Verkalýðsfélag Akraness boðar til opins fundar vegna alvarlegrar stöðu kjaraviðræðna. Fundurinn verður haldinn í Bíóhöllinni á Akranesi á morgun, fimmtudaginn 17. febrúar kl. 20.

Á fundinum mun formaður félagsins gera grein fyrir stöðu kjarasamninga og verða fyrirspurnir fundargesta leyfðar. Kaffiveitingar verða í boði að loknum fundinum. Verkalýðsfélag Akraness hvetur alla launþega á hinum almenna vinnumarkaði til að fjölmenna á fundinn og ekki síst þá sem starfa hjá útflutningsfyrirtækjum eins og Elkem Ísland, Klafa ehf, Norðuráli og Síldarbræðslunni. Oft hefur verið þörf á samstöðu en nú er nauðsyn! 

Járnblendiverksmiðjan á GrundartangaÁ miðvikudaginn var haldinn fundur hjá ríksisáttasemjara vegna kjaradeilu Verkalýðsfélags Akraness við Samtök atvinnulífsins vegna kjarasamnings Elkem Íslands og Klafa.

Það er óhætt að segja að þetta hafi verið algjörlega árangurslaus fundur og lítinn sem engan samningsvilja að finna af hálfu Samtaka atvinnulífsins. Samtökin buðu reyndar endurskoðun á bónuskerfinu en grundvallaratriðið var sá málflutningur sem kom fram hjá forsvarsmönnum SA sem byggðist á því að ekki yrði samið við samninganefnd Elkem um launalið samningsins. 

Það kom skýrt fram í máli þeirra að það væri verið að semja um samræmda launastefnu og það væri það sem yrði í boði fyrir starfsmenn Elkem eins og alla aðra launþega. Það er í raun og veru með hreinustu ólíkindum að heyra þennan málflutning í ljósi þeirra staðreynda að með þessum orðum er verið að taka kjarasamningsbundinn rétt starfsmanna Elkem Ísland og færa hann yfir til þriðja aðila sem er í þessu tilfelli Alþýðusamband Íslands.

Verkalýðsfélag Akraness hefur aldrei falið Alþýðusambandi Íslands eða samninganefnd ASÍ að ganga frá kjarasamningum fyrir félagið. Á þeirri forsendu er undarlegt að heyra forsvarsmenn Samtaka atvinnulífsins tilkynna það að það verði einhverjir aðrir sem muni semja um launahækkanir heldur en þeir sem fara með samningsumboðið.

Þetta er náttúrulega ekkert annað en ofbeldi af verstu gerð og reyndar hefur formaður sagt að hann dragi það stórlega í efa að þetta standist lög um stéttarfélög og vinnudeilur, það er að segja, að það eigi að taka kjarasamningsbundinn rétt starfsmanna Elkem og Klafa og semja um hann við aðra heldur en þá sem umboðið hafa.

Kjarni málsins er hins vegar sá að samninganefnd Elkem og Klafa hefur sýnt fullkominn samningsvilja og hafa lagt fram tillögur þar að lútandi en svar Samtaka atvinnulífsins er skýrt: Við ætlum að semja til þriggja ára og við ætlum að semja í anda samræmdrar launastefnu. Þið skuluð hlýða okkur í einu og öllu er það sem má lesa út úr þessum orðum.

Þegar þetta lá orðið fyrir að það væri nánast búið að taka kjarasamningsbundinn rétt af samninganefndinni og færa hann til ASÍ þá var ekkert annað í stöðunni en að slíta viðræðum við Samtök atvinnulífsins og mun verða boðað til fundar með starfsmönnum strax í byrjun næstu viku þar sem ákvörðun verður tekið um hvernig skuli bregðast við þessu. Því miður er æði margt sem bendir til þess að það stefni í hörð átök á þessu svæði. En að sjálfsögðu eru það starfsmennirnir sjálfir sem taka ákvörðun um slíkt en það er mat formanns að þetta ofbeldi sem þessir aðilar sýna sé ekki hægt að líða og er íslensk verkalýðsbarátta nánast í húfi.  

Orlofshús félagsins í Ölfusborgum er laust nú um helgina vegna forfalla. Húsið er nýuppgert og hefur svefnpláss fyrir 7 manns. Húsið í Ölfusborgum er bókað margar vikur fram í tímann, eins og reyndar öll orlofshús félagsins. Félagar geta bókað húsið á félagavefnum en einnig er hægt að koma á skrifstofu félagsins að Sunnubraut 13 eða hringja í síma 430-9900.  

Gríðarleg samstaða og einhugur ríktu á opnum fundi um stöðu kjaramála sem Verkalýðsfélag Akraness hélt í gær í Bíóhöllinni. Formaður félagsins rakti stöðu allra kjarasamninga sem félagið er aðili að og gerði grein fyrir þeirri grafalvarlegu stöðu sem upp er komin í kjaradeilu félagsins við Samtök atvinnulífsins.

Það kom skýrt fram í máli formanns í gær að það er fullur skilningur hjá Verkalýðsfélagi Akraness á að sýna fyrirtækjum sem eiga í erfiðleikum um þessar mundir sökum efnahagshrunsins skilning í komandi kjarasamningum. Nefndi formaðurinn sérstaklega byggingariðnaðinn og Sementsverksmiðjuna í því samhengi. En það kom hins vegar skýrt fram hjá formanni að að sjálfsögðu þurfi þessir aðilar einnig að fá einhverjar launabætur á meðan að þessar greinar vinna sig úr þeim vanda sem þær eiga við að etja þessi misserin. Kjör starfsmanna í þessum atvinnugreinum verður svo að bæta til muna síðar þegar betur árar í viðkomandi greinum.

En það kom hvellskýrt fram hjá formanni VLFA sú skýlausa krafa að atvinnugreinar tengdar útflutningi skili þeim ávinningi sem þær hafa fengið, meðal annars vegna gengisfalls íslensku krónunnar og stórhækkaðs afurðaverðs, með afgerandi hætti í komandi samningnum. Það verður lágmarkskrafa að þeirri kaupmáttarrýrnun sem starfsmenn í útflutningsfyrirtækjum hafa orðið fyrir, verði skilað til þeirra starfsmanna.

Þessi fjölmenni fundur fordæmir vinnubrögð Samtaka atvinnulífsins og forystu ASÍ fyrir þá stefnu sem lýtur að samræmdri launastefnu. Stefnu sem byggist á því að lítið sem ekkert tillit á að taka til sterkrar stöðu útflutningsgreina. Nefndi formaður til dæmis að þau fyrirtæki sem eiga þær síldarbræðslur sem hér eru starfandi skiluðu flest milljörðum í hagnað á starfsárinu 2009. Formaðurinn rakti líka hvernig afurðaverð á mjöli og lýsi hefur stórhækkað og einnig á kísiljárni og áli. Það kom fram í máli formanns að upp undir 70% félagsmanna í VLFA eru starfandi hjá útflutningsfyrirtækjum. Á þeirri forsendu er nöturlegt og dapurlegt að verða vitni að því að Alþýðusamband Íslands skuli taka höndum saman með Samtökum atvinnulífsins til að koma í veg fyrir það að þessar útflutningsgreinar þurfi að hækka laun umfram það sem gerist hjá atvinnugreinum sem eiga í gríðarlegum erfiðleikum.

Að mati fundarmanna eru Þetta vinnubrögð sem eru óskiljanleg. Hví í ósköpunum berst ekki ASÍ af öllum kröftum fyrir því að fordæma þær skefjalausu hækkanir sem dunið hafa á launþegum á liðnum misserum í staðinn fyrir að berjast fyrir því að starfsmenn útflutningsfyrirtækja fái ekki notið þess ávinnings sem fyrirtækin eru að njóta í kjölfar gengisfalls íslensku krónunnar.

Það kom tillaga frá fundarmanni sem lýsti yfir fullum stuðningi við forystu Verkalýðsfélags Akraness í þeirri baráttu sem nú er framundan og var sú tillaga samþykkt með dynjandi lófaklappi fundarmanna. Það er þessi stuðningur sem skiptir forystumenn í stéttarfélögum gríðarlegu máli því án stuðnings launþega eru forystumenn í stéttarfélögum ekkert. Það er æði margt sem bendir til þess að hörð barátta sé framundan fyrir bættum kjörum íslenskra launþega og á þeirri forsendu er gríðarleg þörf á algjörri samstöðu íslenskra launþega. Það þarf að brjóta á bak aftur þessa samræmdu launastefnu þar sem hagsmunum starfsmanna í útflutningsgreinum á að fórna að mati þessara aðila sem um ræðir.

Samninganefnd starfsmanna Norðuráls fundaði með fulltrúum fyrirtækisins og Samtaka atvinnulífsins hjá ríksisáttasemjara í gær. Skemmst er frá því að segja að árangurinn var afskaplega takmarkaður. Það kom skýrt fram í máli fulltrúa Samtaka atvinnulífsins að verið er að semja um launalið samningsins á öðrum stað heldur en á því samningsborði sem það ætti að vera gert eða með öðrum orðum, það er verið að semja við Alþýðusambandið um samræmda launastefnu og það er það sem að á að gilda fyrir starfsmenn Norðuráls.

Það er sorglegt að verða vitni að því að það er búið að taka kjarasamningsbundinn rétt af samninganefnd starfsmanna og færa hann til þriðja aðila sem í þessu tilfelli er forysta ASÍ. En eins og kom fram í fréttum í gær þá vinnur ASÍ að því af fullri hörku að hér verði samið við alla launþega innan ASÍ með sambærilegum launahækkunum þar sem ekkert tillit verður tekið til sterkrar stöðu útflutningsfyrirtækja. Þessu mótmælti formaður Verkalýðsfélags Akraness harðlega á fundinum í gær og fordæmir þessi vinnubrögð enda er það með ólíkindum að það sé verið að taka samningsumboð af samninganefnd starfsmanna og færa það til áðurnefndra aðila.

Formaður lítur á þetta sem forysta ASÍ er að gera sem gríðarlegt skemmdarverk gagnvart þeim starfsmönnum sem starfa í útflutningsfyrirtækjum. Formaður hefur fært rök fyrir því af hverju á að sækja meira á útflutningsfyrirtækin og nægir í þessu samhengi að nefna að álverð heldur áfram að hækka stórkostlega og er það nú komið upp í 2.535 dollara og hækkar nú nánast dag hvern. Þessu til viðbótar hefur gengi dollarans styrkst gagnvart íslensku krónunni sem nemur yfir 90% frá hruni. Því spyr formaður sig að því hví í ósköpunum eigi að setja starfsmenn þessara fyrirtækja undir sömu láglaunastefnuna sem forysta ASÍ berst nú hatrammlega fyrir að farin verði.

Það er líka rétt að geta þess að starfsmenn stóriðjunnar á Grundartanga nutu ekki þess gríðarlega launaskriðs sem varð í kjölfar efnahagsbólunnar en launaskriðið á höfuðborgarsvæðinu á þessu tímabili var allt að 20 - 30%. Starfsmenn stóriðjunnar fá einungis þær launahækkanir sem um semst í kjarasamningum sökum þeirra fastlaunasamninga sem samningarnir byggjast á. Nú er komið að þeim tímapunkti að starfsmenn stóriðjufyrirtækja fari að mótmæla þessum skemmdarverkum sem aðildarfélögin sem eiga aðild að samningnum ástunda undir dyggri aðstoð forystu ASÍ.  

Járnblendiverksmiðjan á GrundartangaFormaður Verkalýðsfélags Akraness hélt tvo fundi með starfsmönnum Elkem Ísland og Klafa í gær og voru fundirnir haldnir á Gamla kaupfélaginu. Fyrri fundurinn var haldinn kl. 13 og mættu á þann fund um 60 manns en síðari fundurinn var haldinn kl. 19 og voru nálægt 70 manns sem mættu á þann fund.

Eins og flestir vita þá er kjaradeila vegna stóriðjusamninganna á Grundartanga komin í algjöran hnút og vinnur félagið nú að því að reyna að koma í veg fyrir hörð átök á þessu svæði. Eins og staðan er núna er því miður fátt sem getur komið í veg fyrir slíkt. Það ríkti gríðarleg samstaða og einhugur á fundinum í gær og kom fram í máli fundarmanna að afstaða forystu ASÍ til þess að sækja meira á fyrirtæki sem hafa hagnast gríðarlega vegna gengisfalls krónunnar og hækkandi afurðaverðs sé óskiljanleg á grundvelli þess að menn berjast hatrammlega fyrir því að þessi fyrirtæki skili ekki þeim ávinningi til sinna starfsmanna.

Það ríkir gremja og reiði á meðal starfsmanna yfir því hvernig forysta ASÍ hefur tekið stöðu gegn starfsmönnum útflutningsfyrirtækja og komu fram hugmyndir á fundinum í gær hvort ekki væri orðið tímabært að Verkalýðsfélag Akraness segði skilið við slík samtök sem vinna gegn hagsmunum starfsmanna útflutningsfyrirtækja. Formaður sagði að vissulega væri sú staða komin upp að menn þyrftu að fara að skoða það alvarlega hvort við ættum samleið með slíkum hagsmunasamtökum launafólks ef hagsmunasamtök skyldi yfir höfuð kalla.

Ríkissáttasemjari hefur boðað til fundar kl. 14 á morgun og er alls ekki ólíklegt að á þeim fundi muni koma í ljós hvort hér stefni til átaka eða ekki. Rétt er að það komi fram að samninganefndin hefur lagt fram ýmsar hugmyndir að lausn á þessu máli á undanförnum fundum án þess að finna fyrir miklum samningsvilja af hálfu Samtaka atvinnulífsins.

Að sjálfsögðu er gríðarlega erfitt að ná saman samningum þegar Samtök atvinnulífsins og ASÍ hafa tekið höndum saman um það að ekki skuli vera tekið tillit til sterkrar stöðu útflutningsfyrirtækja. En það kom skýrt fram á fundinum í gær að starfsmenn munu ekki sætta sig við slíkt ofbeldi af hálfu ofangreindra aðila.

Húsakynni ríkissáttasemjaraÍ gær fundaði formaður félagsins ásamt trúnaðarmönnum Elkem Ísland með forsvarsmönnum Samtaka atvinnulífsins og fyrirtækisins hjá ríkissáttasemjara vegna þeirrar alvarlegu deilu sem nú er uppi vegna kjarasamnings starfsmanna við Samtök atvinnulífsins.

Samninganefndin lagði fram hugmyndir að lausn á deilunni í gær sem er núna til skoðunar hjá okkar viðsemjendum en þetta er lokaatlagan sem Verkalýðsfélag Akraness mun gera til að leysa þessa deilu og ef það ekki tekst þá er nánast óhjákvæmilegt að það muni koma til alvarlegra átaka á Grundartangasvæðinu í kjölfarið.

Ríkissáttasemjari boðaði aftur til fundar í dag vegna þessarar deilu og hefst sá fundur kl. 15 og þá mun samninganefnd félagsins væntanlega fá svör við þeim hugmyndum sem lagðar voru fram í gær. Eins og staðan er núna er formaður hóflega bjartsýnn á að deilan leysist þannig að hægt verði að komast hjá alvarlegum átökum. En samninganefndin hefur svo sannarlega sýnt það í verki að hún er tilbúin til að leggja sitt af mörkum til að forða þessari deilu frá vinnustöðvun.

Í gær var haldinn samningafundur hjá Ríkissáttasemjara vegna kjaradeilu félagsins við Samtök atvinnulífsins vegna Elkem Ísland. Það er skemmst frá því að segja að fundurinn var algjörlega árangurslaus, nokkurs hroka gætti og alls engan samningsvilja var að finna af hálfu Samtaka atvinnulífsins.

Félagið vinnur áfram ötullega að því að finna lausn á þessu grafalvarlega máli, en það er alveg morgunljóst að ástandið nú er afar eldfimt. Samninganefndin í heild sinni leggur sig í líma við að forða þessari deilu frá alvarlegum átökum.

Verkalýðsfélag Akraness fundaði með öllum starfsmönnum Elkem Ísland á mánudaginn var og á þeim fundi var formanni félagsins veitt fullt umboð til að finna farsæla lausn þar sem hagsmunir starfsmanna yrði hafðir að leiðarljósi. Einnig var honum veitt heimild til að gefa sér þann tíma sem hann þyrfti til að finna farsæla lausn á deilunni. Nú er staðan þannig að hugsanlega þarf félagið ögn lengri tíma til að ná niðurstöðu í þessari alvarlegu kjaradeilu enda eru gríðarlegir hagsmunir í húfi ekki bara fyrir starfsmenn heldur í raun og veru fyrir allt þjóðarbúið. 

Það er einnig ljóst að það ofbeldi sem Samtök atvinnulífsins hafa sýnt í þessu máli þar sem rótgrónum stöðugleika á Grundartangasvæðinu er stefnt í algjöra tvísýnu er með hreinustu ólíkindum. Þetta ofbeldi mun Verkalýðsfélag Akraness ekki láta yfir sig ganga enda mun félagið ávalt hafa hagsmuni sinna félagsmanna að leiðarljósi.

Hún var alveg ótrúleg könnunin sem forysta Alþýðusambands Íslands lét gera er laut að samræmdri launastefnu. Formaður félagsins veltir því fyrir sér hver tilgangur forystu ASÍ var með þessari könnun en það er mat formanns að hér hafi ekkert annað legið að baki en að skemma sterka stöðu starfsmanna sem starfa hjá útflutningsfyrirtækjum vegna gríðarsterkrar stöðu þessara fyrirtækja. Spurningin var afar villandi og er þar vægt til orða tekið.

Spurningin hljóðaði með eftirfarandi hætti:

Nú standa yfir viðræður um nýja kjarasamninga. Hvort ertu hlynntari því að verkalýðshreyfingin leggi áherslu á sambærilegar launahækkanir fyrir alla, eða meiri launahækkanir til þeirra sem starfa í útflutningsgreinunum, sem njóta nú góðs af gengi krónunnar?

Könnunin var með þeim hætti að 94% svörðuðu þessari spuringu játandi en einungis 6% neitandi. Eins og áður hefur komið fram var þessi spurning afar villandi og nægir að nefna í því samhengi að ekki kemur skýrt fram hvað átt er við með sambærilegum launahækkunum. Eins og samræmd launastefna hefur verið kynnt þá byggist hún á tvennu, annars vegar á prósentuhækkunum og hins vegar á krónutöluhækkunum. Eins og margoft hefur komið hér fram á heimasíðunni þá myndi þessi samræmda launastefna þýða það, miðað við þau drög sem kynnt hafa verið, að lágtekjufólk væri að fá í kringum 9 þúsund króna hækkun á sínum launatöxtum á meðan að þeir sem starfa ekki eftir taxtakerfi væru að fá upp undir 3,5% launahækkun.

Myndu þeir sem tóku þátt í könnuninni sætta sig við að forseti ASÍ fengi 35 þúsund króna hækkun, framkvæmdastjóri Samtaka atvinnulífsins 60 þúsund króna hækkun og margir aðrir miðstjórnarmenn innan ASÍ væru að fá frá 35 þúsund og upp í 50 þúsund króna hækkun á meðan almennir verkamenn, til dæmis fiskvinnslufólk og verkamenn í stóriðjum, væru að fá 9 þúsund króna hækkun. Hefðu þeir sem tóku þátt í könnuninni greitt atkvæði eins og áður hefur komið fram ef þessar staðreyndir hefðu legið fyrir? Svar formanns við því er nei. Er þetta samræmda launastefnan sem ASÍ vill fara, að slegin verði skjaldborg utan um þá tekjuhæstu?

Á fundi með Samtökum atvinnulífsins vegna launaliðar Norðuráls var það fyrsta sem fulltrúar fyrirtækisins höfðu orð á að 94% sem tóku þátt í könnuninni væru hlynntir samræmdri launastefnu og af þeirri ástæðu vildi fyrirtækið að sjálfsögðu semja á slíkum forsendum.

Það er mat formanns að hér sé um gríðarleg skemmdarverk að ræða af hálfu forystu ASÍ enda eru engar forsendur fyrir því að fyrirtæki starfandi í útflutningi komist hjá því að skila kaupmáttarskerðingunni sem starfsmenn hafa orðið fyrir vegna efnahagshrunsins enda eru útflutningsfyrirtæki að hagnast gríðarlega vegna gengisfalls íslensku krónunnar og vegna stórhækkaðs afurðaverðs. Það er nöturlegt að verða vitni að því að slík könnun sé gerð einvörðungu til að veikja stöðu þeirra sem eru að berjast fyrir því að útflutningsfyrirtæki skili ávinningnum til sinna starfsmanna. Að kosta til könnunar sem kostar jafnvel hundruðir þúsunda með þetta að meginmarkmiði er sorglegt.

Það liggur algjörlega fyrir að Verkalýðsfélag Akraness mun ekki láta þetta ofbeldi yfir sig ganga enda verður þessum vinnubrögðum mætt af fullri hörku. En vissulega er við ramman reip að draga þegar bæði þarf að berjast við atvinnurekendur og ekki síður þá láglaunastefnu sem forysta ASÍ vinnur nú ötullega að með Samtökum atvinnulífsins. Nú er mikilvægt að launþegar allir sem einn standi þétt saman og berjist gegn þessari láglaunastefnu.  

Nú um áramótin dundu enn og aftur skattahækkanir og gjaldskrárhækkanir á alþýðu þessa lands og er þetta til viðbótar þeim gríðarlegu skattahækkunum sem urðu á árinu 2010. Nýjustu skattahækkanirnar sem tóku gildi nú um áramótin voru að greiðsluþátttaka sjúklinga vegna heilbrigðisþjónustu hækkaði að jafnaði um tæp 3% og hlutur sjúklinga í lyfjakostnaði hækkaði einnig. Tóbak hækkaði um 3% og léttvín og bjór um 4%. Einnig hækkuðu vörugjöld á fjölmargar bifreiðar og síðast en ekki síst þá hækkaði bensínið umtalsvert en ef ég man þetta rétt þá er þetta fjórða skattahækkunin sem orðið hefur á bensíni á skömmum tíma. Ekki má heldur gleyma því að ríkisstjórnin er byrjuð að stíga það skref að afnema sjómannaafsláttinn í þrepum en hann lækkaði um 25% um áramótin. Og ríkisstjórnin heldur áfram með hugmyndir um miskunnarlausa skatta á almenning en nú eru uppi hugmyndir um að setja vegtolla allt í kringum höfuðborgarsvæðið. Með öðrum orðum, ríkisstjórn Íslands leggur álögur á íslenska launþega eins og enginn sé morgundagurinn.

Svíkja Stöðugleikasáttmálann

Þær skattahækkanir sem nú hafa litið dagsins ljós eru langt umfram það sem samið var um í hinum margfræga stöðugleikasáttmála sem er nú löngu dáinn drottni sínum. En það þykja nú svosem ekki stór tíðindi þó ríkisstjórn Íslands standi ekki við það sem um var samið í þeim sáttmála enda hefur þeim nánast tekist að svíkja hvert einasta atriði sem þar var um samið. Rétt er að rifja upp að ríkisstjórnin hefur svikið verkalýðshreyfinguna um verðtryggingu persónuafsláttar sem hefði komið þeim tekjulægstu hvað best.

Öllu varpað á launþega

Þessu til viðbótar eru hin ýmsu sveitarfélög í nákvæmlega sama gírnum og ríkisstjórn Íslands, það er, að varpa öllum sínum vanda viðstöðulaust yfir á neytendur, enda hafa gjaldskrár í mörgum sveitarfélögum hækkað gríðarlega á undanförnum tveimur árum. Ekki má gleyma orkufyrirtækjunum sem hafa verið að hækka sínar gjaldskrár og frægasta hækkunin er tæplega 30% hækkun hjá Orkuveitu Reykjavíkur á nýliðnu ári. Eins og allir vita þá hafa þessar skatta- og gjaldskrárhækkanir þau áhrif að verðtryggðar skuldir landsmanna hækka umtalsvert í gegnum hækkun á neysluvísitölunni. Eina verðbólgufóðrið sem heldur verðbólgunni gangandi þessa dagana eru þessar skelfilegu skatta- og gjaldskrárhækkanir hjá hinu opinbera.

Rök forsvarsmanna ríkisstjórnarinnar, sveitarstjórnarmanna og forsvarsmanna orkufyrirtækjanna fyrir þessum skefjalausu hækkunum eru að engar aðrar leiðir séu færar til að mæta fjárhagsvanda þeirra. Með öðrum orðum, öllum vanda áðurnefndra aðila er varpað viðstöðulaust yfir á íslenska launþega en á sama tíma er ætlast til þess að þeir sýni stillingu í komandi kjarasamningum.

Þolinmæðin tæmd

Jóhanna Sigurðardóttir, forsætisráðherra, sagði í áramótaávarpi sínu að þakka beri launafólki fyrir þolinmæði og þrautseigju, þrátt fyrir mikla og óhjákvæmilega kjaraskerðingu vegna hrunsins hefur þetta fólk haldið hjólum atvinnulífsins og opinberrar þjónustu gangandi. Hún sagði einnig að þetta væri ekki sjálfsagt eins og við sjáum víða í kringum okkur þar sem verkföll og mótmæli lama heilu samfélögin og sagði hún að það væri það sem við þyrftum síst á að halda núna.  Við Jóhönnu og hennar ríkisstjórn vill formaður félagsins segja að þolinmæði og þrautseigja íslenskra launþega er algjörlega tæmd með þessum síðustu skattaaðgerðum ríkisstjórnarinnar og því óréttlæti og úrræðaleysi er lítur að skuldavanda heimilanna.

Vissulega er það rétt hjá forsætisráðherranum að verkföll eru það sem við þurfum síst á að halda nú en það er morgunljóst að íslenskir launþegar munu af fullum þunga þurfa að mæta sínum vanda vegna þessara miskunnarlausu skatta- og gjaldskrárhækkana með hækkun launa. Að reka heimili er ekkert öðruvísi en að reka fyrirtæki.

Sótt af fullri hörku

Það er mat formanns að ef það tekst ekki með góðu að ná til baka þeirri kaupmáttarskerðingu sem launþegar hafa orðið fyrir þá er ekkert annað í stöðunni en að sækja þær launahækkanir af fullri hörku. En nú er að verða liðinn einn og hálfur mánuður frá því kjarasamningar á hinum almenna vinnumarkaði runnu út og ljóst að það mun draga til tíðinda í viðræðum við Samtök atvinnulífsins fljótlega. Það er mat formanns félagsins að það komi ekki annað til greina en að íslenskum launþegum verði skilað til baka þeirri kaupmáttarskerðingu sem þeir hafa orðið fyrir frá hruni. Meira verður ekki lagt á herðar alþýðu þessa lands og nú er komið að öðrum að axla ábyrgð í þessu samfélagi, enda er þolinmæðin og þrautseigjan hjá alþýðunni algjörlega tæmd og það fyrir löngu.