Afar fróðlegur og gagnlegur félagsfundur um öryggis og heilbrigðismál í stóriðjum  var haldinn í gær í sal félagsins að Kirkjubraut 40.  Júlíus K Björnsson sálfræðingur fjallaði um vaktavinnu, svefn og heilsu og áhrif  óreglulegs vinnutíma á heilbrigði og lífsgæði.  Erindið frá Júlíusi var afar fróðlegt og gagnlegt og vöknuðu fjölmargar spurningar hjá fundarmönnum sem sálfræðingurinn svarði eftir bestu getu.  Hallveig Skúladóttir hjúkrunarfræðingur fór yfir gögn sem Reynir Þorsteinsson læknir hafði tekið saman um heilsufar í stóriðjum.  Í þessari samtekt frá Reyni kom t.b fram að meðalaldur í Íslenska járnblendinu er 44 ár og meðalstarfsalur 14 ár sem er mjög hátt.  Hjá Norðuráli er meðalaldur 39 ár og meðalstarfsaldur 4,5 ár en Norðurál byrjaði með sína starfsemi 1998.  Einnig kom fram í gögnum frá Reyni Þorsteinssyni að reykingar í Íslenska járnblendinu hefðu minkað um 20% frá árinu 1990 en þá reyktu um helmingur starfmanna.   Árið 2003 var sú tala komin niðrí 30% og hefur lækkað enn meira síðan þá.  Hjá Norðuráli hefur reykingarfólki fækkað alverulega og nú reykja aðeins 20% starfsmanna samkvæmt gögnum Reynis Þorsteinssonar.  Það kom fram í máli Hallveigar að læknar á heilsugæslustöðinni á Akranesi hafa stýrt starfsmannaheilsuvernd í Íj frá árinu 1981 og hjá Norðuráli frá árinu 2000. 

Stóriðjudeild Verkalýðsfélags Akraness heldur fund á mánudaginn kemur um öryggismál og heilbrigðismál í stóriðjum.  Einnig kemur Júlíus K. Björnsson sálfræðingur og fjallar um vaktavinnu,svefn og heilsu og áhrif óreglulegs vinnutíma á heilbrigði og lífgæði.  Reynir Þorsteinsson yfirlæknir hefur tekið saman punkta um heilsufar starfsmanna sem starfa í stóriðjum á Vesturlandi, og mun Hallveig Skúladóttir hjúkrunarfræðingur fara yfir þessa samantekt frá Reyni Þorsteinssyni lækni.  Fundurinn hefst kl. 20:00 og er haldinn að Kirkjubraut 40 þriðju hæð.  Dagskrá fundarins er eftirfarandi:

Verkalýðsfélag Akraness

Stóriðjudeild

FUNDUR

Stóriðjudeild Verkalýðsfélags Akraness heldur opinn fund mánudaginn 14. nóvember 2005 kl. 20:00 að Kirkjubraut 40, 3. hæð.

Dagskrá fundarins:

1.     Öryggis- og heilbrigðismál í stóriðjunum.  Öryggisfulltrúar frá Norðuráli, Íslenska járnblendifélaginu og Sementsverksmiðjunni gera grein fyrir öryggismálum í verksmiðjunum.

2.     Fulltrúi frá Heilsugæslustöðinni á Akranesi fjallar um heilbrigðismál í verksmiðjunum.

3.     Júlíus K. Björnsson sálfræðingur fjallar um vaktavinnu, svefn og heilsu – áhrif óreglulegs vinnutíma á heilbrigði og lífsgæði.

4.     Önnur mál.

Félagsmenn eru eindregið hvattir til að mæta – fundurinn er einnig opinn öllum starfsmönnum stóriðjanna.

Formaður félagsins og trúnaðarmaður starfsmanna Klafa munu funda með forsvarsmönnum fyrirtækisins á morgun.  Tilefni fundarins er að fara yfir nýja bónuskerfið sem tekið var upp samhliða nýjum kjarasamningi sem undirritaður var í sumar.  Það eru atriði í bónusnum sem stéttarfélagið og trúnaðarmaður Klafa vilja fara yfir með forsvarsvarsmönnum fyrirtækisins.  Einnig vill stéttarfélagið ræða um  síðustu úttekt á þrifabónusnum.   En starfsmenn eru ekki á eitt sáttir við nokkur atriði sem leiddu til lækkunar á þrifabónusnum í síðustu úttekt, og fljótt á litið getur Verkalýðsfélag Akraness tekið undir þessa óánægju starfsmanna.     

Ístak hf. hefur fengið atvinnuleyfi fyrir pólverjana 14 sem starfað hafa án atvinnuleyfa á Grundartanga á vegum starfsmannaleigunnar 2B.  Vinnumálastofnun samþykkti atvinnuleyfin frá sér dag.  Því er það orðið ljóst að pólverjarnir 14 eru ekki lengur að starfa hér á landi á vegum starfsmannaleigunnar 2b.  Ístak og Verkalýðsfélag Akraness hafa í sameiningu unnið að því finna farsæla lausn á málefnum pólsku starfsmannanna og hefur það nú loksins tekist.  Þessi leið sem nú er farinn er sú sama og þegar Verkalýðsfélag Akraness leysti mál pólverjanna 5 sem starfa hjá Spútnik bátum á Akranesi.  Verkalýðsfélag Akraness fagnar innilega því að farsæl lausn hefur fundist á þessari deilu og ljóst að sú mikla óvissa sem pólsku starfsmennirnir hafa búið við að undanförnu hefur verið eytt með þessu samkomulagi.  Einnig er það mat félagsins að hagsmunum og starfsöryggi pólsku starfsmannanna séu mun betur tryggðir nú eftir að þeir urðu launþegar hjá Ístaki.  Eins og marg oft hefur komið fram kærði Verkalýðsfélag Akraness og Félag iðn og tæknigreina meint lögbrot starfsmannaleigunnar 2B til Sýslumannsins í Borgarnesi, nú hafa félögin hins vegar ákveðið að falla frá kærunni þar sem farsæl lausn er komin í málinu. 

Eins og fram hefur komið á heimasíðu félagsins þá óskuðu forsvarsmenn Norðuráls eftir að funda með Verkalýðsfélagi Akraness og öðrum félögum sem eiga aðild að kjarasamningi Norðuráls.  Forsvarsmenn Norðuráls vildu upplýsa stéttarfélögin um að fyrirtækið krefjist þess að verktakar sem vinni að stækkun álversins fylgi í einu og öllu lögum og reglum sem gilda á íslenskum vinnumarkaði, enda komi þessi krafa skýrt fram í samningum Norðuráls við verktaka sína. Á fundinum kom fram að Norðurál líti það mjög alvarlegum augum ef þeir verktakar sem vinna við stækkun álversins fylgi ekki þessum samningum. Norðurál gaf jafnframt út þá yfirlýsingu að þeir muni, að gefnu tilefni, afla frekari gagna hjá verktökum sínum um þá erlendu starfsmenn sem vinni að stækkun álversins. Formenn stéttarfélaganna og forsvarsmenn Norðuráls munu funda aftur fljótlega til að fara betur yfir málin. 

Verkalýðsfélag Akraness vill taka ofan af fyrir forsvarsmönnum Norðuráls í þessu máli og skorar á aðra vinnuveitendur að taka þá sér til fyrirmyndar í þessu efni.  

Rétt í þessu var að ljúka fundi Verkalýðsfélags Akraness með forsvarsmönnum Ístaks.  Tilefni fundarins var að fara yfir málefni pólsku starfsmannanna sem hingað komu til starfa í gegnum starfsmannaleiguna 2b og starfa hjá Ístaki á Grundartanga.  Fundur var afar gagnlegur og einnig ánægjulegur.  Málefni pólsku starfsmannanna er í góðum farvegi og er allt útlit að þeirri óvissu sem ríkt hefur um pólsku starfsmennina muni fá farsælan endi strax á mánudag eða þriðjudag.  En stéttarfélagið vinnur að lausn málsins í fullri samvinnu við forsvarsmenn Ístaks.  

Forsvarsmenn Norðuráls hafa boðað Verkalýðsfélag Akraness og þau stéttarfélög sem eiga aðild að kjarasamningi við Norðurál til fundar á  morgun.  Það er hinn nýi starfsmannastjóri Norðuráls  Rakel Heiðmarsdóttir sem boðar til fundarins.  Eitt af þeim málum sem  forsvarsmenn Norðuráls vilja ræða um er um þá erlendu starfsmenn sem eru að vinna við stækkun Norðuráls hjá hinum ýmsu verktökum á Grundartangasvæðinu.  Forsvarsmenn Norðuráls vilja fara yfir málið með stéttarfélögunum því þeir vilja og gera kröfu um að þeir verkatakar sem starfa við stækkun Norðuráls fari í hvívetna eftir lögum og þeim leikreglum sem gilda á íslenskum vinnumarkaði.  Og einnig að hinum erlendu starfsmönnum sem starfa við stækkun Norðuráls séu greidd laun eftir íslenskum kjarasamningum.   Verkalýðsfélag Akraness fagnar þessari afstöðu Norðuráls innilega.   þessi afstaða  hjálpar stéttarfélaginu klárlega við að koma í veg fyrir að einstaka verktakar og fyrirtæki komist upp með fara ekki eftir þeim leikreglum sem gilda á íslenskum vinnumarkaði. 

Borist hefur yfirlýsing frá Gissuri Péturssyni forstjóra Vinnumálastofnunar um túlkun og framkvæmd laga um atvinnuréttindi útlendinga. Þar með er staðfest af hálfu Vinnumálastastofnunar að þeir starfsmenn starfsmannaleigunnar 2B sem starfa hér á grundvelli þjónustusamninga eru ólöglegir. Nú er liðin rúm vika  síðan Verkalýðsfélag Akraness og Félag-iðn og tæknigreina fóru með kæru til sýslumannsins í Borgarnesi vegna ólöglegs vinnuafls 2B sem starfar við stækkun Norðuráls á Grundartanga.  Því miður virðist lítið gerast þótt afstaða Vinnumálastofnunar sé hvell skýr í þessu máli.

Yfirlýsing Gissurar er svohljóðandi:

Frá Vinnumálastofnun um túlkun laga um atvinnuréttindi.

Með vísan til fyrirspurnar Alþýðusambands Íslands skal það upplýst að Vinnumálastofnun túlkar og framkvæmir lög um atvinnuréttindi útlendinga nr. 97/2002 á þann veg að fyrirtæki með staðfestu á Íslandi, sem óskar eftir erlendu vinnuafli frá hinum nýju ríkum Evrópusambandsins eða ríkjum sem standa utan EES verður að sækja um atvinnuleyfi sbr. lög 97/2002 og dvalarleyfi sbr. lög um útlendinga nr. 96/2002.  Breytir þá engu hvort fyrirtækið er starfsmannaleiga eða stundar annars konar starfsemi.  

Virðingarfyllst,

Gissur Pétursson forstjóri

Verkalýðsfélag Akraness ásamt fulltrúa ASÍ funduðu með pólsku starfsmönnunum sem hingað komu til starfa í gegnum starfsmannaleiguna 2b.  Umræddir starfsmenn eru að störfum hjá Ístaki og Fagsmíði við stækkun Norðuráls að Grundartanga.  Fundurinn var haldinn að Arnarholti á Kjalarnesi en þar gista pólsku starfsmennirnir.  Þessi fundur var haldinn að ósk pólsku starfsmannanna sjálfra.  Þegar fundurinn átti að hefjast kom eigandi starfsmannaleigunnar 2b og óskaði eftir að fá að sitja fundinn þar sem um starfsmenn 2b væri um að ræða.  Verkalýðsfélag Akraness og fulltrúi ASÍ mótmæltu þessu algerlega og sögðu að fundurinn yrði marklaus ef eigandi 2b myndi sitja fundinn.  Varð það að samkomulagi að starfsmennirnir sjálfir myndu ákveða hvort eigandi 2b  yrði með á  fundinn eða ekki.  Með stéttarfélaginu var pólskur túlkur og bað hún þá starfsmenn sem vildu að eigandi starfsmannaleigunnar 2b yfirgæfi fundinn, að rétta upp hönd.   Allir pólsku starfsmennirnir réttu upp hönd.  Að því loknu yfirgaf eigandi starfsmannaleigunnar fundinn.

Því næst var farið yfir stöðuna með pólsku starfsmönnunum eins og hún er þessa stundina.  Ekki fór á milli mála að pólsku starfsmennirnir eru verulega uggandi um sinn hag og hafa miklar áhyggur af framvindu mála.  Á fundinum afhentu starfsmennirnir tímaskriftir vegna vinnu sinnar frá því þeir komu hingað til lands.  Einnig upplýstu starfsmennirnir hversu mikið þeir hafa fengið greitt frá því þeir hófu störf hjá starfsmannaleigunni 2b.  Kom fram hjá tveimur starfsmönnunum að þeir byrjuðu að starfa hjá starfsmannaleigunni 2b 8 september og hafi einungis fengið 95 þúsund krónur útborgað og engan launaseðil fengið né séð.   Í dag verður farið ítarlega yfir þessi gögn ásamt því að frekari gagna verður aflað.

Fyrirtækjasamningur við Fang ehf. var samþykktur með öllum greiddum atkvæðum og virðist starfsmenn vera mjög ánægðir með samning ef marka má kosningu um samning.  En á kjörskrá voru 13 starfsmenn og 10 starfsmenn kusu eða 77%.  Já sögðu 10 starfsmenn eða 100%

Verkalýðsfélag Akraness vill enn og aftur þakka trúnaðarmanni Fangs sem og öllum starfsmönnum fyrir aðstoðina við gerð þessa samnings sem er heilt yfir mjög góður fyrir starfsmenn Fangs.