• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Sameinaðir stöndum vér, sundraðir föllum vér
28
 Jun

Sameinaðir stöndum vér, sundraðir föllum vér

Verkalýðsfélag Akraness vill minna félagsmenn sína sem starfa hjá Norðuráli á gríðarlega mikilvægan kynningar- og samstöðufund sem haldinn verður í Bíóhöllinni á morgun, miðvikudaginn 29. júní kl. 20:30. Þar mun formaður félagsins fara ítarlega yfir þá alvarlegu stöðu sem upp er komin í kjaradeilu félagsins við Norðurál. Einnig mun formaður kynna launasamanburð við Fjarðaál sem unninn hefur verið á skrifstofu félagsins en eins og flestir vita var gengið frá samningi við starfsmenn Fjarðaáls fyrir nokkrum dögum síðan.

Þegar launakjör starfsmanna Fjarðaáls og Norðuráls eru borin saman kemur í ljós að gríðarlegur launamunur er á milli þessara fyrirtækja. Þessi launamunur nemur mörgum tugum þúsunda á mánuði en rétt er að geta þess að vakta- og vinnutími í þessum verksmiðjum er nánast eins. Það er alveg ljóst að Verkalýðsfélag Akraness og starfsmenn Norðuráls geta ekki undir nokkrum kringumstæðum sætt sig við að fyrirtæki sem einungis hefur verið starfrækt í fjögur ár eins og Fjarðarál, borgi langtum hærri laun en Norðurál greiðir fyrir sömu vinnu. Á þeirri forsendu vinnur félagið nú að nýrri kröfugerð sem mun taka mið af sömu launahækkunum og um var samið fyrir starfsmenn Fjarðaáls.

Formaður félagsins trúir ekki öðru en að eigendur Norðuráls muni taka tillit til þess samnings sem gerður var hjá Fjarðaáli enda er Fjarðarál greinilega að skila þeim mikla ávinningi sem fyrirtækið hefur notið vegna gengisfalls íslensku krónunnar og stórhækkaðs afurðaverðs með afgerandi hætti til starfsmanna. Félagið vill ítreka að það er gríðarlega mikilvægt að allir starfsmenn Norðuráls sem hafa tök á, fjölmenni nú og sýni samstöðu um að það er ekki við það unað að greidd séu mun hærri laun í öðrum álverksmiðjum heldur en hjá Norðuráli. Orðatiltækið sameinaðir stöndum vér, sundraðir föllum vér, hefur aldrei átt betur við heldur en einmitt núna. Oft er þörf en nú er algjör nauðsyn.

24
 Jun

Tugþúsunda launamunur á milli starfsmanna Fjarðaráls og Norðuráls

Nú er komið að ykkur að fá launahækkanirNú er komið að ykkur að fá launahækkanirVerkalýðsfélag Akraness hefur boðað félagsmenn sína sem starfa hjá Norðuráli til kynningar- og samstöðufundar í Bíóhöllinni á Akranesi, miðvikudaginn 29. júní kl. 20:30 vegna þeirrar alvarlegu kjaradeilu sem nú er uppi við forsvarsmenn Norðuráls. Er þetta annar kynningarfundurinn sem er haldinn á stuttum tíma með félagsmönnum VLFA. Um 100 manns mættu á síðasta fund en nú er algjör skyldumæting og er því krafa formanns félagsins að Bíóhöllin verði kjaftfull á þessum fundi.

Á þessum fundi mun formaður fara yfir nýgerðan kjarasamning sem gerður var við starfsmenn Fjarðaráls en samkvæmt skoðun formanns á þessum samningi er orðið ljóst að þetta nýja fyrirtæki sem einungis hefur verið starfrækt í fjögur ár er komið fleiri tugum þúsunda fram úr launakjörum starfsmanna Norðuráls og mun formaður sýna nákvæmlega á fundinum hver hinn raunverulegi launamunur er í krónum talið en skrifstofa félagsins hefur lagt töluverða vinnu í að reikna út þennan launamun.

Það er ótrúlegt til þess að vita að álfyrirtæki sem hóf starfsemi fyrir einungis fjórum árum síðan skuli vera búið að umbuna sínum starfsmönnum með jafn afgerandi hætti og gert var í þessum samningi sem samþykktur var í Fjarðaráli í gær í ljósi þess að starfsemi Norðuráls er búin að vera við lýði frá árinu 1998 eða í ein 13 ár. Sem dæmi þá hefur barátta Verkalýðsfélags Akraness verið í síðustu samningum að ná inn stóriðjuskóla sem veitir starfsmönnum umtalsverða umbun að afloknu námi. Það hefur ekki tekist hingað til þó vissulega hafi verið samþykkt bókun um starfsnám í síðustu samningum sem ekki hefur verið uppfyllt eins og samningurinn kvað á um. En rétt er að geta þess að í samningnum við Fjarðarál var samþykkt að setja á laggirnar stóriðjuskóla sem mun veita starfsmönnum allt að 10% launahækkun að afloknu námi og einnig hefur verið starfræktur skóli í Alcan í Straumsvík í áraraðir sem hefur skilað starfsmönnum umtalsverðum ávinningi.

Verkalýðsfélag Akraness er eitt félaga hér á landi sem hefur hafnað samræmdri launastefnu og bent á að það séu engar forsendur fyrir því að álfyrirtækin séu sett undir sama hatt er lítur að launahækkunum og önnur fyrirtæki sem eiga í rekstrarerfiðleikum. Reyndar spyr formaður sig að því hvað hafi orðið um samræmdu launastefnuna þegar samið var við Fjarðarál. En rétt er að geta þess að Fjarðarál er að hluta til í Samtökum atvinnulífsins og reyndar eru þau félög sem eiga aðild að þessum samningi innan ASÍ og hafa þau stutt samræmda launastefnu í gegnum ASÍ. Því vekur þessi samningur Fjarðaráls undrun formanns í ljósi þessara staðreynda en að sjálfsögðu fagnar Verkalýðsfélag Akraness þessum samningi innilega, samningi sem gefur starfsmönnum launahækkun upp á allt að 80 þúsund krónum á mánuði, samningi sem er metinn á tugi prósenta. Þetta er ákkurat málið sem Verkalýðsfélag Akraness hefur verið að benda á, það eru þessi fyrirtæki sem geta svo sannarlega skilað ávinningnum til sinna starfsmanna eins og þarna var gert.

Viðræður við forsvarsmenn Norðuráls hafa engan árangur borið enda hafa þeir einungis boðið það sama og um var samð á hinum almenna vinnumarkaði sem er algjörlega út í hött í ljósi þeirra staðreynda að álfyrirtækin hafa hagnast gríðarlega vegna gengisfalls íslensku krónunnar og stórhækkaðs álverðs. Forsvarsmenn Fjarðaráls voru hins vegar tilbúnir til að skila þessum ávinningi til sinna starfsmanna og er það virðingarvert. Á þeirri forsendu trúir formaður Verkalýðsfélags Akraness því ekki að það sama muni ekki gilda fyrir það frábæra starfsfólk sem leggur sig fram af alúð og eljusemi fyrir Norðurál.

Einnig mun verða á fundinum á miðvikudaginn lögð fram tillaga að nýrri kröfugerð, kröfugerð sem byggist á sömu launahækkunum og um var samið hjá Fjarðaráli enda mun Verkalýðsfélag Akraness og reyndar starfsmenn Norðuráls allir, ekki sætta sig við þessa mismunun öllu lengur. Það er ekki hægt að láta það átölulaust að bæði Alcan í Straumsvík og Fjarðarál borgi umtalsvert hærri laun heldur en Norðurál. Við Íslendingar eigum að skoða það gaumgæfilega þegar að erlendir eignaraðilar að álfyrirtækjum óska eftir að hefja starfsemi sína hér á landi hvað þeir eru tilbúnir til að borga starfsmönnum í laun og þau stóriðjufyrirtæki sem eru tilbúin til að skila hér á landi sem mestum ávinningi í formi launagreiðslna til sinna starfsmanna eiga að hafa forgang að þeirri raforku sem við Íslendingar eigum öll saman.

Það er alveg ljóst að það er harður slagur framundan í þessari kjaradeilu en sem betur fer ríkir gríðarlegur einhugur á meðal starfsmanna um að launamunur á milli Norðuráls og annarra stóriðjufyrirtæki verði jafnaður og það í eitt skipti fyrir öll.

Yfir 100 milljónir í verkfallssjóði verða nýttar ef til verkfalls kemur
23
 Jun

Yfir 100 milljónir í verkfallssjóði verða nýttar ef til verkfalls kemur

Eins og fram kom hér á heimasíðunni í gær þá boðaði ríkissáttasemjari til fundar vegna kjaradeilu félagsins við Samtök atvinnulífsins vegna Klafa ehf og hófst fundurinn kl. 8 í morgun í húsakynnum ríkissáttasemjara. Eins og einnig hefur komið fram hér á heimasíðunni þá hafa starfsmenn kosið um að hefja vinnustöðvun 5. júlí næstkomandi og er skemmst frá því að segja að þessi fundur sem var haldinn í morgun gefi litlar vonir til þess að sátt náist fyrir þann tíma.

Það kom skýrt fram í máli forsvarsmanna Samtaka atvinnulífsins og Klafa að engin stefnubreyting hefur orðið af hálfu eigenda Klafa í þessari deilu en eigendur fyrirtækisins eru Elkem Ísland og Norðurál. Þeir bjóða að starfsmenn Klafa fái sömu launahækkanir og um var samið á hinum almenna vinnumarkaði. Sú sanngjarna krafa félagsins fyrir hönd starfsmanna er hins vegar að þeir fái sömu launahækkanir og eingreiðslu og um var samið handa starfsmönnum Elkem Ísland þann 19. apríl síðastliðinn.

Það er gríðarlega mikilvægt að menn átti sig á því að starfsmenn Klafa eru flestir fyrrverandi starfsmenn Elkem Ísland, borða í sama mötuneyti og starfsmenn Elkem Ísland og eru að vinna á sama starfssvæði. Það er því þyngra en tárum taki að verða vitni að því að starfsmenn við eitt matarborðið í mötuneyti Elkem Íslands er án samnings á meðan 99% starfsmanna í verksmiðjunni hafa fengið sína launahækkun og það allverulega. Verkalýðsfélag Akraness og starfsmenn Klafa geta ekki undir nokkrum kringumstæðum horft upp á þessa ósanngirni og óbilgirni af hálfu eigenda Klafa og á þeirri forsendu mun félagið og starfsmenn Klafa fylgja sínum kröfum eftir af fullum þunga og nýta verkfallsheimildina ef ekki næst samkomulag fyrir 5. júlí.

Það kom einnig fram á fundinum í morgun af hálfu forsvarsmanna Norðuráls, sem er annar eigandi Klafa, að þeir telji að starfsmenn Klafa eigi að taka laun samkvæmt kjarasamningum á hinum almenna vinnumarkaði. Hér er einmitt kjarni málsins á ferð, laun á Grundartangasvæðinu sem tengjast stóriðjunum hafa hingað til verið ívið betri heldur en kjarasamningar á hinum almenna vinnumarkaði hvað varðar hin ýmsu réttindamál og launakjör enda er hér um verksmiðjustörf að ræða sem oft á tíðum geta verið krefjandi og hættuleg. Á þeirri forsendu þarf að verja þessi kjör á stóriðjusvæðinu með kjafti og klóm til að forðast það að þessi störf verði gjaldfelld eins og nú virðist vera gerð tilraun til að gera.

Hins vegar er það orðin staðreynd að launakjör í stóriðjunum á Grundartanga eru alls ekki orðin eins góð og þau voru gagnvart almenna vinnumarkaðnum hér á árum áður þegar störf í stóriðjum voru afar eftirsóknarverð.  Nægir að nefna í því samhengi að grunnlaun byrjanda hjá Norðuráli eru einungis 175.000 kr. hjá Klafa er byrjandinn með 180.031 kr. og hjá Elekm Ísland eru byrjanda grunnlaun 194.611 kr.  Það er hlutverk Verkalýðsfélags Akraness að verja starfskjör á svæðinu með kjafti og klóm og sjá til þess að launakjör annara stóriðja séu ekki langtum hærri.  Því er rétt að geta þess að Fjarðarál gekk frá samningi við sína starfsmenn fyrir nokkrum dögum sem gerir það að verkum að tugþúsunda launamunur er nú á milli Norðuráls og Fjarðaráls. 

Verkalýðsfélag Akraness á yfir 100 milljónir í verkfallssjóði sem munu klárlega koma vel til nota ef verkfallið dregst á langinn enda mun félagið að sjálfsögðu styðja starfsmenn af fullum þunga þannig að þeir verði fyrir eins litlu tjóni og hugsast getur ef til verkfalls kemur. Ríkissáttasemjari hefur boðað til næsta fundar fimmtudaginn 30. júní kl. 9:30 og bera formaður félagsins og starfsmenn Klafa þá von í brjósti sér að forsvarsmenn fyrirtækisins sjái að sér og komi til móts við þá sanngjörnu launakröfu sem starfsmenn hafa sett fram.

22
 Jun

Ríkissáttasemjari hefur boðað til fundar í fyrramálið

GrundartangasvæðiðGrundartangasvæðiðEins og fram kom hér á heimasíðunni í gær þá samþykktu starfsmenn Klafa að hefja verkfall 5. júlí nk. Það er alveg óhætt að segja að starfsmenn Klafa séu orðnir sárir og reiðir yfir þeirri framkomu sem þeim er ætíð sýnd þegar kemur að því að semja um kaup kjör þeirra. Eins og fram hefur komið þá eru það Elkem og Norðurál sem eiga Klafa til helminga en Klafi var stofnaður árið 2000, en starfsmenn Klafa voru flestir fyrrverandi starfsmenn Elkem Ísland.

Þegar núverandi starfsmönnum Klafa var tilkynnt árið 2000 að það ætti að stofna nýtt þjónustufyrirtæki undir heitinu Klafi þá var þeim tjáð að það myndi ekki hafa nein áhrif á launakjör þeirra hvorki í nútíð né framtíð. Því miður hefur þetta loforð margoft verið svikið. 

Krafa starfsmanna er að fá sömu launahækkanir og fyrrverandi starfsbræður þeirra hjá Elkem fengu en því hefur alfarið verið hafnað og lítur út fyrir að það séu forsvarsmenn Norðurlás sem leggist gegn slíkum samningi ekki forsvarsmenn Elkem.  Frá þessari kröfu munu starfsmenn ekki kvika enda er engin sanngirni í öðru.

Nú hefur ríkissáttasemjari boðað til fundar kl. 08.15 í fyrramálið og það verður að segjast alveg eins og er að formaður félagsins er alls ekki bjartsýnn á jákvæð tíðindi af þessum fundi og það nema síður sé.   

Verkfall hefst 5. júlí hjá starfsmönnum Klafa
21
 Jun

Verkfall hefst 5. júlí hjá starfsmönnum Klafa

Rétt í þessu var að ljúka kosningu um verkfall hjá starfsmönnum Klafa og er skemmst frá því að segja að það ríkti mikill einhugur hjá starfsmönnum enda var verkfallsboðunin samþykkt með 100% greiddra atkvæða, en kosningaþátttaka var 79%.

Verkfallið mun hefjast 5. júlí næstkomandi kl. 12 á hádegi og standa í ótilgreindan tíma. Það er alveg ljóst að verkfall þetta mun geta haft mjög alvarlegar afleiðingar í för með sér fyrir Elkem Ísland en því miður er ekki hægt að beita verkfallsvopninu gegn Norðuráli þar sem undanþága í kjarasamningi frá árinu 2000 kveður á um að ekki megi raska framleiðslu Norðuráls.

Rétt er að geta þess að Klafi er þjónustufyrirtæki sem sér um alla upp- og útskipun á Grundartangasvæðinu, bæði fyrir Norðurál og Elkem Ísland enda er Klafi í 100% eigu þessara tveggja fyrirtækja. Það er þyngra en tárum taki að þurfa að beina aðgerðum sínum gegn Elkem Ísland einvörðungu vegna þess að starfsmenn og félagið skynja vilja hjá forsvarsmönnum Elkem um að ganga frá kjarasamningi fyrir starfsmenn Klafa. Það er rétt að geta þess að starfsmenn Klafa eru fyrrverandi starfsmenn Elkem Ísland en árið 2000 var þetta þjónustufyrirtæki stofnað í eigu áðurnefndra aðila og þegar fyrirtækið Klafi var stofnað var starfsmönnum lofað því að það myndi hvorki hafa áhrif á launakjör þeirra í nútíð né framtíð.

Einnig er rétt að rifja upp að Elkem Ísland gekk frá mjög góðum samningi fyrir sína starfsmenn þann 19. apríl síðastliðinn, samningi sem gaf starfsmönnum allt að 26% launahækkun.

Því er krafa starfsmanna Klafa sú að þær launahækkanir og eingreiðslur sem um var samið hjá Elkem verði með sambærilegum hætti enda stenst annað ekki nokkra skoðun. En því miður virðist það vera með þeim hætti að Norðurál sé ekki tilbúið að ganga frá samningi á þessum nótum og á þeirri forsendu er málið komið í þann farveg sem hér hefur verið rakinn.

Til upplýsinga þá eru grunnlaun starfsmanna Klafa einungis 180.031 kr. og heildarlaun byrjanda losa rétt 260.000 kr. þannig að það er ljóst að hér er ekki um hálaunastörf að ræða. Því miður er verkfallsvopnið eina vopnið sem starfsmenn hafa eftir að hafa reynt samningaleiðina árangurlaust í 6 mánuði og því verður beitt af fullum þunga ef þörf krefur.

Verkalýðsfélag Akraness skorar á HB Granda
20
 Jun

Verkalýðsfélag Akraness skorar á HB Granda

Eins og fram hefur komið í fjölmiðlum að undanförnu þá hafa nokkur sjávarútvegsfyrirtæki, eins og til dæmis Samherji og Brim, ákveðið að tvöfalda þær eingreiðslur sem um var samið í kjarasamningunum á hinum almenna vinnumarkaði. Það er ekki bara að þessi tvö fyrirtæki hafi tekið þessa jákvæðu ákvörðun fyrir starfsfólk sitt heldur greiddu þau einnig út eingreiðslu í desember sem nam 260 þúsund krónum á hvern starfsmann. Samtals virðast því þessi fyrirtæki hafa greitt sínum starfsmönnum á fjórða hundrað þúsund krónur umfram það sem samið hefur verið um í kjarasamningum. Þessu fagnar formaður Verkalýðsfélags Akraness innilega.

Á þessari forsendu sendu trúnaðarmenn HB Granda hér á Akranesi, í Reykjavík og fyrir austan forstjóra fyrirtækisins, Eggerti Guðmundssyni, bréf þar sem þess var farið á leit að HB Grandi myndi greiða sambærilegar greiðslur og áðurnefnd sjávarútvegsfyrirtæki. Því miður hafnaði forstjóri fyrirtækisins þessari beiðni trúnaðarmannanna og kom fram hjá honum að fyrirtækið umbuni sínu starfsfólki með launum sem þeir geri ráð fyrir að séu samkeppnishæf. Einnig kom fram í svari forstjórans að fyrirtækið fari eftir þeim kjarasamningum sem eru í gildi á hverjum tíma.

Formanni Verkalýðsfélags Akraness er kunnugt um að margir starfsmenn séu sárir og svekktir yfir þessu svari enda er HB Grandi eitt sterkasta og öflugasta sjávarútvegsfyrirtækið hér á landi og starfsmönnum finnst það grátlegt að verið sé að greiða slíkar greiðslur umfram kjarasamninga hjá öðrum sjávarútvegsfyrirtækjum eins og til dæmis Samherja og Brim en því sé alfarið hafnað af hálfu HB Granda.

Á þeirri forsendu skorar Verkalýðsfélag Akraness á HB Granda að endurskoða ákvörðun sína og greiða sínu frábæra starfsfólki sambærilegar eingreiðslur og önnur öflug sjávarútvegsfyrirtæki hafa verið að gera.

16
 Jun

Kosið verður um verkfall hjá Klafa eftir helgi

Klafi sér um upp- og útskipun á GrundartangasvæðinuKlafi sér um upp- og útskipun á GrundartangasvæðinuRétt í þessu var að ljúka fundi hjá ríkissáttasemjara vegna kjaradeilu starfsmanna Klafa við Samtök atvinnulífsins. En Klafi er fyrirtæki sem sér um upp- og útskipanir og önnur þjónustuverk fyrir eigendur sína sem eru Norðurál og Elkem Ísland en hvort fyrirtæki á 50% í Klafa.

Kjarasamningur starfsmanna Klafa rann út um síðustu áramót og hafa verið haldnir 8 fundir hjá riksisáttasemjara og allir algjörlega án árangurs. Síðasti fundur fyrir utan þann sem haldinn var áðan var haldinn 20. maí og tilkynntu forsvarsmenn Klafa og Samtaka atvinnulífsins að engin stefnubreyting væri af hálfu fyrirtækisins varðandi þessa deilu en fyrirtækið hefur boðið sömu launahækkanir og um var samið á hinum almenna vinnumarkaði sem er 11,4% í þriggja ára samningi. Þessu hefur Verkalýðsfélag Akraness algjörlega hafnað enda er Klafi í eigu tveggja stórra útflutningsfyrirtækja og þessu til viðbótar hefur Elkem Ísland gengið frá kjarasamningi fyrir sína starfsmenn upp á umtalsverðar launahækkanir. Krafa félagsins fyrir hönd starfsmanna Klafa er að starfsmenn fái sömu launahækkanir og um var samið hjá Elkem Ísland enda eru starfsmenn Klafa fyrrverandi starfsmenn Elkem Ísland og það lá ljóst fyrir að þegar Klafi var stofnaður að það ætti ekki að hafa áhrif á þeirra launakjör, hvorki í nútíð né framtíð.

Nú liggur orðið fyrir að deilan er komin í algjöran hnút og á þeirri forsendu hefur samninganefnd Klafa ákveðið að boða starfsmenn til fundar á þriðjudaginn næstkomandi þar sem kosið verður um verkfallsheimild. Það liggur hins vegar fyrir að ekki verður hægt að beita verkfallsvopninu gagnvart Norðuráli þar sem gengið var frá samkomulagi árið 2000 um friðarskyldu gagnvart framleiðslu Norðuráls. Það er reyndar umhugsunarefni hví í ósköpunum Norðurál hefur ætíð fengið þessa sérmeðferð í gegnum tíðina en svona er staðan og það er í raun og veru grátlegt að þurfa að beina aðgerðum sínum að fyrirtæki sem er búið að hækka laun sinna starfsmanna, það er að segja Elkem Ísland, og félagið skynjar að Elkem sé tilbúið til að leysa þessa deilu með sambærilegum hætti og gert var fyrir starfsmenn Elkem Ísland.

Það vakti undrun formanns af hverju enginn fulltrúi frá Elkem Ísland sat fundinn hjá ríkissáttasemjara áðan en þeir sem sátu fundinn voru Hannes Sigurðsson fyrir hönd Samtaka atvinnulífsins og Ágúst Hafberg fyrir hönd Norðuráls en samkvæmt upplýsingum formanns þá er það Elkem Ísland sem fer með stjórnarformennsku í Klafa um þessar mundir og því hefði verið eðlilegt að það hefði verið fulltrúi frá þeim á þessum fundi og sérstaklega í ljósi þeirrar bláköldu staðreyndar að fyrirhugaðar aðgerðir munu fyrst og fremst beinast að Elkem Ísland. Þetta vakti eins og áður sagði mikla undrun hjá trúnaðarmanni Klafa og formanni félagsins. En nú er þolinmæði starfsmanna algörlega tæmd enda eru liðnir upp undir 6 mánuðir frá því að kjarasamningurinn rann út og einnig hafa þeir horft upp á starfsbræður sína hjá Elkem fá umtalsverða launahækkun á sama tíma og þeim er boðið sama launahækkun og fyrirtæki sem eiga í bullandi erfiðleikum. Slíkt munu starfsmenn og félagið aldrei sætta sig við.  

Minnum á kynningarfund um nýgerðan kjarasamning við ríkið kl. 18:00
14
 Jun

Minnum á kynningarfund um nýgerðan kjarasamning við ríkið kl. 18:00

Verkalýðsfélag Akraness vill minna þá félagsmenn sína sem starfa hjá ríkinu á kynningarfund um nýgerðan kjarasamning sem haldinn verður á Gamla Kaupfélaginu kl. 18.00 í kvöld.  Formaður félagsins mun fara yfir helstu atriði samningsins og svara þeim spurningum sem upp kunna að koma. 

Grunnlaun uppá 175.000 kr. eru aðhlátursefni og ekki sæmandi álfyrirtæki
10
 Jun

Grunnlaun uppá 175.000 kr. eru aðhlátursefni og ekki sæmandi álfyrirtæki

Í gær stóð Verkalýðsfélag Akraness fyrir fundi í Bíóhöllinni með starfsmönnum Norðuráls vegna þeirrar grafalvarlegu stöðu sem upp er komin í kjaraviðræðum við forsvarsmenn Norðuráls, en nú eru að verða liðnir sex mánuðir frá því launaliður samnings starfsmanna rann út. Á fundinum kom skýrt fram hjá starfsmönnum að þeir eru sárir og reiðir yfir þessu framferði forsvarsmanna Norðuráls.

Á fundinum fór formaður félagsins yfir stöðuna og greindi starfsmönnum frá því að forsvarsmenn Norðuráls hafa algerlega hafnað því að semja við félagið með sambærilegum hætti og félagið samdi við Elkem Ísland en sá samningur var mjög góður.  Forsvarsmenn Norðuráls hafa boðið að semja á sömu nótum og á hinum almenna vinnumarkaði eða sem nemur 11,4% til þriggja ára.

Það kom skýrt fram hjá fundarmönnum í gær að þessu tilboði er algerlega hafnað enda engar forsendur fyrir því að fyrirtæki sem hefur hagnast gríðarlega vegna gengisfalls íslensku krónunar og hækkaðs álverð eða sem nemur tugum prósetna á liðnum misserum fái afslátt í þessum kjaraviðræðum. 

Það er í raun og veru þyngra en tárum taki að fyrirtæki eins og Norðurál sem hefur hagnast um 40 til 50 milljarða frá því það hóf starfssemi hér á landi árið 1998 skuli ekki vera tilbúið að láta starfsmenn njóta ávinnings af góðri afkomu.  Rétt er að geta þess að Norðurál á Grundartanga er skuldlaust fyrirtæki með eigið fé uppá 73 milljarða og launakostnaður er innan við 10% af heildarveltu og einnig rétt að geta þess að grunnlaun byrjanda hjá Norðuráli eru heilar 175.000 kr.  Slík grunnlaun eru aðhláturefni um allt land. 

Að taka tillit til þessara staðreynda um frábæra afkomu sem hefur skapast í gengum gott starfsfólk kemur ekki til greina. Svo skýla forsvarsmenn Norðuráls sér á bakvið samræmda launastefnu sem ASÍ og SA gerðu samkomu lag um, en þar er ekkert tillit tekið til sterkrar stöðu útflutningsfyrirtækja og sem dæmi þá liggur fyrir að það vellur hagnaður uppúr öllum kerjum álfyrirtækja þessi misserin.  Hin samræmda láglaunastefna ASÍ og SA gerir ráð fyrir því að allir fái lítið og ekki megi taka tillit til sterkrar stöðu útflutningsfyrirtækja.

Eins og áður sagði þá hafnaði fundurinn umræddu tilboði frá forsvarsmönnum Norðuráls og þær heyrðust raddir á fundinum að fyrst ekki væri borin meiri virðing fyrir þeim störfum sem þarna væru unnin þá væri ekkert annað í stöðunni en bíða með að semja til loka árs 2014 en þá kemur verkfallsréttur starfsmanna inn.  Rétt er að geta þess að Verkalýðsfélag Akraness náði inn bókun hjá ríkissáttasemjara í síðasta samningi um að kjarasamningur Norðuráls skuli ávalt miðast við þann tíma sem hann rann út, með öðrum orðum starfsmenn Norðuráls munu aldrei tapa þótt samningar dragist um all langa hríð vegna þess að afturvirkni hans er tryggð.

Eins og áður hefur komið fram skein í gegn á fundinum reiði og undrun í garð fyrirtækisins fyrir að það sýni ekki vilja til að skila þeim mikla ávinningi sem fyrirtækið hefur haft vegna hagstæðra ytri skilyrða til starfsmanna. Sérstaklega í ljósi þess að starfsmenn hafa orðið fyrir umtalsverðri kaupmáttarskerðingu, stökkbreyttingu á lánum og öðrum útgjöldum í kjölfar bankahrunsins. Þessa reiði má sjá í ályktun sem starfsmenn sömdu sjálfir og lögðu fram á fundinum. Var ályktunin samþykkt með dynjandi lófaklappi fundarmanna.

09
 Jun

Fundur með starfsmönnum Norðuráls í kvöld

Verkalýðsfélag Akraness minnir á fund sem haldinn verður með starfsmönnum Norðuráls í Bíóhöllinni á Akranesi í kvöld, fimmtudag, kl. 20:30.

Á fundinum verður farið yfir þá grafalvarlegu stöðu sem upp er komin í kjaradeilu félagsins við Norðurál en nú er að verða hálft ár síðan launaliður samningsins rann út og ekkert þokast í viðræðum.

Félagið hvetur starfsmenn Norðuráls til að fjölmenna á þennan áríðandi fund og taka þátt í að ákveða hver næstu skref verða í þessari erfiðu deilu.

Page 93 of 211

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image