Fundað var vegna launaliðar kjarasamnings Norðuráls í húsakynnum Ríkissáttasemjara í gær, og er skemmst frá því að segja að enginn niðurstaða hafa orðið af þeim fundi.

Það kom fram í máli forsvarsmanna fyrirtækisins að þeir væru að skoða þessi mál, en engin stefnubreyting hafi orðið af þeirra hálfu varðandi það tilboð sem fyrirtækið hafði lagt fram, en það tilboð byggðist alfarið á því sem um var samið á hinum almenna vinnumarkaði, en þar áttu starfsmenn að hækka um 4,25% á þessu ári, 3,5% árið 2012 og 3,25% árið 2013.

Þessu hefur Verkalýðsfélag Akraness algerlega hafnað og mun aldrei koma til greina að samið verði á þessum nótum því eins og áður hefur komið fram hér á heimasíðunni þá eru engar forsendur fyrir því að fyrirtæki í áliðnaði sem hefur notið áhrifa af gengisfalli íslensku krónunnar og stórhækkaðs afurðaverðs sé sett undir sama hatt og fyrirtækis sem eiga í rekstrarerfiðleikum eins og til dæmis í byggingariðnaðinum.

Formaður félagsins kynnti einnig á fundinum í gær fyrir forsvarsmönnum fyrirtækisins þann launasamanburð sem félagið hefur gert vegna þessa kjarasamnings sem gerður var fyrir starfsmenn Fjarðaáls, en sá samanburður sýnir að launamunur á milli Fjarðaáls og Norðuráls getur numið í sumum tilfellum allt að 30% sem gerir það að verkum að það er tug þúsunda launamunur á milli þessa tveggja fyrirtækja fyrir sama vinnustundafjölda enda eru vaktakerfi þessara verksmiðja nánast eins.

Þetta eru niðurstöður sem starfsmenn, trúnaðarmenn og Verkalýðsfélag Akraness munu aldrei sætta sig við og liggur fyrir að krafa félagsins fyrir hönd starfsmanna verður að sömu launahækkanir og um var samið í Fjarðaál munu koma til handa starfsmönnum  Norðuráls. Starfsmenn eru algerlega sammála því að það tilboð sem liggur fyrir mun aldrei verða samþykkt í fyrirtækinu enda gefur þetta tilboð starfsmönnum einungis 15-19 þúsund króna launahækkun á mánuði sem þýðir að starfsmenn munu einungis fá um 10 þúsund krónur í vasann.

Það hefur komið fram á fjölmennum fundum sem VLFA hefur haldið að starfsmenn ætla að standa þétt saman í þessari baráttu og eru frekar tilbúnir að bíða eins lengi og þörf krefur til að ná fram þeirri sjálfsögðu kröfu sem er að þeir njóti sömu launahækkana og um var samið í Fjarðaáli enda eru engar forsendur fyrir öðru.

Næsti fundur hefur ekki verið boðaður fyrr en 22. ágúst og má segja að það sé engin ástæða til að funda meðan ekki verður hugarfarsbreyting á meðal forsvarsmanna Norðuráls. Þennan slag mun Verkalýðsfélag Akraness taka alla leið.

Nú klukkan 10 mun formaður félagsins eiga fund í húsakynnum Ríkissáttasemjara með launanefnd sveitarfélaga, en nú liggja fyrir drög að nýjum kjarasamningi fyrir starfsmenn Akraneskaupstaðar sem eru félagsmenn í Verkalýðsfélagi Akraness. Þessi drög veita starfsmönnum Akraneskaupstaðar álíka launahækkanir og um var samið á hinum almenna vinnumarkaði 5. maí sl. og reiknar formaður fastlega með því að skrifað verði undir nýjan kjarasamning í dag.

Í gærmorgun höfðu forsvarsmenn Klafa samband við formann félagsins og óskuðu eftir því að verkfallinu yrði frestað um eina viku vegna þess að eigendaskipti voru að eiga sér stað í fyrirtækinu. Eins og áður hefur komið fram hér á heimasíðunni þá áttu Elkem Ísland og Norðurál 50% hvort í Klafa, en Klafi sér um allar út- og uppskipanir og aðra þjónustu fyrir áðurnefnd fyrirtæki.

Að höfðu samráði við starfsmenn og trúnaðarmann ákvað Verkalýðsfélag Akraness að verða við þessari ósk og fresta verkfallsaðgerðum til hádegis 11. júlí, en ríkissáttasemjari hefur boðað til fundar fimmtudaginn 7. júlí.

Eins og einnig hefur komið fram hér á heimasíðunni þá er krafa starfsmanna Klafa að þeir fái sömu launahækkanir og eingreiðslu og um var samið við starfsbræður þeirra hjá Elkem Ísland, enda eru starfsmenn Klafa fyrrverandi starfsmenn Elkem Ísland og hafa ætíð verið með mjög sambærileg laun og greidd hafa verið í Járnblendiverksmiðjunni. Nú er bara að sjá og vona að hægt verði að ganga frá nýjum kjarasamningi fyrir starfsmenn Klafa sem fyrst og er formaður hóflega bjartsýnn á að það takist áður en til verkfallsaðgerða kemur. En það er morgunljóst að félagið og starfsmenn munu ekki hvika frá sinni sanngjörnu kröfu sem er sú sem hér hefur verið rakin.

Hér á Akranesi eru nú að ganga í garð Írskir dagar þar sem boðið verður upp á glæsilega dagskrá alla helgina og hvetur formaður félagsins alla félagsmenn sína til að taka þátt í þessari miklu fjölskylduhátíð.

Það er ljóst að strax eftir helgi mun alvara lífsins taka við á nýjan leik því eins og fram hefur komið hér á heimasíðunni mun boðað verkfall hjá starfsmönnum Klafa hefjast á þriðjudaginn. Strax á mánudaginn verða tveir fundir í húsakynnum ríkissáttasemjara, annars vegar vegna kjarasamnings Klafa og hins vegar vegna launaliðar Norðuráls en mikið ber á milli samningsaðila í báðum þessum deilum. 

Einnig liggur fyrir að fljótlega eftir helgi muni félagið ganga frá kjarasamningi fyrir starfsmenn sveitarfélaga og verður sá samningur kynntur fyrir starfsmönnum um leið og hann hefur verið undirritaður.

Á þessu sést að það er mikið annríki framundan í næstu viku í hinum ýmsu málum er lúta að hagsmunum félagsmanna Verkalýðsfélags Akraness. Á þeirri forsendu er mikilvægt að félagsmenn nýti sér þessa glæsilegu hátíð sem nú er að ganga í garð og geri sér glaðan dag í ljósi þeirra staðreynda að framundan eru hörð átök varðandi áðurnefndar kjaradeilur.

Það er óhætt að segja að kynningar- og samstöðufundurinn sem Verkalýðsfélag Akraness hélt með starfsmönnum Norðuráls í gær hafi heppnast frábærlega. En um 250 starfsmenn mættu á fundinn, sem er upp undir 50% af starfsmönnum Norðuráls. Það var frábært að finna þann einhug og samstöðu sem ríkti á meðal starfsmanna í þessari kjaradeilu sem félagið á nú í við forsvarsmenn Norðuráls.

Á fundinum rakti formaður félagsins þá stöðu sem nú er upp komin í þessari erfiðu deilu, en eins og áður hefur komið fram hér á heimasíðunni þá rann launaliður samningsins út um síðustu áramót og þrátt fyrir ítrekaðar tilraunir hafa allar viðræður hingað til verið árangurslausar. Forsvarsmenn fyrirtækisins og Samtök atvinnulífsins sem leiða viðræðurnar fyrir hönd Norðuráls hafa einungis boðið launahækkun í samræmi við hina margfrægu samræmdu launastefnu sem ASÍ og SA gerðu á hinum almenna vinnumarkaði.

Það hefur margoft komið fram í máli formanns að það eru engar forsendur fyrir því að álfyrirtæki eins og Norðurál sem hefur hagnast gríðarlega á undanförnum árum vegna góðra rekstrarskilyrða m.a. vegna gengisfalls íslensku krónunnar sem og stórhækkaðs afurðaverðs komi með kjarabætur í anda samræmdrar launastefnu, enda er ekki hægt að setja álfyrirtæki í sömu stöðu og t.a.m. fyrirtæki í byggingariðnaði sem eiga í bullandi rekstrarerfiðleikum um þessar mundir. Það hefur verið krafa félagsins að þessum ávinningi útflutningsfyrirtækja verði skilað með afgerandi hætti til starfsmanna umræddra fyrirtækja.

Á fundinum í gær fór formaður yfir nýgerðan kjarasamning sem gerður var fyrir starfsmenn Alcoa Fjarðaáls, en sá samningur veitti starfsmönnum umtalsverðar launahækkanir og kynnti formaður á fundinum hver launamunurinn á milli starfsmanna Norðuráls og Fjarðaáls er núna eftir að Fjarðaál gekk frá sínum samningi. En sá launamunur er sláandi. Rétt er að geta þess að vinnutími og vaktafyrirkomulag eru nánast með sama hætti í báðum verksmiðjunum. Með öðrum orðum þá var verið að bera saman epli og epli, ekki epli og appelsínur.

Í kynningunni kom fram að launamunur verkamanna á vöktum er frá 70.000 kr. upp í 80.000 kr. á mánuði eða sem nemur frá 16% upp í tæp 22%, sé miðað við þann launaflokk sem stórum hluta starfsmanna Fjarðaáls var raðað í í nýgerðum samningi, en það er launaflokkur sem kallast Framleiðslumaður 3. Launamunur iðnaðarmanna á vöktum er frá kr. 99.000 upp í 108.000, eða sem 17,5%-18,5%. En flestir iðnaðarmenn röðuðust inn sem iðnaðarmaður 4 í nýgerðum kjarasamningi Fjarðaáls. Launamunur verkamanna í dagvinnu nemur frá tæpum kr. 79.000 upp í 85.000 kr. á mánuði eða frá 26,4% upp í 32,7%. Launamunur iðnaðarmanna í dagvinnu er frá kr. 99.000 upp í 106.000 kr., eða frá 28,4% upp í 29,6%.

Einnig var samið um stóriðjuskóla sem mun hefja starfsemi sína í haust en þar mun starfsmönnum gefast kostur á að fara í nám sem gefur kost á allt að 10% launahækkun til viðbótar að námi loknu. Og sem dæmi þá munu starfsmenn Fjarðaáls, að afloknum stóriðjuskólanum, vera með kr. 111.000 upp í 120.000 kr. hærri laun en verkamenn í Norðuráli á vöktum.

Á þessu sést að hér er um sláandi launamun að ræða, en það ber að fagna þessum samningi sem gerður var í Fjarðaáli þar sem skín í gegn að eigendur Alcoa hafa greinilega verið tilbúnir til að skila þeim mikla ávinningi og sínu góða rekstrarumhverfi sem ríkir um þessar mundir hjá álfyrirtækjum með afgerandi hætti til sinna starfsmanna. Á fundinum í gær var algjör einhugur og samstaða um það að það séu ekki nokkrar forsendur fyrir því að starfsmenn Norðuráls njóti lakari kjara en starfsbræður og -systur í Alcoa Fjarðaáli. Krafan á fundinum var skýr: sömu laun fyrir sömu vinnu. Við annað verður ekki unað að mati Verkalýðsfélags Akraness og allra þeirra starfsmanna sem sátu fundinn í gær.

Reyndar vekur það undrun formanns hvað hafi orðið um samræmdu launastefnuna sem öll stéttarfélög innan ASÍ stóðu að nema Verkalýðsfélag Akraness í þessum samningi í Fjarðaáli. Einfaldlega vegna þess að þarna var í sumum tilfellum samið um tugi prósenta, en formaður félagsins vill ítreka það að hann fagnar þessum samningi innilega og óskar starfsmönnum og forsvarsmönnum Alcoa til hamingju með þennan samning sem er algjörlega í anda þess sem formaður VLFA hefur ætíð sagt: að fyrirtæki í útflutningi eigi að skila ávinningnum til sinna starfsmanna með afgerandi hætti. Það hefur gerst hjá Fjarðaáli svo ekki verður um villst.

Boðað hefur verið til fundar í húsakynnum Ríkissáttasemjara á mánudaginn kl. 16:30 og það er alveg ljóst að þessi mikli launamunur sem er orðinn á milli þessara tveggja fyrirtækja verður svo sannarlega til umræðu enda mun krafan byggjast á þessum samningi sem Fjarðaál gerði, eða eins og áður sagði: sömu laun fyrir sömu vinnu. Enda ber formaður þá von í brjósti sér að eigendur Norðuráls vilji meta sína starfsmenn í sömu verðleikum í launakjörum séð eins og er nú að gerast í Fjarðaáli.

Það er óhætt að segja að fundurinn hjá ríksisáttasemjara vegna kjaradeilu Klafa hafi verið árangurslaus enda stóð fundurinn einungis yfir í tæpan hálftíma þó afar stutt sé nú í boðað verkfall starfsmanna. Það hefst eins og áður hefur komið fram á þriðjudaginn næstkomandi.

Aðstoðarríkissáttasemjari sem stýrði þessum fundi kallaði eftir því frá samningsaðilum hvort einhver breyting hefði orðið á deilunni frá síðasta fundi. Kom skýrt fram af hálfu forsvarsmanna Samtaka atvinnulífsins, sem leiða viðræðurnar fyrir hönd Klafa, að engin stefnubreyting væri af hálfu fyrirtækisins varðandi þessa deilu. Þeir hafa boðið eins og áður hefur komið fram að starfsmenn Klafa fái sömu launahækkanir og samið var um á hinum almenna vinnumarkaði í anda hinnar frægu samræmdu launastefnu. Krafa félagsins fyrir hönd stafsmanna er hvellskýr en hún byggist á því að starfsmenn Klafa fái sömu launahækkanir og um var samið við starfsbræður þeirra hjá Elkem Ísland.

Það er algjörlega óásættanlegt að samið sé við starfsmenn Elkem Ísland upp á mjög góðar launahækkanir og eingreiðslu og ætlast til þess að starfsmenn Klafa sem starfa á nákvæmlega sama svæði og borða í sama mötuneyti sé boðið einungis lítið brot af því sem um var samið fyrir áðurnefnda starfsmenn. Þetta er eitthvað sem Verkalýðsfélag Akraness og starfsmenn Klafa geta ekki undir nokkrum kringumstæðum sætt sig við og munu ekki sætta sig við.

Á þeirri forsendu hafa starfsmenn og stéttarfélagið nú hafið fullan undirbúning að þeirri vinnustöðvun sem mun hefjast á þriðjudaginn næstkomandi en það eru fjölmargir verkþættir sem munu stöðvast samdægurs þegar verkfallið skellur á. Það eru undanþágur í samningnum um að halda ofnum í Elkem heitum í allt að þrjár vikur og að sjálfsögðu munu starfsmenn og stéttarfélagið uppfylla þessar undanþágur en það kom fram á fundinum í morgun að fyrirtækið muni óska eftir þessari undanþágu. Þó svo að þessi undanþága sé til staðar þá mun þetta hafa gríðarleg áhrif á starfsemi Elkem Ísland ef verkfallið verður að veruleika sem fátt virðist í raun geta komið í veg fyrir.

Ríkissáttasemjari boðaði til næsta sáttafundar á mánudaginn kl. 16 en þá verður einungis tæpur sólarhringur þar til þessi vinnustöðvun skellur á af fullum þunga. Það er morgunljóst að það er engan bilbug að finna á starfsmönnum né Verkalýðsfélagi Akraness í þessari deilu og mun verkfallssjóður styðja sína félagsmenn í hvívetna ef til átaka mun koma.

GrundartangasvæðiðRíkissáttasemjari hefur boðað til fundar í kjaradeilu félagsins við Samtök atvinnulífsins vegna kjarasamnings Klafa ehf. og fundurinn hefst kl. 9:30 í dag. Klafi er eins og áður hefur komið fram þjónustufyrirtæki á Grundartanga sem sér um allar út- og uppskipanir á Grundartangasvæðinu. Klafi er í eigu tveggja stórra og öflugra útflutningsfyrirtækja, Norðuráls og Elkem Ísland.

Eins og kom fram hér á heimasíðunni þá hafa starfsmenn Klafa boðað til verkfalls sem hefst þriðjudaginn 5. júlí kl. 12 á hádegi. Það er alveg ljóst að tíminn er að renna út til að leysa þessa deilu en á þessari stundu ber mikið í milli hjá deiluaðilum. Krafa starfsmanna er að þeir njóti sömu launahækkana og um var samið við starfsbræður þeirra í verksmiðjunni Elkem Ísland en rétt er að geta þess enn og aftur að starfsmenn Klafa eru fyrrverandi starfsmenn Elkem á Grundartanga.

Verkalýðsfélag Akraness minnir á gríðarlega mikilvægan fund sem haldinn verður fyrir starfsmenn Norðuráls í Bíóhöllinni í kvöld kl. 20:30.

Á fundinum verður kynntur afar fróðlegur launasamanburður milli starfsmanna Norðuráls annars vegar og starfsmanna Fjarðaráls hins vegar en þeir síðarnefndu gengu nýverið frá nýjum kjarasamningi.

Afar mikilvægt er að allir starfsmenn Norðuráls, sem mögulega hafa tök á, mæti á fundinn og sýni þannig samstöðu í þeirri erfiðu baráttu sem nú stendur yfir. Á fundinum verður einnig lögð fram tillaga að nýrri kröfugerð sem mun taka mið af samningi Fjarðaráls. Sýnum samstöðu í verki og mætum öll!

Verkalýðsfélag Akraness vill minna félagsmenn sína sem starfa hjá Norðuráli á gríðarlega mikilvægan kynningar- og samstöðufund sem haldinn verður í Bíóhöllinni á morgun, miðvikudaginn 29. júní kl. 20:30. Þar mun formaður félagsins fara ítarlega yfir þá alvarlegu stöðu sem upp er komin í kjaradeilu félagsins við Norðurál. Einnig mun formaður kynna launasamanburð við Fjarðaál sem unninn hefur verið á skrifstofu félagsins en eins og flestir vita var gengið frá samningi við starfsmenn Fjarðaáls fyrir nokkrum dögum síðan.

Þegar launakjör starfsmanna Fjarðaáls og Norðuráls eru borin saman kemur í ljós að gríðarlegur launamunur er á milli þessara fyrirtækja. Þessi launamunur nemur mörgum tugum þúsunda á mánuði en rétt er að geta þess að vakta- og vinnutími í þessum verksmiðjum er nánast eins. Það er alveg ljóst að Verkalýðsfélag Akraness og starfsmenn Norðuráls geta ekki undir nokkrum kringumstæðum sætt sig við að fyrirtæki sem einungis hefur verið starfrækt í fjögur ár eins og Fjarðarál, borgi langtum hærri laun en Norðurál greiðir fyrir sömu vinnu. Á þeirri forsendu vinnur félagið nú að nýrri kröfugerð sem mun taka mið af sömu launahækkunum og um var samið fyrir starfsmenn Fjarðaáls.

Formaður félagsins trúir ekki öðru en að eigendur Norðuráls muni taka tillit til þess samnings sem gerður var hjá Fjarðaáli enda er Fjarðarál greinilega að skila þeim mikla ávinningi sem fyrirtækið hefur notið vegna gengisfalls íslensku krónunnar og stórhækkaðs afurðaverðs með afgerandi hætti til starfsmanna. Félagið vill ítreka að það er gríðarlega mikilvægt að allir starfsmenn Norðuráls sem hafa tök á, fjölmenni nú og sýni samstöðu um að það er ekki við það unað að greidd séu mun hærri laun í öðrum álverksmiðjum heldur en hjá Norðuráli. Orðatiltækið sameinaðir stöndum vér, sundraðir föllum vér, hefur aldrei átt betur við heldur en einmitt núna. Oft er þörf en nú er algjör nauðsyn.

Nú er komið að ykkur að fá launahækkanirVerkalýðsfélag Akraness hefur boðað félagsmenn sína sem starfa hjá Norðuráli til kynningar- og samstöðufundar í Bíóhöllinni á Akranesi, miðvikudaginn 29. júní kl. 20:30 vegna þeirrar alvarlegu kjaradeilu sem nú er uppi við forsvarsmenn Norðuráls. Er þetta annar kynningarfundurinn sem er haldinn á stuttum tíma með félagsmönnum VLFA. Um 100 manns mættu á síðasta fund en nú er algjör skyldumæting og er því krafa formanns félagsins að Bíóhöllin verði kjaftfull á þessum fundi.

Á þessum fundi mun formaður fara yfir nýgerðan kjarasamning sem gerður var við starfsmenn Fjarðaráls en samkvæmt skoðun formanns á þessum samningi er orðið ljóst að þetta nýja fyrirtæki sem einungis hefur verið starfrækt í fjögur ár er komið fleiri tugum þúsunda fram úr launakjörum starfsmanna Norðuráls og mun formaður sýna nákvæmlega á fundinum hver hinn raunverulegi launamunur er í krónum talið en skrifstofa félagsins hefur lagt töluverða vinnu í að reikna út þennan launamun.

Það er ótrúlegt til þess að vita að álfyrirtæki sem hóf starfsemi fyrir einungis fjórum árum síðan skuli vera búið að umbuna sínum starfsmönnum með jafn afgerandi hætti og gert var í þessum samningi sem samþykktur var í Fjarðaráli í gær í ljósi þess að starfsemi Norðuráls er búin að vera við lýði frá árinu 1998 eða í ein 13 ár. Sem dæmi þá hefur barátta Verkalýðsfélags Akraness verið í síðustu samningum að ná inn stóriðjuskóla sem veitir starfsmönnum umtalsverða umbun að afloknu námi. Það hefur ekki tekist hingað til þó vissulega hafi verið samþykkt bókun um starfsnám í síðustu samningum sem ekki hefur verið uppfyllt eins og samningurinn kvað á um. En rétt er að geta þess að í samningnum við Fjarðarál var samþykkt að setja á laggirnar stóriðjuskóla sem mun veita starfsmönnum allt að 10% launahækkun að afloknu námi og einnig hefur verið starfræktur skóli í Alcan í Straumsvík í áraraðir sem hefur skilað starfsmönnum umtalsverðum ávinningi.

Verkalýðsfélag Akraness er eitt félaga hér á landi sem hefur hafnað samræmdri launastefnu og bent á að það séu engar forsendur fyrir því að álfyrirtækin séu sett undir sama hatt er lítur að launahækkunum og önnur fyrirtæki sem eiga í rekstrarerfiðleikum. Reyndar spyr formaður sig að því hvað hafi orðið um samræmdu launastefnuna þegar samið var við Fjarðarál. En rétt er að geta þess að Fjarðarál er að hluta til í Samtökum atvinnulífsins og reyndar eru þau félög sem eiga aðild að þessum samningi innan ASÍ og hafa þau stutt samræmda launastefnu í gegnum ASÍ. Því vekur þessi samningur Fjarðaráls undrun formanns í ljósi þessara staðreynda en að sjálfsögðu fagnar Verkalýðsfélag Akraness þessum samningi innilega, samningi sem gefur starfsmönnum launahækkun upp á allt að 80 þúsund krónum á mánuði, samningi sem er metinn á tugi prósenta. Þetta er ákkurat málið sem Verkalýðsfélag Akraness hefur verið að benda á, það eru þessi fyrirtæki sem geta svo sannarlega skilað ávinningnum til sinna starfsmanna eins og þarna var gert.

Viðræður við forsvarsmenn Norðuráls hafa engan árangur borið enda hafa þeir einungis boðið það sama og um var samð á hinum almenna vinnumarkaði sem er algjörlega út í hött í ljósi þeirra staðreynda að álfyrirtækin hafa hagnast gríðarlega vegna gengisfalls íslensku krónunnar og stórhækkaðs álverðs. Forsvarsmenn Fjarðaráls voru hins vegar tilbúnir til að skila þessum ávinningi til sinna starfsmanna og er það virðingarvert. Á þeirri forsendu trúir formaður Verkalýðsfélags Akraness því ekki að það sama muni ekki gilda fyrir það frábæra starfsfólk sem leggur sig fram af alúð og eljusemi fyrir Norðurál.

Einnig mun verða á fundinum á miðvikudaginn lögð fram tillaga að nýrri kröfugerð, kröfugerð sem byggist á sömu launahækkunum og um var samið hjá Fjarðaráli enda mun Verkalýðsfélag Akraness og reyndar starfsmenn Norðuráls allir, ekki sætta sig við þessa mismunun öllu lengur. Það er ekki hægt að láta það átölulaust að bæði Alcan í Straumsvík og Fjarðarál borgi umtalsvert hærri laun heldur en Norðurál. Við Íslendingar eigum að skoða það gaumgæfilega þegar að erlendir eignaraðilar að álfyrirtækjum óska eftir að hefja starfsemi sína hér á landi hvað þeir eru tilbúnir til að borga starfsmönnum í laun og þau stóriðjufyrirtæki sem eru tilbúin til að skila hér á landi sem mestum ávinningi í formi launagreiðslna til sinna starfsmanna eiga að hafa forgang að þeirri raforku sem við Íslendingar eigum öll saman.

Það er alveg ljóst að það er harður slagur framundan í þessari kjaradeilu en sem betur fer ríkir gríðarlegur einhugur á meðal starfsmanna um að launamunur á milli Norðuráls og annarra stóriðjufyrirtæki verði jafnaður og það í eitt skipti fyrir öll.