Verkalýðsfélag Akraness fagnar 100 ára afmæli í dag en það var stofnað þann 14. október 1924. Á þeirri öld sem liðin er hafa orðið gríðarlegar breytingar á atvinnulífinu, margir sigrar hafa unnist í verkalýðsbaráttunni og jafnframt hafa verið erfiðari tímar þar sem hert hefur að. Á þessum stóru tímamótum er Verkalýðsfélag Akraness bæði félagslega og fjárhagslega sterkt og heldur áfram að vinna með hag sinna félagsmanna fyrir brjósti enda eru alltaf næg verkefni til staðar þegar kemur að því að verja kaup og kjör verkafólks.

Í tilefni af 100 ára afmælinu hélt félagið opið hús á skrifstofunni að Þjóðbraut 1 föstudaginn 11. október á milli kl. 13 og 17. Boðið var upp á léttar veitingar og ýmsar gamlar myndir og munir voru til sýnis. Gríðarlega góð mæting var á opna húsið en gestir voru nokkur hundruð talsins og naut fólk þess að koma saman og samgleðjast félaginu.

Að kvöldi 11. október voru haldnir afmælistónleikar í Bíóhöllinni þar sem Helgi Björns og Reiðmenn vindanna skemmtu fyrir fullu húsi og voru þeir tónleikar mjög vel heppnaðir á allan hátt.  

Um leið og félagið þakkar öllum þeim sem sáu sér fært að koma og fagna afmælinu síðastliðinn föstudag óskar það félagsmönnum sínum innilega til hamingju með daginn.

Í tilefni afmælisins gaf félagið út afmælisrit þar sem farið er yfir sögu Verkalýðsfélags Akraness. Hægt er að nálgast ritið á skrifstofu félagsins en það verður einnig fljótlega aðgengilegt í rafrænni útgáfu.

Myndir frá föstudeginum má sjá hér.

Í gær fundaði formaður VLFA og SGS með efnahags- og viðskiptanefnd vegna hinna ýmsu laga sem nú liggja fyrir á Alþingi en SGS skilaði inn umsögn vegna tveggja mála. Annað laut að afnámi laga vegna kauptryggingar fiskvinnslufólks og hitt að hugmyndum um skerðingar og afnám á framlagi vegna jöfnunar á örorkubyrði.

Formaður kom því hátt og skýrt á framfæri við efnahags- og viðskiptanefnd að ef hugmyndir þeirra varðandi skerðingu og afnám á framlagi vegna jöfnunar á örorkubyrði verða að veruleika þá er það alvarleg árás á réttindi verkafólks í lífeyrissjóðunum. Lífeyrissjóðir verkfólks sem vinnur erfiðisvinnu eru með langmesta örorkubyrði af öllum á íslenskum vinnumarkaði og sökum þess er réttindaávinnsla minni en hjá öðrum sjóðum. Framlagið í núverandi mynd dugar ekki einu sinni til að jafna þennan mun og því ótrúlegt að verið sé að ræða um að skerða eða afnema það en framlagið hefur verið til þess fallið að jafna þann óréttláta mun sem er á milli lífeyrissjóða og skerðing þess eða niðurfelling mun skerða enn frekar réttindaávinnslu verkafólks.