Verið er að leggja lokahönd á fréttablað félagsins og verður blaðið borið út í næstu viku. Blaðið er með sambærilegu sniði og undanfarin ár en félagið gefur út tvö fréttablöð á ári, annars vegar í maí og hins vegar í desember.

Meðal efnis í blaðinu núna verður stutt yfirferð á þeim kröfum sem félagið hefur gert á Samtök atvinnulífsins er lúta að verkafólki á hinum almenna vinnumarkaði ásamt fjölmörgum öðrum stuttum fréttum af starfsemi félagsins.

Boðað hefur verið til samningafundar vegna kjarasamning starfsmanna Elkem Íslands á þriðjudaginn næstkomandi og verður fundurinn haldinn í fundarsal fyrirtækisins á Grundartanga.

Trúnaðarmenn fyrirtækisins hafa útbúið kröfur vegna komandi kjarasamnings og er Verkalýðsfélag Akraness að setja þessar kröfur upp. Þær verða svo lagðar fram á fundinum á þriðjudaginn. Það er alveg ljóst að kröfugerðin endurspeglar það ástand sem er hjá fyrirtækjum sem eru starfandi í útflutningi eins og Elkem Ísland en fyrirtæki í útflutningi hafa verið að njóta góðs af þeim gengisbreytingum sem orðið hafa á íslensku krónunni. Þennan ávinning vilja starfsmenn Elkem Íslands fá að hluta til til sín í komandi kjarasamningum.

Það er alveg ljóst að Verkalýðsfélag Akraness mun sýna fulla hörku hjá þeim fyrirtækjum sem eru starfandi í útflutningi og hafa burði til að láta starfsmenn sína njóta ávinnings af falli krónunnar.

Í gær var fyrsti samningafundur vegna kjarasamnings starfsmanna Elkem Íslands haldinn á Grundartanga. Til fundarins mættu Ragnar Árnason frá Samtökum atvinnulífsins, Sigrún Pálsdóttir, mannauðsstjóri fyrirtækisins og formenn Verkalýðsfélags Akraness og FIT. Einnig sátu fundinn aðaltrúnaðarmaður og einn af trúnaðartengiliðum starfsmanna.

Formaður Verkalýðsfélags Akraness lagði fram kröfugerð starfsmanna Elkem Íslands og gerði grein fyrir henni en heildarkostnaðarmat kröfugerðarinnar er um 28%. Eins og fram hefur komið hér á heimasíðunni þá er það meginkrafa Verkalýðsfélags Akraness að sækja að þeim fyrirtækjum sem eru starfandi í útflutningi og hafa verið að njóta góðrar afkomu vegna gengisbreytinga á íslensku krónunni.

Í kröfugerðinni er lögð áhersla á hækkun grunnlauna hjá starfsmönnum Elkem Íslands. Það er mat félagsins að grunnlaun byrjanda upp á rétt rúmar 184 þúsund krónur séu skammarlega lág miðað við eðli þeirrar starfsemi sem unnin er í þessari verksmiðju enda eru starfsmenn að vinna við mjög krefjandi og jafnvel hættulegar aðstæður.

Rekstur Elkem Íslands hefur gengið nokkuð vel að undanförnu og nægir að nefna að eigið fé fyrirtækisins er um 20 milljarðar króna. Fyrirtækið gerir upp í norskum krónum og hefur íslenska krónan veikst um 73% miðað við þá norsku frá 1. janúar 2008 fram til dagsins í dag. Á þessu sést að fyrirtækið hefur umtalsvert svigrúm til þess að hækka laun starfsmanna allverulega.

Það er alveg ljóst að umtalsverð kaupmáttarrýrnun hefur verið hjá starfsmönnum Elkem Íslands frá 1. janúar 2008 en formanni reiknast til að kaupmáttarskerðingin sé um 10% frá þeim tíma. Formaður gerði fulltrúa Samtaka atvinnulífsins það algjörlega ljóst að þessi samningur er sjálfstæður kjarasamningur og mun félagið ekki líða það að dráttur verði á kjarasamningsviðræðum vegna kjarasamninga á hinum almenna vinnumarkaði. Staða stóriðjufyrirtækja og fyrirtækja í útflutningi er eðli málsins samkvæmt mun betri til launahækkana heldur en margra annarra atvinnugreina hér á landi um þessar mundir. Á þeirri forsendu mun félagið ekki sýna neina linkind í viðræðum við fyrirtæki sem eru starfandi í útflutningi.

Eins og fram hefur komið hér á heimasíðunni hafa allir félagsmenn Verkalýðsfélags Akraness nú fengið sent afsláttarkort sem veitir þeim afslátt í ýmsum fyrirtækjum á Akranesi. Starfsmenn skrifstofu leitast við að bæta við afsláttarkjörum eftir fremsta megni og nú hefur félagið gert samning við Reykjavíkurhótel varðandi afslátt til handa félagsmanna.

Um er að ræða afslætti sem gilda á Grand Hótel, Hótel Reykjavík Centrum og á Fosshótelunum. Á þetta við bæði um gistingu og veitingar en einnig er hægt að leigja sali sem henta vel fyrir hvers konar fundi, ráðstefnur, námskeið og fleira. Hér má sjá nánari upplýsingar um afsláttarkjörin. Er það von félagsins að þessi kjör muni nýtast félagsmönnum vel, hvort sem þeir eru búsettir á Akranesi eða annars staðar á landinu.

Síldarverksmiðjan og AkraneshöfnÁ föstudaginn skilaði félagið kröfugerð vegna tveggja sérkjarasamninga. Annars vegar var það kjarasamningur fyrir starfsmenn Klafa og hins vegar fyrir starfsmenn Síldarbræðslunnar á Akranesi. Kröfugerðin vegna þessara tveggja samninga er með sambærilegum hækkunum og kröfugerðin hjá Elkem Ísland en heildarkostnaðarmat þess samings var um 28%.

Félagið var búið að skila inn kröfugerð vegna starfsmanna Elkem Íslands og nú er verið að vinna að kröfugerð vegna launaliðar í kjarasamningi Norðuráls en launaliður þess samnings rennur út nú um áramótin.

Það er alveg ljóst að kjarasamningsviðræður vegna allra þeirra samninga sem nú eru lausir munu ekki hefjast af neinum þunga fyrr en eftir áramót en gríðarlegt álag verður í kringum þær viðræður þar sem margir kjarasamningar eru að renna út eða eru það nú þegar. Kröfugerð félagsins tekur töluvert mið af atvinnugreinum og er alveg ljóst að félagið mun sækja nokkuð þungt á þau fyrirtæki sem eru með starfsemi tengda útflutningi, eins og til dæmis stóriðjurnar og fiskvinnslufyrirtækin.

Eins og fram kom hér á heimasíðunni 9. júní þá neituðu eigendur Norðuráls að greiða svokölluðum sérkjaramönnum fyrirtækisins eingreiðslu uppá 150.000 kr. eins um hafði verið samið í kjarasamningi frá 20 apríl 2010.  En í kjarasamningnum var samið um eingreiðslu til allra starfsmanna Norðuráls uppá 150.000 kr en þegar kom til útgreiðslu á umræddri eingreiðslu tilkynntu eigendur fyrirtækisins að sérkjaramenn sem eru t.d vaktstjórar ættu ekki rétt á slíkri greiðslu.

Verkalýðsfélag Akraness mótmælti þessari ákvörðun harðlega við forsvarsmenn Norðuráls og taldi félagið að um klárt samningsbrot væri að ræða.  Á þeirri forsendu var lögmanni félagsins falið að undirbúa málssókn fyrir félagsdómi til að sækja umrædda eingreiðslu.  Nú hefur fyrirtækið hins vegar horfið frá þessari fyrirætlan sinni og tilkynnt þeim aðilum sem um ræðir að umrædd eingreiðsla verði greidd að fullu og það með vöxtum.

Verkalýðsfélag Akraness fagnar þassari niðurstöðu innilega, enda lá það algjörlega klárt fyrir að þessi ákvörðun eigenda Norðuráls stóðst enga skoðun.  Eftir þeim upplýsingum sem félagið hefur þá eru þetta um 50 starfsmenn sem um ræðir þannig að heildar endurgreiðslan lætur nærri 10 milljónum fyrir utan vexti og ljóst að þá starfsmenn sem um ræðir munar um minna.

Stjórn og starfsmenn Verkalýðsfélags Akraness óska félagsmönnum sínum og landsmönnum öllum gleðilegra jóla með von um bættan hag á komandi ári. 

Sjómannadeild Verkalýðsfélags Akraness vill minna sjómenn sína á aðalfund deildarinnar sem haldinn verður á morgun, þriðjudaginn 28. desember, klukkan 14. Fundurinn verður haldinn í fundarsal á skrifstofu félagsins að Sunnubraut 13.

Auk venjubundinnar dagskrár aðalfundar verður farið yfir komandi kjarasamninga en kjarasamningur sjómanna verður laus nú um áramótin. Félagið hvetur sjómenn til að mæta. Boðið verður upp á kaffiveitingar.

Aðalfundur Sjómannadeildar Verkalýðsfélags Akraness var að ljúka rétt í þessu. Auk venjubundinna aðalfundarstarfa voru hin ýmsu mál til umfjöllunar en að sjálfsögðu bar hæst umræður um komandi kjarasamningar við Landsamband íslenskra útvegsmanna og þær hugmyndir að kröfugerð sem nú er verið að vinna að.

Fundarmenn voru sammála um að það skref sem nú á að stíga varðandi afnám sjómannaafsláttar verði mætt af fullum þunga. Fyrir liggur að sjómannaafsláttur á að lækka úr 987 kr. fyrir hvern lögskráningardag niður í 740 kr. frá og með 1. janúar 2011 eða sem nemur 25% lækkun. Síðan á afslátturinn að lækka aftur niður í 493 kr. árið 2012 og niður í 246 kr. árið 2013 og fellur síðan alfarið brott árið 2014.

Það er alveg ljóst að sjómenn munu ekki sætta sig við þá kjaraskerðingu sem felst í afnámi sjómannaafsláttarins og gagnrýndu fundarmenn stjórnvöld harðlega fyrir þessa ákvörðun. Það gengur ekki upp að sjómenn sem starfa árið um kring fjarri heimilum sínum njóti ekki einhvers konar skattaívilnunar eins og allir aðrir launþegar þessa lands. En eins og allir þekkja þá eru greiddir skattfrjálsir dagpeningar til annarra launþega þegar þeir þurfa að starfa fjarri sínu heimili. Við slíkt munu sjómenn ekki una.

Stjórn og trúnaðarráð Verkalýðsfélags Akraness hélt sinn árlega jólatrúnaðarráðsfund í gærkvöldi. Formaður félagsins fór yfir kröfugerðir vegna komandi kjarasamninga og gerði grein fyrir því helsta sem gerst hefur á starfsárinu sem nú er að líða. Það kom fram í máli formanns að framundan séu afar erfiðar kjaraviðræður en eins og áður hefur komið fram þá liggur fyrir að það eru atvinnugreinar í okkar samfélagi sem eru mun betur í stakk búnar en aðrar til að mæta umtalsverðum hækkunum á launakjörum sinna starfsmanna og átti formaður þar við allar útflutningsgreinarnar. Það kom skýrt fram í máli hans að sótt verði af fullum þunga á þessar greinar, það er að segja, stóriðjurnar og fiskvinnslufyrirtækin.

Eins og fram hefur komið í fréttum hafa fjölmörg fiskvinnslufyrirtæki greitt sínum starfsmönnum jólabónus og hefur sá jólabónus numið allt að 260 þúsund krónum umfram gildandi kjarasamninga og ber því að sjálfsögðu að fagna. Hins vegar hörmuðu fundargestir að HB Grandi, sem er eitt af stærstu fiskvinnslufyrirtækjum á Íslandi, skildi hafa hafnað því að greiða sambærilegan jólabónus og önnur fiskvinnslufyrirtæki höfðu gert til handa sínu starfsfólki. Þessi jólabónus sem greiddur hefur verið út af hinum ýmsu fiskvinnslufyrirtækjum sýnir svo ekki verður um villst að afkoma þessara fyrirtækja er nægilega góð til að mæta kröfum verkalýðshreyfingarinnar um stórhækkun launa til handa fiskvinnslufólki.

Formaður fór einnig yfir að nú eru 7 ár liðin frá því að ný stjórn tók við Verkalýðsfélagi Akraness eftir gríðarleg átök sem átt höfðu sér stað í félaginu um langa hríð. Árangurinn sem núverandi stjórn hefur náð á þessum 7 árum er einstakur. Þegar ný stjórn tók við þann 19. nóvember 2003 var félagið nánast fjárvana. Félagssjóður var rekinn á yfirdrætti og peningalegar innistæður félagsins voru af afar skornum skammti. Í dag hefur stjórninni tekist að byggja alla sjóði félagsins vel upp og heildar innistæður félagsins hafa aukist gríðarlega á þessum 7 árum enda verður stéttarfélag að vera fjárhagslega sterkt til að geta þjónað sínum félagsmönnum eins og kostur er.

Það kom fram í máli formanns að það er ekki bara að félaginu hafi tekist að byggja sjóði félagsins upp á þessum 7 árum heldur hefur félagið einnig bætt við sjö nýjum styrkjum til handa félagsmönnum og hefur sjúkrasjóður félagsins greitt út tæpar 200 milljónir á þessum 7 árum. Einnig hefur félagið greitt út milljónir króna í fræðslustyrki.

En það sem vakti mikla athygli fundarmanna var hvað réttindabarátta félagsins hefur skilað félagsmönnum gríðarlegum ávinningi. Á þessum 7 árum hefur félagið innheimt yfir 100 milljónir króna vegna brota á kjarasamningum og með innheimtu í gegnum Ábyrgðarsjóð launa vegna gjaldþrota fyrirtækja. Það gera að meðaltali rúmar 14 milljónir á ári hverju frá því ný stjórn tók við.

Helstu dæmin um mál sem félagið hefur náð að vinna fyrir sína félagsmenn er til dæmis hlutdeild í arðgreiðslum hjá Elkem Ísland en sú barátta skilaði starfsmönnum tæpum 8 milljónum króna. Nýjasta dæmið sem félagið náði að knýja fram var eingreiðsla til handa sérkjaramönnum Norðuráls og nam sú heildarupphæð um 10 milljónum króna. Hæsta einstaka greiðslan til handa félagsmanni eru 3 milljónir vegna sjómanns sem var afleysingamaður í sínum fyrsta túr og slasaðist en honum hafði verið tjáð að hann ætti ekki rétt á launum þar sem hann hefði verið í afleysingum. Félagið fór í málið og að sjálfsögðu átti hann fullan rétt til launa enda hafði maðurinn slasast um borð í skipinu. Eitt af stóru málunum sem félagið fór í var til dæmis þegar stjórn HB Granda greiddi arðgreiðslur til eigenda á sama tíma og launafólk hafði verið þvingað til að afsala sér og fresta sínum launahækkunum. Þessi barátta skilaði því að allir starfsmenn HB Granda fengu sínar umsömdu launahækkanir og fjölmörg fiskvinnslufyrirtæki vítt og breitt um landið fylgdu í kjölfarið og stóðu við þá samninga sem höfðu verið gerðir á sínum tíma. Þessi vinna skilaði hverjum og einum starfsmanni nálægt 150 þúsund krónum.

Verkalýðsfélag Akraness tók félagsleg undirboð á erlendum verkamönnum á árunum 2005, 2006 og 2007 mjög föstum tökum enda var í mörgum tilfellum verið að brjóta á þessum mönnum með skelfilegum hætti. Félagið innheimti á þessum árum um 7 milljónir króna vegna hinna ýmsu brota er lutu að réttindum erlendra starfsmanna.

Á þessu sést að Verkalýðsfélag Akraness hefur kjark og þor til að taka á öllum málum sem upp koma og vílar ekki fyrir sér að fara í málin af fullum þunga með hagsmuni sinna félagsmanna ávallt að leiðarljósi. Þetta hefur farið misjafnlega í þá atvinnurekendur sem félagið hefur þurft að hjóla í og hefur félaginu nokkrum sinnum verið hótað málsókn vegna meiðyrða. Frægasta dæmið er þegar verið var að brjóta á starfsmönnum Glyms í Hvalfirði með skelfilegum hætti. En ekki hafa þessi fyrirtæki haft kjark né þor til að fara í mál við félagið enda hafði félagið ávallt rétt fyrir sér í þessum málum.

Það er stefna Verkalýðsfélags Akraness að verja hagsmuni sinna félagsmanna ávallt með kjafti og klóm þegar grunur er um brot á kjarasamningum og þannig verður það áfram.