Í gær tilkynnti Alcoa að þeir hefðu hætt við áform um að reisa álver á Bakka við Húsavík. Formaður VLFA skilur vel þá gremju og reiði sem nú ríkir hjá Húsvíkingum en nú hafa þeir beðið eftir atvinnuuppbyggingu á þessu svæði um alllanga hríð og bundu miklar vonir við áform Alcoa um stórt og öflugt álver á þeirra atvinnusvæði.

Við Akurnesingar þekkjum mætavel hversu gríðarlega mikilvæg stóriðja er fyrir hvert atvinnusvæði. En formaður myndi ekki vilja hugsa þá hugsun til enda ef stóriðjunnar á Grundartanga, þ.e.a.s. Elkem Ísland og Norðurál, nyti ekki við á okkar atvinnusvæði. En hjá Norðuráli starfa um 530 starfsmenn og yfir 200 manns starfa hjá Elkem Ísland. Með afleiddum störfum starfa um 3.000 manns tengt stóriðjunni á Grundartanga. Atvinnuástandið á Akranesi væri með öðrum orðum skelfilegt ef stóriðjunnar á Grundartanga nyti ekki við og búsetuskilyrði á svæðinu væru þar af leiðandi ekki vænleg.

Það er gríðarlega mikilvægt að stóriðjan bjóði upp á bestu mögulegu launakjör og það er eitt af því sem Verkalýðsfélag Akraness hefur verið að berjast fyrir um alllanga hríð. Í síðustu samningalotu sem nú er nýlokið var stigið skref í jákvæða átt hvað varðar launakjör Norðuráls á Grundartanga, en baráttu fyrir bættum kjörum félagsmanna mun að sjálfsögðu aldrei ljúka. Rétt er að geta þess að í dag er verkamaður á vöktum með 5 ára starfsaldur hjá Norðuráli með yfir 500.000 kr. í heildarlaun á mánuði fyrir 182 klst vinnu. Iðnaðarmaður er með um 650.000 kr. á vöktum fyrir sama vinnustundafjölda.

Launakjör í Norðurál hækka á þessu ári sem nemur 14,1% sem klárlega skilar sér til samfélagsins með einum eða öðrum hætti og þessar launahækkanir sýna sterka stöðu þessara fyrirtækja og mikilvægi þeirra hér á landi. Eins og áður sagði þá starfa t.a.m. 530 manns hjá Norðuráli á Grundartanga og það er ljóst að sveitarfélögin njóta góðs af þessari starfsemi bæði í formi fasteignagjalda, útsvars og annarra greiðslna til ríkis og sveitarfélaga.

Formaður hefur oft og tíðum undrað sig á þeim fordómum sem ríkja í garð stóriðju hér á landi í ljósi þeirra staðreynda hversu mikilvæg hún er íslensku samfélagi og síðast en ekki síst hverju því atvinnusvæði sem hún tilheyrir. Það þýðir ekki lengur fyrir þá sem gagnrýna stóriðju hér á landi að segja að það verði bara eitthvað annað að koma í staðinn. Þá verða þessir sömu aðilar að benda á hvað annað eigi að koma, því formaður fullyrðir það að ef stóriðjunnar nyti ekki við á Akranesi þá væru búsetuskilyrði hér vægast sagt skelfileg.

Frábær nýting er á orlofshúsum félagsins og er greinilegt að félagsmenn kunna vel að meta þá kosti sem eru í boði hvað varðar orlofshús og afþreyingu hjá félaginu. Í dag eru öll orlofshús félagsins uppbókuð fram að áramótum um helgar að undanskildum tveimur helgum í Húsafelli, einni í Svínadal og nokkrum í Hraunborgum.

Allar helgar í Ölfusborgum eru upppantaðar fram að áramótum og það er skemmst frá því að segja að nýja sumarhúsið sem félagið festi kaup á í Kjós í Hvalfirði er einnig fullbókað um helgar út þetta ár.

Stjórn orlofssjóðs hélt fund á miðvikudaginn í nýja sumarhúsinu í Kjós en þetta er afar glæsilegur bústaður sem er 83 fermetrar að stærð og búinn öllum helstu þægindum, meðal annars heitum potti. Skrifstofa félagsins hvetur félagsmenn til að fylgjast vel með inni á félagavefnum varðandi laus orlofshús og panta í tíma eins og sagan sýnir okkur nú að er nauðsynlegt.

Á fundi sínum þann 4. október sl. lagði stjórn og trúnaðarráð Verkalýðsfélags Akraness fram framboðslista til stjórnar næstu tvö árin. Auglýst var eftir öðrum listum hér á heimasíðunni þann 11. október og einnig í Póstinum og Skessuhorni.

Þar sem ekki bárust aðrir listar til kjörstjórnar telst listi stjórnar og trúnaðarráðs sjálfkjörinn til næstu tveggja ára.

Að miklu leyti er listinn skipaður því fólki sem tók við stjórn félagsins árið 2003 en þó með nokkrum breytingum. Á listanum núna koma nýir inn í stjórn:  Jónína Herdís Sigurðardóttir sem vararitari, Hafsteinn Þórisson sem formaður stóriðjudeildar, og Jóna Adolfsdóttir sem varaformaður opinberrar deildar. Þeir sem láta af störfum í stjórn félagsins eru Þórarinn Helgason, Oddur Kristinn Guðmundsson og Guðrún Guðbjartsdóttir og eru þeim færðar bestu þakkir fyrir vel unnin störf í þágu félagsins.

Markmið stjórnar Verkalýðsfélags Akraness er og hefur ávallt verið að félagið verði það stéttarfélag sem mest og best þjónar sínum félagsmönnum hér á landi. Vissulega er þetta háleitt markmið en með viljann að vopni er allt hægt. Stjórn Verkalýðsfélags Akraness er afar stolt af því hvernig til hefur tekist á síðastliðnum 8 árum þar sem afkoma félagsins hefur ekki aðeins batnað til muna, heldur hefur þjónusta við félagsmenn tekið algerum stakkaskiptum.

Formannafundur Alþýðusambands Íslands var haldinn í dag. Fundurinn byrjaði á ávarpi Gylfa Arnbjörnssonar, forseta ASÍ, en forsetinn fór víða í sinni ræðu og m.a. kom fram hjá honum að í ljósi þess að krónan eigi sér ekki viðreisnar von og við blasa gjaldeyrishöft um ókomin ár eigi að ræða milliliðalaust við pólitíska forystumenn helstu ríkja í Evrópu um beina aðstoð þeirra til að treysta stöðu gjaldmiðilsins.

Það má vel vera að það sé rétt hjá forsetanum að gjaldmiðilinn okkar hafi gert okkur erfitt fyrir í gegnum árin vegna óstöðugleika í efnahagsmálum.  Hins vegar er það mat formanns félagsins að krónan sé að hjálpa okkur núna í ljósi þeirrar staðreyndar að mun meira er að fást fyrir okkar útflutningsvörur sökum hruns íslensku krónunnar. Og einnig þeirri staðreynd að íslensk heimili hafa nú þegar tekið skellinn á sig vegna gríðarlegrar lækkunar á gengi íslensku krónunnar.

Jóhanna Sigurðardóttir, forsætisráðherra hélt einnig ávarp og fór hún víða í sínu ávarpi og kom m.a. fram hjá henni að búið væri að verðtryggja persónuafsláttinn og taldi það mikinn áfangasigur, en hún gleymdi hins vegar að geta þess að hún og hennar ríkisstjórn afnámu verðtryggingu persónuafsláttar sem verkalýðshreyfingin gekk frá samhliða kjarasamningum 2006 og 2008, sem hefur gert það að verkum að persónuafslátturinn er nokkrum þúsund krónum lægri en ella ef staðið hefði verið við samkomulagið.

Hins vegar vakti erindi Harðar Arnarsonar, forstjóra Landsvirkjunar, mesta athygli formanns á þessum fundi. Í erindi sínu fór hann yfir hin ýmsu mál er tengjast Landsvirkjun, m.a. virkjunarmál og ekki síður málefni álversins í Helguvík.

Það er mat fomanns VLFA eftir að hafa hlustað á forstjóra Landsvirkjunar að hverfandi líkur séu á að framkvæmdir vegna álversins í Helguvík verði að veruleika. Það kom fram í máli Harðar að Norðurál ætti eftir að fjármagna verkefnið að andvirði 250 milljarða og taldi hann að það yrði gríðarlega erfitt fyrir Norðurál að fjármagna verkefnið sökum ástandsins á alþjóðlegum mörkuðum. Það var í raun og veru undarlegt að hlusta á forstjórann tala um Helguvíkurverkefnið því eins og áður sagði var ekki hægt að skilja forstjórann öðru vísi en að hverfandi líkur séu á því að þetta verkefni verði nokkurn tímann að veruleika. Einnig kom fram í máli hans að ef allt myndi ganga upp varðandi fjármögnun og aðra þætti er lúta að þessari framkvæmd, þá væri í fyrsta lagi hægt að afhenda raforku til álversins eftir 5-6 ár. Aðspurður sagði forstjóri Landsvirkjunar að pólitísk afskipti gagnvart stjórn Landsvirkjunar í þessu máli og öðrum væru alls ekki til staðar. En að sjálfsögðu velta menn því fyrir sér hvort svo geti verið í ljósi þessara tafa sem hin ýmsu stóriðjuverkefni hafa mátt þola á undanförnum mánuðum og árum.

Þessi niðurstaða, ef rétt reynist, hlýtur að vera gríðarleg vonbrigði fyrir Suðurnesjamenn sem og þjóðina alla. Við Akurnesingar þekkjum vel mikilvægi stóriðjunnar og þau sterku áhrif sem stóriðjan hefur á allt samfélagið. Á þeirri forsendu skilur formaður vel áhyggjur Suðurnesjamanna ef af þessum framkvæmdum verður ekki.

Formaður gat ekki klárað að sitja allan fundinn sökum anna, en fleiri áhugaverð erindi voru eftir á dagskrá eins og t.d. erindi frá Runólfi Ágústsyni stjórnarformanni Atvinnuleysistryggingasjóðs.

Formaður félgasins hélt kynningu í morgun fyrir hóp atvinnuleitenda um réttindi og skyldur á íslenskum vinnumarkaði. Einnig fór formaður ítarlega yfir þau réttindi og þá þjónustu sem félagið býður sínum félagsmönnum upp á en það er alveg óhætt að fullyrða að sú þjónusta er með því besta sem gerist hjá stéttarfélögum í dag.

Námskeiðið stóð í tæpa 3 klukkutíma og sköpuðust fjörugar umræður um hin ýmsu mál er lúta að réttindum og skyldum á íslenskum vinnumarkaði og var ánægjulegt að sjá hversu mikill áhugi var meðal atvinnuleitanda og hversu virkan þátt þeir tóku í námskeiðinu. Það gladdi formann fyrir hönd starfsmanna og stjórnar Verkalýðsfélags Akraness hversu jákvæðum orðum atvinnuleitendurnir fóru um starfsemi félagsins og þá þjónustu sem félagið er að veita sínum félagsmönnum. Það er svona hvatning sem hvetur stjórn og starfsmenn félagsins til að halda áfram því góða starfi sem nú er unnið hjá VLFA en það er ljóst að þeirri vinnu lýkur aldrei við að gæta að hagsmunum og verja réttindi félagsmanna.  

Eins og fram hefur komið hér á heimasíðunni þá festi Verkalýðsfélag Akraness nýverið kaup á sumarbústað að Berjabraut 10 í Kjós í Hvalfirði sem er einungis í 25 mínútna akstursfjarlægð frá Akranesi. Þetta er 83 fm bústaður sem byggður var 2005 og er allur hinn glæsilegasti. Nú hafa iðnaðarmenn verið að störfum við að stækka pall og aðlaga bústaðinn að þörfum félagsmanna og er áætlað að bústaðurinn verði klár til útleigu föstudaginn 16. september. Hins vegar verður nokkurra vikna bið á því að hægt verði að taka í notkun heitan pott vegna þess að nokkurra vikna afhendingatími er á þeim potti sem pantaður hefur verið.

Starfsmenn hafa verið að kaupa inn húsbúnað og annað innbú og er ljóst að bústaðurinn verður allur hinn glæsilegasti þegar hann verður tilbúinn til útleigu fyrir félagsmenn. Vonandi munu félagsmenn nýta sér þennan valmöguleika vel enda er bústaðurinn staðsettur á gríðarlega fallegum stað í Hvalfirði. Hægt er að panta bústaðinn nú þegar, en eins og áður sagði hefst útleigan föstudaginn 16. september.

Kjarasamningur Verkalýðsfélags Akraness við Samband íslenskra sveitarfélaga sem undirritaður var þann 7. júlí síðastliðinn hefur nú verið prentaður. Þeir félagsmenn sem starfa fyrir sveitarfélögin geta nálgast innbundið eintak af samningnum á skrifstofu félagsins að Sunnubraut 13. Hægt er að nálgast vefútgáfu af samningnum hér og einnig má nálgast kauptaxtana hér.

Nú er liðinn 251 dagur frá því launaliður kjarasamnings Norðuráls rann út og hafa formlegir samningafundir ekki borið árangur til þessa. Krafa Verkalýðsfélags Akraness í þessum viðræðum er jöfnuður við verksmiðjur í sambærilegum iðnaði en því miður hafa launakjör hjá Norðuráli verið töluvert lakari en gerist í öðrum sambærilegum verksmiðjum.

Formaður hefur átt óformlega fundi með forsvarsmönnum Norðuráls að undanförnu þar sem leitað er leiða til að finna lausn á þeim ágreiningi sem er á milli samningsaðila. Hefur það ekki borið árangur til þessa en þessum óformlegu viðræðum verður haldið áfram. Nú liggur fyrir að kjarasamningur Alcan í Straumsvík sem undirritaður var fyrir skemmstu var kolfelldur í atkvæðagreiðslu á meðal starfsmanna en ein af kröfum starfsmanna Norðuráls er einmitt jöfnuður meðal annars við Alcan í Straumsvík.

Verkalýðsfélag Akraness hefur ákveðið að halda fund með starfsmönnum Norðuráls sem haldinn verður í Bíóhöllinni fimmtudaginn 15. september næstkomandi en þar mun formaður fara yfir þá möguleika sem eru í stöðunni og kalla eftir viðbrögðum frá starfsmönnum um hvað gera skuli. Félagið leggur mikla áherslu á það að upplýsa starfsmenn eins vel og kostur er um þá möguleika sem í stöðunni eru en eins og áður sagði er það morgunljóst að félagið mun ekki hvika frá þeirri sanngjörnu kröfu að launakjör í Norðuráli verði með sambærilegum hætti og í sambærilegum verksmiðjum hér á landi. Það liggur fyrir að baráttumál eins og upptaka á stóriðjuskóla, sem mun skila starfsmönnum ávinningi að loknu námi, virðist vera að nást í þessum viðræðum, eina sem útaf stendur er hversu mikill sá ávinnungur verður og hvenær skólinn á að hefjast. En formaður er vongóður um að niðurstaða muni nást í þessu máli sem ætti að geta verið ásættanleg fyrir starfsmenn.

Eins og áður sagði er 251 dagur liðinn frá því að launaliðurinn rann út og því er mjög mikilvægt að niðurstaða fari að komast í þessar viðræður því það er ekki hægt að bjóða starfsmönnum upp á að vera án kjarasamningsbundinna launahækkana í eina 9 mánuði eins og raunin er nú orðin.

Síðastliðinn föstudag héldu eldri félagsmenn Verkalýðsfélags Akraness ásamt mökum í sína árlegu dagsferð á vegum félagsins. Þátttakendur voru um 100 talsins auk fulltrúa frá félaginu. Þessi ferð er árlegur liður í starfsemi félagsins og að þessu sinni var ferðinni heitið til Reykjavíkur undir dyggri leiðsögn Björns Inga Finsen.

Ekið var í tveimur rútum sem leið lá norður fyrir Akrafjall að Grundartanga þar sem ekki var áð, en aðeins keyrt um þetta svæði þar sem mikil uppbygging hefur átt sér stað síðustu ár með tilheyrandi nýbyggingum og nýjum fyrirtækjum sem hafa hafið þar starfsemi sína.

Frá Grundartanga var ekið um Hvalfjarðargöng að Kjalarnesi. Hringur var ekinn um Grundarhverfi áður en haldið var áfram suður Vesturlandsveg í gegnum Mosfellsbæ og að Korpúlfsstöðum, framhjá Egilshöll og áfram upp í Grafarholt þaðan sem frábært útsýni er í allar áttir og ekki síst að Esju og upp á Akranes.

Fyrsti áningarstaður ferðarinnar var í Morgunblaðshúsinu í Hádegismóum þar sem vel var tekið á móti okkur. Karl Blöndal aðstoðarritstjóri ræddi við hópinn og svaraði fyrirspurnum og síðan tók Svanhvít starfsmannastjóri við hópnum og leiddi hann í skoðunarferð um prentsmiðjuna.

Frá Hádegismóum var ekið rakleiðis að Árbæjarsafni þar sem leiðsögumennirnir Hjördís og Karl skiptu hópnum á milli sín og leiddu um safnið. Góður rómur var gerður að kynningu þeirra og hefðu margir vilja dvelja lengur á safninu enda könnuðust sumir vel við að hafa búið í húsum keimlíkum þeim sem tilheyra sýningunni á Árbæjarsafni.

Næsti viðkomustaður var Höfði þar sem ferðafólk teygði úr sér í góða veðrinu og skoðaði þetta virðulega og sögulega hús, en búið er að setja upplýsingaskilti við húsið sem fróðlegt er að skoða.

Þegar hér var komið sögu var ferðfólk farið að svengja enda sól að nálgast hádegisstað. Hádegisverður var snæddur á veitingastaðnum Munnhörpunni sem staðsettur í hinu nýja tónlistarhúsi Hörpu. Eftir matinn gat fólk gengið um Hörpu og skoðað húsið.

Frá Hörpu var ekið að Þjóðarbókhlöðu þar sem hópurinn fékk hlýjar móttökur. Í kynningu sem hópurinn fékk var sérstaklega tekið fram hversu ánægjulegt það væri að fá að kynna þjónustu bókhlöðunnar fyrir þessum aldurshópi þar sem yfirleitt væru notendur safnsins í yngri kantinum og aukinn fjölbreytileiki í þeim efnum væri af hinu góða.

Eftir að hafa blaðað aðeins í tímaritum og bókum á Þjóðarbókhlöðu lá leiðin á Austurvöll þar sem Guðbjartur Hannesson, velferðarráðherra, tók á móti hópnum og fylgdi um Alþingishúsið ásamt starfsmönnum Alþingis. Hópurinn fékk góða og fróðlega leiðsögn um húsið og gott spjall við ráðherrann. Vegna stærðar hópsins þurfti að tvískipta honum og fór sá hópur sem var utanþings í Ráðhús Reykjavíkur þar sem sumir skoðuðu upphleypta Íslandskortið á meðan aðrir gengu að Tjörninni og gáfu öndunum brauð.

Á heimleiðinni var komið við í Perlunni þar sem félagið bauð upp á síðdegishressingu.

Þykir ferðin í ár hafa heppnast einstaklega vel og kann félagið öllum þeim sem komu að undirbúningi og framkvæmd hennar bestu þakkir fyrir. Sérstakar þakkir fær Björn Finsen leiðsögumaður sem kann, að því er virðist, áhugaverða sögu um hvern stein og hvert götuhorn sem á vegi hans verður, samferðafólki hans til fræðslu og yndisauka.

Hægt er að skoða myndir úr ferðinni með því að smella hér.

Kynningar- og samstöðufundur verður haldinn fyrir starfsmenn Norðuráls næstkomandi fimmtudag, 15. september. Fundurinn fer fram í Bíóhöllinni og hefst kl. 20:30. Á fundinum mun formaður félagsins fara yfir stöðu mála en launaliður starfsmanna hefur verið laus frá áramótum. Einnig verður farið yfir hvað hægt sé að gera og ekki síst hvað starfsmenn vilja gera í þessari erfiðu stöðu. Því er gríðarlega mikilvægt að allir sem mögulega geta mæti á fundinn og sýni þannig samstöðu í verki.