Klukkan 13 í dag hefst formannafundur Alþýðusambands Íslands þar sem farið verður yfir forsendur kjarasamninga og lagðar línurnar hvort segja eigi upp samningunum vegna vanefnda ríkisstjórnar Íslands á loforðum sem gerð voru samhliða kjarasamningum á hinum almenna vinnumarkaði 5. maí 2011.

Það liggur fyrir að laun eiga að hækka um næstu mánaðarmót og sem dæmi þá eiga taxtalaun að hækka um 11 þúsund krónur og hjá þeim sem ekki vinna eftir svokölluðu taxtakerfi eiga laun að hækka um 3,5%. Það liggur einnig fyrir að forsendur er lúta að Samtökum atvinnulífsins hafa staðist nokkurn veginn en öðru máli gegnir um forsendur er lúta að loforðum ríkisstjórnarinnar. Ef verkalýðshreyfingin ætlaði sér að segja upp samningum til að sækja meiri launabætur til handa launafólki þá er Verkalýðsfélag Akraness tilbúið til að fara í þá vegferð. Það liggur hins vegar fyrir að það stendur ekki til vegna þess að forsendur er lúta að Samtökum atvinnulífsins hafa staðist. Því telur stjórn og trúnaðarráð Verkalýðsfélags Akraness það ekki skynsamlegt að segja upp kjarasamningum og hafa af launafólki þær kjarabætur sem eiga að koma til framkvæmda 1. febrúar næstkomandi. Formanni er það minnisstætt þegar stöðugleikasáttmálinn var gerður 2009 og launahækkunum var frestað sem hafði þær afleiðingar að verkafólk varð af á annað hundrað þúsund krónum í launum.

Hins vegar er ekki hægt að horfa stundinni lengur á þau svik ríkisstjórnarinn er lúta að íslensku launafólki og þeim loforðum sem gerð hafa verið í gegnum tíðina en þau svik hafa gert það að verkum að ráðist er á þá sem minnst mega sín í íslensku samfélagi sem eru atvinnulausir, ellilífeyrisþegar og öryrkjar. Samkvæmt loforði Steingríms J. Sigfússonar og Jóhönnu Sigurðardóttur áttu atvinnuleysisbætur og elli- og örorkubætur að hækka um 11 þúsund krónur en það hefur verið svikið og áðurnefndar bætur munu einungis hækka um 5.500 kr. Ekki hefur heldur verið staðið við jöfnun lífeyrisréttinda heldur hefur verið tekin ákvörðun um að skattleggja lífeyrissjóðina á hinum almenna vinnumarkaði sem gerir ekkert annað en að auka á þann ójöfnuð sem nú er fyrir.

Formaður Verkalýðsfélags Akraness ætlar að leggja fram ályktun á formannafundinum og vonast hann eindregið til þess að sú ályktun verði samþykkt en hún hljóðar með eftirfarandi hætti:

Ályktun

 Formannafundur Alþýðusambands Íslands haldinn þann 19. janúar 2012 lýsir forundrun sinni á því að ríkisstjórn sem kennir sig við norræna velferð, félagshyggju, jöfnuð og réttlæti ætli enn og aftur að svíkja verkalýðshreyfinguna illilega þegar kemur að því að efna loforð sem gerð eru samhliða kjarasamningum á hinum almenna vinnumarkaði.

Aðildarfélög ASÍ geta ekki og ætla ekki að láta þessi síendurteknu svik stjórnvalda átölulaus stundinni lengur. Á þeirri forsendu krefst formannafundurinn þess að ríkisstjórn Íslands standi við þau loforð sem fram koma í yfirlýsingu sem ríkisstjórnin gerði við verkalýðshreyfinguna samhliða kjarasamningum 5. maí 2011. Að öðrum kosti sér formannafundurinn sig knúinn til að lýsa yfir vantrausti á ríkisstjórn Íslands vegna þessara síendurteknu svika.

___

Hér má svo sjá ályktun stjórnar og trúnaðarráðs Verkalýðsfélags Akraness sem samþykkt var 10. janúar 2012.

Það er óhætt að segja að íslenskt launafólk hafi fengið frábæran dóm frá Hæstarétti í gær er hæstiréttur sneri dómi héraðsdóms Reykjavíkur algjörlega við. Það mál sem um ræðir er vinnuslys sem varð í Norðuráli þegar Þórarinn Björn Steinsson kom samstarfskonu sinni til hjálpar eftir að bakskautaklemma sem var 620 kg að þyngd, féll ofan á hana. Þórarni ásamt öðrum vinnufélaga sínum tókst með ótrúlegum hætti að lyfta þessu þunga járnstykki ofan af samstarfskonunni en því miður með þeim skelfilegu afleiðingum fyrir Þórarin að hann hefur verið 75% öryrki eftir þessa hetjudáð.

Eins og áður sagði sneri hæstiréttur dómnum algjörlega við en bæði Sjóvá almennar og Norðurál höfðu verið algjörlega sýknuð af allri skaðabótaskyldu gagnvart þessu vinnuslysi í héraðsdómi og er því hér um gríðarlega hagsmuni að ræða, ekki bara fyrir Þórarin heldur alla íslenska launþega eins og áður sagði.

Nú hefur verið tekinn af allur vafi um að íslenskt launafólk þarf ekki að hika við að koma samstarfsfólki sínu til hjálpar og sitja sjálft uppi með tjón sem það hugsanlega getur orðið fyrir við slíka björgun.

Dómurinn er alveg hvellskýr en hann kveður á um að Norðurál sé skaðabótaskylt gagnvart Þórarni þegar hann kom samstarfskonu sinni til hjálpar. Í dómnum segir meðal annars:

„Áfrýjandi varð fyrir tjóni sínu er hann kom samstarfsmanni sínum Málfríði Söndru í skyndingu til hjálpar þar sem hún hafði skorðast undir þungu málmstykki. Telja verður að viðbrögð áfrýjanda, og hins starfsmannsins sem lyfti undir klemmuna með honum, hafi verið eðlileg við þær aðstæður sem upp voru komnar. Má fyrirfram gera ráð fyrir að starfsmenn komi samstarfsmönnum, sem verða fyrir slysum, til hjálpar eftir föngum, ekki síst til að aflétta hættu sem að samstarfsmanni steðjar, eins og að losa hann undan fargi svo sem hér var raunin. Viðbrögð áfrýjanda og starfsfélaga hans voru líka til þess fallin að draga úr tjóni samstarfsmannsins sem undir farginu lá og voru þau að því leyti í þágu hagsmuna stefnda Norðuráls Grundartanga ehf. sem vinnuveitanda samstarfsmannsins. Af þessu leiðir að tjónið sem áfrýjandi varð fyrir, er hann lyfti hinu þunga fargi, telst til bótaskyldra afleiðinga af þeirri háttsemi sem fyrr var lýst og talin er valda bótaskyldu stefnda Norðuráls Grundartanga ehf.“

Þessu til viðbótar var Norðurál dæmt til að greiða Þórarni málskostnað að upphæð 1.200.000 kr.

Formaður Verkalýðsfélags Akraness er gríðarlega ánægður með þennan dóm en félagið hefur staðið þétt við bakið á Þórarni í þessu máli og sá meðal annars til þess að greiða allan kostnað varðandi áfrýjun til hæstaréttar og var búið að gefa Þórarni fullkomið loforð um það að ef málið myndi tapast þá myndi félagið greiða allan þann málskostnað sem hlytist af þessu máli. Enda er það stefna stjórnar félagsins að standa ávallt þétt við bakið á sínum félagsmönnum þegar brotið er á þeim og hagsmunir þeirra eru í húfi.

Formaður félagsins óskar Þórarni innilega til hamingju með þennan dóm en það er ljóst að með þessum dómi mun hann fá skaða sinn bættan og formanni þótti vænt um að heyra þau hlýju orð sem Þórarinn lét falla víða í fjölmiðlum í gær í garð félagsins er lítur að aðstoð og aðkomu VLFA að þessu máli.

Það er óhætt að segja að lýðræðisofbeldið og einræðið innan Alþýðusambands Íslands hafi náð nýjum hæðum í gær. En eins og fram hefur komið í fréttum þá var í gær haldinn formannafundur ASÍ þar sem farið var yfir forsenduákvæði kjarasamninga og síendurteknar vanefndir ríkisstjórnar Íslands á liðnum árum.

Á fundinum gerði forseti ASÍ grein fyrir vanefndum ríkisstjórnarinnar á samkomulagi við verkalýðshreyfinguna sem gert var samhliða kjarasamningum á hinum almenna vinnumarkaði 5. maí 2011. En fram kom í máli forsetans að ríkisstjórnin ætlaði ekki að taka fjárlögin upp og koma með þær launahækkanir til handa atvinnulausum, ellilífeyrisþegum og öryrkjum sem um hafði verið samið. Einnig kom fram að ekki yrði breyting á skattlagningu á lífeyrissjóðunum.

Formaður Verkalýðsfélags Akraness tók til máls og sagði að þetta væri grafalvarlegt mál í ljósi þess að atvinnurekendur hefðu staðið við sinn þátt í kjarasamningum, en hins vegar lægi það fyrir að ríkisstjórn Íslands hafi enn og aftur svikið sinn þátt í þríhliða samkomulagi við gerð kjarasamninga. Á þeirri forsendu lagði formaður fram tillögu þar sem þess var krafist að ríkisstjórn Íslands stæði við þau loforð sem fram komu í yfirlýsingu sem ríkisstjórnin gerði við verkalýðshreyfinguna samhliða kjarasamningum 5. maí 2011. Að öðrum kosti myndi formannafundurinn lýsa yfir vantrausti á ríkisstjórn Íslands vegna þessara síendurteknu svika.

Það er óhætt að segja að þessi ályktun hafi gert það að verkum að flokkspólitísk gríma nokkurra af æðstu forystumanna verkalýðshreyfingarinnar hafi fallið. Forseti Alþýðusambandsins tók til máls og neitaði að taka tillöguna til afgreiðslu, á þeirri forsendu að formannafundur ASÍ væri ekki ályktunarhæfur. Formaður VLFA benti forseta ASÍ á að formannafundur Starfsgreinasambands Íslands, sem er stærsta landsamband ASÍ, hafði ályktað deginum áður um vanefndir ríkisstjórnarinnar og að sjálfsögðu var formannafundur SGS ályktunarhæfur, enda datt engum í hug að draga slíkt í efa.

Um það er getið í lögum ASÍ að hægt sé að leggja fram ályktanir á formannafundum, en það þurfi að gerast með þriggja vikna fyrirvara. Í þessu tilfelli lá fyrir að fundurinn var einungis boðaður með 13 daga fyrirvara og því ekki mögulegt að verða við því. Formaður óskaði eftir því að fundurinn myndi greiða um það atkvæði hvort tillagan yrði tekin til afgreiðslu, því í öllum lýðræðislegum félögum geta fundir tekið ákvarðanir um slíkt. Þessi harðneitaði forseti Alþýðusambands Íslands, en lagði hins vegar fram tillögu um að ályktuninni yrði vísað til umfjöllunar hjá samninganefnd ASÍ. Formaður hefur aldrei orðið vitni að öðru eins lýðræðislegu ofbeldi, þótt hann hafi nú marga fjöruna sopið hvað það varðar þegar kemur að forystu ASÍ og nægir að nefna í því samhengi þegar reynt var að slökkva á míkrófóni þegar formaður hélt ræðu á ársfundi Alþýðusambands Íslands 2009..  Það liggur alveg fyrir í huga formanns að sú ályktun sem lá fyrir fundinum þjónaði hvorki flokkspólitískum hagsmunum forsetans né annarra forystumanna innan verkalýðshreyfingarinnar og því var þessu lýðræðislega ofbeldi beitt.

Sem betur fer fékk þessi ályktun stuðning nokkurra aðila, þar á meðal formanns stærsta stéttarfélags á Íslandi í dag sem er VR, auk nokkurra aðila til viðbótar. Þessir aðilar voru því sammála að formannafundur ASÍ væri að sjálfsögðu ályktunarhæfur og þessi ályktun ætti að koma til afgreiðslu. En eins og áður sagði neitaði forseti ASÍ því algerlega, þó svo að miðstjórn ASÍ hafi í janúar 2009 lagt fram vantrauststillögu á þáverandi ríkisstjórn og einnig sent frá sér fréttatilkynningu eftir formannafund einnig í janúar 2009 um að verkalýðshreyfingin lýsti yfir vantrausti á þáverandi ríkisstjórn.

Formaður félagsins sagði á fundinum í gær að forystumenn í verkalýðshreyfingunni eigi ekki undir nokkrum kringumstæðum að vera eyrnamerktir einhverjum einum ákveðnum stjórnmálaflokki, heldur styðja öll góð málefni óháð því frá hvaða flokki slík mál koma. Og að sjálfsögðu á að gagnrýna ríkisstjórnir óháð því hvaða stjórnmálaflokkar sitja í ríkisstjórn hverjum tíma fyrir sig. Það er greinilegt að það skiptir máli hvaða ríkisstjórn er við stjórnartaumana þegar kemur að því að senda frá sér afdráttarlausar ályktanir af hálfu ASÍ. Það skiptir máli hvort ríkisstjórnin er til hægri, vinstri eða miðju. Þessi afgreiðsla forsetans í gær staðfestir það svo ekki verður um villst.

Það liggur fyrir að forseti Alþýðusambandsins hefur unnið leynt og ljóst að því að ná samningsumboði frá stéttarfélögunum við gerð kjarasamninga, sem honum hefur að hluta til tekist eins og sást í síðustu samningum. En það liggur algerlega fyrir að samningsumboðið á að vera hjá stéttarfélögunum sjálfum. Þessu til viðbótar er búið að læða inn forsenduákvæði kjarasamninga, þar sem fámenn elíta innan forystu ASÍ tekur afstöðu til þess hvort forsenduákvæði kjarasamninga eigi að halda eða ekki. Það er ekki í höndum stéttarfélaganna eins og margir halda. Lýðræðislegt ofbeldi af þeim toga sem forseti ASÍ sýndi í gær og þeir einræðistilburðir sem hann hefur ástundað frá því hann tók við sem forseti ASÍ þekkjast ekki nema þá helst hjá forseta Norður-Kóreu og hans líkum.

Það er óhætt að segja að félagsmenn nýti þjónustu félagsins vel, en á árinu sem nú er nýliðið voru greiddar út úr sjúkrasjóði félagsins upp undir 35 milljónir króna í formi sjúkradagpeninga og hinna ýmsu styrkja sem félagið býður upp á. Einnig voru félagsmenn duglegir að nýta sér fræðslustyrki úr þeim sjóðum sem félagið á aðild að, en greiðslurnar námu á síðasta ári 7,7 milljónum króna. 208 félagsmenn nýttu sér þessa fræðslustyrki sem gerir að meðaltali um 37.000 kr. á mann.

Félagavefurinn sem opnaður var árið 2010 hefur farið gríðarlega vel af stað, en á síðasta ári voru 1952 innskráningar. Þetta segir okkur að félagsmenn hafa nýtt sér félagavefinn mjög vel og sést umtalsverð aukning frá mánuði til mánaðar. Á félagavefnum er hægt að skoða iðgjaldasögu, punktastöðu, greiðslusögu vegna bóta og styrkja og úthlutunarsögu vegna orlofshúsa. Jafnframt býður félagavefurinn upp á upplýsingar um stöðu orlofshúsa og einnig er hægt að sækja um, bóka og greiða fyrir orlofshús með greiðslukorti.

Nýting á orlofshúsum félagsins hefur einnig verið gríðarlega mikil, en eins og fram hefur komið hér á heimasíðunni þá fjárfesti félagið í nýjum glæsilegum bústað í Kjós í Hvalfirði og það er skemmst að segja frá því að hann er uppbókaður allt fram að sumarúthlutun. Þetta sýnir að félagsmenn eru afar ánægðir með þennan nýja valkost sem félagið býður upp á.

Þrátt fyrir samdrátt á íslenskum vinnumarkaði og minnkandi tekjur þá jukust félagstekjur Verkalýðsfélags Akraness um tæp 7% á milli ára sem sýnir okkur svo ekki verður um villst að félagssvæði Verkalýðsfélags Akraness er sterkt m.a. vegna öflugra útflutningsfyrirtækja sem starfa á svæðinu. Upp undir 70% af félagsmönnum VLFA starfa hjá útflutningsfyrirtækjum. Þessi aukning á félagstekjum skýrist einnig af því að félaginu tókst að ná umtalsvert betri kjarasamningum á liðnu ári, en um var samið á hinum almenna vinnumarkaði í anda svokallaðrar samræmdrar launastefnu.

Sökum sterkar stöðu félagsins þá hefur félagið ákveðið að hækka t.d. fæðingarstyrki um 100% og nemur styrkurinn nú 70.000 kr. til félagsmanns. Ef báðir foreldrarnir eru félagsins þá nemur styrkurinn 140.000 kr. Það er stefna stjórnar að láta félagsmenn ávalt njóta góðs af góðum rekstri og rekstrarafkomu félagsins, enda stefnir stjórnin að því að reyna að þjónusta sína félagsmenn eins vel og kostur er á öllum sviðum.

Það er óhætt að segja að loðnuvertíðin sé nú að fara á fulla ferð í síldarbræðslunni hér á Akranesi. Á fimmtudaginn síðasta landaði Ingunn AK 2000 tonnum og í þessum töluðu orðum er gamla aflaskipið Víkingur AK að landa 1400 tonnum. Í kvöld landar Faxi RE og samkvæmt upplýsingum þá er hann með fullfermi.

Þetta eru gríðarlega jákvæðar fréttir enda byggjast laun starfsmanna í síldarbræðslum að stórum hluta á loðnuvertíðinni sjálfri þegar unnið er á vöktum svo ekki sé nú talað um tekjur sjómanna sem byggjast á því að aflist vel. Einnig skiptir þetta íslenskt þjóðarbú mjög miklu máli enda liggur það fyrir að það eru útflutningstekjur sem halda uppi íslenskri velferð og á þeirri forsendu verða það að teljast jákvæðar fréttir að hér stefni í eina bestu loðnuvertíð í mörg ár.

Það er óhætt að segja að tíðarfarið í vetur hafi haft áhrif á útleigu á sumarbústöðum félagsins, sérstaklega á bústaðnum í Svínadal. En nú er staðan þannig að það er búið að vera meira og minna ófært frá byrjun desember til dagsins í dag og á þeirri forsendu hefur ekki verið hægt að leigja bústaðinn út. Ófærð af þessu tagi hefur ekki verið síðastliðin 10 ár þó vissulega detti út ein og ein helgi sem ekki hefur verið hægt að leigja út sökum ófærðar. 

Einnig hefur dottið út ein og ein helgi í sumarbústað félagsins í Hraunborgum í Grímsnesi sökum ófærðar en aðrir orlofskostir félagsins hafa gengið frábærlega eins og til dæmis bústaðurinn í Húsafelli og síðast en ekki síst í Kjós í Hvalfirði en í bæði þessi hús félagsins hefur verið greiðfært fram til þessa. Nú er bara að vona að tíðin fari að lagast þannig að hægt verði að koma bústöðunum út í fulla útleigu að nýju enda er eftirspurnin gríðarleg um allar helgar.

Þann 20. janúar skrifaði Sjómannasamband Íslands undir samkomulag við LÍÚ um hækkanir á kauptryggingu og öðrum kaupliðum frá 1. febrúar nk.

Kjarasamningar sjómanna á fiskiskipum hafa verið lausir frá 1. janúar 2011 og ekki útlit fyrir breytingar á því á næstunni. Í desember 2010 lýsti formaður LÍÚ því yfir að ekki yrði samið við sjómenn fyrr en niðurstaða fengist varðandi fyrirhugaðar breytingar á lögum um stjórn fiskveiða. Niðurstaða í því máli hefur ekki enn fengist og því nánast engar viðræður í gangi milli aðila um endurnýjun kjarasamningsins. Á aðalfundi sjómannadeildar VLFA sem haldinn var 28. desember 2011 voru kjarasamningar m.a. til umræðu og var það mat fundarmanna að algjörlega óásættanlegt væri að halda kjarasamningum sjómanna í herkví vegna ágreinings útgerðarmanna við stjórnvöld. Hins vegar voru fundarmenn sammála um að ámælisvert sé af stjórnvöldum hversu lengi það hefur dregist að leggja fram breytingar á fiskveiðistjórnunarkerfinu

Þrátt fyrir samningsleysið hefur LÍÚ fallist á að hækka kauptryggingu og aðra kaupliði hjá sjómönnum um sömu prósentuhækkun og samið var um á almenna vinnumarkaðnum. Hækkunin nemur 3,5% og tekur gildi 1. febrúar næstkomandi eins og áður sagði.

Hér er hægt að nálgast samkomulagið í heild sinni.

Hér er hægt að nálgast nýja kaupskrá fyrir sjómenn sem tekur gildi 1. febrúar 2012.

Nú er að hefjast fiskvinnslunámskeið fyrir starfsmenn HB Granda á Akranesi en samkvæmt kjarasamningi hækka starfsmenn við slíkt námskeið um tvo launaflokka. Með öðrum orðum, þeir fara úr launaflokki 5 sem er almennur fiskvinnslumaður og í sérhæfðan fiskvinnslumann sem er launaflokkur 7.

Því til viðbótar var samið um í síðustu samningum að sérhæfður fiskvinnslumaður sem lokið hefur slíku námskeiði getur farið í viðbótarfiskvinnslunám sem veitir honum tveggja flokka launahækkun til viðbótar sem þýðir að viðkomandi fer í launaflokk 9.

Formaður Verkalýðsfélags Akraness mun á mánudaginn fara yfir réttindi og skyldur á íslenskum vinnumarkaði og jafnframt gera grein fyrir hinum ýmsu bónuskerfum sem nú eru í gildi og sýna hver meðaltalsbónus á landinu er sem og hér á Akranesi. Það er skemmst frá því að segja að það er mismunandi á milli fiskvinnslufyrirtækja hver bónus fiskvinnslufólks er. Meðaltalsbónus á landsvísu er 290 kr. en á Akranesi er meðaltalsbónusinn hins vegar 350 kr sem er rúmlega 20% hærri bónus en á landsvísu.

Launataxtar fiskvinnslufólks munu hækka um 11 þúsund krónur frá og með 1. febrúar næstkomandi og einnig mun bónusinn hækka um 3,5% en þó að lágmarki um 10 krónur pr. klst.  

Það er óhætt að segja að gríðarlega alvarlegir hlutir blasi nú við Heilbrigðisstofnun Vesturlands ef fyrirliggjandi fjárlög verða samþykkt. En gert er ráð fyrir að stofnunin þurfi að skera niður um allt að 150 til 200 milljónir á næsta ári sem mun hafa þær skelfilegu afleiðingar í för með sér.  En vel á þriðja tug starfsmanna munu missa vinnuna hér á Akranesi  og umtalsverður fjöldi starfsmanna mun verða lækkaður í starfshlutfalli. Þetta eru blákaldar staðreyndir því það er ljóst að það mun þurfa að loka einni deild á sjúkrahúsinu á Akranesi.

Það er þyngra en tárum taki að horfa upp á þann miskunnarlausa niðurskurð sem heilbrigðisstofnunin hefur mátt þola og er það mat formanns félagsins að þessi mikli niðurskurður geti leitt til þess að öryggi sjúklinga verði ógnað. Heilbrigðisstofnunin hefur þurft að skera niður, til dæmis á sjúkrasviði frá árinu 2008 um heil 41% en í heildina nemur niðurskurður hjá stofnuninni frá hruni 25%.  

Við Akurnesingar erum afar stoltir af sjúkrahúsi Akraness og þeirri þjónustu sem þar er boðið upp á og því er það algjörlega óásættanlegt að horfa upp á hvernig er verið að mylja undan þeirri góðu starfsemi sem þar fer fram. Það er algjörlega morgunljóst að Akurnesingar munu ekki horfa aðgerðarlausir á þann mikla niðurskurð sem nú liggur fyrir á Heilbrigðisstofnun Vesturlands og munu bæjarbúar svo sannarlega fylgjast vel með framvindu þessa máls enda er hér um gríðarlega hagsmuni að ræða fyrir samfélagið hér á Akranesi.

Formaður skorar á Alþingi Íslendinga þegar að þriðja umræða um fjárlögin fer fram á næstu dögum, að sjá til þess að slegin verði  skjaldborg utan um heilbrigðisþjónustuna vítt og breitt um landið enda er heilbrigðisþjónustan hornsteinn í hverju samfélagi fyrir sig.

Það er einnig þyngra en tárum taki að sjá þá forgangsröðun sem stjórnvöld nota þegar kemur að niðurskurði í heilbrigðiskerfinu því það er formanni Verkalýðsfélags Akraness óskiljanlegt að horfa upp á fjárveitingar eins og til dæmis til Sinfóníuhljómsveitar Íslands upp á 800 milljónir á ári og 150 milljónir sem fara til Íslensku óperunnar á sama tíma og þessi miskunnarlausi niðurskurður fer fram á heilbrigðisþjónustu vítt og breitt um landið. Það er einnig hægt að benda á þær gríðarlegu upphæðir sem það kostar að halda úti sendiráðum vítt og breitt um heiminn en sá heildarkostnaður nemur í kringum 2,7 milljarða. Einnig er umhugsunarefni sá gríðarlegi kostnaður sem fylgir aðildarumsókn að ESB en samkvæmt fjárlögum nemur sá kostnaður í kringum 1,4 milljarð á þessu ári. Það hlýtur að vera mun mikilvægara að halda úti öflugu heilbrigðiskerfi heldur en þessum atriðum sem hér hafa verið nefnd, þó með fullri virðingu fyrir þeim. 

Ríkisstjórnin sem kennir sig við félagshyggju, jöfnuð og réttlæti og síðast en ekki síst velferð, getur ekki lagt fram frumvarp sem gerir það að verkum að verið sé að höggva í þá grunnstoð velferðarinnar sem heilbrigðisþjónustan er. Því ítrekar formaður þá áskorun sína að Alþingi Íslendinga sjái til þess að heilbrigðiskerfinu verði hlíft við þessum miskunnarlausa niðurskurði eins og kostur er því ekkert er eins mikilvægt okkur Íslendingum eins og góð heilbrigðisþjónusta.

Það er óhætt að segja að tíðindi úr atvinnulífinu hér á Akranesi hafi verið skelfileg að undanförnu en 70 manns hefur verið tilkynnt um blóðugar uppsagnir á undanförnum vikum. Þessar uppsagnir tengjast fyrirtækjum vítt og breitt í okkar samfélagi en 16 manns hefur verið sagt upp hjá Sementsverksmiðjunni, 14 manns hjá trésmíðafyrirtækinu TH, Elkem Ísland hefur sagt upp 5 manns og nú síðast hefur verið tilkynnt að um 30 manns muni missa vinnuna á Sjúkrahúsi Akraness ásamt því að umtalsverður fjöldi starfsmanna verður lækkaður í starfshlutfalli.

Svona gríðarlegar uppsagnir hafa ekki átt sér stað í einum mánuði á atvinnusvæði okkar Akurnesinga frá hruni en í október voru 199 manns án atvinnu á Akranesi og því ljóst að þessi mikli fjöldi sem nú er að missa vinnuna mun hækka atvinnuleysistölur hér á Akranesi gríðarlega.

Það er því undarlegt að hlusta á Steingrím J. Sigfússon, fjármálaráðherra, tala sífellt um að nú sé landið tekið að rísa en það er mat formanns félagsins að það væri nær að segja landið frýs, sérstaklega í ljósi þeirra bláköldu staðreynda sem hér hafa verið raktar. Fjármálaráðherrann hefur einnig talað um aukinn hagvöxt, hagvöxt sem byggist fyrst og fremst á einkaneyslu vegna þess að íslenskt launafólk gengur nú miskunnarlaust á séreignarsparnað sinn til að sjá sér og sínum farborða en bara á þessu ári hefur launafólk tekið út séreignarsparnað sem nemur 25 milljörðum króna.

Það er orðið löngu tímabært að íslensk stjórnvöld geri sér grein fyrir þeirri grafalvarlegu stöðu sem nú ríkir á íslenskum vinnumarkaði, en nú eru um 12 þúsund manns án atvinnu hér á landi.   Það er morgunljóst að það á eftir að fjölga allverulega á atvinnuleysisskránni á næstu mánuðum, þegar áhrifin af þeim miskunnarlausa niðurskurði sem verið hefur í heilbrigðiskerfinu fara að skila sér.

Hvernig má það vera að hundruðum milljóna af almennafé sé dælt til eftirlitsstofnana eins og t.d. Fjármálaeftirlitsins á sama tíma og höggvið er skefjalaust í okkar grunnstoð sem er okkar góða heilbrigðiskerfi.  Einnig er rétt að benda á að í nýgerðu fjárlagafrumvarpi voru  íslenskir skattgreiðendur látnir ábyrgjast allt að 30 milljarða króna vegna Sparisjóðs Keflavíkur. Þetta gerist á sama tíma og verið er að skera niður í íslensku heilbrigðiskerfi eins og enginn sé morgundagurinn.  Formaður spyr hvers lags forgangsröðun sé fólgin í slíkum aðgerðum.

Það er orðið fátt sem kemur formanni félagsins á óvart þegar íslensk stjórnvöld eru annars vegar og nægir að nefna í því samhengi að það er með ólíkindum að ríkisstjórn sem kennir sig við félagshyggju skuli ekki einu standa við samkomulag sem gert var við verkalýðshreyfinguna vegna launahækkunar til öryrkja og atvinnulausra. Nú er mál að linni og stjórnvöld taki stöðu með íslenskum almenningi.