Vegna nýs kjarasamnings  við Samband íslenskra sveitarfélaga boðar Verkalýðsfélag Akraness þá félagsmenn sína sem starfa hjá sveitarfélögum til kynningafundar á Gamla Kaupfélaginu, Kirkjubraut 11 þriðjudaginn 19. júlí kl. 18:00.

Eftir kynninguna hefst kosning um samninginn og geta fundarmenn kosið á staðnum. Einnig verður hægt að kjósa á skrifstofu félagsins til kl. 16:00 fimmtudaginn 21. júlí.

Þeir félagar sem starfa eftir samningnum eru eindregið hvattir til að mæta.

Kjarasamninginn í heild sinni má nálgast hér.

Fjórtán félagsmenn úr nokkrum stéttarfélögum hafa sent formönnum stéttarfélaga sem tilheyra Starfsgreinasamband Íslands bréf þar sem fram kemur að þau sé verulega ósátt við afgreiðslu á málefnum fyrrverandi framkvæmdastjóra SGS.

Þau gagnrýna harðlega að málefni framkvæmdastjórans hafi ekki verið kærð til lögreglu í ljósi þeirra alvarlegu athugasemda sem fram komu í skýrslu Deloitte á fjárreiðum sambandsins en fram kemur í skýrslunni að gerðar voru athugasemdir á kostnaðarliðum uppá tæpa milljón króna sem tilheyrðu framkvæmdastjóranum.

Formaður Verkalýðsfélags Akraness tekur undir hvert orð í þessu bréfi en hann situr í framkvæmdastjórn SGS. Enda liggur fyrir að formaður VLFA  ásamt þremur öðrum framkvæmdastjórnarmönnum lögðu til við framkvæmdastjórn að málið yrði kært til lögreglu.  Því miður komst meirihluti framkvæmdastjórnar að annarri niðurstöðu en sú niðurstaða byggðist á því að segja framkvæmdastjóranum upp störfum og endurkrefja hann um rúmar fimmhundruð þúsund krónur.  Meirihlutinn samþykkti einnig að greiða framkvæmdastjóranum uppsagnarfrest þrátt fyrir þessar alvarlegu ásakanir sem fram komu í skýrslu Deloitte og nemur sá starfslokasamningur í það minnsta 6 milljónum króna. 

Formaður félagsins hefur lýst yfir vanþóknun sinni á þessari afgreiðslu framkvæmdastjórnar og skilur því vel að hinum almenna félagsmanni innan Starfsgreinasambandsins sé verulega misboðið með þessa afgreiðslu á málefnum framkvæmdastjórans. 

Hægt er að lesa bréfið sem formönnum barst með því að smella á meira.

Ágæti formaður

Eftirfarandi bréf hefur verið sent til formanns Starfsgreinasambandsins og til Morgunblaðsins.

Ástæðan er að við erum nokkur hópur félagsmanna víða af landinu sem er mjög ósáttur við afgreiðslu framkvæmdarstjórnar Starfsgreinasambandsins í kjölfarið á skoðun sem framkvæmd var á fjárreiðum sambandsins. Erfiðlega hefur gengið að fá haldbær svör og því er þessi leið farin. Formaður sambandsins lagði fram þá tillögu sem samþykkt var og því er þessum spurningum beint til hans. Ekki var einhugur um þessa afgreiðslu innan stjórnarinnar og vildi hluti stjórnar fara aðra leið sem hefði verið eðlilegri að okkar mati.

Við teljum að meirihluti framkvæmdastjórnar hafi tekið ranga ákvörðun um starfslok framkvæmdarstjóra og erum ósátt við þá ákvörðun að skoða ekki fjármálin lengra aftur í tímann fyrst á annað borð er grunur um misferli. Það er krafa að það verði síðar skoðað.

Eins og þetta tiltekna mál lítur út fyrir okkur þá er ekkert sem segir okkur að hagsmunir hins almenna félagsmanns hafi verið hafðir að leiðarljósi. Frekar hafa menn tilfinningu fyrir því að þarna sé verið að halda hlífiskildi yfir ákveðnum aðilum til að tryggja að þeir þurfi ekki að taka afleiðingum gerða sinna frekar en nokkur annar í þessu samfélagi sem á annað borð hefur komist í einhverja ábyrðarstöðu. Við teljum þetta bera vott um hugarfar sem á ekki heima í verkalýðsbaráttu þar sem hver króna í umslag launamannsins kostar blóð, svita og tár og baráttan fyrir að halda því sem náðst hefur er hörð og óvægin.

Málið snýst um gagnrýni okkar er á vinnubrögð og hugarfar forystunnar. Við teljum að verkalýðshreyfingin eigi að ganga í fararbroddi með bætt vinnubrögð og gegnsæi í ákvörðunum sínum og gerðum

 Forystumenn okkar eru leiðtogar þess hóps í þessu samfélagi sem hvað minnst ber úr býtum á vinnumarkaðnum og teljum að öll vinnubrögð eigi að vera hafinn yfir allan vafa um að eitthvað annað ráði en hagsmunir félagsmanna.

Við teljum ennfremur að á tímum sem þessum þar sem launamenn eiga í vök að verjast þá eigi það að vera forgangsmál okkar að endurvekja traust á verkalýðshreyfingunni og safna félagsmönnum á bak við forystuna svo viðsemjendur okkar fari ekki í neinar grafgötur með það afl sem sameinuð verkalýðshreyfing er.

Við teljum almennt að vinnubrögðum innan verkalýðshreyfingarinnar sé í mörgu áfátt þrátt fyrir að þar séu innanborðs hið mætasta fólk sem ekki má vamm sitt vita. Við teljum nauðsynlegt að málefni okkar séu rædd opinskátt og séu teknar ákvarðanir sem klárlega vekja upp spurningar hjá félagsmönnum þá þurfi skýringar að fylgja svo ekki skapist andrúmsloft tortryggni og sundrungar. Það er það síðasta sem við þurfum á að halda núna. Mál af þessu tagi býður upp á spurningar sem félagsmenn eiga fullan rétt á að fá svör við frá sínum forystumönnum.

Bak við ykkur forystumenn stendur stór hópur fólks sem er tilbúinn til að styðja ykkur til allra góðra verka. Til  að vekja áhuga og kraft þessa fólks þá þarf öll umræða að vera uppi á borðinu og öll vinnubrögð hafin yfir allan vafa.

Við munum halda áfram þessari baráttu okkar áfram þar til menn eru tilbúnir til að setjast niður og ræða stöðuna og hvernig hægt er að bæta hlutina. Þessi umræða þarf að fara fram sem víðast, ekki bara í hópi forystumanna heldur innan félaganna, á síðum blaðanna, í netheimum og ekki síst í hjarta hvers þess sem gefur sig út fyrir að starfa til heilla launamönnum.

Að endingu óskum við eftir að þetta verði birt á heimasíðu félags yðar, félögum til upplýsingar.

Til formanns Starfsgreinasambands Íslands, Björns Snæbjörnssonar

Á fundi SGS 26 maí síðastliðinn  var samþykkt tillaga Björns Snæbjörnssonar um starfslok Skúla Thoroddsen vegna trúnaðarbrests.  Í afgreiðslunni fellst að gerður verði stafslokasamningur sem tryggir Skúla laun á uppsagnafresti  ásamt orlofi og áunnum réttindum og að hann verði einungis endurkrafinn um hluta þess fjár sem hann er grunaður um að hafa dregið sér.                                                                          Spyrja verður hvort þessi viðbrögð framkvæmdastjórnarinnar séu viðtekin venja komi sambærileg mál upp innan raða forystumanna hreyfingarinnar og hvort þeir formenn félaga sem stóðu að umræddri samþykkt séu með henni að víkja hreyfingunni undan ábyrgð á spillingu innan eigin raða.                                                   Þá viljum við undirritaðir félagsmenn stéttarfélaga í Starfsgreinasambandi Íslands, fá svör formanns  SGS við eftirfarandi spurningum og óskum eftir að þau svör verði birt sem fyrst á opinberum vettvangi, almennum félagsmönnum til glöggvunar.

1.       Hvers vegna er grun um refsivert misferli í starfi ekki fylgt eftir með ákæru?

2.      Voru hagsmunir félagsmanna í SGS hafðir að leiðarljósi þegar þú lagðir fram þá tillögu sem samþykkt var af meirihluta framkvæmdarstjórnar?

3.      Hvað kostar þessi starfslokasamningur?

4.      Telur þú sem forystumaður í verkalýðshreyfingunni að þessi viðbrögð við skýrslu Deloitt séu til þess fallin að auka traust á verkalýðshreyfingunni?

5.      Telur þú sem formaður stærstu samtaka launþega innan Alþýðusambands Íslands ekki eðlilegt að birta frétt á heimasíðu sambandsins um gagngera breytingu í starfmannahaldi SGS með útskýringum?     

Þessum spurningum er beint til Björns Snæbjörnssonar formanns SGS sem lagði fram tillögu fyrir framkvæmdarstjórn Starfsgreinasambands Íslands um að semja við Skúla Thoroddsen um starfslok þrátt fyrir að rökstuddur grunur sé um umboðssvik og fjárdrátt. Við teljum að Björn verði að útskýra fyrir okkur sauðsvörtum almúganum hvers vegna sumir eru jafnari fyrir lögunum en aðrir, svo við getum tekið mið af því í okkar störfum sem við kunnum að takast á hendur fyrir verkalýðshreyfinguna.

Loftur Guðmundsson, Bárunni stéttarfélagi

Ragnhildur Eiríksdóttir, Bárunni stéttarfélagi

Hjalti Tómasson Bárunni stéttarfélagi

Agnes Einarsdóttir, Framsýn stéttarfélagi

Olga Gísladóttir, Framsýn stéttarfélagi

Svava Árnadóttir, Framsýn stéttarfélagi

Valdimar Gunnarsson, Einingu – Iðju

Tryggvi Jóhannesson, Einingu – Iðju

Ólafur P. Agnarsson, Einingu – Iðju

Óskar Guðjón Kjartansson, Drífanda stéttarfélagi

Albert Sævarsson, Drífanda stéttarfélagi

Gunnhildur Elíasdóttir, Verkalýðsfélagi Vestfirðinga

Eygló Jónsdóttir, Verkalýðsfélagi Vestfirðinga

Sigurjón Skæringsson, Eflingu, stéttarfélagi

Afrit sent á:

 mbl.is

     Formann Starfsgreinasambandsins

Á skrifstofu félagsins fást ennþá Veiðikort og gistimiðar á Edduhótel og Fosshótel. Útilegukortin eru hins vegar uppseld en verða aftur í boði að ári.

Athygli er vakin á því að gistimiðar á Fosshótel verða áfram í boði í haust og um að gera að nýta sér þá. 

Í gær var nýr kjarasamningur kynntur fyrir starfsmönnum Klafa og kom fram í þeirri kynningu að allar kröfur starfsmanna hafi náðst fram í þessari erfiðu kjaradeilu, en eins og fram hefur komið hér á heimasíðunni þá átti áður boðað verkfall að hefjast sl. þriðjudag. Sem betur fer náðist að leysa þessa deilu án þess að til verkfalls þyrfti að koma. Fram kom í máli formanns að það hafi tekist vegna þeirra gríðarlegu samstöðu og einhugs sem ríkti hjá starfsmönnum í þessari deilu, enda var krafan í sjálfu sér mjög sanngjörn, að launakjör starfsmanna skyldu hækka til jafns við starfsbræður þeirra hjá Elkem Ísland.

Eins og einnig hefur komið fram hér á heimasíðunni þá eignaðist Elkem Ísland Klafa að fullu eftir að þeir keyptu Norðurál út úr fyrirtækinu og formaður spyr sig hvort það hafi verið tilviljun að eftir að Norðurál var farið með sinn eignarhluta úr Klafa þá hafi nánast verið gengið frá samningi örfáum klukkutímum síðar.

Í kynningunni kom fram að starfsmenn munu fá nákvæmlega sömu launahækkanir og um var samið hjá Elkem Ísland og samningurinn mun gilda frá 1. janúar 2011. Einnig hefur starfsmönnum og félaginu verið tilkynnt um að fyrirtækið muni greiða starfsmönnum eingreiðslu ígildi fastra mánaðarlauna. Þannig að starfsmaður sem starfað hefur hjá Klafa á 10 ára taxta mun fá með afturvirkni og umræddri eingreiðslu greiðslu sem nemur 488 þúsund krónur. Grunnlaun munu hækka um 5% og einnig orlofs- og desemberuppbætur en þær fara úr 249.000 í 261.700. Einnig mun hámarkið á bónusnum fara úr 10% í 13,5%.

Starfsmenn voru mjög ánægðir með að kröfur þeirra hafi náðst fram og tekist hafi að afstýra verkfalli og fór svo að samningurinn var samþykktur með öllum greiddum atkvæðum. Af þeim sem voru á kjörskrá greiddu 73,6% atkvæði og voru þeir allir samþykkir. Þetta sýnir svo ekki verður um villst að starfsmenn voru ánægðir með samninginn og vill formaður þakka starfsmönnum og síðan en ekki síst trúnaðarmanninum Hafsteini Þórissyni kærlega fyrir aðstoðina við gerð þessa samnings, en fundað var samtals 13 sinnum hjá Ríkissáttasemjar til að finna lausn á þessari erfiðu deilu sem nú loksins hefur fengið farsæla lausn.

Eftir kynninguna gátu starfsmenn kosið um samninginn og var samningurinn samþykktur með 100% greiddra atkvæða, en eins og áður sagði var kosningaþátttaka 73,6%.

Orlofssjóður Verkalýðsfélags Akraness hefur fest kaup á nýlegu fjögurra herbergja heilsárshúsi við Berjabraut í Kjós. Um er að ræða 83,2 fermetra hús byggt árið 2005 sem stendur á fallegum útsýnisstað yfir Hvalfjörðinn í landi Hálsa í Kjós.

Húsið er á tveimur hæðum með yfirbyggðum inngangi. Í húsinu eru tvö svefnherbergi á neðri hæð, auk eldhúss, stofu og baðherbergis. Stofan er með mikilli lofthæð og úr stofu er stigi upp á risloft sem er eitt opið rými með útgengt í enda út á vestursvalir með fallegu útsýni.

Gert er ráð fyrir að húsið verði tilbúið til útleigu í september 2011.

Hægt er að skoða myndir hér.

Stjórn Verkalýðsfélags Akraness ákvað á fundi fyrir helgi að styrkja félagsmann sinn Þórarinn B Steinsson til að hann gæti áfrýjað dómi Héraðsdóms Reykjavíkur frá því 5. júlí sl.  Dómurinn sýknaði Sjóvá og Norðurál af allri bótaskyldu gagnvart Þórarni vegna slyss sem hann varð fyrir þegar hann var að hjálpa samstarfskonu sinni hjá Norðuráli, en Þórarni ásamt öðrum starfsmanni Norðuráls tókst að lyfta 620 kg. stálbita sem fallið hafði á fætur samstarfskonu þeirra. Við slysið varð Þórarinn 75% öryrki og hefur ekki fengið neinar bætur vegna þessa slyss.

Formaður VLFA undrast að forsvarsmenn Norðuráls skuli reyna að skjóta sér undan allri bótaskyldu í ljósi þess að hann vann hetjudáð við að bjarga samstarfskonu sinni og aðgerðir Þórarins við að bjarga konunni geta seint talist glæfralegar enda beittu hann og samstarfsmaður hans einungis handafli þegar þeir lyftu 620 kg. stálbita ofan af samstarfskonunni. 

Það er sorglegt til þess að vita að komi vinnufélagi samstarfsmanni sínum til hjálpar og vinni slíkt þrekvirki geti hann jafnvel átt von á því að sitja uppi með varanlega örorku uppá 75% og það án þess að fá neinar bætur hvorki frá tryggingarfélaginu né fyrirtækinu.  Það er einnig mat formanns að með þessum dómi sé verið að senda slæm skilaboð útí samfélagið, skilaboð sem segja: ef þið aðstoðið fólk í neyð þá er það algerlega á ykkar ábyrgð.

Kostnaður við að reka mál fyrir dómsstólum er hár og hér eru hagsmunir og öryggi allra launþega í húfi. Á þeirri forsendu er stjórn Verkalýðsfélags Akraness stolt af því að hafa gert það að verkum með þessum styrk að þessum dómi verði áfrýjað til Hæstaréttar.  

Þann 5. júlí síðastliðinn féll stórundarlegur dómur í Héraðsdómi Reykjavíkur í máli Þórarins Björns Steinssonar gegn Norðuráli og Sjóvá vegna slyss sem hann varð fyrir er hann var að bjarga samstarfskonu sinni sem hafði lent í því að fá 620 kg. stálbita ofan á sig. Þórarinn og samstarfsmaður hans tóku ákvörðun um það að lyfta bitanum ofan af samstarfskonunni til að hægt yrði að ná henni undan. Við þessa hetjulegu björgun varð Þórarinn fyrir alvarlegum bakmeiðslum sem hann hefur átt í síðan slysið átti sér stað og hefur m.a. verið lagður tvívegis inn á sjúkrahús sökum verkja sem rekja má til slyssins.

Enda kemur það fram í niðurstöðu dómsins að ekki er deilt um það að Þórarni hafi tekist að sanna að hann hafi orðið fyrir líkamstjóni við þessa björgun skv. þeim læknisfræðilegu gögnum sem hann hefur lagt fram.

Það er í raun og veru með ólíkindum að lesa þennan dóm og að Norðurál skuli ekki sjá sóma sinn í því að bæta Þórarni þann skaða sem hann varð fyrir við það að bjarga samstarfskonu sinni er með hreinustu ólíkindum og er í raun og veru fyrirtækinu til ævarandi skammar. Það er ekki bara að Norðurál hafi óskað eftir algerri sýknu í þessu máli heldur gerði fyrirtækið einnig kröfu um að Þórarinn yrði dæmdur til að greiða Norðuráli málskostnað skv. málskotsreikningi eða að mati dómsins. Með öðrum orðum, maður sem vann hetjudáð með því að bjarga samstarfskonu sinni og hlaut af því varanlegan skaða hefði getað setið uppi með jafnvel milljónir króna í málskostnað, ef dómurinn hefði tekið tillit til kröfu Norðuráls.

Það er mat formanns að Þórarinn og samstarfsmaður hans hafi brugðist við með eðlilegum hætti þegar slysið á sér stað í ljósi þeirra staðreynda að stúlkan lá undir 620 kg. stálbita og fyrsta hugsun þessara manna var að koma henni til hjálpar enda lá hún þar sárkvalin undir. Þetta eru í raun og veru eðlileg viðbrögð fólks sem kemur að slíku slysi, að reyna að aðstoða eins fljótt og kostur er.

Í málsvörn og lagarökum Norðuráls segir m.a. að því sé jafnframt mótmælt sem ósönnuðu og röngu að nauðsynlegt hafi verið að lyfta bitanum án tafar til að komast hjá frekara tjóni og það hafi ekki verið unnt að gera með öðrum hætti. Hvaða skilaboð er verið að senda út til starfsmanna á íslenskum vinnumarkaði sem koma að vinnufélögum sínum sem hafa slasast? Eru skilaboðin þessi: gerið ekki neitt. Því ef þið verðið fyrir skaða við slíka björgun þá er það á ykkar eigin ábyrgð.

Þetta er grafalvarlegur dómur fyrir alla íslenska launþegar og er í raun og veru mikilvægt að þessum dómi verði algerlega snúið við í Hæstarétti því öryggi starfsmanna vítt og breitt á íslenskum vinnumarkaði getur hér verið í húfi. En það er þyngra en tárum taki að fyrirtæki eins og Norðurál, eitt öflugasta fyrirtækið á íslenskum vinnumarkaði skuli koma fram við sinn starfsmann á þann hátt sem það hefur gert í þessu máli. Því skorar formaður Verkalýðsfélags Akraness á Norðurál að greiða Þórarni þær bætur sem eðlilegt getur talist í ljósi þess líkamstjóns sem hann hefur orðið fyrir því það er sorglegt að einstaklingur sem hefur aðstoðað samstarfskonu sína og jafnframt starfsmann Norðuráls skuli eiga að þurfa að sitja uppi með slíkan skaða án nokkurs réttar.

Eftir hörð átök vegna kjarasamnings starfsmanna Klafa á Grundartanga tókst að ganga frá nýjum kjarasamningi í húsakynnum Ríkissáttasemjara upp úr hádegi í dag. Það er skemmst frá því að segja að markmið félagsins og starfsmanna um sömu launahækkanir og um var samið hjá Elkem Ísland hafi náðst að fullu. Verða það að teljast afar ánægjuleg tíðindi og í ljósi þeirra hefur formaður VLFA tilkynnt Ríkissáttasemjara og Samtökum atvinnulífsins að boðuðu verkfalli sem taka átti gildi nk. þriðjudag hafi verið aflýst.

Eins og áður hefur komið fram byggist samningurinn í meginatriðum á því sama og um samdist við Elkem. Grunnlaun hækka með sambærilegum hætti og bónusinn hækkar einnig með sambærilegum hætti og hámarkið fer úr 10% í 13,5% og einnig hefur starfsmönnum verið tilkynnt að þeir fái eingreiðslu sem er ígildi fastra mánaðarlauna, en sú eingreiðsla er ekki hluti af kjarasamningnum. Mun sú eingreiðsla vera greidd í tvennu lagi, helmingurinn með næstu útborgun og síðan í desember 2011.

Orlofs- og desemberuppbætur hækka samtals úr 249.000 í 261.400 og í lok samningstímans verða uppbætur komnar upp í tæp 280.000 sem er hækkun um 12,2%. Samningurinn er að gefa starfsmönnum með eingreiðslunni tæp 16% á árinu 2011 og í heildina gefur samningurinn 24% á samningstímanum.

Formaður Verkalýðsfélags Akraness vill þakka trúnaðarmanni Klafa sem og öllum starfsmönnum fyrir órjúfanlega samstöðu sem gerði það að verkum að meginmarkmið félagsins og starfsmanna náðust að fullu. Því án samstöðu er morgunljóst að slíkt hefði ekki náðst. Einnig vill félagið þakka Elkem Ísland fyrir sinn þátt í því að hafa leyst þetta mál án átaka og ber að virða það. En eins og áður hefur komið fram hér á heimasíðunni þá á Elkem Ísland nú 100% hlut í Klafa eftir að Norðurál seldi sinn helmingshlut.

Rétt í þessu skrifaði formaður félagsins undir kjarasamning við Launanefnd Sveitarfélaga vegna félagsmanna sinna sem starfa hjá Akraneskaupstað og Hvalfjarðasveit. Samningurinn er að mörgu leyti sambærilegur þeim sem um var samið á hinum almenna vinnumarkaði, en reyndar var verið að breyta launatöflu þar sem lífaldurshækkanir voru lagðar af og í staðinn voru tekin upp svokölluð persónuálög. 

Í hinum nýja samningi eru lágmarkslaun fyrir fullt starf eða 173,33 stundir kr. 196.708,-. Verði samningurinn samþykktur munu starfsmenn fá eingreiðslu að upphæð kr. 50.000 og miðast það við starfsmann í fullu starfi í mánuðunum mars-maí. Einnig mun koma önnur eingreiðsla 1. febrúar 2012 og er sú greiðsla kr. 25.000 m.v. fullt starf.

Þriðjudaginn 19. júlí mun samningurinn verða kynntur fyrir félagsmönnum sem starfa eftir umræddum kjarasamningi og að aflokinni kynningu verður hægt að kjósa um samninginn. Hægt er að sjá samninginn í heild sinni síðar með því að smella hér.

Töluvert annríki hefur verið við kjarasamningagerð undanfarna daga en nú er verið að leggja lokahönd á kjarasamning fyrir starfsmenn sveitarfélaga. Það eina sem eftir á að ganga frá eru sérákvæði sem Verkalýðsfélag Akraness hafði og er allt útlit fyrir að skrifað verði undir kjarasamninginn á morgun. Í framhaldinu mun formaður kynna samninginn þá félagsmenn sem starfa eftir samningi VLFA við launanefnd sveitarfélaga en í þessu tilfelli er bæði um að ræða félagsmenn hjá Akraneskaupstað og Hvalfjarðarsveit.

Einnig er töluvert að gerast varðandi kjaradeilu Klafa, en Samtök atvinnulífsins og forsvarsmenn Klafa óskuðu eftir formanni og trúnaðarmanni í dag til að undirbúa fundin hjá Ríkissáttasemjara á morgun. En eins og margoft hefur komið fram hér á heimasíðunni þá skellur verkfall á hjá Klafa á hádegi næsta þriðjudag ef ekki verður búið að leysa deiluna fyrir þann tíma.

Krafa félagsins í þessari deilu er hvellskýr, það er að starfsmenn Klafa fái sömu launahækkanir og um var samið fyrir starfsbræður þeirra hjá Elkem Ísland og ríkir alger einhugur og samstaða á meðal starfsmanna um að hvika hvergi frá þeirri sanngjörnu kröfu.