Eins og fram kom hér á heimasíðunni í gær þá var fyrsti samningafundur samninganefndar Elkem Ísland og Klafa haldinn hjá Ríkissáttasemjara í dag. Sá ótrúlegi atburður átti sér stað við upphaf fundanna að þrjú stéttarfélög af þeim fimm sem aðild eiga að kjarasamningi Elkem höfðu haft samband við atvinnurekendur og Samtök atvinnulífsins og greint frá að þeir fulltrúar sem sætu í samninganefndinn væru ekki þar í þeirra umboði. Í samninganefndinni situr formaður Verkalýðsfélags Akraness, trúnaðarmaður rafiðnaðarmanna, trúnaðarmaður VR, trúnaðarmaður FIT, formaður FIT og aðaltrúnaðarmaður starfsmanna sem jafnframt er fulltrúi allra stéttarfélaga.

Þegar fundurinn hófst upplýsti fulltrúi Samtaka atvinnulífsins að eftirtalin félög: Rafiðnaðarsamband Íslands, VR og Stéttarfélag Vesturlands viðurkenndu ekki sína fulltrúa í samninganefndinni. Það er með hreinustu ólíkindum að trúnaðarmenn viðkomandi félaga sem sátu í samninganefnd Elkem Ísland og hafa sumir hverjir setið árum saman í samninganefnd og undirritað kjarasamninga skuli nú ekki vera viðurkenndir af sínum stéttarfélögum. Sérstaklega í ljósi þess að engar athugasemdir hafa t.a.m. borist formanni Verkalýðsfélags Akraness vegna kröfugerðarinnar, viðræðuáætlunarinnar, eða varðandi það að fulltrúar samninganefndarinnar nytu ekki trausts sinna félaga. Að fá síðan upplýsingar á fyrsta fundi hjá ríkissáttasemjara er að mati formanns ekkert annað en algjört skemmdarverk og eru hagsmunir starfsmanna klárlega ekki hafðir að leiðarljósi við slík vinnubrögð.

Hins vegar er það algjörlega morgunljóst, að mati formanns félagsins, að þessi ótrúlega uppákoma í morgun beinist fyrst og fremst að formanni Verkalýðsfélags Akraness og er liður í skipulagðri skemmdarstarfsemi úr herbúðum Alþýðusambands Íslands. Það liggur fyrir að formaður Stéttarfélags Vesturlands er varaforseti Alþýðusambands Íslands og þessir aðilar hafa markvisst reynt að koma höggi á formann Verkalýðsfélags Akraness. En að nota sína eigin trúnaðarmenn í þessu skyni og skaða kjaraviðræður viðkomandi starfsmanna er til ævarandi skammar fyrir þá sem slíkt ástunda.

Formaður Verkalýðsfélags Akraness veit vel að þessi herferð stendur yfir núna og hefur í raun staðið yfir um alllanga hríð. Ástæða hennar er einföld: formaður hefur gagnrýnt forystu Alþýðusambands Íslands harðlega fyrir hin ýmsu slælegu vinnubrögð og linkind svo ekki sé nú talað um handónýta samræmda launastefnu þar sem ekkert tillit á að taka til starfsmanna fjársterkra útflutningsfyrirtækja.

Það er gríðarlega ánægjulegt og jákvætt að finna þann mikla stuðning sem kemur frá starfsmönnum Elkem Ísland og Klafa þar sem starfsmenn gagnrýna þessi vinnubrögð harðlega. Þessar athugasemdir stéttarfélaganna hafa ekkert að gera með kjaraviðræður, enda höfðu trúnaðarmennirnir unnið sína kröfugerð að langmestu leyti sjálfir. Vissulega er það erfitt fyrir varaforseta ASÍ, sem talað hefur fyrir langtímasamningi þar sem allir launþegar eiga að fá sömu kjarabætur algjörlega óháð getu einstakra atvinnugreina, að leggja fram kröfugerð upp á 27,5%. Enda er slíkt algjörlega í andstöðu við samræmda launastefnu ASÍ.

Formaður félagsins mun nú yfirfara þetta grafalvarlega mál með sínum félagsmönnum og það skemmdarverk sem hér er verið að vinna því það er í höndum starfsmanna að taka ákvörðun um hvernig á þessum málum er haldið enda er þetta jú þeirra lifibrauð. Það er líka hollt fyrir áðurnefnd stéttarfélög að átta sig á því að það eru félagsmennirnir sem borga jú laun starfsmanna stéttarfélaganna og við eigum að gæta að þeirra hagsmunum og ávalt að fara eftir því sem þeir óska eftir.

Myndir frá samstöðufundum starfsmanna Elkem og Klafa í gær eru nú aðgengilegar hér á síðunni. Hægt er að sjá þær með því að smella hér. 

Rétt í þessu lauk fyrri samstöðufundi starfsmanna Elkem Ísland og Klafa en eins og fram hefur komið hér á heimasíðunni þá stefnir í harða kjaradeilu vegna kjarasamnings áðurnefndra fyrirtækja.

Á fundinum gerði formaður Verkalýðsfélags Akraness, sem jafnframt er formaður samninganefndarinnar, yfir 50 starfsmönnum grein fyrir þeirri grafalvarlegu stöðu sem upp er komin í kjaradeilu starfsmanna við Samtök atvinnulífsins. Á fundinum ríkti gríðarlegur einhugur og samstaða á meðal starfsmanna um að sýna fulla hörku í komandi kjaraviðræðum. Boðað hefur verið til fundar samninganefndarinnar með Samtökum atvinnulífsins hjá Ríkissáttasemjara á morgun og mun þá koma í ljós hvort hægt verður að leysa deiluna án átaka eða ekki.

Það var ánægjulegt að sjá þá miklu samstöðu sem ríkti á meðal starfsmanna og kom fram í máli fundarmanna að þeir eru klárir til að mæta því ábyrgðarleysi sem Samtök atvinnulífsins hafa sýnt íslenskum launþegum að undanförnu af fullri hörku. Það er æði margt sem bendir til þess að það stefni í vinnustöðvun hjá áðurnefndum fyrirtækjum ef ekki næst niðurstaða á fundinum á morgun.

Nýafstaðinn samstöðufundur starfsmanna Elkem og Klafa samþykkti ályktun en þeirri ályktun segir m.a.:

"Það er svívirða af verstu sort af hálfu Samtaka atvinnulífsins að ætla að taka kjarasamningsbundinn rétt launafólks í herkví í óákveðinn tíma vegna ágreinings útvegsmanna við stjórnvöld vegna fiskveiðistjórnunarkerfisins." Einnig segir: "Fundurinn hafnar alfarið samræmdri launastefnu sem virðist byggjast á þriggja ára samningi með afar hófstilltum launahækkunum, algjörlega óháð getu hverrar atvinnugreinar fyrir sig. Það liggur fyrir að rekstrarskilyrði útflutningsfyrirtækja hafa verið afar góð um alllanga hríð vegna gengisfalls íslensku krónunnar. [...] Fundurinn lýsir yfir furðu sinni varðandi það miskunnarlausa ábyrgðarleysi Samtaka atvinnulífsins að ætla að stefna rótgrónum stöðugleika stóriðjufyrirtækja á Grundartanga í stórhættu vegna ágreinings um fiskveiðistjórnunarkerfið."

Ályktunina í heild sinni má lesa hér.

Seinni samstöðufundur starsfmanna Elkem og Klafa verður haldinn kl. 19 í kvöld og vonandi verður sami einhugurinn og samstaðan ríkjandi á þeim fundi.

Í morgun fundaði formaður félagsins með trúnaðartengiliðum Elkem Ísland. Trúnaðartengiliðirnir eiga sæti í aðalsamninganefnd vegna kjarasamninga starfsmanna Elkem Ísland við Samtök atvinnulífsins.

Á fundinum var farið yfir þá grafalvarlegu stöðu sem upp er komin, en eins og fram kom hér á heimasíðunni í gær þá hefur samninganefndin nú vísað kjaradeilunni til Ríkisáttasemjara. Nú hefur Ríkissáttasemjari boðað til fundar vegna kjarasamnings starfsmanna Elkem Ísland við Samtök atvinnulífsins og verður fundurinn haldinn í húsakynnum Ríkissáttasemjara næstkomandi föstudag.

Ákvörðun hefur verið tekin um að boða til fundar nk. fimmtudag með starfsmönnum en vegna fjölda starfsmanna þarf að halda fundinn í tvennu lagi. Verður fyrri fundurinn haldinn kl. 13 og sá seinni kl. 19. Báðir fundirnir verða haldnir á Gamla Kaupfélaginu.

Það var afar ánægjulegt að finna þann einhug sem ríkir í samninganefndinni vegna þeirrar deilu sem nú er komin upp. Eins og áður hefur komið fram hér á heimasíðunni þá var samninganefndin tilbúin að ganga frá samkomulagi um framlengingu á kjarasamningnum til 1. maí gegn eingreiðslu. Þessu tóku forsvarsmenn fyrirtækisins nokkuð jákvætt, en margt bendir til þess að Samtök atvinnulífsins hafi stoppað þetta mál alfarið af. Á þeirri forsendu er mjög líklegt að starfsmenn fyrirtækisins muni sýna fulla samstöðu og hörku við að ná fram sínum áherslum í komandi viðræðum. Eins og staðan er núna er það mat formanns að æði margt bendi til þess að það stefni í veruleg átök vegna þessarar deilu.

Rétt er að geta þess að starfsmenn Klafa munu einnig sitja þessa fundi á fimmtudaginn kemur. Klafi er þjónustufyrirtæki sem sér um upp- og útskipanir á Grundartanga og er í eigu fyrirtækjanna Elkem Ísland og Norðuráls. Þeir eru því í nákvæmlega sömu sporum og starsfmenn Elkem Ísland.

Samninganefnd Elkem Ísland fól formanni Verkalýðsfélags Akraness að vísa kjaradeilu starfsmanna til ríkissáttasemjara í morgun. Einnig fól samninganefnd Klafa ehf, sem er þjónustufyrirtæki sem sér um upp- og útskipanir á Grundartangahöfn, formanni að vísa sinni kjaradeilu til ríksisáttasemjara. En rétt er að geta þess að Klafi ehf er í 50% eigu Elkem Ísland og 50% eigu Norðuráls.

Samninganefndin hefur haldið tvo formlega fundi með Samtökum atvinnulífsins vegna áðurnefndra kjarasamninga en algjörlega án árangurs. Því til viðbótar gerði samninganefndin forsvarsmönnum Elkem Ísland og Klafa ehf tilboð sem var fólgið í því að framlengja samningana til 1. maí næstkomandi gegn eingreiðslu til handa starfsmönnum. Það er skemmst frá því að segja að forsvarsmenn Elkem Ísland tóku þessari hugmynd nokkuð vel en nú virðist sem Samtök atvinnulífsins hafi alfarið meinað fyrirtækinu að ganga frá slíku samkomulagi.

Samninganefndin harmar það að Samtök atvinnulífsins skuli hafa lagt stein í götu þessa samkomulags og það er ábyrgðarlaust af hálfu Samtaka atvinnulífsins að verða valdir að því að stefna áðurnefndri kjaradeilu í átök. Það er fátt sem virðist geta komið í veg fyrir að gripið verði til róttækra aðgerða í áðurnefndum fyrirtækjum. Það ríkir einhugur á meðal samninganefndar og þeirra fjölmörgu starfsmanna sem formaður hefur rætt við síðustu daga um að sýna fulla hörku í þeirri kjaradeilu sem starfsmenn eiga nú í.

Eins og áður hefur komið fram hér á heimasíðunni þá leggur félagið ofuráherslu á að útflutningsfyrirtæki sem hafa hagnast gríðarlega á gengisfalli íslensku krónunnar, skili því með einum eða öðrum hætti til starfsmanna sinna. Á þeirri forsendu hafnar samninganefnd áðurnefndra fyrirtækja alfarið samræmdri launastefnu þar sem ekkert tillit er tekið til góðrar stöðu útflutningsgreina.

Verkalýðsfélag Akraness mun standa fyrir fundi með starfsmönnum, væntanlega næstkomandi fimmtudag, þar sem farið verður yfir þá grafalvarlegu stöðu sem upp er komin og einnig til að kalla fram til hvaða aðgerða starfsmenn vilja grípa. Fundurinn verður haldinn bæði með starfsmönnum Elkem Ísland sem og Klafa og verður auglýstur nánar síðar.

Í morgun var haldinn fundur í samninganefnd Starfsgreinasambands Íslands og var á þeim fundi samþykkt að skoða hugmyndir forseta Alþýðusambands Íslands um samræmda launastefnu. Fyrir liggja hugmyndir að þessari launastefnu og það er morgunljóst að þær falla alls ekki að þeirri kröfugerð sem Verkalýðsfélag Akraness stendur fyrir.

Á þeirri forsendu hefur formaður Verkalýðsfélags Akraness tilkynnt samninganefnd Starfsgreinasambands Íslands að félagið segir sig frá þessu samstarfi og hefur félagið nú þegar tilkynnt Starfsgreinasambandinu formlega um að það hafi dregið samningsumboð sitt til baka. Einnig hefur félagið sent Ríkissáttasemjara bréf og vísað kjaradeilu félagsins á hinum almenna vinnumarkaði til hans á formlegan hátt.

Það er mat samninganefndar Verkalýðsfélags Akraness að þessi samræmda launastefna eins og hún er hugsuð af forseta Alþýðusambands Íslands og kynnt fyrir félögunum er ekkert annað en skemmdarverk gagnvart öllum þeim starfsmönnum sem starfa í útflutningi. Það er skoðun formanns að með þessari samþykkt samninganefndar SGS sé í raun og veru verið að fela forseta ASÍ og samninganefnd ASÍ að hefja viðræður við Samtök atvinnulífsins um samræmda launastefnu. Í því sambandi er félaginu minnistæður síðasti gjörningur samninganefndar ASÍ þegar stöðugleikasáttmálinn var undirritaður 25. júní 2009.

Formaður greindi einnig frá því á fundinum í dag að nýjar upplýsingar væru að koma fram sem lúta að viðmiði lágmarksframfærslu, en Harpa Njálsdóttir félagsfræðingur hefur reiknað út að einstaklingur þurfi að lágmarki 250.000 kr. til að geta framfleytt sér. Inni í þessu neysluviðmiði Hörpu er tekið tillit til þess að viðkomandi leigi einstaklingsíbúð og reki gamlan bíl. Núna er félagsmálaráðuneytið að vinna að sams konar lágmarksframfærsluviðmiði og á þeirri forsendu er gríðarlega mikilvægt að upplýst verði um þetta neysluviðmið því ef það byggist á sambærilegri niðurstöðu og hjá Hörpu Njálsdóttur þá er ljóst að sú krafa sem er verið að leggja fram núna varðandi lágmarkslaun er langt fyrir neðan viðmið um lágmarksframfærslu.

Þess vegna er útilokað að ganga frá kjarasamningum fyrr en þessir hlutir eru komnir á hreint því verkalýðshreyfingin getur ekki samið um lágmarkslaun sem duga engan veginn til þess að fólk nái lágmarksframfærslu. Hugmyndir forseta ASÍ varðandi lágmarkslaun eru að lágmarkslaun verði orðin 200.000 kr. í lok samningstímans sem er árið 2014. Þetta er að mati formanns algjör skandall því krafa okkar hefur verið sú að lágmarkslaun verði frá 1. desember 2010 kr. 200.000. Þessi hugmynd um samræmda launastefnu er galin og nægir að nefna í því samhengi að þær hugmyndir sem maður hefur séð varðandi samræmda launastefnu myndi þýða að verkafólk á töxtum gæti verið að fá á bilinu 10-13 þúsund króna hækkun á mánuði, á meðan menn eins og Gylfi Arnbjörnsson sem er með milljón á mánuði fengi 35.000 kr. hækkun. Kristján Gunnarsson, formaður Starfsgreinasambands Íslands sem var með skv. tekjublaði mannlífs á síðasta ári um 1,4 milljón væri að fá tæpar 50.000 kr. og Vilhjálmur Egilsson frkv.stj. Samtaka atvinnulífsins sem var með skv. sömu heimild rúma 1,8 milljón á mánuði fengi 63.000 króna hækkun. Er þetta samræmda launastefnan sem menn vilja stefna að? Að þeir tekjuhærri fá ennþá meira en fólk sem er á launum sem ekki duga til lágmarksframfærslu? Svar Verkalýðsfélags Akraness við því er nei, og sveiattan!

Það verður að gera þá skýlausu kröfu á Guðbjart Hannesson velferðarráðherra að hann skili þessari vinnu er lýtur að neysluviðmiðinu tafarlaust, þannig að verkalýðshreyfingin geti notað þessa viðmiðun varðandi lágmarkslaunin í sinni kjarasamningsgerð.

Grundarvallaratriðið er lýtur að samræmdri launastefnu er eins og áður hefur komið fram að það er verið að eyðileggja möguleika þeirra starfsmanna sem starfa í útflutningsfyrirtækjum ef það á að setja alla upp í einn og sama sporvagninn algerlega óháð getu hverrar atvinnugreinar fyrir sig. Slíku samráði mun Verkalýðsfélag Akraness ekki taka þátt í.

Strax eftir helgi mun félagið boða til áríðandi fundar með starfsmönnum Elkem Ísland, Klafa, Síldarbræðslunnar og starfsmönnum Norðuráls þar sem þeim verður gerð grein fyrir þessari nýju stöðu sem upp er komin. Starfsmenn þessara fyrirtækja starfa eftir sérkjarasamningum og öll þessi fyrirtæki tengjast útflutningi. Þessir starfsmenn munu núna taka ákvörðun um það á næstu dögum hvort þeir eru tilbúnir til að fara í verkföll til að knýja fram að þessi fyrirtæki skili þeim gríðarlega ávinningi sem þau hafa haft vegna gengisfellingar íslensku krónunnar að einhverru leyti til starfsmanna. Rétt er að geta þess að starfsmenn Norðuráls eru einungis með launaliðinn lausann þannig að það er ljóst að ekki mun koma til verkfalla í þeirri verksmiðju.

Um síðustu áramót rann launaliður kjarasamnings Norðuráls út. Á þeirri forsendu hefur Verkalýðsfélag Akraness fyrir hönd trúnaðarmanna verkamanna í verksmiðjunni, lagt fram kröfugerð fyrir verkamenn. Kröfugerðin var lögð fram rétt fyrir áramót og er heildarkostnaðarmat hennar um 27,5%. Hún er með sambærilegum hætti og kröfugerð vegna Elkem Ísland og starfsmanna í fiskimjölsverksmiðjunni.

Eins og margoft hefur komið fram hér á heimasíðunni og í máli og riti formanns félagsins þá er það stefna félagsins að þau fyrirtæki sem starfa í útflutningi skili þeim gríðarlega ávinningi sem þau hafa notið vegna falls krónunnar með einum eða öðrum hætti til sinna starfsmanna. Á þessari forsendu hefur Verkalýðsfélag Akraness algjörlega hafnað samræmdri launastefnu sem nú er unnið að af hálfu Alþýðusambands Íslands og Samtaka atvinnulífsins. Meðal annars gerði formaður grein fyrir þessari afstöðu sinni á ársfundi ASÍ í október síðastliðnum. Það er alveg morgunljóst að ef af þessari samræmdu launastefnu verður þá er búið að stórskemma og skaða möguleika starfsmanna sem starfa í útflutningsfyrirækjum til að sækja þann ávinning sem útflutningsfyrirtækin hafa fengið sökum falls íslensku krónunnar.

Það er ekki bara að álfyrirtækin séu að selja sínar afurðir í dollurum og borga laun í íslenskum krónum heldur hefur álverð hækkað umtalsvert á liðnum mánuðum og stendur álverð nú í 2500 dollurum pr. tonn. En ef formaður man rétt þá var meðalverð á álverði árið 2009 um 1700 dollarar. Þannig að þarna er nægt svigrúm til launahækkana og eigendur þessara fyrirtækja eiga að sjá sóma sinn í því að skila ávinningi sínum til starfsmanna.

Formaður á von á því að farið verði fram á að viðræður vegna launaliðar kjarasamningsins hefjist sem allra fyrst en félagið vill ítreka það að það mun sýna fulla hörku gagnvart þeim fyrirtækjum sem eru starfandi í útflutningi í þeim kjaraviðræðum sem nú eru framundan.

Stjórn og trúnaðarráð Verkalýðsfélags Akraness, sem er jafnframt aðal samninganefnd félagsins, kom saman til fundar í gær. Formaður fór yfir með samninganefndinni þá alvarlegu stöðu sem upp er komin í kjaradeilu við Samtök atvinnulífsins og rakti fyrir samninganefndinni hvað hefur verið að gerast. Einnig fór formaður yfir stöðu annarra kjarasamninga sem félagið er aðili að eins og við Elkem Ísland, Klafa, sveitarfélögin og Norðurál.

En aðalmál fundarins var fyrirhuguð vinnustöðvun í síldarbræðslunni og samþykkti samninganefnd félagsins að kosið verði um verkfall í verksmiðjunni, verkfall sem tekur gildi í byrjun febrúar og mun kosningin fara fram á morgun.  Formaður fór yfir tilboð sem félagið hafði gert forsvarsmönnum HB Granda til lausnar á þessari grafalvarlegu deilu og harmaði samninganefndin að ekki skuli hafa verið samningsvilji af hálfu Samtaka atvinnulífsins. Æði margt bendir til þess að þessi samræmda launastefna sem Gylfi Arnbjörnsson, forseti ASÍ og Vilhjálmur Egilsson, framkvæmdastjóri Samtaka atvinnulífsins, vinna nú ötullega að, sé að stórskemma stöðu þeirra starfsmanna sem starfa í fyrirtækjum tengdum útflutningi. Rétt er að það komi fram að gríðarlegur einhugur og samstaða ríkti í samninganefnd Verkalýðsfélags Akraness um verkfallsboðun í síldarbræðslunni og síðast en ekki síst að hafna alfarið þessari samræmdu launastefnu.

Formaður félagsins hefur gagnrýnt harðlega þá afskiptasemi forseta ASÍ af þeim kjaraviðræðum sem nú eiga sér stað og telur hann vera kominn langt út fyrir sitt valdasvið, enda liggur samningsumboðið hjá stéttarfélögunum en ekki hjá Alþýðusambandi Íslands.  

Í gær kom samninganefnd Starfsgreinasambands Íslands saman þar sem þrjú mál voru aðallega til umfjöllunar. Í fyrsta lagi var fjallað um hvort Starfsgreinasambandið ætti að taka þátt í samræmdri launastefnu. Þá var fjallað um hvort vísa ætti deilu Starfsgreinasambandsins til ríkissáttasemjara og í þriðja lagi voru sérkjarasamningar fiskimjölsverksmiðja ræddir. En eins og fram hefur komið hér á heimasíðunni þá hafa Samtök atvinnulífsins sagt að fiskimjölssamningarnir séu hluti af aðalkjarasamningi og nú stefnir í verkföll í fiskimjölsverksmiðjunum.

Formaður félagsins, sem er fulltrúi í samninganefnd Starfsgreinasambandsins, ítrekaði þá skoðun Verkalýðsfélags Akraness að það muni ekki taka þátt í samræmdri launastefnu, launastefnu sem byggist á 3 ára samningi þar sem allir launþegar verða settir upp í einn og sama sporvagninn, algjörlega óháð getu einstakra greina. Það hefur komið fram hér á heimasíðunni að félagið vill sækja meira á útflutningsgreinarnar, einvörðungu vegna þess að þær hafa fulla burði til að skila sínum ávinningi vegna falls krónunnar til starfsmanna.

Á fundinum var samþykkt að vísa deilunni til ríkissáttasemjara enda liggur fyrir að nú eru liðnar rúmar 6 vikur frá því kjarasamningur á hinum almenna vinnumarkaði rann út og hefur þessi vinna við að gera nýjan kjarasamning gengið afskaplega hægt. Því er full ástæða til að vísa deilunni til sáttasemjara. Nú þegar liggur fyrir að Starfsgreinasambandið er búið að vísa deilunni til ríksisáttasemjara og á þessari stundu er fátt sem getur komið í veg fyrir verkföll í síldarbræðslunum. En rétt er að ítreka það að Verkalýðsfélag Akraness gerði forsvarsmönnum HB Granda tilboð til að leysa þessa deilu, tilboð sem var hagstætt báðum deiluaðilum en eftir sólarhrings umhugsunarfrest var því hafnað af hálfu forsvarsmanna fyrirtækisins.

Verkalýðsfélag Akraness er nú byrjað af fullum krafti að undirbúa verkfall í fiskimjölsverksmiðjunni á Akranesi en félagið hefur átt í viðræðum við Samtök atvinnulífsins vegna þessa sérkjarasamnings án árangurs. Í framhaldi af þeim áranguslausu viðræðum setti formaður sig í samband við forstjóra HB Granda, en HB Grandi á fiskimjölsverksmiðjuna.  Formaður félagsins lagði fram hugmynd að lausn á deilunni en því miður höfnuðu forsvarsmenn fyrirtækisins þessari tillögu eftir sólarhrings umhugsunarfrest. Á þeirri forsendu var haldinn fundur með starfsmönnum í morgun þar sem var ákveðið að láta kjósa um verkfall en sú kosning mun væntanlega fara fram í byrjun næstu viku.

Það er rétt að geta þess að gríðarlegur einhugur var á meðal starfsmanna að grípa til aðgerða vegna afstöðu Samtaka atvinnulífsins til gerð nýs sérkjarasamnings fyrir starfsmenn Síldarverksmiðjunnar.

Það er því fátt sem virðist geta komið í veg fyrir það á þessari stundu að verkfall skelli á í fiskimjölsverksmiðjunni á Akranesi í byrjun næsta mánaðar. Það er í raun og veru með hreinustu ólíkindum að Samtök atvinnulífsins og forsvarsmenn HB Granda skuli ekki hafa verið tilbúnir til að taka sáttartillögu félagsins sem hefði í huga formanns klárlega verið báðum deiluaðilum til mikilla hagsbóta. Formaður hefur gert ríkissáttasemjara grein fyrir þeirri grafalvarlegu stöðu sem upp er komin í þessari deilu og mun hann fylgjast með framvindu mála eins og lög kveða á um.

Byrjunarlaun starfsmanna í fiskimjölsverksmiðjunum eru í dag rúmar 224 þúsund krónur fyrir fullan dagvinnumánuð. Það er ljóst að starfsmenn síldarbræðslunnar hafa orðið fyrir umtalsverðri kjaraskerðingu frá janúar 2008 en eins og allir vita þá hafa ríki, sveitarfélög, orkufyrirtæki og nánast allir aðilar varpað sínum vanda viðstöðulaust yfir á íslenska launþega.  Einnig hafa skuldir heimilanna stökkbreyst í kjölfar bankahrunsins.  

Rétt er að geta þess að sjávarútvegsfyrirtæki hafa verið að gera mjög góða hluti á grundvelli stöðu íslensku krónunnar og nægir að nefna í þessu samhengi að mjöl hefur hækkað frá árslokum 2007 til dagsins í dag um 141% og lýsið hefur hækkað frá sama tíma um 110%. Á grundvelli þessara staðreynda er ljóst að þessi fyrirtæki hafa fulla burði og getu til að hækka laun sinna starfsmanna umtalsvert enda eru störf í fiskimjölsverksmiðjunum afar sérhæfð.  Á þessum forsendum m.a. er morgunljóst að atvinnurekendum verður mætt af fullum þunga í komandi kjarasamningum þegar engan samningsvilja er að finna hjá þeim.

Það hefur margoft komið fram hér á heimsíðu félagsins og einnig kom það fram í máli formanns félagsins á ársfundi ASÍ að Verkalýðsfélag Akraness er ekki undir nokkrum kringumstæðum að fara að taka þátt í þessum sýndarleik er lítur að samræmdri launastefnu sem forseti Alþýðusambands Íslands vinnur nú að með félaga sínum Vilhjálmi Egilssyni. Staða atvinnufyrirtækja er afar mismunandi en það liggur fyrir að til dæmis á félagssvæði Verkalýðsfélags Akraness eru gríðarlega stór og mikil útflutningsfyrirtæki og á þeirri forsendu, með hagsmuni félagsmanna að leiðarljósi, mun félagið ekki taka þátt í slíkri samræmdri launastefnu.

Þessi samræmda launastefna sem þeir félagar og kunningjar Gylfi Arnbjörnsson, forseti ASÍ og Vilhjálmur Egilsson, framkvæmdastjóri Samtaka atvinnulífsins, vinna nú ötullega að, virðist byggjast á 3 ára kjarasamningi þar sem allir íslenskir launþegar eiga að fá sömu launahækkunina algjörlega óháð getu einstakra atvinnugreina.

Hvað þýðir þessi samræmda launastefna? Gefum okkur það sem að Samtök atvinnulífsins hafa ýjað að, það er hófstilltri prósentuhækkun með sambærilegum hætti og gerst hefur á Norðurlöndunum og eru þá menn væntanlega að tala um hækkun í kringum 3%. Það myndi þýða það að fiskvinnslukona eftir 15 ára starf fengi 6.700 kr. hækkun á mánuði eða að starfsmaður í fiskimjölsverksmiðju fengi um 7000 kr. hækkun miðað við þessar hugmyndir sem heyrst hafa. 

En hvað skyldu nú þeir félagar, Gylfi forseti ASÍ og Vilhjálmur Egilsson, fá ef þetta yrði hin samræmda launastefna upp á 3% launahækkun? Jú, Gylfi sem er með 1 milljón á mánuði fengi 30 þúsund króna hækkun á mánuði og Vilhjálmur Egilsson, framkvæmdastjóri SA, fengi uppundir 60 þúsund króna hækkun en hann var með tæpa 1.9 milljón í mánaðarlaun samkvæmt Tekjublaði Mannlífs. Eða forstjórar þessara stóru fyrirtækja, eins og Norðuráls, Elkem, HB Granda og annarra stórfyrirtækja. Flestir þessara manna eru með vel á þriðju milljón á mánuði og þeir fengju á bilinu 70 - 90 þúsund króna hækkun á mánuði. Er þetta samræmda launastefnan sem að forystumenn ASÍ vilja sjá? Auka ójöfnuð hér á landi. Eru það þeir tekjuhæstu sem þurfa að fá mest? Svar Verkalýðsfélags Akraness við því er klárlega nei.