdi.is geta allir sent inn ábendingar um verðhækkanir á fljótlegan og einfaldan hátt. Þannig getum við sameiginlega skapað mikilvægt aðhald, meðvitund og umræðu um verðlagsmál.

Það er hagsmunamál okkar allra að vera á verði og láta vita.

Verðbólgan versti óvinur launafólks

Launafólk er langþreytt á að hóflegar launahækkanir sem samið er um í kjarasamningum séu sífellt notaðar til að réttlæta miklar verðhækkanir og aukna verðbólgu. Við endurskoðun kjarasamninga nú í janúar lögðu fulltrúar launafólks mikla áherslu á að samstaða yrði meðal fyrirtækja og opinberra aðila um að sýna aðhald í verðhækkunum svo nýtilkomnar launahækkanir skili sér í auknum kaupmætti launafólks.

Eins og fram hefur komið hér á heimasíðunni þá hefur hefur Verkalýðsfélag Akraness ákveðið að gera sína eigin verðkönnun til viðbótar þessu átaki þar sem fylgst verður með verðlagsþróun árfjórðungslega. En niðurstaða í þeirri könnun verður birt hér á heimasíðunni.

Allir þurfa nú að taka höndum saman – sýna ábyrgð og stöðva verðhækkanir – það gagnast okkur öllum.

Sameiginlegur aðalfundur Almennrar deildar, Opinberrar deildar, Iðnsveinadeildar, Stóriðjudeildar og Matvæladeildar Verkalýðsfélags Akraness var haldinn á Gamla Kaupfélaginu miðvikudaginn 20. febrúar síðastliðinn.

Góð mæting var á fundinum og fór formaður félagsins yfir helstu atriði í starfi VLFA undanfarið ár. Á fundinum urðu smávægilegar breytingar á stjórn félagsins en tveir nýir stjórnarmenn voru kosnir. Hafþór Pálsson var kosinn inn í stjórn almennrar deildar og Bjarki Þór Aðalsteinsson var kosinn í stjórn Stóriðjudeildar. Að fundinum loknum var boðið upp á pizzuveislu og súpu fyrir fundargesti.

Karlpeningurinn á skrifstofu Verkalýðsfélags Akraness þjófstartaði konudeginum í dag og gerði vel við samstarfskonur sínar á ýmsa lund. Var þeim boðið upp á dýrðlegan hádegisverð á kaffistofunni og allar fengu þær blóm að gjöf. Voru þær að vonum kátar með þetta hugulsama framtak.

Að sögn fulltrúa kvenþjóðarinnar á skrifstofu VLFA er komin hefð á það að haldið sé upp á konudaginn og bóndadaginn á skrifstofunni á einhvern hátt og telja þær karlpeninginn á Sunnubrautinni hafa staðið sig óvenju vel í ár.