kvöld var haldinn aðalfundur stóriðjudeildar.  Í gær var það Iðnsveinadeildin sem hélt sinn aðalfund.  Einn breyting varð á stjórn Iðnsveinadeildar Arnar Þór Erlingsson hætti og í hans stað kom Guðni Ragnarsson en hann er trúnaðarmaður hjá Smellinn.  Á báðum þessum aðalfundum fór formaður félagsins yfir  helstu atriði í starfsemi félagsins frá síðasta ári.  Einnig var mikið rædd um þá þróun sem er að eiga sér stað hjá HB Granda og þeirri fækkun á störfum sem átt hefur sér stað hjá fyrirtækinu á liðnu ári.  Á morgun verður haldinn aðalfundur almennu deildar og er það síðasti aðalfundur deildanna.  Eins og áður hefur komið fram hér á heimasíðunni þá er það í lögum félagsins að aðalfundir deildanna skulu haldnir fyrir janúarlok og eftir því fer stjórn félagsins í hvívetna

Verkalýðsfélag Akraness hefur verið að skoða á undanförnum dögum hvernig sameining Haraldar Böðvarssonar við Granda hefur komið út fyrir samfélagið hér á Akranesi.

Það er skemmst frá því að segja að það er skelfilegt að sjá hvernig Akurnesingar hafa farið út úr þessari sameiningu.   

Í lok árs 2004 eða rétt fyrir sameiningu voru 125 starfsmenn sem störfuðu við landvinnslu hjá HB Granda á Akranesi.  Í dag eru 80 starfsmenn sem starfa við landvinnsluna, sem er fækkun uppá 45 starfsmenn eða 31% á rétt rúmu ári.   Hafa skal það í huga að hér er bara verið að tala um landvinnslufólk. 

Sjómönnum hér á Akranesi hefur einnig fækkað vegna þessarar sameiningar.  Það voru 85 sjómenn sem voru í Verkalýðsfélagi Akraness og störfuðu hjá Haraldi Böðvarssyni fyrir sameiningu.  Í  dag eru 77 sjómenn og hefur  fækkað um 8 skipverja. 

Síðan verður einnig að hafa í huga að 11 skipverjum á aflaskipinu Víkingi Ak 100 hefur nýverið verið sagt upp störfum.  Þegar búið verður að leggja Víkingi Ak þá hafa 19 sjómenn misst vinnuna hjá HB Granda frá sameiningu eða 22%

Rétt er að það komi fram að forsvarsmenn HB Granda leggja áherslu á að skipverjar á Víkingi Ak fá pláss á öðrum skipum hjá útgerðinni.  En ekkert er fast í hendi hvað það varðar.

Stöðugildum á skrifstofu félagsins hefur einnig fækkað eða sem nemur 4 stöðugildum.  Þar á meðal er störf þeirra bræðra Sturlaugs og Haraldar.

Þetta eru blákaldar staðreyndir um þá þróun sem átt hefur sér stað eftir að fyrirtækin sameinuðust.

Vissulega má segja að hluti af þessum samdrætti hér á Akranesi sé vegna aflasamdráttur og hagræðingar innan fyrirtækisins.  En klárlega skýrir það ekki allan þennan samdrátt sem orðin er hér á Akranesi. 

Það sem Verkalýðsfélag Akraness vill sjá er sanngirni á milli þeirra starfstöðva sem eru í eigu HB Granda.  En það er mat formanns Verkalýðsfélags Akraness að við Akurnesingar höfum verið niðurlægðir í þessari sameiningu.

 Það verður ekki með tárum tekið hvernig samfélagið á Akranesi hefur farið út úr þessari sameiningu.  En fyrirtækið Haraldur Böðvarsson & co hefði orðið 100 ára 17. nóvember 2006

Nú verða allir að leggjast á eitt og reyna að koma í veg fyrir að fjöregg okkar skagamanna blæði endanlega út.  Við verðum að verja þann nýtingarrétt sem HB fjölskyldan og við skagamenn höfum áunnið okkur inn á síðustu 100 árum.  Við getum ekki horft aðgerðalaus á nýtingaréttin og einnig störfin okkar hverfa héðan í burtu eins og ekkert sé.  Gerum eitthvað !

Verkalýðsfélag Akraness er einnig að skoða svarið sem sjávarútvegsráðherra gerði við fyrirspurn Magnúsar þ Hafsteinssonar um landaðan afla hér á Akranesi.  Í því svari sést nokkuð vel hvernig fjarað hefur undan okkur hér á Akranesi hvað varðar þessa sameiningu.  En verulegur samdráttur er á lönduðum afla hér á Akranesi eftir að fyrirtækin sameinuðust.

Sem dæmi má nefna að 37.824 þús tonn var landað í bræðslu hér á Akranesi af Kolmuna á árinu 2004.  Árið 2005 var ekki einu kílói landað hér á skaganum.  Öllum kolmuna var landað á Vopnafirði eða öðrum höfnum fyrir austan.  Nánar verður fjallað um svar sjávarútvegsráðherra við fyrirspurn Magnúsar hér á heimasíðunni fljótlega.

Aðalfundur Opinberrar deildar var haldinn í gærkveldi.  Nokkuð góð mæting var á fundinn enda eru starfsmenn sjúkrahúss Akraness einstaklega duglegir að mætta á fundi sem tengjast þeirra vinnustað.  Formaður félagsins fór yfir það sem gerst hefur í deildinni á liðnu ári.  Fór formaðurinn einnig yfir það helsta sem gerst hefur í starfsemi félagsins frá síðasta aðalfundi deildarinnar og var þar af nógu að taka.  Í kvöld verður aðalfundur Matvæladeildarinnar og hefst hann kl. 20.00 að Sunnubraut 13

Agnar Jónsson fyrrverandi formaður og heiðursfélagi Verkalýðsfélags Akraness lést föstudaginn 20. janúar s.l   Agnar gegndi formennsku í Verkalýðsfélagi Akraness á árunum 1981 til 1985.  Agnar Jónsson var gerður að heiðursfélaga árið 2004.  Stjórn félagsins vill þakka Agnari Jónssyni kærlega fyrir hans framlag í þágu félagsins.  Stjórn Verkalýðsfélags Akraness vottar aðstandendum dýpstu samúð.

Skipverjum á aflaskipinu Víkingi Ak 100 var afhent uppsagnarbréf í gær.  En skipið mun taka loðnuvertíðina í ár ef einhver loðna finnst og að vertíðinni lokinni verður skipinu lagt alveg fram í janúar 2007.

 Verkalýðsfélag Akraness hefur haft áhyggjur af framtíðarskipan Víkings Ak og síldarbræðslunnar um all langa hríð.  En félagið fundaði með forsvarsmönnum HB Granda um þessi mál í ágúst í fyrra.  Á þeim fundi kom fram að ekki stæði til að breyta útgerðarfyrirkomulagi Víkings AK, nú hefur hins vegar annað komið á daginn. 

Vissulega hefur það ekki hjálpað til að aflasamdráttur á loðnu er gríðarlegur eins og allir vita og alls óvisst hvort einhver vertíð verður í ár.  Sjálfsagt er það ein skýringin á þessari ákvörðun forsvarsmanna HB Granda.  Einnig liggur það líka fyrir að verkefni sem Víkingur Ak hefur verið með eins og síldveiðar á haustin hafa verið fluttar yfir á önnur skip fyrirtækisins að miklu leiti.

Verkalýðsfélag Akraness þætti fróðlegt að vita hversu mörg stöðugildi hafi verið hjá Haraldi Böðvarssyni fyrir sameiningu við Granda og hversu mörg þau eru nú.  Verkalýðsfélag Akraness hefur trú á að störfum tengdum HB Granda hafi fækkað umtalsvert hér á Akranesi eftir sameiningu þessa tveggja fyrirtækja. 

Í ár eru liðin 100 ár (1906) frá því að fyrirtækið Haraldur Böðvarsson var stofnað og verður því sárt að horfa upp á aflaskipið Víking AK bundið við bryggju megnið af árinu.  Aflaskipið Víkingur Ak hefur skilað eigendum Haraldar Böðvarssonar, skagamönnum og einnig þjóðarbúinu öllu, gríðarlegum tekjum í gegnum áratugina.

Uppsagnarbréf skipverja hljóðaði eftirfarandi: 

 Uppsagnarbréf

Sýnt þykir að ekki verði verkefni fyrir Víking Ak 100, skrásetningarnr.220, að lokinni loðnuvertíð fyrr en í ársbyrjun 2007.

Þér er því hér með sagt upp störfum frá og með móttöku þessa bréfs en gert er ráð fyrir óbreyttum útgerðaháttum út þessa loðnuvertíð.

Áhersla verður lögð á að útvega þér starf á einhverju af þeim skipum sem áfram verða í rekstri hjá félaginu hafir þú á því áhuga.

Undir uppsagnarbréfið skrifar Vilhjálmur Vilhjálmsson deildarstjóri HB Granda.

Verkalýðsfélag Akraness vill minna félagsmenn sína á aðalfundi deildanna sem haldnir verða alla næstu viku.  En í lögum félagsins er kveðið að um að aðalfundnir deildanna skulu haldnir fyrir janúarlok.  Stjórn félagsins kappkostar að fylgja lögum félagsins í hvívetna.  Fundirnir verða haldnir eftirfarandi daga:

Aðalfundir deilda Verkalýðsfélags Akraness verða haldnir eftirfarandi daga:

Opinber deild    -   Mánud. 23. jan. að Sunnubraut 13 kl. 20:00

Matvæladeild -   Þriðjud. 24. jan. að Sunnubraut 13. kl. 20:00

Iðnsveinadeild   -   Miðvikud. 25. jan. að Sunnubraut 13.kl. 20.00

Stóriðjudeild   -Fimmtud. 26. jan. að Sunnubraut 13. hæð. kl. 20:15

Almenn deild   -   Föstudaginn 27. jan. að Sunnubraut 13. 20:00

Dagskrá aðalfundanna er eftirfarandi:

1.   Venjuleg aðalfundarstörf.

2.   Önnur mál.

Félagsmenn eru eindregið hvattir til að mæta.

Stjórn sjúkrasjóðs fundaði í kvöld nokkur erindi lágu fyrir fundinum.  Stjórnin ákvað að hefja undirbúning að breytingum á reglugerð sjúkrasjóðsins sem lagðar verða fyrir aðalfund félagsins sem haldinn verður um miðjan apríl. 

Markamiðið með þessum breytingum er að auka enn frekar þá þjónustu sem sjóðurinn er að veita félagsmönnum.  T.b stendur til að auka umtalsvert sjúkradagpeninga til félagsmanna í veikindum eftir að greiðsluskyldu atvinnurekanda líkur.

En hugmyndir eru um að sjúkradagpeningar geti numið allt að 80% af launum félagsmannsins eftir að veikindarétti hjá atvinnurekanda ljúki.  Ef þessi breyting á sjúkradagpeningum verður að veruleika mun það þýða algjörlega byltingu fyrir okkar félagsmenn sem verða fyrir því óláni að veikjast í lengri tíma en veikindaréttur starfsmannsins segir til um. 

Formaður félagsins fór og heimsótti nokkur fyrirtæki í dag í þeim tilgangi að heyra hvað brennur á félagsmönnum þessa daganna.

Einnig eru þessar vinnustaðaheimsóknir hugsaðar til þessa að fá tillögur frá félagsmönnum hvað megi bæta í þjónustu félagsins.

Það er afar ánægjulegt fyrir stjórn og starfsmenn félagsins að þeir félagsmenn sem formaður ræddi við í dag eru nokkuð ánægðir með þá þjónustu sem félagið er að veita í dag.

Stjórn félagsins leggur mikla áherslu á að vera í nánu og góðu sambandi við sína félagsmenn og eru þessar heimsóknir einn liður í því.

Stjórn félagsins er einnig alltaf að leita leiða til að auka þjónustuna enn frekar og ef þið félagsmenn eruð með einhverjar snjallar hugmyndir í þá veru endilega hafið samband við skrifstofu félagsins.

Í síðasta kjarasamningi Íslenska járnblendifélagsins var samið um nýtt bónuskerfi sem samningsaðilar voru sammála um að ætti að geta veitt báðum aðilum töluverðan ávinning. Því miður hefur sá ávinningur látið á sér standa.

Verkalýðsfélag Akraness hefur óskað eftir fundi með forsvarsmönnum Íj um þetta mál og stendur núna til að sá fundur gæti orðið 26. janúar. 

Formaður félagsins hefur verið í sambandi við trúnaðartengiliði Íslenska járnblendifélagsins vegna þessa máls.

Verkalýðsfélag Akraness vill fara yfir alla þætti í hinu nýja  bónuskerfi og reyna að finna hvað veldur því að sumir liðir í bónuskerfinu virka ekki sem skildi.

Það er verulegt hagsmunamál  bæði fyrir eigendur Íj sem og starfsmenn Íj að finna hvað veldur því að bónuskerfið er ekki að skila þeim ávinningi sem aðilar voru sammála um að það ætti að geta skilað.

Verkalýðsfélag Akraness hefur haldið áfram að bera saman kjör starfsmanna Reykjavíkurborgar sem vinna eftir nýgerðum  kjarasamningi Eflingar og starfsmanna Akraneskaupstaðar en þeir vinna eftir kjarasamningi Launanefndar sveitafélaga.

Það er verulega sláandi þegar rýnt er í samanburð á launatöxtum þessara tveggja sveitafélaga, en í þessum samanburði er um að ræða mjög sambærileg störf.  Hér á heimsíðunni var bent á launamun almennra verkamanna og skólaliða og var launamunurinn hjá verkamönnum 9.2% og skólaliðum 12.5%

Verkalýðsfélag Akraness hefur nú borið saman launamun þeirra starfsmanna sem starfa við heimaþjónustu, flokkstjórn við bæjarframkvæmdir, Matráð (yfirmaður) og ræstingu.  Launamunurinn milli starfsmanna Akraneskaupstaðar og Reykjavíkurborgar fyrir áðurnefnd störf er eftirfarandi:

Heimaþjónusta I Rvk. 136.599 Akrn 109.355 mism 24.9%

Heimaþjónusta II Rvk. 147.177 Akrn 130.748 mism 12.5%

Heimaþjónusta III Rvk. 156.208 Akrn 134.700 mism 16%

Verkamaður(flokkstjóri) Rvk 163.344 Akrn 128.816 mism 26%

Matráður(yfirmaður) Rvk 163.344 Akrn 151.738 mism 7.6%

Aðstoðarmaður í eldhúsi Rvk 119.485 Akrn 107.740 mism 11%

Ræsting Rvk 117.720 Akrn 107.740 mism 9.2 %

Eins og sést á þessari samantekt á launkjörum starfmanna Akraneskaupstaðar og Reykjavíkurborgar er verulegur launamunur sem Verkalýðsfélag Akraness á verulega erfitt með að sætta sig við og vart hægt að láta átölulaust.

Félagið bíður eftir viðbrögðum bæjarráðs vegna bréfs sem félagið sendi inn þar sem óskað var eftir viðbrögðum bæjaryfirvalda á þeim mikla launamun sem orðin er á milli Reykjavíkurborgar og Akraneskaupstaðar.  Erindi félagsins var tekið fyrir á bæjarráðsfundi í gær. 

Formaður Eflingar Sigurður Bessason hefur hælt Steinunni Valdísi borgarstjóra í hástert  fyrir það að hækka laun þeirra sem hafa lægstu launin og undir það tekur formaður Verkalýðsfélags Akraness.  Mættu önnur sveitafélög fara að fordæmi Reykjavíkurborgar, hvað það varðar.