Klukkan 10 í morgun lagðist Ingunn AK að bryggju með fullfermi af kolmunna, en skipið tekur rúm 2000 þúsund tonn.  Það er ekki annað hægt en að gleðjast yfir þessum tíðundum þar sem þetta er fyrsti kolmunnaaflin sem landað er hér á Akranesi frá því í desember 2004.  Öllum kolmunnaafla skipa HB Granda var landað á Vopnafirði á árinu 2005.   

Núna er staðan hins vegar  þannig að það er mun styttra fyrir skipin sem eru á kolmunnaveiðum að landa á Akranesi heldur en á Vopnafirði.  Það voru 560 sjómílur til Akranes frá þeim stað sem Ingunnin var að veiðum, en 660 sjómílur til Vopnafjarðar. 

Væntanlega verður öllum Kolmunnaaflanum sem skip fyrirtækisins afla landað á Akranesi alla vega á meðan kolmuninn heldur sig á því svæði sem Ingunn fyllti sig.  

Formaður Verkalýðfélags Akraness byggir það mat sitt á því að forsvarsmenn HB Granda hafa ávallt talað um að hagræðissjónamið séu látin ráða því hvar skip fyrirtækisins landa sínum uppsjávarafla.  

Eins og áður hefur komið fram þá hefur engum kolmunna verðið landað á Akranesi frá því í desember 2004 og hefur það leitt til þess að tekjur starfsmanna síldarbræðslunnar hafa dregist umtalsvert saman á síðasta ári. 

Forsvarsmenn HB Granda tilkynntu á starfsmannafundi með starfsmönnum bræðslunnar í fyrrasumar að engum kolmunna yrði landað á Akranesi árið 2005 vegna þess að styttra væri af kolmunamiðunum til Vopnafjarðar en til Akraness.

Vonandi munu forsvarsmenn HB Granda hafa sama  sjónarmið að leiðarljósi  þegar ákveðið verður hvar Faxi RE  og Ingunn AK verða látin landa kolmunnaafla sínum á þessari kolmunnavertíð.

Vegna mikillar eftirspurnar eftir framtalsaðstoð hjá VLFA hefur verið bætt við aukadegi þann 20. mars. Ennþá eru nokkrir lausir tímar föstudaginn 17. mars og mánudagana 13. og 20. mars. Félagsmenn geta bókað tíma á skrifstofu félagsins í síma 4309900.

Formenn allra félaga sem eiga aðild að kjarasamningi Norðuráls funduðu í gær ásamt trúnaðarmönnum.  Tilefni fundarins var að fara yfir ýmis mál er lúta að túlkun á atriðum í kjarasamningum.

Einnig var til umræðu orlof starfsmanna en ágreiningur hefur verið uppi um þann kafla samningsins og vonir standa til að það muni leysast farsællega. 

Eins og áður hefur komið fram þá eru nokkur atriði í samningum sem er ágreiningur um og hefur verið ákveðið að funda með forsvarsmönnum og lögmanni Norðuráls mjög fljótlega til að reyna að ná sameiginlegri niðurstöðu í þessum ágreiningi.

Fullbókað er orðið í alla tímana sem eftir voru í framtalsaðstoðina sem Verkalýðsfélag Akraness stendur fyrir, nú þegar eru nokkrir félagsmenn komir á biðlista.    Félagsmenn eru mjög duglegir að nýta sér þessa þjónustu og eru félagsmenn einnig mjög ánægðir með þessa þjónustu sem hefur verið veitt frá því ný stjórn tók við árið 2003.  það er verið að kanna hvort hugsanlega verði bætt við fleiri tímum, en því miður er alls óvisst hvort hægt verði að koma því við. 

Páskaúthlutun á sumarhúsum félagsins verður með sama hætti og gert var í fyrra.   Úthlutunin fer þannig fram að félagsmenn sækja um á skrifstofu félagsins fyrir 31. mars.  Mánudaginn 3. apríl verður síðan dregið úr þeim nöfnum sem sótt hafa um.  Haft verður samband við þá sem fá úthlutað.

Verkalýðsfélag Akraness vinnur nú að því í samvinnu við Símenntunarstöð Vesturlands að halda íslensku námskeið fyrir útlendinga- grunnstig II.  Fyrirhugað er að námskeið hefjist 20. mars nk. og mun námskeið fara fram í Fjölbrautarskóla Vesturlands.

Verkalýðsfélag Akraness finnur gríðarlegan áhuga hjá útlendingum fyrir þessu námskeiði.  Formaður félagsins hefur verið að hafa samband við forsvarsmenn fyrirtækja sem eru með erlent vinnuafl í sinni þjónustu.  Hafa forsvarsmenn fyrirtækja tekið mjög vel í þetta framtak hjá Verkalýðsfélagi og t.d hafa tvö fyrirtæki ákveðið að senda tíu Pólska starfsmenn sína á þetta námskeið. 

Fyrirhugað er að námskeið sé í 30 kennslustundir og kostnaður verði 26.000 þúsund.  Verkalýðsfélag Akraness vill minna fullgilda félagsmenn á að þeir eiga rétt á styrk frá félaginu sem nemur allt að 75% af námskeiðsgjaldinu.  Þannig að kostnaður fullgilds félagsmanns verður 6.500 krónur.  

Faxi RE 9 landaði hér á Akranesi í gær fullfermi af kolmunna til bræðslu.  Formanni félagsins var tjáð í gær af starfsmönnum síldarbræðslunnar að Ingunn AK væri einnig á leið til Akraness með fullfermi af kolmunna, eða um 2000 tonn.

Eins og áður hefur komið fram hér á heimasíðunni þá var engum kolmunna landað hér á Akranesi í fyrra.  Öllum kolmunna var landað á Vopnafirði.  Núna bregður hins vegar þannig við að mun styttra er af miðunum til Akraness heldur en til Vopnafjarðar.

Það hefur komið fram í máli forsvarsmanna HB Granda að einungis hagræðissjónamið eru látin ráða því hvar skip fyrirtækisins landa sínum afla.  Á þeirri forsendu eru skip fyrirtækisins væntanlega að landa afla sínum hér á Akranesi.

Verkalýðsfélag Akraness fagnar því að loksins sé kolmunni farinn að berast aftur til bræðslu hér á Akranesi. 

Hér er um umtalsverða hagsmuni að ræða fyrir starfsmenn síldarbræðslunnar því tekjur starfsmanna byggjast fyrst og fremst á fjölda vakta sem starfsmenn fá yfir árið.  Verkalýðsfélag Akraness hefur bent á að töluverðir hagsmunir séu í húfi fyrir samfélagið hér á Akranesi hvað varðar löndun á uppsjávarafla, nægir þar að nefna tekjur starfsmanna síldarbræðslunnar og einnig tekjur hafnarinnar.

Í fyrra var gríðarlegur samdráttur á launum starfsmanna vegna þess að engum kolmunna var landað hér á Akranesi, sem leiddi af sér umtalsverða fækkun á vöktum starfsmanna.

Nú er undirbúningur fyrir sumarið 2006 í hámarki á skrifstofu félagsins. Félagar eiga von á bæklingi inn um lúguna mjög fljótlega þar sem þeir geta sótt um orlofshús og íbúðir í sumar.

Helstu breytingar í sumar eru þær að bústaðirnir að Hlíð í Hvalfjarðarstrandahreppi og Klifabotni í Lóni detta út og í staðinn koma inn nýir bústaðir sem félagið hefur fengið leigða fyrir félagsmenn.

Í Úthlíð, Biskupstungum verða í boði bústaðirnir Breiðabunga og Stórabunga í nokkrar vikur í sumar. Hægt er að skoða myndir af þeim hér.

Einnig vorum við að fá bústað að Eiðum fyrir austan í leigu. Með honum fylgir bátur og veiðileyfi í Eiðavatni. Þó skal tekið fram að stutt er í sund á Egilstöðum ef veiði bregst. Hér er hægt að lesa lýsingu á þessum bústað.

Í Stykkishólmi er Verkalýðsfélagið áfram með í leigu vel búna íbúð í raðhúsi við Laufásveg. Húsið var byggt 2005 og hafa félagsmenn verið duglegir að nýta íbúðina í vetur. Hér er hægt að skoða myndir frá Stykkishólmi.

Auk nýju bústaðanna verða sem áður bústaðir okkar í Svínadal, Húsafelli, Ölfusborgum, Hraunborgum og íbúðirnar á Akureyri í sumarleigu.

Umsóknir um orlofshúsin þurfa að berast skrifstofu félagsins fyrir kl. 16:00 miðvikudaginn 12. apríl. Þeir sem fá úthlutað, fá það staðfest með bréfi.

Í gær hófst íslenskunámskeið fyrir útlendinga sem Verkalýðsfélag Akraness stendur fyrir í samvinnu við Símenntunarstöð Vesturlands.  Það er skemmst frá því að segja að fullt er á námskeiðið eða 18 manns. 

Flestir koma frá Smellinn og Laugafiski eða 14 einstaklingar.  Námskeiðið kostar 26.600 og fullgildir félagsmenn VLFA fá starfsmenntastyrk sem nemur 75% af námskeiðsgjaldinu.  Bæði Smellinn og Laugafiskur ákváðu að bjóða sínum erlendu starfsmönnum þannig að kostnaður þeirra er enginn og fagnar Verkalýðsfélag Akraness þeirri ákvörðun fyrirtækjanna.

Það er afar mikilvægt að erlendir starfsmenn sem hingað koma til starfa nái einhverjum tökum á íslensku máli til að geta aðlagast íslensku samfélagi.  Það er enginn spurning að þeir útlendingar sem sækja námskeið af þessum toga verða mun betur í stakk búnir að fylgjast með hver réttindi sín eru á íslenskum vinnumarkaði. 

Eftir rúman mánuð, nánar tiltekið 1.maí 2006, falla úr gildi takmarkanir á frjálsri för launafólks frá nýjum aðildarríkjum Evrópusambandsins.  Það þýðir að ríkisborgarar frá Eistlandi, Lettlandi, Póllandi, Slóvakíu, Slóveníu,Tékklandi og Ungverjalandi munu ekki þurfa að sækja um atvinnuleyfi hér á landi eins og verið hefur.

Eins og staðan er núna þarf að sækja um atvinnuleyfi fyrir ríkisborgara frá þessum löndum sem hingað koma til starfa.  Það tryggir að stéttarfélögin geta fylgst með að erlendum starfsmönnum séu tryggð lágmarkskjör sem eru í gildi samkvæmt íslenskum kjarasamningum.

Ef félagsmálaráðuneytið mun aflétta þessum takmörkunum 1. maí nk. þá munu stéttarfélögin ekki sjá neina ráðningarsamninga frá erlendu starfsmönnunum og munu þar af leiðandi eiga í töluverðum vandræðum með að tryggja að kjarasamningar séu virtir.

Formaður Verkalýðsfélags Akraness er afar undrandi á að félagsmálaráðuneytið hafi ekki ennþá tekið ákvörðun um hvað gera skuli eftir 1. maí nk. varðandi takmarkanir á frjálsri för launafólks frá ofangreindum löndum.   Fyrir liggur að íslensk stjórnvöld hafa rétt til að framlengja aðlögunarfrestinn um allt að þrjú ár til viðbótar.  Það hafa t.d Þýskaland, Frakkland og Austurríki ákveðið að gera.

Það er  mat formanns félagsins að  íslensk stjórnvöld eigi skýlaust að fylgja fordæmi þessa þriggja landa og framlengja aðlögunartímann um þrjú ár.    Það er einnig mat formannsins að það megi ekki undir nokkrum kringumstæðum afnema þær takmarkanir sem nú eru í gildi varðandi frjálst flæði launafólks frá nýjum aðildarríkum EES.  

Verkalýðsfélag Akraness hefur margoft þurft að hafa afskipti af fyrirtækjum sem mismuna erlendum starfsmönnum gróflega bæði hvað varðar aðbúnað sem og launakjör.  Einnig hrinti ASÍ þann 1. maí 2005 af stað átaki undir nafninu Einn réttur ekkert svindl.  Það var gert vegna þess að mjög mörg dæmi voru um að gróflega væri verið að brjóta á réttindum erlendra starfsmanna.   Hægt að lesa meira með því að smella á meira.

Sem dæmi þá er einungis einn mánuður síðan Vinnumálastofnun afturkallaði atvinnuleyfi hjá sex Litháum en verktaki hér á Akranesi hafði Litháana í sinni þjónustu.  Vinnumálastofnun afturkallaði atvinnuleyfin vegna margvíslegra brota verktakans. 

Því er afar mikilvægt að búið verði til sérstakt regluverk er varðar eftirlit með aðbúnaði og starfskjörum erlends verkafólks.  Það þarf einnig að veita stéttarfélögum mun víðtækari heimildir til gagnaöflunar leiki grunur á um að verið sé að brjóta á réttindum erlendra starfsmanna, en oft hefur reynst erfitt að fá gögn frá atvinnurekendum þegar grunur leikur  á broti.   Einnig er mjög mikilvægt að haldin verði nákvæm skráning á öllu því erlenda vinnuafli sem hingað kemur til starfa.  Þessi atriði verða stjórnvöld að tryggja áður en takmörkunum verða aflétt.

Formaður Verkalýðsfélags Akraness telur að reynslan hafi svo sannarlega sýnt okkur að stjórnvöld eru á engan hátt undir það búinn að hingað streymi erlent vinnuafl algjörlega án eftirlits. Myndi það  klárlega leiða til félagslegra undirboða og jafnvel auka á svarta atvinnustarfssemi.

Frjálst flæði verkafólks frá þessum löndum mun einnig skaða það markaðslaunakerfi sem víða gildir á íslenskum vinnumarkaði í dag.  Alla vega hræðist formaður VLFA það að atvinnurekendur muni í auknu mæli sækja í ódýrara vinnuafl og reynslan sýnir að erlent verkafólk hefur því miður oftar en ekki verið sett á lágmarkstaxta.  Það sjáum við í verkalýðshreyfingunni glögglega þegar atvinnurekendur sækja um atvinnuleyfi, meirihluti þeirra ráðningarsamninga sem fylgja atvinnuleyfunum sýna að erlendu starfsmönnum eru einungis greidd laun samkvæmt lágmarkstaxta.  

Vissulega vilja Samtök atvinnulífsins að stjórnvöld afnemi takmarkanir á nýjum aðildarríkjunum EES strax 1. maí nk.   Samtök atvinnulífsins vita að meirihluti erlends vinnuafls fer beint á lágmarkskjör og þannig komast atvinnurekendur hjá því að greiða þau markaðslaun sem eru í gildi á hinum ýmsu starfssvæðum.  

Eins og áður hefur komið fram þá má ekki undir neinum kringumstæðum afnema þær  takmarkanir sem nú er í gildi á frjálsu flæði verkafólks frá hinum nýju ríkum EES fyrr en búið verður að tryggja eftirfarandi:

• Að bein ráðning sé meginregla vegna starfa á íslenskum vinnumarkaði.
• Að erlent launafólk sem starfar hér á landi njóti sömu launa og starfskjara og annarra réttinda og þeir sem fyrir eru á vinnumarkaðnum.
• Að fullnægjandi úrræði séu til staðar fyrir stéttarfélögin til að fylgjast með að kjarasamningar og lög séu virt og hægt sé að fylgja því eftir eins og nauðsyn krefur.
• Að upplýsingar liggi fyrir um þá útlendinga sem hér eru að störfum, fjölda, hvaðan þeir koma, hverjir þeir eru, hvar þeir starfa og við hvað þeir starfa.

Þessi ofangreindu atriði eru grunnforsenda fyrir því að hægt sé að afnema takmarkanir á frjálsri för launafólks hingað til lands.

Það væri köld vatnsgusa framan í íslenskt verkafólk ef félagsmálaráðneytið myndi aflétta takmörkunum á frjálsri för launafólks frá nýjum ríkum ESS og það á baráttudegi launafólks, 1. maí.