Eins og fram hefur komið í fjölmiðlum þá var í gær undirritaður stöðugleikasáttmáli milli aðila vinnumarkaðarins og stjórnvalda. Þá hafa aðilar vinnumarkaðarins einnig gengið frá samkomulagi um breytingar á gildandi kjarasamningi sem felur í sér að launþegar á almenna vinnumarkaðinum fresti enn frekar umsömdum launahækkunum.

Í dag er talað um að helmingur hækkunarinnar, kr. 6.750, komi til framkvæmda 1. júlí n.k. Einnig komi til helmingur hækkunar á ákvæðisvinnutöxtum, kostnaðarliðum og fastákveðnum launabreytingum. Hinn helmingur hækkunarinnar komi til framkvæmda 1. nóvember 2009. Þessar hækkanir áttu að koma til framkvæmda 1. mars sl. auk verðbóta á laun þar sem forsendur kjarasamninga eru löngu brostnar.

Þá er talað um að 3,5% launaþróunartrygging komi til framkvæmda 1. nóvember 2009 í stað 1. mars sl. Þá frestist einnig launahækkanir sem koma áttu til framkvæmda 1. janúar 2010 til 1. júní 2010. Samkvæmt þessum hugmyndum, sem byggja á verulegri kjaraskerðingu launþega á almenna vinnumarkaðinum, er hækkunin 1. júlí sú eina sem er föst í hendi þar sem endurskoðunar- og framlengingarákvæðið samningsins frestast og ákvörðun um framlengingu skal lokið eigi síðar en 27. október 2009. Staðan er því ekki glæsileg fyrir verkafólk sem vænst hafði verulegra breytinga á sínum kjörum í sumar. 

Á formannafundi Starfsgreinasambandsins á sl. þriðjudag var rætt um svokallaðan Stöðugleikasáttmála. Töldu einstaka fundarmenn það mjög óeðlilegt að kalla samkomulag aðila Stöðugleikasáttmála, sáttmála sem byggði á því að launþegar þyrftu að taka á sig verulegar kjaraskerðingar, aukna skattbyrði, aukið atvinnuleysi og þá væri verðlag í sögulegu hámarki og boðaðar væru verulegar skerðingar á opinberri þjónustu.

Það sem verra væri að frekari skattahækkanir, niðurskurður og verðlagshækkanir væru í kortunum.  Voru margir formenn SGS sammála því að ekki væri við hæfi að tala um Stöðugleikasáttmála og að rétt væri að kalla sáttmálann Kreppusáttmála.

Afstaða Verkalýðsfélags Akraness til þess samkomulags SA og ASÍ um að fresta enn einu sinni umsömdum launahækkunum hefur verið hvellskýr.  Samtök atvinnulífsins eiga að standa við hóflegan kjarasamning sem gerður var 17. febrúar 2008 ella verði samningum sagt upp.  Þetta er afstaða VLFA og hefur hún ekkert breyst. 

Verði það hins vegar vilji meirihluta verkalýðshreyfingarinnar að taka tilboði SA um frestun þá á að fara skýlaust með slíkt í allsherjaratkvæðagreiðslu á meðal þeirra starfsmanna sem starfa eftir umræddum kjarasamningum.  Allt annað eru ólýðræðisleg vinnubrögð.  

Hægt er að lesa stöðugleikasáttmálann í heild sinni með því að smella hér.

Hægt er að lesa samning ASÍ og SA með því að smella hér.

Á árinu 2017 greiddi sjúkrasjóður Verkalýðsfélags Akraness rétt tæpar 70 milljónir út í formi styrkja og sjúkradagpeninga. En það voru 1.245 félagsmenn sem nýttu sér þjónustu sjúkrasjóðs félagsins eða sem nemur rúmum 40% félagsmanna.

Verkalýðsfélag Akraness greiddi líka út námsstyrki til 343 félagsmanna eða 10% af félagsmönnum úr starfsmenntasjóði sem félagið er aðili að og nam sú upphæð 18,7 milljónum. 

Félagsmenn VLFA geta sótt um margvíslega styrki úr sjúkrasjóði félagsins en þessir styrkir eru fyrir utan sjúkradagpeninga sem koma þegar veikindarétti hjá atvinnurekenda er lokið má helst nefna eftirfarandi styrki:

·         Fæðingarstyrkur

·         Heilsuefling – líkamsrækt

·         Gleraugnastyrkur

·         Sálfræðiþjónusta

·         Styrkur vegna heilsufarsskoðunar

·         Dánarbætur

·         Heyrnatækjastyrkur

·         Göngugreining

Þetta eru þeir styrkir sem félagsmenn nýta hvað helst úr sjúkrasjóði félagsins en af þessum 70 milljónum sem greiddar voru út þá námu sjúkradagpeningar vegna veikinda 35 milljónum og þar á eftir kom greiðsla vegna fæðingarstyrkja upp á tæpar 8 milljónir. Heilsufarsstyrkurinn var einnig vel nýttur en um 430 félagsmenn nýttu sér þennan styrk. Meðal þess sem félagsmenn geta nýtt þann styrk í er kostnaður vegna tannlækninga en greiðsla vegna þessa styrks nam tæpum 7 milljónum. 296 félagsmenn nýttu sér heilsueflingarstyrkinn og voru greiddar rúmar 5 milljónir vegna heilsueflingar félagsmanna.

Það er gríðarlega ánægjulegt að sjá hversu vel félagsmenn nýta sér styrki sem félagið býður upp á enda voru eins og áður sagði yfir 40% félagsmenn sem nýttu sér þessa þjónustu félagsins.

Að lokum er rétt að geta þess að verkfallssjóður Verkalýðsfélags Akraness greiddi uppundir 40 milljónir úr sjóðnum vegna verkfalls sjómanna við útgerðarmenn á síðasta ári. En verkfall sjómanna var lengsta verkfall í 37 ára sögu ríkissáttasemjara en verkfallið stóð yfir í 10 vikur.

Við sem stjórnum Verkalýðsfélagi Akraness erum nokkuð stolt af þeirri þjónustu sem félagið býður sínum félagsmönnum upp á en alltaf má gera betur og félagið bætir nánast alltaf einhverjum réttindum úr sjóðum félagsins við á hverju ári.

Í dag leit formaður félagsins við í Heimaskaga en Hvalur hf. hefur húsnæðið á leigu undir starfsemi sína á Akranesi.

Í Heimaskaga er nú líf og fjör í nýjan leik þar sem fjöldi fólks starfar á tvískiptum vöktum. Mikil vinna hefur verið síðan hvalveiðar hófust að nýju þann og er ljóst að um heilmikla uppbót er að ræða fyrir þá sem þar starfa.

Vel lá á starfsfólki Hvals þegar formann bar að garði.

Eins og fram hefur komið hér á heimasíðunni þá stefndi Verkalýðsfélag Akraness fyrirtækinu Skaganum hf. fyrir hönd tveggja félagsmanna sinna eftir að ágreiningur kom upp vegna greiðslu launa í uppsagnarfresti og greiðslu fyrir skerðingar á hvíldartíma. Félagið reyndi ítrekað að ná sátt við fyrirtækið í þessum ágreiningi en án árangurs og því var félagið nauðbeygt að stefna fyrirtækinu og fá niðurstöðu fyrir dómstólum.

Síðastliðinn föstudag var dómsuppkvaðning í Héraðsdómi Reykjavíkur og vann Verkalýðsfélag Akraness annað málið en fyrirtækið var sýknað í hinu málinu.

Málið sem félagið vann laut að því að starfsmanni Skagans var sagt upp störfum og átti starfsmaðurinn ekki að fá greiddan uppsagnarfrest. Ástæða þess að fyrirtækið ætlaði ekki að greiða uppsagnarfrestinn var atvik sem átti sér stað í frítíma starfsmannsins.

Dómurinn var sammála þeim rökum Verkalýðsfélags Akraness í þessu máli um að fyrirtækinu kæmi ekki við það sem starfsmenn gera í sínum frítíma, en orðrétt segir m.a. í dómnum: „Ekki verður fallist á að umrætt atvik hafi réttlætt fyrirvaralausa uppsögn án greiðslu í uppsagnarfresti“.

Um erlendan starfsmanna var að ræða og vék dómari einnig að því í niðurstöðu dómsins að útskýra þurfi með afgerandi hætti hvað stendur í uppsagnarbréfi þannig það sé yfir allan vafa hafið að erlendir starfsmenn viti hvað þeir eru að skrifa undir, en um þetta segir í niðurstöðu dómsins: „Þó að stefnandi skilji að einhverju leyti íslensku og tali ensku verður ekki fallist á að með undirskrift hans á uppsögnina hafi falist að hann samþykki að fallast á að afsala sér launagreiðslum í uppsagnarfresti þó að hann hafi staðfest að hafa skilið að verið væri að segja sér upp en móðurmál hans er pólska, enda leitaði hann til Verkalýðsfélagsins til þess að fá upplýsingar um hvað fælist í uppsögninni“.

Skaginn var dæmdur til að greiða starfsmanninum tæpar 400 þúsund í uppsagnarfrest og 400 þúsund í málskostnað.

Hitt málið laut að starfsmanni sem átti að mati Verkalýðsfélags Akraness inni umtalsverðan rétt vegna skerðingar á hvíldartímum, en stór hluti af skerðingunni var vegna vinnu sem hann innti að hendi þegar verið var að setja nýjan búnað um borð í Málmey Sk 1.

Það er skemmst frá því að segja að Skaginn var sýknaður af þessari kröfu en Verkalýðsfélag Akraness hefur nú þegar ákveðið í samráði við umræddan starfsmann að áfrýja þeim dómi til Landsréttar enda telur félagið niðurstöðu þess dóms kolrangan. Málið laut að því að starfsmanninum var falið að fara í sjóferð með Málmey SK 1 en verið var að setja nýja vinnslubúnað um borð, þann fyrsta sinnar tegundar í heiminum. Vinnslubúnaðurinn byggir á Sub-chilling tækni þeirri er Skaginn 3X hefur þróað undanfarin misseri. Sub-chilling tæknin gerir m.a. notkun íss við geymslu fersks fisks óþarfa með tilheyrandi lækkun kostnaðar við veiðar og vinnslu.

Þessi vinnuferð kallaði á gríðarlega mikla vinnu þar sem vinnudagarnir voru langir og til mikillar skerðingar kom á hvíldartímum. Fyrirtækið hélt því fram að búið væri að greiða hvíldartímana en ekkert í málsgögnum studdi við þann málflutning forsvarsmanna fyrirtækisins.

Dómur tók vitnisburð forsvarsmanna Skagans trúanlegan en dómaranum fannst í ýmsum atriðum framburður starfsmannsins ekki trúverðugur þrátt fyrir að málflutningur forsvarsmanna Skagans hefi alls ekki verið byggður á neinum haldbærum gögnum.

Dómurinn er svo rangur að okkar mati að það nær ekki nokkurri átt enda héldu forsvarsmenn fyrirtækisins því fram að starfsmaðurinn hefði skrifað 186 tímum meira en hann vann og án þess að þeir hafi gert neinar athugsemdir við tímaskráninguna á sínum tíma. Þeir héldu því fram að starfsmaðurinn hefði „sennilega“ skrifað þessa umfram tíma vegna þess að hann hefði verið að rukka hvíldartímana. Í þessu samhengi er rétt að geta þess að Verkalýðsfélag Akraness átti í ítarlegum samskiptum við forsvarmenn fyrirtækisins áður en málið fór fyrir dóm með von um að hægt yrði að leysa málið og aldrei var vikið að því að starfsmaðurinn hafi skrifað fleiri tíma en hann vann. Öll þessi samskipti eru til og voru lögð fram fyrir dóminn.

Málatilbúnaður forsvarsmanna fyrirtækisins var afar ótrúverðugur svo ekki sé fastar að orði kveðið, en fyrirtækið hélt því fram í aðalmeðferðinni að launakerfi fyrirtækisins væri ekki nægilega gott þannig að það gat ekki reiknað launin nema með ákveðnum fjölda tíma á sólarhring og því hefði launadeildin þurft að „blöffa“ launakerfið og færa umfram tíma yfir á aðra daga.

Hugsið ykkur fyrirtæki eins og Skaginn3X sem hefur fengið margvísleg verðlaun fyrir að hanna háþróaðan tæknibúnað um borð í íslensk skip sem og hátæknibúnað sem seldur er erlendis segist vera með svo vanþróað launakerfi að það geti ekki tekið við öllum tímum sem starfsmenn inna af hendi fyrir fyrirtækið og þurfi að blöffa kerfið til að láta það ganga upp. Þetta er alls ekki trúverðugt hjá forsvarsmönnum fyrirtækisins enda sýnist formanni að það eina sem forsvarsmenn hafi náð að blöffa var dómarann í málinu!

Dómurinn kemur reyndar inná þetta með launakerfið og einnig inn á að ráðningarsamningar sem gerðir voru við starfsmanninn hafi verið ólöglegir. Þrátt fyrir það kemst dómurinn að þessari niðurstöðu að sýkna beri fyrirtækið og starfsmaðurinn hafi verið ótrúverðugur. En vegna þess að launakerfið var ekki að uppfylla lágmarksskyldur og ráðningarsamningurinn stóðst ekki grundvallarréttindi kjarasamninga var málskostnaður felldur niður.

Eins og áður sagði þá munum við klárlega áfrýja þessari niðurstöðu til Landsdóms og er lögmaður félagsins nú þegar byrjaður að undirbúa þá áfrýjun.

Eins og ætíð þegar fyrirtæki verða gjaldþrota þá kemur það í hlut stéttarfélaganna að verja áunnin réttindi sinna félagsmanna. 

Þessi réttindi lúta yfirleitt að því að tryggja að starfsmenn fái öll þau vangreiddu laun sem þeir eiga inni og þann uppsagnarfrest sem þeir hafa áunnið sér samkvæmt gildandi kjarasamningum.

Í þessari viku náði félagið að ganga frá greiðslu frá Ábyrgðarsjóði launa á uppsagnarfresti til handa starfsmönnum sem störfuðu hjá GMR Endurvinnslufyrirtækinu á Grundartanga en fyrirtækið varð gjaldþrota 1. febrúar 2017. Heildargreiðslan til þeirra starfsmanna sem áttu rétt á launum í uppsagnarfrestinum nam rétt tæpum 3 milljónum og hefur þeim greiðslum nú verið komið til starfsmanna.

Hinsvegar er rétt að geta þess að Verkalýðsfélag Akraness hefur gert athugasemdir við útreikning frá skiptastjóra á uppsagnarfresti starfsmanna vegna þess að skiptastjóri tók ekki tillit til þess að starfsmönnum var sagt upp störfum 25. janúar 2017 og því vantaði fjóra daga upp á kjarasamningsbundinn uppsagnarfrest að mati VLFA . Það er því mat félagsins að það vanti um eina milljón til að uppfylla greiðslur vegna uppsagnarfrests til starfsmanna.

Það er ljóst að mati VLFA að skiptastjóri túlkar uppsagnarfrest í kjarasamningum kolrangt enda miðast uppsagnarfrestur ætíð við mánaðarmót og því áttu starfsmenn GMR rétt til launa frá 25. janúar og uppsagnarfresturinn byrjaði síðan að telja frá mánaðarmótum.

VLFA hefur falið lögfræðingi félagsins að gera kröfu á Ábyrgðarsjóð launa hvað varðar þessa daga sem upp á vantar og málið er nú komið í lögfræðilega meðferð.

Það er gríðarlega mikilvægt fyrir launafólk að geta leitað til stéttarfélaga sinna í málum sem þessum til að tryggja að öllum réttindum sé til haga haldið þegar fyrirtæki verða gjaldþrota.

Eins og fram hefur komið hér á heimasíðunni þá taka launahækkanir starfsmanna Norðuráls hækkunum launavísitölunnar frá desember til desember ár hvert.

Nú liggur fyrir samkvæmt hækkun á launavísitölunni að laun starfsmanna Norðuráls munu hækka frá og með 1. janúar 2018 um 6,51%

Það þýðir að byrjandi á vöktum í kerskála er að hækka í heildarlaunum með öllu um 40 þúsund krónur á mánuði og starfsmaður með 10 ára starfsreynslu um rúmar 45 þúsund krónur.

Samkvæmt þessu mun byrjandi á vöktum í kerskála vera með í heildarlaun með öllu fyrir 182 vinnustundir rétt tæpar 610 þúsund krónur en starfsmaður með 10 ára starfsreynslu er með rétt rúmar 733 þúsund krónur á mánuði.

Iðnaðarmenn byrjandi á vöktum er að hækka um tæp 50 þúsnd á mánuði og iðnaðarmaður með 10 ára starfsreynslu á vöktum er að hækka um tæp 60 þúsund á mánuði.

Samkvæmt þessu mun iðnaðarmaður sem er byrjandi á vöktum vera með í heildarlaun með öllu fyrir 182 vinnustundir rétt um 780 þúsund krónur á mánuði en iðnaðarmaður með 10 ára starfsreynslu er með rétt tæpar 950 þúsund krónur á mánuði með öllu.

Það verður að segjast alveg eins og er að þessi launavísitölutenging hefur svo sannarlega skilað starfsmönnum Norðuráls góðum launahækkunum en í fyrra hækkuðu laun starfsmanna um 9% og núna um 6,51%

Rétt er að geta þess að orlofs-og desemberuppbætur hækka líka um 6,51% þannig að þær verða 214.923 kr. hvor fyrir sig eða samtals 429.466 kr. á ári.

Nýjar launatöflur munu birtast inni á heimasíðu félagsins á næstu dögum.

Nú er opið fyrir umsóknir um dvöl í orlofshúsum félagsins í páskavikunni. Um er að ræða vikuleigu frá 28. mars til 4.apríl.

Þar sem alltaf er mikil ásókn í dvöl í orlofshúsum þessa viku er sá háttur hafður á að þeir sem hafa áhuga leggja inn umsókn í pott. Einn pottur er fyrir hvert hús, og hægt er að sækja um á ákveðnum stöðum eða þeim öllum. Dregið er úr pottunum af handahófi, punktastaða skiptir ekki máli og ekki eru dregnir af punktar við úthlutun. Hringt er í þann sem dreginn er út og geti hann ekki nýtt sér vikuna, er dregið aftur. Greiða þarf leigu strax.

Tekið er á móti umsóknum á skrifstofu félagsins að Sunnubraut 13 og í síma 4309900. Einnig er hægt að senda nafn, kennitölu og símanúmer á netfangið This email address is being protected from spambots. You need JavaScript enabled to view it. til og með 28. febrúar 2018 en dregið verður þann 1. mars 2018.

Verkalýðsfélag Akraness gekk frá góðum kjarasamningi fyrir starfsmenn Elkem Ísland á Grundartanga í fyrra og núna liggur fyrir hverjar launabreytingar fyrir þetta ár verða en þær gilda frá 1. janúar 2018.

Starfsmenn hækka í launum um 5,51% auk þess sem þeir fá eingreiðslu sem nemur 120 þúsundum vegna breytinga á launatímabili

Laun byrjanda sem starfar sem ofngæslumaður á þrískiptum vöktum munu hækka um 30 þúsund með öllu og ofngæslumaður með 10 ára starfsreynslu um rúmar 35 þúsund krónur á mánuði.

Heildarlaun byrjanda sem starfar sem ofngæslumaður hjá Elkem verða frá og með 1. janúar 2018 rétt rúmar 500 þúsund krónur á mánuði og hjá ofngæslumanni með 10 ára starfsreynslu rétt tæpar 600 þúsund krónur.

Rétt er að vekja athygli á að vinnuskyldan á bakvið þessi laun hjá ofngæslumönnum á þrískiptum vöktum er 146 vinnustundir á mánuði auk 24 skilatíma á ári til námskeiðshalds. Heildarvinnutími á mánuði með skilatímum er því 148 tímar.

Auk þessa munu orlofs-og desemberuppbætur einnig hækka um 5,51% og verða því 213.130 hvor fyrir sig eða 426.260 kr. samtals á ári.

Vegna forfalla er nú laus vikan 3. til 10. júlí á Akureyri. 

Í íbúðinni eru tvö svefnherbergi, stofa, eldhús og baðherbergi með sturtu og þvottavél. Svefnpláss er fyrir fjóra í svefnherbergjum og hægt er að bæta við gestarúmum og barnarúmi. Sængur og koddar eru fyrir sex manns. Á svölum er gasgrill og svalahúsgögn.

Hægt er að skoða fleiri myndir frá Akureyri með því að smella hér.

Hægt er að bóka vikuna á skrifstofu félagsins Sunnubraut 13 eða í síma 430-9900.

Í dag áttu formaður Verkalýðsfélags Akraness og Ragnar Þór Ingólfsson formaður VR afar góðan og ánægjulegan þriggja tíma fund með Sólveigu Önnu Jónsdóttur sem býður sig fram sem formannsefni í kjöri til stjórnar í stéttarfélaginu Eflingu sem er stærsta stéttarfélagið innan Starfsgreinasambands Íslands.

Umræðan á fundinum snerist um mörg hagsmunamál alþýðunnar eins og mikilvægi þess að lagfæra kjör þeirra sem höllustum fæti standa í íslensku samfélagi.

Einnig var rætt um mikilvægi þess að verkalýðshreyfingin láti til sín taka hvað varðar hið tryllta umhverfi sem nú ríkir á húsnæðis-og leigumarkaðnum sem og það okurvaxta- og verðtryggingar umhverfi sem íslenskur almenningur þarf að búa við. Einnig var rætt um lífeyrissjóðskerfið en það er ljóst að verkalýðshreyfingin getur látið margt jákvætt til sín taka hvað það varðar eins og til dæmis að beita sér fyrir aukinni lýðræðisvæðingu innan sjóðanna sem og að fá lífeyrissjóðina til að taka þátt í fjármögnun á lítt hagnaðardrifnum leigufélögum.

Eins og áður sagði var þetta virkilega ánægjulegur fundur enda virðist vera ótrúlegur samhljómur í áherslum í framboði Sólveigar í mjög mörgum hagsmunamálum er lúta að hagsmunum launafólks og formanna VR og Verkalýðsfélags Akraness.

Formaður VLFA skynjaði gríðarlegan kraft, vilja og þor hjá Sólveigu Önnu til að láta virkilega gott af sér leiða nái hún kjöri sem formaður Eflingar og er formaður ekki í neinum vafa um að nái framboð hennar kjöri mun það hafa gríðarlega jákvæð áhrif á íslenska verkalýðshreyfingu.

Það mun svo sannarlega geta skipt sköpum fyrir þær hugsjónir og þau baráttumál sem Verkalýðsfélag Akraness hefur staðið fyrir á liðnum árum ef ný forysta með þann nýja kraft sem þau hafa boðað verður að veruleika innan Eflingar.

Það eru svo sannarlega spennandi tímar framundan í íslenskri verkalýðsbaráttu þegar og ef Efling verður komin með nýja forystu eins og VR, forystu sem tekur undir með Verkalýðsfélagi Akraness að hafna þessari brauðmolahagfræði sem æðsta forysta ASÍ hefur reynt að innleiða undir forystu forseta ASÍ.

Það er morgunljóst í huga formanns VLFA að það verður að skipta um skipstjóra í brúnni á ASÍ skútunni því skipstjóri sem fiskar ekkert og nýtur ekki trausts áhafnar, er með allt í skrúfunni með þeim afleiðingum að skútan rekur nánast stjórnlaus upp í brimgarðinn, verður að víkja.

Með breytingu á forystu Eflingar í takt við breytingarnar hjá VR ásamt nokkrum stéttarfélögum á landsbyggðinni sem eru mótfallin brauðmolakenningunni mun skapast gríðarlegt tækifæri til sóknar þar sem brauðmolakenningunni verður sturtað niður!  Teknar verða upp nýjar og kröftugar baráttuaðferðir við að lagfæra lágmarkskjör, skattbyrði lágtekju- og millitekjufólks ásamt því að berjast gegn græðgivæðingu á húsnæðis-og leigumarkaði sem og okurvöxtum og afnámi verðtryggingar.

Já mitt mat er að það eru virkilega bjartir tímar fyrir alþýðu þessa lands ef framboð Sólveigar nær kjöri enda er það mat formanns VLFA að ef hún nær kjöri þá muni hún jafnvel eftir að leiða íslenska verkalýðsbaráttu á komandi árum. Það er ljóst að ef þessi félög sem hafa sömu hugsjónir og áherslur taka höndum saman þá munu umtalsverðar jákvæðar breytingar eiga sér stað í íslenskri verkalýðsbaráttu og já þá kemur vor í verkó!