Kristinn H Gunnarsson þingmaður Framsóknarflokksins hefur óskað eftir að funda með formanni Verkalýðsfélags Akraness.  Ákveðið hefur verið að fundurinn verði á mánudaginn kemur og hefst hann kl. 10:00.   Formaður félagsins mun gera þingmanninum grein fyrir helstu málefnum sem félagið er að vinna að þessa stundina.  Að sjálfsögðu verður málið í kringum HB Granda það mál sem helst verður til umræðu á þessum fundi og þeim áhyggjum sem stéttarfélagið hefur af því máli.  Einnig ætlar formaðurinn að ræða við þingmanninn um  veggjaldið í Hvalfjarðagöngum en það er mat félagsins að hér sé um afar ósanngjarna skattheimtu um að ræða sem bitnar hvað harðast á Vestlendingum.   Það verður að segjast alveg eins og er að Verkalýðsfélag Akraness er afar ánægt með þann mikla áhuga sem þingmenn kjördæmisins sína Verkalýðsfélagi Akraness og starfsemi þess.  En í fyrradag voru þingmenn Frjálslyndaflokksins á fundi með formanni félagsins þar sem farið var yfir stöðu atvinnumála á okkar félagssvæði.

Fundur sem Verkalýðsfélag Akraness óskaði eftir með forsvarsmönnum HB Granda var haldinn í morgun í höfuðstöðvum fyrirtækisins í Reykjavík.   Á fundinum voru fyrir hönd HB Granda Eggert B Guðmundsson  forstjóri,Vilhjálmur Vilhjálmsson  deildarstjóri uppsjávardeildar og Guðmundur Páll Jónsson starfsmannastjóri.  Frá Verkalýðsfélagi Akraness voru Vilhjálmur Birgisson formaður, Hjörtur Júlíusson trúnaðarmaður Víkings AK og Björgólfur Einarsson trúnaðarmaður síldarbræðslunnar.  Formaður félagsins fór yfir í hverju  áhyggjur starfsmanna síldarbræðslunnar og skipverja Víkings Ak væru fólgnar.  Eins og fram hefur komið hér á heimasíðunni þá hafa tekjur starfsmanna bræðslunnar minkað um allt að 56% á milli ára, er það vegna þess að stórum hluta af uppsjávarafla fyrirtækisins hefur verið landað annarstaðar en á Akranesi.  Nú þegar hafa 5 af 12 starfsmönnum síldarbræðslunnar hætt störfum vegna þessa samdráttar og ljóst að þeir sem eftir eru munu hugsa sinn gang vel ef ekki verður einhver breyting á.  Forsvarsmenn HB Granda lýstu því yfir á fundinum í morgun að þeir vildu fyrir alla muni halda í þá starfsmenn síldarbræðslunnar sem eftir væru.  Því ljóst er að sú mikla þekking starfsmanna á þeim flókna búnaði verksmiðjunnar er fyrirtækinu nauðsynlegur.  Ákveðið var að funda með starfsmönnum  Síldar-og fiskimjölsverksmiðjunnar í næstu viku á þeim fundi verður farið yfir stöðuna eins og hún er í dag.  Það kom skýrt fram í máli forsvarsmanna fyrirtækisins að fullur vilji sé til að halda rekstri Síldar-og fiskimjölsverksmiðjunnar áfram á Akranesi.  Það sem var einna ánægjulegast við þennan fund í morgun var að forsvarsmenn HB Granda tilkynntu að þeir hefðu breytt fyrri ákvörðun sinni um að senda Víking Ak ekki til síldveiða.  Forsvarsmenn HB Granda tilkynntu hins vegar að  Víkingur muni halda til síldveiða í byrjun október og hefur heimild til að veiða um 3500 tonn, og er fyrirhugað að vinna allan þann afla til manneldis.

 Formaður félagsins sagði forsvarsmönnum HB Granda að stéttarfélagið hefði verulegar áhyggjur af þeirri þróun sem átt hafi sér stað að undanförnu.  Búið sé að leggja ísfisktogaranum Haraldi Böðvarssyni en 15 skipverjar voru á skipinu, búið sé að loka smíðaverkstæðinu, loka vélaverkstæðinu og setja rafmagnsverkstæðinu í verktöku.  Það eru  gríðarlega miklir hagsmunir í húfi fyrir allt samfélagið hér á Akranesi að ekki komi til frekari samdráttar heldur orðið er.  Formaður Verkalýðsfélags Akraness sagði við forsvarsmenn HB Granda að stéttarfélagið myndi fylgjast vel með hvernig málin muni þróast hér á Akranesi og verður óspart á að láta í sér heyra ef hagsmunum okkar félagsmanna verður ógnað.