Í húsakynnum Ríkissáttasemjara  var rétt í þessu undirritað samkomulag um hækkun á launalið kjarasamnings Norðuráls sem hefur verið laus frá 1. janúar sl. Formaður Verkalýðsfélags Akraness hefur átt í viðræðum við forstjóra fyrirtækisins á liðnum vikum til lausnar á þessari erfiðu kjaradeilu sem lauk eins og áður sagði með undirritun rétt áðan.

Stóriðjuskóli

Hækkun launaliðar á samningstímanum mun gefa allt að 21,4% og því til viðbótar var samið um stóriðjuskóla sem hefur verið baráttumál starfsmanna um alllanga hríð, en áætlað er að skólinn hefji starfsemi innan árs frá undirritun samkomulagsins. Hins vegar er það einlægur vilji fyrirtækisins að stóriðjuskólinn hefji starfsemi í janúar 2012 og reynt verður eftir fremsta megni að láta það verða að veruleika. Grunnnám stóriðjuskólans, sem mun taka 3 annir, mun gefa starfsmönnum viðbótarhækkun upp á 5% og framhaldsnám skólans mun gefa 4% til viðbótar.

Hækkun grunnlauna

Annað sem um var samið í þessum samningi er hækkun á grunnlaunum um 5,35% frá 1. janúar 2011. Síðan munu þeir sem hafa starfað í 3 ár eða lengur fá 3% hæfnisálag ofan á grunnlaun. Þessu til viðbótar kemur önnur hækkun 1. desember á þessu ári upp á 5,35%. Með öðrum orðum þá fær starfsmaður sem starfað hefur í 3 ár hjá Norðuráli 14,2% launahækkun á árinu 2011. Þeir sem hafa starfað skemur en í 3 ár munu hins vegar fá 11% launahækkun á þessu ári, en þeim er tryggt að um leið og þriggja ára starfsaldri verður náð þá muni starfsmenn fá 3% án þess að þurfa að uppfylla skilyrði sem kveðið er á um í hæfnisálagi. Þeir sem hefja störf eftir 1. september 2011 þurfa hins vegar að uppfylla viss skilyrði til að fá þessi 3%, en ekki mun koma til framkvæmda á því fyrr en eftir 3 ár, eðli málsins samkvæmt.

Einnig mun koma 1% hækkun á launflokkum iðnaðarmanna 116/216 annars vegar og 117/217 hins vegar. Aðrar almennar launahækkanir eru 3,25% 1. janúar 2013 og 3% 1. janúar 2014.

Orlofs- og desemberuppbætur

Orlofs- og desemberuppbætur fyrir árið 2011 og 2012 munu hækka úr 264.000 í 293.000, en rétt er að geta þess að orlofs-uppbótin sem greidd var út í júní verður leiðrétt afturvirkt um 5,35% eins og öll önnur laun sem greidd hafa verið frá 1. janúar 2011 til dagsins í dag. Orlofs- og desemberuppbætur fyrir árið 2013 verða kr. 302.000 og fyrir árið 2014 kr. 311.000.

Sem dæmi þá munu laun vaktamanns með 5 ára starfsreynslu hafa hækkað frá 1. september 2011 um tæpar  kr. 36.000 á mánuði og síðan kemur önnur hækkun 1. desember og þá hafa laun hans hækkað um kr. 61.000 tæpar. Þá hafa heildarlaun þessa vaktamanns hækkað úr kr. 439.000 upp í tæp kr. 502.000 á mánuði. Iðnaðarmaður með 5 ára starfsreynslu á vöktum mun hækka um rúmar 47.000 kr. á mánuði frá og með 1. september og eftir hækkunina 1. desember nk. þá hafa laun hans hækkað um rétt rúmar 80.000 kr. á mánuði. Þá hafa heildarlaun hans hækkað úr rúmum 564.000 kr. í rúmar 644.000 kr. á mánuði.

Eins og áður hefur komið fram þá verða öll laun starfsmanna jafnt þeirra sem eru í starfi núna sem og þeirra sem hafa verið í sumarafleysingum eða hafa látið af störfum leiðrétt um 5,35% aftur til 1. janúar 2011.

Heilt yfir er formaður félagsins afar ánægður með þessa niðurstöðu sem í raun og veru hefur kostað blóð, svita og tár, þótt vissulega sé það alltaf þannig þegar kjaraviðræður eiga sér stað að menn myndu vilja fá meira. Það er hins vegar sannfæring formanns að lengra verði ekki komist í þessari lotu, enda telur formaður að mjög margt jákvætt hafi náðst í þessum samningi og nægir að nefna stóriðjuskólann í því samhengi og einnig þá bláköldu staðreynd að frá og með 1. desember nk. er launamunur á milli vaktavinnumanna Norðuráls og Fjarðaáls orðinn óverulegur sem var jú eitt af stóru baráttumálunum í þessum viðræðum. Það verður að teljast afar góð niðurstaða miðað við horfurnar í kjaraviðræðunum á liðnum mánuðum.

Formaður félagsins mun kynna þennan samning rækilega fyrir starfsmönnum og verða kynningarfundir haldnir á Gamla Kaupfélaginu sem hér segir:

• Mánudaginn 26. september kl. 16
• Þriðjudaginn 27. september kl. 17
• Miðvikudaginn 28. september kl. 17
• Fimmtudaginn 29. september kl. 17

Hægt verður að kjósa um samninginn að aflokinni kynningu og einnig verður hægt að kjósa á vinnustaðnum á skrifstofu aðaltrúnaðarmanns strax eftir helgi.

Að lokum vill formaður VLFA hvetja alla þá sem vilja fá nánari upplýsingar um innihald samningsins að vera óhrædda við að hringja í sig hvenær sem er, en sími formanns er 865-1294.

Húsakynni ríkissáttasemjaraBoðað hefur verið til samningafundar í húsakynnum ríkissáttasemjara á morgun kl. 10 vegna launaliðar kjarasamnings Norðuráls. Eins og áður hefur komið fram hér á heimasíðunni þá rann kjarasamningur starfsmanna út um síðustu áramót og hafa starfsmenn því verið án launahækkana í rétt um 9 mánuði.

Formaður hefur átt í óformlegum viðræðum við Ragnar Guðmundsson, forstjóra Norðuráls, um mikilvægi þess að ná lausn í þessari erfiðu deilu en það mun skýrast á fundinum á morgun hvort það takist eða ekki. Eins og staðan er í dag er formaður félagsins nokkuð vongóður um að loksins sjái fyrir endann á þessari erfiðu deilu. Enda er gríðarlega mikilvægt að starfsmenn fái launahækkanir í ljósi þess að allt í íslensku samfélagi hefur hækkað umtalsvert á liðnum misserum. Á þeirri forsendu er orðið erfitt fyrir íslenska launþega að láta enda ná saman á meðan allt hækkar eins og áður sagði en launin standa í stað.

Ef samningur næst um launalið á morgun mun formaður kynna sínum félagsmönnum vel og rækilega innihald þess samnings og nú er bara að vona að það sjái fyrir endann á þessari erfiðu deilu eins og áður sagði.  

Vegna forfalla er bústaður félagsins í Kjós laus nú um næstu helgi, 23.-26. september.Í bústaðnum eru þrjú tvíbreið rúm auk þess sem aukadýnur eru til staðar en nánari upplýsingar um bústaðinn er að finna hér.

Hægt er að bóka bústaðinn með því að hafa samband við skrifstofu félagsins í síma 4309900 eða á félagavefnum.

Það  er þyngra en tárum taki að verða vitni að því hvernig svokallaðar vinaþjóðir koma fram við smáþjóð eins og okkur Íslendinga.  Í kjölfar bankahrunsins settu Bretar á okkur hryðjuverkalög sem hafa að öllum líkindum kostað þjóðina tugi milljarða króna og því til viðbótar liggur fyrir að orðspor þjóðarinnar hefur beðið verulegan skaða af á alþjóðavettvangi vegna þessarar ákvörðunar breskra stjórnvalda.

Áfram halda þessar svokölluðu vinaþjóðir að höggva í sama knérunn en Bandaríkjaforseti tilkynnti fyrir nokkrum dögum að gripið yrði til diplómatískra aðgerða gegn Íslandi vegna hvalveiða Íslendinga.

Formaður félagsins spyr, hvað eru bandarísk stjórnvöld að skipta sér af hvalveiðum Íslendinga í ljósi þeirra staðreynda að hvalveiðar Íslendinga eru löglegar og alþjóðleg viðskipti með hvalaafurðir eru í samræmi við alþjóðlegar skuldbindingar.

Að fá slíka hótun frá stórveldi eins og Bandaríkjamönnum er grafalvarlegt í ljósi þeirra staðreynda að það liggur fyrir að veiðar Íslendinga á hrefnu og langreyðum eru byggðar á löglegum og traustum vísindalegum grunni og það er skylda íslenskra stjórnvalda að mótmæla svona ofbeldi af fullri hörku.

Það er stórmál ef stórþjóðir eins og Bandaríkin ætla að skipta sér af því hvernig við nýtum  okkar sjávarauðlindir sem eru nýttar samkvæmt útgefnum kvótum að fenginni ráðgjöf frá Hafrannsóknarstofnun.

Það vita allir að afkoma okkar Íslendinga byggist að stórum hluta á sjávarfangi en um 50% gjaldeyristekna þjóðarinnar kemur frá sjávarútvegnum. Því eru svona hótanir ekkert annað en aðför að velferð okkar Íslendinga. Formaður VLFA spyr hvar mun þessi vitleysa  enda og getum við átt von á því að gerð verði krafa um að veiðum verði hætt á öðrum fiskistofnum eins og t.d. þorski.

Það er morgunljóst að hvalveiðar skipta þjóðarbúið máli svo ekki sé talað um samfélagið hér á Akranesi en um 200 manns störfuðu við veiðar og vinnslu á vertíðinni 2010 og sem dæmi voru meðallaun yfir 700.000 kr. á mánuði. Þó er rétt að geta þess að mikið vinnuframlag lá að baki slíkum launum.

Því miður þurfti Kristján Loftsson hjá Hval hf. að hætta við hvalveiðar á þessari vertíð vegna náttúruhamfaranna sem riðu yfir Japan, en það er einlæg von mín úr rætist á næsta ári þannig að hægt verði að hefja veiðar á langreyðum strax í júní á næsta ári.

Formaðurinn skorar á íslensk stjórnvöld að mótmæla harðlega þessum aðgerðum Bandaríkjamanna sem eru eins og áður sagði ógn við velferð og sjálfstæði okkar Íslendinga til að nýta okkar sjávarauðlindir.

Hver þarf að eiga óvini þegar hann á svona vini eins og Breta og Bandaríkjamenn?

Verkalýðsfélag Akraness stóð fyrir fundi í Bíóhöllinni í gær með starfsmönnum Norðuráls vegna kjaradeilu sem félagið á í við Norðurál en eins og margoft hefur komið fram hér á heimasíðunni þá rann launaliður kjarasamningsins út 1. janúar síðastliðinn. Ágætis mæting var á fundinn en um 170 manns mættu en þetta er þriðji kynningar- og samstöðufundurinn sem félagið heldur á liðnum mánuðum þar sem farið er yfir stöðu mála.

Í gær fór formaður ítarlega yfir tilboð sem forsvarsmenn fyrirtækisins lögðu fram 22. ágúst síðastliðinn og kom skýrt fram hjá fundarmönnum að það tilboð sé óásættanlegt með öllu. Krafa starfsmanna er skýr en hún er sú að laun starfsmanna Norðuráls séu með sambærilegum hætti og gerist í öðrum iðnfyrirtækjum í sambærilegum iðnaði. Formaður fór yfir stöðuna og kallaði eftir hugmyndum frá starfsmönnum um hvaða leið best væri að fara og það var afar ánægjulegt að finna þá miklu samstöðu og einhug sem ríkir hjá starfsmönnum í þessari kjaradeilu en það er morgunljóst að það þarf að fara að ganga frá launalið kjarasamningsins sem allra fyrst.

Fundurinn samþykkti viss markmið sem formanni var falið að vinna eftir og það er ljóst að það er umtalsverð vinna framundan við að ná þessum markmiðum en með samstöðuna að vopni er æði margt hægt að gera. Formaður hefur átt óformlega fundi með Ragnari Guðmundssyni, forstjóra Norðuráls, þar sem leitað hefur verið leiða til að finna lausn á þessari deilu og vonandi munu samningsaðilar ná saman en það mun ekki takast nema að jöfnuður við fyrirtæki í sambærilegum iðnaði nái fram að ganga. Formaður hefur greint forstjóra Norðuráls frá niðurstöðum frá þessum fundi í gærkvöldi og er hann nú með málið til skoðunar hjá sér og er það einlæg von formanns félagsins að hægt verði að ná niðurstöðu í þetta mál því það er óþolandi með öllu að starfsmenn séu búnir að vera án launahækkana í rúma 9 mánuði.

En það liggur einnig fyrir að það eru fleiri álfyrirtæki sem eru í harðri kjarabaráttu um þessar mundir en eins og flestir vita þá felldu starfsmenn Alcan í Straumsvík kjarasamning sinn með 70% atkvæða fyrir skemmstu og að sjálfsögðu fylgjast starfsmenn Norðuráls og Verkalýðsfélag Akraness vel með hvernig því máli mun lykta. En formaður ítrekar þá ósk sína að hægt verði að ganga frá launalið samningsins sem fyrst því það gengur ekki upp fyrir fólk að fá skefjalausar verðlagshækkanir á öllum sviðum á sig á sama tíma og launahækkanir láta á sér standa.

Félagið vill enn og aftur minna á gríðarlega mikilvægan samstöðu- og kynningarfund fyrir starfsmenn Norðuráls sem haldinn verður í Bíóhöllinni í kvöld kl. 20:30.

Mjög mikilvægt er að allir starfsmenn sem ekki eru á vakt á þessum tíma mæti á fundinn.

Kynningar- og samstöðufundur verður haldinn fyrir starfsmenn Norðuráls næstkomandi fimmtudag, 15. september. Fundurinn fer fram í Bíóhöllinni og hefst kl. 20:30. Á fundinum mun formaður félagsins fara yfir stöðu mála en launaliður starfsmanna hefur verið laus frá áramótum. Einnig verður farið yfir hvað hægt sé að gera og ekki síst hvað starfsmenn vilja gera í þessari erfiðu stöðu. Því er gríðarlega mikilvægt að allir sem mögulega geta mæti á fundinn og sýni þannig samstöðu í verki.  

Síðastliðinn föstudag héldu eldri félagsmenn Verkalýðsfélags Akraness ásamt mökum í sína árlegu dagsferð á vegum félagsins. Þátttakendur voru um 100 talsins auk fulltrúa frá félaginu. Þessi ferð er árlegur liður í starfsemi félagsins og að þessu sinni var ferðinni heitið til Reykjavíkur undir dyggri leiðsögn Björns Inga Finsen.

Ekið var í tveimur rútum sem leið lá norður fyrir Akrafjall að Grundartanga þar sem ekki var áð, en aðeins keyrt um þetta svæði þar sem mikil uppbygging hefur átt sér stað síðustu ár með tilheyrandi nýbyggingum og nýjum fyrirtækjum sem hafa hafið þar starfsemi sína.

Frá Grundartanga var ekið um Hvalfjarðargöng að Kjalarnesi. Hringur var ekinn um Grundarhverfi áður en haldið var áfram suður Vesturlandsveg í gegnum Mosfellsbæ og að Korpúlfsstöðum, framhjá Egilshöll og áfram upp í Grafarholt þaðan sem frábært útsýni er í allar áttir og ekki síst að Esju og upp á Akranes.

Fyrsti áningarstaður ferðarinnar var í Morgunblaðshúsinu í Hádegismóum þar sem vel var tekið á móti okkur. Karl Blöndal aðstoðarritstjóri ræddi við hópinn og svaraði fyrirspurnum og síðan tók Svanhvít starfsmannastjóri við hópnum og leiddi hann í skoðunarferð um prentsmiðjuna.

Frá Hádegismóum var ekið rakleiðis að Árbæjarsafni þar sem leiðsögumennirnir Hjördís og Karl skiptu hópnum á milli sín og leiddu um safnið. Góður rómur var gerður að kynningu þeirra og hefðu margir vilja dvelja lengur á safninu enda könnuðust sumir vel við að hafa búið í húsum keimlíkum þeim sem tilheyra sýningunni á Árbæjarsafni.

Næsti viðkomustaður var Höfði þar sem ferðafólk teygði úr sér í góða veðrinu og skoðaði þetta virðulega og sögulega hús, en búið er að setja upplýsingaskilti við húsið sem fróðlegt er að skoða.

Þegar hér var komið sögu var ferðfólk farið að svengja enda sól að nálgast hádegisstað. Hádegisverður var snæddur á veitingastaðnum Munnhörpunni sem staðsettur í hinu nýja tónlistarhúsi Hörpu. Eftir matinn gat fólk gengið um Hörpu og skoðað húsið.

Frá Hörpu var ekið að Þjóðarbókhlöðu þar sem hópurinn fékk hlýjar móttökur. Í kynningu sem hópurinn fékk var sérstaklega tekið fram hversu ánægjulegt það væri að fá að kynna þjónustu bókhlöðunnar fyrir þessum aldurshópi þar sem yfirleitt væru notendur safnsins í yngri kantinum og aukinn fjölbreytileiki í þeim efnum væri af hinu góða.

Eftir að hafa blaðað aðeins í tímaritum og bókum á Þjóðarbókhlöðu lá leiðin á Austurvöll þar sem Guðbjartur Hannesson, velferðarráðherra, tók á móti hópnum og fylgdi um Alþingishúsið ásamt starfsmönnum Alþingis. Hópurinn fékk góða og fróðlega leiðsögn um húsið og gott spjall við ráðherrann. Vegna stærðar hópsins þurfti að tvískipta honum og fór sá hópur sem var utanþings í Ráðhús Reykjavíkur þar sem sumir skoðuðu upphleypta Íslandskortið á meðan aðrir gengu að Tjörninni og gáfu öndunum brauð.

Á heimleiðinni var komið við í Perlunni þar sem félagið bauð upp á síðdegishressingu.

Þykir ferðin í ár hafa heppnast einstaklega vel og kann félagið öllum þeim sem komu að undirbúningi og framkvæmd hennar bestu þakkir fyrir. Sérstakar þakkir fær Björn Finsen leiðsögumaður sem kann, að því er virðist, áhugaverða sögu um hvern stein og hvert götuhorn sem á vegi hans verður, samferðafólki hans til fræðslu og yndisauka.

Hægt er að skoða myndir úr ferðinni með því að smella hér.

Nú er liðinn 251 dagur frá því launaliður kjarasamnings Norðuráls rann út og hafa formlegir samningafundir ekki borið árangur til þessa. Krafa Verkalýðsfélags Akraness í þessum viðræðum er jöfnuður við verksmiðjur í sambærilegum iðnaði en því miður hafa launakjör hjá Norðuráli verið töluvert lakari en gerist í öðrum sambærilegum verksmiðjum.

Formaður hefur átt óformlega fundi með forsvarsmönnum Norðuráls að undanförnu þar sem leitað er leiða til að finna lausn á þeim ágreiningi sem er á milli samningsaðila. Hefur það ekki borið árangur til þessa en þessum óformlegu viðræðum verður haldið áfram. Nú liggur fyrir að kjarasamningur Alcan í Straumsvík sem undirritaður var fyrir skemmstu var kolfelldur í atkvæðagreiðslu á meðal starfsmanna en ein af kröfum starfsmanna Norðuráls er einmitt jöfnuður meðal annars við Alcan í Straumsvík.

Verkalýðsfélag Akraness hefur ákveðið að halda fund með starfsmönnum Norðuráls sem haldinn verður í Bíóhöllinni fimmtudaginn 15. september næstkomandi en þar mun formaður fara yfir þá möguleika sem eru í stöðunni og kalla eftir viðbrögðum frá starfsmönnum um hvað gera skuli. Félagið leggur mikla áherslu á það að upplýsa starfsmenn eins vel og kostur er um þá möguleika sem í stöðunni eru en eins og áður sagði er það morgunljóst að félagið mun ekki hvika frá þeirri sanngjörnu kröfu að launakjör í Norðuráli verði með sambærilegum hætti og í sambærilegum verksmiðjum hér á landi. Það liggur fyrir að baráttumál eins og upptaka á stóriðjuskóla, sem mun skila starfsmönnum ávinningi að loknu námi, virðist vera að nást í þessum viðræðum, eina sem útaf stendur er hversu mikill sá ávinnungur verður og hvenær skólinn á að hefjast. En formaður er vongóður um að niðurstaða muni nást í þessu máli sem ætti að geta verið ásættanleg fyrir starfsmenn.

Eins og áður sagði er 251 dagur liðinn frá því að launaliðurinn rann út og því er mjög mikilvægt að niðurstaða fari að komast í þessar viðræður því það er ekki hægt að bjóða starfsmönnum upp á að vera án kjarasamningsbundinna launahækkana í eina 9 mánuði eins og raunin er nú orðin.

Kjarasamningur Verkalýðsfélags Akraness við Samband íslenskra sveitarfélaga sem undirritaður var þann 7. júlí síðastliðinn hefur nú verið prentaður. Þeir félagsmenn sem starfa fyrir sveitarfélögin geta nálgast innbundið eintak af samningnum á skrifstofu félagsins að Sunnubraut 13. Hægt er að nálgast vefútgáfu af samningnum hér og einnig má nálgast kauptaxtana hér.