Klukkan 12:00 á morgun lýkur atkvæðagreiðslu um kjarasamninga Verkalýðsfélags Akraness við Samtök atvinnulífsins annars vegar vegna starfa á almennum vinnumarkaði (Almenn deild og Matvæladeild) og hins vegar vegna iðnaðarmanna (Iðnsveinadeild).

Kjarasamningar og kynningargögn liggja frammi á skrifstofu félagsins þar sem opinn kjörfundur fer fram. Einnig er hægt að skoða upplýsingar um almenna samninginn með því að smella hér og samning iðnaðarmanna hér.

Talningu er nú lokið í atkvæðagreiðslu þeirra tveggja samningar sem undirritaðir voru í maí. Annars vegar er um að ræða kjarasamning vegna iðnaðarmanna (Samiðn) sem undirritaður var 5. maí sl. og hins vegar kjarasamning vegna starfa á almennum vinnumarkaði sem undirritaður var 13. maí sl.

Niðurstöður liggja fyrir og eru báðir samningar samþykktir á meðal félagsmanna Verkalýðsfélags Akraness.

Iðnsveinar:

Kosningaþátttaka var 17,6%

Já sögðu 66,7%

Nei sögðu 33,3%

Almenni:

Kosningaþátttaka var 4,1%

Já sögðu 92,3%

Nei sögðu 7,7%

Núna sitja fulltrúar Verkalýðsfélags Akraness, þær Anna Signý Árnadóttir og Ragnhildur Bjarnadóttir, trúnaðarmenn á Sjúkrahúsi Akraness, á samningafundi vegna ríkissamningsins. Þessa stundina er æði margt sem bendir til þess að gengið verði frá samningi í dag en samkvæmt upplýsingum sem skrifstofan hefur fengið er sá samningur í anda þess sem gengið hefur verið frá á hinum almenna vinnumarkaði. Þess má geta að ófaglærðir starfsmenn á Sjúkrahúsi Akraness taka allir laun eftir þessum samningi.

Greint verður ítarlegar frá innihaldi samningsins þegar niðurstaða liggur fyrir.  

Leikritinu á milli Samtaka atvinnulífsins og Alþýðusambands Íslands virðist ekki ætla að ljúka á næstu dögum ef marka má fréttir síðasta sólarhring. ASÍ og SA hafa sagt að ekki sé hægt að ganga frá kjarasamningum til þriggja ára nema fyrir liggi aðkoma ríkisvaldsins að komandi kjarasamningum og í gær lagði ríkisstjórnin fram drög að aðgerðapakka til að koma til móts við óskir þessara aðila.

Formaður hefur kynnt sér þessi drög og er margt jákvætt í þeim þó vissulega þurfi meira að koma til.  Hins vegar liggur  það  fyrir að Samtök atvinnulífsins eru afar óhress með að ekki sé tekið á deilu þeirra vegna fiskveiðistjórnunarkerfisins. Það hefur komið fram hér á heimasíðunni áður að það er með hreinustu ólíkindum að þurfa að sitja undir þessu ofbeldi af hálfu SA að neitað sé að ganga frá kjarasamningum vegna áðurnefnds ágreinings um fiskveiðistjórnunarkerfið og um leið halda þessir menn kjarasamningum launafólks í herkví.

Það er í raun og veru ótrúlegt að verða vitni að því að ASÍ og SA skuli krefjast þess að ríkisvaldið opinberi aðgerðapakka sinn til lausnar á kjarasamningi til þriggja ára, en á sama tíma fá launþegar ekkert að vita hvað standi til að semja um er lýtur að launahækkunum í komandi kjarasamningum. Eitt liggur þó fyrir að ASÍ og SA stefna að því að lágmarkslaun verði orðin 200 þúsund í lok samningstímans sem er árið 2014. Þetta er í raun og veru alveg með hreinustu ólíkindum í ljósi þess að nýtt neysluviðmið velferðarráðherra gerir ráð fyrir að einstaklingur þurfi að lágmarki um 214 þúsund krónur í ráðstöfunartekjur eða sem nemur heildarlaunum í kringum 290 þúsund krónur á mánuði til að geta framfleytt sér. Það er ekki mikil reisn eða kraftur yfir slíkri kröfu að ætla sér að láta lágmarkslaun vera orðin 200 þúsund í lok samningstímans.

Það hefur algjörlega ræst sem formaður félagsins hefur margoft bent á, en forseti ASÍ hefur leynt og ljóst unnið að því að ná samningsumboðinu af stéttarfélögunu hér á landi og nú er það einungis 5-7 manna fámenn valdaklíka innan verkalýðshreyfingarinnar sem fer með allt samningsumboð fyrir íslenskt launafólk. Það er dapurlegt að verða vitni að því að draumar forsetans um að ná samningsumboðinu af stéttarfélögunum skuli hafa náð að rætast eins og raunin hefur orðið.

Í dag eru liðnir 4 mánuðir frá því kjarasamningar runnu út og hafa launþegar þar af leiðandi ekki fengið kjarabætur fyrir sama tíma en hafa samt sem áður þurft að taka við hverri hækkuninni á fætur annarri og nægir að nefna í þessu samhengi hækkun Orkuveitu Reykjavíkur á fráveitugjaldi upp á 45% og á heitu vatni upp á 8% og er þetta til viðbótar þeirri 30% hækkun sem varð ekki alls fyrir löngu frá OR. Og í gær hækkaði bensínverðið um 4 krónur og það heyrist hvorki hósti né stuna frá forystu ASÍ vegna þessara skefjalausu hækkana sem nú dynja á íslenskum launþegum. Þetta eru vinnubrögð sem formanni Verkalýðsfélags Akraness finnast vera til skammar.

Sjálftökuliðinu innan Samtaka atvinnulífsins sem skammtar sér sín laun nánast af eigin geðþótta og nægir að nefna í því samhengi Birnu Einarsdóttur, bankastjóra Íslandsbanka og Höskuld H. Ólafsson, bankastjóra Arion banka en þessir einstaklingar hafa fengið hækkun á sínum launum upp á milljónir króna á ársgrundvelli á sama tíma og launahækkanir til íslenskra launþega eru settar í algjört frost.  En þessir tveir einstaklingar sitja einnig í stjórnum og ráðum innan Samtaka atvinnulífsins og taka þannig þátt í að móta þá samræmdu láglaunastefnu sem unnið er eftir af hálfu SA.

 Eins og áður hefur komið fram hér á heimasíðunni þá er það mat formanns VLFA að nú sé komið að algjörri ögurstundu og skorar enn og aftur á ASÍ að skipuleggja allsherjaverkfall og væri hægt að byrja á einum degi í slíku verkfalli.  Alla vega þarf forysta ASÍ að fara að sýna Samtökum atvinnulífsins tennurnar í þessum kjaraviðræðum, svo mikið er víst.

AkraneskaupstaðurFormaður félagsins fundaði með Guðmundi Páli Jónssyni formanni bæjarráðs og Árna Múla Jónassyni bæjarstjóra í gær. Þetta var afar góður fundur þar sem farið var yfir hin ýmsu sameiginleg hagsmunamál sveitarfélagsins og Verkalýðsfélags Akraness eins og t.d atvinnulíf og kjaramál. Einnig voru nokkur hagsmunamál er lúta að félagsmönnum Verkalýðsfélags Akraness sem starfa hjá Akraneskaupstað til umræðu.

Eins og áður sagði þá var þetta góður fundur með þeim félögum enda leggur félagið mikla áherslu á að vera í góðu sambandi og samvinnu við bæjaryfirvöld í sameiginlegum hagsmunamálum. 

Það er þyngra en tárum taki að verða vitni að þeim hótunum sem Samtök atvinnulífsins og einstaka forystumenn innan Alþýðusambands Íslands beita þessa dagana vegna þjóðaratkvæðagreiðslunnar um Icesave.

Eins og fram hefur komið í fréttum síðustu sólarhringa hafa þessir aðilar hótað íslenskum launþegum því að ef lögin um Icesave verði ekki staðfest í atkvæðagreiðslunni sem fer fram á laugardaginn þá verði ekki gengið frá kjarasamningum og þar af leiðandi muni kjarabætur til íslenskra launþega dragast enn frekar. 

Þessu til viðbótar hafa Samtök atvinnulífsins einnig hótað því að ekki verði gengið frá kjarasamningum ef ríkisstjórn Íslands gangi ekki frá ágreiningi við útvegsmenn vegna fiskveiðistjórnunarkerfisins. Þessar hótanir, báðar tvær, eru með svo miklum ólíkindum að þær ná ekki nokkurri átt enda er verið að setja fram hluti sem hafa ekkert með kjarasamninga íslenskra launþega að gera. Það er með öllu ábyrgðarlaust að forystumenn innan verkalýðshreyfingarinnar og innan Samtaka atvinnulífsins skuli ætla að misnota aðstöðu sína jafn alvarlega og fréttir síðustu daga sýna.

Formaður Verkalýðsfélags Akraness skorar á félagsmenn sína að kynna sér allar hliðar á Icesave málinu til hlítar og taka afstöðu útfrá sinni eigin skoðun. Einnig skorar formaður á félagsmenn að nýta lýðræðislegan rétt sinn í komandi þjóðaratkvæðagreiðslu.

Stéttarfélög á Akranesi leita að ráðgjafa í fullt starf til að starfa á sviði starfsendurhæfingar. Hlutverk ráðgjafa er að styðja og hvetja einstaklinga til að viðhalda og efla virkni til vinnu. Aðsetur verður á skrifstofu Verkalýðsfélags Akraness, Sunnubraut 13 á Akranesi.

Helstu verkefni ráðgjafans verða:

• Stuðningur og ráðgjöf fyrir einstaklinga
• Upplýsingaöflun og mat skv. viðurkenndum aðferðum
• Umsjón, eftirfylgni og leiðsögn varðandi endurhæfingaráætlanir einstaklinga, í samstarfi við fagaðila
• Náin samvinna við atvinnurekendur og stéttarfélög með það að markmiðið að auka starfshæfni og varðveita vinnusamband einstaklinga á vinnumarkaði

Kröfur um hæfni

Helstu hæfniskröfur til ráðgjafa eru eftirfarandi:

• Mjög góð samskiptahæfni og þjónustulund
• Góð þekking á vinnumarkaði og nærsamfélagi
• Háskólamenntun á sviði félags-, heilbrigðis- og menntavísinda eða sambærileg menntun
• Þekking og/eða reynsla á sviði ráðgjafar æskileg
• Sveigjanleiki og færni til að tileinka sér nýja þekkingu og vinnubrögð
• Frumkvæði, sjálfstæði og skipulagshæfni
• Tungumálakunnátta, enska og eitt Norðurlandamál
• Geta til að koma frá sér efni í ræðu og riti

Starf ráðgjafans er samstarfsverkefni milli stéttarfélaganna og Starfsendurhæfingarsjóðs. Nánari upplýsingar um starf ráðgjafa og starfsemi Starfsendurhæfingarsjóðs er að finna á heimasíðu sjóðsins www.virk.is. Til að tryggja þekkingu og símenntun ráðgjafans mun hann fá sérstaka þjálfun sem skipulögð er af Virk, Starfsendurhæfingarsjóði.

Umsókn um starfið skal skilað fyrir kl 16:00, mánudaginn 11. apríl nk. á skrifstofu Verkalýðsfélags Akraness, Sunnubraut 11 í lokuðu umslagi merktu VIRK – Ráðgjafi í starfsendurhæfingu.

Nánari upplýsingar er hægt að fá á netfanginu This email address is being protected from spambots. You need JavaScript enabled to view it. og This email address is being protected from spambots. You need JavaScript enabled to view it.eða á skrifstofu VLFA og VIRK.

Járnblendiverksmiðjan á GrundartangaVerkalýðsfélag Akraness, Framsýn,  og Verkalýðsfélag Þórshafnar óskuðu í morgun eftir fundi með fulltrúum Samtaka atvinnulífsins um sérmál og launalið kjarasamnings aðila. Þessi þrjú félög ákváðu á sínum tíma að segja skilið við önnur stéttarfélög innan Starfsgreinasambands Íslands vegna mismunandi áherslna í kröfugerð sambandsins.

Þessi þrjú félög hafa lagt áherslu á að 200.000 króna tekjutrygging kæmi til framkvæmda strax.

Haft hefur verið eftir forseta ASÍ að 200.000 króna lágmarkslaunum verði ekki náð fyrr en 1. janúar 2013.  Það er mat Verkalýðsfélag Akraness að slíkt sé með öllu óásættanlegt, enda hefur nýtt neysluviðmið sem velferðaráðherra lét gera sýnt fram á að lágmarksframfærsla einstaklings þurfi að vera að lágmarki í kringum 280.000 kr. á mánuði.

Félögin þrjú hafa átt fundi með fulltrúum SA en þeir hafa ekki viljað ganga frá neinu meðan þeir hafa átt í viðræðum við landssambönd ASÍ og stjórnvöld.  Það er óþolandi hvernig forseta ASÍ hefur tekist að hrifsa til sín samningsumboð nánast allra stéttarfélaga í þessum kjaraviðræðum og stjórnar þessum viðræðum við SA með afar döprum hætti.

Nú er ekki margt sem bendir til þess að SA sé yfir höfuð að fara að semja um kjarabætur við verkalýðshreyfinguna ef marka má þær hótanir sem dunið hafa á launþegum síðustu daga og vikur.  En það hefur komið skýrt fram hjá Samtökum atvinnulífsins að ef Icesave lögin verði ekki samþykkt á morgun þá verði ekki samið við verkalýðshreyfinguna.  Öllu alvarlega er að forseti ASÍ og einstaka forystumenn innan verkalýðshreyfingarinnar hafa einnig rekið slíkan hræðsluáróður sem hefur vægt til orða tekið fallið í grýttan jarðveg hjá launþegum vítt og breitt um landið.

Það er sorglegt að t.d starfsmenn Norðuráls sem eru búnir að vera með sinn launalið lausan frá áramótum fái ekki kjarabætur vegna þess að forsvarsmenn Samtaka atvinnulífsins neita alfarið að semja fyrr en þeir eru búnir að semja við Gylfa Arnbjörnsson og co hjá ASÍ í anda láglaunastefnunnar sem byggist á samræmdri launastefnu sem Gylfi og Vilhjálmur hjá SA hafa mótað.  Einnig fær VLFA ekki að ganga frá kjarasamningum fyrir starfsmenn Elkem og Klafa vegna þessarar samræmdu launastefnu.  Rekstrarskilyrði þessara fyrirtækja er feikigóð um þessar mundir og ljóst að bæði þessi fyrirtæki eru rekin með umtalsverðum hagnaði þessa dagana en sem dæmi þá er álverð nú í hæstu hæðum eða um 2.600 dollarar pr. tonn.  Einnig er rekstur Elkem mjög góður en kísiljárn hefur hækkað um 58 % á liðnum misserum

Nú er það algjörlega orðið morgunljóst að þolinmæði Verkalýðsfélags Akraness er gjörsamlega búin og mun félagið strax eftir helgi skoða sína stöðu rækilega ef ekki sér til lands í þessum kjaradeilum ASÍ og SA.  Formaður VLFA vill ítreka það sem áður hefur komið fram hér á heimasíðunni þar sem hann lýsir yfir fullkomnu vantrausti á forseta ASÍ til að leiða þessa kjaraviðræður enda er það mat formanns að hann sé algjörlega vanhæfur til þess og nægir að nefna að komið er á fimmta mánuð frá því að kjarasamningar á hinum almenna vinnumarkaði runnu út. 

Það er óhætt að segja að félagsmenn Verkalýðsfélags Akraness nýta sér þjónustu félagsins gríðarlega vel en nú vinna starfsmenn félagsins að því að gera skýrslu stjórnar klára fyrir aðalfund félagsins sem haldinn verður 19. apríl næst komandi á Gamla Kaupfélaginu.

Á árinu 2010 voru greiddar úr sjúkrasjóði 37 milljónir króna til 611 félagsmanna, en þá er um að ræða styrki sem í boði eru úr sjóðnum eins og heilsueflingarstyrkur, gleraugnastyrkir, sjúkraþjálfun, göngugreining, hjartavernd, krabbameinsskoðun og svo að sjálfsögðu sjúkradagpeningar.

Tæplega 200 manns nýttu sér afslátt á Veiði- og Útilegukortum á árinu 2010 en félagið veitir 50% afslátt af útsöluverði.

174 félagsmenn fengu greiðslu úr starfsmenntasjóðum sem Verkalýðsfélag Akraness er aðili að og nam heildarupphæðin rétt tæpum 7 milljónum króna.

Alls nýttu 270 félagsmenn sér orlofshús félagsins og er óhætt að nýtingin á orlofshúsum félagsins sé gríðarlega góð jafnt að sumri sem að vetri.

Um 100 félagsmenn þáðu aðstoð við gerð skattframtala sem félagið bauð upp á og hefur þessi aðstoð fallið í mjög góðan jarðveg hjá félagsmönnum.

Vegna góðrar afkomu félagsins hefur stjórn sjúkrasjóðs ákveðið að hækka hámark heilsueflingarstyrks úr 15.000 í kr. 20.000 sem gerir 33% hækkun. Einnig hefur verið tekinn upp nýr styrkur vegna heilsufarsskoðunar og er hann að hámarki kr. 15.000. Þennan styrk er hægt að nýta t.d. í krabbameinsskoðun, sneiðmyndatöku, maga- og ristilskoðun, skoðun hjá Hjartavernd og Karlaskoðun.

Nú hefur farið fram úthlutun vegna sumarleigu orlofshúsa félagsins sumarið 2011. Tæplega 260 umsóknir bárust og hafa þær aldrei verið fleiri. Þeir sem sóttu um eiga nú von á bréfi þar sem fram kemur hvort þeir hafi fengið úthlutað eða ekki. Einnig er hægt að sjá upplýsingar um það með því að skrá sig inn á félagavefinn.

Þeir sem fengu úthlutað hafa frest til þriðjudagsins 26. apríl til að greiða leiguna og stuttu eftir það verður þeim vikum sem eftir standa endurúthlutað. Eins og sést á þeim fjölda umsókna sem bárust þá er gríðarlega mikil eftirspurn eftir orlofshúsunum og því mikilvægt að þeir sem fengu úthlutað gangi sem fyrst frá greiðslu ef þeir ætla sér að þiggja sína úthlutuðu viku. Þann 3. maí verður svo hægt að bóka þær vikur sem eftir standa þegar endurúthlutun er lokið og þá gildir sú regla að fyrstur kemur, fyrstur fær.