Á miðvikudaginn var haldinn aðalfundur allra deilda Verkalýðsfélags Akraness að undanskilinni sjómanandeildinni en þær deildir sem um ræðir eru matvæladeild, almenn deild, stóriðjudeild, iðnsveinadeild og opinber deild. 

Mætingin á fundinn var bara nokkuð góð, uppundir 30 manns, en þessi háttur hefur verið hafður á í nokkur ár að halda aðalfundi sameiginlega. Auk venjubundinna aðalfundarstarfa fór formaður yfir rekstur félagsins á liðnu ári og komandi kjarasamninga. 

Fram kom í máli formanns að reksturinn gengur mjög vel, það fjölgar jafnt og þétt í félaginu og félagið er það lánsamt að hafa eitt besta atvinnustig á landinu. Skiptir þar mestu máli Grundartangasvæðið og sú mikla uppbygging sem þar er og einnig hafa orðið algjör straumhvörf hjá HB Granda en þar hefur störfum í fiskvinnslu fjölgað gríðarlega á liðnum misserum. 

Formaður fór yfir komandi kjarasamninga og það var afar ánægjulegt að heyra þann tón og þá samstöðu sem ríkti á meðal fundarmanna um að kjör verkafólks verði að lagfæra í komandi kjarasamningum þannig að þau dugi í það minnsta fyrir lágmarksframfærslu og að það verði að gerast með góðu eða illu.  

Það er gríðarlega jákvætt að sjá þá miklu uppbyggingu og fjölgun starfa  sem orðið hefur hjá HB Granda hér á Akranesi en algjör viðsnúningur hefur orðið á liðnum árum hvað það varðar. Fyrst eftir sameininguna árið 2004 dró töluvert úr starfseminni en nú á liðnum misserum hefur störfum fjölgað jafnt og þétt. Sem dæmi er núna unnið allan sólarhringinn í loðnufrystingunni. Einnig er unnið myrkranna á milli í frystihúsi fyrirtækisins sem og í loðnubræðslunni. 

Það er einnig mjög jákvætt að sjá að HB Granda gengur gríðarlega vel. Skilaði fyrirtækið 5,6 milljörðum í hagnað á síðasta ári, ákveðið hefur verið að greiða til hluthafa 2,7 milljarða í arðgreiðslur og fyrirhuguð er frekari uppbygging fyrirtækisins hér á Akranesi. Það ber hinsvegar einn skugga á þetta allt saman og það lýtur að því að lagfæra verður kjör þeirra sem starfa í fiskvinnslunni. Ekki bara hjá HB Granda heldur allsstaðar. Það liggur algjörlega fyrir að fyrirtæki sem skilar svona gríðarlegum hagnaði geta greitt sínu fólki mun betri laun heldur en gert er í dag og það er hlutverk okkar í verkalýðshreyfingunni að sjá til þess að fiskvinnslufólk fái stærri hlutdeild í þessum mikla hagnaði sem sjávarútvegurinn er að skila. 

Það græða allir á því að laun verkafólks verði hækkuð, til dæmis ríki og sveitarfélög en verslun og þjónusta myndu einnig fá hlutdeild í slíku. Það verður að gerast að laun fiskvinnslufólks og annars verkafólks taki verulegum hækkunum í komandi kjarasamningum enda er afkoma til dæmis í fiskvinnslunni svo ævintýraleg að annað eins hefur ekki sést á liðnum árum. Þetta eru algjörir smáaurar sem um er að ræða í þessu samhengi og sem dæmi þá starfa um 600 manns í fiskvinnslunni hjá HB Granda vítt og breitt um landið og ef kjör þessa fólks yrðu hækkuð um 50.000 kr. á mánuði myndi launakostnaður einungis hækka um 360 milljónir á ári fyrir utan launatengd gjöld. Já, takið eftir þessu, einungis 360 milljónir og það er sáralítið í ljósi 5,6 milljarða hagnaðar. 

En aðalmálið er að fyrirtækinu gengur vel, störfum fjölgar og þegar búið verður að lagfæra kjör þessa fólks þá munu allir græða eins og áður sagði.  

Í morgun var dregið úr umsóknum um páskavikuna í orlofshúsum Verkalýðsfélags Akraness. Að venju sóttu margir um en því miður komast alltaf mun færri að en vilja. Í boði voru öll orlofshús félagsins en þau eru Efstiás og Bláskógar í Svínadal, Ásendi og Birkihlíð í Húsafelli, Hraunborgir, Ölfusborgir og Kjós. Einnig var hægt að sækja um að dvelja í einni af íbúðum félagsins á Akureyri. 

Leigutíminn er ein vika frá miðvikudegi til miðvikudags og hefst tímabilið í ár þann 1. apríl. Allir umsækjendur á hverjum stað voru númeraðir og til að gæta þess að allt færi vel fram voru ráðgjafar Virk fengnir til að sjá um að draga út númerin. Verið er að ljúka við að hafa samband við þá sem voru dregnir út.

Á formannafundi Starfsgreinasambands Íslands sem lauk rétt áðan var samþykkt með smávægilegum breytingum ályktun sem formaður Verkalýðsfélags Akraness og formaður Drífanda í Vestmannaeyjum lögðu fram en ályktunin lýtur að okurvöxtum bankanna. Það liggur fyrir að hér er um eitt mesta hagsmunamál íslenskrar alþýðu að ræða enda eru okurvextir fjármálakerfisins að leggjast afar þungt á skuldsetta alþýðu þessa lands. 

Ályktunin hljóðar á eftirfarandi hátt:

Formannafundur SGS tekur undir gagnrýni um mikinn og ólíðandi vaxtamun viðskiptabankanna á Íslandi. Það liggur fyrir að mörg heimili og fyrirtæki hérlendis berjast í bökkum vegna þeirra okurvaxta sem þeim standa til boða.

Það liggur líka fyrir að sá vaxtamunur sem hér ríkir þekkist varla í þeim löndum sem við viljum helst bera okkur saman við. Þessi mikli vaxtamunur og okurvextir leggjast þungt á skuldsetta alþýðu þessa lands.

Bankakerfið á Íslandi olli íslensku samfélagi gríðarlegum skaða og það er algerlega ótækt  að bönkunum, sem yfirtóku lánasöfn almennings og fyrirtækja með miklum afslætti eftir hrun, skuli í skjóli fákeppninnar leyfast að níðast áfram á almenningi með okurvöxtum og gjaldskrárhækkunum.

Fundurinn fagnar því að forsætisráðherra skuli standa með launafólki í þessu mikla hagsmunamáli  sem vaxtakjör fjármálakerfisins er, ásamt því að taka undir kröfur SGS vegna komandi kjarasamninga,  enda eru hér um brýnustu hagsmunamál alþýðunnar að ræða.

Fundurinn skorar á ríkisstjórnina, Alþingi og fjármálakerfið í heild sinni að taka höndum saman um að skapa hér eðlilegt og sanngjarnt lánaumhverfi þar sem vextir og önnur kjör fjármálakerfisins verði eins og í siðmenntuðum löndum.

Hinn árlegi jólafundur stjórnar- og trúnaðarráðs Verkalýðsfélags Akraness verður haldinn á morgun þar sem farið verður yfir liðið ár og þau hörkuátök sem framundan eru hvað kjarasamningsgerð varðar enda eru margir helstu kjarasamningar félagsins lausir eða að losna um þessar mundir. Fundurinn verður haldinn á Gamla Kaupfélaginu og eins og ætíð er góð mæting enda skiptir miklu máli fyrir alla aðila að fylgjast vel með því sem framundan er því gríðarlega mikilvægt er að menn séu vel upplýstir um þau atriði er lúta að komandi kjarasamningum og þeim átökum sem hugsanlega kunna að fylgja.

Þetta er búið að vera viðburðaríkt ár sem verður gert grein fyrir. Meðal annars hvatti Verkalýðsfélag Akraness allt verkafólk til að fella kjarasamningana sem voru gerðir 21. desember 2013 og er formaður ekki í neinum vafa um að hækkun orlofs- og desemberuppbóta um 32.300 kr. má þakka staðfestu Verkalýðsfélags Akraness og nokkurra annarra félaga. Það er ljóst að þessi ávinningur hefði ekki komið til ef þessi félög hefðu ekki staðið í lappirnar. Vissulega vildu menn svo sannarlega sjá meiri launahækkanir til handa íslensku verkafólki í síðustu samningum en því miður tókst það ekki. En rétt er að benda á að þessi hækkun orlofs- og desemberuppbótar er ígildi um 1,3 milljarða kostnaðarauka fyrir atvinnulífið ef bara er horft á þá 100.000 félagsmenn sem tilheyra ASÍ.

Það er alveg ljóst að komandi kjarasamningar munu reyna mikið á íslenska verkalýðshreyfingu því það er ekki hægt að láta það átölulaust að verkafólk sé með grunnlaun frá 201.000 kr. upp í 229.000 kr. Þetta eru laun sem eru langt undir öllum framfærsluviðmiðum sem hið opinbera hefur gefið út og morgunljóst að þessa launataxta þarf að hækka allverulega. Formaður félagsins tekur undir með fyrrverandi forstljóra N1 sem sagði í útvarpsviðtali ekki alls fyrir löngu að fyrirtæki sem ekki geta greitt dagvinnulaun sem nema um 300.000 kr. eiga vart tilverurétt á íslenskum vinnumarkaði. Eins og allir vita þá gengur fyrirtækjum í útflutningsgreinum mjög vel. Hagnaður sjávarútvegsfyrirtækja nemur þetta í kringum 40-60 milljörðum á ári, arðgreiðslur flæða úr greininni til eigenda án þess að það skili sér til þeirra sem skapa hagnaðinn sem er fiskvinnslufólkið. Hagnaður Norðuráls var mjög góður á síðastliðnu ári og er ljóst að í þeim kjaraviðræðum sem nú eru hafnar við Norðurál verður svo sannarlega látið sverfa til stáls þegar kemur að því að starfsmenn fái ríkari hlutdeild í góðri afkomu fyrirtækisins heldur en verið hefur.

Verkaýðsfélag Akraness er klárt í átök í komandi kjarasamningum og mun stjórn og trúnaðarráð meðal annars fara yfir alla þessa þætti á fundinum á morgun.

Á þriðjudaginn síðastliðinn komu fulltrúar Silicor materials á skrifstofu Verkalýðsfélags Akraness til að ræða um væntanlega sólarkísilverksmiðju fyrirtækisins á Grundartangasvæðinu. Fundurinn var mjög ánægjulegur og fróðlegur og var farið ítarlega yfir ýmislegt sem miklu máli skiptir í tengslum við nýju verksmiðjuna.

Það kom fram hjá fulltrúunum að það sé ekki spurning hvort þessi verksmiðja rísi heldur hvenær og stefnt er á að framkvæmdir eigi að geta hafist í janúar á næsta ári ef allt gengur upp. Það þarf ekki að fara í grafgötur með það hversu gríðarlega jákvæðar fréttir þetta eru enda mun þessi verksmiðja skila allt að 440 vel launuðum störfum. Þetta mun þýða að það verður samkeppni um vinnuafl á félagssvæði Verkalýðsfélags Akraness og samkeppni getur aldrei verið til annars en góðs enda munu fyrirtæki þurfa að keppa um gott starfsfólk.

Til að fá gott starfsfólk þurfa atriði eins og aðbúnaður, laun, vinnuumhverfi og vinnutími að vera góð. Þetta var meðal þess sem fulltrúar Silicor voru að kynna sér hjá formanni félagsins og fór formaður yfir það með þeim hvernig kjör á Grundartangasvæðinu eru og lagði áherslu á hversu gríðarlega mikilvægt það er að þessi nýi vinnustaður verði fjölskylduvænn. Lykillinn að því er að vaktakerfi fyrirtækisins séu 8 tímar en ekki 12 tímar. Þá upplýsti formaður félagsins fulltrúa Silicor um að mikil ánægja sé með vaktakerfið hjá Elkem Ísland sem byggist á því að starfsmenn vinna 6 vaktir á 5 dögum og eiga svo 5 daga frí en hér er um 8 tíma vaktir að ræða.

Eins og áður sagði var þetta ánægjulegur fundur og verður vel fagnað þegar framkvæmdir hefjast. Eins og áður sagði kom fram hjá fulltrúum Silicor að það sé ekki spurning um hvort heldur hvenær framkvæmdir hefjist en áætlað er að fyrsti áfangi verði klár í júní 2016 sem þýðir í raun og veru að ráðningar gætu þurft að hefjast um mitt næsta ár enda mun þurfa að fara fram víðtæk þjálfun áður en starfsemin fer á fulla ferð.

Í gærmorgun skilaði EFTA dómstóllinn loks frá sér álitinu sem lengi hefur verið beðið eftir og svaraði þar með þeirri mikilvægu spurningu um hvort fjármálastofnunum hafi verið heimilt að miða við 0% verðbólgu í greiðsluáætlunum og lánasamningum. Niðurstaðan var nákvæmlega sú sem vænst var, þegar greiðsluáætlun er gerð þá er óheimilt að gera ráð fyrir 0% verðbólgu, enda skekkir slíkt það mat sem lántaki getur lagt á raunverulegan kostnaði við verðtryggt lán. Í álitinu er þetta orðað svo: "Þegar láns­samn­ing­ur er bund­inn við vísi­tölu neyslu­verðs, sam­rým­ist það ekki til­skip­un 87/​102/​EBE að miðað sé við 0% verðbólgu við út­reikn­ing á heild­ar­lán­töku­kostnaði og ár­legri hlut­fallstölu kostnaðar ef þekkt verðbólgu­stig á lán­töku­degi er ekki 0%".

Það er óhætt að segja að fjármálaelítan nötri af hræðslu yfir þessu ráðgefandi áliti og reynir að gera eins lítið úr því eins og kostur er. Álitið er þó hvellskýrt og dómstólar hafa aldrei farið gegn ráðgefandi áliti EFTA-dómstólsins. En hvað þýðir það þegar fjármálastofnanir miða við 0% verðbólgu á 20 milljóna króna verðtryggðu láni til 40 ára með 3,85% vöxtum í greiðsluáætlun? Jú, lánið lítur alls ekki illa út á pappírum, það á strax að byrja að lækka og heildarkostnaðurinn við þetta 20 milljóna króna lán á þessum 40 árum á að vera samkvæmt greiðsluáætluninni 35 milljónir. En ef miðað er við 5,6% verðbólgu í greiðsluáætluninni, sem er meðaltalsverðbólga frá því mælingar á henni hófust, þá væri heildarkostnaðurinn vegna þessa 20 milljóna króna láns 109 milljónir! Sú blekking að miða við 0% verðbólgu eins fjármálastofnanir hafa gert í gegnum tíðina felur í þessu dæmi í sér kostnað upp á 74 milljónir sem hvergi kom fram á greiðsluáætlun og líklegt að lántakandi hefði hugsað sig tvisvar um hefðu upplýsingar um þann heildarlántökukostnaði legið fyrir.

Stjórn Verkalýðsfélags Akraness óskar íslenskum neytendum til hamingju með þessa niðurstöðu og er stolt af því að hafa farið með þetta mál alla leið, en nú tekur við áframhaldandi meðferð málsins í íslenska dómskerfinu.

Hægt er að lesa dóminn í heild sinni með því að smella hér.
Hægt er að lesa fréttatilkynningu frá EFTA dómsstólnum með því að smella hér.

Í dag var haldinn fyrsti samningafundur með forsvarsmönnum Norðuráls vegna komandi kjarasamnings en eldri samningurinn rennur út nú um áramótin. Það er óhætt að segja að samstarf þeirra stéttarfélaga sem eiga aðild að kjarasamningi Norðuráls hafi byrjað með nákvæmlega sama hætti eins og ætíð þegar kemur að því að semja um kaup og kjör á Grundartangasvæðinu. Með öðrum orðum, skemmdarverkastarfsemin heldur áfram.

Samninganefndin, sem samanstendur af fulltrúum stéttarfélaganna, meðal annars formönnum þeirra og trúnaðarmönnum, kom saman til fundar til að stilla saman strengi sína áður en farið yrði í að hitta forsvarsmenn fyrirtækisins. 80% allra starfsmanna sem starfa hjá Norðuráli greiða til Verkalýðsfélags Akraness og á þeirri forsendu gerir félagið að sjálfsögðu þá kröfu að formaður VLFA sé einnig formaður samninganefndarinnar en hann hefur verið formaður í öllum stóriðjusamningunum á Grundartanga frá árinu 2004.

Nú gerðist það hinsvegar að trúnaðarmaður RSÍ, Guðjón V. Guðjónsson, gerði kröfu um að formaður VLFA myndi ekki gegna formannsstöðu samninganefndar heldur yrði það aðaltrúnaðarmaðurinn. Slíkt kom ekki til greina af hálfu fulltrúa VLFA í ljósi þeirra miklu hagsmuna sem eru í húfi og reyndar einnig í ljósi sögunnar um gerð kjarasamninga á stóriðjusvæðunum enda hafa stéttarfélögin sem eiga aðild með VLFA að stóriðjusamningunum ítrekað unnið stórfelld skemmdarverk þegar kemur að kjarasamningsgerð stóriðjunnar.

Við þessa kröfu Guðjóns kættust fulltrúar hinna stéttarfélaganna sem hafa í gegnum árin reynt að skaða kjarasamningsgerð á stóriðjusvæðinu. Aðaltrúnaðarmaður lýsti hinsvegar yfir fullum stuðningi við formann VLFA sem formann samninganefndarinnar og kvaðst ekki ætla að gefa kost á sér í slíkt enda treysti hann formanni VLFA fullkomlega til að sinna því verkefni. Sagði hann meðal annars að samband hans við formann VLFA við undirbúning kjaraviðræðna hafi ávallt verið mjög gott. Guðjón, trúnaðarmaður RSÍ, ákvað í kjölfarið að bjóða sig sjálfur fram sem formann samninganefndarinnar þrátt fyrir að aðaltrúnaðarmaður og trúnaðarmenn VLFA sem og trúnaðarmaður FIT stéttarfélags hefðu viljað hafa formann Verkalýðsfélags Akraness í því hlutverki. Að sjálfsögðu studdu formenn og starfsmenn Stéttarfélags Vesturlands, VR, FIT og RSÍ Guðjón þrátt fyrir vilja meirihluta trúnaðarmannanna og var hann því kosinn formaður samninganefndar.

Fram kom hjá þessum fulltrúum og þá sérstaklega hjá formanni Stéttarfélags Vesturlands að Verkalýðsfélag Akraness tæki aldrei tillit til hinna stéttarfélaganna þegar kæmi að gerð kjarasamninga á Grundartanga. Þegar þessi orð féllu þráspurði formaður VLFA hvað það væri sem Verkalýðsfélag Akraness hefði ekki tekið tillit til sem hin stéttarfélögin hefðu lagt til þegar kemur að kjarasamningsgerð. Að sjálfsögðu var fátt um svör hvað það varðar. Hinsvegar er rétt að upplýsa að það er eitt sem Verkalýðsfélag Akraness hefur ekki tekið tillit til hjá hinum stéttarfélögunum. Það er til dæmis þegar samið var við Norðurál og Elkem árið 2011, þá gerðu þessi félög kröfu um að farin yrði leið samræmdrar launastefnu sem hefði gefið starfsmönnum einungis 11,4% hækkun. Niðurstaðan varð hinsvegar sú að það var samið um yfir 20% á báðum stöðum. Að sjálfsögðu kalla hin félögin þetta ekki góð vinnubrögð, að hafa ekki viljað fara leið samræmdrar láglaunastefnu eins og þau höfðu barist fyrir.

Þetta gerðist aftur núna í kjarasamningunum hjá Elkem þar sem þau kröfðust þess að farin yrði aftur leið samræmdrar láglaunastefnu upp á 2,8% en niðurstaðan varð hinsvegar sú að Verkalýðsfélag Akraness og trúnaðarmenn náðu fram rúmum 9%. Já, það er von að þetta ágæta fólk treysti ekki fulltrúa Verkalýðsfélags Akraness til að leiða komandi kjaraviðræður!

Það má segja að samstarf við þessa aðila sé þyrnum stráð. Þetta ágæta fólk hefur ítrekað reynt að leggja stein í götu kjaraviðræðna á Grundartanga og það hefur farið gríðarlega í taugarnar á þeim sá árangur sem náðst hefur umfram það sem samið hefur verið um á hinum almenna vinnumarkaði. Það er algjörlega magnað að forystumenn í stéttarfélögum skuli haga sér með þessum hætti. Þessi sömu félög neituðu til að mynda að taka þátt í yfirvinnubanni sem félagsmenn Verkalýðsfélags Akraness boðuðu í síðustu samningum og þau meira að segja reyndu að leggja stein í götu verkfallsboðunar í kjölfar yfirvinnubannsins.

Þessi uppákoma er eins og áður sagði ótrúleg og þetta ágæta fólk er greinilega ekki að horfa til hagsmuna starfsmanna þegar það hagar sér með þeim hætti sem það hefur gert. Þetta er alvanalegt, þessar árásir sem formaður verður fyrir og er greinilega orðin einhver persónuleg óvild enda er þessi atburðarás ekki skýrð með öðrum hætti. Formaður er til dæmis ekki búinn að gleyma uppákomunni sem varð árið 2011 þegar hin félögin neituðu að lýsa því yfir að trúnaðarmenn þeirra eigin félaga væru í þeirra umboði (sjá hér).

Það er allavega morgunljóst að samstarf við þessi stéttarfélög við gerð kjarasamnings á Grundartanga verður aldrei aftur. Mun félagið einbeita sér að því að reyna að ná viðunandi samningi fyrir félagsmenn en það er líka morgunljóst að þessi skemmdarverk gera ekkert annað en að skemmta atvinnurekandanum innilega. Þetta veikir kjarasamningsstöðu okkar og það veit þetta ágæta fólk en formaður veltir því fyrir sér hvort það sé kannski hinn raunverulegi tilgangur. Formaður mun boða til fundar í Bíóhöllinni strax í næstu viku þar sem hann mun fara ítarlega yfir þessi mál því þessi uppákoma er eitthvað sem er ekki hægt að líða og verður ekki liðið. Þáttur trúnaðarmanns RSÍ er þar stærstur í ljósi þess að hann fer gegn meirihluta trúnaðarráðs með framkomu sinni.

Af kjaraviðræðunum sjálfum er það að frétta að fulltrúar Verkalýðsfélags Akraness áttu síðan 2 tíma langan fund með samninganefnd Norðuráls þar sem ítarleg kröfugerð var lögð fram og var hún rökstudd ítarlega fyrir forsvarsmönnum fyrirtækisins. Á þessu stigi var lítið um viðbrögð af hálfu fyrirtækisins að ræða enda ætlar fyrirtækið að gefa sér tíma til að skoða kröfugerðina en þó mátti vera ljóst að það ríkti ekki mikil kátína með margt sem í kröfugerðinni kom fram. En við skulum vona það besta og fáum væntanlega viðbrögð frá forsvarsmönnum fyrirtækisins von bráðar. Það er alveg ljóst að framundan eru mjög erfiðar kjaraviðræður sem kalla fyrst og fremst á samstöðu á meðal starfsmanna í þeirri vinnu sem framundan er því án hennar næst enginn árangur.

Starfsmenn Norðuráls hafa hingað til mætt vel á fundi VLFA í BíóhöllinniFimmtudaginn 27. nóvember næstkomandi hefur Verkalýðsfélag Akraness boðað starfsmenn Norðuráls á fund í Bíóhöllinni Akranesi og hefst hann kl. 20:00.

Efni fundarins er óvænt uppákoma sem varð á fyrsta fundi samninganefndarinnar þann 20. nóvember síðastliðinn, en hægt er að lesa frétt um þá uppákomu með því að smella hér.. Einnig verður farið verður yfir kröfugerð þá sem mótuð hefur verið.

Nauðsynlegt er að sem allra flestir sjái sér fært að mæta því framundan er ströng barátta og nauðsynlegt að starfsmenn láti vilja sinn í ljós og sýni samstöðu

Fjölmennur fundur var haldinn í Bíóhöllinni á Akranesi í gær með starfsmönnum Norðuráls. Á fundinum fór formaður félagsins yfir þá ótrúlegu atburðarás sem átti sér stað á fyrsta samningafundi með forsvarsmönnum Norðuráls. Sú atburðarás hefur þegar verið rakin í frétt hér á síðunni.

Það fór ekkert á milli mála að stuðningurinn, samstaðan og einhugurinn sem ríkir á meðal starfsmanna var gríðarlegur á fundinum. Fram kom í máli fundarmanna að þessum skemmdarverkum sem ástunduð hafa verið í kjarasamningsgerð á Grundartangasvæðinu skuli ljúka í eitt skipti fyrir öll. Það voru skýr fyrirmæli um að starfsmenn Norðuráls muni ekki og ætli sér aldrei að taka þátt í einhverju sem heitir samræmd láglaunastefna eins og tíðkast hefur á undanförnum árum á hinum almenna vinnumarkaði.

Formaður Verkalýðsfélags Akraness fékk mikinn stuðning og hvatningu frá fundarmönnum um að halda áfram á þeirri braut sem félagið hefur verið á í að bæta og efla réttindi starfsmanna Norðuráls. Það komu fram skýr fyrirmæli á fundinum um að starfsmenn muni ekki undir nokkrum kringumstæðum sætta sig við að ekki verði hlustað á kröfuna um 8 tíma vaktakerfi með sambærilegum hætti og gerist hjá Elkem Ísland. Þetta var mjög hávær krafa á fundinum. 

Formaður fór yfir það með fundarmönnum að framundan séu erfiðar og krefjandi kjaraviðræður og því skiptir samstaða starfsmanna lykilmáli ef nást á viðunandi og góður árangur til handa starfsmönnum Norðuráls. Formaður fór einnig yfir það að rekstur Norðuráls hefur ætíð gengið vel sem skiptir miklu máli og er jákvætt fyrir alla. Einnig benti formaður á að álverð fari nú hækkandi á heimsmarkaði og sé nú að nálgast 2.100 dollara og hafi ekki verið hærra um alllanga hríð. Þessu til viðbótar liggur fyrir að allt stefnir í að í byrjun næsta árs verði hafnar framkvæmdir á stóru og öflugu stóriðjufyrirtæki, Silicor sólarkísilverksmiðju, á Grundartanga sem mun þurfa uppundir 440 manns í vinnu. Samkeppni um vinnuafl hefur jákvæð áhrif því öll samkeppni er af hinu jákvæða sem gerir það að verkum að fyrirtæki þurfa að vera vel samkeppnishæf í launum, aðbúnaði og öðru slíku.

Núna klukkan 10 mun hefjast fundur með forsvarsmönnum Norðuráls í húsakynnum Ríkissáttasemjara og væntanlega mun samninganefndin fá einhver viðbrögð við kröfugerðinni sem lögð var fram á fyrsta fundinum.