Stjórn Verkalýðsfélags Akraness óskar félagsmönnum sínum til hamingju með daginn.  Félagið hvetur félagsmenn sína til að taka þátt í hátíðardagskránni.  Dagskráin er eftirfarandi:

Safnast verður saman við Kirkjubraut 40 kl. 14:00 og genginn hringur á Neðri-Skagann.  Að göngu lokinni verður hátíðardagskrá í sal á 3ju hæð Kirkjubrautar 40.

Ræðumaður dagsins er Gunnar Páll Pálsson formaður VR

Einnig verður boðið uppá hljóðfæraleik, upplestur og söng

Kaffiveitingar

Met þátttaka var í hátíðarhöldum á 1. maí á Akranesi, en um 220 manns komu og tóku þátt í hátíðarhöldum sem stéttarfélögin buðu uppá.  Í fyrra voru um 150 manns sem tóku þátt í hátíðarhöldunum þannig að hér er um mjög ánægjulega fjölgun um að ræða.

Aðalræðumaður dagsins var Gunnar Páll Pálsson formaður VR.  Einnig var boðið uppá tónlistaratriði, upplestur og kór Íslenska járnblendifélagsins flutti nokkur lög.  Eins og áður sagði var um met þátttöku að ræða og um tíma leit út að ekki væri sæti fyrir alla fundargesti en með því að fjölga borðum og stólum þá bjargaðist það farsællega. 

Stéttarfélögin buðu hátíðargestum uppá kaffiveitingar sem 4. flokkur kvenna sá um með glæsibrag.

Forsvarsmenn Sjúkrahúss Akraness hafa tekið ákvörðun um að leggja niður þvottahús sjúkrahússins í þeirri mynd sem það hefur verið starfrækt á liðnum árum og áratugum. Fram hefur farið útboð á rekstri þvottahússins og hafa forsvarsmenn sjúkrahússins gengið frá samkomulagi við fyrirtæki hér í bæ sem mun sjá um allan þvott spítalans og mun rekstur þvottahússins í núverandi mynd hætta alfarið þann 1. september næstkomandi.

Formaður fundaði með starfsmönnum þvottahússins í morgun þar sem farið var yfir þau réttindamál sem lúta að starfsmönnunum. Það jákvæða í þessu máli er að stofnuninni hefur tekist að skaffa flestum þeim starfsmönnum sem starfa í þvottahúsinu vinnu annars staðar í stofnuninni.

Reyndar er mat formanns félagsins að í hvert sinn sem fyrirtæki leita hagræðingar hjá sér þá er eins og ekkert annað komi til greina en að hagræða í ræstingu, þvottahúsi eða mötuneyti. Alltaf verður starfsfólk í þessum störfum fyrir einhvers konar skerðingu eða skakkaföllum þegar um hagræðingar í rekstri er að ræða.

Upplýsingar varðandi endurúthlutun má finna með því að smella hér.

Í blaðinu Magna sem er blað framsóknarmanna á Akranesi er mynd af formanni Verkalýðsfélags Akraness ásamt formanni starfsmannafélags Akraneskaupstaðar og bæjarstjóranum.  Því miður kemur ekki fram í blaðinu hvert tilefni myndarinnar var en það var vegna þess að framsóknarmenn buðu formanni félagsins á morgunverðafund sem var haldinn vegna baráttudags launafólks 1. maí sl.  

Að sjálfsögðu varð formaður félagsins við þessari beiðni og fór yfir það helsta sem er að gerast í verkalýðsmálum á Akranesi.

Formaður Verkalýðsfélags Akraness vill að það komi skýrt fram að hann tilheyrir engum stjórnmálaflokki hvorki framsóknarflokknum né öðrum flokkum.  Enda er það mat formannsins að það sé andstætt hagsmunum félagsmanna Verkalýðsfélags Akraness að formaður félagsins tilheyri einum stjórnmálaflokki, þar sem félagsmenn VLFA koma úr öllum flokkum.

Það er líka mat formannsins að formenn stéttarfélaga eigi ekki að vera í pólitísku amstri fyrir einhvern einn stjórnmálaflokk þar sem félagsmenn stéttarfélaga koma eins og áður sagði úr öllum flokkum.

Eins og áður hefur komið fram þá tilheyrir formaður Verkalýðsfélags Akraness ekki neinum stjórnmálaflokki en vill að sjálfsögðu eiga gott samstarf við alla stjórnmálaflokka og með því er hagsmunum félagsmanna VLFA best borgið.

Formaður félagsins mun funda með starfsmönnum Sjúkrahúss Akraness í hádeginu á morgun.  Starfsmenn SHA eru verulega ósáttir með að vera með mun lakari kjör en starfsmenn sveitafélaganna hafa og það fyrir sambærileg störf. 

Krafa starfsmanna er hvellskýr, það er að sá launamunur sem ríkir á milli sveitafélaga og ríkis fyrir sambærileg störf verði leiðréttur.  Það kemur í ljós á morgun til hvaða aðgerða starfsmenn SHA grípa til að knýja fram leiðréttingu á sínum launakjörum. 

Formaður félagsins fundaði með starfsmönnum SHA í morgun vegna óánægju starfsmanna með að vera á lakari kjörum heldur starfsmenn sem gegna samskonar störfum hjá sveitarfélögunum.

Í morgun kom hins vegar tilkynning frá samninganefnd ríkisins um að þeir væru tilbúnir til að hækka kjör starfsmanna sem starfa eftir kjarasamningi SGS við fjármálaráðherra um allt að 4 launaflokka.  Nemur sú hækkun um 12.5% og mun gilda frá 1. maí.   Einnig mun koma 4% launahækkun 1. september svo samtals munu laun starfsmanna SHA hækka um  17%.

Starfsmenn SHA fagna að sjálfsögðu þessari hækkun en fólu jafnframt formanni Verkalýðsfélags Akraness að kanna hvort þessi hækkun dugi til að jafna laun þeirra á við starfsmenn sem starfa við sambærileg störf hjá sveitarfélögunum.

Það kom skýrt fram hjá starfsmönnum SHA að þær sætta sig við ekkert  annað en fullan jöfnuð á við starfsmenn sem starfa við sömu störf hjá sveitarfélögunum.

Ákveðið var að funda aftur á föstudaginn kemur.  Í millitíðinni mun formaður félagsins bera saman launakjör starfsmanna SHA við launakjör starfsmanna sveitarfélaganna, sem starfa við ræstingar, mötuneyti og í þvottahúsi að teknu tilliti til þeirra hækkana sem tilkynntar voru í dag.

Fundur var haldinn í hádeginu í dag með starfsmönnum Sjúkrahúss Akraness. Á fundinum gerði formaður félagsins starfsmönnum grein fyrir þeim launasamanburði sem honum var falið að vinna. Eins og áður hefur komið fram hér á heimasíðunni hafa forsvarsmenn SHA kynnt að laun starfsmanna munu hækka frá og með 1. maí um fjóra launaflokka og síðan aftur um 4% þann 1. september. Í samanburðinum kom fram að þegar báðar hækkanirnar verða orðnar að veruleika þann 1. september verði launamunur sem ríkt hefur á milli sambærilegra starfa hjá sveitarfélögunum orðinn nánast enginn.

Starfsmenn voru nokkuð sáttir með að sjá að búið yrði að jafna þennan launamun eins og áður sagði þann 1. september þótt vissulega hefðu starfsmenn viljað sjá allar hækkanirnar koma strax 1. maí. Þó ber þess að gæta að það eru atriði í þessum samanburði sem þarfnast nánari skoðunar og lúta að starfsmönnum í mötuneyti.

Mun formaður hafa samband við forsvarsmenn SHA og fara yfir þau atriði.

Starfsmenn voru sammála því að hverfa frá fyrirhuguðum aðgerðum og vonast til að leiðréttingar þessar komi strax til framkvæmda við næstu útborgun.

Frá og með deginum í dag býður sjúkrasjóður Verkalýðsfélags Akraness félagsmönnum sínum 25% afslátt af kortum Íþróttamannvirkja Akraneskaupstaðar. Um er að ræða fjórar gerðir af kortum:

Árskort í þrek og sund:

- fullt verð: 25.000 kr.   - með afslætti: 18.750 kr.

Árskort í sund:

- fullt verð: 15.000 kr.   - með afslætti: 11.250 kr.

6 mán. kort í þrek og sund:

- fullt verð: 14.900 kr.   - með afslætti: 11.175 kr.

3 mán. kort í þrek og sund:

- fullt verð: 9.900 kr.     - með afslætti: 7.425 kr.

Eins og áður hefur komið fram hér á síðunni var afkoma félagsins á síðasta ári afar glæsileg og má rekja þetta framtak sjúkrasjóðs til þeirrar niðurstöðu.

Kortin eru seld með afslætti á skrifstofu félagsins að Sunnubraut 13. Endilega hafið samband við skrifstofuna ef spurningar vakna.

Ársfundur Lífeyrissjóðs Vesturlands var haldinn í gær í Ólafsvík. Á fundinum var kosið um sameiningu Lífeyrissjóðs Vesturlands við Lífeyrissjóð Suðurlands og var sú tillaga samþykkt. Formaður félagsins fór á fundinum yfir áhyggjur sínar vegna þessarar sameiningar en rekstur þessara sjóða hefur verið gjörólíkur á undanförnum árum. Lífeyrissjóður Vesturlands hefur skilað mun betri ávöxtun hvort sem litið er til síðasta árs eða síðastliðinna tíu ára.

Raunávöxtun Lífeyrissjóðs Vesturlands árið 2005 var 10,3% á móti 6,6% hjá Lífeyrissjóði Suðurlands og munar hér um heil 3,7%. Á síðastliðnum 5 árum hefur meðaltal raunávöxtunar hjá Lífeyrissjóði Vesturlands verið 5,82% en hjá Lífeyrissjóði Suðurlands einungis 2,39%. Hér er munur upp á 3,43%. Sé tekið mið af raunávöxtun síðustu 10 ára er raunávöxtun hjá Lífeyrissjóði Vesturlands 6,51% en 4,14% hjá Lífeyrissjóði Suðurlands. Hér er munur upp á 2,37%.

Eins og sést á þessum tölum hefur Gylfi Jónasson framkvæmdastjóri Lífeyrissjóðs Vesturlands rekið sjóð okkar félagsmanna afar vel og eini ljósi punkturinn sem formaður félagsins sér við þessa sameiningu sá að Gylfi Jónasson verður framkvæmdastjóri hins nýja sameinaða lífeyrissjóðs. Fram kom í máli fulltrúa stéttarfélaganna á ársfundinum í gær að menn binda vonir við að Gylfi muni snúa fjárfestingarstefnu Lífeyrissjóðs Suðurlands til betri vegar og muni það skila okkar sjóðsfélögum betri sjóði til lengri tíma litið.