Formaður  fundaði með starfsmönnum Klafa í dag þar sem farið var yfir þá staðreynd að eigendur Klafa hafna alfarið að greiða sambærilega bónusgreiðslu og starfsmenn Íslenska járnblendifélagsins fengu í ágúst sl.  Það var eðlilega afar þungt hljóðið í starfsmönnum Klafa.  En góð samstaða var hjá starfsmönnum um að leita réttar síns í máli þessu.

Það er skoðun starfsmanna að hér sé klárlega verið að brjóta á kjarasamningi sem gerður hefur verið við þá.  Formaður félagsins hefur boðað trúnaðarmenn Klafa á fund með stjórn og trúnaðarráði félagsins sem haldinn verður á miðvikudaginn 16 september nk.  Þar verður farið yfir málið í heild sinni og kynnt verður álit lögmanns félagsins á því hvað hann telur að gera eigi í þessari stöðu sem upp er komin.  Eitt er alveg víst að þessi afstaða hjá eigendum Klafa að greiða ekki umrædda bónusgreiðslu mun ekki auðvelda komandi kjarasamningagerð sem er framundan er, nema síður sé.

Verkalýðsfélag Akranes hefur fengið svar við bréfi sem lögmaður félagins sendi forsvarsmönnum Klafa.  Félagið hafði krafist að starfsmenn Klafa fengu sömu eingreiðslu og starfsmenn Íslenska járnblendifélagsins fengu í ágúst, en þar fékk hver starfsmaður um 80 þúsund krónur eftir að Verkalýðsfélag Akraness hafði krafið forsvarsmenn ÍJ um að standa við bókun frá árinu 1998, bókunin veitti starfsmönnum rétt til ágóðahlutdeildar. 

Í svarbréfinu kemur fram að Klafi hafni með öllu að greiða starfsmönnum álíka greiðslu og starfsmenn ÍJ fengu, þeir telja sig ekki vera bundnir af bókun stjórnar ÍJ frá 1998.  Þegar starfsmenn Klafa voru ráðnir var gert samkomulag við Verkalýðsfélag Akraness  og Verkalýðsfélagið Hörður um hver launakjör starfsmanna skyldu vera.   Í því samkomulagi segir að kjarasamningur Íslenska járnblendifélagsins skuli gilda hvað varðar öll kjaraatriði.  Á grundvelli þessa samkomulags krafðist Verkalýðsfélag Akraness Klafa um sambærilega greiðslu til handa starfsmönnum Klafa.  Formaður félagsins fundaði með trúnaðarmanni Klafa í dag og voru þeir í sambandi við lögmann félagsins og voru þeir að meta stöðuna.  Ákveðið var að formaður félagsins fundi með starfsmönnum  mánudaginn 13. september og farið verði yfir stöðu mála.  Ekki er útilokað að félagið vísu þessu máli til dómstóla.  Sé einhver vafi á því að verið sé að brjóta á okkar félagsmönnum, þá mun stjórn félagsins gera allt sem í hennar valdi stendur til að fá þeim vafa eytt.