Formaður Verkalýðsfélags Akraness ásamt aðaltrúnaðarmanni Íslenska járnblendifélagsins áttu fund með forstjóra Íj og Þorsteini Hannessyni þróunarstjóra.  Tilefni fundarins var að fara yfir bónuskerfi starfsmanna og þá sér í lagi mælikvarðana í bónuskerfinu.   

Því miður hefur bónusinn  ekki verið að skila þeim ávinningi sem samningsaðilar vonuðust til.  Það er eins og áður hefur komið fram sérstaklega einn þáttur bónussins sem ekki hefur verið að virka sem skyldi og er það hreinsaður málmur.  Verkalýðsfélag Akraness óskaði eftir því að mælikvarðarnir yrðu endurskoðaðir í þessum þætti bónussins.  

Niðurstaða fundarins í dag var sú að forsvarsmenn ÍJ telja sig vera búna að átta sig á því hvað veldur því að D liðurinn í nýtingarbónusnum sé ekki að virka. Telja forsvarsmenn Íj einnig að starfsmenn geti lagfært ýmislegt sem myndi leiða það af sér að D liðurinn myndi fara að skila því sem til hans er ætlast.  

Ætla forsvarsmenn Íj mjög fljótlega að funda með starfsmönnum þar sem farið verður yfir hvaða atriði það eru sem starfsmenn þurfa að lagfæra.  Einnig var ákveðið á fundinum að D liðurinn í bónusnum muni ekki gefa undir 0,25% í tvo mánuði meðan reynt er lagfæra þennan þátt bónussins. 

Formaður Verkalýðsfélags Akraness hefur óskað eftir formlegum fundi með forsvarsmönnum Sjúkrahúss Akraness.   Á þessum fundi mun félagið óska eftir endurskoðun á stofnanasamningi í ljósi þeirra hækkana sem orðið hafa á lægstu launum hjá sveitarfélögunum, en verulegur launamunur er orðinn á sambærilegum störfum á milli sveitarfélaga og ríkis.

Í bréfinu til framkvæmdastjóra Sjúkrahús Akraness  er farið fram á að hafnar verði sem allra fyrst viðræður um endurskoðun á gildandi stofnanasamningi milli Verkalýðsfélags Akraness og Heilbrigðisstofnunar Akraness. Jafnframt er skorað á framkvæmdastjóra stofnunarinnar að hann leiti allra leiða til að hægt verði að nálgast þau launakjör sem nú eru í gildi hjá sveitarfélögunum varðandi sambærileg störf.  Hægt er að lesa bréfið sem sent var forsvarsmönnum SHA í heild sinni með því að smella á meira.

Sjúkrahúsið og heilsugæslustöðin á Akranesi

bt. skrifstofustjóra

Ásgeir Ásgeirsson

Merkigerði

300Akranes                                                                           Akranesi 1. mars 2006

Efni:    Endurskoðun á stofnanasamningi og launabreytingar hjá starfsmönnum              sveitarfélaga

Samkvæmt samkomulagi sem undirritað var 11.11. 2005 milli Starfsgreinasambandsins og Samninganefndar ríkisins fh. fjármálaráðherra er gert ráð fyrir að gerðar verði breytingar á stofnanasamningum sem taka eiga gildi 1. maí nk. Gert er ráð fyrir samkvæmt samkomulaginu að 1.5% af launasummunni verði ráðstafað í þessar breytingar.

Það hefur vart farið fram hjá neinum að sveitarfélögin í landinu hafa verið að hækka laun þeirra sem lægst hafa haft launin og sérstaklega hefur verið lögð áhersla á að hækka laun þeirra sem starfa við ummönnun, þótt aðrir láglaunahópar hafi líka fengið leiðréttinu. Þetta hefur gerst með samningum milli Eflingar og Reykjavíkurborgar og svo hafa fylgt í kjölfarið heimildir Launanefndar sveitarfélaga, til sveitarfélaganna, að greiða laun umfram kjarasamninga frá því 29. maí 2005.

Forysta Starfsgreinasambands Íslands hefur á fundi með Samninganefnd ríkisins 3. febrúar sl. vakið athygli á þeim mikla mun sem orðin er á launum starfsmanna ríkisins og starfsmanna sveitarfélaga. Fulltrúar SGS lýstu yfir áhyggjum sínum á þeim fólksflótta sem blasir við úr störfum hjá ríkinu verði ekkert að gert. Fulltrúar fjármálaráðherra vísuðu í heimildir forstöðumanna stofnana til að bregðast við með breytingum á stofnanasamningum og að með samkomulaginu frá 11.11. 2005 hefði verið staðið við samningsákvæðin frá 7. apríl 2004 um samanburð milli hópa.

Með bréfi þessu er farið fram á að hafnar verði sem fyrst viðræður um endurskoðun á gildandi stofnanasamningi milli Verkalýðsfélagsins Akraness og Heilbrigðisstofnunar Akraness. Jafnframt er skorað á framkvæmdastjóra stofnunarinnar að hann leiti allra leiða til að hægt verði að nálgast þau launakjör sem nú eru í gildi hjá sveitarfélögunum varðandi sambærileg störf.

Virðingarfyllst,

________________________

Vilhjálmur Birgisson, formaður