• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Viðræðum slitið við Samtök atvinnulífsins
28
 Apr

Viðræðum slitið við Samtök atvinnulífsins

Í morgun fundaði formaður félagsins með ríkissáttasemjara og forsvarsmönnum Samtaka atvinnulífsins vegna kjarasamnings Verkalýðsfélags Akraness á hinum almenna vinnumarkaði. Það er skemmst frá því að segja að niðurstaðan var engin og lét formaður bóka hjá ríkissáttasemjara árangurslausan fund sem er forsenda fyrir því að hægt sé að hefja verkfallsaðgerðir.

Verkalýðsfélag Akraness vísaði sinni kjaradeilu á hinum almenna vinnumarkaði til ríkissáttasemjara 21. janúar síðastliðinn, langt á undan öðrum stéttarfélögum sem eru þessa dagana að vísa sinni deilu til ríkissáttasemjara. En samkvæmt lögum um stéttarfélög og vinnudeilur er ekki hægt að hefja verkfallsaðgerðir eða boðun nema deilunni hafi verið vísað til sáttasemjara og farið hafi fram árangurslausar viðræður. Nú er eins og áður sagði þessu ferli lokið hjá félaginu og ljóst að strax eftir helgi mun félagið kalla saman samninganefnd félagsins til að fara yfir þá grafalvarlegu stöðu sem upp er komin og undirbúa aðgerðir.

En eins og fram kom hér á heimasíðunni í gær mun formaður félagsins leggja til við samninganefnd félagsins að hafinn verði undirbúningur að verkfallsaðgerðum er lúta að fyrirtækjum í fiskvinnslu í fyrstu atrennu. Félagið mun væntanlega boða starfsmenn fiskvinnslufyrirtækja til áríðandi fundar í næstu viku vegna þeirrar stöðu sem upp er komin ef ekki verður búið að semja fyrir þann tíma.

Formaður félagsins var í viðtali í Íslandi í bítið í morgun þar sem sú alvarlega staða sem upp er komin á hinum almenna vinnumarkaði var til umfjöllunar. Hægt er að hlusta á viðtalið hér..

27
 Apr

Þeir hafa kallað eftir stríði og þeir fá stríð

Nú er orðið morgunljóst að ekki muni nást kjarasamningar við Samtök atvinnulífsins á hinum almenna vinnumarkaði með góðu. Á þeirri forsendu mun formaður félagsins um eða eftir helgi boða samninganefnd Verkalýðsfélags Akraness til fundar þar sem verkfallsaðgerðir verða ákveðnar. Formaður mun leggja til við samninganefnd félagsins að hafin verði undirbúningur að verkfalli í öllum fiskvinnslufyrirtækjum á félagssvæði félagsins en þau eru þónokkur. Formaður hefur haft samband við forsvarsmenn nokkurra fiskvinnslufyrirtækja til að greina þeim frá þeirri grafalvarlegu stöðu sem upp er komin á íslenskum vinnumarkaði og fann formaður fyrir miklum vilja frá fulltrúum þeirra fyrirtækja sem hann ræddi við um að leysa þessa kjaradeilu án þess að til átaka kæmi.

Nú eru liðnir 6 mánuðir frá því að kjarasamningar á hinum almenna vinnumarkaði runnu út en íslenskir launþegar hafa orðið fyrir gríðarlegri kaupmáttarskerðingu frá janúar 2008. Á þeirri forsendu verða kjarabætur til handa íslensku verkafólki sóttar af fullum þunga á næstu vikum. Félagið hefur sagt að fyrirtækjum sem starfandi eru í útflutningi og hafa hagnast umtalsvert vegna gengisfalls íslensku krónunnar verði ekki hlíft við að skila þeirri kaupmáttarskerðingu sem starfsmenn þeirra hafa orðið fyrir.

Það er nöturlegt og í raun og veru sorglegt að verða vitni að því að stórt og öflugt sjávarútvegsfyrirtæki eins og til dæmis HB Grandi sjái sér fært að greiða út tæplega 400 milljóna króna arð til hluthafa á sama tíma og fiskvinnslufólk hefur verið án launahækkana í 6 mánuði og um leið orðið fyrir skefja- og miskunnarlausum hækkunum á öllum sviðum. En eins og margoft hefur komið fram hér á heimasíðunni hafa allir varpað sínum vanda viðstöðulaust yfir á íslenska launþega eins og til að mynda ríki, sveitarfélög, verslunareigendur og aðrir þjónustuaðilar.   

Að sjálfsögðu mun félagið leita leiða með þeim fyrirtækjum sem eru á félagssvæði þess til að leysa þessa kjaradeilu án átaka en eins og staðan er í dag er ofbeldi Samtaka atvinnulífsins þvílíkt að ekki verður lengur við unað. Þeir hafa kallað eftir stríði og þeir fá stríð.

Nýr kjarasamningur Elkem samþykktur með tæplega 90% greiddra atkvæða
26
 Apr

Nýr kjarasamningur Elkem samþykktur með tæplega 90% greiddra atkvæða

Síðastliðinn miðvikudag kynnti formaður Verkalýðsfélags Akraness nýgerðan kjarasamning við Elkem Ísland 19. apríl fyrir starfsmönnum fyrirtækisins.

Við undirritun kjarasamningsins er gefur hann starfsmönnum 17,5% að teknu tilliti til eingreiðslu sem félagið samdi sérstaklega um við fyrirtækið. Án eingreiðslu eru starfsmenn að hækka í launum frá tæpum 30.000 til 35.000 kr. á mánuði á fyrsta ári. Samningurinn gildir frá 1. janúar 2011 og með eingreiðslu og afturvirkni samningsins eru starfsmenn að fá allt að 500.000 kr. greiðslu með næstu útborgun. Auk taxtahækkunar eru gerðar breytingar á bónuskerfinu í nýja samningnum, hámarksbónus getur nú gefið 13,5% en 10% áður. Einnig voru nýir þættir voru teknir inn í bónuskerfið sem gerir það að verkum að það mun gefa meira en gamla kerfið gerði.

Á kynningunni lýstu starfsmenn almennt yfir ánægju með samninginn en þeim bauðst að kjósa um hann að aflokinni kynningu og einnig gátu starfsmenn kosið yfir páskahátíðina. Kosningu lauk kl. 15 í dag. Það er skemmst frá því að segja að samningurinn var samþykktur með miklum meirihluta sem sýnir þá miklu ánægju sem ríkti með samninginn. Alls greiddu 125 starfsmenn atkvæði og féllu þau þannig að 111 sögðu já sem eru 88,8% og 14 sögðu nei sem eru 11,2%.

Nú er verk að vinna, því félagið á fleiri ógerða samninga á Grundartangasvæðinu en kjarasamningur Klafa var laus 1. janúar og það er morgunljóst að krafa félagsins verður að sú krafa og eingreiðsla sem um samdist fyrir starfsmenn Elkem gangi jafnt til starfsmenn Klafa. En rétt er að geta þess að Elkem á 50% hlut í Klafa og Norðurál 50%, en Klafi sér um upp- og útskipanir á Grundartangasvæðinu.

Einnig er rétt að geta þess að launaliður Norðuráls var laus um áramótinn og sá samningur sem undirritaður var ásamt eingreiðslunni þarf klárlega að koma að fullu til starfsmanna Norðuráls. Einnig vantar starsfmenn Norðuráls 3% til að brúa endanlega launabilið milli Elkem og Alcan í Straumsvík. Launin voru jöfn til áramóta en þá runnu áhrif eingreiðslu sem félagið samdi um við Norðurál út.

Innbrot í Húsafelli
26
 Apr

Innbrot í Húsafelli

Nú í nótt var brotist inn í sumarbústað Verkalýðsfélags Akraness í Húsafelli. Skemmdir voru unnar á útidyrum, rúða brotin og sjónvarpi stolið. Málið hefur verið kært til lögreglu.

Þeir sem mögulega hafa séð til mannaferða eða geta veitt upplýsingar um málið eru beðnir um að hafa samband við lögreglu eða skrifstofu félagsins.

Aðalfundur Verkalýðsfélags Akraness haldinn í gær
20
 Apr

Aðalfundur Verkalýðsfélags Akraness haldinn í gær

Í gærkvöldi var árlegur aðalfundur Verkalýðsfélags Akraness haldinn á Gamla Kaupfélaginu. Á fundinum fór formaður félagsins yfir starfsemi og verkefni félagsins frá síðasta aðalfundi og endurskoðendur kynntu afkomu félagsins.

Endurskoðendur félagsins fóru yfir ársreikninga félagsins og í yfirferð þeirra kom m.a. fram að allir sjóðir félagsins eru reknir með rekstrarafgangi. Það er gríðarlega mikilvægt að rekstur félagsins skuli vera með þessum hætti því fjárhagslega sterkt og sjálfstætt félag er engum háð og betur í stakk búið til að styðja við sína félagsmenn og berjast fyrir réttindum þeirra af öllum kröftum.

Í skýrslu stjórnar fór formaður yfir þær gríðarlegu breytingar Verkalýðsfélag Akraness hefur tekið á undanförnum árum. Ekki aðeins fjárhagslega heldur einnig félagslega. Félagsmönnum hefur t.a.m. fjölgað mjög ört undanfarin ár og mikill metnaður hefur verið lagður í framúrskarandi þjónustu við félagsmenn.

Það var afar ánægjulegt að heyra í þeim fundarmönnum sem tóku til máls og lýstu yfir ánægju með starfsemi félagsins. Slíkt gerir ekkert annað en að efla stjórnir og starfsmenn félagsins enn frekar til dáða.

19
 Apr

Eingreiðsla og afturvirkni nema allt að 500 þúsund krónum

Járnblendiverksmiðja Elkem á GrundartangaJárnblendiverksmiðja Elkem á GrundartangaRétt í þessu var undirritaður kjarasamningur Verkalýðsfélags Akraness við Elkem Ísland en samningurinn mun gilda til þriggja ára. Þetta er fyrsti samningurinn sem undirritaður er með þessum hætti hjá ríkissáttasemjara í þeirri samningalotu sem nú stendur yfir.

Starfsmenn munu hækka að meðaltali um tæp 10% á fyrsta ári samningsins og mun byrjandi hjá Elkem hækka um tæpar 30 þúsund krónur á mánuði en starfsmaður sem hefur starfað í 10 ár er að hækka um tæpar 35 þúsund krónur. Rétt er að geta þess að samningurinn hefur afturvirkni og munu starfsmenn fá greitt frá 1. janúar 2011. Þessu til viðbótar ákvað fyrirtækið vegna góðrar afkomu þess að greiða starfsmönnum ein föst mánaðarlaun aukalega. Þegar allt þetta er tekið saman er niðurstaðan sú að starfsmaður sem hefur starfað í 10 ár hjá Elkem mun fá tæpar 500 þúsund krónur í formi eingreiðslu við næstu útborgun.

Orlofs- og desemberuppbætur munu einnig hækka töluvert en þær eru samtals í dag 260.542 kr. en munu hækka í 274.872 kr. samanlagt sem er 5,5% hækkun. Heildarhækkun samningsins á samningstímanum að teknu tilliti til eingreiðslunnar vegna góðrar afkomu fyrirtækisins er um 26%.

Formaður telur þennan samning vera mjög ásættanlegan fyrir starfsmenn Elkem en samningurinn verður kynntur fyrir starfsmönnum á fundum á morgun og einnig mun starfsmönnum bjóðast að kjósa um samninginn að lokinni kynningu.

Það er alveg morgunljóst að þetta er sú lína sem félagið mun leggja varðandi aðra samninga á Grundartangasvæðinu, það er að segja við Klafa og Norðurál, en samningur Klafa var laus um áramót og launaliður Norðuráls einnig á sama tíma.

18
 Apr

Drög að kjarasamningi til þriggja ára liggja fyrir hjá Elkem Ísland

Verksmiðja Elkem Ísland á GrundartangaVerksmiðja Elkem Ísland á GrundartangaRétt í þessu var að ljúka samningafundi hjá ríkissáttasemjara vegna kjarasamnings Elkem Ísland og það er skemmst frá því að segja að það liggja fyrir drög að kjarasamningi sem væntanlega verður undirritaður á morgun. 

Hér er um þriggja ára samning að ræða og ef endanleg niðurstaða fæst á morgun mun formaður væntanlega kynna samninginn fyrir starfsmönnum næstkomandi miðvikudag. Formaður er þokkalega sáttur við þau drög sem nú liggja fyrir enda skiptir gríðarlega miklu máli að íslenskir launþegar fari að fá launahækkanir enda eru nú liðinir upp undir 6 mánuðir frá því að kjarasamningar á hinum almenna vinnumarkaði runnu út. Kjarasamningur Elkem rann út 1. janúar og það liggur fyrir að í þessum samningsdrögum muni vera um afturvirkni samningsins að ræða þannig að starfsmenn hafa ekki orðið af launahækkunum fyrir það tímabil frá því að samningurinn rann út.

15
 Apr

Framleiðsla í Sementsverksmiðjunni loksins að fara af stað

SementsverksmiðjanSementsverksmiðjanÁ morgun mun 9 og hálfs mánaðar framleiðslustoppi í Sementsverksmiðjunni loksins ljúka og er áætlað að framleiða 25 þúsund tonn af sementi. Hluti af þeirri framleiðslu er nú þegar seldur, meðal annars í Búðarhálsvirkjun.

Þetta eru gríðarlega jákvæð tíðindi enda hefur rekstrarumhverfi Sementsverksmiðjunnar verið mjög erfitt í kjölfar hruns á byggingarmarkaðinum en formanni VLFA finnst það með óílkindum að verið sé að flytja inn erlent sement frá Danmörku á sama tíma og við Íslendingar erum að framleiða hér hágæða sement. Í fyrra voru flutt inn um 28 þúsund tonn af sementi. Það er mat formanns að íslenska ríkið eigi að styrkja íslenska framleiðslu og versla allt sitt sement innanlands en með því sparast umtalsverðar gjaldeyristekjur.

Árið 2007 framleiddi Sementsverksmiðjan 153 þúsund tonn af sementi sem var nánast metár en í fyrra voru einungis framleidd 38.700 tonn. Ástæðan fyrir því að framleiðsla er að hefjast að nýju er sú að birgðastaða á sementi á lager er nánast engin og munu þessi 25 þúsund tonn duga eitthvað fram á haust en áætlað er að það taki verksmiðjuna tvo mánuði að framleiða þau.

Verkalýðsfélag Akraness skorar á íslenska ríkið sem og alla verktaka að styðja við íslenska framleiðslu með því að versla íslenskt sement. Með því verjum við störf hér á landi og á sama tíma sparast umtalsverður gjaldeyrir og ekki veitir af um þessar mundir.

14
 Apr

Úthlutun orlofshúsa lokið

Nú hefur farið fram úthlutun vegna sumarleigu orlofshúsa félagsins sumarið 2011. Tæplega 260 umsóknir bárust og hafa þær aldrei verið fleiri. Þeir sem sóttu um eiga nú von á bréfi þar sem fram kemur hvort þeir hafi fengið úthlutað eða ekki. Einnig er hægt að sjá upplýsingar um það með því að skrá sig inn á félagavefinn.

Þeir sem fengu úthlutað hafa frest til þriðjudagsins 26. apríl til að greiða leiguna og stuttu eftir það verður þeim vikum sem eftir standa endurúthlutað. Eins og sést á þeim fjölda umsókna sem bárust þá er gríðarlega mikil eftirspurn eftir orlofshúsunum og því mikilvægt að þeir sem fengu úthlutað gangi sem fyrst frá greiðslu ef þeir ætla sér að þiggja sína úthlutuðu viku. Þann 3. maí verður svo hægt að bóka þær vikur sem eftir standa þegar endurúthlutun er lokið og þá gildir sú regla að fyrstur kemur, fyrstur fær.

Tæpar 7 milljónir greiddar í starfsmenntastyrki
11
 Apr

Tæpar 7 milljónir greiddar í starfsmenntastyrki

Það er óhætt að segja að félagsmenn Verkalýðsfélags Akraness nýta sér þjónustu félagsins gríðarlega vel en nú vinna starfsmenn félagsins að því að gera skýrslu stjórnar klára fyrir aðalfund félagsins sem haldinn verður 19. apríl næst komandi á Gamla Kaupfélaginu.

Á árinu 2010 voru greiddar úr sjúkrasjóði 37 milljónir króna til 611 félagsmanna, en þá er um að ræða styrki sem í boði eru úr sjóðnum eins og heilsueflingarstyrkur, gleraugnastyrkir, sjúkraþjálfun, göngugreining, hjartavernd, krabbameinsskoðun og svo að sjálfsögðu sjúkradagpeningar.

Tæplega 200 manns nýttu sér afslátt á Veiði- og Útilegukortum á árinu 2010 en félagið veitir 50% afslátt af útsöluverði.

174 félagsmenn fengu greiðslu úr starfsmenntasjóðum sem Verkalýðsfélag Akraness er aðili að og nam heildarupphæðin rétt tæpum 7 milljónum króna.

Alls nýttu 270 félagsmenn sér orlofshús félagsins og er óhætt að nýtingin á orlofshúsum félagsins sé gríðarlega góð jafnt að sumri sem að vetri.

Um 100 félagsmenn þáðu aðstoð við gerð skattframtala sem félagið bauð upp á og hefur þessi aðstoð fallið í mjög góðan jarðveg hjá félagsmönnum.

Vegna góðrar afkomu félagsins hefur stjórn sjúkrasjóðs ákveðið að hækka hámark heilsueflingarstyrks úr 15.000 í kr. 20.000 sem gerir 33% hækkun. Einnig hefur verið tekinn upp nýr styrkur vegna heilsufarsskoðunar og er hann að hámarki kr. 15.000. Þennan styrk er hægt að nýta t.d. í krabbameinsskoðun, sneiðmyndatöku, maga- og ristilskoðun, skoðun hjá Hjartavernd og Karlaskoðun.

Page 96 of 212

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image