Frá AkraneshöfnAðalfundur sjómannadeildar Verkalýðsfélags Akraness verður haldinn á morgun í fundarsal félagsins að Sunnubraut 13 og hefst hann kl. 14.

Dagskrá fundarins er með eftirfarandi hætti:

1. Venjubundin aðalfundarstörf.

2. Önnur mál.

Að sjálfsögðu er um margt að ræða þegar kemur að kjaramálum sjómanna og nægir að nefna að sjómenn eru nú búnir að vera án kjarasamnings í hartnær 4 ár sem verður að teljast með hreinustu ólíkindum. Það sem brennur helst á sjómönnum fyrir utan það að ná fram kjarasamningi er verðmyndun á sjávarafurðum en hún hefur verið á algjörum villigötum í gegnum árin enda gengur það ekki upp að útgerðaraðilar komi að verðmyndun eins og nú er í gegnum Verðlagsstofu skiptaverðs. Þetta er eitt af brýnustu verkefnunum að leysa enda liggur fyrir að fiskverð er 30-60% lægra samkvæmt Verðlagsstofuverði sé miðað við fiskverð á mörkuðum. Eins og áður sagði er þetta eitt af stóru málunum sem þarf að taka á.

Sjómenn eru hvattir til að mæta og fara yfir stöðuna eins og hún er í dag.  

Í gær var haldinn níundi samningafundurinn í kjaradeilu stéttarfélaganna við Norðurál, en eins og áður hefur komið fram þá var þessari deilu vísað til ríkissáttasemjara fyrir áramót. Fundurinn í gær var sá fimmti sem haldinn er undir handleiðslu ríkissáttasemjara en áður en deilunni var vísað til hans höfðu stéttarfélögin átt fjóra fundi með forsvarsmönnum Norðuráls.

Á fundinum í gær var farið yfir hin ýmsu mál er lúta að kröfugerð stéttarfélaganna og sumt skýrðist en annað ekki. Töluvert ber enn á milli deiluaðila en eins og í öllum kjaradeilum þá er það jákvætt á meðan aðilar tala saman, eins og allir vita þá ná samningsaðilar ekki samningi nema samræður eigi sér stað. Það er svo sem enginn launung á því að enn ber talsvert á milli deiluaðila, en stóru kröfurnar eru þær að grunnlaun starfsmanna hækki umtalsvert á fyrsta ári og tekið verði upp nýtt 8 tíma vaktakerfi með sambærilegum hætti og tíðkast hjá Elekm Ísland. Það liggur hins vegar fyrir að þeirri kröfu hafa forsvarsmenn Norðuráls alfarið hafnað.

Næsti fundur verður mánudaginn 16. febrúar og á þeim fundi mun væntanlega skýrast hvort grundvöllur sé fyrir frekari viðræðum eða hvort viðræðurnar sigli endanlega í strand, en að sjálfsögðu standa vonir til að forsvarsmenn Norðuráls komi með eitthvað útspil á þeim fundi sem færir deiluaðila nær hverjum öðrum.

Í gær kom aðalstjórn Verkalýðsfélags Akraness saman til fundar og var aðalmál fundarins að fara yfir þá grafalvarlegu stöðu sem upp er komin á hinum almenna vinnumarkaði. Það liggur fyrir að forsvarsmenn Samtaka atvinnulífsins hafa alfarið hafnað sanngjörnum kröfum Starfsgreinasambandsins um að stigin verði jöfn og ákveðin skref í því að dagvinnulaun verkafólks dugi fyrir lágmarksframfærslu, en eins og fram hefur komið fréttum þá er aðalkrafa SGS að lágmarkslaun verði komin uppí 300.000 kr. innan þriggja ára.

Það kom hvellskýrt fram á fundi aðalstjórnar félagsins í gær að þessu skilningsleysi og óbilgirni forsvarsmanna Samtaka atvinnulífsins verði að mæta af fullri hörku og ljóst að Verkalýðsfélag Akraness verður að búa sig undir hörð verkfallsátök á næstu vikum og mánuðum eins og önnur aðildarfélög innan SGS. Það er ekki og verður ekki hægt að láta það átölulaust að dagvinnulaun verkafólks skuli vera frá 201 þúsund krónum uppí rúmar 240 þúsund enda liggur fyrir að þessi laun duga alls ekki fyrir lágmarksframfærslu sem hið opinbera hefur gefið út.

Það ríkti gríðarleg gremja hjá stjórnarmönnum VLFA yfir því að hræðsluáróður Samtaka atvinnulífsins skuli enn á ný óma á ljósvakamiðlum hér á landi eins og enginn sé morgundagurinn, en slíkur hræðsluóhróður byrjar ætíð að óma þegar kröfur verkafólks eru lagðar fram. Það liggur fyrir að það hefur verið bullandi launaskrið á íslenskum vinnumarkaði undanfarin ár, enda hefur launavísitalan hækkað mun meira en almennar prósentuhækkanir sem um hefur verið samið á hinum almenna vinnumarkaði. Og hverjir bera ábyrgð á launaskriðinu? Að sjálfsögðu eru það stjórnendur fyrirtækja innan SA.

Einnig er rétt að benda á og rifja upp að fyrirtæki, ríki, sveitarfélög og aðrir þjónustuaðilar hafa þann möguleika að varpa sínum vanda yfir á neytendur og launafólk og gera það hiklaust. Núna er komið að verkafólki sem þarf nauðsynlega að fá lagfæringu og leiðréttingu á sínum kjörum til að geta staðið undir öllum þessum álögum sem á herðar þeirra hafa verið lagðar. 

Það liggur fyrir að hinir ýmsu starfshópar eins og kennarar, læknar, flugstjórar og aðrar háskólastéttir hafa samið um tugprósenta launahækkun og hafa því hækkað í sumum tilfellum um og yfir 100 þúsund krónur á mánuði og nú þegar verkafólk fer fram á að laun þeirra dugi fyrir lágmarksframfærslu ætlar allt um koll að keyra hjá forystu Samtaka atvinnulífsins.

Verkalýðsfélag Akraness tekur heils hugar undir með Alþjóðavinnumálastofnun, en þar á bæ er varað við of litlum launahækkunum og bent á að slíkt geti leitt til verðhjöðnunar og vandræðum í hagkerfum heimsins. Það er mjög mikilvægt að laun verkafólks hækki, enda mun það klárlega koma öllum til góða: sveitafélög munu fá hærri útsvarstekjur sem hugsanlega gerir það að verkum að þau geti haldið aftur af gjaldskrárhækkunum og það sama gildir um ríkissjóð, hærri tekjuskattur skilar sér í betri afkomu ríkissjóðs. Hvað með verslun og þjónustu? Að sjálfsögðu skilar betri afkoma verkafólks sér í aukinni veltu og hagnaði í verslunum og þjónustufyrirtækjum, sem sagt allir græða á að laun verkafólks hækki. Það liggur fyrir að sumar atvinnugreinar mala gull þessi misserin eins og ferðaþjónustan, stóriðjan og sjávarútvegurinn og verður það að teljast ótrúverðugur málflutningur þegar því er haldið fram að þessar greinar geti ekki lagfært kjör sinna starfsmanna svo um munar í komandi kjarasamningum, því það geta þær svo sannarlega.

Aðalstjórn Verkalýðsfélags Akraness samþykkti á fundinum í gær að hefja undirbúning að verkfallsaðgerðum í samvinnu við önnur félög Starfsgreinasambandsins. Fram kom á fundinum að stjórn félagsins er svo sannarlega tilbúin að láta sverfa til stáls í komandi kjaraátökum, því þessu óréttlæti sem íslenskt verkafólk þarf ætíð að lifa við verður að linna í eitt skipti fyrir öll. Samninganefnd Starfsgreinasambandsins fundar í húsakynnum Ríkissáttasemjara í dag kl. 13.

Í dag verður haldinn tíundi samningafundurinn hjá ríkissáttasemjara vegna kjarasamnings starfsmanna Norðuráls, en eins og áður hefur komið fram hér á síðunni þá rann samningurinn út um síðustu áramót.

Það er svo sem enginn launung á því að töluvert ber ennþá á milli samningsaðila en hins vegar er ætíð von að saman dragi með aðilum á meðan viðræður eiga sér stað. Það liggur fyrir að starfsmenn Norðuráls eygja von um góðan samning enda hefur rekstur Norðuráls blessunarlega ætíð gengið mjög vel, en fyrirtækið er eitt besta rekna fyrirtæki á landinu og hefur skilað hagnaði nánast öll þau ár sem það hefur verið starfrækt. Á þeirri forsendu vilja starfsmenn eðlilega fá aukna hlutdeild í þessari góðu afkomu.

Á fundinum í dag verður farið yfir hin ýmsu atriði er snúa að kröfugerð stéttarfélaganna, en ein aðalkrafan er hvellskýr: að grunnlaun fyrir dagvinnu hækki umtalsvert enda eru grunnlaunin í dag því miður alltof lág og þar verður að verða umtalsverð breyting á í komandi kjarasamningi.

Það er morgunljóst að miklu máli skiptir fyrir alla að samningsaðilar nái saman sem fyrst, því álögur á almenning í þessu landi hafa hækkað gríðarlega á undanförnum árum og misserum og því mikilvægt að starfsmenn Norðuráls sem og annað launafólk fái lagfæringu á sínum launum til að geta meðal annars mætt þessum kostnaðarauka sem heimili landsins hafa þurft að taka á sig í gegnum árin.   

Að vanda var líf og fjör á skrifstofu félagsins á öskudaginn, þegar furðuverur mættu á svæðið, sungu hástöfum og fengu sælgæti að launum. Hægt er að sjá nokkrar myndir frá öskudeginum með því að smella hér og einnig á Facebook-síðu félagsins. 

Í kvöld verður haldinn í Háskólabíói kl. 20 fundur undir yfirskriftinni "Verðtryggingin bíður dóms." Að þessum fundi standa Hagsmunasamtök heimilanna og hefur formanni Verkalýðsfélags Akraness verið boðið að sitja í pallborði. Verkalýðsfélag Akraness hefur svo sannarlega látið sig varða málefni og skaðsemi verðtryggingar í gegnum tíðina. Meðal annars er félagið með mál fyrir dómstólum um ólögmæti verðtryggingar er lýtur að 0% verðbólguviðmiði í greiðsluáætlunum. Eins og fram hefur komið í fjölmiðlum þá hefur EFTA dómstóllinn dæmt í þessu máli um að fjármálastofnunum sé óheimilt að miða við 0% verðbólgu í lánasamningum neytenda. 

Héraðsdómur Reykjavíkur dæmdi nýlega í máli Hagsmunasamtakanna að slíkt væri ólöglegt en dæmdi engin viðurlög hvað það varðar sem er óskiljanlegt og vonandi verður þessari niðurstöðu snúið við í dómskerfinu eins fljótt og verða má. 

Á fundinum í kvöld verða:

- Vilhjálmur Bjarnason (ekki fjárfestir), formaður HH 
- Jacky Mallet, Vitvélastofnun Íslands 
- Marinó G. Njálsson, tölvunarfræðingur 
- Þórður Heimir Sveinsson, lögmaður HH 
- Aðalsteinn Sigurðsson, lögfræðingur 
- Vilhjálmur Birgisson, formaður VLFA 
- Ólafur Ísleifsson, hagfræðingur

Samninganefnd Starfsgreinasambands Íslands mun koma saman til fundar hjá ríkissáttasemjara kl.11 í dag þar sem farið verður yfir stöðuna og næstu skref. Eins og fram hefur komið í fréttum þá hefur Starfsgreinasamband Íslands lagt fram sanngjarna og réttláta kröfugerð sem byggist á því að almennt verkafólk geti framfleytt sér og sínum á dagvinnulaunum og haldið mannlegri reisn. 

Krafan byggist á því að lágmarkslaun hækki jafnt og þétt og verði innan þriggja ára komin upp í 300.000 kr. Þetta er sáttarhönd sem Starfsgreinasambandið hefur rétt Samtökum atvinnulífsins, sáttarhönd sem gengur út á það að jafnt og þétt verði stigin skref í átt til þess að lágmarkslaun dugi fyrir þeim framfærsluviðmiðum sem hið opinbera hefur gefið út en slíku er alls ekki til að dreifa í dag. 

Ugglaust verður rætt á þessum fundi hvað gera skuli í ljósi þeirrar bláköldu staðreyndar að Samtök atvinnulífsins hafa alfarið hafnað þessari sanngjörnu kröfu og eru við sama heygarðshornið um að allt fari til fjandans í íslensku samfélagi ef að verkafólki verða réttar einhverjar kjarabætur sem heitið geta. Það liggur fyrir að áróðursmaskína Samtaka atvinnulífsins er afar vel smurð og því haldið fram að lágtekjufólk hafi fengið mestu hækkanirnar í gegnum árin og benda menn á prósentuhækkanir í því samhengi. Eins og fram hefur komið hér á heimasíðunni þá blekkja prósentur enda getur hátekjumaður sem fær 150.000 kr. launahækkun á mánuði fengið minni hækkun heldur en verkamaður sem fær 20.000 kr. hækkun og takið eftir, í prósentum. En kjarni málsins hlýtur að vera sá að 150.000 kr. launahækkun er hærri heldur en 20.000 kr. launahækkun. Prósentur blekkja og eru til þess fallnar að dýpka og auka hér misskiptingu og óréttlæti í íslensku samfélagi. Við verslum ekki með prósentum heldur íslenskum krónum.  

Formaður mun funda með forsætisráðherra í dag um hin ýmsu mál er lúta að hagsmunum íslenskrar alþýðu og að sjálfsögðu mun staða kjaramála koma þar sterkt inn. Það hefur verið ánægjulegt að heyra á hinum ýmsu ráðamönnum þjóðarinnar að það verði að lagfæra kjör íslensks verkafólks og þá hvatningu til verkalýðshreyfingarinnar að nota krónutöluhækkanir í stað prósentuhækkana. Það liggur fyrir að krónutöluhækkanir koma þeim tekjulægstu að sjálfsögðu hvað best. 

Formaður mun einnig ræða nýfallinn verðtryggingardóm við ráðherra og mikilvægi þess að ráðist verði sem fyrst í að afnema hér verðtryggingu á neytendalánum. Menn mega ekki sofa á verðinum þó verðbólgan sé lág um þessar mundir því óréttlætið sem fólgið er í verðtryggingunni er svo gríðarlegt þar sem fjármálafyrirtækin eru tryggð í bak og fyrir á meðan neytendur standa eftir varnarlausir. Þetta getur leitt það af sér eins og dæmin sönnuðu í hruninu að allur eignarhluti íslenskra heimila sogist burt þegar verðbólgan lætur á sér kræla og færist yfir til fjármálakerfisins. Enda gengur það ekki upp að hér sé fámenn útvalin elíta sem geti fengið að vera með fjármuni sína verðtryggða á meðan íslenskt launafólk nýtur ekki sömu réttinda.  

Sameiginlegur aðalfundur Almennrar deildar, Stóriðjudeildar, Opinberrar deildar, Iðnsveinadeildar og Matvæladeildar verður haldinn á Gamla kaupfélaginu miðvikudaginn 25. febrúar kl. 18:00.

Dagskrá:

1.               Venjuleg aðalfundarstörf

2.               Staða kjaramála

3.               Önnur mál

Boðið verður upp á súpu og brauð að afloknum fundi.

Félagsmenn eru eindregið hvattir til að fjölmenna!

Aðalstjórn Verkalýðsfélags Akraness

Formaður Verkalýðsfélags Akraness hélt kynningu fyrir nemendur í Fjölbrautaskóla Vesturlands í morgun um réttindi og skyldur á íslenskum vinnumarkaði og þá þjónustu sem stéttarfélagið veitir sínum félagsmönnum. 

Það var afar ánægjulegt að uppundir 40 nemendur sátu þessa kynningu og höfðu mikinn áhuga á starfsemi stéttarfélaganna. Fór formaður vel og vandlega yfir mikilvægi þess að launafólk sé vel upplýst og meðvitað um sín réttindi gagnvart sínum vinnuveitanda. Það er hlutverk stéttarfélaganna að upplýsa unga fólkið um réttindi og skyldur á hinum almenna vinnumarkaði og mikilvægi þess að unga fólkið sé meðvitað um að standa sig vel í vinnu og vera með gott orðspor. Staðreyndin er sú að gott orðspor í vinnu gefur fólki betri möguleika á að fá góð störf og góð kjör. 

Eftir kynninguna spurðu nemendur formann fjölmargra spurninga sem hann svaraði eins vel og kostur var á og ítrekaði hann við nemendur að kynna sér vel inni á heimasíðu félagsins öll þau réttindi sem félagið býður upp á. Það er dapurlegt ef fólk verður af réttindum sem það sannarlega á rétt á. Fleiri myndir frá kynningunni má sjá hér.