Lögreglan á Akranesi vinnur að rannsókn málsins af fullri einurðFulltrúar frá Lögreglunni á Akranesi og Vinnumálastofnun funduðu í morgun vegna kæru Verkalýðsfélags Akraness á hendur fyrirtækinu Formaco.

Eins og fram hefur komið hér á heimasíðunni þá liggur fyrir að Formaco hefur haft á annan tug Litháa í vinnu á síðastliðnu eina og hálfa ári, í það minnsta.  Litháarnir eru hvorki með kennitölur né dvalarleyfi hér á landi og hefur Formaco ekki greitt opinber gjöld af mönnunum eins og lög kveða skýlaust á um að eigi að gera.

Lögin eru skýr bæði hvað varðar skattskyldu af erlendum starfsmönnum og einnig því sem lýtur að skráningu á erlendum starfsmönnum, þ.e.s til Vinnumálastofnunar, útlendingaeftirlitsins sem og til Þjóðskrár. 

Að mati formanns félagsins liggur fyrir að lög hafa verið brotin hvað varðar skráningar af umræddum starfsmönnum alla vega hvað varðar dvalarleyfi og kennitölur fyrir starfsmennina.  Það liggur líka fyrir að ekki hafa verið greidd opinber gjöld af Litháunum frá því þeir hófu störf hér á landi.

Formaður spyr sig: hvað gerist ef fyrirtæki hér á landi komast í auknum mæli upp með að ráða erlenda starfsmenn með það að markmiði að komast hjá því að greiða opinber gjöld.  Með þessu geta óprúttnir atvinnurekendur komist hjá því að greiða tugi prósenta í hinn ýmsu opinberu gjöld t.d tekjuskatt og mótframlag í lífeyrissjóð.

Hér er um að ræða gríðarlega mikið hagsmunamál fyrir samfélagið allt.  Háttarlag þeirra sem þetta ástunda skekkir samkeppnisstöðu annarra fyrirtæka og einnig verður erfitt að halda úti velferðaþjónustu hér á landi ef fyrirtæki reyna að komast hjá því að greiða það sem þeim ber til samfélagsins.  Á þessu máli verður ríkisvaldið að taka af fullri hörku.  Formaður hefur vitneskju um að starfsmenn ríkisskattstjóra séu nú þegar farnir að skoða þetta mál.

Í dag 8. júní komu fulltrúar frá nokkrum landsbyggðarfélögum Starfsgreinasambandsins saman til fundar á Egilsstöðum til að ræða framkomnar hugmyndir um breytingar á veikinda og slysarétti launafólks innan ASÍ og hugsanlegt samstarf í komandi kjarasamningum. Kjarasamningar eru lausir 31. desember n.k. Mikil samstaða, baráttuhugur og góður andi ríkti á fundinum.  Formaður Verkalýðsfélags Akraness var fulltrúi félagsins á umræddum fundi.Niðurstaða fundarins er að ekki komi til greina að blanda inn í gerð komandi kjarasamninga þeim hugmyndum sem komið hafa fram af hálfu nefndar Samtaka atvinnulífsins og Alþýðusambandsins er lúta að stofnun ,,Áfallatryggingasjóðs”. Fundarmenn tóku saman greinargerð um málið þar sem afstaða hópsins er skýrð. Greinagerðin fylgir hér á eftir.Eftir fundinn er kominn góður grundvöllur til áframhaldandi samstarfs og tillögugerðar fyrir komandi kjarasaminga. Næsti fundur félagana og þeirra félaga sem vilja vera með verður haldinn 6. júlí á Sauðárkróki.

Hægt er er að lesa sameignlega yfirlýsingu frá þeim aðilum sem sátu fundinn með því að smella á meira.

Yfirlýsing:

Föstudaginn 8. júní komum við neðangreind saman á Egilsstöðum til að ræða framkomnar hugmyndir að breytingum á veikinda og slysarétti launafólks innan ASÍ,  og hugsanlegt samstarf í komandi kjarasamningum.

Niðurstaða okkar er að ekki komi til greina að blanda saman þeim hugmyndum sem komið hafa fram af hálfu nefndar SA og ASÍ er lúta að stofnun ,,Áfallatryggingasjóðs” við gerð komandi kjarasamninga.

Ljóst er eftir fundinn í dag að kominn er góður grundvöllur til áframhaldandi samstarfs og tillögugerðar fyrir komandi kjarasaminga. Næsti fundur hópsins verður 6. júlí á Sauðárkróki

Vegna hugmynda um þróun áfallatrygginga eins og það er nefnt í minnisblaði sameiginlegrar nefndar ASÍ og SA viljum við taka eftirfarandi fram.

1. Þær hugmyndir sem lagðar hafa verið fram fyrir aðildarfélögin eru lítt mótaðar og óljósar.
2. Í minnisblaðinu er tekið fram að aðeins sé lokið fyrsta áfanga af fimm eða fleirum, í undirbúningi þessara breytinga.
3. Samráð við aðildarfélög hefur verið af skornum skammti hingað til og nauðsynlegt er að forystufólki aðildarfélaga og sjúkrasjóða þeirra fái að kynna sér tillögurnar.
4. Þrátt fyrir ofangreint virðist af, m.a. ummælum framkvæmdastjóra SA í fjölmiðlum nú nýverið, sem uppi séu hugmyndir um að taka þessar breytingar upp í komandi kjarasamningum .
5. Í minnisblaði nefndarinnar er tekið fram að til undirbúnings næsta áfanga sé nauðsynlegt að fá ábendingar frá „baklandi nefndarinnar“ eins og það er orðað, þ.e. stéttarfélögum og fyrirtækjum. Okkur er ekki kunnugt um að óskað hafi verið slíkra ábendinga né að undirbúningur formlegrar vinnu við slíkt ferli sé hafinn.
6. Þær hugmyndir sem fyrir liggja, fela í sér veigamiklar breytingar á nánast öllum þáttum veikinda- og slysaréttar félagsmanna okkar og stöðu sjúkrasjóða félagsmannanna. Það er því eðlilegt að við viljum stíga varlega til jarðar í þessu máli.
7. Sumar af þeim hugmyndum sem felast í tillögunum eru jákvæðar við fyrstu sýn. Endurskoðun á rétti og málsmeðferð örorkubótaþega er brýn og ýmislegt jákvætt hefur verið unnið síðustu ár til að auka lífsgæði þessa fólks – s.s. Janus endurhæfing og Starfsendurhæfing Norðurlands.
8. Framkomnum hugmyndum má skipta í eftirfarandi þætti sem hvern um sig má framkvæma sjálfstætt.
9. Aukin réttindi og bætt lífskjör örorkuþega með nýjum úrræðum. Þennan þátt styðjum við en bendum á að mestu breytingarnar verða að vera hjá opinberum aðilum en ekki stéttarfélögum.
10. Flutningur veikindaréttar frá fyrirtækjunum til sjúkrasjóða stéttarfélaganna.Þetta er framkvæmanlegt með hækkun sjúkrasjóðsiðgjalda.
11. Miðstýrð stjórnun við endurhæfingarmeðferð. Hér sjáum við ekki rökin eða nauðsyn. Við teljum þessum verkþætti best komið í heimabyggð og bendum á góðan árangur m.a. Starfsendurhæfingar Norðurlands.
12. Flutningur sjúkrasjóðsiðgjalda í sameiginlegan sjóð þar sem forræði sjúkrasjóðs og þar með veikindaréttar félagsmanna er framseldur til sjóðs þar sem verkalýðshreyfingin hefði þegar best léti helming stjórnarmanna. Að svo stöddu sjáum við engann tilgang með þessari breytingu og sýnist að hér verði einungis búið til ný miðstýrð stofnun sem fjarlægist verkalýðshreyfinguna í hugum félagsmanna okkar og fái á sig hálfopinberan stimpil. Að auki höfum við verulegar efasemdir um að aðrir ,,aðilar” leggi þessu nýja „kerfi“ til fjármagn án þess að krefjast áhrifa í stjórn sjóðsins. Þannig yrðu fulltrúar verkalýðsfélaganna í minnihluta stjórnar innan skamms og forræði hreyfingarinnar á þessum mikilvæga þætti réttinda launafólks horfið.

9. Með tilliti til þróunar í nágrannalöndum okkar þar sem sífellt harðar er sótt að verkalýðsfélögum með þeim afleiðingum að félagsaðild fer minnkandi, teljum við sjúkrasjóði stéttarfélaganna eitt mikilvægasta tæki okkar til að tryggja framtíð verkalýðshreyfingarinnar. Þess vegna finnst okkur fráleitt að setja stærstan hluta veikindaréttar félagsmanna okkar í einn pott með stjórnaraðild SA og mögulega fleiri og sjáum verulegar líkur á því að innan fárra ára verði unnt að kaupa sér réttindi þar án félagsaðildar í verkalýðsfélagi.

Að teknu tilliti til ofangreindra atriða teljum við útilokað að breytingar á veikinda-og slysarétti félagsmanna okkar í anda þessara tillagna verði til umfjöllunar í komandi kjarasamningum.

AFL – Starfsgreinafélags                 VerkalýðsfélagHúsavíkur og nágrennis

Hjördís Þóra Sigurþórsdóttir        AðalsteinnBaldursson

Sigurður Hólm Freysson              Kristbjörg Sigurðardóttir

Sverrir Albertsson                      Olga Gísladóttir                                                                                                             

Aldan Stéttarfélag                                    Verkalýðsfélag  Akraness

Þórarinn Sverrisson                                     VilhjálmurBirgisson

Dífandi Stéttarfélag

Arnar Hjaltalín

Eins og fram hefur komið hér á heimasíðunni þá funduðu nokkur sterk landsbyggðarfélög saman á föstudaginn sl.  Þau félög sem komu saman voru Verkalýðsfélag Akraness, Verkalýðsfélag Húsavíkur, Afl-Starfsgreinafélag Austurlands, Aldan stéttarfélag og Drífandi Vestmannaeyjum.

Það sem helst var til umræðu voru fyrirhugaðar breytingar á veikinda- og slysarétti samhliða því að stofna nýjan áfallatryggingarsjóð. 

Formenn áðurnefndra félaga leggjast alfarið gegn þessum hugmyndum sem ASÍ og SA hafa verið að vinna að og lúta að breytingum á veikinda- og slysarétti sem og stofnun á nýjum áfallatryggingasjóði.

Einnig ræddu formenn áðurnefndra félaga komandi kjarasamninga og hvort félögin ættu að fara saman í komandi kjarasamninga í ljósi þeirrar staðreyndar að Flóbandlags félögin ætla að semja sér eins og þau hafa reyndar gert áður. 

Formaður VLFA telur að þessi landsbyggðarfélög eigi klárlega að mynda bandalag og fara sameinuð í næstu kjarasamninga.  Vissulega væri ánægjulegt ef fleiri landsbyggðarfélög myndu vilja koma með í þessa hugsanlegu vegferð vegna komandi samninga.  Formaður er hins vegar nokkuð bjartsýnn á að umrædd stéttarfélög fari sameinuð til næstu kjarasamningagerðar og telur einnig töluverðar líkur á að fleiri stéttarfélög taki þátt í nýju bandalagi ef af verður. 

Fundurinn á Egilsstöðum einkenndist af einstakri samstöðu og góðum baráttuhug fyrir komandi kjarasamninga og var t.d. ákveðið að funda aftur 6. júlí á Sauðarkróki og er allt eins líklegt að fleiri stéttarfélög innan SGS verði á þeim fundi en voru á Egilsstöðum.

Starfsmenn LaugafisksHeilbrigðiseftirlit Vesturlands telur að þeir sem stóðu fyrir undirskriftasöfnun gegn hausaþurrkun Laugafisks hafi haft fyrirtækið fyrir rangri sök.  Meint ólykt sem átti sér stað fyrir nokkrum vikum hafi átt rætur að rekja til bræðslu beina frá Fiskimjölsverksmiðju HB-Granda hér á Akranesi, en ekki frá Laugafiski.

Það fór svo sem ekkert á milli mála að það lagði töluverða ólykt yfir bæinn þegar fiskimjölsverksmiðjan var að bræða gömul bein og telur formaður félagsins að hér hafi einungis verið um mistök að ræða sem hæglega hefði verið hægt að koma í veg fyrir.  Þau kalla þó alls ekki á að starfsleyfi verksmiðjunnar verði afturkallað.  Vissulega verður að gera þá kröfu til allra fyrirtækja að þau framfylgi þeim starfsleyfum sem þeim eru sett.

Það gleður formann félagsins mjög mikið að Laugafiskur hafi verið hreinsaður af þessu máli núna, einfaldlega vegna þess að formanni er fullkunnugt um allar þær ráðstafanir sem forsvarsmenn Laugafisks hafa lagt útí til að sporna við þessu hvimleiða vandamáli sem fylgir lyktarmengun.  Formanni er einnig kunnugt um að forsvarsmönnum Laugafisks hafi svo sannarlega orðið ágengt í þeirri baráttu og hefur þeim nánast tekist að koma í veg fyrir alla lyktarmengun. Því miður er það einu sinni þannig að þegar um fiskvinnslu er að ræða þá er aldrei hægt að útiloka alla lytarmengun frá slíkri starfsemi.

Formaður VLFA veit að starfsmönnum Laugafisks er létt við þessar fréttir því að mikið hefur mætt á fyrirtækinu á undanförnum árum og oft verið farið framá að starfsleyfi verksmiðjunnar verði endurskoðað eða jafnvel afturkallað.  Formaður VLFA vill einnig að það komi fram að Laugafiskur hefur verið til mikillar fyrirmyndar í einu og öllu er lýtur að starfsmönnum fyrirtækisins og nægir að nefna í því samhengi að stjórn fyrirtækisins borgaði starfsmönnum eingreiðslu uppá 125.000 vegna góðrar afkomu á síðasta ári.

Það er óhætt að segja að almennt verkafólk sé agndofa og jafnvel bálreitt yfir þeirri launahækkun sem bankaráð Seðlabankans ákvað til handa seðlabankastjóra fyrir fáeinum dögum.  Að hækka laun seðlabankastjóra um 200 þúsund á mánuði án þess að gefa viðhlítandi skýringu er til háborinnar skammar og er þessi hækkun eins og blaut vatnstuska framaní almennt verkafólk.  Eitt af hlutverkum bankans er að ná hér niður verðbólgunni og hefur bankinn verið óhræddur við að beita þeim tækjum sem hann hefur, þ.e.a.s að hækka stýrivextina sem eru nú í sögulegu hámarki og hafa bitnað illilega á því verkafólki sem er hvað skuldsettast.  Eitt er víst að þessi hækkun launa seðlabankans er ekki til þess fallin að ná hér tökum á verðbólgunni, svo mikið er víst. 

Það er orðið óþolandi að horfa uppá almennt verkfólk sitja alltaf eftir og nægir að nefna síðustu kjarasamninga sem gerðir voru 2004 en þá var samið uppá 15,8% hækkun á samningstímanum sem var fjögur ár.  Flest allir samningshópar sem sömdu á eftir Starfsgreinasambandinu sömdu um töluvert meira heldur en 15,8%.  Eitt er víst að slíkt mun ekki henda aftur ef formaður VLFA fær einhverju ráðið í þeim efnum.  Rétt er það komi fram að formaður VLFA skrifaði ekki undir kjarasamninginn  2004 vegna þess hversu rýr hann var.  Rétt er þó að geta þess að það komu launahækkanir 1. júlí 2006 vegna endurskoðunarákvæðis kjarasamningsins.

Hér á heimasíðunni hefur einnig verið fjallað um það hversu þingfarakaupið hefur hækkað langt um meira en lágmarkslaun frá árinu 1997 fram til ársins 2007.  Á þessu tímabili hefur þingfarakaupið hækkað um 145% á meðan lágmarkslaunin hafa hækkað um 104%. Munurinn nemur 41%. Með öðrum orðum: almennt verkafólk hefur ætíð borið skarðan hlut frá borði þegar kemur að launahækkunum samanborið við aðra þegna þessa lands.

Nú eru kjarasamningar lausir um áramótin og það mun ekki koma annað til greina en að almennt verkafólk fái leiðréttingu á sínum launum í komandi kjarasamningum.  Formaður VLFA hefur áður sagt það vera íslenskri verkalýðshreyfingu og reyndar öllu samfélaginu til skammar að lágmarkslaun skuli einungis vera 125.000, einfaldlega vegna þess að það er ekki hægt að lifa á slíkum sultarlaunum.  Hækkun á lágmarkstöxtunum verður að vera algert forgangsmál í komandi kjarasamningum, það mun ekki ganga í almennt verkafólk að gera hófstilltan kjarasamning til að koma hér á stöðugleika, nú er komið að öðrum en verkafólki í þeim efnum.  

Fundað verður um öryggismál starfsmanna Íslenska járnblendifélagsins á mánudaginn kemur. 

Þessi fundur er m.a. einn liður í því að fara yfir öryggismál starfsmanna með það að markmiði að auka öryggi starfsmanna enn frekar.  

Á fundinn munu mæta fyrir hönd starfsmanna formaður VLFA ásamt trúnaðartengiliðum.

Af hálfu fyrirtækisins munu mæta Ingimundur Birnir forstjóri og Þórður Magnússon framkvæmdastjóri framleiðslusviðs.  Einnig munu fulltrúar frá Vinnueftirlitinu sitja fundinn.

Eitt af þeim málum sem verða til umræðu á þessum fundi er nýr öryggisfatnaður sem tekinn var í nokkun ekki alls fyrir löngu.  Starfsmenn eru almennt mjög ósáttir við þennan nýja öryggisfatnað.  Telja þeir jafnvel að nýi hlífðarfatnaðurinn ógni öryggi þeirra vegna þess hversu slæptir starfsmennn verða við að vinna í honum, og það í hita sem getur farið upp í allt 60 gráður

Formaður félagsins óskaði eftir fundi með forsvarsmönnum Norðuráls vegna hina ýmsu hagsmunamála er lúta að félagsmönnum VLFA sem starfa hjá Norðuráli.

Fundurinn var haldinn seinni partinn í dag, þeir sem sátu fundinn fyrir hönd Norðuráls voru þeir Skúli Skúlason starfsmannastjóri og Ragnar Guðmundsson framkvæmdastjóri. 

Formaður fór yfir nokkur mál sem VLFA telur að þurfi að skoðast betur og tengjast hagsmunum félagsmanna VLFA sem starfa hjá Norðuráli.

Þetta var nokkuð góður fundur sem vonandi skilar sér þegar  til lengri tíma er litið.  Ákveðið var að funda aftur þegar aðilar hafa náð að skoða þau atriði sem voru til umfjöllunar á þessum fundi betur.  

Í gær var haldinn fundur um öryggismál starfsmanna Íslenska járnblendifélagsins.  Þeir sem sátu fundinn voru ásamt formanni, trúnaðartengiliðir starfsmanna, Ingimundur Birnir forstjóri, Anna Dóra starfsmannastjóri, Þórður Magnússon framkvæmdastjóri framleiðslusviðs og einnig var fulltrúi frá Vinnueftirlitinu.

Aðalumræðuefni fundarins var nýr öryggisfatnaður sem tekinn var í notkun í apríl.  Starfsmenn hafa ítrekað gert athugasemdir við þennan nýja fatnað þar sem þeim er nánast fyrirmunað að vinna í honum sökum mikils hita en hitinn getur á vissum stöðum í verksmiðjunni farið í allt að 60°C.  

Forsvarsmenn fyrirtækisins voru að vissu marki tilbúnir að hlusta á gagnrýnisraddir starfsmanna en voru hins vegar ekki tilbúnir að leggja þennan nýja öryggisfatnað til hliðar á meðan aðilar reyndu að finna annan fatnað sem hentaði starfsmönnum betur.

Það sem forsvarsmenn Íj voru tilbúnir að gera var að auka kælingu í kringum ofnana og hefur það þegar verið gert í kringum ofn 3. Það sama verður gert við ofn 1 og 2.  Einnig ætla þeir að bæta aðgengi starfsmanna að drykkjarföngum og einnig upplýstu þeir að nýjar öryggisbuxur komi til prófunar í júlí og  binda menn vonir um að þær verði hentugri en þessar sem fyrir eru.

Það er alveg ljóst að hér er um mjög mikilvægt mál að ræða fyrir starfsmenn því það getur ekki verið hollt að vinna kappklæddur í hita sem getur farið uppí 60 gráður.  Fram kom á fundinum í gær að einn starfsmaður hefur fallið í yfirlið við vinnu sína og er talið að það megi rekja til of mikils hita. 

Eins og fram hefur komið fram hér á heimasíðunni þá kærði Verkalýðsfélag Akraness fyrirtækið Formaco til lögreglunnar á Akranesi fyrir nokkrum vikum síðan.

Kæran var lögð fram vegna sterkra grunsemda um að Litháar sem starfa hjá fyrirtækinu væru ekki skráðir eins og lög og reglugerðir kveða skýrt á um. 

Lögreglan á Akranesi sem fer með rannsókn þessa máls hefur t.d. fundað með Vinnumálastofnun og einnig hefur hún leitað upplýsinga hjá Útlendingastofnun varðandi skráningu Litháanna.

Samkvæmt upplýsingum frá Lögreglunni á Akrnaesi þá hefur hún fengið hin ýmsu gögn frá Vinnumálastofnun sem hafa verið til skoðunar að undaförnu.  Formaður félagsins veit fyrir víst að þau gögn sem lögreglan hefur undir höndum staðfestir þær grunsemdir sem VLFA hefur haft í þessu máli.  Lögreglan á Akranesi hefur hins vegar tekið ákvörðun um að vísa málinu til lögreglunnar í Reykjavík þar sem fyrirtækið Formaco hefur lögheimili þar. 

Það liggur fyrir samkvæmt þeim upplýsingum og gögnum sem VLFA hefur aflað sér að undanförnu að sterkar líkur eru á að lög hafi verið brotin hvað varðar skráningar og skattaskil á Litháísku starfsmönnunum.

Formaco hefur haft 28 erlenda starfsmenn að störfum á síðastliðnum 12 mánuðum, flesta frá Litháen.  Samkvæmt upplýsingum og gögnum sem fyrir liggja í málinu þá er enginn þeirra með kennitölu, lögheimili eða dvalarleyfi hér á landi.

Að auki hafa ekki verið borguð opinber gjöld af Liháunum, eftir þeim upplýsingum sem félagið hefur aflað sér, hvorki skattar, félagsgjöld né lífeyrissjóðsgjöld.

Formaður VLFA skorar á ríkisskattstjóra að taka mál eins og þetta af festu og einurð einfaldlega vegna þess að það liggur fyrir að Formaco bar að greiða opinber gjöld af Litháunum alla vega þeim sem starfað hafa hér í meira en 181 dag. 

Formaco var einungis búið að tilkynna til Vinnumálastofnunar 6 af þeim 28 sem starfa hjá fyrirtækinu en skýrt er kveðið á um í lögum að skrá skuli erlenda starfsmenn innan 10 daga frá ráðningu þeirra.  Ráðningarsamningar sem Formaco lét fylgja með þessum 6 starfsmönnum voru því miður meingallaðir og til dæmis var ekki getið um yfirvinnukaup í ráðningarsamningum, einungis dagvinnukaup sem hljóðaði uppá aðeins 726 kr. á tímann.

Formaður vill einnig minna á stjórnarsáttmálann sem Ingibjörg Sólrún og Geir undirrituðu en þar kemur m.a. fram að ríkistjórnin ætli að koma í veg fyrir félagsleg undirboð á íslenskum vinnumarkaði. 

Það mat formanns að hér sé um klárt undirboð á íslenskum vinnumarkaði að ræða þar sem Formaco reynir að komast hjá því að greiða opinber gjöld og klárlega skekkir það samkeppnistöðu gagnvart öðrum fyrirtækjum og einnig hefur VLFA enga hugmynd hvort verið sé að greiða Litháunum laun eftir íslenskum kjarasamningum, enda fá þeir laun sín ekki greidd hér á landi.  Félagsleg undirboð eins og þetta verður að stöðva og það með öllum tiltækum ráðum.

Formaður félagsins hefur ákveðið að óska eftir fundi með félagsmálaráðherra þar sem mál tengd félagslegum undirboðum verða til umræðu. 

Eins og áður hefur komið fram hér á heimsíðunni þá varð fyrirtækið Efnalaugin Lísa gjaldþrota nú í vor.

Sjö starfsmenn áttu vangreidd laun inni hjá fyrirtækinu og námu þau tæpri einni milljón króna þegar fyrirtækið var tekið til gjaldþrotaskipta. 

Verkalýðsfélag Akraness hefur unnið að því ásamt lögmanni félagsins að ná vangreiddum launum til baka úr þrotabúinu en það tókst ekki þar sem ekki voru neinar eignir í búinu.  Á þeirri forsendu gerði VLFA kröfu á hendur Ábyrgðarsjóði launa og var sú krafa samþykkt af hálfu sjóðsins. 

Ábyrgðarsjóðurinn varð í gær við kröfu félagsins og hefur starfsfólkið nú fengið þau vangreiddu laun sem það átti inni hjá Efnalauginni.

Starfsfólkið er afar ánægt með þá þjónustu sem VLFA veitti þeim í þessu máli og mál sem þetta sýnir hversu mikilvægt það getur verið að vera félagsmaður í öflugu stéttarfélagi.