Samninganefnd Sementsverksmiðjunnar hefur vísað kjaradeilu sinni við Samtök atvinnulífsins til ríkissáttasemjara. Kjarasamningur starfsmanna Sementsverksmiðjunnar rann út 1. desember sl. en viðræður við SA um nýjan kjarasamning hafa ekki gengið sem skyldi hingað til.
Samninganefndin hefur átt nokkra fundi með fulltrúum Samtaka atvinnulífsins að undanförnu en eins og áður hefur komið fram hafa þær viðræður ekki borið árangur. Krafa starfsmanna Sementsverksmiðjunnar hljóðar uppá sambærilegar launahækkanir og um samdist hjá Elkem Ísland.
Ríkissáttasemjari hefur boðað deiluaðila til fundar á morgun í húsakynnum sáttasemjara og hefst fundurinn kl. 14.00
Eins og fram hefur komið hér á heimasíðunni þá hefur Verkalýðsfélag Akraness verið að vinna að lausn á kjarasamningi starfsmanna Klafa en þeir sjá um upp- og útskipanir á Grundartangasvæðinu ásamt því að þjónusta eigendur sína sem eru Elkem Ísland og Norðurál en hvort fyrirtæki um sig á 50% í Klafa.
Krafa félagsins hefur verið skýr, að starfsmenn Klafa fái sambærilegar launahækkanir og um samdist hjá Elkem Ísland í desember sl. en sú hækkun hljóðaði upp á 17-18% við undirskrift samningsins. Það hefur einnig komið fram hér á heimasíðunni að starfsmenn Klafa eru fyrrverandi starfsmenn Elkem Ísland og á þeirri forsendu er afar erfitt að veita einhvern afslátt af þeim kröfum sem lagðar hafa verið fram.
Ríkissáttasemjari hefur tekið þá ákvörðun að leggja fram innanhúss sáttatillögu á fundi á miðvikudaginn og hefur hann verið að ráðfæra sig við deiluaðila. Er það mat félagsins að full ástæða sé til að skoða þá tillögu sem sáttasemjari er að vinna að. Á fundinum á miðvikudaginn mun það koma í ljós hvort deiluaðilar munu ná saman eða ekki og vill formaður ekki hugsa þá hugsun til enda ef niðurstaða fæst ekki í þetta mál á miðvikudaginn kemur því þá er ljóst að deilan er komin í algert öngstræti.
Um 100 manns mættu á mótmælafund sem haldinn var á Akratorginu á Akranesi í dag. Tilefni fundarins var að mótmæla því grafalvarlega ástandi sem nú ríkir í íslensku atvinnu- og efnahagslífi. Þau sem stóðu fyrir þessum fundi voru Anna Lára Steindal og Kristinn Pétursson. Sá síðarnefndi hélt ræðu þar sem hann fordæmdi það aðgerða- og úrræðaleysi sem ríkt hefur hjá stjórnvöldum frá hruni bankanna.
Skipuleggjendur fundarins óskuðu eftir því að formaður Verkalýðsfélags Akraness myndi flytja ræðu á fundinum og að sjálfsögðu varð formaður félagsins við þeirri ósk. Í ræðu formanns kom m.a. fram að það væri frábært að sjá þann árangur sem mótmælin á höfuðborgarsvæðinu væru búin að skila, en eins allir vita þá eru miklar líkur á að það verði kosið til Alþingis 9 maí n.k.
Það kom einnig fram í ræðu formanns að draga þyrfti þá aðila innan fjármálakerfisins sem mögulega bera ábyrgð á því ástandi sem nú ríkir í íslensku samfélagi til ábyrgðar og einnig þá aðila innan stjórnsýslunnar sem brugðist hafa sínu eftirlitshlutverki.
Formaður félagsins sagði að lokum í sinni ræðu að þau gildi sem ríkt hafa í íslensku samfélagi á liðnum árum og áratugum þurfi að heyra sögunni til. Þau gildi sem um ræðir lúta að græðgi, sérhagsmunagæslu og hroka í garð almennings. Það þarf að taka upp ný gildi í íslensku samfélagi, gildi sem lúta jöfnuði, réttlæti og virðingu.
Formenn aðildarfélaga Alþýðusambands Íslands komu saman til fundar kl. 11 í morgun á Grand Hóteli þar sem til umræðu var endurskoðunarákvæði í kjarasamningum á hinum almenna vinnumarkaði. En eins og fram kom á miðstjórnarfundi ASÍ í fyrradag þá er vilji hjá miðstjórninni fyrir því að fresta viðræðum um endurskoðun kjarasamninga fram í júní.
Slíkt myndi hafa í för með sér að þær launahækkanir sem eiga að taka gildi 1. mars nk. eins og 13.500 kr. taxtahækkun og almenn launahækkun upp á 3,5% myndu frestast um 4 mánuði.
Fram kom í máli forseta Alþýðusambands Íslands að hann skynji að atvinnurekendur hafi jafnvel í huga að segja kjarasamningunum upp þegar að endurskoðun kemur ef ekki næst samkomulag um frestun á endurskoðuninni. Einnig kom fram í máli forseta að SA sé ekki búnið að taka neina ákvörðun ennþá, en að þetta sé krafa sem hann hafi heyrt.
Það fór ekkert á milli mála á fundinum í dag að það eru afar skiptar skoðanir um hvað gera skuli og t.a.m. kom fram í máli einstakra fundarmanna að það verði einfaldlega að koma í ljós hvort atvinnurekendur ætli sér ekki að standa við þann kjarasamning sem undirritaður þann 17. febrúar sl. Krafa okkar eigi hins vegar sú að kjarasamningurinn verði framlengdur óbreyttur og þannig staðið við þær umsömdu launahækkanir sem í honum er kveðið á um.
Formaður Verkalýðsfélags Akraness tók til máls á fundinum og kom fram í hans máli að hann dragi í efa að fulltrúar ASÍ í forsendunefnd hafi heimild til að ákvarða breytingar á kjarasamningi til lækkunar. Formaður lagði til að ef það verður lagt í þá vegferð að fresta endurskoðunarákvæði og umsömdum launahækkunum þá verði skýlaust að leggja það undir þá félagsmenn sem vinna eftir umræddum kjarasamningum, annað standist hreinlega ekki neina skoðun. Slíkt myndi gera það að verkum að það verða félagsmennirnir sjálfir sem taka ákvörðun um að fresta umsömdum launahækkunum, en ekki fámennur hópur innan verkalýðshreyfingarinnar.
Það kom líka fram í máli formanns að krafa almennings í þessu landi er sú að viðhöfð séu lýðræðisleg vinnubrögð og breytt siðferði og á þeirri forsendu ber verkalýðshreyfingunni skylda til þess að leggja slíkar veigamiklar breytingar á kjarasamningi undir alla félagsmenn sína sem vinna eftir áðurnefndum samningum.
Það skynja allir afar erfiða stöðu atvinnulífsins um þessar mundir en það er mat formanns að það gleymist oft að heimilin eiga einnig í gríðarlegum erfiðleikum um þessar mundir og því verði þær umsömdu hækkanir sem eiga að koma til handa okkar fólki samkvæmt kjarasamningi að taka gildi 1. mars eins og um var samið.
Boðað hefur verið til mótmælafundar á Akratorgi kl. 17:00 í dag.
Vegna þess skelfilega ástands sem nú ríkir í íslensku efnahags- og atvinnulífi eru félagsmenn hvattir til að mæta og sýna stuðning í verki.
Í gær fundaði samninganefnd stéttarfélaganna með forsvarsmönnum Norðuráls í húsakynnum ríkissáttasemjara vegna breytinga á launum starfsmanna Norðuráls fyrir árið 2009 . Þetta var þriðji fundurinn sem samningsaðilar hafa átt til að leysa úr ágreiningi um hver hækkun til handa starfsmönnum Norðuráls eigi að vera.
Eins og fram hefur komið hér á heimasíðunni þá er kveðið á um í kjarasamningi Norðuráls frá árinu 2005 að laun starfsmanna Norðuráls taki að meðaltali sömu breytingum fyrir árið 2009 og laun samkvæmt kjarasamningum stéttarfélaga og vinnuveitenda í sambærilegum orkufrekum iðnaði.
Skilningur Verkalýðsfélags Akraness og annarra sem sátu í samninganefndinni 2005 var hvellskýr, en hann er sá að átt hafi verið við meðaltalshækkanir hjá Járnblendiverksmiðjunni Elkem Ísland á Grundartanga og álverksmiðjunni Alcan. Samningsaðilar eru búnir að vera að reyna að komast að samkomulagi um hver meðaltalshækkun í þessum fyrirtækjum var en því miður ríkir ágreiningur á milli aðila um hver sú hækkun sé. Byggist sá ágreiningur á því hve mikið laun í þessum verksmiðjum hækkuðu og hvernig slíkur útreikningur eigi að fara fram.
Verkalýðsfélag Akraness og samninganefndin öll hefur farið yfir þessa tvo kjarasamninga og hefur komist að niðurstöðu um hver þessi meðaltalshækkun sé en eins og áður sagði þá ber útreikningum samningsaðila ekki saman. Því miður ber of mikið á milli aðila til að ástæða hafi verið til að halda viðræðum áfram og var niðurstaða samninganefndarinnar sú að málinu yrði vísað til félagsdóms sem mun dæma í málinu.
Verkalýðsfélag Akraness harmar þessa niðurstöðu því það mun verða þess valdandi að starfsmenn munu ekki fá sína umsömdu hækkun fyrr en félagsdómur hefur tekið málið til afgreiðslu, en á þessari stundu liggur fyrir að það geti tekið allt að 4 til 6 mánuði að fá niðurstöðu í málið.
Í gærmorgun var haldinn fundur í aðgerðanefnd sem bæjaryfirvöld Akraneskaupstaðar settu á laggirnar fyrir áramót vegna efnahagshrunsins. Þeir sem skipa nefndina eru Vilhjálmur Birgisson formaður Verkalýðsfélags Akraness, Ólafur Þór Hauksson sýslumaður, Sveinborg Kristjánsdóttir félagsmálastjóri, Gunnar Richardsson frá Vinnumálastofnun, og Helga Gunnarsdóttir framkvæmdastjóri fjölskyldustofu Akraneskaupstaðar.
Nefndin hefur fundað reglulega frá því hún var stofnuð en hlutverk nefndarinnar er að fylgjast með afleiðingum efnahagshrunsins og leita leiða til upplýsa bæjarbúa um þau úrræði sem í boði eru hjá hinum ýmsu stofnunum og félagasamtökum vegna ástandsins í íslensku efnahagslífi.
Fyrir áramót stóð aðgerðanefndin til að mynda fyrir opnum upplýsinga- og fræðslufundi sem bar yfirskriftina Úrræði vegna efnahagsmála.
Á fundinum í gærmorgun var farið yfir stöðuna og kom fram í máli nefndarmanna að allir finna fyrir auknu álagi í störfum sínum vegna þess ástands sem nú ríkir í íslensku efnahagslífi. Fram kom hjá Gunnari Richardssyni forstöðumanni Vinnumálastofnunar að 270 einstaklingar séu á atvinnuleysisskrá á Akranesi en á sama tíma í fyrra voru skráðir 44 einstaklingar.
Einnig var ákveðið á fundinum að reynt verður að bjóða upp á viðtöl á vegum Ráðgjafarstöð heimilanna en gríðarlegt álag er á þeim aðilum sem sjá um ráðgjafastöðina þessa daganna. Að lokum var ákveðið að vinna að því að bjóða uppá fjármálanámskeið í samvinnu þeirra aðila sem koma að þessum aðgerðahóp.
Ólafur Þór Hauksson sýslumaður tilkynnti að þetta væri síðasti fundur sem hann myndi sitja þar sem hann væri að hverfa til annarra starfa tímabundið í tvö ár en sá sem myndi leysa hann af sem sýslumann myndi taka hans sæti. En eins og fram hefur komið fram í fréttum þá hefur Ólafur verið skipaður sérstakur saksóknari vegna efnahagshrunsins.
Fundur var haldinn hjá ríkissáttasemjara í morgun vegna kjarasamnings starfsmanna Klafa, en þeir sjá um upp- og útskipanir á Grundartangasvæðinu. Kjarasamningur Klafa rann út 1. desember sl. og hafa samningsaðilar verið að reyna að ná niðurstöðu um alllanga hríð.
Það er skemmst frá því að segja að náðst hefur samkomulag varðandi nokkur atriði, t.d. um nýtt bónuskerfi en því miður er stóra málið um almenna launahækkun algerlega strand þessa stundina og ákvað ríkissáttasemjari því í morgun að slíta fundi en boðar samningsaðila jafnframt til fundar á morgun kl. 15:00 til að reyna að ná niðurstöðu.
Eins og staðan er núna lítur það alls ekki vel út, en krafa starfsmanna Klafa er sú að fá sömu launahækkun og um samdist hjá starfsmönnum Elkem Ísland sem starfa á sama svæði. Rétt er að minna enn og aftur á að starfsmenn Klafa voru eitt sinn starfsmenn Elkem Ísland, en fyrir örfáum árum síðan var ákveðið að stofna sér fyrirtæki í kringum þá sem störfuðu í flutningadeild fyrirtækisins.
Það er því alveg ljóst að félagið mun ekki geta sætt sig við það að stofnuð séu dótturfyrirtæki í kringum Elkem Ísland sem verði þess valdandi að starfsmenn þeirra sitji eftir í launum miðað við starfsmenn móðurfyrirtækisins.
Í gær var haldinn fundur í húsakynnum ríkissáttasemjara vegna launahækkana hjá starfsmönnum Norðuráls.
Gríðarlegur fjöldi starfsmanna hefur haft samband við formann Verkalýðsfélags Akraness í dag til að fá upplýsingar um gang viðræðnanna og er það ósköp eðlilegt að starfsmenn vilji fá að vita um ganginn á þessum viðræðum.
Það sem hægt er að segja núna um stöðuna er að samningsaðilar eru að reyna eftir fremsta megni að komast að niðurstöðu um hver hækkunin eigi að vera og hafa aðilar einnig verið að fara yfir þá samninga sem gerðir hafa verið nýverið í orkufrekum iðnaði
Enda á hækkun starfsmanna að taka að meðaltali þeim hækkunum sem um var samið í orkufrekum iðnaði. En í kjarasamningi Norðuráls frá árinu 2005 er kveðið á um laun starfsmanna Norðuráls taki að meðaltali sömu breytingum fyrir árið 2009 og laun samkvæmt kjarasamningum stéttarfélaga og vinnuveitenda í sambærilegum orkufrekum iðnaði.
Það er verkefni samningsaðila að finna út og vera sammála um hver meðaltals hækkun í nýgerðum kjarasamningum í orkufrekum iðnaði var og er það sú vinna sem samningsaðilar vinna nú að.
Næsti fundur verður haldinn á miðvikudaginn nk. kl 10:00 og verður hann einnig í húsakynnum sáttsemjara.
Það er mikið annríki hjá félaginu þessa dagana en félagið vinnur nú að lausn á tveimur kjarasamningum, annars vegar málum starfsmanna Norðuráls og hins vegar nýjum kjarasamningi fyrir starfsmenn Klafa.
Í dag verður fundað um launahækkanir hjá starfsmönnum Norðuráls. Hefst sá fundur kl 14:00 í húsakynnum ríkissáttasemjara. Eins fram hefur komið hér á heimasíðunni þá stefna samningsaðilar að því að ná niðurstöðu fyrir 20. janúar nk.
Á mánudaginn verður fundað um nýjan kjarasamning fyrir starfsmenn Klafa og stjórnar ríkissáttasemjari þeim viðræðum, en sá samningur rann út 1. desember á síðastliðnu ári.
Viðræðurnar vegna kjarasamnings Klafa hafa gengið fremur treglega hingað til. Það eru tvö atriði sem standa útaf í viðræðum við Samtök atvinnulífsins vegna Klafa en þau mál lúta að nýju bónuskerfi fyrir starfsmenn Klafa og einnig hver almenn launahækkun skuli vera.
Eins og staðan er í dag þá virðast samningsaðilar vera að ná niðurstöðu varðandi nýtt bónuskerfi, en eftir stendur ágreiningur um hver launahækkunin eigi að vera. En krafa félagsins er sú að laun starfsmanna Klafa skuli taka sömu hækkunum og starfsmenn Elkem Ísland fengu í sínum samningum, enda er um sama vinnusvæði um að ræða.
Í gær var fundað með forsvarsmönnum Norðuráls vegna launahækkana starfsmanna sem taka eiga gildi frá frá 1. janúar 2009.
En eins áður hefur komið fram hér á heimasíðunni þá er kveðið á um í kjarasamningi Norðuráls frá árinu 2005 að laun starfsmanna Norðuráls taki að meðaltali sömu breytingum fyrir árið 2009 og laun samkvæmt kjarasamningum stéttarfélaga og vinnuveitenda í sambærilegum orkufrekum iðnaði.
Ekki náðist niðurstaða á fundinum í gær en á fundinum voru samningsaðilar að fara yfir áðurnefnt ákvæði og skipst var á skoðunum um hvernig túlka eigi ákvæðið.
Skilningur VLFA er að átt sé við Alcan og járnblendiverksmiðjuna Elkem Ísland þegar talað er um að laun starfsmanna Norðuráls taki að meðaltali sömu breytingum fyrir árið 2009 og laun samkvæmt kjarasamningum stéttarfélaga og vinnuveitenda í sambærilegum orkufrekum iðnaði. Það liggur fyrir að starfsmenn Elkem fengu launahækkun frá 17% uppí 18,4% við undirskrift. Samkvæmt upplýsingum frá hagfræðingi ASÍ þá gaf kjarasamningur Alcan eitthvað minna heldur kjarasamningur Elkem.
Samningsaðilar voru sammála um að reyna eftir fremsta megni að vera búnir að ná niðurstöðu um launahækkunina fyrir 20. janúar nk. en næsti fundur verður haldinn á morgun í húsakynnum ríkissáttasemjara.
Fundað var hjá ríkissáttasemjara í gær vegna kjarasamnings starfsmanna Klafa en þeir sjá um út- og uppskipanir á Grundartangasvæðinu. Á fundinum í gær var lögð fram tillaga að nýju bónuskerfi til handa starfsmönnum Klafa og lítur sú tillaga ágætlega út að því frátöldu að félagið hefur gert nokkrar breytingartillögur sem félagið eygir von um að tekið verði tillit til.
Hins vegar gengur aðilum erfiðlega að ná saman hvað varðar launahækkanir en krafa starfsmanna og félagsins er sú að launahækkanir til handa starfsmönnum Klafa verði með sambærilegum hætti og gerðist hjá Elkem Ísland. En samningur Elkem gaf starfsmönnum á bilinu 17-18,4% við undirskrift. Það er krafa sem starfsmenn og félagið munu ekki hvika frá.
Ríkissáttasemjari mun boða til næsta fundar og er sá fundur fyrirhugaður á föstudaginn eða á mánudaginn næstkomandi.
Trúnaðarmenn Sementsverksmiðjunnar funduðu með forsvarsmönnum Samtaka atvinnulífsins á föstudaginn var en kjarasamningur Sementsverksmiðjunnar rann út 1. desember 2008.
Forsvarsmenn Samtaka atvinnulífsins lögðu fram tilboð vegna nýs kjarasamnings og er hann nú til skoðunar hjá trúnaðarmönnum og þeim félögum sem eiga aðild að kjarasamningnum. Fundað verður fljótlega vegna þessa tilboðs sem borist hefur frá Samtökum atvinnulífsins.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
