Hinn árlega kynning fyrir 16 ára unglinga á réttindum og skyldum á íslenskum vinnumarkaði verður haldinn í næstu viku. 

Kynning af þessum toga er nú haldin í þriðja skipti og er hún haldin í fullu samráði við Einar Skúlason æskulýðsfulltrúa Akraneskaupstaðar.  Það er mat stjórnar félagsins að það sé mjög brýnt að kynna vel fyrir unglingum hver séu réttindi þeirra og ekki síður hverjar séu skyldur þeirra gagnvart atvinnurekandanum þegar þau hefja störf á hinum almenna vinnumarkaði. 

Einnig er farið vel yfir alla þá þjónustu sem Verkalýðsfélagið býður sínum félagsmönnum uppá og einnig hversu mikilvægt það getur verið að vera félagi í öflugu stéttarfélagi.

Í lok kynningarinnar býður Verkalýðsfélag Akraness uppá grillaðar pylsur og gos.

Eins og flestir vita þá bætist 15.000 króna taxtaviðauki við alla mánaðarlaunataxta frá 1. júlí sl.  Af gefnu tilefni skorar Verklýðsfélag Akraness á félagsmenn sína og sér í lagi fiskvinnslufólk að fylgjast vel með því um næstu mánaðarmót hvort taxtaviðaukinn uppá  15.000 kr. komi ekki alveg örugglega fram á launaseðlinum.

Í þeim tilvikum þar sem laun einstaklinga eru samsett af launataxta kjarasamnings og ráðningarsamningsbundnum viðbótargreiðslum (yfirborganir) skulu viðbótargreiðslunnar lækka um allt að því jafn há fjárhæð og taxtaviðaukanum nemur. 

Hins vegar má alls ekki lækka umsamdar viðbótargreiðslur skv. kjarasamningum, t.d. afkasta- eða frammistöðutengda bónusgreiðslur. 

Eitt fiskvinnslufyrirtæki hér í bæ telur sig geta lækkað bónusgreiðslur til starfsmanna sinna um allt að jafn háa upphæð og taxtaviðaukanum nemur á þeirri forsendu að um yfirborgun sé um að ræða.  Í umræddu fyrirtæki var gerður skriflegur samningur um sérstakan bónus handa starfsmönnum sem klárlega er tengdur frammistöðu starfsmanna.  Það er því mat formanns félagsins að fyrirtækið hafi alls enga heimild til að lækka bónusgreiðslur til starfsmanna til jafns á við hækkun á taxtaviðaukanum.  Formaður félagsins hefur unnið að lausn á þessari deilu við fyrirtækið á undanförnum dögum og er þokkalega bjartsýnn á að það takist.  Takist það hins vegar ekki þá mun Verkalýðsfélag Akraness vísa málinu til Félagsdóms því hér er um gríðarlegt hagsmunamál að ræða fyrir umrædda starfsmenn. 

Verkalýðsfélag Akraness hélt kynningarfund í samráði við vinnuskólann fyrir 16 ára unglinga um réttindi og skyldur á vinnumarkaðinum.

Formaður félagsins fór yfir hin ýmsu réttindi sem eru í kjarasamningum á hinum almenna vinnumarkaði. 

Þá gerði formaðurinn unglingunum grein fyrir þeim skyldum sem launþeginn hefur gagnvart sínum atvinnurekanda.   

Einnig fór formaðurinn yfir starfsemi Verkalýðsfélags Akraness og hvað félagsmönnum stæði til  boða ef þeir væru  fullgildir félagsmenn. 

Stjórn Verkalýðsfélag Akraness er ekki í nokkrum vafa um mikilvægi þess að kynna fyrir unglingum réttindi og skyldur á íslenskum vinnumarkaði. 

Þegar kynningunni var lokið bauð félagið uppá grillaðar pylsur og gos með.  Hægt er að skoða myndir frá kynningunni með því að smella á myndir og síðan á kynning fyrir 16 ára unglinga.   

Þegar ný stjórn tók við Verkalýðsfélagi Akraness 19. nóvember 2003 var ákveðið af stjórn félagsins að gefa út tvö fréttabréf á ári sem dreift yrði í öll hús og fyrirtæki á Akranesi.  Ekki hafði áður verið gefið út fréttabréf með þessum hætti hjá Verkalýðsfélagi Akraness.

Eins og áður sagði þá eru tvö fréttabréf gefin út á ári. Kemur annað þeirra út rétt fyrir baráttudag verkafólks 1. maí og síðara fréttabréfið kemur út rétt fyrir jól.

Útgáfa á fréttablaðinu er liður í því að kynna starfssemi félagsins fyrir félagsmönnum og helstu málefnum sem eru á dagskrá hjá félaginu á þeim tíma sem blöðin koma út. 

Hægt er að skoða öll fréttablöðin sem gefin hafa verið út með því að smella á fréttablöð hér til vinstri.

Samtök atvinnulífsins hafa komið með tillögur um að hækka samningsbundna launataxta um 12 þúsund krónur á mánuði með svokölluðum taxtaviðauka.  

Formaður félagsins mun fara yfir þessar hugmyndir sem Samtök atvinnulífsins hafa nú lagt fram.  Við fyrstu skoðun virðist svo sem þessi 12 þúsund króna hækkun til handa verkafólki á hinum almenna vinnumarkaði dugi ekki til að jafna það sem starfsmenn sveitarfélaga og ríkis hafa verið að fá í hækkanir á sínum launum að undanförnu.

Það hlýtur að vera krafa félaga innan Starfsgreinasambands Íslands að þær kauphækkanir sem starfsmenn hjá ríkinu og sveitarfélögunum hafa verið að fá að undanförnu komi einnig til handa verkafólki á hinum almenna vinnumarkaði með sambærilegum hætti og þar gerðist.

Samt sem áður eru þessar hugmyndir Samtaka atvinnulífsins jákvætt skref í rétta átt.

Núna hefur Starfsgreinasamband Íslands boðað til formannafundar á þriðjudaginn kemur þar sem þessar hugmyndir verða til umræðu og því fagnar formaður Verkalýðsfélags Akraness. 

Starfsgreinasamband Íslands hélt formannafund í gær.  Einungis eitt mál var til umræðu á fundinum en það var tilboð sem Samtök atvinnulífsins hafa lagt fram til hækkunar á launatöxtum. Mun tilboðið taka gildi 1. júlí ef samkomlag næst.  Með þessu tilboði vilja SA reyna að forða því að kjarasamningum verði sagt upp í haust. 

Formaður Verkalýðsfélags Akraness er hlynntur því að reyna eftir fremsta megni að ná samkomulagi við Samtök atvinnulífsins.  En til að það geti orðið að veruleika þarf að þroska þessar hugmyndir sem SA hefur lagt fram. 

Það er mat formanns félagsins að 12 þúsund króna hækkun á launatöxtum handa verkafólki á hinum almenna vinnumarkaði sé einfaldlega of lág.  Rétt er að minna á að kjarasamningur sem gerður var við Starfsgreinasambandið 7. mars 2004 og gildir fyrir verkafólk á hinum almenna vinnumarkaði gaf langt um minna en aðrir samningar sem síðar voru gerðir. 

Hvað var sagt við verkafólk þegar kjarasamningurinn var gerður 7. mars 2004?  Jú, því var sagt að með því að gera kjarasamning til fjögurra ára og hafa kauphækkanir á samningstímanum hóflegar þá myndi það leiða af sér lága verðbólgu. Það myndi tryggja verkafólki kaupmáttaraukningu en ekki kaupmáttarskerðingu.

Raunin varð hins vegar sú að flest allir hópar sem sömdu á eftir Starfsgreinasambandinu sömdu um langtum meira heldur en verkafólk á hinum almenna vinnumarkaði fékk út úr sínum kjarasamningi.  Þessu til viðbótar hefur verðbólgan verðið langt fyrir ofan viðmið Seðlabankans sem er 2.5%. Nú er verðbólgan 7.6%.  Það liggur fyrir að stór hluti þess fólks sem tekur laun eftir kjarasamningi Starfsgreinasambandsins hefur orðið fyrir umtalsverðri kjaraskerðingu frá 7. mars 2004.   Það er einnig alveg morgunljóst að verkafólki á hinum almenna vinnumarkaði verður ekki kennt um þann óstöðugleika sem nú ríkir í þjóðfélaginu.

Ef það er einhver hópur í þessu samfélagi sem þarf að fá leiðréttingu á sínum launakjörum þá er það verkafólk á hinum almenna vinnumarkaði.  Það verður ekki lengur liðið að það eitt og sér sé látið viðhalda stöðugleikanum í þessu landi og sér í lagi þegar hvorki íslensk stjórnvöld né aðrir, eru tilbúnir að axla þá ábyrð.

Eins og áður sagði þá er formaður félagsins hlynntur því að reynt verði til þrautar að ná samkomlagi við Samtök atvinnulífsins.  Til að samkomulag náist verða Samtök atvinnlífsins þó að koma með hærri taxtahækkanir.  Einnig verður ríkisvaldið að koma að þessu samkomulagi.  T.d. á að gera þá skýlausu kröfu á ríkisvaldið að það hækki viðmið vaxtabóta til samræmis við hækkun á fasteignamati.  Hækkun á fasteignamati mun leiða til þess að vaxtabætur til fólks mun stórskerðast.

Rétt er að minna á að forsendur kjarasamnings SGS eru kolbrostnar á það bæði við verðbólguþáttinn og einnig þáttinn er lúta að kostnaðarhækkunum annarra kjarasamninga.  En það liggur ljóst fyrir að kostnaðarhækkanir annarra kjarasamninga eru langt yfir því sem kjarasamningur SGS gaf.

Starfsfólk sem áunnið hefur sér fullan orlofsrétt og er í starfi síðustu vikuna í apríl eða fyrstu vikuna í maí á rétt á orlofsuppbót. Fullt starf á orlofsárinu er 45 unnar vikur eða 1800 vinnustundir. Fyrir hlutastarf eða starfstíma skal greiða hutfallslega. Hafi starfsmaður látið af störfum á orlofsárinu þá er meginreglan sú að hann þarf að hafa náð 12 vikna samfeldu starfi til að eiga rétt á hlutfallsuppbót. Þetta er
þó breytilegt eftir kjarasamningum

Orlofsuppbót skal greiða þegar starfsmaður fer í sumarleyfi, en í síðasta lagi 15. ágúst.  Samkvæmt kjarasamningum sveitarfélaga skal þó greiða uppbótina 1. maí og samkvæmt samningum ríkisins 1. júní. Margir aðrir launagreiðendur greiða uppbótina 1. júní.

Hægt er að sjá hver orlofsuppbótin er eftir kjarasamningum með því að smella á meira.

Samningur SA og Starfsgreinasambandsins  22.400 kr.

Akraneskaupstaður og Ríkissamningur          22.400 kr.

Íj, Klafi, Fang og Norðurál                               99.605 kr.

Kjarasamningur Samiðnar (trésmiðir)           22.400 kr.

Stjórn Verkalýðsfélag Akraness óskar öllum sjómönnum vítt og breytt um landið og fjölskyldum þeirra innilega til hamingju með daginn.  Til fróðleiks má geta þess að það eru 116 sjómenn í sjómannadeild félagsins.  Formaður deildarinnar er Hjörtur Júlíusson. 

Félagsmenn athugið það eru tvö laus sumarhús sem félagið er með til útleigu fyrir félagsmenn. Um er að ræða vikuna 16. júní til 23. júní (næsta föstudag).  Það er annars vegar raðhús að Laufásvegi 31 í Stykkishólmi og hins vegar orlofshús nr. 1 að Eiðum.  Nú gildir reglan fyrstur kemur fyrstur fær.  Hægt er að skoða myndir frá þessum stöðum með því að smella á orlofshús.

Formaður Verkalýðsfélags Akraness tekur undir það með forseta ASÍ að það séu vonbrigði að ríkisstjórnin sé ekki tilbúin að koma til móts við kröfur verkalýðshreyfingarinnar um nýtt skattþrep fyrir lægri tekjur.  Einnig eru það gríðarleg vonbrigði að ekki skuli vera vilji hjá ríkisstjórninni til að endurskoða eftirlaun ráðherra, þingmanna og æðstu ráðamanna, en eftirlaun þessara aðila eru ekki í neinum takt við það sem almennt gerist í þessu þjóðfélagi.

Einnig er rétt að minna enn og aftur á að þingfarakaup þingmanna hafi hækkað frá 1. janúar 1998 til 1. febrúar 2006 um 114%, en lágmarkslaun verkafólks á hinum almenna vinnumarkaði hækkuðu um 70% á sama tímabili.  Þingfarakaupið var árið 1998 220.168 en er í dag 471.427 og hefur því hækkað um 251.259 krónur eða um 114% frá árinu 1998.  Lágmarkslaun voru árið 1998 63.399 en eru í dag 108.000 og hafa því hækkað um 44.601 krónur eða sem nemur 70% frá árinu 1998.

Með öðrum orðum þá hefur þingfarakaup alþingismanna hækkað tæplega sexfalt umfram lágmarkslaun hjá verkafólki frá árinu 1998.  Því stenst það alls ekki eins og einstaka þingmenn hafa haldið fram að lágmarkslaun hafi hækkað umtalsvert umfram önnur laun á síðustu árum.  Einnig sést á þessum samburði að það eru ekki verkamenn á hinum almenna vinnumarkaði sem bera ábyrgð á stigvaxandi verðbólgu hér á landi.

Aðkoma ríkisstjórnar að því samkomulagi sem verkalýðshreyfingin er hugsanlega tilbúin til að gera við Samtök atvinnulífsins er bráðnauðsynleg og sú aðkoma þarf að vera í þeim anda sem verkalýðhreyfingin hefur nú þegar kynnt fyrir talsmönnum ríkisstjórnarinnar.

Það er einnig alveg ljóst að mati formanns félagsins að það tilboð sem Samtök atvinnulífsins hafa lagt fram nægir ekki til að forða því að kjarasamningum verði sagt upp í haust.  Til dæmis verður að koma hærri hækkun á launatöxtum en 12 þúsund krónur á mánuði.  Einnig hafa Samtök atvinnulífsins boðið 6% hækkun handa því fólki sem starfar við tímamælda ákvæðisvinnu í ræstingum, en 6% hækkun handa starfsfólki sem starfar við tímamælda ákvæðisvinnu er lægri en 12 þúsund krónurnar sem SA hefur boðið að komi ofan á launataxtana.  Það verður að vera skýlaus krafa að starfsfólk sem starfar við tímamælda ákvæðisvinnu fái sambærilega hækkun og verið er að bjóða í taxtaviðaukanum.

Það er engum vafa undirorpið að það verður erfitt að ná þessu samkomulagi saman ef ríkisvaldið verður ekki tilbúið að koma mjög myndarlega að þessu samkomulagi.  Eins er það mat formanns félagsins að það verði að gera þó nokkrar lagfæringar á því tilboði sem SA hefur lagt fram til að verkalýðshreyfingin geti gengið að þessu samkomulagi.

Með því að smella hér er hægt að sjá minnisblaðið sem verkalýðshreyfingin hefur afhent fulltrúum ríkisstjórnarinnar.